إختطاف مدرسه <<< رحتوا فيها يابنات :)
إختطاف مدرسه <<< رحتوا فيها يابنات :)
هذي السالفه قالها لي واحد من الربع
ويقول انها حاصلتن على طريق القصيم
والسالفه يقول انه فيه بنت ماشاء الله عليها خلصت دراستها في الكليه
وصارت مدرسه (يقول انها مدرسة علم نفس) المهم انهم عينوا البنت في
ديره من ديار القصيم وهي ساكنه بالرياض عشان كذا سافر معها ابوها للقصيم
وسكنوا هناك والبنت قعدت تدرس الطالبات وأخذت لها تقريبا ثلاث سنوات وهي هناك
والصيفيه تجي تقضيها مع أهلها في الرياض0
وفي آخر الامتحانات قالها ابوها زهبي أغراضك نبي نجهم من بكره على الرياض
البنت طارت من الفرحه وزهبت أغراضها كلها حتى الذهب أخذته!!
وبعد ماوزعوا الشهادات في المدرسه قام الشايب وزهم على بنته وقالها مشينا
وركبت البنت مع ابوها ومشوا للرياض طبعا مشوا بالنهار
المهم البنت مبسوطه لأبعد درجه وهي تبي تشوف أمها وخواتها بعد ترم كامل من الدراسه
والشايب بالقوه ماسكن العبره متلهف على أم العيال
وقاعد يهيجن بالسياره ويقول:
يانفس لك بالهوى لفته @@@مانتي على دين الأخواني
هو معجبك واحد شفته@@@ عوده من الزين رياني
وماسكن الخط وأنواع الشعر والقصيد
الا وموتره قعد يدخن والكفره انصلخت وهو يتمايل الموتر فيه يم اليمين يم الشبك
وهو يرده لليسار يم الشعيب ويقعد يحذف به الموتر مره يمين ومره يسار لين وقف
ويوم وقف الموتر على جال الخط وينزل الشايب ويشوف الموتر لين الدخنه طالعة
والسير منقطع والموتر مفور
ويقعد يشر الشايب لها الخلق يبيهم يوقفون له لكن ماهناك أحد كل من شاف انه رجال
سحب عليه السيفون
ويوم أخذ شوي للسياره اللي وقفت عنده فيها اثنين شباب أشكالهم محترمين وجنتل بعد
علمهم بالسالفه قالوا :مالك الا تخاوينا وتخلي سيارتك واذا وصلنا نقطه التفتيش نبلغهم عنها
قال خلاص ومشى معهم هو وبنته0
المهم أن السواق عينه على المرايه ويقز في البنت اللي ورا والبنت صاده عنه ولاتناظر فيه
وهذي حالتهم والشايب جاه النوم يوم اونس البراد وحط راسه وراح بسابع نومه
ويوم وصلوا لنقطه التفتيش نزل الشايب يبي يبلغ عن السياره حقته ويلقى لك ذاك الجيزاني
اللي كنه ناصر القصبي يوم يقلدهم ويبدأ يحقق معه متى خربت السياره ووين كنت رايح
ومن وين كنت جاي ووش هوله وليش لين فقع راس الشايب
الشباب في السياره ومعهم البنت وكلن يناظر بالثاني قال واحد منهم لخويه وش رايك!!
قال الثاني الراي رايك ؟ وهو يدعس للموتر وينحاش في البنت والشايب يلتفت الا يوم شاف السياره
قد راحت وبنته معها ويقعد يصايح على العسكر00تكفون جيبوا بنتي تكفون لايروحون فيها
اذبحوني انا بس جيبوها الله يرحم والديكم ياليتها ماعرفت الدراسه ولا التدريس ياخلق ياناس
تكفون رجعوا لي بنتي وخوذي عيوني يامن يرجعها لي00
ويقوم لك ذاك العسكري وخويه وعلى الجيب حق أمن الطرق ويطردون ورا الشباب
ووراهم ووراهم لين نزلوا الشباب صحراء وهم وراهم والشباب داعسين للموتر والبنت معهم
جالسه تصايح وتبكي وتقول اتركوني والله يرحم والديكم تكفون انتم وش تبون مني خوذي الذهب كله
بس فكوني 000تكفون 0000تكفون؟؟
والشباب حالتهم حاله وعرقهم يتصبب و الخوف ذابحهم والدوريات تجمعت عليهم ونهارهم نهار
قال واحد منهم وش اريك نحذفها من السياره قال الثاني انت صاحي شفهم ورانا اكيد بيمسكونا
قال لا ماعليك بيلتهون فيها ويتأخرون عنا شوي قال اجل امسكها واحذفها
والبنت انهبلت ياناس حرام عليكم ليه كذا انا وش سويت لكم وذاك ماغير يسحبها يبي يحذفها
والبنت تبكي من الخوف والشايب والجيوب وراهم وآخرشي قام الولد وفتح الباب والسياره تمشي
ومسرعه بعد000 تخبرون شباب وتطردهم الدوريات وحذف البنت بكل قوته برا السياره
الشايب يوم شاف بنته وهي تحذف وهو يغمى عليه والجيوب توقف تبي تشوف البنت حيه والا ميته
ويوم وصلوا لها لينها طايحه على وجهها والدم على ثيابها وراسها
قال واحد من العسكر اكشفوا وجهها خلنا نشوفها بس محد قدر يكشف وجهها من الخوف
وقالهم كذا مره بس محد طاعه قال انا بكشف وجهها
ويقوم العسكري وياخذ البنت ويشيلها ويقلبها على وجهها لين وجهها مليان دم
والشعر لاصق عليه ويقعد يبعد شعرها عن وجهها ويمسح الدم عنه0
ويوم ناظر لها زين وقعد يتمقل فيها
واثرها بنت السبيت مقلوبه على وجهها ومكبوب عليها شاهي
هههههههههههههههههههههههههههه
http://scoon80.freeservers.com/002.jpg
