تصحيح لموضوع : الرسم و التلوين بالفتوشوب .... ( بس بجنوون !)

الحين إضغط زد Delete بالكي بورد
راح ينمسح خط المتجه و يبقى خط الفرشاه فقط

و إذا ما انمسح المتجه .... إضغط عليه بالماوس و بعدين إضغط Delete لما ينمسح و يبقى خط الفرشاه بروحه مثل الصوره اللي فوق :)

و الحين وصلنا لمرحة مسح الرسمه البدائيه الأساسيه و الشخابيط اللي ورا ....... اللي سويناهم أول شي
ممكن نمسح الطبقه بالمره (( الطبقه اللي سويناها اول وحده .. Layer 1 ))
او نضغط على رمز العين اللي جنب الطبقه و راح تصير مخفيه :)

و بالنهايه تكون النتيجه ..... هي رسمه خطوطها صحيحه ..... و ناعمه و بالشكل المطلوب تمام ..... و بطبقه بروحها

من المثال السابق ........ نطبق نفس الفكره و نفس الخطوات
(( المثال البسيط اللي شرحناه فوق هو لإختصار الشرح الطويل .. لكن المهم وصلت الفكره .. و عليك الباجي و التطبيق على الرسمه الحقيقيه ;) ))
و ما ننسى ان الخطوط و النقط والطبقات ببلاش ........... يعني حط على حسب الدقه اللي تحتاجها :)
و الرسمه اللي هي موضوعنا للشرح كانت خطواتها بنفس الفكره
اولا نحط خطوط الرسمه بشكل سريع ....... سواء من الخيال او فكره مستوحاه من شخصيه ........ و كإننا نرسم برصاص على ورقه

و بعدها نضيف طبقه جديده ..... و نحول الخطوط الأوليه و الشخابيط لخطوط ناعمه و دقيقه بالـ Pen Tool بنفس الاسلوب بالمثال الأول البسيط :)

لكن يفضل ..... انك تعزل الشعر عن الوجه بطبقه مستقله .....
يعني مثل ما هو موضح بالصوره :)

بحد ما ننتهي من الرسم و التعديل ...راح تنتج معانا الرسمه نظيفه و خطوطها سليمه :)

بعدها بالمساحه ..... نمسح الخطوط و الأطراف الزايده

و أخيرا ........ تنتهي الرسمه المحبره و الجاهزه للتلوين ...... بخلفيه بيضا و طبقه للوجه و طبقه فوقها للشعر :D

تأكد ان الخطوه الأولى هي أساس الفن :) ....... يعني لا تتوقع بعد ها الخطوه إذا شغلك فيه خلل انه بيترقع
حاول قدر الإمكان تطور قدراتك الفنيه بالخطوه الأولى بأكبر شكل تقدر عليه
و هي إنك ترسم رسمه نظيفه محبره و حلوه ;)

إنتهت الخطوه الأولى ..... :D

الخطوه الثانيه :)

و هي التلوين
في هاذي الخطوه راح نستخدم طبقات كثيره
الأمر مو صعب ..... بالعكس ممتع لدرجه كبيره (( هونها تهون ....... عقدها تتعقد :D ))
بمجرد التفكير راح تعرف اننا راح نلون بطبقه جديده ^^.... و تكون تحت طبقة رسمة الوجه المحبره
على شان خطوط الوجه و الشعر تصير فوقها باينه
يعني كل طبقات الألوان سواء البشره او الشعر كلها تكون (((بين))) طبقة الخلفيه البيضا (Background) و طبقة الرسمه المحبره
و طبقات الألوان نفسها تنقسم ........ لطبقات تلوين الجلد ... و طبقات تلوين الشعر
اولا .... طبقات تلوين الجلد :)
نضيف طبقه جديده ..... بين الخلفيه و الرسمه المحبره مثل ماهو واضح بالصوره

و تكون هاذي هي أول طبقه من طبقات تلوين الجلد ....... و هي طبقة اللون الأساسي للبشره ( اللي هو لون البشره الأصلي بدون نور او ظلال )

و الحين وصلنا لإختيار الألوان :)

أسهل و أسلم طريقه لإختيار الألوان :6 ..... هي اننا نفتح صوره حقيقيه ألوانه متناسقه :D ..... او رسمة مانجا فيها نفس درجات الالوان اللي نحتاجها :6 و ما اضن فيه حد يحب الرسم و ما يكون عنده مخزون ضخم من الصور و الرسوم اللي منقيها نقوه من الانترنت :D .... ( ههههههه الحين بوريكم قشي اللي بالكمبيوتر :6 :D )
إفتح أي صوره ... فيها لون البشره عاجبك :D

و لا تنسى شغلنا و تسرح و تروح بالخيال مع صور المانجا بالانترنت :6 ( واحد عارف روحه .... بسرعه يسرح :cool: )

و خذ درجات الوان البشره بورقه جديده مستقله ....... :) ( تذكر ها الخطوه مهمه في جمييييع رسومك و تلوينك بالفوتوشوب ... يعني حاول تنقي و تحفظ أحسن شي :) )

شوف ها المقطع .... مأخذون من صوره فيه تدرج ألوان البشره ممكن يكون حيل مهم لك بالتلوين و هو نفسه اللي حنا مستخدمينه في تلوينا الحين :6

خل الصوره اللي فيها الوان البشره جدامك على طول
و غير لون الفرشاه إلى لون البشره ..... بأداة الـ Eyedropper

و الحين إختار الفرشاه ( Paintbrush) و إختار اللون الأساسي المناسب للجلد ......... و لون على طبقة الجلد بعد ما تختار نوع و حجم الفرشاه المناسب
سواء فرشاه صغيره او كبيره من قائمة الفرش :)

لاحظ اننا نلون بستخدام الفرشاه العاديه ....... مو بأداة الصبغ المعروفه Paint Bucket
لان الفرشاه دقيقه بتلوين المناطق الصغيره ..... و هي الأفضل إذا كنت تبي نتايج صحيح بالكامل
الحين لون البشره بلونها الاساسي بإستخدام الـفرشاه Paintbrush