قصة مناحي وشلتة الطيبه *_*ومعاناة ابوه ×_×
بسم الله
السلام عليكم
الفكرة : جمعة جيران الحي وهم خمس عوائل
من حضر وبادية
وكلها تدور حول الأبناء
وطرق تربيتهم
ومدى تأثرهم بالحضارة
الشخصيات:
ابو بندر:صاحب المنزل( من الجنوب)
ابو مناحي : المتأخر وصاحب القصة (من البادية)
ابو احمد : احد الجيران المدللين لأولادهم( من الحضر)
ابو رامي: احد الجيران المهمل لأولاده( اسمر البشرة)
ابو عبدالله : احد الجيران الملتزمين ويحرص على ابنائه حرصاً شديداً
الشخصيات الفرعية :
مناحي: ابن تعب لوالده من كونه ابن لمدة 18 سنة ورشح نفسه انه يكون منصب الأب وقام بحمل حملة تؤيد اسقاط الحكم الابوي >>>>>>>حبيبي
بندر : ولد لاهي بالأنترنت والمغازله والشلة والسيارات والسهر ولايهمة شي دايماً على قولتهم فاصل الريوس
الا ان كان على مزاجة ومسوي حضري
أحمد : تخرج من الثانوية بالدف يالله يالله طلع وبتقدير مقبول ولا يبي يكمل دراسته >>>>هذا اذا قبله احد
مدلل مغرور شايف حاله من شكله بندر
رامي : مشكلجي نمبر ون يحب المضاربات كحب الشجرة للماء وعليه دخلات غلط
عبدالله : ولد ونعم فيه ملتزم حافض القرآن ومشترك بالتوعية الأسلامية والنوادي الرياضية محب لوطنه
القصة:
الفصل الأول :
ابو بندر عائد من الصلاة قائلاً : يارب انك تغفرلنا وترحمنا يالعيال حضرتوا القهوه الرجال بيوصلون , بندر بندر يابندر ياولد وينك الله يهديه الولد هذا يا أنه على الكمبيوتر يا انه نايم ويا انه برى
بندر: هاه هاه يا أبويه وشتبغى >>>>>عجيييييييب والله
ابو بندر : وراني ازهمك ماترد مع اني متأكد انك تسمعني وانا اخبرت ان في يوم من الأيام زهم علي مافزيت فز والى نطيت نط
بندر : علينا ياهوه (بصوت منخفض) يا ابويه الزمن تغير ابي أسألك
كان عندكم انترنت او كمبيوتر ؟
ابو بندر : لا لكن ……. وقاطعه بندر
بندر : طيب كان عندك اب حليوه زيك متفهم ومتعلم ومعيشك عيشة مايحلم فيها احد؟
ابو بندر : كل هذي اشياء بسيطة ( بتكبر )
الجرس يرن
صوت ابو احمد: ابو بندر- يا ابو بندر يامعزبنا السلام عليكم
ابو بندر : مرحباً مليون وعليكم السلام والرحمة على عوايدك ماشالله عليك في نفس الوقت الي تقوله تجي فيه
ابو احمد: الله يسلمك انا ما احب اني اعزم احد وأخلف الوقت
مو زي بعض الناس اعامل الغير زي مايعاملوني
ابو بندر: تعجبني قسم بالله ونعم فيك
ابو احمد: ماعليك زود ( يقاطعهم صوت ابو رامي)
ابو رامي داخل وهو يغني قائلاً: سلام سلام ياجماعة يأهل الكرم والشجاعة سلاااام عليهم
ابو بندر: ورى ماتخلي الحركات هذي وعليكم السلام مرحباً مليون
ابو احمد : مرة تانيه لاتتحدى من يوصل اول وعليكم السلام
ابو رامي: اما في هذي معك حق واعترف انك غلبتني
على فكرة يا أبو بندر كم عندك سهم في شركة الكهرباء؟
ابو بندر: وش هذا السؤال الي ماله داعي والله يا أبو رامي انك تطلع طلعات ما يطلعا الفي اكس ار
ابو رامي: اشوفك منور الحارة كلها قلت امكن تبغى تفيد الشركة حتى ولو كان على حساب نفسك
ابو احمد: والله صحيح تقول ان عندك زواج والى عشان ربي انعم عليك تقوم تبذر والموية سوة حفلة في الحارة البزارين صارو ا يلعبون فيها يفكرونها مطر
ابو بندر : خلاص الله يخارجنا منكم ما تكودون تشوفون زلة منا وتبهذلونا فيها انا عارف اني غلطان بس الله لا يواخذنا
ابو رامي مقاطعاً : وبما فعل السفهاء منا
ابو بندر: يعني انا سفيه
ابو رامي: لا ياشيخ اقصد البزران والخدامات كمان احنا علينا غلط والسكوت والساكت عن الحق شيطاناً اخرس
ابو احمد : الى اقلك انت واياه فكونا من هرجكم الفاضي هذا وقلولي وين ابو مناحي ماشفته صلى معنا ولاشي وتأخر عسى ماشر انشالله ( يقاطعهم صوت ابو مناحي)
ابو مناحي: ياولد يا أهل البيت ابو بندر يا ابو بندر
ابو بندر: مرحباٍ الف
ابو مناحي : الله يبقيك السلام عليكم
ابو بندر والحاضرين : وعليكم السلام والرحمة
ابو بندر: وينك ياأخي تأخرت علينا
ابو مناحي: اسكتو والله ياجماعة اليوم صار معي قصة ولا قصص مية ليلة
ابو رامي : انا اعرف انها الف ليلة وين وديت التسمية الباقية
ابو مناحي: سطرتها في ضهر مناحي
ابو بندر : ليش عسى ماشر
ابو مناحي : وش اقلكم ياجماعة شي ينقال وشي ما ينقال
ابو احمد : اقلك اختصر تراك شوقتنا
ابو مناحي : القصة وما فيها ياطوال العمر اني جيت من صلاة العصر والا….. (دخل ابو عبدالله مسلماًً)
ابو بندر : اسمع يا ابو عبدالله قصة ابو مناحي وبعدين نشوف ليش تأخرت >>>>>مسكين بيكتبونه تعاهد سرنافي مدرسة
قصة ابو مناحي معى ولدة مناحي :
خش ابو مناحي وشاف البيت معفوووووس عفس المراكي مرماة في كل جهة والورعان يبكون وشاف صورة غريبه الصورة فيها صورة مناحي ولدة لابس ثوب وكاتب ورى ظهره انتخبو الدكتور المهندس مناحي صوتك يسمعه الله اذا لم تسمعه الغير وما خبرت ان مناحي تخرج من اول ثانوي الى بتقدير مقبول وزين اذا ماعاد دور
ابو مناحي: يامناحي مناحي ياورع علام الدنيا معفوسة
مناحي : والله شوف …….. صراحة……. اقلك اجلس ابي اقلك كلام ولازم تتفهمه زين حنا زي ماتعرف يبه في سنة2005 والدنيا تغيرة 180 درجة تتطور الاحكام والدركتولية>>>يقصد الدكتاتورية اسقطوها وجا بدالها الديموخراطية المعاصرة >>>>يقصد الديموقراطية
ابو مناحي مقاطعاً : ابك انت وشتقول والله مافهمت شي من الي قلته
مناحي : الزبدة ومافيها والله اني تعبت 18 سنة وانا اشتغل ولدك وابغى اترقى وقررت أصير ابوك وانت ولدي
ابو مناحي: ابك انت وشتقول والله انك مريض والى شارب لك شي ياحليلك والله اني ون يوم شفتك لابس جنز وفوق راسك طاقية ولابس شبشب حمام >>>الله يكرمكم
اني عرفت انك مريض
مناحي: انا صاحي واصحى منك وانا خلاص فزت بالأغلبية وشف اليوم قناة ……. وتشوف
ابو مناحي: الى خلك من القنوات الكذب حقتك
مناحي : وش هو الصدق اجل
ابو مناحي: تعال اعلمك الصدق تعرف اشارة النسيم خلها على شمالك( وبدا يضرب مناحي)
ويفك نفسه مناحي : وش دخل اشارة النسيم
ابو مناحي : يقولون ان عندها مستوصوف زين روح كمل حملتك هناك (وكمل ضرب)
ابو مناحي : هذي قصتي
ابو رامي والحضور: معقولة
ابو عبدالله: والله ماهو منه من القنوات الفضائيه الي تبث سمومها في عيالنا
ابو رامي : ايه والله انك صادق مع اني كل ماعصبت على رامي انضرب كل يوم يقلد المصارع الفلاني في عيال الحارة حتى الخدامة قام يقلد فيها المصارعة وشردة
ابو احمد: لاتشكيلي عشان لا أبكي ياشيخ خلينا ساكتين احسن كلنا في الهوا سوا انا ولدي احمد قعد في تالتة تنوي تلاته سنين ماتخرج الى بالواسطة وماقبله احد وهذا كله من القنوات والبرامج البايخة تصدقون انه قبل يومين يقول انه يبغى يشترك في ستار ماركة
ابو عبدالله : والله شي طيب انه يشتغل
ابو احمد: عجييييييب يالمطوع وانا اقول انك انت القدوة فينا واحسن واحد فينا تبغاني اخلي ولدي يشترك في هذا البرنامج الي كلة مسخرة واختلاط وقلة حياء
ابو عبدالله : الله يهديك انت تقصد استار اكاديمي وانا على بالي اسواق النجمة
ابو احمد : انا قلت استار ماركة او استار اكاديمي
الجميع: ستار ماركة
ابو احمد : اعذرني يا أبو عبدالله أعذروني ياجماعة من زعلي لخبطة الله يلخبط الي لخبطني , يقدر الي لخبطة لخبطكم يلخبط لخبطة لخبطتنا , اتحدى واحد يقولها عشر مرات
الجميع : ههههههههههههههه
ابو عبدالله : كل هذا منا جبنا القنوات الي مالها داعي وفلتنعا عيالنا عليها
ابو بندر: يعني مانشوف اخبار العالم وش الي صار
ابو رامي : علينا ياهوه
ابو بندر : لاتدقق
ابو عبدالله: ان كان ولابد فسوو رقابة عليهم
ابو احمد : والله صعبة نقعد نراقبهم وعندنا اشغال
ابو عبدالله: لابارك الله في الي يشغلك عن عيالك
الفصل الثاني:
يلتقي مناحي وبندر ورامي واحمد
بندر : يلامات يامناحي وشبك مفقع وجهك
مناحي: والله والله طحت ايه طحت من على السلم
أحمد : علينا ياهوه الا ابوك فقع في وجهك
مناحي : كذااااب كذااااب اصلاً مايقدر >>>>> ايه هين
رامي : كذاب هاه والله انو ابوك الي مسوي في وجهك مضارب البادية شف وجهك تقول واحد مطعس علية
مناحي : والله ……..والله ….هذا في سبيل الحرية الديموخراطية
بندر: وشهي الديموخراطية
مناحي: هذا دليل انك متخلف ماتتابع التلفزين >>>>>>ايه متخلف وهو عنده كمبيوتر وتلفزيون
رامي : ديموخراطية ماتعرف وينها يا احمد
احمد : لا والله
رامي : شف تعرف اشارة البلدية خلها على يسارك وطول بتشوف المطار قدامك اعط المغسلة ثوبك خلها تكوية والبسة واشتر من المحطة شريط بلايستيشن وبعد ماتقفل البنوك خذ الدواء حقك قبل ماتنام مو بعد والحمدلله الولد طيب بس الجربوع ماسلم ……..حتى انا ما أعرف >>>>>هذي احدى الخشات الغلط
بندر : لاتكون تقصد الديمو قراطية
مناحي : ايوووووه هذي هي الديموقراطية
أحمد: اختصرلنا ياواد
وبدأو يتشاورون فيما بينهم حتى
وقال مناحي: لكن والله اني محقق الديموقراطيه حتى لو كان من منكم معي ومن ضدي
الجميع : كلنا معك ماورانا شي
مناحي : اجل لاقوني في الأستراحة
يتبع
مشاركة: قصة مناحي وشلتة الطيبه *_*ومعاناة ابوه ×_×
الفصل الثالث:
مناحي : حياكم الله يالأرهابيين
الجميع : الله يبقيك
بندر : الى اقول وش قصة الأرهابيين
مناحي : كلمة ارهابي تطلق على من له هيبة في مجتمعه
أحمد : بس الأرهابيين والأرهاب حاجة مو كويسة
مناحي : من قالك هذا الكلام هاه من قال
احمد : سمعة في التلفزيون
مناحي : لاتتابع هذي القنوات تابع القنوات الصادقة زي : وبدا يشوشر بأذنة
رامي : في احد طلعاته الفلسفية : الى ياشيخ ماقد جربت وشربت سجارة بالحمامات الي في المدرسة وعلى الريق ترى احسن شي انك تلعب هجوم وماتخلي احد يتكلم وانت جالس واهم شي الأخلاق
بندر : الله يخارجنا منك يارامي والله لو انتضرناك تفهمنا مافهمتنا ,قلنا يامناحي الزبدة وش في راسك
مناحي : والله الكفار هذي الأيام كثرو ولازم نوقفهم عند حدهم
أحمد : طيب كيف تعرف الكافر من المسل
مناحي: اسأل من له علم مثلي>>>>>>>ياحبيبي
رامي: واذا سألناك وما احد رد على التلفون وش نسوي بالخبز الزايد
بندر : طيب انا بأسألك لي ولد عم ذاك اليوم كان مستعجل يبغى يلحق صلاة المغرب وقطع الأشارة
مناحي : هل قفطة المرور
بندر : لا
مناحي: اذا فقد كفر كفراً بواحاً وهذا اخر كلام
بندر: اخسسسسسسسس والله منت بهين
رامي : وانا بعد عندي سؤال
مناحي : تفضل يا أخي ( باللغة العربية الفصحى)
رامي : واحد باع لي برتقال ورحت البيت آكل منه لقيته حامض
مناحي : هل كان لونه برتقالياً ام بمبا ؟
رامي : برتقالي
مناحي : اذا فقد اشرك شرك اصغر مخرج من المله
احمد: وانا ابسألك
مناحي : أيه سؤال بس مو لغز
احمد : طيب قطار يمشي بسرعة 150ميلو جرام وبينه وبين المدينة الأخرى 250كيلو فهرنهايت
كم حرارة درجة غليان الماء عند طبقة الأوزون
مناحي : من قالك هذا السؤال ؟
احمد : مدرس الرياضيات
مناحي : اذا مدرس الرياضيات كافر الذي يليه لايوجد اسئلة
الجميع : ايه لايوجد
مناحي : اذاً هيا بنا الى المعمل
الفصل الرابع والأخير
مناحي والشلة في المعمل في طرف الأستراحة
كيف انقلبو 180درجة ومن السبب
مناحي : درسنا اليوم عن كيفية تحديد الكافر من المسلم واسهل واسرع طريقة لتفجيرة
القاعدة الأولى : اذاكان طوله اكثر من180ويكون اما ابيض البشرة او اسمر البشرة
رامي : يالله :afraid: يعني ابوي كافر وانا اقول وره يتكلم انجليزي
القاعدة الثانية : اذا كانت عيونه ملونه بغير اللون البني او الاسود
أحمد: قل قسم والله عمي لون عيونه زرق
مناحي : مافي مجال كااااافر
احمد : اذا توسطناله
مناحي : وقتها نشوف حل ثاني يخلية مايخرج عن الملة
بندر : طيب عرفنا كيف نحدد طيب كيف نفجرة
مناحي : ايوه تعجبني يالأرهابي بس يبغالنا واحد من خارج البلاد عشان يعلمنا
بندر : هذي سهلة انا خبير بالكمبيوتر ادور واحد بس فيه مشكلة
مناحي : وش هي
بندر : انه كافر
مناحي : لالا الكفار الي برى طيبين خاصتاً الي من ( وقاعد يغمزله)
المهم الشباب دبرو كل شي اللحين يخططون للعملية
الى وفجأة دخل عليهم عبدالله وكل واحد دس الي في ايدة وشردو الي جايبينه يساعدهم من برى
عبدالله : السلام عليكم
مناحي : وعليهم
عبدالله أيش الرد التافه هذا
مناحي : اقول اعقب لا اجي اطعس فوق بطنك
عبدالله : الله يهديكم وش تسوون
الجميع ماعدا مناحي : ننفذ الديموقراطية
عبدالله : ايش
مناحي : اقول انت بالضبط وش تبي يالله اطلع منها
عبدالله فهم الموضوع شغل التلفزيون الى وفيه محاضرة للشيخ سعد البريك يفتي عن الأرهاب وحكمه
وبدأو يخرجون من الضلمات الى النور
وبدأ صدر مناحي ينشرح وذهبوا الى عبدالله واحتضنوه
وبهذا تنتهي القصة
ارجو من الله اني اسعدتكم وافدتكم
لكم خالص تحيتي
الهـ07ـاوي
مشاركة: قصة مناحي وشلتة الطيبه *_*ومعاناة ابوه ×_×
ماشاء الله عليك الهاوي
قصة جميلة أبدعت بها
وسالفة أبو مناحي أبو أحمد أبو رامي أبوبندر ( رهيبة :D )
والحديث اللي دار بين العيال روعه (( مناحي : حياكم الله يالأرهابيين)) :reporter: :biggthump
جميلة القصة أخوي وخصوصاً باللهجة العامية ضابطه صح .
أتمنى لك التوفيق ..
تحياتي
غالي الساهر
مشاركة: قصة مناحي وشلتة الطيبه *_*ومعاناة ابوه ×_×
