والله صدقت يا خوي والله تعب سنة ومذاكرة ايام كامله ولا يفصلها الا النوم ذهبت ادراج الرياح
وحسبي الله ونعم الوكيل عليكم ياوزارة التعقيد والتفحيط وحسبي الله على من كتب الاسئلة وحسبي الله على من راجعها وحسبي الله عليكم يالجرايد وحسبي الله على الطلاب الفاشلين اعداء انفسهم اللي كل يوم راز وجهه بالجريدة ويتباهى قدام الناس ويقول ان الاسئلة كانت سهلة وفي مستوانا وحسبي الله على كل من وافق على ان الاسئلة كانت سهلة
والله اني كل يوم افتح الجريدة واقرى احتري يكون فيه احتجاج على الاسئلة والقى التصفيق والتطبيل والتصفير للأسئلة من قبل الطلاب والمراقبين
المشكلة اني ال الان ما لقيت واحد قدامي حل بقدرته من غير غش ولا مساعدة يقول ان اسئلة الرياضيات او الفيزياء او الاحياء او الكيمياء او "المادة الادبية اللي ما لها دخل في تخصصنا " الادب انها سهلة فودي بس مرة القى واحد من اللي يقولون ان الاسئلة سهلة
والله انكم بتضحكون اذا قلت لكم القصة اللي صارت بعد اختبار الاحياء في مدرستنا
جاء صحفي من جريدة الوطن وقابل مع عدة طلاب يسألهم عن اختبار الاحياء وعن الاختبارات الماضية فكان ردهم بالرد المتوقع بانها صعبة و......و........و.......
وبعدها رحنا لبيوتنا مستانسين ان فيه احد عطانا وجه وسألنا عن راينا بالاسئلة عشان نقول الحق
حاء بكرة ورحت شريت الجريدة وشفت صور اخوياي ومقابلتهم والحمد لله لم يتم تحريف شي منها ولكن الغريب انه بعد ما ذكر المقابلة اللي معهم قال الصحفي" هذا وقد خالفهم بالرأي زميلهم الطالب ........................وقال بان الاسئلة كانت متوقعه وفي مستوى الطلاب وسهلة "
انا استغربت من اسم الطالب فعدد طلاب الطبيعي عندنا 180 طالب فقط واعرفهم كلهم
فرحت وسألت اخوياي وطلع الطالب هذا من طلاب الشرعي :wow: :wow: :wow: :wow:
ياحليله وكان يقول ان اسئلة الاحياء سهلة:09: :09: :09:
والله غريبة عاد ما ادري وش صار له بس اكيد تسطر عقب حركته
المهم نرجع لمحور حديثنا انا عطيتكم المثال هذا عشان تعرفون ان اللي يطلعون بالجرايد ويمدحون
بالأسئلة هم ثلاثة اصناف اما 1- طالب كذاب .
أو 2- طالب جايب العيد في الاختبار بس ماصدق على الله ان صورته راح تطلع بالجريدة فراح يسوي تفسه اينشتاين .
أو 3- وهذا الصنف الاكثر بحسب معايشتي لبعض الطلاب وهو انه مغشش في الاختبار فطلع من الاختبار وهو ما تعب حاله ولا حك راسه على مسألة مستعصية .
ومن الامثلة على هذا النوع هو اني كنت بعد اختبار الرياضيات مع احد اخوياي من مدرسة اهلية ومستوى الطالب زفت يعني مو ذاك الطالب اللي تقول انه راح يبدع او راح يمشي نفسه فقلت له
هاه كيف الاختبار جبت العيد ؟؟
قال لا والله الله يعافيهم على هالأسئلة
انا ما خشت مخي هالكلمة واستقعدت له على كل سؤال كيف حليته وتورط
طلع الاخ مغششينه في سؤال الهرم والاختيارات كلها يعني الاخ ما بقى له الا سؤال شبه المنحرف"الله يحرف اصابع اللي حطها" وسؤال التطبيق الفيزيائي:12: :12: يعني ضمن فوق 25 درجة
طيب وش ذنبنا حنا اذا كانت مدرستنا ما تغشش الطلاب
والله حاله والله تعبنا واخرتها ضيقوا علينا الله يضيق عليهم
وما نقول الا حسبنا الله ونعم الوكيل عليكي ياوزارة التربية والتعليم
والله يعيننا واياكم ويرفع نسبنا ويصبر طلاب الثاني ثانوي المقبلي على ثالث في السنة القادمة
"وهذي نصيحة لكل طالب مقبل على ثالث ثانوي ان نسبته في النصف الاول لا تنزل عن 100%
وتراها سهلة جدا جدا جدا جدا مقارنة باسئلة الوزارة . وان تجيب درجات كاملة في جميع المواد النصف الثاني في الاختبار الشهري ونخل لاختبار الوزارة بنسبة كاملة ولاتغتر بها ابدا لان اختبار الرياضيات لوحده سوف يجعل نسبتك تنزل خمس نسب "اذاكنت جايب على الورقة صفر من ثلاثين"
وتنزل ثلاث تسب اذا كنت جايب عشرة من ثلاثين وتنزل نسبة ونصف اذا كنت جايب عشرين من ثلاثين وتنزل 0.8 نسبة اذا جبت 25 من 30 ولا تنسى ان وراك مواد اخرى تلعب بالنسبة مثل الفيز والكيم والاحيا والانجليزي و" اختبار القدرات" فالله يعينكم وشدوا حيلكم وزي ما قلت اهم شي النصف الاول لأن الدرجات بيديكم "
والسلام عليكم
