مرحبتين ..
هذي قصديده من قصدائد الشاعر الامير عبدالرحمن بي مساعد الي انا الحقيقة نشرت له والحين انشر له وان شاء الله يوصلكم جديده مني .. لاني الحقيقة معجب بشعره بشكل غير طبيعي . . .
---
الشوارع : مستقبل الماضي المضارع
الكراسي : مصدر افراح ومآسي ، لا هي تبارك لجالسها الجديد.. ولا هي لأهل تاركها تواسي.
الكراسي عامدة، تهزأ بنا وهي جامدة ، الصرير اللي من قوائمها يقول: ما في احد منكم أساسي
المواطن : شخص تخفاه البواطن ، شخص ما هو لمصلحة مستقبله فاطن ، المواطن في جميع الأزمنة و الأماكن دومه ماكل و شارب وساكن ما يبي غير الذي يقدر يفكر له ، يبين له ، يقرر له وش الفاتح من الألوان و وش الداكن ، المواطن كفء عاقل محترم لكنه شخص جاهل بالبواطن.
الذكاء : انك تلاقي مكانك بين اكوام الغباء.
الجود : العطا بحدود ، او بمعنى آخر انك تعطي اكثر من الموجود.
الحياة : الممر الكهل بين الولادة والممات ، او بمعنى آخر نقول المسافة بين جبهة متجهه صوب السجود وبين سجادة صلاة .
السياسة : السياسة فن والدنيا ومسارح ، ولأجل تحقيق المصالح تقدر انك تكرهه في داخلك وتلعــن الطيب في ساسه .. لكن ان شفته عليك تقوم له وتحضنه وتبوس راسه.
الاقتصاد : ناس تزرع من فجر ربي لين الشمس تغرب ، وناس تصحا في العشا تتولى تقسيم الحصاد .
السجون : هي مكان العزل من يخرج عن القانون.. وان غدا القانون جائر تصبح القضبان دنيا وتعزل الخارج عن المسجون.
النفاق : رغم اختلافك تبقى آرائك وآراء الذي تخشاه دايم في اتفاق ، أو نقول هو انتماءك كل فترة لانتماء .. أو نقول هو ارتماء أو بمعنى آخر هرولة صوب اليـهــود، وبكا على أطفال العراق .
السراب : وهم .. ما هو ماء لكن يعطي للضامي أمل واحساس مفعم بالأمل.. والسراب ينادي يا ضامي تعال ما تبقى الا خطوتين وتنعم برشف الشراب .. أو بمعنى آخر نقول السراب : الوعود اللي قطعها المرشِّح للمرشَّح في انتخاب.
الحداثة : الرضوض الناتجة عن ارتطام الشهب باسراب البعوض .. ما هي طلاسم او غموض،
او بمعنى آخر نقول الحداثة : واحد زائد واحد يساوي ثلاثة
عبد الرحمن بن مساعد ..
تحياتي .. الســــــــــــــاهـر ..
