مقابلات بين اعضاء منتدى الرسم .....

السلاااااااااام عليكم..

سوووري ماكتبت الرد امس... no execuses :o

الحين ببدا على طول :).. (سوري الرد بيكون مجزأ لأن عدد السمايليز وايد عشان جذيء جزأت..)

انا كنت مفكر من قبل العيد ان اروح الكويت و في كم عضو هناك عرفوا هالشي.. لكن كنت طول الوقت متردد يوم اقول اروح ويوم اقول لا صعبه.. و كنت مفكر ان يكون على تاريخ 3-12 يوم الاربعا.. و ماااقررت و اخذت القرار الاخير ( مو هذا مسلسل! :p ) الا يوم الثلاثا العصر..
عقبها الاعضاء اللي جفتهم يوم الثلاثا عطيتهم خبر.. و كانوا جيم و كيتي و تاجا..

الاربعا الساعه 5 الصبح.. طلعت من شقتي في الخبر و مسكت الطريق.. وصلت الدمام ومسكت خط الدمام - الخفجي الساعه 5ونص.. و طول الطريق كان مطر :raincloud و فترات كان قويييي قوي وايد :raincloud :raincloud لدرجة ان فكرت اوقف لين يهدا شوي.. لكن كل هذا يعني تأخير وانا معطي الشباب خبر ان بكون عندهم على الساعه 10 الصباح انشالله.. وصلت مدينة الكويت الساعه 9وربع تقريبا.. هههههههههههه انا كنت ماخذ خارطة للكويت و العاصمة من مكتبة جرير و قلت بتبع الخارطه لين اوصل جامعة الكويت في مدينة الخالدية مقر التجمع.. قعدت من 9ربع لين 9:50 وانا احوووس في العاصمة و ادور في مكاني هههههه لين في النهاية جفت مكتوب "الخالدية" :D تشققت.. و جفت مكان عرفت انه الجامعه على طول.. طبعا اخترنا هالمكان لأن اريكسا و ليتل ليللي و كيتي و ساكورا و مزم و شارب آيز كلهم يدرسون هني... و اتفقنا مع باقي الاعضاء ان يلتقونا هني بعد..

المهم وصلت الجامعة.. و قالوا لي ادخل من البوابة رقم واحد و هناك لقيت كيتي.. هههههههههه كأن مكتوب على راسها كيتي عرفتها :p و الظاهر كان مكتوب على راسي رانما بعد :06: هعهعهعهعهع
من هناك مشينا لين المرسم.. وووووووو دخلنا المرسم نياهاهاهاااي (الحمدلله والشكر).. هناك كان في 3 بنات و ولد كشخه خطير ;) (شتبي اكثر بعد).. اول مادخلت الا تقول لي كيتي: "هذا منو؟"
انا قلت: "ممم شارب آيز :D"... طلع غلط (ومستانس مع ويهي)... قلت اكيد عيل مزم.. رحت سلمت عليه :D :D ويهه بشوش و منور و يشرح الصدر وووو طويل.. يمكن انا قصير.. لالا هو طويل... لما سلمت عليه قعدنا جنب بعض و في الجهة الثانيه من الطاولة صفة 3 بنات مع كيتي... "وهذولا منو؟"
انا: "مممم اللي في الوسط اريكسا.. (عرفتها على طول يحليلي)... مممم اللي على يمينها مانجا كوين!".. الا كلهم في نفس الوقت بمعنى "لا غلط"... "اوكي عيل ليتل ليللي.. واللي على يساركم مانجا كوين"
هعهعهع عرفتهم على طول.. (شباب لاتنطرون مني اوصاف البنات :09: dream hahai) ههههههههههههههههه..

يتبع...

.....
جفت المرسم محتلينه ههههه معلقين رسوماتهم.. جفت رسوم اذكرها مالت مزم و رجعت ذكريات جميله جدا و رسوم لأريكسا و البقيه هذا غير الرسوم اللي بالالوان المائية و غيرها المعلقه في كل مكان.. اشياء وايد حلوه المفروض تعرض في المنتدى.. :)
بعدين قعدنا..هم قعدوا هناك و انا و مزم قعدنا هنيه.. عطتني مانجا كوين ملف فيه رسومها :wow: اشياء وااايد عجيبه.. كانت اوراق وايد قعدت اجوفها بعدين كيتي طلعت CD من ملفها و شغله مزم على اللاب توب ماله.. السيدي في رسوم عجيبه و كيوت مالت لعبه هم يعرفونها.. انا قعدت اجوف السيدي و رسمات مانجا كوين.. ههههههههه ماشالله يدي تعبت من كثر مانا شايل الاوراق واقلّب فيهم.. في رسوم و سكتشات عجيييبه.. اللي عجبني منهم حطيته على جنب أن بصادرهم بعدين هعهعهعهع :evil: و ايه بعد كنا انا و مزم نجوف كتاب عن Final Fantasy 8.. في كللل شي عن اللعبه.. و جفنا الوحوش و الشخصيات وغيره وغيره و قعدنا نتكلم عن الالعاب شوي خاصه الاربيجي و بعدين يبنا طاري لعبة رانما و هني تميزت ليتل ليللي ههههههه طلعت خبيره في رانما اكثر مني :embarasse وقالت لي عن العاب رانما لكن ماعطتني اللعبه :12: (اصلا ماكان عندها.. احم)..
و سألت مزم عن باقي الشباب.. كلم شارب آيز.. و قالوا لي ان شارب آيز يشابه الرسوم اللي يرسمها :naughty2: خطير هاه.. بعدين دخل علينا واحد يشبه الرسوم اللي يرسمها :p عرفته على طول و صرخت مثل الاهبل شارب آيز :D (و شاق الحلج شكلي مسخره).. سلمت عليه و شلونك اخبارك.. شلون اوصفه! صج مثل مايرسم نفسه في المنتدى لكن شعره مب اخضر و شيلوا العلامات اللي على الويه يطلع لكم هو بالضبط :icon6:
و قعدنا شلونك شخبارك و من هالكلام.. بعديييين دخل علييينا ميثم :arms: و سلام و غيره و عطاني دفتر السكيتشات ماله.. ونااااسه.. صج ان معظم الرسوم ماكانت كامله لكن رسومه كششششخه وايد حلوه ماشالله عليه.. كان ودي اخذ الدفتر بدون مايلاحظ :salook:...
و تاجا بعد يات لكن ماطوّلت.. اذكر لما كانت موجوده تكلمنا عن سالفة الايقافات والطرود و ايقاف لوجين و حذف التواقيع و خرابيط المعقدين اللي في المنتدى :ziplip: مابي اكمل.. بس كان نقاش حلو :)..

وووووو.. شارب آيز كانت عليه محاضرات فطلع على طول.. بعدين تونا نسولف الا مزم يقول ان جيم الحين جاي.. و دخللللللللللللللل جيم :6147: و في يده كيس من اول ماشفته استبشرت خير هههههههههههههه..
اول ماقعد معانا طلع الكنوز اللي عنده.. كتب كلللها mecha mecha meeeechaaa.. واحد فيه جريندايزر و مازنجر رسوم و ديزاينات اوليه و غيره :Eyecrazy: يطير العقل.. و الثاني معظمه عن Gundam.. شي شي عجييييب صج شغلنا كل واحد ماسك كتاب و عيونه هالكبر @@ يبحلق فيه..
و ماشالله عليه جيم كلما سألنا عن آلي عطانا تقرير عنه.. لكن المشكله اذا قال كلمه بالياباني في الوسط هههههههههههه ويهنا يصير جذيه :confused2 جيم في حركاته و كلماته وايد من المانجا :biggthump خطير هاه.. و بيني وبينكم لاتقولون حق جيم اوكي.. في الصج غير عن المسنجر لأن في المسنجر دايما شكله مكتئب و معصب هههههه لكن في الصج طول الوقت مستانس و ينكت ويضحك..
مممممم بعد.. بعدين قعدت اجوف الرسوم والصور اللي في كمبيوتر مزم مع كيتي.. الشباب كانوا يسولفون و البنات يرسمون.. و ساكو دخلت و اشتغلت على رسمة لها.. منظر للقمر وانعكاسه على البحر.. والله رسمه حلوه لكن هي مب مقتنعه فيها للأسف.. و ماشالله عليه مزم دايما يعطي توجيهات و تعليمات.. من اكثر الاشياء اللي عجبتني :) و شلون متعاونين و يعلمون بعض على طول.. و اميرة الخيال كانت موجوده لكن مالها حس ابدا.. الكل كان موجود حوالي 11 او 12 عضو في مكان واحد :D
ووو رجع شارب آيز من محاضراته و كملنا سوالف.. تكلمنا عن اكثر من شي من اول مادخلت.. تكلمنا عن النقد و الردود و مشكلة منتدى السياسه اللي صارت قبل و تكلمنا عن بعض رسوم الاعضاء و حاولنا نطلع بعد بمخطط لليومين اللي بقعدهم.. والله آآآخر وناسه..

يتبع...

.....
بعدين الوقت بدا يتأخر يعني الظهر بعدين قرب العصر.. الساعه 2 يسكر المرسم.. البنات راحوا وبقينا احنا الشباب لين 2وربع في المرسم هههههههه و المشرف ينتظرنا نطلع عشان يقفل الباب..
طلعنا و قلنا وين الحين.. قلت لهم "والله انا ميت يوع ماتريقت حتى والحين 2 الظهر ابي اتغدا هههههه" قالوا اوكي عيل كافيتيريا الجامعه في مكدونالدز.. مشينا لين جدام الكافيتيريا و مزم قال ان عنده محاضره الساعه 3 ولازم يروح.. قعدنا نسولف شوي و ميثم التقط صور.. في صوره تذبح ضحك مادري شلون صورها هههههههه بس محد بيجوفها :nana: اخذت ارقامهم و قلت بتصل فيكم بعد المغرب عشان نتفق على مكان نلتقي ونطلع مع بعض..
مزم راح و بقينا رانما - جيم - ميثم - شارب آيز.. رحنا الكافيتيريا انا وجيم تغدينا لكن الشباب الظاهر مسوين رجيم :p.. ايه جيم نسيت.. الله يغنيك على الغدا :o.. على الغدا السوالف كلها دارت حول موضوع الاخ booob و النقاط اللي انطرحت في الموضوع و رأينا و غيره.. كان حلو النقاش كلنا مع بعض غير عن المسنجر فرق والله..
خلصنا غدا و طلعنا من الكافتيريا ( اوففف توني منتبه الرد وايد طويل.. تفصيل ممل هاه :hmmmm: ) المهم.. بعدين كلنا "هاه وين سيارتك.. وين سيارتك انت.. انا سيارتي هناك.. عند بوابه واحد".. طلع ان سياراتنا مع بعض.. قلنا احسن نمشي مع بعض لين نوصل هناك.. و احنا نمشي كنا نفكر وين نروح المغرب او اليوم الثاني (الخميس) الصبح و غيره.. مشينا لين وصلنا قريب سيارتي كانت اقرب وحده.. وقفنا هناك نسولف اشياء متفرقه.. و بعدييييييييييييييين (اهم سالفه هذي هعهعهعهع).. ياتنا هالقطوه الصغيره.. و قفت في الوسط بيننا.. "شتبي هذي" ههههههههههههه.. و تطالعنا واحد واحد ههههههههه قنلنا اكيد مطرشتها كيتي تتجسس :ninja: لالا اكيد شادو كات مطرشتها هعهعهعهع.. بعدين يات القطوه وبدت اتّمسح في شنطة شارب آيز.. (sooo cute).. تروح و ترجع تحكك جسمها في الشنطه و المسطره المتريه.. بعدين يات عندي نفس الشي!!.. عقبها يا الدور على جيم ههههههه ماخلت حد ماتحككت فيه.. الا ميثم الظاهر كان حاط مزيل قطاوه ( :yawn: سخيف ).. و تصدقون القطوه على هالحال يمكن مدة 10 دقايق طول الوقت اتحكك و اتمسح فينا بس اكثرررر شي في شنطة شارب آيز والمسطره.. كان شكلها متوسخه من المطر و الغبار الظاهر تنفظ نفسها فينا :s: و ماكانت تخاف يعني جيم نزل لها و قام يحمس على راسها وبين اذنها و هي مستاسنه كانها قطوة بيوت مب شوارع..
بعدين جفنا السالفه طولت ههههههههههههه قلنا خلاص يلا خل نمشي.. و بعدين بيكون بيننا اتصال عشان نطلع.. انا قلت لهم بتصل فيهم من الفندق لما اكون مستعد لأن موبايلي مايشتغل في الكويت وكانت هذي من المشاكل اللي واجهتني هناك.. مافي طريقة اتصال الا تلفون الفندق..
رحت الفندق.. اوكي الحجز موجود بدفع.. الفيزا ماتشتغل.. اففففف الحين شسوي... مالت عليهم ماعندهم حتى مكينة ATM في الفندق... قالت لي الفلبينيه روح المكان الفلاني ( مادري وين قالت :s: ) في بنك اسحب من هناك... انا افكر.. الحين اول مره ايي الكويت شلون تبيني ادل البنك الفلاني ولا المكان الفلاني.. والله و رحت على ويهي درت حست حست هههههههه نص ساعه لين طلعت مكينة سحبت منها و رجعت لهم.. قلت لها برجع عقب 10 دقايق ههههههههههههه رجعت عقب ساعه كامله..
المهم skip لين بعد مانمت و اتصلت في جيم..

على الساعه 7 كأن التقينا انا وجيم في الفندق و اتصلنا في شارب أيز و ميثم أن بننتظرهم ايون الفندق عشان نتحرك مع بعض.. لكن تأخروا فقررنا نطلع انا و جيم واتفقنا ان نلتقي معاهم في مكان معين...
ههههههههه كانوا طول الوقت متوهقين مايعرفون وين يودوني.. أي مكان مب مشكله عندي.. بعدين استقر الاتفاق على مجمع الرحاب.. مكان كلللله محلات العاب بلاي ستيشن و غيره.. وفي محل أنيمي..
شفناهم هناك و مزم كان مشغول فماقدر ايي.. رسام (حامل التابوت) كان طالع رحله مع ربعه فماقدرنا نشوفه.. المهم.. ركبنا فوق وداني جيم محل كله figures و اشياء عجيبه.. وقعدنا نحوس في المجمع و طبعا الجو كان يساعد على سوالف الانيمي و الالعاب.. قعدنا نحوس في المكان و دخلنا بعدين محل و شروا الشباب لعبه مادري شسمها لكن المهم mecha هعهعهعهع كله mecha.. بس كان فيها ايفا 01 و خماشي و جيتر روبو.. و عقب ماشبعنا من المكان طلعنا.. مممم وين نروح وين نروح... قلنا خل مطعم تكون قعدته حلوه منها ناكل ومنها نسولف.. اصلا ماكنا نحس باليوع لكن مافي أي افكار ثانيه.. الشباب قرروا يودوني مطعم على البحر مادري شسمه.. جيم قال ان يدله و ميثم وشارب آيز مع بعض في سياره وحده قالوا بيلحقونا.. (انا مع جيم في سيارته) و في السياره حشينا في كم عضو (سامحونا كخخخخ)..
واحنا في الطريق الاخ جيم طوّف اللفه و ضيّع هههههههههههه.. انا قلت له عيل خل نروح نينو.. في نااااس طول الوقت يتكلمون عن هالمطعم وقلت لازم اجربه.. طبعا انا مستغل فكرة أني ضيف فقعدت اتشرط.. فوافقوا ان نروح نينو هههههههه.. و طلعوا الشباب كلهم اول مره يروحون نينو حالهم حالي..
لما وصلنا عن البوابه.. اشوف الشباب مترددين هنيه عرفت ان اول مره ايونه و ماكان عاجبهم شكله من الاضاءه اللي داخل و الموسيقى و كان متروس بعد.. المهم دخلنا هناك احنا الاربعه و يابوا لنا المنيو اللي كأنها دفتر محاضرات :p و الاسعار كانت شوي.. احم.. و في اصناف وايد توهقنا شنو نطلب.. تفاديا للشسمه طلبنا اشياء نعرفها ومجربينها من قبل.. ماقول لكم شنو طلبنا :eviltongu
جلسة المطعم كانت مخصصه للمنتدى.. طووول الوقت نتكلم عن المنتدى.. تكلمنا عن بعض المواضيع و عن بعض الاعضاء.. بس الظاهر ان هارد روك :scool: كان الاكثر شهره (مين أدّك ابسط ياعم).. تكلمنا عن بعض المشاكل اللي في المنتدى و تكلمنا عن الردود و الانتقادات وشلون المفروض يكون الرد و بعض الاقتراحات اللي ممكن تنعرض للأعضاء و تكلمنا عن ههههه الكم الهائل للجاليريات و الpluses and mineses من هالشي.. تكلمنا عن بعض الاعضاء القدامى و الذكريات الحلوه معاهم و تمنينا لو يرجعون.. تكلمنا عن المشاكل اللي مرت على المنتدى من قبل و شلون كانت كلها تنحل بفضل الله ثم المراقبين والاعضاء و الترابط اللي بينهم.. تكلمنا عن عدة اشياء لكن ماذكر والله اتمنى من الشباب لو يذكرون شي يقولونه..
طبعا طولنا في مطعم و خذتنا السوالف.. ماوعينا الا مافي حد بالمطعم هعهعهعهع و الساعه صارت 12 بالليل.. طلعنا من المطعم و طبعا ميثم ماقصر بالتصوير من يوم كنا في الرحاب لين المطعم لين طلعنا منه.. بس ونااااسه يعني كان يصور كل لحظه للذكرى.. بعدين واحنا عن سياييرنا حاولنا نتفق على مكان معين حق يوم الخميس لكن ماتفقنا الا ان نفطر مع بعض و بعدين بنقرر وين نروح و كان الجو ذاك الوقت بارد و شارب ايز أثر فيه البرد وبان التأثير يوم الخميس و مشكوووورين شباب الله يكثر خيركم على العشا الحلو :arabchatr

يتبع....

.....
كلللل هذا اللي صار يوم الاربعا.... الحين نبدا في يوم الخميس..

اتفقت مع الشباب ان اتصل فيهم على الساعه 9 و قالوا ان بيكونون صاحيين.. yeeeah right.. ههههههههه اتصلت في ميثم و كان واضح من صوته ان كان نايم..
رانما: "صباح الخيييير.. هاه توك قاعد؟"
ميثم: "صباح النووور.. هاه.. لا.. يعني من شوي كنت قاعد"
رانما: "قعدت على صوت الموبايل صح :phone: "
ميثم: "....ايه"
صادوه هعهعهعهع.. المهم طبعا لأني مادل مكان في الكويت قال ان بيمر على شارب آيز بياخذه و بيمر علي الفندق و نطلع كلنا مع بعض.. انا انتظرتهم في اللوبي و قعدت على النت هناك شوي.. لين ياووني..
طلعنا رحنا مكان ماعرف سشمه لكن تريقنا في tekka.. والله كان خوش ريوق.. ههههههههههههههههه بحلي ميثم او شارب ايز يقولون الكلام اللي كانوا يقولونه لي :12:... تذكرون شكنتوا تقولون وانا اخذ الاكل من البوفيه؟... ههههههههههههههههههههههههههه انا أكلي خفيف و ماكنت اخر اشياء وايد.. يقولون لي.. شوي شوي اعصابك ياخي عالاكل بتمتن ههههههههههههههههههههههههههههههههههه والله ذبحوني من الضحك... جلسنا نتريق.. ريوق لين الساعه 12 الظهر :tongue2: و ميثم بعد كان يصور هناك.. يصورني وانا اكل :31: بس كانت صور عجيبه :biggthump و جيم ماكان معانا لأن عليه دوام.. مممممم.. عن شنو سولفنا ذاك الوقت شباب؟! :o ماذكر هيهي..

عالساعه 12 الظهر طلعنا من المطعم.. و ايييه لما طلعنا من نينو الاربعا ميثم قال ان الغدا يوم الخميس عنده.. فللله هالانسان :).. المهم مثل ماقلت عالساعه 12 طلعنا من تيككا.. و قالوا الشباب بيودوني المركز العلمي.. رحنا هناك والله مكان عجييييب وايد عجبني.. اول شي مرينا على السينما ال3D و شارب آيز خبير ماشالله يعرف كل الافلام.. حاولنا نلقى فيلم وقته مناسب لكن طبعا حظي دايما عوي.. فمالقينا فيلم 3d وقته مناسب.. قلنا نبروح عند البحر.. رحنا هناك الجو كان عجييييب و المكان وايد حلو صراحه.. قعدنا نسولف عن موضوع القراصنه هههههه لأن المكان كان مناسب.. واللي صار بعدييييين بخلي شارب آيز او ميثم يقولونه.. ( كسّـلت :o ) عقبها قررنا نمشي خلاص... وووو... وانتهى الجزء الاول من يوم الخميس...
و صلوني الفندق و عالساعه 3 العصر تقريبا ياووني الفندق مره ثانيه (ميثم و شارب آيز) لكن هالمره انا لحقتهم بسيارتي لين بيت ميثم
و ميثم كان يقول ان محضر لنا مفاجأه بعد الغدا.. وصلنا بيت ميثم جعله الله بيت عامر و ملاه بالسعاده انشالله.. دخلنا هناك و جزاه الله خير ضيفنا (ميثم شنو ينادونك.. بو شنو؟؟؟) احم.. و شارب آيز كان مزكم ههههههه الله يعافيه كله من لفحة برد الاربعا.. وبعدين انتظرنا جيم لين يانا قعدنا نسولف شوي سوالف متفرقه و بعدين تغدينا ذاك الغدا الحلو الله مشكووووور ميثم و الله يغنيك و يكثر خيرك.. و طــــبـــــعا اكلي ماعجبهم لأن يقولوون هم أني ماكلت شي.. ( شسوي يعني اغصب نفسي :12: ).. انا قلت بعدين أني ماقدر أطول لأني متواعد مع واحد من ربعي في جامعة الكويت.. بعد الغدا كانت المفاجأه..
فيلم من تمثيل مجموعة من الشباب الحلوين.. ميثم و اقربائه و من اخراج اخوه الكبير.. limme tell u something.. الفيلم عجيييييييييب عجييييييييب عجييييب وااايد حلو.. صراحه كنت speechless لما شفته اولا عجبني الاخراج ماشااااالله ماشالله صراحه شغل عجيييب و حركات وايد حلوه.. :eek5: :Eyecrazy: :shock22: بعدين التمثيل.. هههههههههههههههههههه والله التمثيل كان خطير و الحركات رهيبه.. و من ناحية كوميديا.. :rofl: مت ضحك لووووول والله كان ودي لو كللل الاعضاء مجتمعين و يجوفونه مع بعض.. من أول الاخراج و الموسيقى و التمثيل و الضحك و الحركات اللي كانوا يسوونها.. والله شغل :bigok: الله يعطيكم ألف عافيه شباب.. ههههههههههههههههه كل شوي اذكر شي عبيط في الفيلم ههههههههههههههههههههههه ميثم لااازم تسوي نسخ لجميع الشباب صراحه هالفيلم مايتفوت..
للأسف ماقدرت اجوف الفيلم لين نهايته.. اصلا تاخرت على الموعد نص ساعه.. سلمت على الشباب و طبعا الوداع كان طويل هههههه ماكان ودي اروح والله لكن المشكله ان نقّعت رفيجي والموعد.. طبعا المنطقه اللي ساكن فيها ميثم تضيع.. متاهه... فتفضل جيم مشكووووور ان يراويني الطريق لأنه هو بعد كان لازم يروح عنده شغل و مشكووور بعد مشاني لين الجامعه..
و هناك نزل معاي و سلمنا على بعض و عطاني هدية كشخه لكن ماقول حق حد عنها :icon6:

يتبع... (اخر جزء)

اقتباس:

---

المشاركة الأصلية كتبت بواسطة ODIN

مين القطو الي رفع الموضوع ...


احم اخباركم ؟!

---

أوووووووووووووو
ODIN على قيد الحياة ؟!؟!؟!؟
وين هالغيبات ... أقول تعال الحقنا بمنتدى الشكاوي و المراقبين
في مشاكل يبغالها حل ... :06:

.....
و بجذيه انتهت مقابلتي مع اعضاء المنتدى (وبدا موعدي مع رفيجي هعهعهعهع)

صراحه... ماعرف شنو اقول للأعضاء.. لو شنو اقول ماوفيهم حقهم.. كانت من أحلى الايام اللي مرت علي و استانست وناسه مافي مثلها.. مشكورين مشكورين مشكوريييييين يا أحلى أعضاء شارب آيز جيم و ميثم.. ثننننننكس والله استانس وايد معاكم و خليتوا هالرحله اسعد رحله و كل دقيقه ضحك و وناسه..
و شكراااااااااا لكل الاعضاء اللي كانوا موجودين فرصه سعيدة جدا جدا ان شفتكم و تكلمت معاكم.. اتمنى ان تتكرر... :

شكرا كيتي :arabchatr
شكرا اريكسا :arabchatr
شكرا مانجا كوين :arabchatr
شكرا ليتل ليللي :arabchatr
شكرا ساكورا :arabchatr
شكرا تاجا :arabchatr
شكرا اميرة الخيال :arabchatr
شكرا مزم :arabchatr
شكرا شارب آيز :arabchatr
شكرا جيم هد :arabchatr
شكرا ميثم :arabchatr

مشكورين كلللللكم.. ماعرف شقول... :bawling:
اعذروني اذا في شي نسيته.. اتمنى من اللي ماعطيتهم حقهم في الرد و ماذكرتهم ان يسامحوني.. كان ودي اقعد مع الكل وقت اكثر لكن الرحله كانت سريعه ماتساعد.. اااسف :sad6:

اعتقد... that's all...

هههه ادري ان كتبت بالتفصيل الممل و الرد طويل وايد ههههههههه مب قادرين تكملونه لين الاخير .. انا ماظن بقرا ردي كامل الحين واشيك لو في نواقص او اخطاء.. طوييييل ههههههههه..

اتمنى من باقي الاعضاء اللي قابلتهم ان يكتبون عن المقابله بعد من وجهة نظرهم و يذكرون النواقص و الاشياء اللي نسيتها... و حد يكتب عن سالفة السمج (السمك) :D
مثل ماحبيتوا تشوفون ردي عن المقابله انا بعد حاب اشوف كلامكم عنها :)..

سلام.. و ثنكس :)

رانما هههههههههههههههههههههههه ما خليت شي ما قلته :)


آنا لو بقول شصار ما راح تفهمون علي لأني ييت آخر وحده :31:


بس صج كان وناسه .. مسكينه ساكورا قاعده ساعة تضبط الرسمة هههههههههه كسرت خاطري :tongue2: و مانجا كوين كانت ترسم رسمة حلوة ^_^ و كيتي كانت تعلق رسمات أريكسا في المرسم

صج آنا ما كنت أتكلم وايد لأن كلهم قاعدين يتكلمون و قرقة و ازعاااااااااااااااااااااااااااج بالمرسم :tongue2: لو بعد طولنا القعده جان فنقرونا و اطردونا من المرسم خخخخخخخخخخخ

و أعلى صوت كان صوت رانما خخخخخخخخخ منفعل أعتقد كان يتكلم عن السياسة :D

بس صج كان يوم لا ينسى في تاريخ البشرية جمعاء :09:

ههههههههههههههههههههه
مشال الله رانما


كاتب بالتفصيل



شرايكم اعيد كتابت اللقاء ( طبعا الي كنت موجوده في انا )

بتلقون تفاصيل اكثر عندي

جذي بتكلم عن الشباب والبنات :09:

انا كنت عنصر مواضب على الطرفين

:cool: عشان لا يطوفني شي

ههههههههههههههههههههه
مشال الله رانما


كاتب بالتفصيل

العفو صراحه انته فرحتنا بييتك الكويت ;)

كررها مره ثانيه :p ( لا تصدق :31: )



شرايكم اعيد كتابت اللقاء ( طبعا الي كنت موجوده في انا )

بتلقون تفاصيل اكثر عندي

جذي بتكلم عن الشباب والبنات :09:

انا كنت عنصر مواضب على الطرفين

:cool: عشان لا يطوفني شي

رانمااااااااااااااااااااااااااااااااااااااااااااااااااااااا :bigeyes:

مشكوووووووووووووووووووور يا صديقي على كل هذا التلخيص :09: .. هي تلخيص لأن متعة اللقاء .. و السعاده الي كانت تغمرنا .. أعتقد أكبر من الكلمات بكثير جدا جدا جدا جدا جدا ... إلخ :D .. كانت حقا حقا لحظات لن تنسى :argh: ... صراحة .. أشكرك من كل قلبي على جهدك الكبير في كتابة هذا الرد @@ .. و الله و تحرجنا و الله :23: ... الصراحة يا ابن بطوطة :09: .. انته عزيز و غالي :D و احنا ما سوينا شي @@ ... لنا الشرف بأن نستضيفك عزيزي ^^ آنة و شارب قاعدين نخطط لرد سبيشل .. بس احتمال يطول اسبوع أو شي ^^،،، فلا تخاف ;) و بالنسبة للفيلم :sour: راح نحاول :09: بس انته ما كملته :12: :12: :12: :D إن شاء الله الفرص القادمة ;)

.........
راح أحاول الحين أعرض بعض الصور .. بس بدون أشخاص :naughty2:

رانما .. تذكر الفارس الأسمر في الباسات الأزرق :ridinghor :D

اقتباس:

---

و أعلى صوت كان صوت رانما خخخخخخخخخ منفعل أعتقد كان يتكلم عن السياسة

---

بعديييييييييييييين انا بالا فخر :cool:



بس صح كلام رانما

لا تتوقعون كل شخص نفس على لامسنجر ( اله انا )

جيم غيييييييييييييييييير على لامسنجر بالحقيقه ينكت ويضحك :09:

شارب هااااااااادييييييييي شحليلاااااااااااااااااا ( ويشاابه رسومه حييييييييييل حييييييييل انا انصدمت اول ما شفته كانه رسمته )

مزمز ( مالكم شغل هذه لاتعليق )

ميثم ما كلمته عشان اعرفه

اريكسا بالمسنجر مالت طق لا تتوقعون اهي جذي ترى اهي حبوبه وترد اذا احد كلمها :D

ساكورا تكسر خاطري وايد مرات احس اني كادتها :tongue2:

مانجا تعجبني احسها نفسي :cool:

تاجا هاديه لو تشوفونها على حقيقه تنصدمون حيل هاديه

اميره الخيال تحفه هذي العبط كله عندها :09: ( بعد جبدي الي تسيرلي )

ليلي كانها انمي :09: تشبه شخصيه بس ماعرف اسمها حيييييييل وصغيرونه ( هاهاي طالع من يقول :31: )



ووو رانما هذه تحفه بحاله اهو بين وبين اوكي نفس المسنجر













ميثم كثر كثر صور :p

و الحين جاسوس كيتي @@

ماشاء الله !!
12 عضو يتقابلون !! هاي حفله !! هههههههههههههه
مشكور عالشرح أخ رانما والله شكلك انبسطت ^^
والأعضاء ما شاء الله عليهم ما قصرو وقامو بالواجب !!

يا سلام , أعتقد هاي أحلى مقابله للحين !!
وشوقتني جدا للفيلم اللي عملوه هههههههههه خاطري اشوفه :D

وياريت نسمع أكثر من بقية الأعضاء اللي بالمقابلة ^^

لا تعليق :D

هههههههههههههههههههههه جاسوستي انا اله احوس ادورها هل قطوه

ونبدي نشتغل بالمافيا :cool:

بعد بعد حط صور :أفكر:

زين هذي ايد شارب ايز وله جيم ؟ شارب ايز كانه