احنا الشعب .... صلاح جاهين

احنا الشعب
احنا الشعب
اخترناك من قلب الشعب
يافاتح باب الحريه
ياريس ياكبير القلب
*****
ياحلاوة الشعب وهوه بيهتف باسم حبيبه
مبروك ع الشعب خلاص السعد حيبقى نصيبه
واحنا اخترناك
وح نمشى وراك
احنا الشعب
*****
احنا حياتك وابتساماتك وانت حياتنا
احنا بنفرح وأنت بتفرح من فرحتنا
كل مانكبر قلبك يكبر بمحبتنا
واحنا اخترناك
وح نمشى وراك
احنا الشعب
*****
ياللى بتسهر لجل ما تظهر شمس هنانا
احنا جنودك ايدنا فى ايدك مصر امانه
بكره وطننا ح يصبح جنه وانت معانا
واحنا اخترناك
وح نمشى وراك
احنا الشعب
*****
ياللى واعدنا بأيام عيدنا هل هلالك
بكره يابكره مشتاق نظره لسحر جمالك
بكره بطلنا بجهد عملنا يحيى آمالك
واحنا اخترناك
وح نمشى وراك
احنا الشعب


صديقى شويعر
كانت ايام .... وكانت قلوبنا كلها حماس .... ولكننى
تعلمت منها الا أصدق كل مايقال .... تحياتى وتمنياتى:thanks: