معانات زيارة طبيب الاسنان
اهلين شباب وشابات
مو جني مزعج كل يوم موضوع:silly:
المهم علشان انا ماراح اطول معاكم اهني وحبيت اترك ذكرى <<ذكرى ماتت:02:
حبيت اترك عندكم ذكرى حسنة:D
ندش الموضوع
شفت فلم جديد حق صامويل جاكسون وفيه كلام عن الاسنان
قلت اروح اشوف طبيب الاسنان
دخلت المستوصف رحت عند الكاتب
الكاتب : بطاقتك اخوي
انا : اتفضل
بس والله تطور عندنا ماله داعي تاخذ ورقة كله كمبيوتر
رحت حطيت لي مكان احجز فيه اسمي عند الطبيب
وقعد بالانتظار مرت نص ساعة ومرت ساعة
انا (بصوت عالي ) : وين الطبيب هذا
مراجع : اول مرة تراجع عند الاسنان
انا : اي
المراجع : انطر عجل
وبعد ساعة ونص جا حضرة الدكتور
الدكتور : شنو فيك
انا : مدري بس بشوف صحة ظروسي
بعد الفحص تبين وجود تكسر بسني الخلفي
الدكتور : لازم تروح التخصصي علشان يسوي لك عملية
انا : عملية شنو كله كسر عادي
الدكتور : لا لازم يقطع العصب ويعدل السن علشان لا يطيح السن
انا (بصوت واطي ) : والله لو بعيادتك الخاصة جان ماقلت جذي
جيت اليوم الصبح علشان اروح لطب الاسنان التخصصي من الساعة 7
دخلت التخصصي الا زحمة الله لايوريك
الي يشوفهم يقول توهم اخترعوا طب الاسنان
رحت للاستقبال
الموظفة : بطاقتك اخوي
انا : اتفضلي
الموظفة : جيب طابع بدينارين
انا : اختي هذي بطاقة مدنية كويتي انا ترا
الموظفة : اسفة اتفضل روح لفتح الملف
الموظفة (حقت فتح الملفات ) : بطاقتك
انا : اتفضلي
الموظفة : روح صورها
بعد تصوير البطاقة
انا : اتفضلي اختي
الموظفة : اتفضل اقعد بالاستراحة خمس دقايق واناديك
بعد خمس دقايق
الموظفة : اتفضل اخوي روح لتدقيق الملفات
وعند موظفة تدقيق الملفات
الموظفة : بطاقتك اخوي ....روح عند تجهيز الملفات
ورحنا عند تجهيز الملفات
الموظفة : بطاقتك اخوي
والله الي يسمعهم يقول انا داش امن الدولة كل شوي بطاقتك
الموظفة : انت سنك يعورك ؟؟
انا : لا
الموظفة : انزين لازم تنطر شوي علشان في ناس محتاجين
انا : عفون اختي بس مافي قانون يقول جذي
الموظفة : خلاص اتفضل ملفك
انا : وبعدين وين اروح
الموظفة :روح الجراحة غرفة 2
عند الغرفة
السيستر (ممرضة ) : ملفك ؟؟....... في ملف واجد اليوم انتى لازم ينطر
انا : اروح الانتظار يعني
اهني اكتشفت العنصرية واننا نحن معشر الشباب او الذكور مظلومين
طبعن صالة انتظاار الرجال جم( عند ) صالة انتظار النساء ومافي فاصل بينهم الا الاستقبال
احنا حاطين لنا تلفزيون ولا قناة الكويت فيها فلم من قبل لايخترعون التلفزيون
واذا يبون يحطون مجلات مجلة وحدة عن الاسنان لا وقديمة
اما النساء
:12:
التلفزيون روتانا بس جت وحدة مطوعة حطت على المجد
ومجلات انواع
طبعن فاضي انطر دوري وماعندي شغل غير اطالع الي راح والي جا
بس والله عالم غريب عجيب
بنات الي يشوفهم يقول رايحين العرس
شباب كل واحد شكله واضح جاي يغازل
عمليات ترقيم ومغازل قدام الناس
مرت ساعة وانا انطر
ما احس الا صوت خفيف ينادي : يالاخو يالاخو
التفت والا الموظفة مالت الاستقبال تنادي
انا : نعم
الموظفة : غريبة قاعد تنطر
انا : ليش وين اروح ترا اول مرة اجي اهني
الموظفة : شوف رزقك
انا ( فاتح حلقي ورافع حاجب واحد يعني مستغرب :31: )) : عفون بس اعتقد عيب هذا الكلام وثانيا انا ما اعرفج ولا تعرفيني شلون اتحاجيني بهالطريقة
الموظفة : بس شوف العالم طايحينله مغازل
مشيت عنها شكلها فاضية وادور سوالف
مرت ساعتين وانا انطر
شوي جان اسمع اسمي :خالد ....خالد
انا (اكلم نفسي ) : في الف خالد
عند الغرفة
الدكتور : انت خالد
انا : اي نعم
الدكتور : اتفضل استريح ..انت خالد القطان
انا : لا هذا مو انا
الدكتور : اسف انطر دورك
ورديت لصالة الانتظار
مرت نص ساعة
نادوا اسمي
ونفس الحالة طلع مو انا
ومرت الوقت نادوا اسمه وطلع هو
عند الغرفة
فيها دكتور كويتي وثاني هندي
الكويتي : اشوف سنك ........ كسر بسيط
الهندي : شوف عنده شي ثاني
الكويتي : حاضر((طبعن الكلام الي بينهم بالنجليزي بس انا اعرف انجلش )))
الكويتي : مافيه شي ثاني
انا : ليش منو هذا ؟؟
الكويتي : هذا استشاري
انا : والله ديموقراطية هندي يتأمر على كويتي
الكويتي : ههههههههه بس معاشه ما يجي نص معاشي
انا : تبي واسطه اخليك اعلى منه
الكويتي : لا مشكور
الكويتي : اتفضل سو لك موعد جديد
انا : من اليوم منقعيني اهني واخر شي موعد جديد
الكويتي : هذي سياسة الوزارة بس اوعدك المرة الجاية تدش على طول اهني
انا : والله شكلك خوش رجال عالعموم يعطيك العافية
عند موظفة المواعيد
شايب : ليش ورقتك غير عني
انا : يمكن انت مرضك غير
الشايب : لا مو حاط طابع الفلوس
انا : كويتي انا
الشايب : اها
الموظفة : بطاقتك
انا : اتفضلي
الموظفة : اتفضل اخوي موعدك
انا : شنو هذا بعد 3 شهور
الموظفة : اي لازم جذي
انا : اوكي بس بسافر بعد شهر
الموظفة : خلاص بخليها بعد ااسبوعين
بعد ما قعدت عندهم 3 ساعات
رحت ابركب السيارة
ولا واحد صافط وراي
انا ( بكل عصبية ) : منو ابن ال**** mother**** الي ******son of****** هذا الي صفط اهني؟؟؟
جا السيكيوريتي ( الامن ) وشرحت له السالفة بعد ربع ساعة جابوه راعي السيارة
انا : يعني قلّت المواقف تصفط وراي
راعي السيارة : اسف والله كنا مستعجل
انا : مستعجل والمصافط كلها فاضية
راعي السيارة : لا انا لما شفت السيارة قلت هذا ولد خير محترم
انا : تبي اطيح معاي الميانة انت شيل سيارتك
ورحت من المكان الي كرهت فيه الدنيا
لو ادري جذي جان رحت عيادة خاصة
انتهى
رد: معانات زيارة طبيب الاسنان
والله حزنتني ><"
فكرتني بنفسي ، أنا رحت عيادة خاصة ، دفعت 300 ريال :31: بس عشان أصلح سنين منخورة ><"
و على مدى 6 جلسات ، الدكتور كان مشغوووول ><"
حتى موظفة الإستقبال سارت تعرفني ، و تناديني بالإسم :09:
شكرا على الموضوع الحلو
رد: معانات زيارة طبيب الاسنان
اقتباس:
المشاركة الأصلية كتبت بواسطة TiTaN
والله حزنتني ><"
فكرتني بنفسي ، أنا رحت عيادة خاصة ، دفعت 300 ريال :31: بس عشان أصلح سنين منخورة ><"
و على مدى 6 جلسات ، الدكتور كان مشغوووول ><"
حتى موظفة الإستقبال سارت تعرفني ، و تناديني بالإسم :09:
شكرا على الموضوع الحلو
300 ريال =:33: 20 دينار
يامعود رخيص هذا
بس 6 جلسات وانت تنطر
الصراحة احسدك على صبرك
مشكلتي اني عجول ماعندي صبر
لو انا كنت مكانك اروح اجيب الدكتور من بيته:31:
والله احنا اهل الخليج مظلومين بالخدمات هذي
مدري ليه يقولون احنا احسن خدمة
بس تدري ترا يمدحون الفيتامين و:p
شكرا عزيزي عالرد والحضور
رد: معانات زيارة طبيب الاسنان
الله أكبر إيش هذي المعاناة ..
عندنا في السعودية يا كثر عيادات الأسنان ..
ما تمر بشارع إلا تشوف إعلان عن عيادة أسنان .. :31:
الحمد لله آخر مرة رحت في لدكتور أسنان قبل أربع سنوات .. :D
المهم في مثل هذي المواقف ما في إلا تشغل فيتامين واو " واسطة " ..
وإلا مستحيل تمشي .. :D
ومشكور على الموضوع الحلو ..
رد: معانات زيارة طبيب الاسنان
اقتباس:
المشاركة الأصلية كتبت بواسطة Pr.Game
الله أكبر إيش هذي المعاناة ..
عندنا في السعودية يا كثر عيادات الأسنان ..
ما تمر بشارع إلا تشوف إعلان عن عيادة أسنان .. :31:
الحمد لله آخر مرة رحت في لدكتور أسنان قبل أربع سنوات .. :D
المهم في مثل هذي المواقف ما في إلا تشغل فيتامين واو " واسطة " ..
وإلا مستحيل تمشي .. :D
ومشكور على الموضوع الحلو ..
اول شي مبروك عليك 18.000 مشاركة ماشاءالله
يابن الحلال
الحمد لله اني ماكنت محتاج بالضرور للطبيب ولا كان شغلت الواسطة
احنا عندنا الواسطات بكل مكان حق كل شي
وبسبب هذي التصرفات نجحت العيادات الخاصة عندنا
مشكور عزيزي عالحضور والرد
