اراد ان يفضحها....

اراد ان يفضحها





.. قصة عجيبة .. اترككم مع صاحبها ليرويها لنا



.. امس رحت للمستشفى ازور ولد خالتي الي صار عليه حادث بعنيزه وصارت الأصابه بسيطه ولله الحمد طاحت السنون بس انتهت فترة الزياره وانا صدفت معي اقعد مع ولد خالتي كمرافق ليلة امس عيو علي وطلعون بعد ما حاولت وحاول معهم ولد خالتي بس مافيه فايده طبعا لي افكاري والحقوق محفوظه طلعت من الباب الرئيسي للمستشفى ودخلت مع باب الطوارئ ورحت لغرفة ولد خالتي لا من شاف ولا من درى والولد يقول يا جني وشلون قدرت تدخل بدون محد يقول لك شي..بس موب هذي القصه السالفه وما فيها ان احد الأستشاريين جا يشوف المرضى ويطمئن عليهم دخل الغرفه الي انا وولد خالتي به ويقول وش قاعد تسوي قلت مرافق قال ممنوع قلت هذاك يوم انتهت وقت الزياره وبعدين المريض نفسه قال ابيه يقعد قعدنا ناخذ ونعطي الين اعجبته السواليف وجلس... اللين هنا

سألته وش المواقف العجيبه الي مرت عليك..؟؟ قال قلي وش النوع الي تبيه حوادث..امراض نفسيه..قصص..؟ وش تبي؟؟ قلت اعجب ما مر عليك خلال عملك بالمستشفى.. قال الشي الي موب طبيعي ومر علي خلال 13 سنه عمل بالمستشفى هو: انه مره احد المرضى شاب عمره 22 سنه جا يستشيرني بخصوص شي اعتقدت بالبدايه انه بسيط وعلاجه مره سهل.. هو انه حسب ما قالت لي الممرضه قبل ما يدخل انه فيه بقع خال بيده ويبي يستشيره بأي طريقه يشيله... يوم دخل علي الشاب لاحظت انه لابس قفازات وسلم علي وهو لابسهن ويوم حاولت معه يمين شمال ابي اشوف يده وبقع الخال عيا وقال انت استشاري وبس قال الدكتور لهالشاب انا ما اقدر اساعدك الا اذا شفت الحاله بعيني.. اقتنع الشاب بصعوبه فصخ القفازات....قال الدكتور: شفت شي عجييييب مكتوب ببقع الخال على يده اليمين بس اسم بنت...فلانه بنت فلان يقول انا احسبه بالبدايه مكتوب بخط يد او وشم لكن يوم دققت فيه طلع فعلا دم جامد او مثل ما يسمونه بقع خال.... استغربت وسألت المريض يف جاك هالشي هل هو من الولاده..(الدكتور يقول توقعت انه ولد غير شرعي او من هالقبيل واسم امه مكتوب على يده من يوم ولد) لكن الشاب رفض يتكلم... ويوم حاول معه الدكتور وقاله استنتاجه انه يمكن هذا اسم امه وانه ولد غير شرعي واستفزه) عصب الشاب وبكى وقعد يقول القصه للدكتور.. قال الشاب ودموعه تنهمر : عرفت فتاة بنفس عمري عن طريق الهاتف و صارت بينا مكالمات على مدى 8 شهور وثقت فيها البنت فيني وقالت لي اسمها كامل وتعرفنا على بعض زين... ويوم من الأيام طلبت منها اننا نتقابل بأحد الأسواق والبنت رفضت رفض كلي وصرت اترجاها على مدى شهر مافيه فايده البنت اصرت انها ما تقابله طفح فيني الكيل وهددتها اني افضح اسمها لو ما قابلتني فرفضت وقالت انه عذاب اهلها خير لها من انها تقابله وفعلت فعلتي ونشرت اسمها بين اصحابي وكتبت اسمها على احد الجدران فلانه بنت فلان... بعدها بأسبوع او اسبوعين ظهرت البقع على يدي وما كانت بقع....خط عادي كأنه مكتوبه بخط اليد وانكتبت على يدي بالضبط نفس الخط الي كتبته على احد الجدران... وانا نادم على الي سويته وودي لو اتخلص من يدي بأي طريقه.. الدكتور: نعم انت غلطت اليس لديك اخوات تخاف ان يفعل بهن مثل ما فعلت انت ببنت فلان الي مكتوب اسمه على يدك.؟ ولم يستطع الشاب نطق كلمه واخذ يجهش بالبكاء... الدكتور يكلمني الآن: بعد كذا حولته على مختص الليزر والحروق (مدري نسيت اسم اختصاصه ) واتفقوا على موعد ويوم راح الأسم الي مكتوب على يد الشاب.. ارتاح نفسيا ونام في المستشفى على احد الأسره بعد هالتعب النفسي لكن يوم صحى بصباح ذاك اليوم رجع على يده الأسم مثل ما كان عليه قبل العمليه.... وحاولنا مره ثانيه وثالثه تبقى بعد العمليه مثل الحروق ومن بكرا ترجع مثل ما كانت بعد العمليه...!! قلنا له انه مافيه علاج ثاني غير المراهم وانه راح تاخذ وقت طويل الين تختفي..(الدكتور:حنا عارفين انه مافيه فايده من المراهم لكن ما نبي الشاب يتعب نفسيا ويجيه شي). وكل شهر يجي هالشاب يراجعن ويقول ما فاد المرهم وانا اقول له الصبر زين.. ونصحته بأحد المرات انه يكلم البنت الي نشر اسمه ويروح يمسح الأسم الي كتبه على الجدار... فعلا راح مسح الأسم الي على الجدار وكتب بداله سبحان الله وبحمده سبحان الله العظيم... ويوم كلم البنت بعد جهد لأنه ما كانت تبي ترد عليه... وقال له القصه والبنت لأنه ما وصل لأهله قصة انه كانت تكلم فلان واسمه مكتوب على احد الجدران وانه هالشاب مسحه وكتب بداله تسبيح وتحميد الله.. نصحته انه يتوب ويروح لمكه ويدعي له... ويمسح اسم البنت الي على يده بموية زمزم خلال اسبوع او الين يروح الأسم... وفعلا الشاب سوى الي قالته البنت وقعد بمكه بعد كل صلاه يمسح الأسم على يده بموية زمزم وخلال 10 ايام يقول الشاب للدكتور انه سبحان الله.. والله الأسم انمسح بعد صلاة الفجر من يدي مثل ما ينمسح الحبر من اليد اذا جاه مويه... والدكتور يكمل كلامه يقول ومن ذاك اليوم (قاطعته انا: متى هالسالفه؟) قال: من 4 سنوات تقريبا..ومن ذاك اليوم وهو كل شهر يزورن مره وقال له انه تزوج تلك الفتاة الي حاول يفظحه بعد ما هداه الله وله منها ولد وبنت..وهو الآن يعمل بهيئة الأمر بالمعروف والنهي عن المنكر بالمنطقه الي يسكن به

مشكور والله أخوي على الموضوع ...

وفعلاً من غير أي مجاملة مواضيعك رائعة ...

وهالقصة برضة فيها مغزى كبير ...

وربنا يوفقك في حياتك إن شاء الله ...

وشكري و تحياتي لك ..

مشكور يالنايم:)

شكرا يا النايم على هذه القصه وما نقول إلا سبحان الله العظيم سبحان الله وبحمده والجزاء من جنس العمل والله يستر علينا وعلى كل مسلم.