منزل مبارك .."هدية" مذكرات ملحط يبحث عن وظيفه ج8
حيا الله الشباب ... ومنزل مبارك إن شاء الله...
بأكمل معكم مذكرات ملحط يبحث عن وظيفه... وإن شاء الله بتعجبكم...
اللي وده يتابع الموضوع من أوله على الروابط.
الصفحة الأولى
الصفحة الثانية
الصفحة الثالثة
الصفحة الرابعة
الصفحة الخامسة
الصفحة السادسة
الصفحة السابعة
(الصفحة الثامنه)
مقدمـــــة
اليوم حصل ما لم يكن في الحسبان... فقد سجنت اليوم في مركز للشرطة http://www.freakygamers.com/smilies/.../corkysm34.gif ... والسبب إعتقادهم أني أحد المتسولين...ربما ما أوحى لهم ذلك هي ملابسي الباليه... وهذا ليس ذنبي... فحتى هذه اللحظة لا أشغل أي وظيفة من أي نوع... ولكن هل هذا سبب لإعتقالي؟؟
ولم يطلق سراحي إلا متأخراً ، بعد تحقيقات مكثفة...
ولكن يا مذكرتي العزيزة لن أطيل عليك ... وسأكمل من حيث انتهيت...
رحلة لكوكب عنفسة
بعد ما تعرفت على (حسيس) المخلوق من كوكب "نصبان"، وهروبي منه مباشره .. كان لازم أكمل المهمه... وكان على الجدول زياره لكوكب إسمه "عنفسه"...
وكان الوصول للكوكب سهل جداً... بفضل ماجلان طبعاً...
ولما وصلت للكوكب كان لون سطحه مايل للإحمرار.. وفيه غازات وأبخره تغطي سطحه...
معنى هذا الكلام إني لازم ألبس بدلة رواد الفضاء http://www.freakygamers.com/smilies/...eNiro/r2d2.gif ...
والله وناسه ... من زمان ودي أحس إني رائد فضاء حقيقي... وإستعديت للهبوط..
وبعد ما إخترت منطقة مناسبه للهبوط... هبطت... ونزلت... وهذي المره ما قلت شيء (المره اللي راحت قلت كلام عن خطوه صغيره ولكنها خطوه كبيره للبشريه... والنتيجه إني كل يوم في المحاكم علشان مرفوع علي قضية حقوق فكرية... فخلني ساكت أحسن) http://www.freakygamers.com/smilies/...cdeth/barf.gif ...
وبعد ما نزلت من المركبة... وبديت أسجل ملاحظاتي... فجأه حصل شيء غريب.
كان المكان خالي من الحياة ... أن متأكد.. ولكن ظهرت مخلوقات فضائيه صغيره جداً.
كانت صغيره جداً بالفعل... طولها ما يتعدى كوب القهوة... ولونها أخضر ... أطرافها صغيره... ولها ست لسبع عيون.
كان متجمع حولي حوالي 12 مخلوق منها ... ولا سوت ولا شيء... جلست تناظر فيني ..
أو في المركبة... أو في السماء... والله ما أدري... كل عين كانت في اتجاه..
وأنا كنت نوعاً ما هادي... فهذي المخلوقات صغيره وشكلها ما تضر...علشان كذا ما خفت...
وبعدين إن صار شيء وقامت تستهبل هذي المخلوقات دعستها بالزبيريه حقتي.
ومثلما ظهرت المخلوقات فجأة، اختفت فجأة... وما كملت ثواني ورجعت...
وحصل نفس اللي في المره الأولى... جلست المخلوقات تناظر في شيء أجهل ما هو.
أنا حاس إن فيه شيء تغير في المخلوقات عن المره الأولى اللي شفتها فيه...
ولكني ما أدري وش هو...
ومره ثانيه اختفت المخلوقات ... وبعد شوي رجعت... الآن أنا متأكد إن فيه شيء تغير فيها هذي المره عن المره الماضيه وعن المره اللي قبلها... الفار بدأ يلعب في عبي http://www.freakygamers.com/smilies/.../corkysm79.gif...
مخلوقات صغيره تجي وتروح... وأنا ما أدري وش السالفه... لاهم اللي كلموني...
ولا هم اللي طردوني... ما غير يروحون ويجون...
لحظه... أنا الآن عرفت وش اللي تغير في هذي المخلوقات ... المخلوقات في كل مره تروح وتجي فيها تكبر عن المره اللي قبلها...
فبعد أول مره شفتها صار طولها حوالي النصف متر... وزادت سرعة المخلوقات ...
وبدأ يزيد طولها...
الوضع ما يطمن أنا رايح للمركبه... اللي يبي يلحقني منكم يجي واللي بيقعد الله يوفقه... وأنا ما أنصح أحد منكم يجلس عند المخلوقات هذي ...
وركبت المركبة ودقيت سلف... ولما ناظرت مع طاقة المركبة (الشباك)... كانت المخلوقات وصلت حد الطاقه.
يعني وصل طولها حوالي ست أمتار... وبدت تبين ملامح وجهها ...
كان وجه كبير مليان عيون... وبان فم صغير ما كان واضح لما كانت المخلوقات صغيره... وكانت الأسنان اللي فيه مثل أسنان الذيب... وطقتني ام الركب http://www.freakygamers.com/smilies/...e/Eyecrazy.gif.
... ودعست "كيروسين" لين علق الأبنص...
ولما طارت المركبة وبديت أحس بالأمان قعدت افكر بالمخلوقات.... من وين جت... يمكنهم كانوا طالعين في كشته وصادف إن مكان طلعتهم مكان هبوطي... أو إنهم مبزره قاعدين يلعبون وما دروا عنهم أهلهم ...
وبعدين قعدت أتسائل كيف كانوا يكبرون بسرعه... وأيش نوع الحليب اللي يكبر بسرعه كذا...
وكان أقرب حل وصلت له إنهم بزارين زي ما قلت لكم ولما شافوني خافوا ونادوا إخوانهم...
يمكن... ما علينا... الشيء الأكيد إني لا يمكن أرجع لهذا الكوكب مره ثانيه...
علشان كذا كتبت في التقرير إنه كوكب لا يصلح للحياة.
الآن بأكمل الرحله لكوكب"خرطان"...
ورطة حقيقة وش هذا الصوت ؟؟؟ كأنه صوت سفتي... وإلا أنا غلطان...
إيه والله ... صوت سفتي...
ولما ألتفت الوسط للخلف... فوجيء بمركبه خلفه عليها سفتي وتكبس له.
وطبعا أندهش الوسط... ولقى كوكب من الصخور مستوي السطح فركن مركبته عليه.
ولما نزل شاف المركبة اللي تلحقه وتكبس له ركنت خلفه ونزل منها مخلوق لابس ملابس غريبه..
الملابس اللي كان لابسها المخلوق كانت من قطعه وحده... وكانت تلمع وعليها نجمه... الأكيد إن اللبس اللي لابسه المخلوق كان لبس رسمي... وقرب المخلوق من الوسط وبدأ يكلمه...
المخلوق: من أهل الأرض... أنا كنت متأكد إنك منهم... دايم مخالفات.
الوسط: من أنت ؟؟ وليه تكبس لي كذا وتوقفني؟
المخلوق: أنا من الشرطة الفضائية ... وأسمي مكتوب على البدله ...(وأشر على شخاميط على بدلته).
وكمل المخلوق كلامه وقال: أنت كنت مسرع ، وكنت تمشي بسرعة ثلاثين سنه ضوئيه في الساعه والسرعه المسموحه 15... الرخصه لو سمحت والإستماره..
الوسط: أنا ما معي رخصة ، ولا أدري إن كان في المركبة إستمارة وإلا لا.
المخلوق: مسرع ولا معك لا رخصة ولا إستماره ... أنا آسف لازم نسحب منك المركبة.
الوسط: لا تكفى ياخوي... المركبة هذي عهدة من شركة "تعاسا" وأنا موظف عندهم ... لو سحبتها،ما أقدر أرجع لا لهم ولا لغرفتي.
المخلوق: هذي ماهي أول مره تخالفون النظام ، أنا آسف...
وبالفعل سحب المركبة وكتب لي شخاميط على ورقه تذكرني يوم كنت بزقه أسوي نفسي أعرف أقرأ واكتب...
المخلوق: قل لشركتك إن بغوا يرجعون مركبتهم يسددون الغرامه من كوكب "عنجهه" وياخذون المركبة من كوكب حجز المركبات.
الوسط: طيب كيف أرجع أنا ألحين؟؟
المخلوق (بكل برود): خذ لك ليموزين فضائي.
نهاية المطاف
إنطقيت حوالي نص اليوم أنتظر أحد يوصلني... حتى شفت مركبه بيضاء ... أشرت لها وجت على طول ولبقت على سطح الكوكب...
أنا مادري هي لموزين وإلا لا... ولكن مافيه حل ثاني...
ركبت وكان فيه سواق شكله غريب... إسمحوا لي ..ما لي خلق أوصفه... وطلبت منه يوصلني للأرض... ولما نزلني عند الشركة ... أعطيته فلوس من فلوس الأرض... وكنت أنتظر ردة فعله... فأذا ما خذها فركت... ولكنه أخذ الفلوس وراح... وطبعاً أخذت المخالفة وخطاب إستقالتي وحطيتها في صندوق بريد مدير الشركة "أبو نظمي" فبعد اللي صار لا يمكن أوريه وجهي مره ثانيه...
وهكذا مذكرتي العزيزة ... أطوي معك صفحه جديدة من الإخفاق... ولكن القصه لم تنتهي بعد..
سأروي لك في المره القادمه قصة أخرى من نوع آخر من الوظائف .
لأضيفها لمذكرات ملحط يبحث عن وظيفه.
