قهوة WoW .. :P

كرزان
لا تنسى انه الزحف المقدس ما نجح إلا بسببي
يوم كنت بروحك في جهادك المقدس وكل اللي تحصل عليه توقيفات ابو اسبوع واسبوعين
ويوم كان مافيه أحد يوقف جنبك وكنت أنت وحداني ماغير تشتكي بروحك

لما أنا جيت دعمتك بكل قوتي وناصرتك بكل جوارحي ودافعت عنك ورفعت السلاح علشانك
وواجهت بوحه وشلته وبعد كرات وفرات وبعد مواجهات مستعره وحروب مستمره

قدرنا بفضل الله نعطي بوحه أول توقيف وبسببه تفرق عنه أتباعه وزاد مناصريك
وصار المشرفين يوقفون بصفك
وبسببها أعلن بوحه تقاعده وكتبت رسالته المشهورة في نقد وتجريح الأعضاء والمنتدى واللي رديت عليها أنت بكل قوة وبكلام جميل

نسيت ذاك اليوم والا ما نسيته

والحين تبي تعلن الزحف المقدس مع مين وضد مين
بوحه واندحر وطلع من المنتدى وتلقاه يدش بمعرف مجهول من فترة لفترة عشان يشوف وضع القسم
وعشان ينبسط ويقول في نفسه يستاهلون الحين يعرفون قيمتي واني المحرك للقسم وانه المنتدى بدوني و لاشي

و هذا الكلام طبعا عار من الصحة
والأكيد انه بعد هزيمة بوحه ودحره وبسبب أنه لعبة واو نفسها تغيرت وخربت وصارت ممله وتركها أغلب المناضلين من الزحف المقدس
وبسبب هالشئ القسم قرب يموت وما صار أحد يهتم يجي القسم أو يشارك فيه وتلقاهم في أقسام أخرى يبدعون زي اخونا يوشي في قسم المطبخ

مافيه غير القهوة واللي عاشت بوجودك لأنه مافيه احد عنده البطارية النووية الروسية اللي تمتلكها

وممكن النشبة الجديد قزمان يكون المحرك الثاني للقسم واللي ناشب يبيني أرد عليه وأعطيه كلمة ولو جبر خاطر وإلا سلام من بعيد
ثكلتك أمك يا هذا خلك ثقيل و ابعد عن الواسطات واعتمد على نفسك

اقول كرازان وش اخبار لعبة واو وش اللي تغير فيها يقولون جاروش مات بعد ما انقلب على الكل حتى عشيرته
وانه فولجرن زعيم الترول صار الوارشيف
اما عاد طيب وثرول وش صار عليه وليش مارجع القائد

ياخي والله بليزارد خربت اللوري بقوه وخربت شكل ثرول من جا الكاتا
صاير دلاي لاما مو قائد حرب لأعظم عشيرة في ازيروث عشيرة الأورك ذولي الجلود الخضراء

اكسبانش الباندا كان سقطه كبيره للشركة

لكن لغاية الحين مافيه لعبه نزلت تنافسها
ممكن جيلد وار سحبت بعض لعيبتها لكن مو بالشكل المطلوب

في إنتظار لعبتهم الجديده تيتان
عساها تنزل والديزل تحول على كبينة الكترونيه بدل الكبينة المصديه واللي تقطيع ليل نهار بشكل مستحيل تلعب معه اونلاين

نعم اذكر بوحا كان الباتش 3

والباتش 4 اللي كان اسمه "الملك يحتل القسم ويعلن اجتثاث المتمردين" ويومها دخلوا بوسات جديده مثل نخيلان و عجيلان و قدر الملك بمساعده القاده والتلاميذ وكل المخلصين من اجتثاث حزب بوحا وصار مالهم وجود

الحين باتش 5 واللي اسمه "الحياه السعيده مابعد حزب بوحا" وصار ماكو مشاكل عندنا و نتكلم بأي شي نبيه

تذكر قبل لما كانت جيلد وور مانزلت بعد وتكلم واحد كتبت موضوع ينتقد فيه ووركرافت و مع السوالف تكلمنا عن جيلد وور جان يدش بوحا و حزبه ويعلنون الحرب لأننا بس تكلمنا بعلبه غير ووركرافت

الحين نتكلم بكل شي , من صناعه العطور الى طلبات امازون و ايباي مرورا بالطب والطب البديل

معمرين القسم بالتنويع واكيد الناس قاعده تستفيد بدون تشارك خصوصا سياسه الملك "السحب المقدس" واللي يدخلون علينا ناس مو جوجل لأن بالبحث يطلعلهم مواضيعنا هني ونتكلم بكل شي بشكل حصري و عميق

لو بوحا هني ؟

كان نص الاعضاء توقيف

بس خوفك من باتش 6 لا يرجع علينا , تحت اسم "عوده الاشرار"


بخصوص اللعبه , انا ماتعمقت فيها كثير , مجرد ادش وادخل الرايدات واطلع , بيني وبينك بالبوت

لكن البوت بعد نزول الباتش هذا ماقام يشتغل مضبوط بالرايد و فضيحه صاير , قلت العب بنفسي عشان الهدف اني اخلص كويستات الاسطوريه وبالنهايه تاخذ back اسطوري , خبرك قبل تاخذ سلاح يكون حق كلاسات بعينها

الحين باك و للكل, ميزته يطلع نفس الاجنحه

المهم اني حاليا بكويست يقول جمع 20 شغله اسطوريه تطيح من بوسات ثرون اوف ثندر و من الرايد الجديد مال جاروش , وصلت الحين 8 او 9 و ماقدرت اجمع اكثر لأن الكلام هذا امس قبل الباتش ونمت مبجر وراحت علي

الحاصل ان بعد ماسمعت ان فولجين صار الوورشيف قلت مستحيل ترول يصير علينا , اقل شي رجعوا ثرال , المهم رحت اورقمار وشفت جاروش مازال موجود والوضع طبيعي

ماادري بنهايه الباتش هذا يتغير الوضع يعني او لأ , لأن الى الان مافتح الرايد الخاص بجاروش , حاليا بس نلعب بأول 2 و باقي 2 يمكن او 3 مافتحوا بعد , يمكن اليوم بعد الابديت هذا

اللعبه الحين صارت وانت قاعد في مكانك , تقعد في اورقمار و تضغط ازرار تدخل دنجن و باتل جراند و رايد , اظن انت لحقت عالميزه هذي

يعني ماكو شي جديد الا اشكال الجير و رايدات جديده و دنجن بعد بين فتره وفتره , غير دنجن تروح بروحك فيك تخلص مهمات

مركزين على الكويستات الحين بليزرد , لكن الحلو ويمكن الناس مو ملاحظته ان الكويستات الحين تخلصهم بروحك او مع مجموعه او رايد لكن مو بصعوبه

يعني قبل اذا تذكر مثلا مفتاح كرزان او the eye او بلاك تمبل لازم تخلص سلسله كويستات ولازم قروبات معاك و القروب بالغصب تحصله

غير الالقاب مثل hand of adal و champion of the naruu كنت تتعب فيهم

الحين تدخل lfr وتخلص حتى الكويستات الاسطوريه , يعني صارت اللعبه اسهل بواجد من قبل , والجير تحصله ان كان جير pve بسرعه عكس قبل لما نبي رايد او دنجن هيروك نكتب بالشات full epic يعني اغراء عشان ياخذونا

الحين بيني وبينك صارت ممتعه اذا كنت تسوي كويستات , لأنهم مركزين عليها و مسهلينها و يحطولك قصص وتعرف ليش صار جذي

قبل كنا نقول تاخذ فلوس علينا و مانستفيد شي . كل شي لازم اشيفمنت وماتروح مكان لا رايد ولا دنجن ولا ارينا و فوق هذا ندفع و نتحسف

الحين عالاقل صاروا يحللون فلوسنا ويحطون لنا شي نروحله بدون معاناه

وانت ليش ماتعطي القزم وجه

هذا تلميذ من تلاميذ الملك و سياسه الملك تقول اي تلميذ لازم توقفون معاه وتساندونه و تكلمون الناس اللي متسببين في حرمانه و عذابه انهم يتركونه واذا مانفع الكلام نتجه الى الزحف المقدس

احنا بنسوي زحف على الاداره لأن التلميذ قاعد يكلمهم ومايعطونه وجهه

اقتباس:

---

المشاركة الأصلية كتبت بواسطة Karazhan

وانت ليش ماتعطي القزم وجه

هذا تلميذ من تلاميذ الملك و سياسه الملك تقول اي تلميذ لازم توقفون معاه وتساندونه و تكلمون الناس اللي متسببين في حرمانه و عذابه انهم يتركونه واذا مانفع الكلام نتجه الى الزحف المقدس

احنا بنسوي زحف على الاداره لأن التلميذ قاعد يكلمهم ومايعطونه وجهه

---

يا أخي الكرزان هذا يسمى حب غامض خايف يحبني ويقع في غرامي أو انه غيران مني بسبب اني جديد ولدي حبتين من نقاط الترشيح وهو من سنة 2009 لديه مثلي حبتين من نقاط الترشيح بمعنى , قزم مصرطح له جاذبية مميزة و الأرشيف له جاذبية مميزة , الأول اللي هو القزم حصل عليها في اقل من شهر والثاني حصل عليها من ايام القذافي ما كان يطلب سيجار كوبي من كوبا بألف دولار للواحد

اليوم طلع الفحص وتأكد الخبر اني مصاب بالسكري

الحمدلله على كل حال

انا انسان مميز , كل امراض الدنيا فيني والحين سكر , باقي ايدز وتكمل الفرحه

الحين مااكل شي , اروح مثل الصقعات اشترك بمطعم صحي يجيبلي وجبات

شلون شكلي وانا آكل اكل صحي ؟ من بعد الكبسات والمشاوي والسمج اصير صحي

برجر خضروات من بعد الستيكات

انا غبي انا الغلطان

ادمان شاي وقهوه بس الشاي اكثر , و بيبسي و سفن وهالسوالف

مدمن بشكل رهيب , واخر ايام حياتي الشاي مايوقف , اخلص من قلاص اسوي غيره

والنتيجه شنو , انقلب انسان نباتي

انا خلاص تدمرت حياتي , من قالولي فيك سكر حسيت الاعراض قاعده تطلع , قبل اعرف النتيجه كنت طبيعي لكن من قالولي حاشني صداع و دوخه و تكرمون ابول واجد

نسبه السكر وانا صايم 8.2 و نسبه السكر بعد ساعتين من الاكل 17.6

المفروض من 3.9 الى 6.1 وانا صايم وهذا الطبيعي و 7.8 بعد الاكل

يدافع البلا

خلاص انا لازم انتحر بعد ليش اقعد ؟ ما اترقع خلاص

فقير , مسكين , مريض , ماكو حظ كلش

يلا باي

اخي الكرزان لا تنتحر ارجوك لا تتركني دنا حبايتك حتى نسيت النوم , يا إخوان حد يروح الى الكرزان الكويت ويرفع معناوياته لكي لاينتحر ,وينكم يا ناس يا أخ أرشيف ويا اختي دي دي ويا ابو حناوي اترك عنك القاعدة الآن وتعال نشوف مشكلة اخونا الكرزان يا اخ دارك بيب يا أخ كمال الشناوي يا ناس ...

مساء الخير

شخباركم

بو شنب الحين خلصت السوالف يعني عشان تييب طاري بوحا مسطكين خله في حاله تراك انت الي تتحرش في الناس وعقب تقول اعداء وكانوا ضدي وووووالخ

المهم اذكرو محاسن موتاكم اقصد المعتزلين

شخبارك وارشيف وشو القيم معاك شو بعدك واو او بي اس بي او ...... اي شي تلعبه او تفحيط

وقزوووم وينك وشو اخر عملية تهريب سويتها

اقول صج مافي سوالف صح

هي باجر بحطلكم كم شغله شريتها وبحركم فيها

اقتباس:

---

المشاركة الأصلية كتبت بواسطة Dudette

وقزوووم وينك وشو اخر عملية تهريب سويتها

---

الأخت دي دي تنتظرني عملية تهريب لإكسسوارات للنساء ادا نجحت العملية راح اجيب لكي هدية مميزة , هل تفضلين شيء محدد عشان أعرف كيفية اختيار الهدية

يا إخواني هل سمع احد خبر من الكرزان سمعت انه يفكر بالإنتحار بتدخينه خمس علب سجائر على التوالي في غرفة مغلقة , يعني ناوي ينتحر خنقا حد يكلمه ليتراجع

امبيه صج صج بو شنب اليوم فليل ما دخل لايكون صج انتحر

حتى وارشيف بعد محد شو سالفتهم او يمكن مواعدين هالاثنين وسايرين الحداق ؟

أفا كرازان طلع فيك سكر
هذا من زود حلاوتك
خلاص اذا جينا نشرب الشاي نحط صبعك في البياله ونحركها واهو صاير فيه سكر

دوديت شكلج تحبين الحاجات اللي تحت مسمى تهريب وشغلات من تحت لتحت
وقزوم عنده استعداد يبلط البحر ويهرب لج اللي تبينه زبيدي ، ضب ، اكسسوارات ومو غريب بعد لو جاب لج تمساح يسوي منه شنط و جزم لعيونج
هذا خريج مدرسة ولد بطنها المقدسة ماكو شئ مستحيل عنده

بالنسبه لواو والله بطلتها والحمدالله اللي نجاني منها
الحين متفرغ للجميع وأي خدمة يكلم الشرطة
مو الشرطة في خدمة الشعب ؟؟!

المهم

نبي احد يتوصى ويحجز لنا استراحة على الحدود بين الكويت والسعودية نشوف فيها فلم دريد لحام الحدود
ادري اني قديم لأني اصلا شايب واخوي كرازان بعد شايب بس بما اننا خريجين مدرسة المصبنجية المحدودة هو فرع الكويت وأنا فرع الشرقية فاللي يشوفنا يقول هذولي شياب ما يشيبون
وأحلى تعسيله فخفخينه تحس بجو التفجيرات و انك عايش في النجف

الظاهر ان الكرزان الآن قاعد بغرفة مغلقة لوحده يسمع أغاني القلب الحزين لمطربه المفضل نسيت اسمه , وقاعد يسوي قلاص جبن شاي مع ستة علب سجائر وقاعد يلف السجائر ويبللها بالمخدر , ويقول طز في القزم هو السبب في حالتي هذه هو النكبه ويقول مع نفسه قبل مجيء القزم كنت فقير فقط من يوم ما جاء للمنتدى أصبحت فقير ومريض

بسم الله الرحمان الرحيم

قل لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ
التوبة 51


أخي الكريم كرزان لن يصيبنا إلا ما كتب الله لنا و انت ما أصابك إلا كرما من الله إما لتخفيف ذنوبك او لرفع درجاتك بالجنة
و مرض السكر هو مرض مزمن و ليس مرض خطير

كل اعمامي عندهم سكر يؤكلون كل شيء لكن بنسب محدده و تبارك الرحمان كلهم بخير .

و إعلم إن ما أصابك هو مكتوب عند الله في اللوح المحفوظ
و هو امر مقضي عليك
من نحن لنغير إرادة الله ليس لدينا سوى أن نحمده على خيره و شره
و إعلم ان شره ليس إلا خيرا بإذنه تعالى

و انت إنسان طيب و متقي و الله لا يبتلي إلا عباده المتقين فهنيئا لك بهذا الإبتلاء
ألا تعلم ان الانبياء أشد الناس إبتلاء من غيرهم
و يبتلى المرء على قدر دينه

روى الترمذي (2398)

عَنْ سَعْد بن أبي وقاص رضي الله عنه قَالَ : قُلْتُ : يَا رَسُولَ اللَّهِ , أَيُّ النَّاسِ أَشَدُّ بَلاءً ؟ قَالَ : الأَنْبِيَاءُ , ثُمَّ الأَمْثَلُ فَالأَمْثَلُ , فَيُبْتَلَى الرَّجُلُ عَلَى حَسَبِ دِينِهِ , فَإِنْ كَانَ دِينُهُ صُلْبًا اشْتَدَّ بَلاؤُهُ , وَإِنْ كَانَ فِي دِينِهِ رِقَّةٌ ابْتُلِيَ عَلَى حَسَبِ دِينِهِ , فَمَا يَبْرَحُ الْبَلاءُ بِالْعَبْدِ حَتَّى يَتْرُكَهُ يَمْشِي عَلَى الأَرْضِ مَا عَلَيْهِ خَطِيئَةٌ .صححه الألباني في السلسلة الصحيحة (143).

و لا تنسى ان الصبر على البلاء هو رفعة في الدرجات .

الأن امر بظروف صعبة إبتلاني الله في رزقي و صحتي و هاني صابرة لين يكتب الله لنا الخير في أمر أخر .

و في النهاية أنصحك بالدعاء فهو مفتاح الخير
أسأل الله ان يلبسك ثوب الصحة و العافية .
في امان الله

يا سلام ونعمة الرد اختي استغفار شكرا لكي , يا اخواني تعلموا من رد الاخت استغفار وساندوا الأخ الكرزان , بدل ما تشوفوا الردود المبهدلة اللي يكتبها القزم النكره

اختي استغفار هل لديك نصيحة لقزم نكره مثلي

السلام عليكم , اشكر الجميع على مواساتهم وتشجيعهم لي بالحياه و بالانتحار , انا مقدر واعتبر كلامكم وسام على صدري ,,,,,,,,,,,,,,,,,,,,, كمبيوتري مااعرف شنو انزل تحت , يعني بالقديم اضغط enter وانزل سطر ,,,,, هذا لما اضغط انتر مايصير شي ,,,,,,,,, ابشركم انا الحين صرت صقعه ,,, يعني مثل حلا والصقعات اللي معاها ,,,,,,,,,,, انا كلي طاقه وحيويه ونشاطي يبدا الصبحيه , افطر مع اهلي واخواتي والعيشه تمام .. يسلام ......... انا الحين اقعد الصبح او الفجر يعني الساعه 4 و اغسل وجهي والبس واطلع امشي بالفريج "نفس كل مره يعني" وبعدين اكل توست اسمر وجبن خالي الدسم و شاي اخضر و بعد الاكل اكل حبه السكر ,,,,,,, وبعدين الساعه 12 اكل حبه اللي اكلها مره باليوم وبعدين انطر الغدا واكل واكل بعده الحبه و انطر العشا واكل واكل الحبه وهكذا . صرت صقعه يعني من اللي مايطوفون وجبه بالبيت واكلهم دايت عشان يخسون , قبل اتطنز عليهم الحين صرت منهم , وانا كل ما اتطنز على شي اصير نفسه بعدين ,,, بس تبون الصج انا الغلطان , اهي غلطتي انا الجربوع اللي ماافهم و جيت على الليت , انتوا تتسائلون ليش في مثل يقول حمار الجت ؟ لأن حمار الجت يشيل الجت ويوصله بدون ما ياكل منه شي حتى لو يبي يموت من الجوع , انا جذي , انا مثل حمار الجت , لا انا اغبى من حمار الجت عالاقل اهو مخلص ووفي اما انا لأ , انا حمار ياناس انا حمار يجماعه في حمار جت لا الحين في حمار امراض , اشيل امراض و اسكت , زين روح افحص , شوف شفيك , انسى , اشيل وامشي , مثل حمار الجت , وكل مره اقول اكيد فيني جذي , ومااروح للطبيب اروح للصيدليه واشتري حبوب , حبوب شنو ؟ منو انت عشان تشخص الامراض ؟ ماادري , اروح وانا حاط في بالي مرض , واخذ علاجه واستمر فيه بعد كورس او كورسين واشوف ماكو نتيجه , شقيت نفسي بالادويه والعلاجات وكلها غلط بغلط , ليش ؟ لأني حمار . اشخص على كيفي أي مرض يحوشني وبعدين اروح الصيدليه , نهايه الفيلم طلع سكري فيني من 4 سنين وانا شغال علاجات ومضادات للمثانه والبروستات , زين ماصرت خصي , اكل بالحبوب لين تفجرت الكلى عندي واقول لا اكيد المثانه هالمره , بالاخير طلع سكر واصل حده , انا حمار يجماعه انا غبي حمار غبي , زين ما جتني سكته قلبيه انا بروح اعاني من القلب بعد , يدافع البلا شنو باقي , والمصيبه اشخص الامراض لنفسي , انا خلاص مني ورايح أي شي يصير فيني بروح الطبيب , انا الحين دخلت عالم السكري و افتحولي ملف بالمستوصف و كل مره مراجعه و مواعيد يكشف علي الدكتور ويشوف الحاله في تحسن او مخربط بالاكل ومرتفع , صرت مع الشياب الحين , انا مسكين , انا فقير ومسكين وحمار انا كلب , لاحول ولا قوه الا بالله انا شسويت بعمري , اتلفت جسمي ومسوي روحي فاهم يعني و دكتور وهذي النهايه ,,,, المهم انا بمشي الحين تبون شي ؟ مع السلامه

السلام وعليكم

شخبارك عمي بو شنب ان شاء الله بخير

وخطاك السوء وماجور ان شاء الله

اقول كمبيوترك صارله مثل ما صار في كمبيوتري الصراحه يوم افتح من اكسبلور يصير نفس السي ما اقدر ادق انتر ولا اغير الخط والالوان

نزل محرك غيره وان شاء الله يشتغل مثل فايرفوكس او جروم

هلا والله وارشيف شكلك تبي تعيد مع الاهل في استراحه ومب لاقي حجز والله نحن نفس الحاله بغينا نحجز شاليهات وكلها فل فبنقزرها في المزرعه عند الهووش