بسم الله الرحمن الرحيم
السلام عليكم ورحمة والله وبركاته ، أهلا وسهلا بكم في الجزء الثالث من سلسلة بداية الحديد من قبل العضو VaSh ThE sTaMpEdE ، اذا كنت تريد زيارة الأجزاء السابقة زور الروابط التالية :
موضوعنا اليوم عن :
عضلات الجسم
طبعا رياضة كمال الأجسام هي رياضية لتمرين العضلات ، لتحسين مظهرها ، قوتها ، تحملها . وطبع لازم كل واحد يلعب حديد يعرف كل عضلات الجسم الي يقدر يمرنها . وفي هذا الموضوع ، إن شاء الله بأجيبلك صور ومعلومات عن العضلات لتفيدكم. ويا ليت تردون وتقولون لي إذا هذي المواضيع فادتكم ولا لأ لأني بأحس بسعادة لما أعرف إني ساعدت الواحد .
الرقبة Neck : كثيرا ما يتم تجاهل هذه العضلة . بصراحة هي مب مهمة مرة ، بس للشخص الي يبي يخش التحديات ( مثل التحديات الأولومبية Olymipics ) ولا يلعب رياضة خطرة ( مثل كرة القدم الأمريكية American Football ) فعليها تمرين هذا العضلة لتحسين الشكر وتقوية العضلة لتقليل الإصابات .
الترابس Traps : نفس الشيء مع هذي العضلة ، الكثير يتجاهلها ، وصح مهمة للأسباب السابقة ، ولكن لو الواحد يبي جسم حلو ، لازم يمرن الترابس ، وزيادة على كذا هي عضلة سهلة التمرين وتفيد الظهر .
الكتف Shoulder : عضلة الكتف تتقسم إلى 3 أقسام رئيسية هي :
- الكتف الأمامي Front Shoulder
- الكتف الجانبي Side Shoulder
- الكتف الخلفي Back Shoulder
أي تمرين للكتوف يضرب كل هذا المجموعة ، هذا بالنسبة للناس الي خاشين الحديد عشان القوة والشكل ( مثلي ) ، أما الي ناوي يخش تحديات ، أحسن إنها يسوي عدة تمرينات عشان يضرب كل جهة ويعطيها تركيز قوي .
الصدر Chest : يا زين هالعضلة بس ، كل الرجال يبونها ، ليه ؟ لأن لما تخش على أخوياك في المجلس ، ولا تمشي برا عند الناس ، هالعضلة تجيبلك الاحترام ، الناس يعرفون إنك تلعب حديد ، يعرفون إنك قوي ، كل ما شلت وزن أكثر ، كل ما برز الصدر أكثر .
الترايسب Tricep : الجزء السفلي من الذراع . وهي تمثل ثلثين الذراع . وهذا المعلومة مهمة جدا ، كثير ناس يمرنون البايسب Bicep أكثر ويتجاهلون الترايسب Tricep عشانها العضلات الي الي تجي عليها نظر الواحد ، لو كنت ناوي تكبر حجم يدك ، مرن الترايسب ، تراهي تشكل ثلثين من حجم الذراع . أي تمرين تستخدم فيه دفع الذراع يمرن الترايسب .
البايسب Bicep : عضلة كثير من الناس يعطونها اهتمام أكثر من أختها ويحسبون إنهم لو مرنوها أكثر كبرت يدهم ، تراهي العكس . بس هذا العضلة تكون في أمام الذراع ، مما يعني إنها حتكون بارزة عند الناس ، والي يبي شكل حلو لازم يمرنها . عضلة البايسب تكون في أي تمرين فيه سحب الذراع .
الساعد Forearm : هذا عضلة يتجاهلونها كثير من الناس مدري ليه ( حتى أنا :p ) ، والمشكلة إنه بعد الواحد ما يلعب حديد لمدة طويلة ، يلاقي الجزء الأول من ذراعه كبيرة ( بسبب تمرين التراي والباي ) والجزء الثاني صغير .
البطن Abs : ووو هذي لو قعدت أتكلم لين بكرة ما أخلص كلامي عن كثر حب الناس فيها ، عضلات يبونها كل الشباب ، يعشقونها كل البنات ، وتدهش كل الناس ( لما تفصخ بلوزتك :09: ) . هناك كثير من الخلافات الي تصير مع هذي العضلة ، ناس يقولون لازم تمرنها كل يوم ، ناس يقولون 3 مرات في الأسبوع ، وناس مثلي يمرنوها مرة وحدة في الأسبوع ، والسبب في ذلك إني أشوفها مثل أي عضلة غيرها ، كل عضلة تحتاج راحة . هالعضلة أحلى عضلة في الجسم وأصعبها تحقيقا ، بس إذا كانت فيك النية إن شاء الله يمديك تبرزها . لا تنسون إن عضلات البطن الجانبية الي نسميها أوبليكس Obliques تعتبر جزء منها . تمرين العضلات الأمامية يقدر يكون يوزن زائد أو بدون ، أما الأوبليكس ينصح بعدم تمرينها بزيادة الوزن لأنها حتكبر خصرك ويطلع شكلك يضحك .
اللاتس Lats : هذي عضلة مب كثير يعرفون عنها بس يمرنوها بشكل ممتاز ، كيف ؟ الجواب هو أن معظم تمرينات الظهر يكون فيها استعمال اللاتس ، وكمان بعض تمرينات الصدر ( مثل ال bench press ) تستخدم اللاتس ( ولكن بنسبة صغيرة جدا ) . وهناك أيضا تمرينات خاصة باللاتس .
منتصف الظهر Middle Back : عضلات الظهر كلها على بعض ( الترابس + لاتس + منتصف الظهر + أسفل الظهر ) تمثل جزء كبير من جسم الإنسان ، حيث إنها الجزء الخلفي . عضلات منتصف الظهر تعطيك صلابة وقوي في الظهر ، يعني لو واحد جاب عصا وضربها في ظهرك ( لحد يتهور ويجرب عاد :silly: ) حتكون الإصابة أقل بكثير إذا كانت العضلة ممرنة .
أسفل الظهر Lower Back : ياما وأنا أقول ياما نسمع على آلام مشاكل الظهر السفلية ، نسمعها من الكبار والعجايز وحتى الشباب ( للأسف ) . عشان كذا العضلة مهمة جدا ، تمثل قاعدة ظهرك ، تمرينها يقويها ويخفف آلام الظهر بشكل كبير .
المؤخرة Glutes : بصراحة أنا ما عطيت هالعضلة وجه ، مب يعني إنه ضدها ، بس أن هدفي جسم حلو كبير بارز عضلاته ، ما همني عضلات مؤخرتي :silly: . ولكن الي يبي يخش تحديات ، عليه تمرين هالعضلة . وأصلا لو تبي ولا ما تبي تمرنها ، هالعضلة تشارك في كثير من تمارين الرجل مثل ال squat .
الفخذ Quadricep : هذي زي الترايسب في اليد . تحتاج تمرين ، وتخلي رجل الواحد قوية . المشكلة إن كثير من الناس يتجاهلون كل عضلات الأرجل ( الفخوذ والكالفز و أوتار الركبة ) يكون شكله غبي ، يعني جسمه العلوي قوي وحلو وثقيل ، وتلاقي رجوله كأنها عود أسنان ، ما ينفع هالكلام يا شيخ .:09:
أوتار الركبة Hamstrings : قبل ما أبدا بس حبيت أقولكم أدري الترجمة غبية بس هذي الترجمة الوحيدة الي لقيتها ( لأني أنا عن نفسي أتعامل بالإنجليزي مع العضلات ) . هالعضلة مثل البايسب بس حقت الرجل ، مرنها عشان تقوى وتكبر رجلك .
الكالفز calves : مثل السواعد . نفس الكلام يجي هنا ، بس رجول . :D
انتهينا من الجزء الثالث . وإن شاء الله في الجزء الرابع أكتب عن طريقة التمرين وجداول التمرين . وكمان في المستقبل ناوي أكتب عن البروتين بالتفصيل .
باقيلي 160 يوم عشان أرجع السعودية ، يا رب تمر بسرعة :D . ايه للمعوملة ، تراي لوحة المفاتيح الي عنده ما فيها عربي، كلها من ذاكرتي ، يعني سامحوني إذا لقيتوا أخطاء إملائية
أخوكم VaSh ThE sTaMpEdE ، منتظر ردودكم .
