خواطر وحده ما جاها النوم...........
شباب انا ما لي تعليق الا اني اقول كخخخخخخخخخخخخخخخخخخخخخخخخخخخخخخخخخخخخخخخخخخخخ
خواطر وحده ما جاها النوم
في ليله من الليالي الرومنسيه الرايقه ... انجعصت على سريري ، سكرت عيوني فتحت
خشتي و تجهزت للنوم ... و مير أتقلب يمين ... يسار
ماش مافي فايده ... ماجاني النوم قاعده بس أفكر بالسفر ... قام ابليس ماقصر
طبعا ... جا يلعب برويسي تقل كوره يشوته يمين و يسار
و أنا طبعا مخفه على طول أصدق ... المهم قامت تراودني أفكار جهنميه
(نسبة إلى جهنم الحمراء أي من فعائل ابليس )
جا قالي ابليس حسبي الله عليه قولوا آمين
قال : ريـــــــــــــــــــــــــــم
قلت : هااااااااااااااااااااااااااااه
قال : وجع قولي سم
قلت : تخسى احمد ربك اني رديت عليك بس .. ترى بقفل ( مكلمني على الجوال ما
يلعب ) ... قال طيب طيب اسمعي لا تخسريني ترى الفاتوره علي تحسبون بس أنتم
اللي عندكم فواتير ؟؟؟؟؟
قلت : وشو ؟؟؟ وش عندك ؟؟؟ قوووووول خلصني ؟؟؟؟؟؟
قال : وجع ... وش رايتس تسكتين و تبلعين لسانتس لحظه عشان تخليني أحتسي ...
أما أنتم يا بنات شقرا
قلت : وش فينـــــاااااا هاااااااه ؟؟؟
قال : لا أبد سلامتس ... يمه بسم الله علي منتس الله لا يحدني لتس بس
قال المهم اسمعي يا ريووومه ( اخس يدلعني بعد ) الحين انتي صح ودتس تسافرين
؟؟؟؟
قلت : ايه والله ودي
و يطق على صدره و يقول خلاص ازهليها بمرك بعد ساعتين جهزي قشتس و أنا بجيتس مع
بلكونتس ( بعلمكم ترى عندي بلكونه ) ... قلت طيب بس وش ذا السياره اللي بتجيني
و تطمر عند بلكونتي ؟؟؟
وبعدين أنا ما أركب أي سياره لا يا عيوني ... أنا أقل شي أقل شي بنت لي و مو
ولد فاهم ... بنننننننت <==== تسمع فيها بس ماعندها لا بنات ولا عيال
قال : يووووووووه يلعن أم القراوه يا شيخ ... خيـــــــــر وش بنت لي و بنت لك
.... لا يا ماما أنا بجيتس بشي ثاني يالله بس جهزي عفشتس و اربطي ذا القلعه
اللي فوق راستس ( قصده شوشتي ) طووط طووط طووط
و قفل على طووول ... أكيد ما يبي يطول ذا البخيل ، الحين قاعد ساعه يعلمني و
يلعب برويسي و متحسف يقولي مع السلامه ... صدز انه قليل حيا
المهم و جهزت عفشي و أطلع مشطي الأصفر حق أبوهنود شاريته بريال من عند محطة
البنزين و أكد شعري و أزبطه على جمب مع استخدام شي بسيط من السعابيل عشان يلبق
زين ... و أقعد على الكرسي أهززز أهزززز كني بيجر و بتحويله بعد ... و بعد
ساعه أشوف ذا اللي تسنه بساط يطير بالهوى و جا بيوقع على بلكونتي بس ما معه
قلم
قال اطمري انتي ... طمرت على ذا البساط ... قلت : أخسسسس والله ما تلعب بساط و
حركات ... قال ايه مشلحه من علاء الدين
و أشوفه أنا ياكل و معه مفطح و رز عزيمه و حركات
قلت : اللــــــــــــه كل هذا لي أنــــــــــا
قال : لا وجع .. ما همتس الا كرشتس انتي ... خففي شوي ... شوفي البساط قاعد
يسحب على الأرض من ثــقلتس ... طبعا و تحطيمات من هنا لين بكره ... بعدين قلت
هااااااااه على ويــــــن ؟؟؟؟؟
قال أنتي وين تبين ؟؟ قلت همممممم أبي ، أبي ، أبي أروح الفيصليه
( بزعمي الحين سفر )
قال لا مافيه كلها شباب و هيئه منب ناقصين مشاكل
قلت يووووووووه حتى انت تخاف ... طيب أبي ... ابي ... أبي
و أصرخ ذيك الصرخه و أطمر و أتشقلب في الهوى ( يا حبي للمطامر و التشقلب ما
تلاحظون ) المهم و أقول أبي إيـــــــــــطـــــــــالــــــــيا
يوم انه تكرفس هو من على البساط و طاح و قال وجع وش بلاتس انتي ؟؟؟ قبلتس كذا
مرجوجه ؟؟؟ طيب طيب خلاص أوديتس لايطاليا بس وين في ايطاليا ؟؟؟؟
قلت أبي روما و بالتحديد شارعي المفضل فيافانيتو .... آآآآآآآه يا حلو الأيام
اللي قضيتها هناك ... و قاطعني و قال إنا لله خلاص خلاص درينا انتس رايحتن
لروما فهمنا ... يالله بس اربطي الحزام الحين بنوصل
و في خلال دقائز وصلنا لشارعي المفضل فيافانيتو في روما ... و الجو غيم و مطر
خفيف يرش .... و وجيهن سفره تناظرها و يظحكون في وجهك مهوب مثل ربعنا لا صكيت
الواحد والا الوحده منهم بنظره و أنت تبتسم قال لك خيـــــــــر إن شا الله
؟؟؟؟؟ ظايع لك في وجهي شي ؟؟؟؟؟؟؟
أنا لا قالي أحد تسذا ودي اقوله وش بيظيع لي في وجهك يعني ؟؟
مفتاح أبوجلمبو اللي يشبه خشمك ؟؟؟؟
صاموله مقاس 6 اللي تشبه عيونك لا رموش ولا شي ؟؟؟
ليفة مواعين اللي تشبه شنبك والا وجهك اللي على بعظه تقل خبزة بر محترقه
؟؟؟؟؟؟ .... بس بالنهايه أخاف أقول شي أنجلد
المهم إني جيت لابليسي قلت له : تكفى أبي أروح القهوه اللي هناك تراها تجنن
... عاد أنا خبيرة قهاوي
قال طيب بس انتبهي ترى ايطاليا كلها حراميه و عصابات مافيا و .. والخ
و قام يروعني بالحتسي و يخوفني عاد دخلت أنا القهوه بمسدس خوفا من أي هجمه غير
متوقعه ( طبعا من هنا ابليسي راح و تركني أكيد شايف له شوفه والا شي ) و أنا
واقفه أطلب ما دريت الا بثلاث تماسيح = رجاجيل واقفين في المحل
واحد عند الباب معاه كلاش روسي ثلاثه و ثلاثين طلقه و الثاني وراي بالطابور
معاه آر بي جي و الثالث عند الحمامات ( الله يكرمكم ) معاه رشاش قال اللي وراي
انبطحووووووووووووووووووا على الأرض جميعا
يوم انهم كلهم انبطحوا الا أنا مرتزه طايرتن بوهتي
قال و انتي وراتس ما انبطحتي والا على راستس ريشه ؟؟؟ و يدفني جعله اللي منيب
قايله .. و يقول يالله انبطحي أشوف
عاد أنا بدت تشتغل عندي أنزيمات مايك تايسون ... قلت لا يا دزليل الحيا
( ترجمه : لا يا قليل الحيا )
تبيني أنبطح ياللي ما تستحي مابقى الا هي ... طالت و شمخت أشوف
و أعظ اذنه ( موب أقولكم بدت تشتغل انزيمات مايك تايسون عندي بس منتم
مصدقيني ) و أعظ اذنه عظتن يحبها قلبك بس ليتني حاطتن شوي ملح لأن إذنه خانسه
... و من يوم ما عظيتها و الدنيا متغيره علي
صار تفجير و حركات ... اللي انقطعت رجله و اللي راحت فيها مؤخرته صار يزحف على
بطنه تسنه ظب محرول و اللي تقطعت أصابعه صار ماعاد ينغف ... أنا صعقت <==== يا
زين اللي يقرا روايات عبير
قلت بس يا ريم هذي نهايتس ... تشهدي
و أنا أقول في خاطري لا أبوها لا أبو اللي يروح لذا الديره
ما دريت الا اللي يجي من وراي يقول ريم .. ريم .. ريم
و أفتح عيوني ألاقيها الشغاله تقول يالله ريم ماما بابا يقول تآلي هم هم
ترجمه : أمتس و أبوتس يقولون انزلي تغدي
تنبيه هام جدا
من جد من جد اللي يفكر يروح لايطاليا أنصحه يهون أو يروح و ينتبه لعمره لأن من
تجربه شخصيه أنا أقولكم تراها ديره كلها حراميه و بالذات روما ... لعنبو
ابليسهم سرقونا في نفس الاسبوع 3 مرات
واللي من جد يبي ينبسط لا يتعدى كان
المهم جاكم العلم لاتجون بكره تقولون ما قلتيلنا
