ارخص المكملات في دبي...

السلام عليكم ورحمة الله وبركاته..

الكثير من اللاعبين يرغب بشراء المكملات الغذائية المطلوبة مع التدريب الشاق للوصول للهدف, ولكن يوجد الكثير منا عنده حدود في الصرف مثل الطالب, او المغترب او او او...والأسعار في الاسواق التجارية مرتفعة جدا وفي النادي الرياضي ايضا غالية جدا, وانا شخصيا لا انصح بشراء المكملات من النادي الرياضي لأن جميع السلع تباع للتجارة وبأسعار مضاعفة وهذا ما حصل لي.. ولكن لم اشتري المنتج من النادي قلت خلني اتأكد من محل خارجي..

وسبحان الله ربنا هداني على محل والله العظيم اسعار خيالية, أرخص من هذه المكملات مافي على ما اعتقد,وانا شخصيا جربت من عنده الواي بروتين والليبو.. منتجات تمام وتاريخ انتهائها بعيد جدا.. واصدقائي جميعهم يذهبون اليه لأنه الارخص حاليا..

عنوان المحل:

سوق الحمرية المركزي
Al hamriya shopping center

يمكن هذا اول مركز بدبي قدييييم جدا ومعروف والي ما يعرفه..

مثال: انت جاي من بو ظبي..

تعال من جسر القرهود (لازم يكون عندك سالك) خلك في شارع الاتحاد امشي سيدا بعدين خد اقصى اليمين لما تشوف ارضية المطار على يمينك على شان تاخد من الاشارة يسار عند معرض مازدا ( على اليمين في نفق ) لما تاخد من الاشارة يسار تصير بشارع ابو هيل بتلاقي فندق رمادا على ايدك اليمين.. امشي سيدا عدي الاشارة بعد سيدا وادخل دخله مفاجأة على اليمين عند جمعية الاتحاد او من الاشارة يمين وجمعية الاتحاد ملاصقة للسوق الحمرية المركزي( المركز معروف والشرح للي ما يعرف الدرب ). واذا جاي من خارج الامارة ولك اصدقاء بس قلهم سوق الحمرية بوصلوك.. واذا ما وصلوك :p انا بوصلك فالك طيب..:D

والمحل الثاني في سوق نايف للجملة والمفرق ولكن الشرح صعب للي خارج دبي ولكن الاسعار عند سوق الحمرية ارخص ولكن اذا ما لقيت الي اباه اروح عند الي بنايف.. مثال الي بسوق الحمرية ما عنده بروكمبلكس لانه ما يجيبه ولكن الي بنايف عنده وبكثرة و ب 210 وقدرت انزله لل 180.. صاحب المحل ايراني ( ريال زين وطيب ).

ولكن ملاحظة::D لما تسير هناك وتلاحظ الفرق والرخص لا تقول للرجال عندك رخيص وانا جاي قاصدك من بو ظبي, صدقني هذا هندي ويطمع.. خذ الي تبيه وجادله على السعر موته يا ريال وروح;).. انا عن نفسي اجادل لما اشتري.. لان هو يعطي سعر عالي على شان تجادله وينقص الي زاده.. وبنا ولي التوفيق..

والي يبغى رقم هواتف على شان يتصل ويتأكد ان المنتج موجود قبل ما يجي من خارج الامارة يراسلني. ما مشكله..

وبخصوص الاسعار الي انا شفتها عند الهندي الي بسوق الحمرية..

مثلا:

الواي بروتين : العلبة الكبيرة 170 والعلبة الصغيرة 120 د
السيرياس ماس الكيس ابو خمسه كيلو: 160 د
الامينو 2222: 100 د
الامينو 4800 ابو 300 حبة : 90 د
الليبو 6 لبلاك: 150 د

ويعطيكم العافية..

تــائب

يعطيك الف عافيه يا بعدي كله

شرحك روووعه وكامل و وافي ... الموضوع افادني وااايد جزاك الله خير

يعطيك العافية اخوي ما نريد الا الدعاء حبوب واذا احتجت مساعده ما تتردد عزيزي

بس ملاحظة: على اليسار في النفق مو على اليمين . غلطة مطبعية

بالتوفيق

يعطيك العافية لكن مهم جدا انة يكون مكملات اصلية ومن الخارج

اكيد يا ابو راشد اصلية و100% ان شاءالله..

وما فيها فرق بينها وبين اي منتج عند جي ان سي ونيوترشن نفس الشي.. السعر الفرق وانا دخلت على المخزن الخلفي وشفت الصناديق كلها.. كلها من الخارج اصلية .

بيني وبينك المنتجات هيك سعرها بس اصحاب المحلات تحتقر السوق وتبيع بالغالي وربحها عالي جدا.. الله يرزق الجميع..والله اعلم بالنهاية...

واهم شي ما ينضحك علينا... :)

اي ترا المكملات اساسا رخاص لكن اصحاب المحلات من وين يجيب اجار المحل واجار العمال شوف شلون يرفع السعر والسعر ما يسوى مثال عندنا بالكويت جي ان سي يبيع السيل تيك اب 26 دينار
وعندنا بالكويت جمعيه امريكيه ما يدخلها الا العسكريين اللي بالبحريه تلقى السيل تيك يطلع 46 دولار يعني حوالي 13 دينار شوف النصب شلون لا والناس تشتري من جي ان سي مو هامها
شاكرلك موضوعك

الله يوفقك ياتايب ويجزاك خير
اخوي انا الحين في دبي ومريت على السوق بالليل كنت اتمشى السوق واضح مكانه
بس مادخلت السوق لانهم كانو مسكرين ليتك تعلمني اسم المحل عشان بكره ادور عليه بالاسم
وكثر الله خيرك ورحم الله والديك وجميع المسلمين

اقتباس:

---

المشاركة الأصلية كتبت بواسطة ابو حمد1122

الله يوفقك ياتايب ويجزاك خير
اخوي انا الحين في دبي ومريت على السوق بالليل كنت اتمشى السوق واضح مكانه
بس مادخلت السوق لانهم كانو مسكرين ليتك تعلمني اسم المحل عشان بكره ادور عليه بالاسم
وكثر الله خيرك ورحم الله والديك وجميع المسلمين

---

الله يبارك فيك اخوي..والله يا طيب ما اعرف اسمه. بس ما يحتاج الاسم المحل واضح بس انت روح صوب محلات الحلاقة للرجال.. في ساحة هناك ما في فوقها سقف المحل على الزاوية رح تشوفه فورا ان شاءالله.

على كل حال اذا احتجت شي راسلني بعطيك رقم المحل.

والسلام عليكم.,., ورحم الله والديك عزيزي :)

أنا توي رديت من عنده.. والله صدج اسعار غييير

اليبو 6 بلاك ما طاع يعطيني اقل من 160 درهم و الامينو 2222 ب 100 درهم ..

مشكور اخوي تائب و الله يعطيك العافية...

تعرف صح كلامك انا اشتريت الليبو 6 بلاك ب 160 مو 150 انا الي غلطت بالسعر..المعذرة..

يلا بالتوفيق عزيزي وبس تصير تتردد عنده بيصير يعملك سعر.. ودايما اتصل قبل ما تروح احتمال ما تحصل الي تبيه..

الله يعافيك يا رب..

أخوي انت كم صارلك تتعامل وياه ... كيف حسيت المنتجات اللي عنده بعد الاستخدام؟

والله اخوي من اربع شهور..

جبت من عنده علبتين واي بروتين وعلبة ليبو 6 بلاك..

وصاحبي جاب الكيس الكبير سيرياس ماس 5 كيلو..

وصاحب الثاني جاب من عنده علبتين بروتين (( نسبة البروتين عالية فيه )) شيي ماس والله ما ادري شو اسمه..

والأمور طيبة يالغالي.. البروكمبلكس جبته من نايف لأن ما عنده..

الامينو 4800 جبته من نايف 500 حبة ب 130

كل المكملات ممتازة والعلب مختومة مو مفتوحة..

صار معك شي..؟

للحين الامور طيبه .. بيكون بيننا تواصل ان شاء الله

ان شاءالله اخوي .. حياك الله.

شباب .. في محل في الامارات مول .. اسمه نيوترش سنتر .. قدام كارفور بالضبط من صوب سبلاش

.. والله انه عنده عررض مش طبييعي .. انا مره رحت عنده .. واشوف اسعاره حلوه ..

يعني امينو 4800 - 300 حبه يقولي بـ 95 ..

واليوم بالصدفه طرشت ربيعي .. يقول مسوي عرض والحبه بـ 70 درهم .. وقلتله خذ 2

وغيره من المنتجات .. ان شاء الله بكره بروح اشتري .. وافكر اشتري لكم كوورس عشان مااارجع مره ثانيه :)

والسبب انه يبي يخلص المنتجات اللي عنده عشان يجيب من منتجات ثانيه .
.
ولا محلات ابوظبي .. حتى اللي اتعامل معااه قلتله السالفه .. قال مااقدر ابيعلك امينو 4800 اقل من 120 درهم

ربي يحفظكم