قصة يوم في المدرسه

بسم الله الرحمن الرحيم

انا طالب في المدرسه الثانوية مرت معاي مواقف في المدرسة
ولا أكاد انساها
منها مواقف محرجة
ومنهامواقف لطيفه بين الاصدقاء
انا فتحت هذا الموضوع
عشان اسمع المواقف الي مرت معاكم بالمدرسه
ولا تكاد تنسونها

هذي قصة واحد من اصحابي :
العام الماضي عندي بنت باولى ابتدائي .. ما تسمع الكلام ابدا ابدا .. وطول ماهي جالسه بالفصل تضرب اللى جنبها .. المهم انها ما تقعد عاقله ابدا بالفصل ..

عاد انا ارحمهم لأنهم اطفال وما ارضى اضربهم .. فادور على اساليب ثانيه للعقاب ..

جيت مره واقولها تعالى اطلعي عالسبوره .. وابيك توقفين على رجل وحده > علي عقاب انا بعد ما ادرى وش يبي الموهيم طبعا الغرض من العقاب انو البنت بتنحرج قدام صديقاتها اللى بدوا يضحكون عليها ..

وش كان ردة فعلها .. بدات شوي وراح تصيح وتقول باعلى صوت لها وبكل تهديد

والله انا ابوي ظابط بالشرطه والله لأخليه يجي يوريك شغلك ..

عاد الصدق يعني ما قدرت امسك نفسي من الضحك



مره ثانيه كان باقي شوي وانتحر بسبتها ..

رحت عندها ومعي مسطره ويلا افتحي ايدينك .. انتى قليلة ادب وبتنضربين ..

وش تسوي هي قامت بكل بساطه يعني سحبت من يدي المسطره ورفعتها علي ..

وانا شكلى راح كذا .. اقولها لا والله حلووو بتضربيني بعد

يلا اضربيني وريني الأدب بعد > ترا ابد ما خفت يعني


مره بعد فى ايام الاختبارات وانا واقفه عليهم وتيجي وكيلة المدرسه معها اوراق الاختبارات ..

وما ادرى وش سوت البنت قامت تصارخ عليها الوكيله .. تقوم البنت هي بعد تصارخ عليها

تروح الوكيله تبي تضربها .. ولا البنت تناظرها بطرف عين كذا وشوي الا بتستحلف لها ولسان حالها يقول ياويلك عاد

وربي من الموقف قامت الوكيله بتضحك بعد شوي



يعني انا اشوف يلغوا مهنة التدريس احسن ونقعد فى بيوتنا ..

لأن التعليم هالأيام صاير مهزله للأسف

وهذه قصه وحده بالمدرسه:

قبل شهر تقريبا حدث إن وحدة من الطالبات ( ثاني ثانوي ) تطاولت على أحد المعلمات وتلفظت عليها

أمام الطالبات وقالت لها " أنتي سخيفة وتافهة " المهم طال الأخذ والرد وبالغصب خلوا الطالبة تعتذر من المعلمة

لكن رفضت المعلمة إلا أنها تعتذر لها في الطابور الصباحي وأمام الجميع .. تمنعت الطالبة لكن الإدارة أجبروها

حفظا لهيبة المعلمة .. الزبدة صفوا الطابور اليوم التالي وشهدوا الموقف كل معلمات وإداريات المدرسة وأعلنوا

أن الطالبة فلانة الفلاني تود أن تعتذر للمعلمة فلانة لسوء سلوكها معها .. وجروا البنت كأنهم مودينها لحبل

المشنقة وعطوها المايك وأنتظروا ...... لكن هدووووووء عيت البنت تعتذر عصبت المديرة وقالت يالله وإلا ترا بتنضربين

قدام الكل يالله بسرعة إعتذري! فاجئتنا الطالبة وقالت " مو بس أبلة فلانة السخيفة والتافهة المديرة أتفه وأسخف منها " أثرها

بايعتها وكان موقف صعب عالمديرة لأن كل البنات ضحكوا بصوت عالي وبعضهم أيدوها بالتصفير والتصفيق !

وما انتهى على كذا جابوا مسطرة خشب كبر أمس واليوم عشان يأدبون البنت ويضربونها :( وجت المديرة بمسطرتها

المرعبة وهي مولعة وتستشيط غضب:12: وتصرخ " إفتحي يدك يا بنت " لكن برضوا فاجئتنا الطالبة بالتمرد ورفضت تفتح

يديها وبعد تهديد ووعيد البنت قفلت معاها والمديرة كذلك هذي رافضة تفتح يديها وهذي بدت تضربها في أي مكان تقع

عليه المسطرة (الساطور) مرة على ظهرها ومرة على كتوفها ومرة رجولها (صوت المسطرة على الجلد لا يطاااق) المهم

إن السيدة المديرة نفذت تهديدها ( وفشت غلها ) والغريب فالموضوع ...

إن الطالبة جتها قوة عجيبة ولا دمعة ولا توجع ولا صرخة كانت كل ما أنهالت عليها المسطرة تكرر " تافهة .. سخيفة "

وانتهى الموقف بعد تدخل المساعدة ( بيب بيب ) بأنها أخذت المسطرة وجابت ملف البنت ورمته بوجهها وجرجرتها دف وشد لحد

ما طلعت برا المدرسة والطالبات اللي تبكي واللي تصرخ واللي تقول حرام ما بقلوبكم رحمة ؟؟

طبعا الموضوع صار فيه تحقيق ومحضر بس أنا ذهلت من الموقف تعبنا نقول : المراهقات يحتاجون تعامل خاص بس

وييييييين ؟! ولميييييييين نحكي ؟! لا حياة لمن تنادي فنحن ما زلنا في عصر " العجرة والمشعاب " الله المستعاان

رائعة قصصك يا غالي
قرأت من كلماتك و استفتدت و تعلمت الكثير
راقني أسلوبك و طريقتك في السرد
كان لي الشرف بزيارة سطورك الجميلة...

مشكور يا أخي على الرد
وفي الحقيقة هذه لم تكن قصصي أنا

أخوك فهد