( ياليتني ولد ) جملة ترددها بعض البنات ؟!! ليه؟ ادخل لتعرف ..

بعد السلام ..

مساء وصباح الخير للجميع
بصراحة في موضوع يشغل بال اغلب البنات

والأكيد ان هذا الموضوع نتيجة لأمور كثيرة تواجه المجتمع النسائي .....ولو نخصصة نقول المجتمع البناتي
والموضوع يتلخص بعبارة تلقاها مثل التنفيس اللي يلجأ له
(ياليتني ولد)
لما يكون في عزيمة ...والكل مستعد وتجهز....ويطلعون برا وينادون السواق....وأخيرا يلقون السواق مو موجود
وبعد جوله على جوالات الاخوان.... وتسيرة على جوال الابو
ويأس من ظهور السواق
وبعد جملة مافيه روحة ارقوا غيروا
تلاقي صرخة تسبق هالجملة وتعبر عن الموقف بقوة
(ياليتني ولد )


والا بجمعة عائليه ...وتخيم حلو بالربيع
العيال مجتمعين يلعبون بالبقي والدبابات
وبعضهم معه جمس والا جيب
والباقين باللوت والمنيبولي
وضحك وبسطة
والبنات اللي معهم جوالات ويروح رجاها بالهوا
والثانيه واقفة تترجى اخوها ...بدون فايدة
والثالثة بعد مايأست رجعت لسواليف الحريم المملة والكيئبه
مع ان طلباتهم ماتعدت دورة بالجيب بين هالرمال
والا دورة بالبقي
والا حتى يمكن شريط بسيارتهم بس ماأحد راضي يعطيها المفتاح
والنهاية
(ياليتني ولد )
وأحيانا تعزم صديقاتها
وتقولهم بكل الفخر
العشا على ...لا ومن وين من الريف الايطالي ......طلبيه عشان خاطر عيونكم
هم ماعندهم سواق
لأن الاب يقول عندكم 5 اخوان
(حنا مانحتاج سواق البيت كله شباب)
وإذا كانوا هالشباب
واحد مقفل جواله
والثاني بالبر مايوصل له الارسال
والثالث نايم بالملحق ولا في امل يصحى
والرابع بالغرفة ...وقافل على نفسه الباب ...ويقول لااحد يزعجني
والخامس مع عيال أخواله عندهم دورية


والعشا يتفركش
والاعذار تتسكت بوجبات( بتوصيل منزلي) من هرفي
واول مايطلعون
تسمع صرخة بالحوش
(ياليتني ولد)

كل شيء يهون بس اللي مايهون ايام العطل
قبل العطلة يمكن بشهر
البنات حول الابو
يبه تكفى ..الله يسلمك ...الله يعافيك ...الله يخليك ....الله لا يحرمنا منك ..الله ....الله... الله... الله
نبي نسافر ذا السنة

لا وانا ابوكم ذا السنة مشغول
عندي انتداب عمل
ويمكن عمل اجباري
هالسنة امكم والده
وين ناخذ بزر بالشهور معنا
وأخوكم مهند
توه يمشي
تبونه يشغلنا اذا سافرنا والا يضيع من بين ايدينا
تدرون
تبون جدة والا الشرقيه ...يالله اختاروا ...
والا وش رايكم نروح عند اهلكم بالعيينه
بنفس هالوقت يدخل فيصل
يبه عن إذنك ترا اليوم رحلتي مع محمد وتركي وخالد ولد عمتي
بنسير على مصر ام الدنيا كم يوم ونجي
عاد زي ماقلتلك يمكن نمر شرم الشيخ
هاه يأخوتي ياحلوين تامرون على شيء قبل ماأروح
إيه
سموا
تبادل
ايش
(ياليتنا أولاد)

ولما تكونين جالسة على اللاب توب
وتو النت شابك
(تم تسجيل دخولك الى شبكة الاتصال )
وتوك فاتحة على المفضلة تبين تشيكين على الموقع اللي تبي تدخلينه
الا اللي فوق راسك
ومن صار ...اليكر ...نواف ....حبيب البيت ......وبرا البيت
_____________
قفلي النت
ليه؟؟؟؟؟
ابي التلفون ....وثاني مرة لعد تشبكينه فاهمة !!!!اوكي
وليه معد أشبكه
اولا صرف ....ثانيا بنت ....ثالثا وشوله تشبكينه ...وش الفايدة...؟؟؟؟ماله داعي
!!!!
لاأحد يرفع السماعة طيب......
(ياليتني ولد)

طبعا صايرة كلمة للعائلات فقط تستفز شريحة كبيرة من الشباب هنا
اضف الموضوعات الصحفيه المنتشرة بخصوص هالموضوع
طبعا هالافته بقدر ماهي مزعجة
بقدر ماتخليك تفكر وتمعن فيها
الكل مع الشباب المعارضين لها
لان المحطات الترفيهية لهم قليلة
لكن ،،،لما يجون يقارنونها بالبنات .......هنا نوقف شوي
أغلب المجتمعات النسائيه كيئبة ومملة بشكل كبيييييييير
والسواليف أغلبها تقتصر على
لبست...شرت ...انخطبت ...تزوجت....حملت....سافرت
وتلاقي درجة الغلينا عند البنات من هالسواليف توصل 100درجة مئويه
الطلعات برا و مع الصديقات....أغلب العوائل محدودة
والبقيه مابين حريه مطلقة....الى منع مطلق ...فالبيت هو المنتزه الموجود المشترك
وش في هالمنتزه ؟؟؟؟؟؟؟؟؟؟؟؟؟؟؟؟
مثلا تلفون
أغلب العبارات التي تنقال على اللي تكلم
ايه تلفون 24 ساعة انتي ماتملين
بالله عليكم وش تقولون كل هالوقت

منهي ذي ؟؟؟؟ هذي تغريد....هماك توك شايفتها بالجامعة

قفلي التلفون .....ليه؟؟؟؟؟؟؟بس موب الزم كل ذي الهذرة-

من بتكلمين نهى ...مو لازم بكرة بتشوفينها بالعزيمة ألحين انتظر تلفون من أختك ببريطانيا _

من اللي شاغل التلفون ...والله اني قايلته شوفي سوير ان رفعتيه ثاني مرة لا تلومين الا نفسك

______________
طيب موب لازم انترنت ولا تلفون لانه امر مفروغ منه ...بس أخوي مسموح له .....ابوي دايم يقول ان اخوي ولد وعادي لو يشبك النت ...ولو قلتله على الفاتورة ...قال هو يشبك على خطه ...انا مالي دخل

طيب اروح عند التلفزيون ....لا لا لا
مستحيل التليفزون انقلب الى أداة لترويج المنكر ...كله استعرض للبنات ....وهو خراب لعقولنا يالبنات
أداة استحقر نفسي إذا شفتها ...حتى الافلام اللي شفتها معادة بالقناة نفسها 4 مرات
غير البرامج والسخافات ووووووو...............
وين أجل وين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مافي قدامي غير غرفتي .....تدرون وش ابسوي فيها

على فكرة تراني ما اتشمت لا والله ..

وانا رجال مو بنت ..

بس اخاف تزعلون :D ..

تحياتي لكل البنات في المنتدي ..

تدري انك رفعت ضغطي .....جملة دايما احاول اني انساها.....و كل مرة اختي تقول كذا اتخانق معاها و اقولها بلا سخافة
بس انت مبالغ اشوي....اقصد مبالغ وايد...و الاهم من هذا كله يا اخ الساهر انك قلت المشكلة و ما عطيت الحل....يعني بدال ما تكحله عميتها...

اقول الله يصلحك

مشاركتك مع احترامي لرايك ولتفكيرك ولوجهه نظرك

مكانها مو هنا - فيه منتدى مره سمعت المراقب اودين يقول
انهم سوو منتدى الصرقعه اعتقد انها تكون هناك افضل


تحياتي ولاعاد تتعود لها