البطولة الرمضانية لستريت فايتر ثيرد سترايك في الامارات ( 27th aug )

فيديو للفاضين مثلي :

http://www.youtube.com/watch?v=bkPphYmO1yQ

10 دقائق تراه .................................

not bad

بس مانقدر نحكم من لعب الاونلاين...خله يرجع هني وصدقني بنستلمه ^___^

خخخخخ بس شغلت التعليقات ترفع الضغط لول...يعني لو اللاعب الثاني يشوف الفيديو بيقول هذيله يتمصخرون خخخخخ

لاتبالغ وتقول wooow وغيره مب ناقصين السويدي يصاب بالغرور لول

اقتباس:

---

وغيره مب ناقصين السويدي يصاب بالغرور لول

---

لووول

جاري مشاهدة الفيديو :)

Hi all,
this is agtool's new compilation
http://www.youtube.com/watch?v=qM0HizkcBuQ

It has a demonstration on how and when one earns a right to taunt after a match :P (in the end)j

بلاك:

والله ما ادري يمكن كنت متوتر ؟؟؟ بس بصراحه ما كنت حاس بشي لاكن واظح اني كنت متوتر ولا ما كنت بظبط الكومبوز في التريننج

بالنسبه للبطولة الله يوفقنا و الله الله فيكم انا بحاول و ان شاء الله بسوي شي يعني اذا ظيعت في الكومبو بقلب اللعب مايند بس على كم بسيك كومبو يمشون الحال.


شين فيرجل :

الفيديو تووووووووووووب تسلم ........................

حاول تكثر من هالفيديوز

Another salem's makuto battle
ppl were watching foot ball in my room....sorry for the annoying football announcer!!

http://www.youtube.com/watch?v=psLenIav6UE

شين

بصراحه في الثيرد التانت مايستخدم إلا إذا راح يفيد مثل كيو وددلي وكين وأكوما...وفي اللحظة المناسبة....اما واحد كل مافاز بجولة يقعد يسوي تانت...اول شي يخطر في بالي " من صجه الأخ؟!" خخخخخخ وأقعد أضحك داخليا وإذا شفته زودها أفلت وأطلع الضحكه....

الفيديو فنان الصراحه ومثل ماقال مان كثر من هالنوعية

يامازاكي

خخخخخخ حلوة صوت المعلق تحسه راكب على مباراة السويدي...لعبه حلو لكن صعبه تحكم من الأونلاين...لازم أوفلاين ومع ناس لعيبة....مشكلة ماكوتو إنها تعتمد على التمويه والخدع بشكل كبير....أهم شي السويدي يرجع ومستواه ب كيو ماينزل

أفكر أجرب بعد البطولة ين + يانغ + ددلي + يوريين.....على الأقل راح أعرف التارجيت كومبوز والبيسيكز فيهم

يامازكي

شوف هالبرشومه
بس أهم شي بطل الإستعجال في اللعب...أعرف إنك متعود على الكومبوز والهجوم من الكوف لكن هني لازم تهدي اللعب وخلي الطبخه تستوي على نار هاديه ^___~

^^

ابعد من يورين الله يسلمك ،،، مب ناقصين جزارين ... عاد ما اقدر اتخيل جزار بلاك كيف بيكون ؟؟!

حاول تلعب بـ يان اللعب معه ممتع انا بدأت من كم اسبوع عليه ، + مساعده الاخ شين ماقصر ...

لكن السوبر الثالث ما دخل مزاجي ، ما عرفت اضبطه صح ، يبالي وقت طويل عليه ، حالياً استخدم سوبر 1 ..

و دادلي بعد ممتاز + المايند جيم ماشاء الله عندك عالي يعني ماتحتاج شي غير التدريب عليه وعمل التارجيت كومبو واللينكز بشكل امثل ..

اقتباس:

---

لكن هني لازم تهدي اللعب وخلي الطبخه تستوي على نار هاديه ^___~

---

ههههههههه حلوة سالفة الطبخة ،

ماعليك من يامازاكي احس مع الفترات القادمة مستواه بيكون عالي جداً ...

تابع مباريات اللاعب ysb تراه مستواه عالي جداً بهيوغو + لاعب ثاني نسيت اسمه اللي لونه رمادي ..

اقتباس:

---

خخخخخخ حلوة صوت المعلق تحسه راكب على مباراة السويدي.

---

انا اول شي اندمجت ، تحسبت ان هو بالعمد حاط المعلق على الفيديو ، ولكن بعد فترة عرفت انه يتابع المباراة XD

بس تخيل لو كان تعليق حقيقي : No comment


استمتعوا :



وهذا بعد :

بلاك
اوك بحاول اهدي النار و بالمرة اتعلم الطبيخ هههههه
انشالله بتخلص من الحماس الزائد

الوكارد
احب اتابع YSB لانه لعبه ممتع و مخيف للخصوم
انشالله بتابع الباقين اكثر

اقتباس:

---

خخخخخخ حلوة صوت المعلق تحسه راكب على مباراة السويدي.
انا اول شي اندمجت ، تحسبت ان هو بالعمد حاط المعلق على الفيديو ، ولكن بعد فترة عرفت انه يتابع المباراة XD

---

طبعا كنت مركب السماعات و ما حاسي بصوت المعلق
لين ما شفت الفديو اتفاجأت
XD

خخخخ أهم شي الطبخ يا يامازاكي هذا أساسي جدا!!!!

ألوكارد

والله الصراحه ددلي جينتيل مان....ياخي اللعب فيه فظيع....لينكز وتارجيت كومبوز وتمويه ....مب طبيعي....شكله بيكون التارجت القادم

يون ماشي الحال فيه بس يبالي أتعود عليه....يانق حلو اللعب فيه وأشوفه أمتع من اللعب ب يون

يوريين كالعاده وحش بس لازم أضبط ال unbloackbles

وبسك من المديح في لعببي الي يقرا كلامك يقول هذا الجونقر الي مايخسر لوووووول....ماشفت كيف إستلمونا الشباب في آخر جمعتين !!

اقتباس:

---

المشاركة الأصلية كتبت بواسطة Black_Berserker

خخخخ أهم شي الطبخ يا يامازاكي هذا أساسي جدا!!!!

ألوكارد

والله الصراحه ددلي جينتيل مان....ياخي اللعب فيه فظيع....لينكز وتارجيت كومبوز وتمويه ....مب طبيعي....شكله بيكون التارجت القادم

يون ماشي الحال فيه بس يبالي أتعود عليه....يانق حلو اللعب فيه وأشوفه أمتع من اللعب ب يون

يوريين كالعاده وحش بس لازم أضبط ال unbloackbles

وبسك من المديح في لعببي الي يقرا كلامك يقول هذا الجونقر الي مايخسر لوووووول....ماشفت كيف إستلمونا الشباب في آخر جمعتين !!

---

منو الى استلمك خلها مستوره بس و والله انك جونقر في اللعبه , اذا انت مب جونقر منو بيكون ؟؟؟

على العموم بلاك انا الحين شغال في ال crt و والله اعلم قام يبين وياي انه مثل تلفزيونك بظبط و ان شاء الله يكون مثله ............................

التدريب مستمر و في تقدم بس سؤال متى البطولة ؟؟؟

يامازاكي براشيم جديدة...أريدك تدرسها صح



مان

المفروض تاريخ 28/1/2010

ههههه شسالفه سوالف طلعت عني خخخخ تراني بعدني ضعيف بماكوتو اخسر وايد ان شاء الله قريبا الاستان كومبو يجهز وياي D:

بلاك هذا هاياو, ما يمزح, شكله الاس بي او الياي كورودا و هاياو و موف في فريق

^^

متأكد هاياو؟...كل التعليقات ما تأكد هالشي..والله أنا شاك إنه هو بس محد أكد هالشي...ناقصه بس يضبط الكارا سوبر مثل ماكان يضبطها قبل ويرجع زي العسل

قبل لحظة رجعت من محل الالعاب ، كنت مودي عيال اخويه اشتريلهم العاب ps2

قتلهم اختاروا اللي تبون ، بعد فتره اشوفهم مجمعيلي مجموعة من الالعاب ومن بينهم :

sf 3rd strike

CVS2


لاحظت ان ثيرد سترايك شكله غريب ، البوكس ارت مرة غير :

من الواجهه الامامية صورة ريو وتشان لي من tvc ومن الخلف صورة اليكس + شخصية من سكول رايفل

واللي انا مادخل في مزاجي : كاتبين في خلف الغلاف single play 1-2 وبعد كم مربع على اليمين كاتبين muliplayer 1-8 ؟

لكن النسخة هي نسخة anniversary

على بالي نسخة الاونلاين نزلت لووووووول

خخخخخ يله خيرها في غيرها...مادري إذا سكروا الأونلاين الخاص بنسخة الإكس بوكس أو لا...وأصلا هو تعبان وفيه مشاكل لول

ياجماعه ددلي إبدااااااع...شكلي ببدا أحب لعب الكومبو بسببه....كوكتيل مب طبيعي الصراحه...غربيه مالعبت فيه إلا هاليومين وأنا من فترة طويلة ألعب اللعبه!!!

^^

gentlemen


انا واثق انك راح تبدع فيه نفس ماصار على كيو ...

لكن انتظر لقبك عليه

كيو : راعي الكيماوي

نيكرو : معوق

دادلي : ؟؟

خبر حلو من كابكوم بخصوص نسخة ثيرد سترايك الأونلاين

ماراح يطرأ تغيير على الشخصيات أو أسلوب اللعب ...لكن في مفاجأة حلوة وغيرها

للمهتم يقرا المقابلة

While this probably won't come as a surprise for most of the people reading this, Christian Svensson confirmed on the Capcom Forums that there will be no new characters or gameplay elements for Street Fighter 3 Third Strike Online Edition, but he added that there's still some exciting things to announce in regards to the game, stating the the title will go places for fans that no fighting game has before.
When will we get some Street Fighter 3 Online Edition details?

Svensson: Release is still quite a ways away and posts like this are part of the reason I didn't want to announce the title when we did (just after it was greenlit and development only just beginning).

In a project like this, where you guys know who the characters are and what the gameplay is, we have a very specific set of "new bits" to talk about and we can't go firing all of our details at once lest we not reach beyond a very limited audience (and while I love you guys, we really need to bring more than the hardest core SF3 fans to the table to be successful with the title). Secondly, as a digital release, the marketing ramp up needs to be relatively short as compared to a retail release.

To more directly answer the question (sort of), we have a schedule for reveals and announcements in 2011 that alas, I must still remain coy about for the reasons above. At the risk of stirring the pot/raising expectations to unreasonable levels, there are places this game is going for fans where no fighting game (not even our big retail fighting games) have gone before.

It's for those reasons I'm extremely excited about this project personally.

It makes me think SF3 Online Edition might have Tekken 6 graphics with the way you're talking.

Svensson: Remember what I said about the risk of raising people's speculation to points of unrealistic expectation? You've just gone further than I'd imagined anyone could. ;) It's still Street Fighter 3.

من موقع event hubs

اقتباس:

---

SF3 Online Edition might have Tekken 6

---

????????

هل يعني انهم راح يغيرون السبيريتس ؟؟؟؟

مانبى هذا الشي ، فقط توضيح على السبيريتس القديمة افضل .

^^

بالنسبة لي أتمنى تبقى كما هي ويحترمون الناس الي إستمرت تلعب اللعبة على الرغم إنه كابكوم نستها وخلتها على جنب رغم شعبيتها في الأركيد

وبالنسبة للرسم فجربوها ولعبوا اللعبه على تلفزيون CRT + واير كومبونينت وشوفوا الوضوح...واللعب عسل

ألوكارد

مايحتاي نطلعله لقب لقبه موجود من زمان..." عم شنبو"!!

على فكرة تجمعنا في بيت shin goku والقعده حلوة الصراحه بس كان كوكتيل محترم...ثيرد سترايك مع سوبر ستريت 4 مع مارفل ضد كابكوم 2...كيف هالأشياء إنلعبت في نفس الوقت مادري لول!!!

وطبعا شفنا الخاين "إنفي" لكن اليوم كفر عن خطأه ولعب ثيرد سترايك ومستواه عسل....المشكلة من زمان لاعب معاه إيبوكي ضد كيو وناسي كيف أتعامل مع هالصرصورة "على تسمية السويدي"....خخخخخ أنا أوريها لأجهزلها كيماوي أول مايقول المعلق Fight على طول يقول وراها K.O لأنها ماستحملت الكيماوي

يله يبالنا نرجع لدفتر البراشيم مال كيو...ولو إني مخترش أدخل ب ريو لأنه ولا بطولة دخلت فيه!!

لو ان التغير في الثيرد بيكون احسن, طبعا بيكون احسن لنا, لكن شي طبيعي افضل انهم يخلونه نفس ما هي و نفس ما قال بلاك و بيج بوس قبل انهم يكبرون الفريمات شي جي, شرايكم لو يسون مرحله خاصه ل كيو مع لحنه و يسون يضيفون المراحل من نيو جينيريشن و سيكند ايمباكت و يحطونه في الاونلاين و عقبال ما يحطونه في النسخ الاركيد D:

اوه بلاك بتبدأ ب دادلي شي حلو الصراحه, و الحمدلله يا بلاك ابشرك كيو مستواه ارتفع اكثر ^_^ و نيكرو نفس الشي, لكن بعدني مركز على ماكوتو و لين ما اضبط الستان كومبوز مالها 100 % ان شاء الله

هلا سالم

وينك من زمان مختفي...شكله البرد مخليك في البيات الشتوي!!!

والله بدينا ددلي بس شغل كم ساعه وعسل وبعد يانق وعاجبني من خاطر لأنه عليه ميكس أبز مب طبيعية وشوية يوريين بس بشوفلي جامبيت يعطيني شوية عن ال unblockables أو بشوف مان...لعبت شوي ب 12 وعجبني...فبشوف الشلة كلهم بعد البطولة وبقعد عليهم واحد واحد

بس والله ال ستن كومبوز خاطري أشوفه...حركة الكارا Hk +MP Fukage لكن المشكلة لما تركبها في الداش....على أيامها أول مابديت وماضبطت معاي وقفت عنها...الحين يمكن أجربها مره ثانيه بس مع براشيمك لووول

اقتباس:

---

المشاركة الأصلية كتبت بواسطة Black_Berserker

هلا سالم

وينك من زمان مختفي...شكله البرد مخليك في البيات الشتوي!!!

والله بدينا ددلي بس شغل كم ساعه وعسل وبعد يانق وعاجبني من خاطر لأنه عليه ميكس أبز مب طبيعية وشوية يوريين بس بشوفلي جامبيت يعطيني شوية عن ال unblockables أو بشوف مان...لعبت شوي ب 12 وعجبني...فبشوف الشلة كلهم بعد البطولة وبقعد عليهم واحد واحد

بس والله ال ستن كومبوز خاطري أشوفه...حركة الكارا Hk +MP Fukage لكن المشكلة لما تركبها في الداش....على أيامها أول مابديت وماضبطت معاي وقفت عنها...الحين يمكن أجربها مره ثانيه بس مع براشيمك لووول

---

بلاك شي حلو والله


شوف انا شغال في اللعبه من خاطرررررررر البطولة شكلها ناااار ما نبا نخسر عاد همتك هاليومين حاول تلعب و ترد مستواك لانه اخر مره شفتك تلعب ويا الشباب مستواك كان نازل شوي او اتوقع كنت تجاملنا في اللعب , بحاول اخدمك بيورين بالي اعرفه بس اعتقد جامبت بينفعك اكثر.

حاضرين يا مان...المهم ماوصيك على التدريب....وبالنسبة للمستوى ترى شيبنا شي طبيعي يكون داون...بس أقولك ريو يسلم عليك وقال حق كيو يستريح هالبطولة وإن شاء الله يسوي شي ^___~ والبركة فيك وفي الشباب

ويمكن نسوي تجمع يوم الجمعه في أبوظبي أو دبي...بشوف الشباب وبرد لك خبر يمكن على الأربعاء

سالم

ما سألتك...كيف تكسيرك لرؤوس الأمريكان؟ نبى ندخل GGPO ونقرا إنهم يمدحون فيك وخايفين منك لول.....لازم تسويلهم رعب

والله دادلي قوي جدا تدري احس اكثر لاعب يعذب اكوما هو دادلي ماعرف ليش

و الستان كومبو الحمدلله ضبطت ويايه مرتين في جي جي بي او و ان شاء الله يضبط ويايه 100 %

والله تدري اي بلاك انا انصحك اتدش بريو عشان انشوف الابداعات D:

و بعد شكلهم جامبيت و مان مولعييين بيوورين نتريا كومبوهاتكم D:

من ناحية يعذب أكوما فيعذبه من خاطر....خخخخخخخخخ لو تشوف موسى كيف يتشكى منه....مخليه ألعن من تشن لي لوووول

وإن شاء الله أقدر أعمل شي بريو ونقدم مستوى أفضل من البطولة السابقة

فيديو عن مباراة نهائية ، والغريب ان اسم اللاعب " أحمد " هل هو عربي ؟؟؟!!!! ومستواه ممتاز ..

لكن الشي اللي قهرني هو المعلقين ، كلاهم عبط و احس انهم عنصريين بإتجاه هذا اللاعب ...

هذه المباراة :




------------------------------------

بلاك احتمال امر عليك بعد ما اخلص من الامتحانات ، تقريباً بعد اسبوعين ،،،


مادام انك بتدخل بريو ، فأحب ان اتعلم شغلات من عندك + كم نصايح في تحسين اللعب

والبراشيم طبعاً لوووول


وبنحاول نتفلسف بالشخصيات الجديدة : عمي شنبو و يان ...

ان شاء الله راح يكون بينا كوول وقتها ...

Hi all
Berserker, this is the title "Twelve Dance + Smooth Qriminal" I was talking about, but sadly there is a restriction on it in Youtube. ofcourse there are ways to view it :P

anyway, here is a bonus that could happen in any fighting game
http://www.youtube.com/watch?v=UbQC9clc4fI

And this video reminds me of the times I made silly mistakes
http://www.youtube.com/watch?v=ECLskV5gk2I&

This is a moment of getting mad because of a Taunt (I think tokido vs Kokujin?)
http://www.youtube.com/watch?v=tHC2c3p_pLA

and the classic...
http://www.youtube.com/watch?v=NjwlHeaJNYc

^^

الفيديو الثاني اخر لقطة ، استوت معاي يوم كنت العب ضد اخويه ، لووول

هذا فايدة الحاجز ..

-----------------

شكراً للفيديوز :)

خخخخخخخخخخخخخخخخخخخخخخخخخخ ألوكارد هذا باين مزح شباب بينهم عاد تعرفهم الأمريكان خصوصا لما يكونون مهسترين لوووول

بس فرانكي غريبه يلعب ثيرد حسب علمي بطل...زين نشوفه رجع يلعب

بالنسبة للمباريات فباين إنه باعوها خصوصا لاعب تشن لي تحسه يلعب كاجوال ولا كأنه في فاينال ويحاول يسوي باري لسوبر يون

السويدي

صدقك خاطري يحطون اللحن الخاص ب كيو...صدقني التركيز يزيد من خاطر وتحس كيو قوته تزيد على الأقل 20% لوول

شين..بشوف الفيديوز الحين وبالنسبة لل fail فالحال من بعضه...على الأقل ماصارت معاي لما أسوي amazing parry وموقف تعبان وفي الأخير fail لوووول

^^

لاتلومني ،:)

متأثر من بعض الفيديوهات العنصرية اللي قاعد اشوفهم مؤخراً ..

سالم:

بحاول اقدم مستوى في البطولة ان شاء الله

بلاك:

خير ان شاء الله

الوكارد:

بالتوفيق ان شاء الله في الامتحانات

شين فيرجل:

مشكور على الفيديوهات

خخخخخخخخخخخخخخخخخ على أول وثاني فيديو لووووول


عاد الثاني مأساة...قلبت المواجع ياخوي وذكرتنا بذكريات أليمة ومرة...بس صدقني ..غير لما تتعب من خاطر وريد باري وفلم هندي و تقول هذي ال Amazing comeback وبعدها fail -____-

بس الحق ينقال الأغنية راكبه من خاطر وعن الأخطاء وغيره خخخخخخخخخخخخ

أما أول فيديو فكالعاده الأمريكان لما يكونون مهسترين ومتحمسين على الآخر

الصراحه يبالنا نضيف التعليقات في المباريات....ماعندي مانع أكون معلق وصدقوني راح أسويلكم جو بس أهم شي موسى ماتدخلونه في هالموضوع لأنه بينقع البوكس من وراه لوووول...صدقوني كينشين راح يجروم فيه

مان..

معقولة رد بدون إقتباس وكلمه كلمتين حق كل واحد...شكلك مستعيل مرة لوووول لأنه هذي سابقة!!!

اقتباس:

---

المشاركة الأصلية كتبت بواسطة Black_Berserker

خخخخخخخخخخخخخخخخخ على أول وثاني فيديو لووووول


عاد الثاني مأساة...قلبت المواجع ياخوي وذكرتنا بذكريات أليمة ومرة...بس صدقني ..غير لما تتعب من خاطر وريد باري وفلم هندي و تقول هذي ال Amazing comeback وبعدها fail -____-

بس الحق ينقال الأغنية راكبه من خاطر وعن الأخطاء وغيره خخخخخخخخخخخخ

أما أول فيديو فكالعاده الأمريكان لما يكونون مهسترين ومتحمسين على الآخر

الصراحه يبالنا نضيف التعليقات في المباريات....ماعندي مانع أكون معلق وصدقوني راح أسويلكم جو بس أهم شي موسى ماتدخلونه في هالموضوع لأنه بينقع البوكس من وراه لوووول...صدقوني كينشين راح يجروم فيه

مان..

معقولة رد بدون إقتباس وكلمه كلمتين حق كل واحد...شكلك مستعيل مرة لوووول لأنه هذي سابقة!!!

---

ههههههههههههههههههههههههههه

شو تبانا نسوي ياريال خلها على الله ............................................

فكرة التعليق نايس و انا بشتغل في الفيديوز اذا تبا و بظبط السالفه و انا على فكره كلمة بيج بوس على هالموضوع بس رد بشكل قاتل بصراحه قالي بيستوي البوكس على قولتك من ورا التعليق و غيره منو الى بيعلق ؟؟؟

طبعاً اذا انت بتمسك التعليق اقولك روووووح و القلب داعيلك صراحه اول مره اشوف واحد متحمس لهلافكار واظن هذا سبب نجاحك ما شاء الله في كل شي من تنظيم في البطولات و غيره مع انه الثيرد ايامها المفروض انتهت في الامارات لاكن انت رفعتها مره ثانيه , و مره مرتين و الشباب بيشوفون الموضوع عادي جداً و راح يمسكون التعليق من بعدك لاكن ك بدايه اهي تربش شوي.

الصراحه فكره التعليق عجيبه انا اقول لو تسون 3 معلقين في نفس الوقت يسولفون و يعلقون و ان شاء الله ان رديت الامارات انا ابا اكون واحد من المعلقين D:

اقتباس:

---

المشاركة الأصلية كتبت بواسطة MoMeNTuM

الصراحه فكره التعليق عجيبه انا اقول لو تسون 3 معلقين في نفس الوقت يسولفون و يعلقون و ان شاء الله ان رديت الامارات انا ابا اكون واحد من المعلقين D:

---

خلاص خلوا الكلام الياباني علي لو واحد سوا ريد باري بتحصلني أصرخ " AKAAAAAAAAAAAAi" والهاي هاي بكثر منها لووول....العربي والشرح عليك ....الثالث وظيفته يتمصخر وأقول نخليه موسى أحسن بس لازم نحطه ورا زجاج واقي من الرصاص خخخخخخخ

شوف الفكرة حلوة وأشجعها لكن صعبه علينا حاليا...لأننا بنلعب + ننظم + نعلق لووول باقي نطبخ ونكوي ونكنس بعد هههههههه

بشوف لو الشباب عادي عندهم برتبها هالبطولة وبطلب رأيهم هل يوافقون أو لا

اقتباس:

---

المشاركة الأصلية كتبت بواسطة Black_Berserker

خلاص خلوا الكلام الياباني علي لو واحد سوا ريد باري بتحصلني أصرخ " AKAAAAAAAAAAAAi" والهاي هاي بكثر منها لووول....العربي والشرح عليك ....الثالث وظيفته يتمصخر وأقول نخليه موسى أحسن بس لازم نحطه ورا زجاج واقي من الرصاص خخخخخخخ

شوف الفكرة حلوة وأشجعها لكن صعبه علينا حاليا...لأننا بنلعب + ننظم + نعلق لووول باقي نطبخ ونكوي ونكنس بعد هههههههه

بشوف لو الشباب عادي عندهم برتبها هالبطولة وبطلب رأيهم هل يوافقون أو لا

---

شوف بلاك

دام هالبطولة مب جاهزين الافضل ما يكون في تعليق رسمي بس نجرب و نشوف الوضع و حلو تكونون 3 مثلاً انت و موسى و az مثلاً ...........

و اهم شي ركزلي على سالفة الزجاج لموسى المره الماضيه ما كان دوري و ما كان بيسلم ما نعرف شو بيصير ولا اقولك اول ما يزودها شوي ارفسه خخخخخخخخخخخخخخخخخخخخخخ بس طبعاً ما نستغني عنه في التعليق يعطيك جوك الصراحه .

خخخخخخ خلاص بتخبر الشباب وبشوفهم إذا موافقين بنجربها وبكون كبش الفداء وموسى مثل ماقلت لو زودها برميه للشباب يخلصون عليه

خلفيات جديدة للثيرد

http://www.eventhubs.com/news/2011/jan/04/street-fighter-3-wallpaper-images-axel-kl/

والله يخسهم الأمريكان ...شوفوا الأسئلة الي ساءلينها ل سيث مال كابكوم....يقولونله مابتحطون شورت كت للإنبوت لنسخة ثيرد سترايك أونلاين؟...الله يغربل إبليسكم تبون الناس بدون تعب وجهد تلعب اللعبة وشورتكت ودلع والي سار الجبل وتدرب هناك على التوقيت الصح يروح تعبه على الفاضي...صج يحبون لعب الأي شي هذيله ...بس زين رد عليهم وقال مافي تغيير في ميكانيكية اللعبة...ياخوك محد يبا هالأشكال تقرب صوب الثيرد خلهم بعيد...الي ناقص يبون ألعاب فيها شورتكت للسوبر والكومبوز وكل شي وحتى الكومبو نفسه تسويه بضغطت زر أو زرين وبدون جهد!!!

^^

يحطون لهم خيار بيجينر أو ايزي ،، حتى لو دخل الاونلاين راح يبين ...

انا اقول لايغيرون شي الا يبا يثبت وجوده يلعب و يشد حيله, الثيرد مب سهله, ف حلاته و هي صعبه عشان مب الخبيصه يلعبون, و بعد عشان واحد يوم بيلعب ثيرد يكون حاط فباله انا بلعب هاللعبه بشد حيلي و بفوز مب اي شي و بفوز ^_^

ف اتمني يخلونه نفس ماهو اللهم قلت لو يزيدون المراحل و مرحله خاصه ل كيو و لحنه بيكون شي عجيب ^_^

في هذي ماراح أعترض...مرحلة خاصة ل كيو ساما ....يستاهل الصراحه زعيييييييم ^___^

سالم ياخي نحتاجك هني لأنه بوكيمونات جدد طالعين ولا فوق هذا لاعبين اللعبه من زمان ....كرات البوكيمون الي عندي خلصوا فأشوف ريزو وموسى إذا عندهم أو لا خخخخخخ....والله مادري من وين طلعوا الجماعة الجديدة سبحان الله أول نشحت لعيبة واليوم فجأة يطلعلك واحد لعيب من العدم!!!!! اللهم زد وبارك ^___^

^^

بلاك اخاف تضربهم بعين وينحاشون ....

انا للأسف كل ما امسك بوكيمون مايتم في الكوره يعني بعده ما مروّض على طول يطلع منها ( ssf4 ) ..

بس زين يوم حصلتوا جماعه ...


حصلت موقع مجمع فيديوهات للثيرد ومرتبهن :

http://wn.com/Uriden


لو كابكوم تفتح صفحة في موقعها ( كابكوم كوميونيتي ) خاصة للثيرد ويتم فتح الباب للفانز ، مثل ماعملوا لميجامان و ستريت 4 ...

لو فتحت الصفحه ، اكيد السويدي وبلاك بيسجلون اكثر من عضوية عشان مكان كيو يكون من اكثر الاشياء المطلوبة ...خخخخخ ..

مشكور على الصفحة....وين أيام أول كان عندي موقع RX ومواقع اللعيبة الثانيين وكلها طارت

شباب باركولي

أخيرا قدرت أسوي True kara demon بدون تعديل الأزرار باستخدام ال default button configuration

كانت في بالي حركة وقلت ليش ماجربها وعلى طول إستوت ...قلت بجرب مرة ثانية يمكن حظ وطلعت على طول وطفيت السوني خخخخخ قلت مافيني من الفرحة أحسد عمري مب من زين اللعب الحين

بس الصراحة كل يوم قمت أحس إني أمسك الجويستيك مثل الأخطبوط لوووول...والأركيد مستواي يمشي الحال وأحسن من أول وفي فرق بس مازال مايوصل للجويستيك (pad )

3rd strike frame data

http://ensabahnur.free.fr/Baston/ind...ameName=Street Fighter III Third Strike

بلاك اذا تبانا اليوم في بيت احد او في مكان ياريت تكتب اهني لانه في احتمال اذا دقيت علي ما ارد لانه اغلب الاوقات انشغل و انسى المبايل في الغرفه .............................................................

و السموحه منك

حصلت مباراة السيمي فاينال الصراحه كوكوجين لعب

هلا مان

إسمحلي اليوم إنشغلت مع الشباب شوي وإن شاء الله الأسبوع الياي بكون فاضي

بس الصراحة لعبك تحسن وايد...هذا الصح...لازم تركز على ال pokes وماتستعجل وتلعب على الأخطاء وشغل التحبيس وإنتهاز الفرص....بس يبالك كذا شغلة عشان تكون الجوكر في البطولة...وبالعمد إخترت ريو و كين لأني أباك تتعود كيف تلعب ضدهم خصوصا إنه في 2 كين في البطولة و 3 ريو .....فلازم تشد حيلك ضدهم

سالم

الصراحة لعب فيهم لعب...ياسلام....شفت كيف مرده يرجع للثيرد...لووول خلاص مايقدر بعد الإدمان يترك...فيتامين ثيرد غير ولا شو رايك!! ^___^

وشغلة التعليق بشاور فيها الشباب والفرق إذا قالوا أوكي نتوكل على الله ولأنها أول مرة ماراح أحط موسى لأنه صدقني بتبدا تشوف الكراسي تطير في الغرفة لووول فخلني يمكن أبداها على الخفيف بس مادري ياخوك صعبة أعلق بالعربي...يعني ميكس أبز حلوة كيف أقولها؟ أو لينكز...لول كيف يعني وقد قام بعمل وصلة جميلة ... شكله الأحسن مكس عربي إنجليزي ياباني !!!

اقتباس:

---

المشاركة الأصلية كتبت بواسطة Black_Berserker

هلا مان

إسمحلي اليوم إنشغلت مع الشباب شوي وإن شاء الله الأسبوع الياي بكون فاضي

بس الصراحة لعبك تحسن وايد...هذا الصح...لازم تركز على ال pokes وماتستعجل وتلعب على الأخطاء وشغل التحبيس وإنتهاز الفرص....بس يبالك كذا شغلة عشان تكون الجوكر في البطولة...وبالعمد إخترت ريو و كين لأني أباك تتعود كيف تلعب ضدهم خصوصا إنه في 2 كين في البطولة و 3 ريو .....فلازم تشد حيلك ضدهم

سالم

الصراحة لعب فيهم لعب...ياسلام....شفت كيف مرده يرجع للثيرد...لووول خلاص مايقدر بعد الإدمان يترك...فيتامين ثيرد غير ولا شو رايك!! ^___^

وشغلة التعليق بشاور فيها الشباب والفرق إذا قالوا أوكي نتوكل على الله ولأنها أول مرة ماراح أحط موسى لأنه صدقني بتبدا تشوف الكراسي تطير في الغرفة لووول فخلني يمكن أبداها على الخفيف بس مادري ياخوك صعبة أعلق بالعربي...يعني ميكس أبز حلوة كيف أقولها؟ أو لينكز...لول كيف يعني وقد قام بعمل وصلة جميلة ... شكله الأحسن مكس عربي إنجليزي ياباني !!!

---

مشكور يا بلاك ما تقصر و هذا التشجيع الى يخلي المستوى يتحسن و يدفع الواحد لاجدام

تعرف سرت البارحه happy world و الصراحه استانسة ياخي تصدق اول مره العب على اركيد في الثيرد و لعبت صح صح على كيفك كراشات و انبلوكبول و كل شي و كنت احس اني العب على ps2 joystike طبعاً المشكله الوحيد في الداش هيدبوت وقت الداش تصير صعبه بس بعد ظبطت وياي .

ههههههههههههههههههههههههههههه

حلوه , وقد قام بعمل وصلة جميلة , اذا بتقولها تحذر من صوبي ترا على طول بأي شي اجوفه في ويهك و الله يعين هذاك الوقت ............................

انزين هذا انت راعي افكار ما شاء الله عليك هذا الكلام الصح عربي انجليزي ياباني و انت عطنا من ذاك المكس و تشوف الكل متفاعل وياك ولا تنسى هي تجربه ظبطت اوكي ما نفعت خلاص يعني مالها داعي نطولها و هي قصيره.

انا سمعت انه وقت البطولة تغير ؟؟؟؟

متى صار ؟؟

هلا مان

خخخخخخ شوف أنا نادرا ما أمدح وهذا طبعي بس مب معناها لما ما أمدح مستواك يكون مب زين...بس هذا طبع فيني لأنه عندي قاعدة لو الشعب قعدوا يمدحون في اللعب وخلاص صدقت عمري بعدين مابفكر أطور لعبي خير شر وبقول أنا وصلت الماكس بينما في الواقع باقيلي الكثير لوول

وقت البطولة الجديد تاريخ 4 من شهر فبراير ومكان البطولة تغير...إن شاء الله باكر بنسير نتفاهم عسب نخلص موضوع القاعة والحجز للثيرد سترايك وبعد فهد بيكون موجود عسب نخلص الحجز لبطولة سوبر ستريت فايتر 4

اقتباس:

---

المشاركة الأصلية كتبت بواسطة Black_Berserker

هلا مان

خخخخخخ شوف أنا نادرا ما أمدح وهذا طبعي بس مب معناها لما ما أمدح مستواك يكون مب زين...بس هذا طبع فيني لأنه عندي قاعدة لو الشعب قعدوا يمدحون في اللعب وخلاص صدقت عمري بعدين مابفكر أطور لعبي خير شر وبقول أنا وصلت الماكس بينما في الواقع باقيلي الكثير لوول

وقت البطولة الجديد تاريخ 4 من شهر فبراير ومكان البطولة تغير...إن شاء الله باكر بنسير نتفاهم عسب نخلص موضوع القاعة والحجز للثيرد سترايك وبعد فهد بيكون موجود عسب نخلص الحجز لبطولة سوبر ستريت فايتر 4

---

هيه والله صادق و بعد زين انه نادر ما تمدح لانه المدح من فتره لا ثانيه يخلي الواحد يطور من مستواه لاكن كل يوم بيتكاسل على قولتك و بيقول انا توب ليش ارفع مستواي , موفقين ان شاء الله و تاريخ 4 مب بعيد اهم شي الكل يكون جاهز و فاضي و ان شاء الله نشوف لعب مو مثل البطولة الماضيه بصراحه كانت محبطه جداً (مو في الجو و التنظيم) بس في اللعب بصراحه ما في غيركم اصحاب ال 5 مراكز الاولى قدمتو مستوى زين و يمكن بعد سباركين و تان و الوكارد اما الباقين على كثر المشاركين المستوى كان تعبان بس انا ما لاحظة هالشي لاني كنت يديد على اللعبه و ما اعرف كيف مستوى الشباب لاكن بعد الى شفته بصراحه المستوى كان جداً محبط الكل كانو مرتبكين و ما ادري على شو على العموم الله يعين هالبطولة شكلها بتكون قويه و ان شاء الله بشيل الفريق قدر المستطاع و بحاول انسى اني داخل وياكم ك محترفين و دعم لي لاني ابا اقدم افضل مستوى و اذا فكرة انك داخل وياي راح اتكاسل و بقدم مستوى تعبان جداً.

و على سالفة انك خذتلي كين و ريو متعمد تراني كنت ملاحظ انك تختبرني ويا الشخصيات و تبا تعرف كيف بيكون تصرفي وياهم , انت اكيد لك تخطيط معين لكل تيم و تعرف بترمينا بأي ترتيب المهم ما في اعتراض و ان شاء الله البطولة حقنا.

اقتباس:

---

المشاركة الأصلية كتبت بواسطة MaNForUaE

هيه والله صادق و بعد زين انه نادر ما تمدح لانه المدح من فتره لا ثانيه يخلي الواحد يطور من مستواه لاكن كل يوم بيتكاسل على قولتك و بيقول انا توب ليش ارفع مستواي , موفقين ان شاء الله و تاريخ 4 مب بعيد اهم شي الكل يكون جاهز و فاضي و ان شاء الله نشوف لعب مو مثل البطولة الماضيه بصراحه كانت محبطه جداً (مو في الجو و التنظيم) بس في اللعب بصراحه ما في غيركم اصحاب ال 5 مراكز الاولى قدمتو مستوى زين و يمكن بعد سباركين و تان و الوكارد اما الباقين على كثر المشاركين المستوى كان تعبان بس انا ما لاحظة هالشي لاني كنت يديد على اللعبه و ما اعرف كيف مستوى الشباب لاكن بعد الى شفته بصراحه المستوى كان جداً محبط الكل كانو مرتبكين و ما ادري على شو على العموم الله يعين هالبطولة شكلها بتكون قويه و ان شاء الله بشيل الفريق قدر المستطاع و بحاول انسى اني داخل وياكم ك محترفين و دعم لي لاني ابا اقدم افضل مستوى و اذا فكرة انك داخل وياي راح اتكاسل و بقدم مستوى تعبان جداً.

و على سالفة انك خذتلي كين و ريو متعمد تراني كنت ملاحظ انك تختبرني ويا الشخصيات و تبا تعرف كيف بيكون تصرفي وياهم , انت اكيد لك تخطيط معين لكل تيم و تعرف بترمينا بأي ترتيب المهم ما في اعتراض و ان شاء الله البطولة حقنا.

---

هلا مان

بس بقولك شي وبذكرك فيه في البطولة....التوتر يصيب الكل وإنت في جلسة في بيتنا توترت والكومبوز ماطلعت معاك فكيف وإنت في بطولة؟! فعلا في ناس مالعبوا عدل بس في ناس طلعوا بمستوى حلو سواء أيمن أو خالد ...حتى ثاني في المباراتين لعب حلو لكنه ماتوفق ووحده من المباريات كانت المشكلة إنه أحد الأزرار في أركيد الهوري كان مرفوع ومخلي زر أو شي مايشتغل ومع ذلك شفت مستواه عسل ولا كأنه مأثر وماتشكى من هالشي

في ناس بعد جربوا يدخلون بشخصيات ثانيه مثل جامبيت ولعبه كان حلو ب ريو بس كنت أتمنى أشوفه ب يوريين عسب نشوف التكسير على أصوله

هذا غير إنه في ناس جدد للبطولة مثل يامازاكي وإنت وغيرهم ^___^

إن شاء الله هالبطولة تكون الأقوى والأفضل والكل يكون راضي عن المستوى ويستمتع باللعب

بس على فكرة...إنت وايد تستعجل في الحكم...خخخخخخ يعني لما تجمعنا تشوف واحد جالس تكسير في الكل ...فجأة خسر كم مباراة تروح تقوله ياخي مستواك نازل لوووول ....إحكم على المستوى بشكل عام وأحكم على الأداء خلال المباراة...أوكي يخسر...بس قدم مستوى ممتاز وفاد الثانيين ويمكن عطاهم أفكار جديدة؟! وعلى فكرة في الثيرد مافي شي واحد يقعد يفوزلك بشكل مستمر...حتى كورودا يخسر!!!

وفي عندك لما بديت تلعب يوريين وحكمت على مستوى جامبيت بسرعة وإنك وصلتله على طول....لاتستعجل في الحكم....خذها خطوة بخطوة....مشوار الألف ميل يبدأ بخطوة والتفاؤل مطلوب لكن بحدود!!!! وركز على كلمة حدود!! يمكن في هالبطولة إنت تفوز على جامبيت أو فرقان أو ريزو أو حتى تطلع فريق كامل بس ماتجي بعدها تقول خلاص أنا في التوب وقطعتهم وما إلى ذلك لانها صدقني بداية النهاية والغرور بيستولي على عقلك وتفكيرك!!! عالعموم هالكلام ما أخصه فيك بالذات لكنه كلام عام لكل واحد يلعب ألعاب الفايت بجدية وناوي يطور مستواه صح

شفت كيف عندي مافي مديح ببلاش لوووووول أحسك إحباط بعد هالرد...أهم شي لو إنته معصب أو زعلان روح إدرب على ثيرد سترايك أكثر عشان تكسر راسي وأنا أستفيد من مستواك في البطولة ^__~

وأخيرا ....إنت مثل ماوصفك تان....قال هالإنسان عليه إصرار مب طبيعي لو نوى على شي لازم يسويه والدح حقك يذكرني بأيامي أول مابديت الثيرد وماكنت أعرف عن الفايت شي ^____^

المهم...إنسى درس "الحياة كما يراها بلاك" وخلنا نرجع للبطولة وبشوف هالأسبوع لازم أدبر جلسة معاك عشان تآخذ آخر جرعة من البراشيم ^____^
==================================================================================================== ==========

أول شغلة بغيت أعلن عن بطولة المرح يوم الجمعة تاريخ 14/2/2011 والتسجيل مجاني

النظام فردي مثل بطولة رمضان

============================================================================================

بالنسبة لبطولة الثيرد

التاريخ 4/2/2011

المكان: Flora Creek Hotel Apartments , Dubai, close to Deira City Center

طبعا موضوع البطولة وغيره بشوف باجر بتفرغ وبرتبه لأنهي لازم أحط دليل لمكان الفندق وغيره والترتيب

وإلى اللقاء في الحلقة القادمة!

اقتباس:

---

المشاركة الأصلية كتبت بواسطة Black_Berserker

هلا مان

بس بقولك شي وبذكرك فيه في البطولة....التوتر يصيب الكل وإنت في جلسة في بيتنا توترت والكومبوز ماطلعت معاك فكيف وإنت في بطولة؟! فعلا في ناس مالعبوا عدل بس في ناس طلعوا بمستوى حلو سواء أيمن أو خالد ...حتى ثاني في المباراتين لعب حلو لكنه ماتوفق ووحده من المباريات كانت المشكلة إنه أحد الأزرار في أركيد الهوري كان مرفوع ومخلي زر أو شي مايشتغل ومع ذلك شفت مستواه عسل ولا كأنه مأثر وماتشكى من هالشي

في ناس بعد جربوا يدخلون بشخصيات ثانيه مثل جامبيت ولعبه كان حلو ب ريو بس كنت أتمنى أشوفه ب يوريين عسب نشوف التكسير على أصوله

هذا غير إنه في ناس جدد للبطولة مثل يامازاكي وإنت وغيرهم ^___^

إن شاء الله هالبطولة تكون الأقوى والأفضل والكل يكون راضي عن المستوى ويستمتع باللعب

بس على فكرة...إنت وايد تستعجل في الحكم...خخخخخخ يعني لما تجمعنا تشوف واحد جالس تكسير في الكل ...فجأة خسر كم مباراة تروح تقوله ياخي مستواك نازل لوووول ....إحكم على المستوى بشكل عام وأحكم على الأداء خلال المباراة...أوكي يخسر...بس قدم مستوى ممتاز وفاد الثانيين ويمكن عطاهم أفكار جديدة؟! وعلى فكرة في الثيرد مافي شي واحد يقعد يفوزلك بشكل مستمر...حتى كورودا يخسر!!!

وفي عندك لما بديت تلعب يوريين وحكمت على مستوى جامبيت بسرعة وإنك وصلتله على طول....لاتستعجل في الحكم....خذها خطوة بخطوة....مشوار الألف ميل يبدأ بخطوة والتفاؤل مطلوب لكن بحدود!!!! وركز على كلمة حدود!! يمكن في هالبطولة إنت تفوز على جامبيت أو فرقان أو ريزو أو حتى تطلع فريق كامل بس ماتجي بعدها تقول خلاص أنا في التوب وقطعتهم وما إلى ذلك لانها صدقني بداية النهاية والغرور بيستولي على عقلك وتفكيرك!!! عالعموم هالكلام ما أخصه فيك بالذات لكنه كلام عام لكل واحد يلعب ألعاب الفايت بجدية وناوي يطور مستواه صح

شفت كيف عندي مافي مديح ببلاش لوووووول أحسك إحباط بعد هالرد...أهم شي لو إنته معصب أو زعلان روح إدرب على ثيرد سترايك أكثر عشان تكسر راسي وأنا أستفيد من مستواك في البطولة ^__~

وأخيرا ....إنت مثل ماوصفك تان....قال هالإنسان عليه إصرار مب طبيعي لو نوى على شي لازم يسويه والدح حقك يذكرني بأيامي أول مابديت الثيرد وماكنت أعرف عن الفايت شي ^____^

المهم...إنسى درس "الحياة كما يراها بلاك" وخلنا نرجع للبطولة وبشوف هالأسبوع لازم أدبر جلسة معاك عشان تآخذ آخر جرعة من البراشيم ^____^
==================================================================================================== ==========

أول شغلة بغيت أعلن عن بطولة المرح يوم الجمعة تاريخ 14/2/2011 والتسجيل مجاني

النظام فردي مثل بطولة رمضان

============================================================================================

بالنسبة لبطولة الثيرد

التاريخ 4/2/2011

المكان: Flora Creek Hotel Apartments , Dubai, close to Deira City Center

طبعا موضوع البطولة وغيره بشوف باجر بتفرغ وبرتبه لأنهي لازم أحط دليل لمكان الفندق وغيره والترتيب

وإلى اللقاء في الحلقة القادمة!

---

هلا بلاك

كلامك صح انا ما اقدر اخالفك فيه انا متسرع لكن اكثر الاحيان انا اقول المستوى نازل لبعض الشباب لاني ما اباه ينحرج مثل ايمن يوم قدم مستوى مختلف في بيتك انا قلت مستواه نازل لانه بالفعل كان نازل و اذا كان مستواه مثل ما اعرف ما اعتقد كان بيخسر وايد ويانا بالعكس كان بيكسر راسي انا ك اقل شي ,


بالنسبه لتوتر كان لاعب دور كبير في اخر مره ويا الشباب عندك و صح انه التايم اختلف علي شوي بس كنت اقدر اظبطه اذا ما توترت على العموم حالياً الحمدلله الامور طيبه و اقدر ارتب كل شي و الحمدلله البراشيم عطت شغلها , بس بصراحه اكثر شي استفدت منه يوم لعبة وياك كنت تصيد اغلاطي و توقف و تفهمني الحل و الحين الحمدلله طورت الباري عندي و صرت افهم كيف اصيد الاغلاط و اعرف كيف ما اخلي احد يصيدني بس مع هذا انصاد في بعض الامور و بحاول اشوف حل , المهم اذا الجمعه فاضي خير ان شاءالله.


على فكره احسبني في بطولة المرح لانه الجمعه الماضي لعبة في الاركيد و المستوى كان ممتاز الصراحه و اتوقع بقدم مستوى جيد في البطولتين ان شاء الله ,
ما عليك عن الغرور صعب يصيبني و الحمدلله انا احب امدح غيري و في نفس الوقت ما احب يوصلي المدح الزايد يعني الى يتم يمدحني اصرف عمري من عنده لاني اشوفه ازعاج ههههههههههههه , المهم عن التوتر لا تشيل همه قبل انا كنت مفخم الجميع و معطي كل واحد هيبه في نفسي يعني يوم تلعب مع اي حد حاول ما تغلط و و و و .............. و هذا الى كان يخليني ارتبك بس الحين الحمدلله الامور اوكي و اعرف كيف اتصرف ويا الشخصيات و ان شاء الله اقدر اقولك اني 100% ما برتبك ابداً و بلعب ويا كل واحد بشكل طبيعي يعني بركز على اللعب و بستخدم الباري في الجمب يعني مثل ما العب بشكل العادي و ما بحاول اتفلسف كالعاده و اعطي كتف مكشوف و اقول ان شءا الله بيصيد عشان اسوي كومبو و استعرض بستخدم كل شي في الوقت المناسب المهم كل شي بيظهر في الجمعه الياي و اقدر اقولك اني هذي المره اذا ما قدمت مستوى جيد في البيت عندك ما بقدم مستوى جيد في البطولة و هذي الحقيقه انا تعلمت كل الى اقدر عليه في هذي الفتره و انتو ناس عمر في هذي اللعبه و تعرفون اكثر عني بوايد و ما اقدر اسوي شي فارق الخبره يعمل شغل بس على قدر المستطاع بقدم مستوى جيد.

^^

أوووه إذا جذا مايحتاج ألعب.... خخخخخخ بخليك تستلمهم بس لو شفتك زودتها بدخل مع الفريق الثاني وبحاول أطلعك عسب نقدر نلعب لوووول

وعلى فكرة...أيمن ملاحظ عليه لعبه مزاجي...ساعات لما يكون فايق مثل أول جمعه يمر علينا كلنا ...وساعات تحصله مسطل...شكله الزهايمر المبكر مأثرفيه !! ^___~

على فكرة مان ...لازم تتبع مبدأ " تمسكن إلين ماتتمكن" لول سو مثل الزعيم....أنا مسكين وفقير وأورو كسروا خشمه وإلخ وبعدين في البطولة تستلمهم خخخخخخ

اقتباس:

---

المشاركة الأصلية كتبت بواسطة Black_Berserker

^^

أوووه إذا جذا مايحتاج ألعب.... خخخخخخ بخليك تستلمهم بس لو شفتك زودتها بدخل مع الفريق الثاني وبحاول أطلعك عسب نقدر نلعب لوووول

وعلى فكرة...أيمن ملاحظ عليه لعبه مزاجي...ساعات لما يكون فايق مثل أول جمعه يمر علينا كلنا ...وساعات تحصله مسطل...شكله الزهايمر المبكر مأثرفيه !! ^___~

على فكرة مان ...لازم تتبع مبدأ " تمسكن إلين ماتتمكن" لول سو مثل الزعيم....أنا مسكين وفقير وأورو كسروا خشمه وإلخ وبعدين في البطولة تستلمهم خخخخخخ

---

خخخخخخخخخخخخ

شو تدخل ويا الفريق الثاني انت بروحك بتهزمني ما يبالها فريق وياك ..............................

انا اقولك الى بقدر عليه بسويه مب معنى هذا الشي اني بطلع الكل لا يمكن انهزم بسرعه الله اعلم لاكن انا بحاول و الله يستر هذا القصد ....

الزعيم ما شاء الله عليه بصراحه مستوى قوي جداً بس ما يعترف بالعبه يعني يقعد يمدح الناس و كأنه (انا) خخخخخخخخخخخخ

مع انه مستواه قوي مب مثلي و المفروض هو يتريا المدح و بصراحه وصله وايد مدح بس بعد مصمم انه مستواه مب جيد

^^

خخخخخخخخ لا لا إن شاء الله تستلمهم كلهم والمهم عندي إني أشوف منك لعب صح سواء خسرت أو فزت وطبعا الفوز لمصلحة فريقنا فيفضل لول

بس بغيت أعدل تاريخ بطولة المرح حطيته بالغلط...المفروض هذي الجمعة تاريخ 14/1/2011 لوول التسطيل على أصوله

والي يبى يشارك يعطينا خبر من الحين مثل مااان لأنه A.Z مشغول جدا هالفترة والله يعينه فشكلي أنا وأيمن بنمسك الجداول...الله يعين على صدعة الراس بس خخخخخخ

وإسمحولنا شباب على مكان البطولة كان ودنا في أبوظبي وحاولنا لمدة شهر بس صارتلنا أفلام الله لايراويكم حتى شغلات ماتصير في الأفلام الهندية نفسها!! -___-

بلاك
اوه زين ان البطولة جمب بيتنا ههههههههه
ابا اشارك في بطولة المرح بس متى تبدا و الساعة كم تنتهي؟
المشكلة مع ranking battles في كوف كل اسبوع ما قدرت اروح بوظبي واخد البراشيم منك

توني كلمت فاجيتا و قال بشارك في بطولة المرح

المفروض البطولة تبدأ الساعة 5 ...وتخلص على الساعه 9 أو يمكن 10 لأنها لما جربناها المرة الي طافت ماطولت بس العدد ماكان كبير في نفس الوقت

وزين إنه بيشارك...نبا نشوف كيف مستواه تطور لأنه أشوف كم واحد يمدحلي لعبه أونلاين

خخخخخخ عاد هالبطولة بدخل فيها وشوفوا كيف بيستلموني !!! الله يستر بس

بلاك انا اكيد مشارك احسبني في بطولة الاركيد و ان شاء الله المستوى متحسن .........................

ترا ظروري تحظر بلاك انا متأمل في لعبي بصراحه و اباك تشوف اللعب و ان شاء الله بيكون اللعب صحححححححححح.

ممتاز جداً الساعة 10
اخيراً ممكن العب ويا ماان اوفلاين
نشوفكم يوم الجمعة انشالله

اقتباس:

---

المشاركة الأصلية كتبت بواسطة YamazakY GeesE

ممتاز جداً الساعة 10
اخيراً ممكن العب ويا ماان اوفلاين
نشوفكم يوم الجمعة انشالله

---

هلا يمازاكي

عاد لا تتوقع تشوف شي انت اكيد افضل مني بس ال ggpo و ما يفعل (تعرف حركاتي من تحت لا تحت lag lol)

والله بتكون فرصه , نعرف مستواك على الواقع اوف لاين و ان شاء الله بيكون بيننا تحدي (على فكره مستواي مو مثل ال ps2 controll ) بس جيد جداً يعني اقدر اوعدك بتحدي قوي ان شاء الله و انت عاد جهز عمرك و الله يكتب الى فيه الخير ان شاء الله للجميع .

طبعا انا ما بيخصنيش ابدن في مواضيعكم و في الامور العائليه للثيرد لكن عندي استفسار ابوي... ليش البطوله في دبي؟؟?


بلاك... شكلك ناوي اتسوي اغراء من نوع جديد في عالم الثيرد!!!

خخخخخخ الله يغربل إبليسك

لا ولا إغراء ولا حاجة بس بقولك شي....سير جرب تحجز قاعة في بوظبي ومع الأشياء الي طالبينها وقولي إذا بتحصل أو لا وعلى فكرة ما تكلم عن السعر بس أتكلم عن الخدمة والمعاملة....وصدقني مايحتاج تعرف الأفلام الهندية الي صايرة -___-

خخخخخخخخخ حلوة إغراء جديد...يعني شو ...بجيب مشجعات مثلا!!!!! خخخخخخخ

وعلى فكرة بطولة سوبر ستريت فايتر 4 راح تكون في نفس الفندق بس بعد أسبوعين (للمعلومية فقط)

^^

بعد ما تجمع كل التفاصيل بخصوص البطولة عطني خبر حتى اعمل موضوع جديد مع بانرات وترتيب الخ ...

فكرة : لو نعمل منشورات جديدة ونوزعها في اماكن معينه وخاصة في دبي لجذب عدد اكبر من المشتركين والمشاهدين ...للبطولات القادمة ...

مممممممممممم فكرة حلوة....خخخخخخ شكله الفيروس بينتشر أكثر من قبل...بس لازم أشوف حد من دبي يوزع المنشورات أو يحطها في محلات و أماكن معينة...

بعد لو البوكيمونات الجديدة الي في ال GGPO نصيدهم ونخليهم يحضرون البطولة وبالمرة نعطيهم الدي في دي عسب يكونون جاهزين للبطولات الياية!!

وعن الموضوع تراه تقريبا خالص بس صدقك شغل الترتيب والبانرات ماشاء الله تضبطه فبطرشه لك وماوصيك على الترتيب

الوكارد:

نبا نشوفك هالجمعه في بطولة الاركيد ...........................

بلاك:

كم عدد المشاركين في بطولة الاركيد ؟؟؟؟

و مشكور على تنظيم البطولات بصراحه شغل مب طبيعيييييييي الله يستر بس لو تترك اللعبه اتوقع خلاص كلنا بنتركها .

خخخخخخخخخخخخ لاتخاف السويدي موجود وأيمن والزعيم وريزو والبركة فيك بعد ...فمافي خوف عالثيرد

شوف توني الحين مخلص مكالمة مع أيمن مايقصر الصراحة...هو بيحط إعلان في المرح عن البطولة والأسامي بتوصله..نحن مانريدها تزيد عن 25 أو 26 بس لو زادوا مابنكسر خاطرهم نحن همنا الوقت بس وإن شاء الله تضبط

مان : الود ودي بصراحه ... كنت حاب اجرب ثيرد الاركيد لإول مرة ...

لكن المشكله هالاسبوعين مضغوط بشكل غير طبيعي ...الامتحانات الاسبوع الجاي والدكاتره ماقصروا كويزات وبروجكتات حتى للنفس الاخير ..الله كريم ...

بالتوفيق لجميع المشتركين ...

بلاك:
الله يعينكم , العدد مناسب الصراحه بس النظام كيف بيكون يعني مثل بطولة رمضان ؟؟؟ يعني في winners و losers ولا الى يخسر خلاص ....

الوكارد:
بالتوفيق ان شاء الله ولا يهمك الزم ما عليك دراستك.

ألوكارد إذا الموضوع الجديد بيثقل عليك بترتيبه وبيعطلك عن الدراسة خبرني عسب أحطه والبانر بعدين تعطينا إياه

نشوف إذا موسى يقدر يسوي هالكومبو في هالبطولة....من عندي لو سواها فيني أعطيه المباراة كلها

^^

ان شاء الله اخلصه ...

تراه وقتي مش 24 ساعه دراسه ...فيه بريكات 1-3 ساعات ...واقدر اشتغل عليه ان شاء الله ..

تان شكله اعتزل بعد هههههههه

الوكارد, تراني لاول بطولة سويت منشورات و الصراحه ما فادني واايد, علقتهم في محلات العاب, لكن ان شاء الله مره اليايه ان سوينا منشورات يكون افضل و ناس ايون اكثر ^_*

بلاك... اتمنى اشوف مشجعات في القريب العاجل و خاصة ان سوق البنات ارتفع هاليومين(تعرف مواتر فخمه و غيرها من هالشغلات اللي تخلي الريال نص ريال لول) على فكره ترى بطولة السوبر ما راح اشارك فيها و لسبب مجهول(انا ماعرف ليش ما راح اشارك)


السويدي... هلا حبيبي اخبارك ؟


ما اعتزلت بالعكس العب في الفرح من فتره لفتره بس بطولات و غيره خلاص مش جوي بعد الآن...

مممممم غريبه والله...يعني تلعب اللعبة وماتبى تدخل بطولات...صراحة إنت غريب وعلى راحتك بس الي يبى يثبت المستوى مايكتفي بمباريات الأونلاين أو لعب الكاجوال والمفروض يطلع الي عنده في بطولة

إلا إذا الواحد خايف من الخسارة جدام الناس والقال والقيل فهذا شي ثاني خخخخخخ شوفني كيف فرقان قطعني البطولة الي فاتت وماتشكيت وباركتله

عالعموم كنت أتمنى أشوفك في البطولات بس يله على الأقل عندي أخوك في الثيرد ومايقصر وإن شاء الله تعرف في المستقبل ليش ماتبى تشارك في البطولات

اقتباس:

---

المشاركة الأصلية كتبت بواسطة Black_Berserker

مممممم غريبه والله...يعني تلعب اللعبة وماتبى تدخل بطولات...صراحة إنت غريب وعلى راحتك بس الي يبى يثبت المستوى مايكتفي بمباريات الأونلاين أو لعب الكاجوال والمفروض يطلع الي عنده في بطولة

---

اهااااااااااااااااااااااااااااااااااااااااااااا

اقتباس:

---

المشاركة الأصلية كتبت بواسطة Black_Berserker

إلا إذا الواحد خايف من الخسارة جدام الناس والقال والقيل فهذا شي ثاني خخخخخخ

---

likeaaaa somebooooooody

اقتباس:

---

المشاركة الأصلية كتبت بواسطة Black_Berserker

[SIZE=4]عالعموم كنت أتمنى أشوفك في البطولات بس يله على الأقل عندي أخوك في الثيرد ومايقصر وإن شاء الله تعرف في المستقبل ليش ماتبى تشارك في البطولات

---

افا عليك يا بلاك حاظرين للطيبين (~_^)

هذا هو الحماس ولا بلاش....على فكرة ناوي أسوي معسكر قبل البطولة بأسبوع وأباك إنت وثاني تكونون معاي....لازم نحط الإستراتيجيات كلها وندرس الماتش أبز من خاطر....من الآخر بنقعد ندح لوووول

اقتباس:

---

المشاركة الأصلية كتبت بواسطة Black_Berserker

هذا هو الحماس ولا بلاش....على فكرة ناوي أسوي معسكر قبل البطولة بأسبوع وأباك إنت وثاني تكونون معاي....لازم نحط الإستراتيجيات كلها وندرس الماتش أبز من خاطر....من الآخر بنقعد ندح لوووول

---

افا عليك بس عن نفسي حاظر و ما اقول لا لرفع مستواي

و بصراحه انا اشوف انه عيب نخسر بطولة التيمات يكفي انه انت و انفي و ثاني ويانا يعني يمكن انا و يمازاكي مستوانا عادي مع اني الاحظ مستوى يمازاكي ممتاز يظل ويانا ثلاث محترفين و اذا انا دعمتكم بنكون على ما اعتقد فايزين في البطولة ف اذا خسرنا بحمل نفسي المسؤليه بصراحه لانه الغلط ما اظن راح يكون منكم و هذا شي ما اباه يصير و انا احاول قدر المستطاع اني احسن مستواي بسرعه و ان شاء الله بعد الدح بكون اكثر عن جاهز للبطولة.

بلاك... بالعكس خيو اموري طيبه و انا ما تكلمت عن الاونلاين ابد يعني البطوله الاولى كنت المركز الثاني و البطوله اللي عقبها خبقتها و ما همني من تكلم بالعكس كانت ردودي واضحه و في الويه... عيبني مثالك مع فرقان بس اشوف انه شي عادي انه فلان يخسر و يفوز حتى لو مستواه خرافي راح يخسر فه الشي المفروض ماحد يتحسس منه... و لو حصل و تحسس من الخساره شوه بيسوي مثلا(فكر فيها)راح تظل الامور كما هي... صدقني لي اسبابي الخاصه حاليا و ما ابا اشارك لاسباب معينه... فليقل من شاء ما شاء)))

على راحتك...إذا الأسباب الشخصية طارئة لهالدرجة ومانعتك من المشاركة فنشوفك إن شاء الله المرات الياية

حمدلله يا تان و انت شو مسوي.؟

لا لا تان شكله يترياني ارد هههههههههههه والله شو متحمس ل عالم الفرح, يخبروني حاليا لعيبه مناك, ايمن,ثاني,خالد,فرقان,جون,شادي,شمراز,موسي,ريزو,طارق,سكوبي و انت بعد و الله اعلم لو اني ناسي حد لعيب من قوم المرح بعد P:
, هني في امريكا كرهت الاونلاين ياخي, خلاص شي يرفع الضغط, تبا تسوي كومبو حركه سوبر اي شي , انسي مافي شي يضبط والله ان مرات ايني واحد انا اعرف ها شو يبا يسوي و خلاص انا ضامن الجوله, عاد شوف الباري ما ضبط و الحركه ما تبا تطلع مع الديلاي و اللاق, شوي الا شي الجوله كامله >.< يالله خير لين ما ارد الامارات و ارد على الاوفلاين,

و ان شاء الله يوم اني ارد بنسوي بطولة تيمز اوف 3 و سينجل, و ان شاء الله بطولات المرح مستمره كل بين فتره و فتره نسوي وحده

بلاك يوم بتلعبون في البطوله انا افضل تخلي مان هو اول واحد D: عشان يمتع الجمهور بالكومبوهات D:

خخخخخ والله شوف البطولة لها إستراتيجيتها وبطولة المرح مثل ما إنت تعرف بالقرعة وإلا ود ودي نبدأ فيه

وخاصة البطولة الخماسية في دبي هذي لازم كل فريق يفكر صح للاعب الأول..وبعدين يتفقون ويحطون الإحتماليات عسب مانضيع وقت...مثلا فريق ريزو بدأ بالفلبيني وفريقنا بدأ ب ثاني...بنشوف نتيجة المباراة وعلى طول بنكون متفقين بيننا قبل لو صار جذا من يلعب بعد فلان...مان أبى أخليه هو وإنفي آخر لاعبين ...بس لاتخاف في المعسكر راح نخطط للحرب صح لووول (لسبب ما تذكرت صراع الجبابرة وتخيلت مان وثاني جنرالات حرب وأنا المخطط مالهم خخخخخخ)

hello guys , am sorry but i can't type with arabic because am really slow with it ,So hey black i would like to join the happy world tournament , I have been playing there sf4 for 2 years now and 3rd strike ( Ibuki player ) for 5 months now , I also made a team to join 3rd strike tournament but people told me that's its already full so i really want to join the happy world tournament.

هلا أخوي

حياك الله والسموحة بخصوصة بطولة الفرق لأنه العدد إكتمل ونبى نخلص البطولة على الوقت وإن شاء الله البطولة القادمة تشارك معانا

بالنسبة لبطولة المرح فمرحبا بك وأيمن عنده التسجيل وأي واحد يبا يسجل يخبر أيمن وحاضرين للطيبين

=============================================================================

سالم...تذكرت هالفيديو من زمان لووول الله يخس إبليسهم الأمريكان ...أتمنى ماتوصل عندنا في أي لعبة لهالمواصيل فمهما كانت في الأخير هي لعبة....بس الصراحة الفيديو يضحك

http://www.youtube.com/watch?v=7iv7B0JZodU

mashkoor ma qasrt , bas also about ssf4 location in dubai and date ....
would like to know more about it because i couldn't find the poster for the tournament or something like that.

ههههه مب صاحي هذا ههههههه

لا بعد الشر يا بلاك هههههههه الله يحفظنا بس

------

vortex r u the same transitionar. player whp used to use ken.?o

سالم:

ان شاء الله بسوي الى اقدر عليه

بلاك:

ياخي والله احاول اكون عند ظنك و انا اتريا بطولة الاركيد مستواي جيد في الاركيد و اعتقد اني بلقالي مكان بين الشباب و بعرف وين مستواي على الاقل هذي البطولة بتعلم منها على عكس الماضيه كان مستواي جداً تعبان و ما قدرت العب ويا احد و اعرف مستوى الشباب .

الفيديو توووووووووووحفييييييييييييه بكل ما تحمله الكلمه من معنى... ودي اتحظنه و اواسيه عاللي قاعد يصيرله... لا مش مقتنع ابد انه قاعد يخسر( ذبحني هههههههههههههههههههههاي)

تان اضن هو يالي يفوز حتى لو تسمع يوم ريو كان تورتل يقوله, تستوي تورتل وياي انا هههههههه شي جي

يبالنا انيب واحد شرات ها خخخخخخ مال ضحك

بطلب من أصحاب الموضوع
سيتم إغلاقه