رحلــــــة العمــــــــرــر

الســـــلامـ عليــــكمـ ورحمـــــة اللـــــه


شحــــالكمـ ؟


هذه القصـــــة عجبتنـــــي فحبيـــــت أنـــزــزلهــــا لكمـ وان شاء الله تعجبكــــــمـ :biggthump

نبـــــدااا

..

:: .. الجـــزء الأول .. ::

ام محمد : انوار يمى روحي نادي ديمه وبعدين مع الكمبيوتر يعني ؟؟
انوار: يمى ماعليج منها لو صج تبي غدا جان شفتيها اول وحده قاعده معانا ..
ام محمد قعدت تتحلطم على هالبنت اللي ما همها غير الكمبيوتر ومطنشه الناس كلهم .. دخل بومحمد على صوت ام محمد ومعاه ديمه
ديمه : يمى ماله داعي اخر الفريج يسمعج تناديني !!
ام محمد : لا والله والغدى يبرد بطقاق ها ؟
ديمه : مو قصدي يمى بس كنت مندمجه اقرى قصه ويوم سمعت ابوي يناديني جيت معاه
ام محمد : وانا اناديج طول اليوم ما سمعتيني !!
ديمه تضحك يوم شافت امها معصببببببه حبت راسها ماتقدر على زعلها ابد
ديمه : وهذي حبه لاغلى ام في الدنيا
ام محمد : اقول اكلي يابنتي تراج شوي وتنقرضين !
ديمه : يمى اجل تبيني اصير دبه والناس تتطنز علي ؟
انوار : شفييييييييهم الدببه ان شاء الله ؟؟؟ مو تارسين عينج ؟
ام محمد : يابو محمد شوف بنتك خلها تاكل مثل الاوادم ترى حرام كل يوم اسوي الغدا وهي ما تجيسه
بومحمد : الحين قلبتوها هوشه وانا كنت مسويلكم مفاجأه بس خساره خربتوا على روحكم
محمد : يبىىىى عفيه قوووووووووووول شريتلي اكس بوكس اللي قلتلك عليها ؟
بومحمد يضحك لان محمد ماهمه الا الالعاب : لا شي يونسكم كلكم
انوار اول المهاجمين وشكلها عرفت تخطيط ابوها وغمزت له : يبا ترى الصيف مابقاله الا شهر ويخلص وانت ما سفرتنا شعندك !!
بومحمد التفت لها مستغرب من هالبنت اللي تقرى افكاره انوار مايطوف عليها شي ابد ابد وتموت وتعرف شنو اللي خاشين عليها طبعها فضوليه
بومحمد : احلى سفررررررره لاحلى عاااااااايله
ديمه : صججججججج يباااااااا بعد عمري والله كنت داريه ماراح يطوف هالصيف الا واحنا مسافرين
ام محمد : بس وين عاد ؟؟
بومحمد بلؤم : وين عاااااااد ما راح اقولكم الا اذا شفت ديمه ماكله اللي بصحنها كله
ديمه بصدمه : لالالالالالالا حرام يبى مااقدر ليش بتخرب رجيمي
بومحمد : لحظه انتِ من صجج يعني مسويه رجيم ؟؟؟؟؟؟؟ شبقى فييييييييييييج ارحمي هالعظام ترى بدون اكل ماراح تتحرك
انوار : هههههههههههههههههههه لا يبى هي ما تسوي رجيم بس تحافظ على نفسها يبااااا ماعليك منها قولي وين ناوي تودينا ؟
بومحمد : متى ما كلت اللي بصحنها قلت لكم
ام محمد : يلا يا ديمه لا تخربين علينناااااا اكلي يمى
انوار: ديمممممممممموووووه وجع اكلي اموت واعرف وين بنروح !!
محمد : ديمه ليش انتِ ما تحبيني انا ابي اسافر عشان استانس اكلي وفكيني
ديمه استغربت من هالهجوووووووم الغير متوقع وطالعت صحنها بحزن " يعني هذا كله بأكله اناااااااااا يمىى مستحيللللل "
واللؤم اشتغل ابوها ترس لها الصحن كله عيييييييش ودجااااااااااج وداقوس ووسلطه هي تطالع الصحن شوي وتبجي بس اهم شي اهلها يستانسون لازم تضحي !!!!

ديمه بدت تاكل وتمضغ الاكل بشكل اهي مو مستصيغته كلت لقمتين ودزت الصحن يعني اكتفت
بومحمد : نووووووو ويييي كله قدامي
ديمه : بس والله يبى ماقدر ماقدر معدتي بتنفجر يبا حرام عليك انا ماعودتها على هالاكل كله شوي شوي عليها
بومحمد : اجل مافي سفره ارتحتي ؟
ديمه : لالا يبى خلاص باكل امري لله
والمشكله ان العايله كلها بس قعدت تراقب ديمه وهي تاكل يبونها بسرعه تخلص يبون يعرفون ..
ديمه بابتسامه : الحمدلله خلصت
بومحمد : ههههههههههه صحنج ما يحتاج تنظيف ماشاء الله Iهذا كله بلاغه شفكم يالحريم
ديمه تطالع ابوها منقهره : مو هذا اللي تبونه
ام محمد : خلك منها يلا على وين ناوي تودينا ؟
شوي الا ادخلت مشاعل بالعرض عمرها ثلاث سنين ونص دخلت عليهم تبجي توها قاعده من النوم
انوار : يووووووووووه هذي شيسكتها اللحيييييين مو وقته
ام محمد : ههههههههههه شفيكم على بنتي
وتتلوى عليهاااااا وسكتت مشاعل اسمها الحقيقي لكن الدلع ميشووو خلاص راحت عليها ميشو ميشووو

بومحمد : على باريس ان شاء الله
انوار مستاااااااانسه : احلللللللللللف يبىىى
ام محمد : عيب عليج يعني بيقصج عليج فرضاً ؟
ديمه : بس يبىى ماراح نفهم شي ما يتكلمون انجليزي
بومحمد : ادري بس هناك بندبر لنا مترجم يكون مرشد سياحي لنا وباريس ما تتطوفّ..
محمد : يبى فيها اكس بوكس ؟ والعاب جديده ؟
ديمه : شتقوووووووووول انت فيها العاب ماوصلتلك لا لحين
انوار: ههههههههههههه أي والله اشوى يعني بشتري فستان عرس خالد ولد خالتي من هناك
ديمه : احسن شي اشتري للعيد من هناك
ام محمد : عاد متى العزم ان شاء الله ؟
بومحمد : خلاص حجزت الاسبوع الجاي يوم السبت
انوار : وناااااسه يابعد جبدي انت يعني بنلحق نستانس قبل المدارس
ديمه : الصراحه انا فقدت الامل قلت من كثر الشغل شكله بينسانا
بومحمد : شدعووه وانا بغرقه شغلي ادق على السفريات اشوف اذا في حجوزات ومرتب شغلكم هناك في احد ينسى اهله ؟ واذا على الشغل انا اشتغل لكم عشان اونسكم
ام محمد : الله يخليك لنا ذخر ..
انوار : ونااااااااااااسه الصراحه من اليوم بروح السوق بشتري لي ملابس حق الطلعه هناك
وراحت غرفتها بتشوف شنو ناقصها ..
وديمه بعد راحت لكمبيوترها تقرى قصص ومحمد راح يلعب بالفريج ..ويكمل معاهم الدوري كره قدم قبل لا يسافر الاسبوع الجاي

--------
انوار بغرفتها مع ديمه ومستانسه من هالسفره بس ديمه كانت معاها بالغرفه بس صكرت جهازها وراحت صوب البلكونه تشوف طيرها اللي ماتقدر تستغني عنه بقفص صغير بس موفرتله جميع سبل الراحه ..
انوار عمرها 17 سنه برابعه ثانوي .. وماصدقت على الله انها افتكت من الثانويه والحوسه .. فا كانت هالسفره متنفس وحيد لها قبل الجامعه ولجتها .. وطبيعتها فضوليه بس شفافه وقريبه حيل من ديمه .. بس شخصياتهم متنافره شو ي.. ودايما مع امهااا وتحب السوقه والحوسه وفوضويه نوعا ماا ..

اما ديمه عمرها 19 بثاني سنه جامعه وهااااديه وتحب تقعد بروحها ودايما تحب تقعد مع طيرها بس اذا دخلت البلكونه ماتحب أي مخلوق يقعد معاها لانها تسولف مع الطير .. وباعتقادها لو شافها أي مخلوق بيقول هذي عبيطه والا مجنونه .. واي انسان يزفها على طول تبجي وانسانه حنونه وتتصرف احيانا بطفوليه وعليها ابتسامه جذّابــه...... وتحب النت بشكل كبير بس عشان تدخل المنتدى وتقرى القصص وتحب القصص الرومانسيه القديمه ايام العصور الوسطى !!

ديمه قاعده بالبلكونه الا تطق عليها انوار
ديمه : ماراح افج شتبين ؟
انوار ورى الجامه : الله يخليج بسولف انطقت جبدي مع الملابس
كسرت خاطرها ودخلتها
انوار: اماااااانه شتسوين مع هالطير
ديمه : مالج دخل جم مره اقولج لا تدخلين بأشياء مولج
انوار : بس ديمه انتِ تقعدين معاه اكثر مني وتهتمين فيه اكثر مني ..
حزت بخاطر ديمه " معقوله انا مهمله اهلي لهدرجه ؟"
ديمه : بسسسسس انتِ ما تقعدين عشان اسولف معاج اما قرقه بالتلفون مع رفيجاتج والا ماسكتلي مجلات وتلفزيون أي اركدي عشان اسولف تعرفيني ماحب اختب حيل
انوار : يعني لو انا الكمبيوتر والا طيرج هالفوفو هذا جان قابلتينا اربع وعشرين ساعه بس لنا الله
ديمه : انزين خلي منج فوفو وقوليلي انتِ امانه بعرف اول مره تسافرين والا شنو ؟؟
انوار استوعبت انها طول اليوم مختبه ماتدري على شنو !! : هههههههههههههههههههه
ديمه : صج والله يعني شفيج اركدي شوي
انوار : لامو اول مره اسافر بس الصراحه كنت اتمنى اروح باريس .. تدرين يعني شنو هذي مدينه الاضواء والموضه ..
ديمه : أي موضه الله يهداج قصدج موضه الالالالا لبس
انوار : هههههههههههههههه أي هذي موضه جديده بينزلونها

دشت عليهم ميشوووو شوي وتكسر الباب من الدفاشه
ميشووو : ديمة عطينيييي طييييييير
ديمه : ماسمعت عيدي ؟؟؟؟؟؟؟؟؟؟؟
ميشووو : بثرررررررعه حمود قالي
ديمه : سلمي على حمودج قوليليه طيري انسوووووووه لو تموتون محد يمد ايده عليه
انوار بعبط : عادي ماراح يموت شوي ويردونه
ديمه عصبببببت لانهم ما يتكلمون عن أي شي هذا الطير له مكانه خاصه بقلب ديمه .. لانه له قصه طويله عريضه وتعتبره ذكرى لوتموت ماتفرط فيها ..
ديمه : برى انتوووووا الثنتين الظاهر عطيتكم وجه زياده عن اللزوم
انوار بعد ما تفشلت وباحباط : بطلع زين بس ترى بنروح السوق اليوم وبعدين بنمر بيت خالتي نوف
ديمه معصبه : اطلعي بس روحي جهزي لعمرج حشى عروس مو وحده مسافره
صكت باب البلكونه وقعدت مع الطير تقريبا ربع ساعه بس تشوفه وتتأمله تذكرت ذكريات ماكان ودها تتذكرها بالوقت هذا .. وبدت تنهل عليها الذكريات وحده ورى الثانيه لين شافت نفسها غرقانه بدموعها ..

"يااااااه والله العظيم اشتقت لك رحت وصارت دنيتي كلها فضى !! مت لكن ذكراك ما ماتت حيه بقلبي لين اموت .. كنت مستهينه بفكرتك يوم اهديتني طير .. ماكنت ادري ان هالطير بيضل اخر ذكرى لي منك .. الله يرحمك يارب يا اغلى عم بالدنيا "

مسحت دموعها ووعدت نفسها تكون قويه وهذي فرصه لها انها تنسى الماضي والسفر يمكن يغير من نفسيتها للأحسن ان شاء الله .. وتأملت خير .. وحاولت تسوي مثل اختها تستعد للسفره كثر ماتقدر.. طلعت من البلكونه وراحت لامها وامها كانت تلبس عباتها وخالصه بتروح السوق اعتذرت منها ديمه وقالت من باجر بروح معاكم بس اليوم تعبانه ماتقدر .. بس امها وصتها تخلي انوار تلبس بسرعه مالها خلق تتنقع بالسياره تنطرها .. راحت ديمه للصاله وانصدمت يوم شافت انوار تقشر حب وتسولف مع رفيجتها بالتلفون ..

ديمه : انواااااااااااااااااار امي تنطرج بالسياره تحت
انوار : زين زين بعدين بنزل
ديمه : ماراح تروحين معاها ؟
انوار : امبلا بس لحظه بعرف شسوت انفال مع بنت عمتها بالحفله
ديمه عصبببببببببت : شلون بتروحين وانتِ ما لبستي ولا شي وتقرقين بالتلفون ماتحسين بأمي انتِ؟
انوار تسمع الهرنات تحت : اوووووووه خليها تنطرشوي
ديمه وصلت حدها : صكي التلفووووووون
انوار : ماراح اصك وروحي عني
ديمه تسمع الهرنات تزيد واستفذت كل طاقتها الصبريه وشلعت الواير وبكل تشفي تطالع انوار
انوار بصــــدمه : صكيتيه ؟؟؟؟؟؟
ديمه : لين تتسنعين وتخلين عنج قله الادب ولي قالت لج امي شي تفزين من مكانج وتقولين ان شاء الله مو تقرقين مع فلانه وعلانه ..
انوار بقهــــــــــــــر : انتِ انسانه حقوده يعني عشاااااان ما عندج رفيجات خلالالالالالاص ماتبين احد يكلم رفيجاته ؟؟؟؟؟؟؟؟ والا عشان محد يحبج ؟؟؟؟؟؟؟
ديمه بصدمه تطالع انوار اختها تقول هالكلام !!
ديمه : انا ماعندي رفيجات يا انوار ؟
انوار ارتبكت وحست بكبر الكلام اللي قالته بس حاولت ماتبين ارتباكها
ديمه : اللحين انتِ اللي تقولين هالكلام ؟؟؟ ماتوقعتها منج !!
انوار نزلت عيونها بالارض لانها تدري انها اجرحت اختهااااا واختها مو ناقصه
بس سكوت انوار وتّر الجو اكثر .. ديمه بإنفعال ..
ديمه : تدرين انتِ انا لو ابي مليون وحده جان رافجت من زمان بس انا مابي احد بعد ساره خلاص خفت اصادق بنات من جديد ويختفون من حياتي انتِ عارفه بهالشي تجين تعايريني .؟؟؟؟؟؟؟؟


بنــــــــــت الأصــــــول

انوار طالعت بديمة واخيرا جمعت لها حرفين ودافعت عن نفسها
انوار : لانج قهرتيني اجل البنت تتكلم وانتِ تصكين بوجها ؟
ديمه : قلعتج رحتي مع امي والا مارحتي انا ليش اعور راسي معاج

وطلعت من الصاله وراحت غرفتها .. ومالقت غير الطير عشان تقوله باللي فيها ..

" آه الظاهر يافوفو مافي غيرك بهالدنيا يحبني .. يعني عمي احاول انساه وزين حاولت اطلع نفسي من دوامه الحزن يجون يذكروني بساره ............. انا شسويت كل ما احب احد راح من حياتي بدون سابق انذار .. ساره الوحيده اللي كنت احبها واعزها من بد كل رفيجاتي .. كانت كاتمه اسراري كانت ياااااه ليه بّـذكرعمري وانقهر زياده خلاص ربي اخذ امانته ... الله يرحمها ان شاء الله .. ياربي متى اروح مع عمي وساره ؟؟ دام اللي احبهم راحوا بروح معاهم "

انتبهت ديمه على عمرها انها تقول كلام غريب .. واستغفرت ربها وقالت اللهم لا اعتراض على قضاؤك ..

دخلت الاكل لفوفو ودشت غرفتها ..شافت الجهاز مفتوح .. واستغلت الفرصه .. دشت على المنتدى لانها مشرفه فيه .. بس لاحظت في كذا رساله جايتها على البريد حق المنتدى .. طبعا فتحت كذا وحده اللي يشكتي واللي يبي ينقل موضوعه الين وقفت عند رساله معينه لانها ماتخص قسمها .. واحد يبي يثبت موضوعه في قسم الرياضه والسيارات لان في دوري بيصير في اوربا ومن ضمن المنتخبات المنتخب الوطني .. وده ياخذ رأيها بالموضوع !!
" ياربي وانا شكوو بالكوره والمسخره هذي .. اللحين شايفني مشرفه قسم الخواطر شكو يدز لي عن قسم الرياضه .. افففف متى بيفتهمون الناس ؟؟؟ " ردت ارسلت له رساله انها مالها دخل بالكوره والرياضه لو يبي أي خدمه بقسمها كانت لبتها له واعتذرت بكل ادب وذوق .. وصكت المنتدى وفجت المسنجر واستانست يوم شافت مريم بنت خالتها شابكه .....
مرايم عبدالغني شربت : هلالالالالالالالاوغلالالالالالا بالطش والرش
ديمه : هلالالالالا فيج وينج انتِ ؟
مرايم عبدالغني شربت : لاتخربين المفاجأت .......
ديمه : لييييييييش شصاير ؟
مرايم عبدالغني شربت : بجييييييييج عقب المغرب
ديمه : احلفييييييييي وناااااااسه
مرايم عبدالغني شربت : احم احم بس مو لله
ديمه : والله العظيم مشتاقتلج لونج مسافره جان شفناج بس انتِ هنييييييييه بالكويت مالت عليج
مرايم عبدالغني شربت : ههههههههههههه سمعت ان الغلالالا بيسافر باريس
ديمه : اهااااااااااااااااااا قولي جذي يعني مصالح جايتني
مرايم عبدالغني شربت : هههههههههههههه لا والله العظيم ابي اسلم عليج قبل لا تذلفين
ديمه : لا ريحي ملائكتج بتفتكين مني اسبوعين
مرايم عبدالغني شربت : والله وااااااااااااجد لاتطولون والله احس بفراااااااااااغ
ديمه : بندق عليج لا تحاتين .. وباخذ كاميرة فيديوا عشان اصورلج الهوتيكتور شتبين بعد ؟
مرايم عبدالغني شربت : بعد عمرررررررري انتِ .. لان تعرفين عرس اخوي خالد قرب وانا ماسويت شي المهم ماعلينا شخبار انواااااااروووووووو ؟؟؟؟؟
ديمه تضايقت يوم تذكرت موقفها مع انوار : تبينها دقي عليها
مرايم عبدالغني شربت : متهاوشين بعد ؟
ديمه : المهم متى بتجينا انتِ ؟
مرايم عبدالغني شربت : احلى يالطناش .. بجيكم بعد شوي اول ما يأذن المغرب بصلي وبجي
ديمه : حياج الله وجيبي رغووده معاج
مرايم عبدالغني شربت : اوكييي من عيووووووووني الثنتين
بعد اذان العشى وصلت ام محمد من السوق ومعاها اغراض ..واول ما شافت انوار قعدت تزف فيها ساعه كامله لانها نقعتها تحت .. وشوي الا طلعوا مريم ورغد بنات اختها مع ديمه من الغرفه وسلمت عليهم لانهم جايين من المغرب .. وقعدوا كلهم يسولفون عن مواضيع مختلفه ..

مرّ هالاسبوع والعايله اما تجهز اغراضها والا تتناقش عن السفره .. وجاء يوم السفره .. والبنات بقمه الوناسه .. واخيرا بنفتك من البيت .. كان السايق يسوق فيهم بالسياره الكبيره قدام بومحمد ورى محمد وميشوو وبالنص ام محمد وانوار وديمه .. ديمه طول اليوم ساكته وحاطه القفص الصغير بحظنها .. وتطالع الشوارع بهدوء وصمت .. عكس تمام انوار اللي قاعده عندها من طلعت بالبيت وهي تتصل بفلانه وعلانه مع انهم طالعين مبجر تقريبا الساعه 8 الصبح .. لان رحلتهم الساعه 9.30 والجناط رايحه من امس .. المطار ماكان زحمه .. شافوا قدامهم عائله وحده يودعون بعض .. وانوار تأشر عليهم

انوار : يمى شوفيهم يبجون على بعض المفروض يستانسون بيسافرون من بعد الكراف والدراسه
ام محمد : مو شرط اللي يسافر يستانس سياحه في ناس لدراسه في ناس يردون ديرتهم .. عبالج كل الناس مثلج ..
وبعد ماخلصوا اجراءات المطار ركبوا الطياره ..وكان كل واحد منهم شعوره اسعد من الثاني .. لانه هالسفره بتقربهم من بعض اكثر واكثر لانهم تقريبا بيصيرون 24 ساعه بوجيه بعض محد يطلع ويروح عن الثاني مثل البيت اللي عليه دوام واللي نايم لا السفره اكيد بيكون اكلهم كلهم مع بعض ونومتهم وقومتهم .. المشكله ان رحلتهم ترانزيت لندن .. بعدين باريس يعني ست ساعات وهم بالكراسي قاعدين والمشكله ان بالطياره حطوا انوار جنب ديمه .. وانوار منقهره تبي تسولف بس ديمه مو معطيتها اهميه ديمه سرحانه بالدريشه والغيوم اللي تحتها ..

بعد اربع ساعات .. بالطيـّاره

انوار توهقت تبي تحط فلم بس ماعرفت أي زرّ تضغط ..
انوار : ديمه قوليلي أي زرّ حق الافلام ؟
ديمه : افففففففف شدراني انا طقطقي لين تعرفين كل شي بنعلمج اياه
انوار : بسم الله شوي شوي انهديتي مره و حده
ديمه : انا بنام لا تقوميني الا لين نوصل
انوار : على العموم ترى بقى ساعتين ونوصل
ديمه : اتصدقين مليت من القعده تشنجت رجولي
انوار : انا كل ساعه اقص عليهم اقول بروح الحمام الله يكرمج وانا مناك اتمشى اخاف انشل من كثر القعده
ديمه ضحكت عليها : ههههههههههه واشوفج رايحه راده على بالج بالبلاجات
انوار : ابي اشوف لندن وخري عن الدريشه
ديمه : يماما تو الناس احنا بالبحر اللحين
انوار : ليش مانروح باريس على طول؟
ديمه ملت من كثرت اسئلتها : ابوي زين لقى حجز بهالوقت
انوار : شغلي لي الاف ام ابي اسمع اغاني أي شي
ديمه : خافي ربج اغاني وانتِ بين السماء والقاع
انوار : انزين قرآن مابي اقعد ساكته استخف
ديمه : ههههههههههه انزين بشغل لج سديس اسمعي واخشعي ونامي
انوار : الله عاااااد ارتاح لما اسمع صوته
ديمه : زين والله البنت فيها رجى
انوار : ههههههههههههههه تراني حيل طايحه من عينج
ديمه تضحك : لا شدعوه
انوار: ديمه بسألج اللحين احنا لي رحنا فرنسا شلون بنتفاهم معاهم ؟
ديمه : هذا اللي انا احاتيه بس اكيد فيه مترجمين
انوار : والله شكلنا بنتكلم معاهم سديق سديق مثل الهنود ههههههههههههههه
ديمه : هههههههههه مالت عليج لا افا عليج ماخذه انا كورسين فرنسي بس مشكله كله حروف وارقام والوان يعني ما ينفع محادثه
انوار : شكلنا بنبدع هناك
ديمه : صلي على النبي بس خلنا نوصل بالسلامه
بعد ما وصلوا مطار هيثروا .. قعدوا تقريبا اربع ساعات وشافوا من فوق الطياره شكثر لندن مرتبه وشكلها على النهر التايمز يجنن .. وشافوا الاراضي الخضراء .. والجوو البااااارد والشمس طالعه عندهم .. بعد ما خلصوا اجرائاتهم طلعوا على الطياره الفرنسيه وكانت مستواها عااااااادي جدا .. مافيها تلفزيونات ولا شي اللهم بتوصلهم فرنسا .. وبالطياره كانت ام محمد مع بومحمد ومحمد والبنات معاهم ميشوو
المضيف عطاهم شاي اهي وانوار بس ميشوو تمت تطالعه مستغربه شلون ما عبرها ولا عطاها شي .؟؟
وبعد ماراح المضيف .. شربوا البنات شايهم وردوا بياخذون غفوه لين يوصلون كلها ساعه .. الا ميشووو تنادي بأعلى صوتها زين ان الطياره فاضيه والا افضحتهم ..
ميشووو : تعـــــال لو سمحــــــــــت وين شااااااايي وحليبي ؟؟؟؟
التفت لها المضيف وابتسم .. عطاها اللي تبي بعد ما شرحت له ام محمد باللي تقدر عليه .. ديمه وانوار ماقدروا يبطلون عيونهم بس ضحكوا لين قالوا بس حتى الجاهل طلع لسانها !!

وبعد ما وصلوا فرنسا .. نزلوا وطبعا ديمه نزلت معاها القفص الصغير .. وقعدوا بالمطار ينطرون الجناط متى تنزل من الطياره .. بس الغريب ان معظم اللي شافوه من شرق اسيا .. وجايين معاهم جناط الدنيا والدين .. وكأنهم مهاجرين !! شوي وجات جناطهم وطلعوا برى .. يدورون تاكسي ولقوهم من البوابه الثانيه للمطار صافين طوابير شغالين .. وصولوا الساعه 8.30 باليل بس كانت حزتها توها بتغرب الشمس .. وتمشكل بو محمد مع راعي التاكسي .. وقعدوا ربع ساعه مايدرون شيسوون
ام محمد : منصور شفيك الله يهداك ؟
بومحمد : اللحين التاكسي ماراح يشلنا كلنا ممنوع عندهم كل سياره ما تشل اكثر من اربعه اشخاص
ام محمد : انزين ليش ترى كل سياره اكبر من الثانيه ؟؟
بومحمد : هذا نظامهم اللحين شلون ؟ بعطيج عنوان الفندق وانتِ روحي مع محمد وميشو وانا بروح مع ديمه وانوار ..
ام محمد : اخاف يضيع فيني
بومحمد : العنوان مسجل داخل هالورقه ماراح تضيعين ان شاء الله واحنا وراكم
ام محمد : شورك وهدايه الله يلا مشينا

وركبوا الجناط بالسيارتين .... وحركووا لين وصولوا الفندق .. بس الفندق مو مشهور بالمنطقه وقريب من المطار وبعيد عن باريس العاصمه حوالي ساعه ونص فا اللي صار انهم انزلوا والمشكله انه مو مثل اللي بالكاتلوج لا حتى خدمه سيرفس مافيه توهقوا .. وراحوا البنات وصولوا الجناط فوق الغرف .. والفندق كئيب وحسوا بضيقه من دخلوه .. شكله حق كابوي لان شافوا من ظلمت الدنيا بدى الخمر وبدوا يتجمعون الحبايب باللوبي .. فا صعدوا وحطوا روسوهم وناموا ..وبجذي انتهى اول يوم على ثاني يوم .. الكل مستاء من هالوضع مايبون هالفندق وتريقوا باللوبي الا ولقوا واحد تونسي على الرسبشن .. وبومحمد قعد يسأله عن المنطقه وعن باريس وفنادقها وقاله انه يبي ياخذ الاهل هناك .. ويبي مترجمه ترافقهم .. التونسي اسمه صابر .. اتصل بكذا مترجمه بس كانت عطلتهم لان اليوم كان الاحد ثاني يوم من وصلوا فا ما لقى الا اخته اتصل بأخته لطيفه ووصلت بعد ساعه نص تقريبا .. وتعرفوا عليها البنات وبدت الرحله اول يوم ديمه معاها كاميرا الفيديوا وانوار الفوتغرافيه .. وطبعا طول الطريق كان بومحمد ماسك محمد اللي عمره 12 سنه ويمشون قدامهم .. ولطيفه المترجمه مع البنات والام يمشون على مهلهم .. وقبل لا يوصلون المتروو .. (قطار تحت الارض ) شافوا سياره المزين طويييييييييله بيضاء لها اكثر من اربع ابواب تقريبا عشر ابواب .. وانزلت منها عروس شرق اسيويه ومع زوجها بس الغريب اللي خلا ام محمد وبناتها بنصدمون ان العروس بأخر شهور حملها !!ولابسه نفنوفها وطرحتها واهلها معاها واللي يجون يصورون معاها واللي يباركون لها .. واهي كانت بقمه السعاده .. وقعدت لطيفه توريهم العرس شلون يصير وقالت لهم لا تستغربون اصلا في بعض الاعراس اولاد المعاريس هم اللي يزفونهم .. شي طبيعي عندهم .. وقعد بو محمد يضحك

بومحمد : احلى عرس بعد اسبوع يكون عنده ولده جاهز.. شيبي اكثر !
ام محمد : اعوذ بالله يالله لا تبلانا ..
ديمه : يمى ترى اهم عادي عندهم لكل مجتمع عاداته ..
ام محمد منقهره : بس عين قويه مثلها ماشفت دامه خلاص حملت خلها تنطر لين تولد وبعدين تتزوج بعد شناقص ؟
انوار : ههههههههههه الحمدلله على نعمه الدين بس
ونزلوا المتروا .. واركبوه طبعا تحت الارض وكل شوي موقف عند محطه ويدخلون ناس ويطلعون .. طبعا من كل الجنسيات جنوب افريقيا وشرق اسيا وفرنسيين ومن كل بحار العالم ..

وبعد ما وصلوا شافوا ان المسافه بعيده من الفندق لين العاصمه .. وقرر بومحمد انه يدور هالمره على فندق داخل العاصمه عشان يكون قريب من السوق وبرج ايفل ..
بعد مده وفراره وهم يمشون لقولهم فندق بالشانزليزي .. واستانسوا اهم شي يفتكون من هذاك الفندق الكئيب .. وبومحمد خلا البنات و محمد مع ام محمد وراح مع انوار الفندق القديم وجاب اغراضهم بيوديها الفندق الجديد .. وخلا لطيفه توديهم فندقهم الجديد لانها تدلهّ عدل .. ووقفت لطيفه تاكسيين واحد يشل ميشو ومحمد وام محمد والثاني يشل لطيفه وديمه .. طبعا ابو محمد بيتأخر لانه بيروح بيرد تقريبا يبيله ثلاث ساعات .. التاكسي الاول رفض يركب ام محمد وعيالها ..واسئلته لطيفه قال ماراح اركبهم ومشىى وكمل طريقه .. استغربت لطيفه وعصبت وقعدت تتكلم بالفرنسي .. وقعدت ام محمد تهديها

ام محمد : ليش راح ؟
لطيفه : مدري كيف مخو متحجر عليه عنصرية غريبه !!
ام محمد : عنصريه ؟
لطيفه : ايوا بيقول ما بيركبش عرب !
ام محمد : ليش ان شاء الله مو مالين عينه ؟
لطيفه : ما بعرفش حاجه ماعلينا منوو هو متخلف حنركب تاكسي تاني غيروا
ام محمد : ليش اهم دايما جذي ؟
لطيفه: لا مش كلهم بس هاذاا مش طبيعي فيوزاتوا ضاربه
لقوا تاكسي وراحت ام محمد مع عيالها وركبت ديمه مع لطيفه ..

وديمه ركبت مع لطيفه وكانت اللي تسوق حرمه .. وطول الدربّ لطيفه وهاللي تسوق يقرقرون .. بفرنسي .. وديمه كانت ساكته وتفكر بطيرها لانه بالفندق .. ووصت ابوها عليه وقالها لا تحاتين ..وقعدت اتطالع باريس حست انها منظمه حيل .. وكل اللي فيها يمشون مالهم دخل بالناس .. بس اللي خرعها ان كل واحد فيهم يمشي معاه كلبه البوليسي .. وهي تموت رعب من الكلب البوليسي الاسود ولقت منه واجد وهي ماشيه و كانت كل شوي تلصق ببوها وتدخل بجاكيته من الخرعه وابوها كان يمشي بالطريق اللي مايشوف فيها أي كلب لانه مايبي يخرع ديمه لانه مطلعه عشان يونسها .. بس المشكله ان لطيفه وديمه وصلوا الفندق بس ماشافوا ام محمد وعيالها .. !! وقعدوا تقريبا نص ساعه وديمه كل شوي تلتفت يمين وويسار والمشكله ان تاكسيهم حرك قبل تاكسي لطيفه يعني المفروض وصلوا .. بس وينهم !!
ديمه : مو كأنهم تأخروا ؟؟
لطيفه : ايوا والله اتحيرت عليهم
ديمه : ليكون ضيعوا !!
لطيفه : ليش مانسأل الرسبيشن بركي دخلوا الغرفه ؟
ديمه وهي خايفه على اهلها : اوكي
اول مادخلوا الفندق شافوا ام محمد ايدها على قلبها متخرعه على بالها ديمه ضاعت مع لطيفه .. وقعدت ديمه تهدي امها
ديمه : بالعكس والله يمى انا خفت عليكم انا معاي لطيفه لاتحاتين اما انتِ مامعاج احد
ام محمد : من اول يوم ضعنا الله يستر بس !
ديمه : والله الفندق روعه يمى
ام محمد : يلا بنروح الغرفه
بعد حـوالي ساعتين وصلوا بومحمد وانوار .. انوار اول ما وصلت على طول رحله استكشافيه للمكان .. ماخللت مكان جنب الفندق ما ززارته طبعـا اليوم هذا كان متعب لهم بشكل كبير .. وخاصه بعد ماتلعوزوا بالمترووو .. اللي حلفت ام محمد ماتركبه من كثر ما يختض ويوقف بالمحطات لوع جبدها .. هذا كـان ثاني يوم لهم في العاصمه باريس
:: .. الجـــزء الثــاني .. ::

على ثالث يوم بغرفه البنات كانوا انوار وميشوو نايمين على السرير وديمه بالمطبخ ومحمد نايم بالصاله قدام التلفزيون .. ديمه بعد ماقامت شافت التلفزيون مفتوح وصكته ولحفت اخوها عدل وراحت مطبخ التحضير الصغير مالقت شي تاكلها هي قايمه مبجر .. الساعه 7 تقريبا واهلها بغرقه النوم ماراح يقومون الا 11 .. قعدت تقلب القنوات مالقت شي يعجبها بس ست قنوات حطت على ستار اكاديمي الفرنسي بس لاعت جبدها اكثر وحطت على فاشن تيفي وشافت عروض الازيااااء والمصممين والمكياج بس زهقت ساعه وهي تشوفهم .. خلاص ماقدرت تقعد اكثر حتى فوفو ناايم ولا سمعت حسه .. راحت قومت انوار وشاورتها
ديمه بحس واطي : انوارووه قومي بننزل نتريق
انوار فيها نوم : مو اللحين بنااااام
ديمه : هذي فرصتنا امي وابوي بيقومون متأخر
انوار : ارحميني ترى نايمه متأخر
ديمه : كيفج انا بروح واستكشف المكان واتريق تبين حياج الله ..
انوار: والله ماقدر بس اذا مارديتي بعد نص ساعه بنززلج ونكمل الطلعه اوكي
ديمه : اوكي ناطرتج بس ترى ماراح اروح بعيد تلقيني بواحد من الكوفيات اللي صوب الفندق
انوار : ماعليج كلهم مارتهم امس يلا روحي بنام
ديمه : اوكـي اذا قامت امي قوليلها انا تحت
انوار : انزين ترى شوي والحقج مع حمود
ديمه : يلا بروح البس
لبست ديمه وخذت معاها كاميرا الفيديو ..
فندقهم صاد شويه عن الشارع يعني يبيلها تمشي خمس دقايق لين توصل شارع الشانزليزي الرئيسي اللي فيه كوفيات وسوق وكل شي شمت هواااااء صافي واستانست لانها بدت يومها من اوله وهي تتمشى بنشاط .. شافت الناس رايحه راده وكلن بحال سبيله .. الطويل والقصير والاسمر والابيض .. يوم وصلت الكوفي دخلت وحيتهم بتحيتهم .. اللي هي بنجوور .. وقعدت بطاوله على الشارع عشان اذا جتها انوار تشوفها .. وشافت المنيوو واشرت له على اللي تبيه وشوي الا جايها قرصون شايب وحط لها الاكل .. وقالها
القرصون : السلام عليكم
تفاجأت ديمه ولفت عليه وابتسمت : وعليكم السلام الاخ عربي ؟
القرصون : أي نعم معاكِ صادق من الجزائر ..
ديمه : تشرفنا
صادق : ماشرفتينا بأسمك يا اموره
ديمه : اسمي ديمه
صادق : ما شاء الله ربي يحرسك
ديمه : مشكور ماقلت لي عم صادق انت من زمان هني ؟
صادق يطالعها بحنان واسى على حاله : ايييه يا بنتي لنا عمر عم بنشتغل هنا مهاجر من 25 سنه
ديمه شهقت : وااااااااجد
صادق : عم نترزق
ديمه : أي الله يعينكم ان شاء الله
صادق : الا ماقلتيلي انتِ من وين ؟
ديمه : انا من الكويت تونا ساكنين بالفندق اللي عندكم
صادق : ماشاء لله فيه اكثر من فندق هينا انتِ أي واحد بتقصديه ؟
ديمه : لاباغتيل
صادق : ايوا ايوا عرفتوا على الشمال
ديمه : أي هذا هوو
صادق : تشرفنا بمعرفتك واي حاجه عوزاها نحنا بخدمتك قوليلهم صادق بيدلوكِ عليا
ديمه : مشكووور عموو وان شاء الله بتشوفنا يومياً عندك
صادق : بردون مودمازيل
وراح صادق وقعدت ديمه تفكر بحياه صادق شلون ترك اهله وعياله وتغرب عشان يحصل لقمه العيش .. الناس يعانون عشان يعيشون .. وتريقت وبعد ماخلصت شافت ان انوار ماجتها قالت بروح اتمشى شكلها البنت مطوله .. ورحات عند عم صادق وقالت له اذا شفت بنت متحجبه دخلت الكوفي قولها اختك راح تتمشى بالسوق وطمنها صادق وراحت وهي مرتاحه
مشت حوالي نص ساعه بالسوق وتعبت وقعدت على واحد من الكوفيات اللي على الشارع وشربت لها عصير برتقال .. بس لفت انتباهها مجموعه شباب قاعدين بالطاوله اللي قبالها وشكلهم عرب واحد لهجته مصريه والثاني لبناني والثالث كويتي والباقي ماميزتهم لانهم ماتكلموا .. بس تأكدت انهم عرب من اشكالهم .. بقلبها استانست يعني في عرب هني .. بس من تكلم الكويتي وهي بس تسمع كلامه حنّ قلبها لديرتها .. وكانت تشرب العصير وتطالع الناس وفجت الكاميرا وصورت الشارع وقوس النصر والسوق والباصات المكشوفه وكل شي بعدين قفلت الكاميرا كانت ديمه لابسه بنطلون وفوقه قميص وسيع طويل وشيله بيضاء على بدلتها .. وماسكه الكاميرا بيدها .. بس شكلها ضيعت وكل شوي ترد الكوفي اللي فيه العرب بس مستحيه تسألهم .. لانهم اكثر من اربعه .. ولاحظها الكويتي لانه ماقدر يشل عيونه عنها من داخله خايف عليها لا تضيع .. وخاصه فرنسا ما يتفاهمون الا بلغتهم .. ويوم حست ديمه انها فقدت الامل لانها هي ضيعت روحها ما تدخل المحلات اللي على الشارع لا كانت تدخل داخل وتطلع بعدين ماقدر يستحمل الكويتي قام من مكانه وقرر يدليها بنفسه .. بس ديمه ما انتبهت عليه ورجعت لكوفي العم صادق وهو اللي دلااها .. وبعد مارجع الكويتي لربعه
عمر : في ايه يا مشعل مالك ؟
مشعل : لا بس كسرت خاطري شكلها ضايعه
سمير : شو تضيّع المكان انت التاني ما اجت لوحدها الا بتعرف طريقها
مشعل : يبى بنت خليجيه وهني لازم اساعدها
ناصر : طيب منت قايم
مشعل : الا بس دق على المدرب يمكن بيأجل المباره
ناصر : ياخي قم واللي يعافيك جاي تتمشى انت وراك لعبّ يهدّ الحيل
سمير : أي ولك بكير على اللعب لسى بائي اسبوعين على الدوري
عمر : ماهو برضو حنتدرب
مشعل قام من مكانه
ناصر: على وين ؟
مشعل وده يتمشى المهم يرد يشوفها مره ثانيه ماتطمن يوم شافها ضايعه وشوي وتبجي
مشعل : لا بس بتمشى تجي معاي ؟
ناصر : طيب طيب يلا قمنا
وراحو مع بعض وكان طول ماهم يمشون مشعل يتلفت يبي يدورها ..
ناصر : علامك مضيع شي ؟
مشعل : هااا لا ابد بس ابيلي شريحه تلفون دامنا مطولين
رقع السالفه مشعل وهو وده يروح يشوف البنت اللي مرت عليهم ..
ناصر : قول ابي محل تلفونات ترانا مطوفينه
مشعل : لا انا شايف واحد قدام قبل امس
ناصر شاك بكلامه بس سايره
شوي الا شاف البنت نفسها بكوفي معاها بنت ثانيه ارتاح وعرف انها لقت اهلها ؟؟
بعدين وقف
مشعل : اشوى خلاص خلنا نرجع
ناصر : بلاك انت مره جايبنا ومره مرجعنا
وبعدين لف على الكوفي وشاف البنت اللي مّرتهم قبل شوي وعرف مغزى السالفه
ناصر بمكر : اهااااااااااا قول كذا من الاول
مشعل بجدّيه: لالالالالالا حرام عليك لايروح فكرك بعيد بس كنت بتطمن عليها
ناصر غمز له : يعني عشانها كويتيه ؟؟
مشعل : شدراك انها كويتيه ؟
ناصر : تراهم معنا بنفس الفندق
مشعل : احللللللللف ماشفناهم
ناصر : امس نازلين انت الظاهر الكره ماخذه عقلك اقول امش قدامي بس
مشعل ابتسم ومشى معاه
مشعل : بس ترى والله ابي شريحه لتلفوني زهقت من البطاقات والكباين ياخي بسرعه تخلص
ناصر:ههههههههه مصدقك مصدقك بس امش قدامي لا يزّر عقلك
مشعل ضحك ومشى معاه ..
ناصر سعودي ومشعل كويتي هم حيل مع بعض من وصلوا المعسكر .. تعرفوا على بعض من اسبوع يعني من جيتهم .. مشعل عمره 24 سنه يعشق الكره طويل وجسمه رياضي كان يخرع الاعبين فا يخلونه هجوم دايما وله غمازات عجيبه يعني ابتسامته تسرق القلوب .. وشعره كثيف واسود وناعم عكس السعودي اللي كان محلق شعره ويجي مشعل يقهره ما يلبس شي على راسه عناد .. مشعل ككل وسيم ويلفت الانتباه ..
--

بنــــــــت الأصـــــــــول

انوار : تخيلي قبل لا اجي قامت ميشوو وازعاجها قومّ الدور كلها
ديمه : هههههههههه ياعمري حرام عليج جان لبستيها وجبتيها معاج
انوار: فاضيتلها عشان بنص السوق ابي مامااااااا ابي باااااباااااا ماتعرفنيها انتِ
ديمه : انزين انا زهقت رجولي تكسرت خلنا نرد بشوف فوفو قام والا لا
انوار بتأفف : قام وعطيته اكله وسلمتلج عليه وقلت رايحين شوي وبنجي
ديمه شافت انوار تتطنز عليها بس هي صج تتكلم معاه وتقوله انها بتطلع وكل شي لانها تعتبره عمها تفضفض له عن كل شي .. طالعت الناس بنظره يائسه " آآآه بس لو الف العالم كله ماراح انساك ومافي شي بالكون يعوضني عنك الله يرحمك "
انوار: ليش ليش هالنظره الحزينه عاااااااااااااد
ديمه ابتسمت : لا ابد بس احس اني مختنقه برجع الفندق
انوار : وانا منو بيجي معاي بروح السوق
ديمه : نصيحه لا تروحين انا قبل شوي بغيت اضيع زين اني ميزت كوفي العم صادق
انوار : لحوول المشكله لو رحت مع اهلي بيقولون طولتي بالمحل خلصي ومدري شنو ابي اتمشى على راحتي
ديمه : أي على راحتج وضيعي وعاد انتِ بلبل بالفرنسي تبارك الله
انوار غصبن عنها ضحكت تخيلت شكلها ترطن فرنسي مو لايق
انوار : ههههههههههه ماتخيل
ديمه :انا برجع اللحين اكيد امي بتقوم وابوي بكوي ملابسهم وارتب الغرفه
انوار: لا استريحي دخلوا السيرفس ونظفوها
ديمه : اشوى عبالي نفس هذاك الفندق الخايس
انوار: ههههههههههههههههههه عبالج بالكابوي احنا
ديمه : مادري عنهم يلا انا ماشيه
انوار :خلاص انا بخلص من اكلي وبلحقج
ديمه : اوكي تيك يور تايم
مشت ديمه ودخلت اللوبي شافت محمد اخوها قاعد على القنفات ويشرب كولا
ديمه : حمود شمقعدك هني ؟ وين ابوي
محمد : اففففف واخيرا وصلتي امي وابوي وميشوو راحوا يتريقون بمطعم وقالولي ان جووا خواتك قولهم ينثبرون بالغرفه ولا يطلعون مره ثانيه وعقابا لهم مافي طلعه اليوم الا بعد المغرب
ضحكت ديمه : ههههههههه اتصدق احسن انا رجولي متكسره
محمد منقهر : وانا شذنبي لا اتريق ولا اتغدى ؟ بس احرسكم ؟ ليش انتِ انانيه ؟؟
اسكتت ديمه ماتوقعت هذا الكلام من اخوها اللي تحبه
بعدين قعدت على الكرسي وقالت له بألم وهي تمسك شعره: حمود انا انانيه ؟
محمد: اجل شتفسرين طلعتج بروحج انتِ واختج ومهمله الناس والحين يوم عاقبني ابوي قلتي احسن رجولي متكسره ماتحسين فيني انا جاي استانس مو جاي اتعاقب على شي مالي دخل فيه
ديمه تفاجأت بس تمالكت نفسها : ولايهمك اللحين اوديك اريقك واغديك
محمد ماله نفس : مشكوره روحي اكلي طيرج هالفوفو وخلي اخوج ينطق هني ينطركم كنه ناطوركم
ديمه انقهرت منه حست انها بتندم لو انفعلت
ديمه : امش امش قدامي ترى انوار بالكوفي روح بريقك وبغديك وبمشيك
محمد استانس بداخله على العرض المغري : بس وابوي ؟
ديمه : انت مو قلت بيردون بعد المغرب خلاص بنرد العصر
محمد : بس على شرط ما نبعد حيل
ديمه : لا كاهو الكوفي على اللفه
محمد : اوكي بس شلون بترك لهم خبر
ديمه ماعليك انطرني هنيه وبروح اترك لهم رساله عند الرسبشن
محمد : اوكي تلقيني بمحل الوورد اللي قبال الفندق
ديمه : اوكي دقايق وجايتك
راحت ديمه الرسبشن وحاولت تتفاهم معاهم بالانجليزي .. بس المصيبه ان الفرنسيه ماتعرف انجليزي حيل .. قالت لها انطري شوي وبيجي واحد يتفاهم معاج انطرت ديمه باللوبي لين جاها شاب لابس بدله رسميه لاحظت انه يشتغل بالفندق نفس لبسهم .. ووسييم ومعضل .. قالها
موظف : اهلا اختي اسعادك بشيئ ؟
ديمه : اها أي انت تشتغل هني
درت ان سؤالها غبي بس رد عليها مبتسم
موظف : أي نعم أي خدمه ؟
ديمه : بغيت اترك رساله لاهلي لاني بطلع شوي وبرجع
موظف : تحبي تكتبيها بخط اليد ؟
ديمه : أي والله يكون احسن
موظف : تفضلي معي
ديمه استشفت من لهجته انه مغربي ..
خلت كاميرتها على الطاوله وراحت معاه لين الرسبشن قالها تنتظره دقايق .. وهي واقفه الا انفتح الانصنصير وطلع منه شابين من ملامحهم خليجييين .. بس نزلت عيونها والتهت بالزرع اللي قبالها..
بس اهم القو السلام
مشعل +ناصر : السلا عليكم
ردت عليهم بشكل مقتضب وعيونها بالارض: وعليكم السلام
مشعل كان ينادي اللي بالرسبشن بس مايرد عليه احد الا هذي الموظفه اللي متوهقه فيهم
مشعل: اكسيكيوزموا
الموظفه قعدت ترطن تقوله انتظر اللحين بيجي الموظف العربي
واشرت لهم الموظفه انهم يقعدون لين يخلص الموظف من ديمه ابتسمو وراحوا قعدوا بعد ماكتبت ديمه الرساله وخلصت راحت صوب الباب بس تذكرت ان كاميرتها على الطاوله اللي قاعدين فيها الشباب .. استحت اتروح وشافت محمد اخوها وقالت له انها نست الكاميرا وراح يجيبها ..
سلم محمد على الشباب واخذ الكاميرا
مشعل : انتوا من الكويت ؟
محمد : أي والاخو ؟
مشعل : هلا والله بأهل ديرتي هذا ناصر من السعوديه
محمد استانس عليهم وشكله بيبسط
محمد : والله اجل شجايبكم هني انت من الكويت وهذا من السعوديه
مشعل : وراانا مباريات مو جايين سياحه
محمد : احلففففففف اجل انتوا لاعبين جايين تتبارون دولي
مشعل : ايه هذي اول مباره لي دوليه ادعيلنا
محمد : لاتوصي قلوبنا معاكم
ناصر : تسلم ماتقصر انتوا مطولين هنا ؟
محمد : تقدر تقول اسبوعين هذا اذا ماتغيرت مخططات الوالد
مشعل : فرنسا حلوه بتستانسون فيها
محمد : أي ان شاء الله انا بطلع اللحين نشوفكم على خير
مشعل : على خير ديربالك على عمرك
---
يوم طلع انقهرت منه ديمه ..
ديمه : لا والله جان شربتوا شاي وقهوه بعد ؟
محمد : هذول خليجيين
ديمه : أي ادري وشسوي تقوم تنقعني ساعه برى الشرهه مو عليك على اللي يطلعك
محمد : اقول امشي بس والا نسيتي شسويتي فيني !!
ديمه : يعني وحده بوحده ؟
محمد ابتسم درى انه زودها : تدرين طلعوا مثلي لاعبين ؟
ديمه : وانت قاص على روحك عبالك لاعب ؟
محمد : بدال ما تشجعين اخوج وتقولين انت اكبر لاعب بالدنيا تجين تدقريني ؟
ديمه ضحكت حست بتأنيب ضمير : سوووووري حمود والله انك احسن ولد شفته بحياتي كفايه صابر على انوار وميشو ولسانها
محمد : أي قدروا قدروا ياما تحت البنات مظاليم
ديمه : ههههههههههههههههههههههه عاد مو لي هالدرجه يلا كانا وصلنا
محمد : وينها ام السعف والليف ؟
ديمه : لا تسمعك تنتفك
محمد : وينها ؟ ماشوفها
ديمه : لالالالا مستحيل
محمد : شنو
ديمه : اكيد دشت السوق لالالالالالالالا
محمد خاف : ليش شفيه السوق ؟
ديمه : يعني ماراح تطلع الا عقب باجر ماتعرفها انت
محمد ارتاح : لا ماعليج بسيطه نفتر ندورها واذا قالوا امي وابوي شي نقول ندور انوار نقطها براسها عرفتي ؟
ديمه : عرفت يابو الخطط بس انا مشيت على خط واحد ضعت مابيها هي تحوس
محمد : ماعليج مامداها بعدت وتراها مو مثلج تمشي على عماها تراها ذكيه وكل شي تعرفه
ديمه : تبي كوفي العم صادق والا غيره ؟
محمد : ومنو العم صادق ؟
ديمه : ههههههههه هذا اللي تريقت عنده اليوم
محمد : هلآهلآ والله وطاقه الصحبه مع اخينا بالله
ديمه : حمود ترا مو ناقصتك جايين نستانس
محمد : تستانسين انزين اوكي
ديمه : لحظه بوريك العم صادق عشان ماتقعد تتفلسف على راسي
ودخلوا الكوفي وجاء العم صادق سلم عليهم استانس لما شافهم
ديمه : العم صادق اعرفك على اخوي
صادق : اهليييين يابني ماشاء الله رجل قوي
محمد ابتسم : الله يعطيك طولت العمر
قال هالكلام وهو يطالع ديمه ويبتسم .. لان طلع العم صادق كبير بالسن شايب ..
ديمه : عم صادق ماشفت اختي انوار ؟
صادق : الا يابنتي قالت لي انها بتتفسح في الماركت
ديمه : لحووول هذي وين القاها
صادق : هي بتقول ابتطولشي كلها ساعه زمان
ديمه : لا ياعم ماتعرف ساعتها تصير سنه
صادق : لالا هالمنطقه امان ما تخافيش عليها
محمد : المهم عم صادق شعندك اكل ؟
صادق : كل مالذ وطاب بس استريح
محمد : اوكي عمو وريني
صادق : الا يابنتي ما قلتليش انتوا مطولين هنا ؟
ديمه : عمي تقريبا اسبوعين
صادق : انا بعد بكره بسافر على الجزائر اخواتي عاوزيني كلها اسبوع زمان وراجع
ديمه : لا عمي مايصير احنا ماراح نطول هني
صادق : والله انا سعيد جدا بيكم بس الظروف
محمد : احنا والله اسعد
دشت انوار عليهم الكوفي ومعاها خمس كياس .. وتضحك ماسكه ايس كريم
انوار : انتوا هني ؟
ديمه معصبه : لا هناك وين كنتي حضرتج ؟
انوار : تخيلي شفت كذا عايله خليجيه
ديمه : ادري جايبه شي جديد
محمد : وانتِ تراقبين الرايح والراد ؟
انوار : كيفي زين ؟
ديمه : اشوف وريني شنو شريتي ؟
انوار : ابد والله خرابيط وتراجي واكسسوارت
ديمه : انزين ياحضره المودمازيل تدرين ابوي معاقبنا عشانا طلعنا وما قلناله ؟
انوار : لحظه عباله بننحكر بالفندق ؟؟؟
محمد : لا ياحبيبتي بس لاتطلعين بدون شوره ماعلموكم بالمدرسه الاستئذان ؟
انوار : ماسوينا شي كلها سوق
محمد : أي عيديها شوفي شيسويلج ابوي !
ديمه : بس عاد المهم انتوا اقعدوا هنيه انا بروح الفندق شوي برتاح وبرجع
محمد : بروحج عاد ؟
انوار : دامك مسويلينا فيها رجوله روح وصلها
ديمه : حمود شفيك صاير جذي انت ناسي اني جايه هالكوفي لحالي يعني عادي
محمد : يبى كيفج مو صغيره نقولج هالكلام
ديمه ابتسمت : يلا فمان الله
محمد : لا تطلعين لي خلصنا رجعنالج
ديمه وهي طالعه : لا تحاتي بحط راسي وبنام لاتتأخرون ..

مشت ديمه بخطوات بطيئه ووقفت عند محل الورود .. وتأملت كم ورده وشمتهم حست بإنتعاش وصورت المحل بالفيديو وسلمت على صاحبته وطلعت صعدت غرفتها وشافت فوفو قايم ويتحرك داخل القفص بدلت ملابسها وجت تكلمه كالعاده ..
ديمه : طولت عليك صح ؟! والله كنت برجع بس عطلني محمد اخوي تعتقد حتى لو جيت اخر الدنيا بنسى ؟
وقعدت تبجي وتبجي .. عمها مبارك ماكان انسان عادي .. كان اقرب انسان لها بهالوجود اقرب لها من امها وابوها .. ومن هواها اللي تتنفسه .. كان متكفل فيها بطلعاتها وجياتها .. عمره تقريبا 23 بينها وبينه اربع سنين بس توفى قبل ست شهور .. انهارت وصا حت ووقفت قيدها كورس كامل بس مع مرور الوقت بدت تتقبل الوضع بشكل جدي ان عمها مات ماراح تشوفه خلاص !

ديمه : ادري انك زهقت من كثر ما تشوفني ابجي بس يبيلي وقت عشان تمر ذكراه بشكل عادي ولا اذرف دمعه
مرّ الوقت وجاء المغرب واجتمعوا كلهم بغرفه البنات ..
بومحمد بعتب: ها استانستوا ؟
انوار: أي والله يبى سوقهم يهبل
بومحمد : انتِ اسكتي ولا كلمه
انواركتمت الضحكه: حاضر يبى
بومحمد : ديمه اعتقد انا جايبكم عشان اونسكم اعتقد ماله داعي تسوون حركات ووتتفقون وتنزلون بدون اذن يعني لو ضعتوا وصارلكم شي احط ايدي على خدي ؟
ديمه غصتها العبره : لا يبى انا اسفه بس كنت بتريق وبرجع
بومحمد : ماينفع الاسف المهم ماتعيدونها
انوار: ابشر يابعد باريس واهلها
بومحمد طالع انوار وابتسم يعرف حركات هالبنت ..
ديمه سكتت ودها الارض تنشق وتبلعها ولا يزفها ابوها
ديمه : انا بطلع شوي وبرجع
بومحمد : ديمه مابيج تزعلين مني بس ترى كنت خايف عليكم
ديمه تبلع الغصه : لا يبى عادي مو زعلانه بس بروح الغرفه الثانيه اهدى
بومحمد : ديمه البسي اللحين بنطلع
ديمه : يبى تقدر تأجلها؟؟ دايخه وابي انام
بومحمد : بس ما سألتيني وين بنروح ؟
ديمه : يبى روحوا اللي تبونه بس انا بتعشى وبنام عادي والله
بومحمد : بنروح برج ايفل شلون بتطوفين هالروحه !!
ديمه : يبى ورانا اسبوعين لاحقين بنشبع منه
بومحمد : بس ماراح اخليج بروحج جذي بخلي محمد عندج
فزّ محمد معصب هو الظاهر الضحيه الوحيده بينهم
ديمه قالت بسرعه وهي تشوف محمد منفعل: لالا خلاص بروح معاكم
بومحمد مبتسم : جذي احسن ..
------

راحوا برج ايفل وبالليل شكله عجيب .. الاضواء باللون البرتقالي من فوق لي تحت .. صورت ديمه كل هالاشياء .. وتحس انها دايخه بس اهم شي ما تحرم حمود من الطلعه .. عشان ما تصير بنظره الانانيه !! ولما جات الساعه 9 حسوا بالجوع ومالقوا مطعم الا كفتيريا صغيره تحت البرج او مطعم راقي بس فوق بأعلى البرج ام محمد اعتذرت منهم قالت ماقدر اركب البرج
بومحمد : ها ديوم تركبين معاي ؟
ديمه : الله ودي اركبه واصور بس دايخه اخاف اشوف الناس من فوق واطيح
بومحمد : هههههههههههههه لا اجل اقعدي انتوا ما تشوقون الواحد يصعد
ام محمد : اقول بس دورلنا مطعم نتعشى فيه
انوار : يبى ترى فيه مطعم تحت البرج عند الزاويه اللي صافين عنده طوابير
بومحمد : وانا عبالي التذاكر .. اثاريه مطعم
انوار : مو مطعم مطعم لا كفتيريا يعني فيها سندويشات وشبس وكولا وهالسوالف
ام محمد : يعني مطعممممممممم خلاص بومحمد اشترلنا وخلنا نتعشى قبل مانرد الفندق
بومحمد : على هالخشم ..
وطلبوا بس المشكله ان سندويشاتهم مطلعينها من الفريزر .. ولو تطقها براس الكافر اسلم من كثر ماهي يابسه بس تحملوا وكلوها ..
محمد متضايق من ميشوو: ميشووووو وخري عني ترى والله ان شربتي من كولتي مره ثانيه لا اطقج بهالصمونه اقسمج نصين
انوار : ههههههههههههه حشى صارت سلاح بعد!
وبعد ما خلصوا ركبوا المركب اللي على نهر السين وشافوا كل المنـاظر والمتاحف والقصور الفرنسيه القديمه .. يرجع عهد بعضها الى 1600 سنه ميلاديه وبعد ما انتهت الرحله .. رجعوا الفندق منهكين
.. ردتّ ديمه الفندق وهي خلاص دايخه بس تبي الفراش
حطت راسها ونامت وبجذي انتهى ثالث يوم لهم بباريس

وما قومتها
ثاني يوم الا انوارالساعه 10 تقريبا

انوار : قومي يلالالالا بنروح ديزني قومي عفيه ديوم
ديمه بغرقه النوم : انوار راسي كبر الجبل خليني ارتاح
انوار: خلصي يقولون السايق بيجينا الساعه 11 ما يمديج
ديمه : شسالفه كل يوم طالعين يعني باريس ماراح تطير انطروا شوي خلنا نرتاح
انوار : ياماما ديزني تبعد ساعه من هني
ديمه : افففففففف منكم
انوار : شحنتي الكاميرا .؟
ديمه : بلعنتها انشحنت والا انطقت وخري عني بروح اغسل وجهي
انوار : ترى ريوقج تحت انزلي معاهم تريقي باللوبي
ديمه : على مااتسبح واصلي والبس قدهم خالصين ولا تنسين الريوق يصكرونه 11
انوار : ماعليج تسبحي بسرعه عشان تلحقين
ديمه زهقانه : امرنا لله
نزلت انوار وخذت معاها كاميرا الفيديو ولحقتها بعد نص ساعه ديمه
باللوبي تحت ..
ام محمد : زين قمتي
ديمه : صباح الخير
بومحمد : صباح النوير لاحلى ديوم
ديمه استحت : شخباركم بعد طلعه امس
ميشوو : انا اثناني تعورني من الصمونه
انوار + محمد : هههههههههههههههه
بومحمد : ديوم حبيبتي روحي تريقي الريوق لا لحين مفتوح
ديمه : ليش لالحين ما وصل السايق
بومحمد : لا على ما يوصل قدج مخلصه
ديمه : لا تخاف ماراح اكثر اكل
بومحمد بعصبيه : عشان احرمج من الروحه بطلّ بصحنج لين تخلصينه
ديمه ابتسمت : ابشر يالغالي
ودخلت وقعدت على اقرب طاوله ..
وحطت لها بصحن اشياء خفيفه ..
وقعدت تاكل لين جاتها انوار وقعدت تقرق على راسها .. وطلعوا مع بعض .. الا شافوا ابوهم يسولف مع واحد شكله يعرفه !! وناداهم ابوهم انحرجوا وقربّوا ..
ديمه : هلا يبا
بومحمد : السياره وصلت اركبوا وانطرني شوي وجاي
وطلعوا وابوهم قعد خمس دقايق مع هالرجال وبعدين طلع
وبالسياره ... الكـل متعجب من الجوو كان خيالي و غيم براااااد والارض خضرااااء ..
ام محمد : ماقلتلي يامنصور من اللي كان معاك باللوبي ؟
بومحمد : هذا ابوه صاحبي من سنين وياه وجيرانـا قبل ..
ام محمد : يقولي محمد انه لاعب صج عاد ؟
بومحمد : أي جايين يلعبون دوري .. قعدت معاه والله خوش رجال
ام محمد : الله يخليه لاهله ان شاء الله
ديمه سرحانه وتحاتي الطير اللي خلته بالفندق .. بس هو اللي بقالها من اللي تحبهم .. لازم تحافظ عليه .. بعد ما وصلوا شافوا ديزني كانت بكل بساطه قمه بالروعه ديزني فرنسا كانت مجموعه من العوالم .. عالم افريقي وعالم عصر علاء الدين وعالم حديث وهذا اللي لاحظوه من الالعاب والمداخل اللي تدخل على الالعاب .. وطبعا الشخصيات الكرتونيه تعجّ في ديزني .. ميكي ماوس والحسناء والوحش والسندريلا وفله والاقزام السبعه ونيمو ووو ما الى اخره طبعا ميشوو ومحمد بس واقفين يصورون معاهم وياخذون تواقيعهم.. وديمه تلحقهم بالفيديو


بنــــــــت الأصــــــــــول

ام محمد كانت تتسوق فالمحلات حقت الاطفال تتشرى لميشوو للروضه .. وتشتري لبنت اختها رغد .. لانها كبر ميشوو .. بعد مدّه زهقت ديمه وهي تلحق الجهال تبي تروح تلعب ..
ديمه : انوار وين امي خذت كاميرا فيديوا ولا رجعت ؟
انوار : هي راحت مع ابوي بيتغدون وقالولنا روحوا تغدوا بالمطعم اللي عند لعبه الأكواب .. ونلتقي عند هذاك الكوفي
ديمه : انزين انا بلعب مو ذنبي انج خوافه وماتحبين الالعاب الخطره !
انوار : اللحين خلينا نتغدى بعدين تفلسفي
ديمه : أي منقهره ههههههههاااي
انوار : مالت عليج المهم احمدي ربج انتِ بس تغدي معانا وانا بمسك الجهال وهيتي العبي على كيفج
ديمه : يلا على ما نتغدى قد امي واصله تعطيني الكاميرا
انوار : اوكي
دخلوا المطعم وكان عباره عند عالم اسباني .. يعني النادلات لابسين لبس كله كشاكش وحركات واشكالهم تونس من قلب .. بعد ما طلبوا وجباتهم .. قعدوا ياكلون .. بس احلى شي بالوجبه البطاط لانهم كلهم قضوا عليه معروف البطاط الفرنسي يشهي .. بعد ماخلصوا ..

بس بعد ما خلصووا ماقدرت ديمه تستحمل ..
ديمه : انوار وبعدين وين امي اللحين ..
انوار: هم وعدونا عند الكوفي هذا أبو قنفذ مدري القش هذا خلنا نقعد فيه وننطرهم وانا بلعب الجهال بالاكواب
ديمه : انتِ تدرين ان احنا نضيع وقت
انوار: يعني شلون بتروحين كيفج انا بقعد هنيه .. متى ما خلصتي تلقيني
ديمه : خلاص اجل بخليكم انا بروح كل لعبتين بجي اتطمن عليكم
انوار: اوكي بس لاتقطعين فجأه ترى ديزني داهيه ماراح تخلصينها بيوم واحد
ديمه : ادري مو هذا القهر اهم شي اخطر الالعاب بركبها وبصور فيها
انوار : صج فيني روح المغامره وفضول واركبهم بس اخاف
ديمه : أي احسن اذا انا وياج رحنا من بيتم عند الجهال ؟
انوار : محد يلا روحي انتِ
ديمه : لا وصيج عليهم
انوار : بعيوني طبعا
----

طبعا بومحمد كان مودي ام محمد مطعم تحت البحر .. وشكل المطعم رومانسي حيل .. لانهم ما يشوفون الا شموع .. والجووو كان روعه .. ولاهمهم العيال بس خلوهم مع انوار
وراحوا .. لانهم يدرون العيال بس همهم الالعاب ..
ديمه راحت العالم الحديث .. شافت فخامه ديزني شي رهيب .. وشافت لعبه عباره عن صاروخ داخل نفق وطالع على فوق وتسمع الناس يصارخون استانست هني المتعه وتدخل بس خافت لان الدخله ظلمــاء ماتشوف الا لمعه على الارض تبعت اللمعه دخلت يمين ويسار لين شافت واحد قدامها لحقته احسن من اللمعه اللي بغت تحّول عيونها ووصلت لين بدايه العبه وشافت اللعبه وقفت والناس بدوا يركبونها ركبت معاهم وقعدت جنبها وحده .. توكلت على ربها وسمّت وصكو اللعبه وطاااارت بسرعه البرق .. ودخلوا بأنفاق والمركبه تلف فيهم لين قالت بس ومن كثر ما قلبت فيهم حست ان كل الدم تجمع براسها .. والناس تصارخ .. وهي تضحك بصوت عالي ..
شافت ضوء فلاش لانها كانت مفتحه عيونها والناس يصرخون وهم مغمضين .. ضحكت عليهم اجل ليش راكبينها ؟ بس ماتنكر ان اللعبه تخــرّع من قلب .. نزلت وشافت الناس يتجهون لمكان معين لحقتهم الا صورهم طالعه .. وقعدت تنطر صورتها وضحكت من قلبها يوم شافت صورتها .. كانت كل اسنانها طالعه وتضحك من قلب .. وحاضنه الحديده من الخرعه ..

بعد ما شرت الصوره حست انها بتضيع قالت ارجع لاهلي احسن لان المسافه بعيده شوي ..
رجعت وتشوف الناس اشكـال والوان واستانست يوم بدا الكرنفـال علاء الدين مع ياسمينا .. و سندريلا .. وبقيه الرسوم المتحركه .. وقالت فرصه انادي اخواني .. يوم وصلت مالقت احد منهم .. ولاحد بالكوفي اللي على شكل قنفذ استغربت .. قعدت شوي .. الا ومحمد جاها
محمد : ها لقيتوا ميشوو ؟
ديمه بخوووف : ليش ليكون ضاعت ؟
محمد بآسف : أي
ديمه ايدها على قلبها : متىىىى هالكلام ؟
محمد : يووه شكلج تلعبين وماتدرين شصاير ؟
ديمه : امي وابوي دروا ؟
محمد : كلن درى ويدورون عليها الا انتِ حضرتج من لعبه لي لعبه صج انج ....... وسكت
ديمه ضايقها هالكلام : لاتخليها بخاطرك قول صج انج انانيه
محمد حس بتأنيب ضمير: الله يخليج ديمه مو وقته ترى سوري صج متضايق من هالخبله مادري وين راحت
ديمه : دورتوها عدل ؟
محمد : افففففف لفينا كل مكان رحناله
ديمه : ماعليك دقايق وتكون عندكم
وراحت
محمد يناديها : تعاااااااالي وين رايحه انتِ؟ ناقصين تضيعين !!
راحت ديمه واختصرت على نفسها الدواره وعوار الراس سألت عن الحضانه
دلها السيكيورتي على الحضانه وراحت شافت الجهـال الضايعين يبجون
اول ما سمعت صوت ميشوووووو تقطع قلبهااااا
بس ماخلوها تدخل تاخذها .. يبون ابوها عشان يسجلون بيانات ..
ميشووووو : وخلوا عني هذي اختييييييي حبيبتييييييييي
ديمه حضت مييشوووووو بكل حنان : بعد عمري انتِ ماعليج اللحين بنطلعج ماقلتيلي شلون ضعتي ؟
ميشووو : انا ادولكم انتوا ضعــيتوا عني
ديمه : ههههههههه ياقلبي انزين بخليج شوي بنادي بابا يجي يطلعج انزين بس لا تصيحين خلاص انا لقيتج
ميشوو تصيح: ابي ماماااااااا ابي باباااااا لا تلوحييييييين بعدين شرطي قطني سجن عند الوحش
ديمه ماتت من الضحك شكلها حيل متأثره بسبيس تون
طلعت ونادت ابوها وجاء طلع ميشو بعد ما كتب كل البيانات اسمه ورقم الفندق وما الى ذلك ..
بس بعد كل اللي صار هدأت الاوضاع وصاروا كلهم يمشون مع بعض ..
ديمه : يمى انا بروح العب
ام محمد : خلاص روحي تلقينا هني عند هاللعبه
راحت ديمه كملت رحلتها وركبت لعبه ايام العصر الافريقي القديم .. كانت صج تخرع تعتمد على الهدوء .. بعد ماطلعت شافت انها تعبت مع انها ما لعبت الا لعبتين بس .. وشافت ان ديزني ماتكفيها يوم واحد .. بس ماتنكر انها استانست بهالطلعه .. ردتّ ديمه وشافت امها واخوانها قاعدين
ديمه : يمىىىى ركبت لعبه عجييييييبه
بومحمد بفرح : اهم شي استانستي
ديمه : أي حيييييل الا وين انوار ؟
بومحمد : داخل بالمتاهه ساعه ماطلعت
ديمه : ههههههههههههههه طلعوها اخاف تطلع باجر
بومحمد : لالا ماتضيع لهالدرجه مو من كبرالمتاهه
ديمه : بروح اشووفها ..
بعد ساعه طق مطر عليهم ومعظم المحلات صكرت ولبسوا اصحاب المحلات والالعاب مثل الجياس الصفر من المطر.. وانتهت الرحله وطلعوا برى ينطرون السايق .. بس قبل لا يطلعون .. راحت ديمه محل الهدايا .. واشترت .. كوب عليه صورت ميكي ماوس ومحطوط عليه حرف D عشان يصير كوبها الخاص محد يستخدمه غيرها .. ومنها تتذكر هالطلعه ..

وبجذي انتهى لهم رابع يوم في باريس ..

---

يتبـــــــــع .. :06:

أنتظــــرــر ردكمـ بفـــارغ الصبـــرــر علشــــان أكمــــلـ القصـــــة :ciao:

بنـــــــــت الأصـــــــول

:28: :02: مشكوره اختي
بس نصيحه لا تكملي وشوفي قصه ثانيه بتتعبي على الفاضي ما حد بيقراها
بس على كل حال الله يعطيكي الف عافيه

محمد

هلأ اختي بنت الأصول :)
القصة حلوة كتير والله يعطيكي العافية :)
وبجد زوءك كتير حلو باختيارها ;)
شدتني كتير القصة وخصوصاً لما البنت الصغيرة ضاعت :09: والله أنا خفت عليها :09:
الله يعطيكي العافية مرة تانية أختي :)
وأنتظر البقية وأتمنى أنها تكون بأسرع وقت :p


بس سؤال صغير : شو يعني اللوبي ؟؟؟؟ :33: :33: :33: