قصيدة لابن طناف الكعبي / ومجاراه من معالي ( علي بن سالم الكعبي)

بسم الله الرحمن الرحيم


إثر مقابلة تلفزيونية صرح فيها الشاعر القطري ( محمد الذيب ) أن شعراء الساحة الشعبية هم عبارة عن طحالب جاء رد الشاعر الإماراتي ( محمد بن طناف الكعبي ).. وقام معالي : ( علي بن سالم الكعبي ) بمجاراته في هذه القصيدة، نترك بين أياديكم الرد والمجاراة.

يا ابن الذيب

كلمات : محمد بن طناف الكعبي



http://songs.dubaimoon.com/arshef2/Gololh-bn-6naaf.ram


قولوله ابن الذيب قولو لـه ع شانـه يستشيـط
أني إذا جيته أبسحب من تحت رجلـه البسـاط
ماني أبالغ في الكلام أو أن ذا زيـف وخريـط
ولا قول ذا من حيث قلة عقل أو أنـه اعتبـاط
ما يستوي يغلط ع خلق الله ويا زم شيـط ميـط
مادام مـاط النـاس لا بـده أيتحمـل للميـاط
الناس قامت تشتكي منـه وهـو أمـره بسيـط
ان كان يبغيها زمـاط أنـا تـرى قـد الزمـاط
آهـا تحانـي وشـد العـزم مادمـك نشـيـط
وان كان ماعندك نشـاط أنـا بمـدك بالنشـاط
وإن كنت مانته مقتنع فينا ترى ذوقـك حطيـط
وعديتنا مثـل الطحالـب وش نعـدك لنحطـاط
وين الملوك ووين شيخان العرب معطى الصفيط
إذا نوولك في الشعر مالك على البركن صفـاط
مثل الزعيم الفارس الشاعر يلي يلقـب سليـط
لي مايفوته شي يلقطهـا علـى الطايـر لقـاط
بو راشد محمد إبن راشد أبـو الأمـر القليـط
على أبو أكبر شنب وأهـل الممالـك والبـلاط
ولو ما أحاتي بالرضا فـزاع ماخفـت اللغيـط
لي ماوفاه الذيـب وامثالـه ولا شعـر لنبـاط
الشاعر الفارس الشيخ الراقي الشمـخ البسيـط
يكفي بأنك بس لـو تشوفـه تحـس بالأنبسـاط
إذا سمح لي طال عمره أستأذنه أقص الشريـط
وإن ماسمح لي سيدي أمره ومع الأمـر اتعـاط
أقولهـا مـن حيثـنـي بالله وبالله مستحـيـط
من كل شيطانٍ رجيمٍ واعمله ومـا بـه منـاط
الشعر علمه مثل ميـدان الكـرة لعبـة رهيـط
اليوم تلعبـه أساسـي وبكـره تلعبـه احتيـاط
يا الذيب علامك تحوّط وانت شكلـك ماحويـط
بالشعر مستهتر وراعي الشعر تمسح به البـلاط
وأنته ولا أنته قد لي تستعبطه وما أنـت بعبيـط
أبنصحك نصيحة ٍ أوضع ع الحـروف النقـاط
ما عدا نبكي ع الشباط المنشبـط بـرّا الشبيـط
ما قد قفى قد راح في حالـه ولا يفيـد العيـاط
وش لي تزمّر صادعنا طيط طاط وطاط طيـط
ما حيدنا جيناك لديـارك نبـا انملـي الشنـاط
ان كنت يا ابن الذيب بحر أنا ترا جنبك محيـط
وان كنت حايط لك على شلة أنا بقومي محـاط
لو ماطويـل العمـر فـزاع وزَعلـه مايحيـط
ولو ما مراعا للشعور وخوفتي يفـك الربـاط
ولو ماعربنا والسلوم وخوفتي يـدش الوسيـط
لعلن عليك الحرب من ساحل دبي إلى الربـاط
ياخي أتق الله وخاف ربك والكبر أكبـر سليـط
على بني آدم يوديبـه علـى عـوج الصـراط
الشعر ماهوب ملك لك ولا أن بالأمر البسيـط
واحنا بدو مانقبـل الشينـه ولا نقنـى السيـاط
يا هيه وش تعلم عن الشعـار عشانـك تميـط
لثامة السانك وتوضع للشعـر منـك اشتـراط
الشعر يا ابن الذيب ماهوب أمسيـة ولا سقيـط
الشعر من قبلك ومـن قبلـي ولا يـاه انفـراط





المزون

كلمات : معالي / علي بن سالم الكعبي





شفت المزون الساريـه وبروقهـا باتـت تشيـط
تلمع شرا التبر المصفى معدنـه عالـي القـراط
جاريت بن طناف شفتـه للعـلا سيـره شطيـط
شهم إذا عزم عزومه بـرق فـي عليـاه شـاط
وانا يميني تخـط خـطٍ منطلـق ماهـي قميـط
وان قصرت يمناي مرفـق قصهـا حـد الأبـاط
ولأنه إبـن عـم ورفيـقٍ ودمـي بدمـه خليـط
ومن هاش ياره هاش كيف إن صار بالدم اختلاط
وحروف شعره يشهد الله بالبحر غطـت عطيـط
والتقطت الدر المنقى من غـزر بحـره التقـاط
شاعر ولا يحتاج فزعـه ولا لفـا قولـه لقيـط
من فكر راسه يرسله به لو سمـا العليـا تنـاط
بالعزم يوصل مقصـده مايـازم مكتـف ربيـط
من لابة تفـك الحبـال العاصيـة فـك القمـاط
يسبك حروفه من ذهب ماينسـج بهـدبٍ وخيـط
وبالحر لو هو واجهه يشفط له امواجـه شفـاط
والشعر سيفـه يحفظـه راعيـه مايـازم سليـط
ولا يجرح اشعور العرب يخبط بسنونـه خبـاط
يحفظ لسانـك لايوقـوق مـن توقويـق البطيـط
وان كثّـر بالحكـي تكثـر بمضمونـه اغـلاط
قالوا عصى العزة قبـل مارزهـا وابهـا غبيـط
عيال النسا تكسر عصاه وتمـرط العـزه مـراط
واللي مشـى متخبـطٍ مايوزنـه حكيـه فريـط
بيعلومنه بكـل معنـى شـو معانـي الأنضبـاط
خلك بجوك يالخوي خلك كما الشهـب المحيـط
ولكل شيطانٍ رجيـم شهـبٍ يقطـع لـه النيـاط
لن الجبل صح الصخر ماشبهـه طابـوق حيـط
ثابت وساسك تعرفـه كـل الزوايـا والأوسـاط
قومك يخوضون البحر ماهمهـم كثـر الشعيـط
صنوف الشعر ألهم معاهـا كـل قـوّة وارتبـاط
صاغوا الغزل فخر وعوايد والهجا شخطوا شخيط
درب الفرزدق مع جريرٍ ان انهجوا شبوا الشخاط
عاداتنا لو شـق مخطـي بالفكـر نفـزع نخيـط
نرفا الشقوق الكايـدة وبحكمـة العاقـل تخـاط
انميز العدلـة مـن العوجـى ولا نخبـط خبيـط
ونعرف شهر ايلول مع كانون بوقته مـن شبـاط
والشعر معنى يحترم كـل احتـرام ولـه ننيـط
ألنا تواريخ وقوافـي مـن عهـود أبـو قـراط
واجب على الشاعر وجب من قبل تسجيل الشريط
يدرس ولادة جسـم فكـره ويغسلهـا مالمخـاط
للراس مشط ايسرحه ولا شـك للحيـه مشيـط
وهي بلا اذراع وجدايـل يعنـي الأسـم انتبـاط
كم شاعرٍ لي جاب راس امن المثل جابه سميـط
إذا اكتبوا جنب البـلاط وهـو قراهـا جنبـلاط
ماهو شروى الذيب شاعر فـذ بالبحـر الغويـط
ولاهوب بن طناف سبـاح العريضـات الغـواط
والله مارديت لجل انفـخ شـرى رقطـاً رقيـط
رديـت أهديهـا وسكنهـا حيـطـه واحتـيـاط
والكم سلامي والشعر كل يوم له حوت ومحيـط
يبدا إلى ان يولجون الجمـل فـي سـم الخيـاط

منقول

قصيدة طناف سمعته قالوا لي السبب إن الذيب هجا الشيخ حمدان :boggled:

اقتباس:

---

ولو ما أحاتي بالرضا فـزاع ماخفـت اللغيـط
لي ماوفاه الذيـب وامثالـه ولا شعـر لنبـاط
الشاعر الفارس الشيخ الراقي الشمـخ البسيـط

---

وبنفسي شايفة أمسيه لـ الذيب يمدح فيها الشيخ حمدان و شيوخ الامارات << صدق إنه بويهين:31:
ولو تلاحظ إنه ما حضر مسابقة شاعر المليون بعد ما تاهل>> أو يمكن أستعبدوه منها

قصيدة علي الكعبي أول مره أقراها

يعطيك العافيه اخويه xuae_3 ^_^

اقتباس:

---

المشاركة الأصلية كتبت بواسطة ابتسامــــــه

قصيدة طناف سمعته قالوا لي السبب إن الذيب هجا الشيخ حمدان :boggled:

وبنفسي شايفة أمسيه لـ الذيب يمدح فيها الشيخ حمدان و شيوخ الامارات << صدق إنه بويهين:31:
ولو تلاحظ إنه ما حضر مسابقة شاعر المليون بعد ما تاهل>> أو يمكن أستعبدوه منها

قصيدة علي الكعبي أول مره أقراها

يعطيك العافيه اخويه xuae_3 ^_^

---

الله يعافيج أختي^^
تسلمي ع الرد

بعد الشكر لصاحب الموضوع

يؤسفني أن يصل بنا الأمر ان نرى الشعر كالتالي:

"الشعر علمه مثل ميـدان الكـرة لعبـة رهيـط
اليوم تلعبـه أساسـي وبكـره تلعبـه احتيـاط"

ولا ازيد على هذا
تحياتي
بدر

اقتباس:

---

المشاركة الأصلية كتبت بواسطة Mr.FMZ

بعد الشكر لصاحب الموضوع

يؤسفني أن يصل بنا الأمر ان نرى الشعر كالتالي:

"الشعر علمه مثل ميـدان الكـرة لعبـة رهيـط
اليوم تلعبـه أساسـي وبكـره تلعبـه احتيـاط"

ولا ازيد على هذا
تحياتي

بدر

---

العفو اخوي
حياك,,,,,