شلون تتغلب على ضعف العزيمه وفقدان الأمل بالتمرين تجاربكم أنتو

السلام عليكم ورحمة الله

كما هو واضح من نكي انا انسان دب تعععععبت ابي انحف ماقدرت ودائما أعاني من فقدان الأمل اثناء التمرين واقول انا كذا وبجلس كذا طول عمري ومارح اتغير
انا الحمدالله اني اتمرن في البيت وبغرفه خاصه لأني ساعات بنص التمرين اوقف وابكي بكااااء شديد اللي تحس انو حتى ماعندك نفس تاخذه :ee2:
مادري ليه بس احس اذا بكيت ارتاح نفسيا اشويه
المهم مين مر نفس حالتي وشنو تسون عشان ترفعون عزيمتكم
لأني انا فاااااقد الأمل انو بيوم من الايام رح اكون نحيف:(

وزنك وعمرك وطولك :)
عشان اعطيك اجابة كافية :)

عطنا وزنك وطولك وعمرك

السلأام عليكم ...
يا أخواان الأخ يسأل عن شي يعطيه دافع وعزيمه انه يضعف وانتو تردون عليه بسؤال كم وزنك وطولك اعتقد سؤالكم لايمت للموضوع بصله ..

أخوي انا كنت متين نفسك طبعا اكيد اول الأيام الي كنت اسوي فيها رياضه كنت اقول حق نفسي مالي امل اني اضعف الي اسويه عباره عن أوهام كنت دايما احبط من معنوياتي نفسي بنفسي وغير الأصدقاء الي ما يشجعون :09: , بس في شي لازم دايما تحطه في بالك مثل ماغيرك ضعف راح تضعف حتى لو كان وزنك كبير ليش ماتكون انت القدوة حق غيرك , ودايما وانت تسوي رياضه حط في بالك صورة جسمك الي تبيه وانت مستانس , لاتقكر بعد التمرين أبدا أبدا انك تشوف نفسك بالمرايه لأنه حلم الرشاقه هي مسألة وقت ليس إلا , نصيحتي لاتتهاون لاتتكاسل لاتأجل اجعل الرياضة جزء لايتجزأ من روتينك اليومي واذا تبي تعطي نفسك محفز شوف صور الي كانوا يعانون من السمنة سابقا وشوف أجسامهم الحين وتذكر ان يوم من الأيام راح تكون منهم :أفكر:
ومثل مامتنت راح تضعف ...
وآسفين على الإطالة . . .

وعليكم السلام ورحمة الله

اخوي انا ولله الحمد مامريت باللي انت مريت فيه

انا ولله الحمد من صغري لما احط شي براسي اوصل له قول مشاءالله :biggrin2:

انا بديت مشواري من شهر ثلاثه اللي فات كان وزني 115
وحاليا توني وازن 74 وزني

يعني تقريبا 5 شهور نزلت 41 كيلو جرام

لم اتبع اي رجيم لا من دكتور ولا نصيحه من احد ولا حتى من الرجيمات الموضوعه بالنت

لماذا لصعوبتها لي صعب اني امشي او اواضب على اي رجيم مرتب بسبب السهر او
لما اكون بالخارج لظروفٍ ما لا استطيع ان اجد المؤكولات المخصصه للرجيم

ولذالك كان الرجيم اللي ماشي عليه للفطور توست مع جبن منزوع الدسم وحليب خالي الدسم
وخضار

الغداء نفس الشي تقريبا ولكن بعض الايام ربما يومين بالاسبوع دجاج او لحم مشوي
او علبة تونه

العشاء خضار او فواكه او نفس الفطور

ابتعدت عن كل شي فيه سكر او يحتاج سكر مثل الشاي او الحلويات
والنشويات البيبسي العصائر المعلبه الوجبات السريعه او اي اكل مقلي

اعرف انه رجيم قاسي ولكن كنت اريد السرعه بنزول الوزن

وكان عوامل ساعدتني لنزول وزني مثلا

كنت تقريبا مبتعد عن الاصدقاء والاقارب ربما مره او مرتان بالاسبوع اذهب للاصدقاء
طبعا بسبب المغريات مثل العزائم

كان روتيني الدوام والنادي ومسؤوليات البيت فقط

انا ما ابي اقول جم وزنك وطولك انت عارف الوزن لازم يكون نفس الطول
يعني مثلا طولك 170 وزنك يكون 70

لكن اذا كنت لاتريد النزول بسرعه انصحك على نظام غذائي جيد

بالاسبوع كيلو او كيلو ونصف

الفطور بشكل يومي مابين 5 او 7 تمرات رطب

الضحى كوب نسكافيه بدون سكر

الغداء:
علبة تونه بالماء
او
10 قطع لخم مشوي
او
8 قطع شيش طاووق
او
نص صدر دجاج مشوي
بالاضافه الى الخضار ويفضل تكون الخضراء وخبزه واحده سمراء

المغرب مابين 5 او 7 تمرات

العشاء:
فواكه فقط
او
جبن منزوع الدسم
او
لبنه منزوعة الدسم
او
خمس ملاعق فول
خبزه سمراء فقط

بالنسبه للتمارين انا انصحك لاتلعب حديد عن تجربه اقل شيئ شهرين فقط سويدي
وبعد الشهرين ماتخلص

يكون جدولك يوم سويدي ويوم حديد لمدة شهرين ايضا
وبعد ماتخلص الشهرين

وبعد هذه الاربع شهور كيفك على حسب نزول وزنك تبي حديد فقط تبي تستمر يوم حديد ويوم سويدي

هذا اللي انا اعرفه اما بخصوص الحديد ليست عندي خبره

وموفق ان شاء الله

فيه اشياء كثيره وانا اخوك
لابد تتأكد ان الله عزوجل منحنا طاقه جباره لكن لانستخدم الا 10% منها
اول حاجه ابتعد عن الاصدقاء السلبيين . امنح نفسك الثقه مثل ( انا قادر ) ( مافي شئ مستحيل ) (انا قوي )
انا قدها ونص) ( أنا وانا وانا ) عشان عقلك الباطني من كثر الترديد يحولها الى عزيمه واصرار وطموح وامل وواقع
ودائما حاول تقرأ عن سيره بعض العظماء وشلون كانوا ووش صاروا
بفضل العزيمه والاصرار وقوة الارداه
الشئ الاخر ولا هو مدح في نفسي مثلا كان وزني 54 كيلو وطولي 175 سم . هيكل عظمي كان شكلي يحوم الكبد
وبفضل من الله عزوجل خلال سنه واحده صار وزني 80 كيلو . ضحيت باشياء كثيره
مثل الجلسات العائليه وجلسات الاصدقاء ومتابعة المباريات في الملعب
كلها بديت ارتبها ووضعت في بالي ان التمرين مثل الصلاة ما اقدر اخليه ولايوم واحد ماعدا الاجازه
وايضا كنت احب المسلسلات الكرتونيه مثل الفارس الفتى الشجاع صحيح قصه كرتونيه
لكن يعلمك انه مافي شئ مستحيل ( التضحيه والصبر والعزيمه والطموح والاصرار )
وايضا بنتي الصغيره كل ماشفتها تتولد عندي الطاقه من جديد
وايضا حاول تضع صورة شخص تحبه الوالد او الوالده او اخوانك الخ في غرفتك
واعرف انهم حريصين على صحتك وانهم يهتمون ويعتنون بك وقل بنفسك لن أخذلكم بإذن الله
والشئ المهم عليك بالدعاء والالتجاء الى الله سبحانه وتعالى والاكثار من الاستغفار
لان كثرة الاستغفار تضاعف القوه وتجلي الهم والحزن وتشرح الصدر وتجلب الرزق

بعـض آلطـرق ‘إلي تقـدر تعـملهآ هـي :
1- مشآهـدة بعـض مقآطع فيـديو تمآرين لـ نآس كآنوآ متينين وصآروآ رشيقيـن
2- وطبعـاً تشـوف صـور لهـم كيـف كآنوآ وكيـف صآروآ
3- صـور نفسـك كل آسبـوع ، من جميـع آلجهآت وشـوف آلتطور
4- خـل عندك مذكرة أو نوت وآكتب فيهآ عن تمآرينك وكيف كآن آلتمرين وآلصعوبآت وآلدآيت آلي تغير وهكذآ
5- لازم تشجـع من نفسـك أكثـر وأكثـر وتقـرأ عن تجآرب آلنآس ، وترى آلنآس كلهآ بشـر يعني هم مو أحسن منك !

يالبا قلبك ولله حاس فيك ماعليه عزم وان شاء الله توصل للي تبيه انصحك انك ماتضعف ناحيه الاكل وصدقني اهم شي تسكر حلجك عن الاكل الضار انا قبل كنت لما اتمرن واحس بألم عضلاتي واتعب واحس بأني منهك دايم اردد بيني وبين نفسي هل عباره( هل الاكل الي اكله يستاهل كل التعب الي اسويه عشان افقده) ولله كنت ارددها دايم وألجم نفسي لما اشوف الاكل قدامي او افكر فيه لانه عارف انه مافيه فايده انا انصحك انك تمشي كل يوم لا يقل عن ساعه وانت تسوي رجيم تخفف اكل اول فتره بتكون فيها شويه تغيرات عليك لكن بعد فتره راح يكون شي عادي انا الحين اساسا ماعرف شلون اكل وان كليت معزوم ولا مغصوب ولله نفسي ماتطيق الاكل وبعدها بفتره استفرغه ولله يستر ان حبيت اضخم شكلي بوسوس بالتوفيق وكل شي سهالااااااااااااات ولله

اقتباس:

---

المشاركة الأصلية كتبت بواسطة ميشو البطه

السلام عليكم ورحمة الله

كما هو واضح من نكي انا انسان دب تعععععبت ابي انحف ماقدرت ودائما أعاني من فقدان الأمل اثناء التمرين واقول انا كذا وبجلس كذا طول عمري ومارح اتغير
انا الحمدالله اني اتمرن في البيت وبغرفه خاصه لأني ساعات بنص التمرين اوقف وابكي بكااااء شديد اللي تحس انو حتى ماعندك نفس تاخذه :ee2:
مادري ليه بس احس اذا بكيت ارتاح نفسيا اشويه
المهم مين مر نفس حالتي وشنو تسون عشان ترفعون عزيمتكم
لأني انا فاااااقد الأمل انو بيوم من الايام رح اكون نحيف:(

---

يا اخوي اشرحلنا حالتك , انواع التمارين , اي نظام غذائي تتبع ؟؟؟

تتمرن بجيم افضل من البيت

عيش قصة حب قويه عنيفة تضعف بسرعة :)
وغير اسمك من ميشو البطة لي جبار الضعيف

تدري وزني كان 126 بشهر فبراير اليوم توني موزن وصلت 85 يعني اتكلم على 41 كيلو في خمس شهور كل لبسي بنطلون مقاس 42 او بالالماني يا 58 او 56 كل اسبوع بنطلون عند خياط يسوي الفرط او تفصال دشداشة نويت اضعف ما خليت نادي بالكويت ولكن اخوك كان غلطان اشتراك شهري اقصى شي شهرين اضعف ارد امتن لوووول
بعدها اشتراك سنوي يجبرك تروح والحمد لله مافي شهية كرهت الاكل وجوده وعدمه واحد غرامي اشوف عروقي والله وتبرز :) هاهاها الناس تبي عضلات وانا ابي عروقي اقولك شتسوي

انا سويت نفس سبورت مان والله يا جماعة احسن رجيم والله انا شلون رجيمي

الصبح العائلة ما تتفطر اللهم فنجان قهوة بس
الغداء الساعة 3 العصر بعد نهاية الدوام اشرب شوربه اترس بطني وبعدها سلطة وبعدين الطبق الرئيسي يا سمك او شيش طاوق او صدر دجاج مشوي اخلص غداي اروح احط ملعقتين خل تفاح ويا كأس ماي واشرب

الساعة 6 اكمل تمر واشرب قهوة عربيه (حيل حيل حيل مفيدة وتسد الشهية )

والعشاء سلطة او روب خالي الدسم او جبن نفس عشاء سبورت مان واحيانا ما اكل شي

مافي يوم مفتوح كلام فاضي مشيت على شي كمل عليه وكثر قز في المجمعات امشي المشي بره النادي احسن بوايد من النادي وهم بالنادي هروله كل يوم ساعتين وبالتدريج

شوف عزيمتك تشغل نفسك بأي شي ونصيحة من اخوك اي شي في زيت قلي ابتعد تمام عنه ما نقولك لا تاكل بس خفف شوي وشوي لانك لو حرمت نفسك راح ترد امتن وزيادة خل تفكيرك ان الاكل الي تاكله الحين بعد شوي بتحصل احسن منه وراح تاكل منه اكل شوي مني وشوي مناك ولا تقوم شبعان اكل كأنه شي مو اساسي عندك واستغل الشهر الكريم وخفف تلاقي امورك بروحها تستمر

الاخوان ماقصروا ..

عندي تساؤل : كم صار لك تتمرن ؟

اقل من سنة ؟ بدري يبو الشباب على اليأس!

نصيحة على الماشي : بطل تقارن نفسك ببقية الاجسام في النادي!

انا كنت اسوي كذا في بدايتي و يجيني تحطيم اليم! الحين اشيل 160 lbs ظهر واضحك على ايام حدي ٣٥ !

صراحه مادري شقولكم يعني بجد جزااااااااااااااآآآآآكم الله خيير وماااااااقصرتو كلكم :biggthump

milane - sportsman - رجل من عالم اخر - al3zef - ابومها - bord2love
غيريسي جوجيتسو -المحترف وليد - nassernasser123 - scaryface- بعارين

انشالله ماكون نسيت احد منكم وبجد استفدت كثيييييييييير من تجارب وتوصيات بعض الشباب

ويكفي انكم عبرتوني وعبرتو موضوعي وانا مقدر هالشي لكم :)

اقتباس:

---

المشاركة الأصلية كتبت بواسطة ميشو البطه

صراحه مادري شقولكم يعني بجد جزااااااااااااااآآآآآكم الله خيير وماااااااقصرتو كلكم :biggthump

milane - sportsman - رجل من عالم اخر - al3zef - ابومها - bord2love
غيريسي جوجيتسو -المحترف وليد - nassernasser123 - scaryface- بعارين

انشالله ماكون نسيت احد منكم وبجد استفدت كثيييييييييير من تجارب وتوصيات بعض الشباب

ويكفي انكم عبرتوني وعبرتو موضوعي وانا مقدر هالشي لكم :)

---

يا اخوي حاول تبني اهداف على المدى الطويل ولا تنسى انته بعدك شاب فلا تياس ولا تستسلم وحاول تقرى بعض المواضيع المميزة التي تخص الدايت وان شاء الله تستفيد

وانته قدها يا ميشو

بالتوفيق