عملية كوماندوز ينفذها أعضاء المنتدى في أفغانستان ج4 (جزء مصرقع ... مصرقع)

بنكمل معكم الجزء الرابع وإن شاء الله بيعجبكم ...
اللي بيتابع ...على الروابط ...

الجزء الأول

الجزء الثاني

الجزء الثالث



(الجزء الرابع)




في بكين


وصل الفريق الأول للعاصمة الصينية( بكين) وتلقى الفاكس التالي:

=====================================

أعضاء الفريق الأول .... أتمنى عند إستلامكم هذا الفاكس أن تكونوا بصحة وعافية (صدقوني بتحتاجونها كثير) .
راح تقابلون واحد من العملاء للمنتدى صيني الجنسية إسمه (واهاوا) ... وهو كان ينسخ الدسكات الأصلية ويرسل منها كوبي للمنتدى أيام الحرب الباردة...
على العموم قابلوه وخذو منه شرايح للجوالات اللي عندكم (أتمنى تكون جوالاتكم حتى الآن سليمة ... لأن ضماناتها إنتهت) ... وراح يعطيكم بغال تعبرون فيها الحدود بين الصين وأفغانستان وملابس رعاة .... وراح تجيكم التعليمات في وقتها ... مكان المقابله مؤشر عليه في الخريطة مرسله مع الفاكس هي و صورة العميل...
ملاحظة: إنتبهوا وأنتم تتعاملون مع (واهاوا) لأنه غريب الأطوار شوي ....
إذا إحتجتوا لشيء إتصلوا علي بالجوال...

كلمة السر: عجوز ضايعه في العجه

ملاحظة أهم من الأولى: الفاكس بينفجر تلقائياً بعد دقيقة من فتحكم له...

رقيب ركن / الوسط


==========================================

دجو: ياخي ذا "الوسط" محلل أبو جدنا... ما يمدينا نوصل مكان إلا يرسلنا لمكان ثاني...

Naf: هذي المخابرات ... ما حد قال لك تدخلها ...

دجو: وهو فيه أحد شاورني ... المنتدى جندني على طول ...

باتيقول: آآآآآه لو أعرف أبن الكلب اللي جندك ... والله لا أروح أنتفه و أذبحه ...

عماد18 :خلاص أنت وياه بنروح نقابل اللي إسمه ...

بووووووووووووووووووووووم م م م (إنفجر الفاكس وامتلأت وجيه الأعضاء بالبارود الأسود من آثار الإنفجار )

عماد 18(ووجهه أسود من آثار الإنفجار): وش اللي صار ؟؟؟؟


وعلى بال ما يستوعب الفريق الأول اللي صار له ... وينظفون أنفسهم ...خلونا نطل على الفريق الثاني...




أمام المكتبة العامة في (تايبية)


المكان : أمام المكتبة العامة
الزمان: 9:30 في التوقيت المحلي
وصل الفريق الثاني للمكتبة العامة في تايبية ... ودخل الأعضاء ...
وسأل الأعضاء عامل في المكتبة عن الكتاب ، المرسلة صورته مع الفاكس (اللي أنفجر في وجوهم) الدوم: ودنا نسألك عن هذا الكتاب ... وين نحصله
العامل: الكتاب اللي تسألون عليه وصلنا أمس ... وهو موجود عند الاستقبال هناك...
وتوجه الأعضاء لمكتب الأعضاء للاستقبال ... وكانت المفاجأة المرعبة ...وآخر شيء يتوقعونه...




مقابلة ساخنة مع (واهاوا)


بعد ما نظف الأعضاء أنفسهم راحوا يقابلون العميل (واهاوا) ،حسب المكان اللي حدده "الوسط"

عماد18: المفروض العميل يقابلنا هنا ...

Naf : طيب أنت تعرف شكله ...

عماد18: إحنا معنا صورته ...

باتيقول: أهم شيء لا يطول ...

وجلس الأعضاء ينتظرون (واهاوا) مدة نصف ساعة ... وفجأة ظهر ... وكان عجوز وظهره منحني ... وماله إلا ضرس واحد في نصف فمه ...

عماد18: هذا هو ... واحد منا يروح يكلمه...

باتيقول: لا تروح يا دجو ... إنثبر هنا ، أنا بأكلمه حتى ما تخرب زي العادة...

وتقدم باتيقول للعجوز (واهاوا) وبدأ يكلمه

باتيقول: أنت (واهاوا) ؟؟؟

واهاوا (وهو مرتبك): مين أنت ... و وش تبي؟؟

باتيقول: إحنا المخابرات ... نبغى منك شيء...

واهاوا (وهو ياخذ وضعية قتال في الكنج فو) : إبعد عني ... أنا أحذرك..

باتيقول (وهو يتقرب منه) : تعال يا عجوز يا طيب لا تخاف ... هههههه

وفجأه بحركة سريعة وقوية ضرب (واهاوا) برجله (باتيقول) في منتصف وجهه تماماً ...

باتيقول (وهو تحت تأثير الضربه) : مين رمى قنبله ؟؟؟

عماد18 :كلمة السر " عجوز ضايعه في العجه " ...

وتوقف (واهاوا) عن حركات الكونغ فو وقال :ليش ما قلتوا لي من الأول ...

وراح Naf ودجو يطمئنون على باتيقول ...

Naf : والله يا عطاك وحده على كيفك ..

دجو : ههههه ... تستاهل يالمخلص

باتيقول (بعد ما بدا يستعيد وعيه): فكوني على العجوز ... والله لأكسر ضرسه ...

عماد18 :إحنا من المخابرات ... والمفروض إن معك أغراض لنا...

واهاوا : إبيكم تجون معي ...

وراح الأعضاء معه حتى وصلوا لبيت صغير وهناك ... أعطاهم (واهاوا) شرايح للجوال ... وملابس رعاة ... وبغال ... وبعض الأغراض... وفاكس مرسل من مخابرات المنتدى ...

وبعد ما أخذ الأعضاء الأغراض ... جوا يمشون للحدود الأفغانية ...

واهاوا: لحظة لو سمحتم ...

عماد18: نعم ... فيه شيء ...

واهاوا : "الوسط" قال لي إنكم اللي بتحاسبوني على الأغراض اللي أخذتوها ...

ومره ثانيه قام الأعضاء يناظرون في بعضهم باستغراب ...




بنكمل بعد شوي على هذا الرابط

نكمل


مطاردة في شوارع( تايبية)


لما راح الأعضاء للاستقبال علشان ياخذون الكتاب ،لقوا مفاجأة مرعبة، كان الكتاب اللي يبونه موجود ... ولكن مع واحد أمريكي يبغى يشتريه ... وكان واضح من ملامحه إنه من CIA واهاوا ... وإنصدم الأعضاء ..

خالد1 : هذا من CIA ... أنامتأكد ...

الدوم: زي ما حذرنا "الوسط"

Dr.Lucifer: كيف وصلوا له قبلنا ...

خالد1: وصولوا له وإلا لا ... إحنا لازم ناخذه منهم ...

الدوم : كيف ؟؟؟

خالد1: نستعمل خطة الطواريء 3 ... يروح Selfer يخطف منه الكتاب ويهرب ... وإحنا نعطله إذا جا يلحقه ..

Selfer : نعم !!! أروح أنا ؟؟؟ ليش ؟؟؟ ليش ماتروح أنت ...

خالد1: هذا ماهو وقت السؤال ... يالله روح سوي اللي قلت لك...

وراح Selfer للعميل الأمريكي أمام أعين باقي الأعضاء ... وبدأ يكلم العميل الأمريكي ... ثم تبسم له ... ثم رجع بدون ما ياخذ الكتاب..

الدوم: ليش رجعت بدون الكتاب ؟؟؟؟؟

Selfer : ياخي والله إنه رجال حبيب ... طلبت منه الكتاب وإعتذر لي بأدب .. وقال إنه محتاج له ... وقعدنا نسولف شوي ...

خالد1 (ووجهه أحمر من الغضب) : كان لازم أعرف إنه ما يعتمد عليك ...

ووقف خالد1 قدام الأمريكي ... وفجأة خطف الكتاب وركض ...
ولحقه الأمريكي ومعه 7 من زملائه وإتجهوا لأعضاء الفريق...

Dr.Lucifer: أأأ ... المفروض يلحقه واحد علشان نطبق الخطة 3 ... والآن وش نسوي ...

الدوم (وهو يركض): إركض ولا تفكر بخطط ...

وبدأ أصدقائنا يركضون ومهم الكتاب ... وصارت مطاردة في الشارع ... أربعة أعضاء من المنتدى يلحقهم 8 أمريكان ...
وبطريقة ما قدر الأعضاء يتوهون اللي يلحقونهم ...وجلسوا ياخذون نفس ...

الدوم : آه ...آه ... الخطة ما مشت زي ما نبي ...

خالد1 : آه. .. آه ...كان لازم نتأكد إنه ما معه أحد ...

وفجأة وقفت سيارة سوداء عندهم ... وكانت مظلله بأسود ونزل منها 7 رجال لابسين أسود وإتجهوا لأصدقائنا ...

ومره ثانية رجع أصدقائنا للركض...

الدوم: مين وين جوا هذولي ...

Dr.Lucifer: نص سكان المدينة قاعد يطاردنا ...

Selfer : والنص الثاني يخطط إنه يطاردنا ...

ودخل أصدقائنا مع شوارع ضيقة حتى ما تلحقهم السيارة ...

ولقى أصدقائنا أحد رجال الشرطة التايوانيين ... وأتجه أًصدقائنا له مباشرة يطلبون منه المساعدة...

وتكلم خالد1 للشرطي : آه ... آه ... لو سمحت فيه عصابه قاعده تلاحقنا يبغون يسرقون مننا كتاب معنا ...

وإلتفت لهم الشرطي ومعه مسدس موجه لهم وقال : إحنا يهمنا الكتاب اللي معكم ...

وأخذ Selfer الكتاب وضرب فيه الشرطي على راسه بقوه وقال له: خذ إقراه إن كنت مصُر...
ووقع الشرطي وهو دايخ من أثر الضربة بالكتاب

ورجع مره ثانيه أصدقائنا يركضون ...

Dr.Lucifer: الكتاب هذا قاعد يدخلنا في مشاكل ويطلعنا منها بصورة منتظمة ...

Selfer : يمكن نلقى فرصة في يوم من الأيام إننا نقراه ...

وعلى بال ما يلقى أصدقائنا فرصة إنهم يهربون ... خلونا نشوف الفريق الأول...




على الحدود الصينية - الأفغانية


كان اعضاء الفريق الأول راكبين بغال ويقطعون الحدود من مكان مافيه مراقبه من حرس الحدود ... وكانوا متعبين جداً بعد المشي على البغال مدة أربع ساعات...

Naf : هذا "الوسط" نصاب و حرامي ... خلانا ندفع كل شيء من جيوبنا ... كأننا نسوي العملية لأنفسنا ...

دجو: لو سمحت لا تسب الرقيب ركن ...

باتيقول: حتى رتبته ما دري وش تبي ...

عماد18: خلاص ... وصلنا المنطقه اللي مفروض نقابل فيها واحد من العملاء ...

وتوقف الأعضاء ليستريحوا بعد التعب ...

عماد 18 (وهو يحاول يسمع لشيء): كأني أسمع صوت شيء يقرب ...

باتيقول: يااااه هذا السروال مريح مره ... أحسن من بيجامتي اللي في البيت ...

دجو: لحظة ... لحظة ... هذا سروالي ... جرررررر ... أنت سرقته مني ...

باتقيول: أنا ما سرقت منك شيء ... أنا كسبته منك في رهان ...

عماد18: إص ... خلوني أسمع ...

دجو: رهان ؟؟؟ أي رهان ... أنت دايم تسرق الأشياء ... مثل الجزم...

عماد18 (وهو يصرخ من الغضب) : خلاااااااااص ... ما تفهم أنت وياه ...

Naf : فعلاً أسمع صوت شيء يقرب ...

وفجأة ظهرت هيلوكبتر أمريكية من نوع أباتشي ... واتجهت لهم مباشرة ...




الفريق الثاني ينجز مهمته


تحت صندوق زبالة كبير ، كانت أربع أزواج من العيون تنظر بحذر للمكان ...

Dr.Lucifer: وووععععععععععع ... ريحه تصرع ...

Selfer : ما فيه غير هذا المكان نختبي فيه ؟؟؟

خالد1: المفروض إننا نقابل العميل السري هنا ... وبعدين لا تنسى إن كل المدينة تدور عنا ...

الدوم: أتمنى ما يطول ...

وفجأة ظهر رجل نحيل ومرتبك ... وكان معه كيس ...

خالد1: هذا هو ...

وظهر له الأعضاء ... وعرفوه بنفسهم ...

العميل: ليش كنتوا مختفين تحت الزبالة ...

الدوم: أأأأ .... هههه (يضحك بحياء) ... تعرف لزوم حبكة الشغل ... هههه...

Dr.Lucifer (وهو يضحك بحياء أيضاً) : إيه ... صح ... ههههه

العميل (وهو ينظر لهم باستغراب) : على العموم المفروض إني أسلمكم رسالة وكيس ... وأستلم منكم كتاب ...

وهذا اللي حصل ... وبعد ما راح العميل السري ... فتح خالد1 الرسالة ... وكان مكتوب فيها...


===================================

أعزائي أعضاء الفريق الثاني ...

عند إستلامكم لهذا الفاكس ... يفترض أن تكونوا على قيد الحياة ...
وأن تكونوا أنجز توا المهمة على أكمل وجه...
والآن يجب أن تلاقوا الفريق الأول في أفغانستان لتنفيذ المهمة الأخيرة ... نقطة التقائكم معهم موضحه بالخريطة ... التي أرسلتها مع الرسالة ...

ملاحظة مهمة : الرسالة ستنفجر بعد خمس دقائق

===================================


وبينما كان الأعضاء مستعدين للإنصراف ظهر لهم فجأة واحد من CIA ومعه مسدس كبير ...

العميل: أخيراً طحتوا بين يديني ... أعطوني الورقة اللي معكم ... وراح أخليكم تمشون في حالكم...

خالد1(وهو يكلم الدوم) : أعطيه الرسالة ...

الدوم: ليش أعطيها له ؟؟؟

خالد1: أعطيها إياه بلا فلسفة ...

وأخذ خالد1 الرسالة وأعطاها للعميل ...

وما كاد العميل يفتح الورقة ... بووووووووووم م م م ... وركض الأعضاء مره ثانية ...

خالد1: ما راح أشتكي مره ثانية من طريقة "الوسط" في إرسال الفاكسات...



الفريق الأول في المصيدة


ما كاد أصدقائنا يلمحون الهيلوكبتر حتى إختبوا في كهف قريب جداً هم والبغال اللي معهم...
وأمام أعينهم هبطت الهيلوكبتر ونزل منها أربع جنود أمريكان يحملون رشاشات ضخمة ...
ونزل بعدهم رئيسهم ...

باتيقول: واعمل راح يلقونا بسرعة ...

Naf : هذا اللي ما حسبنا حسابه ... دق تكفى يا عماد18 على " الوسط" يمكن يرسل أحد ينقذنا ...

وبدون تردد دق عماد18 على جوال " الوسط" ...

توووووووووت ... تووووووووت ... توووووووووتت ..

الوسط: خخخخخ ... هاه .. مين ... وين ...

عماد18: إحنا الفريق الأول في المخابرات ... إحنا محصرين ونطلب مساعدة ..

الوسط: بعدين .... بعدين ... أنا نايم الحين ... (وسكر الجوال في وجه عماد18)

عماد18: ألو ... ألو ...

باتيقول: وش صار ؟؟؟

وما رد عليه عماد18 وإتصل بالوسط مره ثانية ... ورد علية صوت يقول (عفواً ... إن الجهاز المطلوب لا يمكن الإتصال به الآن .. يرجى المحاولة فيما بعد ... وشكراً) ...وإتصل عماد18 ثالثة ورابعة وخامسة ... وفي كل مرة نفس الرد ... ولما يئس رمى الجوال وجلس الأعضاء يناظرون في بعض بحيرة ...

في ذلك الوقت كان الجنود الأمريكيين يمشطون المنطقة ... وكأنهم يبحثون عن شيء ...

الرئيس: أنت متأكد إنك شفت أربع أشخاص في المنطقة ...

الجندي: نعم سيدي ... كانوا واقفين في هذي المنطقة بالضبط ...

الرئيس: واصلوا البحث ... أكيد إنهم مختبين في أحد المغارات ...

وفجأة طلع صوت ... ععععاااااااااااااووووووو

جندي1: ذئاب ...

الرئيس (وهو قلق) : الظاهر إن اللي شافهم الجندي ذئاب .. يالله نمشي ... وحتى لو كانوا آدميين ما راح ينجون من الذئاب ...

ورجع الجنود للهيلوكبتر وابتعدوا عن المنطقة ...

باتيقول: ههههههاااااايييييي.... والله حلوة منك يادجو إنك تقلد صوت الذياب وتخوفهم ..

دجو: أنا عندي مواهب كثيرة مرة ... إحم ... إحم ...

عماد (وهو ينظر لحافة الجبل) :والآن كيف ننزل ...

ععععععععاااااااااااااااووووووووووو

عماد18: خلاص كفاية يادجو ...يكفي تقليد الأصوات ...

دجو: لكني ما قلت شيء ...

وإلتفت الأعضاء وراهم بحذر وشاهدوا خلفهم مباشرة حوالي 300 ذيب جائع ...

الأعضاء (بأعلى صوت) : ذئئئئئئئئئاااااااااااااابببببببب ...

وإندفعوا لحافة الجبل ... وتدحرجوا هم والبغال ...

دجو(وهو يتدحرج) : ما يحتاج طريق ...

باتيقول: آآآآآييييي ... بنوصل بسرعة..

ولما وصلوا الأرض ... كانوا يتألمون من الدحرجة ...

باتيقول : آه ... آه...هبوط رائع ...آه

وقاموا ينفظون التراب اللي مغطيهم ... وإنتبهوا لشيء...
إنهم لقوا نفسهم محوطين بعشرات الرجال .. المسلحين ...





إنتهى هذا الجزء

أتمنى يكون هذا الجزء أعجبكم وباقي جزء أو إثنين بالكثير بأنشرها يوم الثلاثاء إن شاء الله...

هههههههههههههههههههههههههههههههههههههههااااي توب عشره على عشره يا عسل:D كملللللللللللل:D

روعة :) ..
بس لو تبدا بالجد يكون احسن يعني لا تخليها مسلسل مصري نص ساعة على لقطة واحد يفكر ..

روووعه يالمنسم

بس ليش دايما انا ودجو ادوارنا هبال مو جديين مثل ناف وعمااد ههههه
هههههههههه بس تصدق لايق علينا تسذا ههههههه

ههههههههههههههههههاااااااااااااااي حلوووه :D

اقتباس:

---

كتب العضو (باتيقـول)
بس ليش دايما انا ودجو ادوارنا هبال مو جديين مثل ناف وعمااد ههههه
هههههههههه بس تصدق لايق علينا تسذا ههههههه

---

لايق اجل:p :)

كخخخخخخخخخخخخخخخخخخخ والله روعة كخخخخخخخخخخخخخ بالله كمللللللللللللللللل :D

مشكووووووووووووووووووووووووووووور

بس لو تخلي كل الاجزاء في موضوع واحد يكون احسن

داج2222

والله مشكور يا عسل يا موهق الفريق كله ... :D :D :D

=============================

عماد18

مشكور على الملاحظة وياليت توضح أكثر تكفى ...
المهم عسى القصة أعجبتك ؟؟؟؟

============================

باتيقول

بس ليش دايما انا ودجو ادوارنا هبال مو جديين مثل ناف وعمااد ههههه
هههههههههه بس تصدق لايق علينا تسذا ههههههه

-------------------------------------------------
والله وأنا أخوك إني مادري ... غصب عني والله...
يمكن إيحاء الأسماء

============================

خـالد عبدالرحمن


وين الناس ... رديت أول جزء ... وبعدها ما شفناك ...
لازم تكون موجود علشان مصلحة الفريق اللي معك ...

:أفكر:

======================

THE LUCKY GUY


شكرا يالغالي

=====================

النايم

مشكور... المشكلة إنها طويلة ولو طولتها ... ماحد قراها...
فأنا حاوللت أختصر قد ما أقدر

====================

مشكورين كلكم .. وتقبلوا تحياتي


الوسط

يعني حاول تخلي الاحداث سريعة ..
مو كل شوي راحوا و جاؤا و قالوا :) ..
القصة روعة اكيد و الا ما كان رديت :D

حلوووووووووووووووو....


يله متى بتكملها؟؟؟

عماد18

والله ملاحظة حلوه مره .... مشكور ...

=====================

naf

إن شاء الله بكره ,,, وأفككم من هذي القصة ...
=====================


وتقبلوا تحياتي


الوسط

هلا
كيف الحال .
اشكرك على قصصك الجميله .
بس أنا آسف على عدم متابعتي لها بانتظام
وشكراً

والله إنك رهيب .
قريت قصتك من أولها الى آخرها .
فكرتها حلوه صراحه
وشكراً .
كممممممممممممممل