~*¤ô§ô¤*~ أمــــل مقــــتـــــول~*¤ô§ô¤*~

السلام عليكم ورحمه الله وبركاته
كيف حالكم شباب وبنات ؟

إن شاء الله تكونو بصحه وعافيه ؟

حبيت أنقل بين يديكم قصه من أروع القصص التي قرأتها
وأسف إذا تكررت القصه هنا لاكن القصه أعجبتني وأتمنى أن تحوز لى إعجابكم أنتم أيضا
والأن أترككم معها
وهي بعنوان



~*¤ô§ô¤*~ أمـــــــــــل مـــــــــقـــــــــتــــــــــول ~*¤ô§ô¤*~
طبعا القصه منقوله
أترككم معها

السلام عليكم :)

الجزء الاول

مهرة وحيدة أبوها و بنت العائلة المشهورة بغناها ، كانت مهرة وحيدة رغم المال و الحاشية الطويلة العريضة المحيطة بها في كل وقت، فهي بلا أخ أو أخت و لا أم، فقد طلق والدها أمها عندما كانت في الخامسة من عمرها، و هي لا تعرف شيء عن أمها سوى أنها من نساء الامارات الشمالية و يحرم عليها السؤال عنها أو عن سبب الطلاق .

كانت مهرة شديدة الجمال ، بيضاء و بياضها ما يعكره أي شيء غير حبة خال ارتسمت في أعلى خدها لترمز على غرورها و جمالها الساحر، كانت ترمي كل من شافها بسهم عيونها الواسعتين باللون العسلي ، أما شعرها كان مثل قطعة من نسيج الحرير اللي غطى جسمها حتى أسفل ركبتيها.

كانت مهرة شديدة الغرور و الكبر من جمالها الفائق و زاد من هذا دلع الوالد الغني اللي ما أخرهلها أي طلب مهما كانت صعوبته.
في أحد أيام الصيف و على أنغام أغنية عيظة " يا مرحبا يا ناعم الصوت و العود" كانت مهرة تتجهز عشان تسير أبوظبي مول، أيام الاجازة قربت تخلص و ما بقى على الجامعة شي و لازم تسير تتشرى لبس عشان أول أسبوعين،
اتصلت مهرة في أعز صديقاتها مريم و اللي كانت الوحيدة اللي تأمنها على أسرارها و الوحيدة اللي توثق فيها و تحس بالسعادة في قربها " مريوووم وييينج" ، يلا عاااد ما استوى موول ، المحلات بيسكرون و انتي بعدج ما وصلتي"
مريم:"حووووه، شو فيج مشتطة، بعده باقي اسبوع على الجامعة ، ما بيخلصن الثياب اللي في المولات، و بعدين كيف يعني ، تبيني أسير جلحة ملحة و انتي ملكة جمال؟؟"
مهرة "ههههههههههههه ، يالدبة ، دومج جي، عنبووه نحن مب سايرين عرس بيخطبونج فيه، الا هو مول و بنكون متغشيات"
مريمّ" ادري متغشيات بس انا يوم كنت اكلم بنت خالي حمد لطيفة على التلفون سمعتها تتضارب ويا سعيد اخوها عسب يوديها ابوظبي مول و هو هب طايع يقول بيسير ويا ربعه، يعني اكيد بيكون هناك"
مهرة" يعني يالهبلة لو اتعدلتي و اتسنعتي بيشوفج هو من ورا الغشوة أو حتى تتحرين بيعرفج"
مريم " هيه و الله صدقج ..بس..."
مهرة " ماشي خلاص...يلا البسي عباتج و الحين بمر عليج ، ما بترياج لين ما تخلصين ما بنوصلّّ"
تضحك مريم و تسكر التلفون و تم تفكر في ولد خالها سعيد، مريم كانت تنافس ربيعتها مهرة في الجمال و الدلال، و ما كانت تحتاج انها تتعدل عشان تحلو لانها كانت آية في الجمال، كانت مريم اخت لخمس أخوان متزوجين و اختها الصغيرة شمسة اللي ما كملت عشر سنين، مريم كانت تموت في سعيد بس سعيد ما كان يعبرها او حتى يسلم عليها في جلسات العائلة، كان سعيد شاب مستهتر كل همه المغازل و السيارات و آخر شي يمكن يفكر فيه هو علاقة جدية تنتهي بالزواج، كان وحيد أبوه في عائلة فيها 4 بنات و منهن لطيفة اللي كانت أقرب وحدة لمريم في العمر.
تمت مريم تفكر في أبوها اللي كان تفكيره يزوجها بعد ما كبرت و دخلت السنة الثانية من الجامعة لولد أخوه محمد " خلف" ، لكن قلب مريم كان معلق في سعيد اللي ما فكر فيها و لا عبرها رغم جمالها.
قطع حبل أفكار مريم صوت الموبايل و هو يرن، كانت مهرة متصلة فيها.
مهرة " يلا خلصتي أنا عند الباب"
مريم" اووووووووووووه، اتريي دقايق و بظهر"
مهرة " اووف ، انا من متى اقولج بظهر، يلا خلصينا ، عندج دقيقتين مب أكثر"
و بسرعة تشل مريم شنطتها و تلبس عباتها و تتعطر و تظهر الصالة ، و هناك تلقى الوالدة.
أم محمد" وين سايرة يا بنتي هالوقت، و شو كل هذا اللي على ويهج يلا سيري غرفتج و امسحي هذا الاحمر و الاخضر"
مريم" عاااد امي شو بلاج، نسيتي اني بظهر ويا مهرة بنت سيف ابوظبي مول"
ام محمد" و حق شو متعدلة جي، ليش هو عرس عشان تراوين زينج عند العرب"
مريم" عاد يا امي كل البنات جي هالايام، يعني تبين يقولون عني خسفة و ما اهتم بعمري، و بعدين انا بتغشى "
ام محمد" انتي محد يروملج، سيري يلا فكينا من حشرتج"
مريم " فديتج يا احلى ام في الدنيا، يلا انا اترخص"
ام محمد" ما تبين فلوس"
مريم " لا امي تسلمين ابويه عطاني اليوم الصبح، يلا مع السلامة"
ام محمد" مع السلامة ، بس لا تتأخرين، اخوج سلطان و حرمته بيوون عندنا اليوم عقب المغرب"

في السيارة، مهرة" صباح الخير، ليش ياية بسرعة ، عادي ترى ما عندي حد غيرج ترى"
مريم و بضحك" أدري ما عندج حد غيري بس قلت حرام اخليها تتريا"
و يضحكون الثنتين و تقول مهرة للسايق انه يروح لأبوظبي مول.
مريم" هيه صح بقولج"
مهرة " ها شو السالفة"
مريم" تعرفين اخوي سلطان بيي عندنا البيت اليوم ويا حرمته"
مهرة " انزين و له ويه ايي بعد ما تضارب ويا ابوج"
مريم" مادري ، بس الظاهر انهم اتراضوا عسب جيه اليوم بييون عندنا"
مهرة" الصراحة يا مريوم حرمة اخوج هاي حصة، ما ادانيها خير شر، احسبها خبيثة و تبا تبعد اخوج عنكم باي طريقة"
مريم" مابالايد حيلة يا مهروو، و الله هو اللي اصر انه ياخذها ، و شفتي شو سوت، يعني مب كفاية انها سوت كل المشاكل عسب تظهره من البيت ، اتي الحين تعق رمسات عن أمايه حليلها اماية ما قالت شي غير الله يسامحها بس ابويه زين ما استوى به شي من كثر ما عصب على سلطون"
مهرة" حليلكم و الله، مريوم اتحملي تقربين منها ، تراني احس انها في يوم من الايام بتدخلج انتي في مشكلة"
مريم:..........
كان سلطان اخو مريم هو الوحيد اللي تمرد على تقاليد العائلة و عاش في بيته الخاص مع زوجته و ابنتهما الصغيرة، و كان ذلك من طلبات زوجته حصة اللي تستوي بنت خاله حمد ابو سعيد حبيب قلب مريم.
سكتت مريم و مهرة و تموا سارحين في افكارهم و هم يسمعون حاتم العراقي يغني" من اغلى ناسي يا روحي قلي شصار من اغلى ناسي"، مريم تفكر في سعيد اللي ما يعبرها و مهرة في الثياب و الكشخة... لين ما وصلوا ابوظبي مول.
في ابوظبي مول..

مهرة" تعالي ندخل هالمحل شكله منزل اشيا رهيبة"
مريم" اتريي في شلة شباب بيمرون ، يمكن سعيد واحد منهم"
مهرة" اوووه ، انتي محد يوديج مكان فيه سعيد مالج"
مريم" خلاص خلاص ، يلا قدامي"
بعد ما خلصوا مريم و مهرة حواطة و اتشروا لبس يكفي كل السنة مب اول اسبوع بس ، شلوا اكياسهم و قرروا انهم يروحون لانهم اتأخروا و قرب أذان المغرب.
و عند الباب طاحت غشوة مريم و ما قدرت تعدلها من كثر الاكياس ، في هذي اللحظة كان هناك شابين يلحقون مريم و مهرة من اول ما دخلوا المركز.
هزاع" ياويلي على الجمال"
حمدان" آه من العيون، تجنن "
هزاع" يا الشيخة هاج الرقم و دقيلي"
مريم متلعوزة و مب قادرة تعدل شيلتها من كثر الاكياس ، و في نفس الوقت مب قادرة توقف من الخوف انهم يتفردون بهم.
و في اللحظة اللي يرمي فيها هزاع الرقم ، يلقى ايد قوية تضربه على راسه و يطيح من كثر الالم.
و تسمع مريم صرخة بصوت عالي " يا حقير"
تميز مريم الصوت ..صوت حبيب القلب"سعيد"....

^^^^^^

انتظروا الجزء الثاني ....

السلام عليكم :)

روووووووووووعة
ننتظر التكملة اخوي
ما ادري ليش احس ان نهاية القصة حزينة من اسمها:D

خربوش المربوش
أشكرك أخي العزيز على المرور
وإن شاء الله تكون نهايه القصه سعيده
مو شرط العنوان يحكم

السلام عليكم :)

الجزء الثاني

في هذي اللحظة ما عرفت مريم وين تودي عمرها

فرت الاكياس و تمت تركض و تركض بين السيايير ، كانت في حالة فظيعة من الخوف و الخجل و الفرحة بعد..لين ما تعبت و فجأة وقفت ركض و طاحت على الأرض.
عند باب المول كانت مهرة متسمرة في مكانها، مهرة ما تعودت على هذي المواقف، سعيد كان يتظارب ويا هزاع و تماسكوا و كفخوا بعض لين ما سال الدم، و آخر شي ادخلوا الأمن ، مهرة تشجعت و تحركت من مكانها بعد ما انشلت افكارها، و كان اول شي فكرت فيه مريم.

تمت تنادي بصوت عالي مريم و تزقر عليها و لكن ما تلقى الرد، و فجأة شافت ناس متيمعين، ركضت لين عند التجمع و شافت صديقة عمرها مريم طايحة و الناس ملتمين حواليها يحاولون يقومونها.
في هذي اللحظة ما تحملت مهرة الموقف و طاحت عدال ربيعتها.

في الجهة الثانية ، كانت الضرابة بعدها حامية و ما وقفت غير يوم ادخلوا رجال الشرطة، كانت كندورة سعيد ملونة بدم هزاع و حمدان و بدمه اللي نزفه من ضربة قوية صابت راسه، القت الشرطة القبض عليهم كلهم و كان منضم اليهم صديق سعيد الغالي نهيان.

قامت مهرة و كانت تتحس بصداع فظيع، تلفتت يمين و يسار و كان اول كلمة قالتها "مريم" و تفاجأت انها في المستشفى، و لكن مريم ما كانت عدالها، و قامت من على الشبرية و هي تدورها و تسأل الممرضات وينها، و الكل ما يعرفون منو مريم لأنها دخلت المستشفى بدون بطاقة هوية، و آخر شي لقت الدكتور المسؤول عن الطوارئ و وضحلها انها الحين يسوولها فحوصات احتياطية، استغربت مهرة ليش الفحوصات لمريم و شو السبب، في نظرها كان الامر مب طبيعي، لان هي بعد طاحت بس ما سوولها فحوصات، بدا الخوف يدخل قلب مهرة، و اصرت على الدكتور انه يخبرها حالة اعز صديقاتها، و بعد الحاح ..
الدكتور" الصراحة يا بنتي انا شاك انها تعرضت لنوبة سكر"
مهرة"هااااااااا...؟؟؟!!ّ"
مهرة" و كيف،،،مريم ما فيها سكر..منو قااال...لييييش يا ربي " و تنزل على خدها دمعة حارة من الحزن و الخوف
الدكتور" يا بنتي انا قلت يمكن و انتي ادعي ربنا انه يخيب ظني"
مهرة و الدموع تخنق كلماتها" انشالله ...يا رب تعافيها..يا رب ما تألم..يا رب خليني مكانها و لا تحس بأي ألم"
كانت هذي احدى المرات النادرة اللي بكت فيها مهرة...مهرة المغرورة ، و اللي كل زميلاتها في الجامعة يعتقدونها متبلدة الأحاسيس، بكت مهرة على أعز صديقاتها مريم
مهرة" انزين يا دكتور دخيلك خلني اشوفها..خلني اكون معاها..انا متأكدة انها تحتاج حد يواسيها"
الدكتور" يا بنتي اللي تحتاجه صديقتك الحين هوه الراحة و عدم التوتر العصبي..ان شاء الله اول ما تخلص فحوصات تكوني انتي هديتي و تخشي عليها و تطمني عليها ..و ربنا يجيب العواقب سليمة"
مهرة".........ّّ"
و تجلس مهرة على كرسي المستشفى البارد..اللي دايما كان يحسسها بالوحدة و بالألم و الخوف...و دايما كان يرسم في خيالها صور قديمة غير مفهومة ...تكون هي البطلة فيها و هي طفلة صغيرة و معها طفل آخر صغير..و هذي الصورة هي الوحيدة اللي تذكر فيها امها... و لكنها دايما كانت تعجز انها تجمع هذي الصورة و تفهم اللي كان فيها،و تفكر مهرة في اعز صديقاتها مريم و تدعي الله يعافيها و ما يصيبها أي شر..
و بعد ساعة من البكاء المتواصل و الادعية تسمع اصوات بكاء عالي يتجه صوبها..و يوم تلتفت تلقى ام محمد و ابو محمد والدين مريم، تستغرب مهرة,,,هي مااتصلت في أي حد عشان ما تكبر السالفة...
و تشوف ام محمد و هي تصيح و مب قادرة تشل عمرها من الخوف على بنتها..و في هذي اللحظة تحس مهرة بنغزة قوية في صدرها..و تذكر انها وحيدة بلا ام تسال عنها و تبكي عليها اذا مرضت، و لكنها تخفي هالمشاعر و تحاول تجمع قوتها و تبتسم ابتسامة باردة تحاول فيها انها تخفف من حالة ام محمد الحرمة العيوز،
مهرة" اهدي يا خالتي..ما فيها شي مريوومة..بس شوي فحوصات عسب يتأكدون من سلامتها قبل ما تظهر.."
ام محمد" فديتها بنتي...و الله طاح قلبي..نزين يا مهرة يا بنتي شو استوى عليكم...و شو كان السبب"
مهرة" ينعقد لسانها و ما تعرف شو ترد...تخاف تقول شي توهج فيه اعز ربيعاتها.."
و في هاذي اللحظة تدخل مريم بالكرسي المتحرك و تنقذ الموقف..
مريم" اماية ما استوى شي...بس شوي دارت بي الدنيا و طحت من التعب..."
ام محمد" انا اقولج اكلي ...لكن انتي ما تسمعين الكلام ...هذا كله من الريجيم اللي ذابحنج"
مهرة" انزين خالتي انتوا كيف عرفتوا ان نحن هني...؟؟"
يرد ابو محمد قبل ما تقول ام محمد شي.." والله يا بنتي نحن كنا قاعدين نحاتيكم لانكم تأخرتوا و فجأة رن تليفوني و كان فيه رقم مريوم، طلع حد من الممرضين العرب خذا التلفون و دق و خبرنا ان انتي هني"
مهرة تقول في خاطرها"يعني هم ما عرفوا بعدهم بسالفة سعيد..يا ويلي اكيد الحين بيحرمونها من الظهرة..و يمكن بعد ما يخلونها تكلمني"
و تقوم بعدين مهرة تسال الدكتور على جنب عن نتايج التحاليل و الفحوصات..
الدكتور"اطمني يا بنتي..انا ظني كان مش في محله...هي بس كان عندها شوية ضعف و الظاهر انها اتعرضت لصدمة و ما قدرتش تستحملها...هي بس تحتاج لأكل صحي و شوية فيتامينات و تبعد عن الاشياء اللي بتنرفزها"
مهرة " انشالله يا دكتور..الحمدلله طمنتني..."
و يكمل ابو مريم اوراق المستشفى عسب يظهر بنته و يوديها البيت..
في هذا الوقت مهرة ما عرفت شو تقول حق ربيعتها مريم..مريم اللي الصدمة ربطت لسانها، كانت مهرة حاسة في مريم، بس كان لازم يدورون حل لمشكلتهم ، صحيح انهم ما سووا شي غلط..بس كان من الممكن انه سعيد يشوف الموقف غلط خاصة و انه غشوة مريم كانت طايحة و كانت مريم متعدلة من الخاطر..و اللي زاد من تعقيد السالفة الضرابة اللي وصلت للشرطة...

................................

في مركز شرطة العاصمة

الملازم"يا عسكري...دخل المحجوزين من المركز"
و يدخل الاربعة حمدان و هزاع و سعيد و نهيان ربيعه، و وقفوا الاربعة يطالعون بعض بنظرات كلها غضب و حلفان بالانتقام ، و يقطع الملازم عليهم حبل النظرات و الجو المشحون.
و يسالهم عن اساميهم و معلوماتهم الشخصية الكاملة، و بعدين يسأل عن سبب الضرابة، و ينفجر سعيد في وجه الملازم" هذا النذل الحقير كان يغازل الاهل عيني عينك..لا و بعد يفرلهم الرقم"
هزاع بصراخ" ايييه انت ..لا تم تفر بلاك على خلق الله...اذا اهلك مب متربيين لا تعق بلاك علينا.."
سعيد"آه يا كلب"..و يتجه صوبه يبي يضربه و لكن العساكر يمسكونة..
الملازم" اسمعوا انتوا..اذا ما بتحترمون وجودكم هني ترى والله اوديكم كلكم الحجز تخيسون لين ما تتعلمون الادب"
و يسكت الاربعة و يحاولون يهدون اعصابهم..
الملازم" انزين يا سعيد...انت عندك دليل انه كان يغازل او في شهود"
هزاع و بوقاحة"اكيد ما عنده..لانه جذاب"
سعيد" انا جذاب ياللي ما تستحي"
الملازم" هدوء..اللي ما بيسكت الحين ترى و الله علطول الحجز"
سعيد" طال عمرك انا و علي ربيعي شفناه بعيونا،،و بعدين هو عق الورقة في واحد من الاجياس و اكيد عليها اسمه و رقم تليفونه"
و هني يتغير ويه هزاع اللي خاف يلقون الورقة
الملازم" انزين يا سعيد اذا كنت وايد خايف على اهلك ليش ما خفت من الفضيحة وسط المركز..كان لازم تقدم شكوى لمركز الشرطة قبل ما تنفعل و تتظارب"
سعيد" يعني اشوفه يسرق شرفي و كرامتي و اسكت...انت ترظاها على عمرك يالضابط"
و هني يسكت الضابط,,و يوجه كلامه لهزاع اللي باله مشغول بالورقة الضايعة .
" و انت يا محترم...شو اقوالك"
هزاع يسكت و ينزل راسه للارض..

لحسن حظ الاربعة انه الظابط كان متساهل و اغلق المحظر بكتابة تعهد عدم التعرض رغم اعتراضات سعيد اللي طالب بسجن هزاع..و لكن الضابط ما قدر يسوي أي شي لعدم وجود الادلة اقصد الورقة ، و لان الدعوى لازم يقدمها المتضرر يعني مريم و لكن سعيد فكر فيها و قال انه اكبر عيب و فضيحة انه يدخل حد من بنات هله المخافر و اقسام الشرطة ،
و عند باب مركز الشرطة ...يتوعد سعيد بالانتقام من هزاع..اللي يسكت و يدري انه غلطان لكنه يكابر..

و يتصل نهيان في اخوه عشان يوصلهم المستشفى، سعيد كان ينزف من راسه و نهيان كان كل ويهه و ايديه ميرحات..
في السيارة يفكر سعيد في كل اللي استوى و محتار و يقول في خاطره" يا ترى شو استوى على مريم ...و ليش هي اتصرفت جي..هل صحيح انها كانت تقصد انه هزاع يغازلها....، معقولة مريم تكون من هالنوعية من البنات؟؟"

و يقطع على سعيد حبل أفكاره كلام نهيان اللي تقريبا ما اتكلم في مركز الشرطة، نهيان كان يدري كيف يحس ربيعه بعد الفضيحة في المركز و ما عرف شو يقوله عشان ما يجرح كرامته ، و لكن الحين اتشجع و قاله
علي" يا سعيد لا تكدر عمرك..ترى هذا هزاع معروف انه نذل و مب ريال..انت ما شفت كيف اختبص ويه يوم طروا الورقة"
سعيد"............."
علي" عالعموم ما صار الا الخير و زين ان الضابط طيب و ظهرنا و ما سوالنا محضر"
و يبتسم سعيد ابتسامة باهتة و هو يشوف كيف ربيعه يحاول يخفف عنه و لكن ما قدر يمحي الصورة من باله و ما لقى لها تفسير..
و يسرح سعيد في اللي صار لين ما يوصلون مستشفى خليفة ، و أول ما يدخلون المستشفى يتسمر سعيد في مكانه ، كان آخر شي ممكن يتوقعه انه يلقى هالشخص في المستشفى...

*********
انتظرواالجزء الثالث..

م ن ق و ل

مشكووووووووووووووووووووووووووور وما قصرت

مشكوووووووووووووور



وان شاء الله تكون مثل انت لي




ومبروك على العوده




والسلام...




;
;
;
;
;
;
;
;
;
;
;
;
;
;
;
;
;
;
;
;
;
;
;
;
;
;
;
;
الساهر@النعسان

الســــــــــــــــلام عليكم

تسلم اخووي حد السيف وهذا اللي

توقعته منك :shock22: :shock22:

تسلم يمناك :biggthump :biggthump

مع تحياتي لك

اخوك:
B!7

NoooOOooon و الساهر@النعسان وB!7
أشكركم على المرور
وهاكم الجزء الثالث

السلام عليكم:)

الجزء الثالث..

في اللحظة اللي دخل فيها سعيد المستشفى ويا نهيان التقى في آخر شخص كان يتوقع يشوفه، شخص من الماضي، التقى في الانسانة الوحيدة اللي تمكنت تاخذ قلبه، التقى في الانسانة اللي سحرته بكلامها و ذوقها و رقتها، الانسانة اللي أثبتت ان الجمال مب اساس الحب، و اللي في نفس الوقت أثبتت لسعيد ان استمرار السعادة في الحب شي مستحيل...اثبتتله ان الحب الدايم هو أمل مقتول، التقى سعيد في نص قلبه الثاني "شرينا"...

وقف سعيد في مكانه، كانت كل أطرافه ترتجف شوق و لهفة و حزن، مسكين ...التقى في الانسانة اللي علقته في حبه و اختفت فجأة بليا وداع أو سبب، شرينا هجرت سعيد في قمة احساسه بالحب، هجرته و دمرت ثقته في كل البنات، شرينا كانت الوحيدة اللي سعيد قالها كلمة "أحبك" من غير خجل و كانت نابعة من قلبه، و اقترب سعيد منها و انتبهت شرينا لوجوده و كان وجوده قدامها صدمة شلّت كل حركاتها، اقترب سعيد منها و كله أمل انها تحييه مثل أول و بترتمي في حضنه، و ما وقفته ألف كلمة لا أطلقتها عيونها و لا ألف دمعة وقفت في عيونها و اترجت انه يوقف في مكانه و يبتعد، و استمر سعيد يقترب و يقترب الين ما أوقفه صوت من خلفه
....." يا مرحبا و الله سعيد، و الله و لك وحشة يا ريال"
سعيد وقف في مكانه و التفت لوراه و التقى في واحد من أصدقاء أيام الدراسة في الثانوية ، كان ربيعه بخيت ، كانت تجمعهم علاقة قوية في أيام الدراسة و لكنهم انقطعوا بعد ما سافر بخيت يدرس طب في لندن، سعيد ماعرف شو يرد..كان كل تفكيره في شرينا اللي واقفة قدامه..
بخيت" بلاك يا ريال...و بعدين شو السالفة شو كل هالدم عسى ما شر"
سعيد و هو مشغول بشيرينا اللي وقفت بعيد و هي تطالعهم بنظرات كلها خوف و توتر" لا و الله ماشي بس ظرابة بسيطة"
بخيت يضحك و يقوله" بعدك انت ما يزت عن الظرابات و سوالف المدرسة"
سعيد يبتسم ابتسامة فاترة و هو ماله خاطر يرمس بعد ما شاف حبيبة العمر شرّون.
بخيت" يلا زين يوم اتلاقينا، و الله و لك وحشة يا ريال..تعرف انت أول واحد ببشرك"
سعيد ترتسم على ويهه علامات تعجب
و يبتسم بخيت بعد ما شاف علامات الاستغراب على ويه سعيد و يكمل" ترى يبنا الحرمة اليوم المستشفى و أخيرا بتيبلنا بخيت صغيرون"
و يباركله سعيد و هو مرتبك خايف شرينا تروح عنه، و يطالعها و هي قاعدة على كرسي المستشفى و تختلس النظرات و تحاول تتجاهل وجوده بالرغم من ان كل ما في وجهها كان مع سعيد.
سعيد" يلا مبروك يا بخيت ..و يتربى في عزك انشالله"
بخيت " تسلم يا سعيد..و الله ويهك خير عليه...اقول يلا انا اترخص و خلينا على اتصال"
و يمدله كرت عليه أرقام تلفوناتها و ياخذ رقم سعيد.
و قبل ما يروح بخيت ينادي بصوت عالي "يلا يا حرمة"
و يلتفت سعيد للجهة اللي ينادي عليها، و تقوم شرينا من مكانها و تمشي صوبهم، و تمسك ايد بخيت و تروح معاه، و هني تتهدم كل الآمال و كل فرحة اللقا....شرينا كانت حرمة بخيت، شرينا حبيبة قلب سعيد اللي محد يدري عنها كانت في نفس الوقت حرمة ربيعه، شرينا كانت حرمة بخيت الحامل.
في هالحظة يحس سعيد بسكين تطعنه في قلبه بدون رحمة و تطلع منه آهة حزينة هزت كل كيانه ، كانت آهة حزن و آهة يأس..و يقول في خاطره ليش يا ربي التقيت فيها، ليش شفتها بعد ما راحت، ليش انا من دون الناس حظي تعيس ..و لكن أسئلته كانت يتيمة ..مالها أجوبة غير الدموع..
نهيان ربيع سعيد كان واقف بعيد يتابع الموقف و لكنه ما كان يعرف شو السالفة، ما كان ربيع بخيت و ما سبق انه التقى في شرينا و لكنه كان يدري عن مكانتها الكبيرة في قلب سعيد و كيف انها الوحيدة اللي حبها و هجرته.
استغرب نهيان من وقفة سعيد، و لاحظ عليه كيف اتغير لون وجهه، و لاحظ دمعة متجمدة في طرف عينه..
نهيان" سعيد شو بلاك..شو فيك..شي يعورك"
سعيد"......."
نهيان" سعيد رد علي...زاد عليك عوار راسك"
و يسكت سعيد ، و يخلي نهيان حاير و مب لاقي أجوبة لأسئلته، سعيد ما كان في حالة تسمحله انه يرد او يوضح أي شي، سعيد كان يحتاج لأي حد يوضحله اللي صار قدام عينه الحين، كان محتاج لعذر مقنع يبرر هجر حبيبته و زواجها من ربيعه.
و مشا سعيد ويا نهيان و هو ساكت و عيونه تحكي آهات و آلام محد يدري عنها غيره، و دخلوا عند الدكتور اللي داوالهم جروحهم و رخصهم بعد أقل من ساعة و وصاهم بالراحة ، و يركبون سيارة اخو نهيان و يروح كل واحد منهم لبيته و في قلبه أسئلة و أسئلة..بس منو يجاوبها...
..........................
في سيارة بخيت..
بخيت" شرينا ..."
شرينا" هلا"
بخيت" شفتي الريال اللي سلمت عليه"
و يعتفس ويه شرينا" ش ..شو بلاه"
بخيت" لا ماشي ..بس هذا ربيعي سعيد...كان وياي أيام الثانوية"
و ما ترد شرينا..
بخيت" تعرفين ...كنا دوم ويا بعض في المدرسة بس افترقنا يوم سافرت أدرس و هو تم هني يدرس في التقنية...ماشاء الله عليه الحين استوى مهندس "
و تبتسم شرينا ابتسامة باردة و تقول في خاطرها" آآآآآه يا بخيت ..ما في داعي تكمل...أنا أعرف كل شي عن سعيد..أعرف كل شي"...و تسرح شرينا في سعيد و تسترجع ذكرياتها معاه..
شرينا ما كانت ملكة جمال ، كان جمالها بسيط و هادي ، كانت انسانة رقيقة و حساسة لأبعد حدود.. كان كل عالمها وردي ..عالم حب وجمال..شرينا حبت سعيد اللي كان ولد جيرانهم، كان حبها في البداية حب من طرف واحد ..لين ما يا اليوم اللي انتبه فيها ولد الجيران للبنت اللي كل يوم تتعلث بالزراعة عشان تشوفه أول ما يرد من الدوام..أو تتعمد اتي مع أمها لبيتهم في كل الزيارات..و بدا سعيد يحس بشي غريب صوب هذي البنت ...هذا الاحساس الغريب كان الحب ...بدا يتوله عليها و يفكر فيها كل الوقت..سعيد حب البنية اللي رفعت الحب فوق راسها و ما حاولت انها تدنسه باتصالات من ورى الأهل أو بلقاءات مخفية عن الأنظار، كان حبهم تكتبه الرسايل القصيرة اللي تملاها حكايات بريئة و مشاعر رقيقة ما تعدت السلام و ما تطورت لبوح المشاعر، كان حب سعيد و شرينا حب عفيف و بريء، و ضحكت شرينا على رسايلهم و تذكرت أول رسالة وصلتها من سعيد..كانت رسالة قصيرة تقول
" في متاهات الدروب..و عند شطآن الخليج..التقت عيناي صدفة..جنة القلب الجديدة..يا روح البنفسج..اقبلي من فارس الفجر السلام.." ....تمت شرينا تضحك على الطريقة اللي عطاها فيها اول رسالة..كانت توها رادة من المدرسة و هو كان يترياها في سيارته..و اول ما نزلت نزل من سيارته و فر الرسالة عدالها..و تمت هي مستحية و مترددة تشل الرسالة او لا..و مدت ايدها و خذت الرسالة و ركضت لحجرتها مستانسة و فرحتها مثل فرحة طفل عطوه هدية..
كانت هذي أول رسالة من سعيد لشرينا ...شرينا استغربت من كلمات سعيد و ما كانت تتوقع انه رومانسي لهالدرجة..ما كانت تتوقع انه ورا هالقناع الحاد من السكوت و الثقة بالنفس في انسان حساس و رقيق لأبعد الحدود..و ما كانت متخيلة انه في ريّال بمثل طيبة سعيد في هذي الأيام..و سرحت شرينا مرة ثانية و هي تتذكر كيف كانوا يوصلون رسايلهم لبعض...و تذكرت كيف كانوا يحطون الرسايل في الزراعة كل يوم ويا آذان الفجر قبل ماحد ينش من الرقاد.. كان موعدهم الفجر.. في كل يوم رسالة..و في كل يوم كان حبهم يكبر و يكبر..كانت حكايتهم سر محد يعرفه غيرهم ..كانت حكايتهم قمة في الرومانسية اللي ما وصلتها أحلى قصص الغرام..
تموا شرينا و سعيد يكتبون الرسايل في كل يوم بأحلى المشاعر الين ما صارح سعيد شرينا بحبه في وحدة من رسايله، و اعترفلها انه يبي يتزوجها بسنة الله و رسوله..
وافقت شرينا على الزواج و لكنها طلبت من سعيد انه يتريا لين ما تخلص دراستها...
و بدت رسايل شرينا تقل عن ما كانت عليه لين ما انقطعت تماما،في البداية كان سعيد يظن ان السبب هي امتحاناتها لانها كانت في الثانوية العامة..و لكن خلصت الامتحانات و ما وصلته أي رسالة من شرينا.. حاول يسال عليها لكن خوفه على سمعتها منعه و في يوم من الأيام سمع انهم انتقلوا من بيتهم بدون ما يخبرون حد و محد يعرف مكانهم...
رحلت روح البنفسج و خذت باقي قلب سعيد معاها..و دمرته بشكل ما قدر بعده انه يتحمله، رحلت و خلته شبه ميت، انسان ما يفكر غير في نفسه، سعيد فقد الثقة في كل حد غير من صديقه نهيان اللي وقف معاه في محنته و كان الصديق الوفي في وقت الضيقة، و لكن سعيد أصبح عقب رحيل شرينا محطم ، انسان ما همه حد، و كان يتعرف على الوحدة ورى الثانية و يعلقهم فيه و يتركهم..كان بهذا يحاول ينتقم منها و لكنه في الحقيقة كان ينتقم من نفسه....كان يحاول يخفي ضعفه بانه يستقوي على البنات..
سعيد عمره ما عرف شو السبب اللي خلا شرينا تبتعد عنه ..و شرينا ما حاولت انها تبين له أسباب خروجها المفاجئ من حياته ..و فضلت انها ترحل بصمت و تحتفظ بسرها لوحدها...
و تنزل دمعة حارة على خد شيرينا حرقت خدها و قلبها على ماضي كان شبه مدفون و لكنه طلع للحياة اليوم، و تمسح هالدمعة بسرعة قبل ما يلاحظها بخيت، بخيت كان ريلها اللي يحبها ، الريال الطيب اللي عمرها ما راح تنساله طيبته وياها..و لا تفكر انها تخونه حتى ولو كانت الخيانة باسترجاع ذكريات قديمة
........................
في بيت مهرة..

دخلت مهرة بيتهم و هي متوترة و خايفة على ربيعتها مريم..و أول ما وصلت دخلت حجرتها دقت لمريوم.. بس تلفونها كان مغلق..و جربت تكلمها على تلفون بيتهم..
مهرة" السلام عليكمّ"
حصة حرمة سلطان اخو مريم" هلا و عليكم السلام"
مهرة" هني مريم ؟"
حصة" هيه موجودة منو اقولها"
مهرة " قوليلها مهرة"
حصة" هلا مهرووه..شحالج..ما عرفتيني..انا حصة"
مهرة " هلا حصة ..شحالج شخبارج"
حصة" و الله تمام..اقوول..شو سالفة مريومة..و ليش جي تعبانة"
مهرة و هي مرتبكة.." ما شي بس تعبت..الدكتور قال فيها ضعف"
حصة بخبث :"هييييييه..و انتوا وين كنتوا يوم طاحت"
مهرة تلعوزت و ما عرفت شو تقول..خافت انه سعيد يكون خبر حصة عن السالفة" والله كنا مروحين من ابوظبي مول..نزين اقول وين مريوم اباها ضروري"
حصة " اهااا..وايت بسير ازقرلج ياها"
و تسرح مهرة..تخاف انه حصة تعرف عن السالفة..بس تقول في خاطرها متى لحق يخبرها..و تقطع مريوم عليها حبل أفكارها.." هلا مهروو..شو السالفة..شي مستوي"
مهرة" لا ما شي ..بس حبيت اطمن عليج و بعدين ليش تلفونج مغلق"
مريم " و الله ياختي انا زايغة و اخاف سعيد يخبر حد من اخواني او ابويه و اروح فيها"
مهرة " انزين انتي ما سويتي شي غلط ..."
مريم" نزين هو شو دراه...هو شافني و انا مب حاطة غشوة و متعدلة بعد"
و تسكت مهرة و تقول في خاطرها.." صدقها و الله..أي حد بيشوفها جي بيتحراها هي الغلطانة"
مريم" اسمعي انا الحين مب متفيجة ارمس..بخليج بسير ايلس ويا العقربة اللي عندنا.."
مهرة" هييه صح على طاريها..ترى تمت تسأل وين كنتوا و شو استوى و مادري شو"
مريم" اوهووو..الحين مب ناقص الا انه سعيد يخبرها عشان ترش فلفل على السالفة و تطلع هي شريفة مكة"
مهرة " لا تقولين جيه..الله يستر"
مريم " الله يستر"
و تسكر مريم عن مهرة و يتمون على نار مب عارفين اذا سعيد خبر حد او لاء..

يتبع لاحقا

اكمل بارك الله فيك

و ين التكملة................. :17:

الجزء الرابع

في مقهى ليالي زمان..

نهيان" آآآآآآآآآخ يالقهر..الحين هذا اللي ما يسوى سعيد يمد ايده علي انا..انا نهيان..بس ماعليه..انا ا راوييه ..ان ما هزأته و خليت اللي ما يسوى يظحك عليه ماكون انا نهيان السويدي"
حمدان" هدي اعصاب يا ريال..ما يسوى عليك..خلاص خلصت السالفة..و بعدين الصراحة.."
نهيان" شو ..شو تبى تقول انت بعد..شو الصراحة"
حمدان يقول و هو متردد..حاس انه نهيان بيسويبه شي اذا رمس " الصراحة يا نهيان انت اللي غلطت و سعيد عنده حق"
نهيان و الشرار يبق من عيونه" انت شو تخربط..أي حق اللي عنده..لو هو ريال و يخاف على هله ما كان خلاهم يحاوطن جي رواحهن في المولات..اونه عنده حق..ماعندك سالفة ياخي تدافع عنه"
حمدان" بس.."
نهيان" لا تم تبسبسلي..انا لازم اردله ياها...لازم"
و يسكت حمدان و هو يعرف انه غرور نهيان و حقده مستحيل انه يبدله لو تم يرمس معاه لين ما يتعب ..
نهيان يقول في خاطره.."بس الصراحة تستاهل نظارب عشانها..محلاتها تجنن..بس آآه يالقهر..مادري من وين ظهرلي سعيد هذا..لو ما رز في السالفة جان الحين انا يالس اتريا اتصال من ام العيون الحلوة..آآآه بس لو اعرف اسمها"..و يسرح نهيان و هو يفكر في مريم و جمالها و يملاه كل النوايا الخبيثة انه ينتقم من سعيد..
...................

في بيت سعيد..

يدخل سعيد حجرته و يركض صوب طاولة صغيرة ما تتبطل غير بمفتاح و يظهر المفتاح اللي يحتفظ فيه دوم في بوكه و يفتح السدة..و يتم يطالع اللي في السدة و هو كله حزن..كانت رسايل روح البنفسج..شرينا..كان محتفظ فيهن كلهن على امل انه في يوم من الأيام بيلتقي فيها مرة ثانية..كان عنده أمل انها ترجعله..و يردلها رسايلها ...و تنزل دمعة حزينة على خده تذكره بماضيه الحلو و اللي انتهى مع شرينا..و يسترجع شريط الأحداث اللي شافه في المستشفى...و كل ما يتذكر انها متزوجة من ربيعه و حامل منه بعد يوقف شعر جسمه..و يصرخ بصمت وهو يحاول يمحي هالصورة من باله..يحاول يمحي صورة ايدها و هي تحضن ايد بخيت....
يمد سعيد ايده و يحضن الرسايل بحناان ...فيهن ريحتها..ريحة عطرها.."ليش يا ربي خلتني..ليش..كل هذي الرسايل كذب...معقولة كل هذي الفترة كانت تقص علي و انا كنت مغفل..لا مستحيل شرينا تكون جي..بس ماشي تفسير ثاني..انا كنت غبي..غبي غبي...و يفر الرسايل في السدة و ينسدح على الشبرية و يفتح الرادو عشان يشغل عمره..و يسمع..."اكذبت..العيون العيون و الموعد وهم..ألم...كل ساعة و كل لحظة..فيييين عيون حبتني و منتني و قالتلي نعم" و يبدأ بنوبة بكاء صامتة و دموع مالها نهاية الين ما ينام من التعب و كثر البكاء...

................

في بيت مريم..

مرت 3 أيام على الضرابة و مريم ما تظهر من البيت و ما تكلم حد حتى مهرووه، مريم ما كانت خايفة من العقاب..بس كان كل خوفها ان سعيد ياخذ فكرة غلط عنها ..و فجأة اتي فكرة في بالها عشان تصلح فيها الموقف..و تقرر تتصل في مهروو عشان تاخذ رايها..
مريم"الوو.."
مهرووو" تو الناس..وييينج"
مريم" و الله سوري يا مهروو بس تدرين كنت شوي زايغة من هذيج السالفة"
مهروو" ليش سعيد خبر حد من اخوانج..شي استوى..خبريني يلا بسرعة"
مريم" لا لا تخافين..ما خبر حد..اصلا حتى لو خبر حد انا ما سويت شي غلط..بس انا اخاف انه ياخذ فكرة مب اوكي عني"
مهرة"انزين و انتي شو كان بيدج"
مريم" مادري..بس انا في خاطري اني اوضحله الموقف"
مهرة و هي مستغربة"و شو بتسوين يعني"
مريم " مادري..بس انا يا في بالي..يعني انه.."
مهرة " ها شو قولي يا ام الافكار"
مريم" قلت انه احسن اخبر اخته لطوف السالفة و اخليها تكلمه..شو رايج"
مهرة" ظنج..."
مريم" و الله انا محتارة يا مهرووه..فديته سعيد انتي ما تدرين شكثر اموت فييه و مابا هالموقف يتم في باله.."
مهرة" ياويلي على اللي يحبووون..متى الله يرزقنا بس..متى"
و يضحكون الثنتين و يظهرون من الجو الكئيب اللي كانوا عايشينه في آخر ثلاث ايام"
مهرة" انزين خلاص عيل..انتي كلمي لطيفة و شوفي شو بترد عليج..بس اتحملي الرمسة توصل حق حصة حرمة اخوج سلطان"
مريووم "لا لا..انا بحلفها قبل ما خبرها..و بعدين لطوف مب من النوع اللي يرمس..مب شراة اختها الحشرة.."
مهرة"ههههههه..الله يغربل سوالفج..انزين اقول...ما بتسيرين وياي ابوظبي مول..ترى من سبتج فريت الاجياس في المول و تميت ارابع في المول شراة الخبلة"
مريم"هههههههه...لا ابوظبي مول ولا غيره..انا بلبس من اللبس اللي يابتلي ياه اليازي حرمة اخوي صلوح من لبنان..و انتي دوريلج حد يسير وياج المول"
مهرة" صدق انج خاينة..ما عليه انا براويج"..و يضحكون الثنتين و يسكرون عن بعض..و تسير مريوم الصالة..و هناك تلقى اخوانها محمد العود ويا حرمته سلامة..صالح ويا حرمته اليازي..و امها و ابوها و اختها الصغيرة شموس"
شمسة" مريوووم وين مفتاح الميلس..ابا اسير العب بلاي ستيشن .."
مريوم "حشى مب بنية ولد..انتي شو سالفتج على هالبلاي ستيشن..24 ساعة مطيحة عليها..يلا سيري ما عرف وين المفتاح"
شمسة و هي تتصنع الدموع"امايه شوفي مريووم..مب طايعة تعطيني المفتاح"
ام محمد"مريوم فديتج عشان خاطري عطيها المفتاح"
مريوم" بس يامي.."
ام محمد" انا قلت عشان خاطري..يعني مالي خاطر عندج"
و تصخ مريوم و يجفط ويها.."دووج..اذلفي يلا.."
و تسير شموس الميلس و هي متشججة..
و يبدا محمد بسوالفه كالعادة"شو فيج طايحة على شموس..خليها تلعب..ولا انتي تبين تلعبين من ورانا"
مريوم"انت ما تيووز..شو ابا في اللعبة..انا عندي لاب توب اسوي فيه اللي اباه.."
و يدخل صالح"ياخوفي انا من هاللاب توب..نتحراه نعمة و يغدي نقمة"
و تقوم مريوم و ما عيبتها الرمسة..صالح كان دوم شكاك..و دوم حاط نجره من نجر مريوم..و هو اللي كان يحرض ابوها عشان يوزها من ولد عمها خلف...
محمد" انت شوفيك عليها..يعني انت مب واثق في اختك..كل شوي فريت عليها كلام"
صالح"والله انا خايف على اختي و اعرف شو السوالف اللي اتيي من النت و هالخرابيط.."
محمد يقطع عليه كلامه و يقوله" اسمعني يا صلوح..اذا انت مب واثق في تربية اختك بتكون مب واثق في تربيتك لأن اللي ربوك هم نفسهم اللي ربوها..لو سمحت مالك شغل فيها.."
هذي الرمسة كلها و ابو محمد ساكت و يتسمع عياله الاثنين شو يقولون..و آخر شي قالهم" اسمعوني انتوا الاثنين..ما يخصكم في بنتي..تتظاربون عتربيتها و انا حي بعدني ما مت...صدق انكم ما تستحون.." و يقوم ابو محمد و يسير حجرته و تلحقه ام محمد ...
ام محمد" هدي اعصابك يا علي..ما يسوى عليك..هاييله ما يعرفون شو يقولون..و مريم ماشالله عليها الله مكملنها بعقلها"
ابو محمد" ماشفتي كيف يتناجرون عليها جدامي..ما عندهم حيا..حسبي الله و نعم الوكيل عليهم من عيال.."
ام محمد" صالح بس خايف على اخته..و يبالها الستر..و الصراحة البنية كبرت و صارت عروس.."
ابو محمد" صدقج والله..بس يا وديمة اخويه محمد لين الحين ما فتح سالفة العرس وياي سالفة خلف"
ام محمد" نزين مب لازم ياخذها خلف...و بعدين انت ما تدري عن خلف كيف صايع و كل شوي مطيح ابوه في المستشفى"
ابو محمد"كيف يعني..اعطي بنتي للاغراب..و بعدين الولد مصيره يصطلب عقب العرس.."
ام محمد" يصير خير..و عسى ان تكرهوا شيئا و هو خير لكم"
.
.
.
في بيت سيف بن عيلان..

مهرة كانت يالسة في الصالة بروحها كالعادة...و يدخل عليها ابوها ..

مهرة " هلا والله ابويه...هلا باحلى اب في الدنيا"
ابو مهرة"هلا والله ببنتي..هلا بشيخة البنات"
مهرة" شحالك ابويه..وينك ماشوفك من ايام"
ابو مهرة"يا بنتي الشغل..الشغل ما يخلص"
مهرة" انزين يابوية انت ليش متعب عمرك...فلوس الله عاطنه خير يعيشنا العمر كله..حرام عليك ابويه صحتك.."
ابو مهرة و هو يبتسم لبنته الوحيدة" يا بنتي و منو بيشوف كل هالاملاك..هالخير كله بيكون لج يا بنتي بعد ما.."
و تقطع عليه مهرة الكلام و تقول" لا تكمل يابوية...فال الله ولا فالك..الله يعطيك طولة العمر ابوية..يعلني فداك.."
ابو مهرة"كح كح كح كح...."
مهرة و هي خايفة" ابوية شو فيك...شو يعورك ..ابوية رد علي"
ابو مهرة" لا تخافين يا بنتي ...هذي بس كحة..انا شيبة الحين و لازم بتيني الكحة"
مهرة" ابوية ليش ما تاخذ اجازة و نسافر ويا بعض"
ابو مهرة"ههههه...هاللي يبون يشردون عن الجامعة..انتي هب جنه دوامج باجر.."
مهرة"اووف لا تذكرني..لازم انش باجر من الساعة 7"
و يضحكون الاثنين و يسير ابو مهرة لمكتبه يكمل شغله..و يترك مهرة وحيدة مثل ما كانت دووم...


تاخذ مريم قرار نهائي انها تتصل في لطيفة بنت خالها و تخبرها كل السالفة عشان توضح لسعيد الموقف...و تتشجع و تشل سماعة التلفون و تدق الرقم
مريم"الوو.."
..."الووو"
مريم" السلام عليكم"
....."عليكم السلام و الرحمة"
ترتبك مريم...كان الصوت اللي رد عليها صوت رجالي...كان صوت ...سعيد
مريم"منووو..منو معاية.."
سعيد" انتي منو بغيتي اختي"
مريم" انا ..انا مريم بنت علي..ما عرفتني يا سعيد.."
و هني يسكت سعيد و يتذكر السالفة...و يقول في خاطره..." الحين انا شو خلاني ارد على التلفون..الحين بتفتحلي سالفة"
مريم" الووو"
سعيد" هلا مريم..لحظة بزقرلج لطيفة.." و يزعج...لطوّووف
مريم" لحظة لحظة...وايت ابا اقول شي"
يتافف سعيد" اتفضلي..خير"
مريم" سعيد انا..كنت ابا اقولك عن السالفة اللي استوت من كم يوم...يا سعيد.."
سعيد"مريم ..مافي داعي تقولين شي...السالفة انتهت و انا ماخبرت حد عشان ما تدخلين في مشاكل ويا اخوانج..و خاصة اخوانج صلوح و جاسم لو دروا.."
مريم" انزين يا سعيد انا..."
سعيد" انتي شو...خلاص انسي السالفة ...و احمدي ربج انها يت عندي مب عند غيري.."
مريم" نزين خلني اشرحلك.."
سعيد" شو تشرحين..اقولج السالفة انتهت..انتي ما تفهمين..." ويفر السماعة و يخلي مريم منصدمة على الجهة الثانية من الخط....نزلت دموع مريم مثل النهر على ويها..معقولة سعيد يكون جي...لهالدرجة يكرهني...ليش يا ربي...نزين ليش ما يسمعني..و تم تصيح و تصيح...وتركض لحجرتها و تقفل عليها الباب
مريم ما كانت تهم سعيد في أي شي...كانت بالنسبة له مجرد بنت عمته..لا اكثر ولا اقل...سعيد ما كان يعرف باللي في قلب مريم..و ما كان يدري بالحب اللي يخفيه قلبها الصغير..مسكينة مريم..الرد الجاف خلاها في حالة نفسية ما يعرف فيها غير الله..و تمت تصيح و تصيح على حبها اللي اليوم اتأكدلها انه حب من طرف واحد..حب يتيم..

******

اترقبوا الجزء الخامس .....

م ن ق و ل

[QUOTE][/QUOTE] مشكوووووووور .

يا خوفي :p

لا تكون زي انت لي

عموما تسلم ايدك :) موضوعاتك كلها رائعه

وربنا يستر في النهايه :33:

يعطيك العافيه

mahk0098
العفو وأشكرك على المرور


onyx2020
لا مش زي أنت لي أحلى منها :09:
مشكوره أختي على المرور العطر الله لايحرمني منه

Valeryana
الله يعافيك مشكوره على المرور

السلام عليكم :)

الجزء الخامس

الساعة اربع الفجر...اليوم اول يوم دوام في الجامعة...يرن تلفون مهرة...و تسويله طاف...و يتم يرن يرن
مهرة" اوووووووووووووف...منو هالسخيف اللي يدج الحين..ما يدري عندنا دوامات"
و تقوم من شبريتها و التلفون بعده يرن و تطالع الرقم...غريبة هذي مريووم..
مهرة" الوو"
مريووم " ........."
مهرة ما كانت تسمع شي من كلام مريم غير الصياح..
مهرة" ردي علي ...ليش تصيحين...شو فيج.."
مريم تصيح و يزيد صياحها كل ما تسالها مهروو
مهرة" مريووم طيحتي قلبي ...شو السافلة"
مريوم اخيرا تتكلم و صوتها رايح من كثر الصياح" يكرهني يا مهروو...يكرهني"
مهرة" منو اللي يكرهج...شو السالفة.."
مريوم" سعيد حبيبي يكرهني"
مهرة تقول في خاطرها...استغفر الله ...من وين طلعلنا هذا سعيد انا مادري..
مهرة" انزين انتي منو قالج انه يكرهج..."
مريوم" من رمسته يا مهرووه من رمسته" و ترد مريوم لنوبة صياحها الهستيرية
مهرة" مريوم اسمعي..الحين الساعة اربع الفجر..استهدي بالله و سيري اغسلي ويهج و اتمسحي و صلي...و باجر نتفاهم.."
مريم" على شو نتفاهم...اقولج يكرهني"
مهرة" انزين اسمعيني..عشان خاطري لا تصيحين..و الله عورتيلي قلبي...مريومة بلييز..فديتج لو لي غلا عندج لا تصيحين..."
مريم" ...."
مهرة" اسمعيني..انتي الحين سيري سوي اللي قلتلج عليه و ارقدي,,و باجر انشالله في الجامعة نتفاهم..اوكي.."
مريم" اوكي"
مهرة"يلا الحين بخليج...بس دخيلج مب اسكر عنج تسيرين تكملين صياحج..."
مريم " انشالله"
و تسكر مريم عن مهرة و تسير تسوي اللي قالتلها عنه اعز ربيعاتها ,,,و اول ما تخلص صلاة تحس براحة و انها تبي ترقد...و تنسدح على شبريتها و ترقد مثل الاطفال..
مهرة اتم على عكس مريووم..." شو سالفتها هاي..منو قالها انه يكرهها...ليكون شك فيها...السالفة فيها ان...انزين كيف يعني جيييه..اووووه...الله يسامحج يا مريوم..الحين ما بيني رقاد و انا افكر..."
و تم مهروو سهرانة لين الصبح و هي تفكر في سعيد اللي تحبه ربيعتها مريوم..و تقول في خاطرها كيف ربيعتها تحب واحد مو معبرنها جي...و تم تسأل عمرها عن اللي استوى لمريووم و خلاها منهارة بهالشكل..بس كل الاسئلة مالها اجوبة غير عند مريم ..."


ثاني يوم الصبح تقوم مهروة من شبريتها و راسها يعورها من قلة الرقاد...و تسير تتلبس و تتعدل..اليوم اول يوم في الجامعة...الحين هي و مريووم ثاني سنة في جامعة زايد..مهرة و مريوم كانوا في مدارس خاصة و عشان جي كانوا يعتبرون الحين من طالبات التخصص..قرروا انهم يدخلون نظم المعلومات..
تنزل مهرو غرفة الطعام
مهرة" marry…where is my breakfast..?
marry: sorry miss. It will be ready in a minuet
مهرة: اوكي اوكي..يلا كويكلي
و تسير ماري ...و يوم ترد وياها الريوق تسالها مهرة عن ابوها..و تقولها ماري انه لين الحين راقد و قال انه يبا يقوم الساعة 8 عشان يسير الدوام..
و تطالع مهرة الساعة و تلقاها 7و نص..و اول محاضرة عندها الساعة 9وعشر دقايق...كانت تفكر انها اتم عشان توعي ابوها بس تذكرت انها لازم تتلاقى ويا مريوم عشان تعرف منها شو السالفة..
و تسير مهرووة الجامعة ويا الدريول و الخدامة...
يوم تدخل مهرة الجامعة تلقى فطوم ربيعتها..فطوم كانت وياها العام القبلي في كل كلاساتها تقريبا..
فطوم"هلا مهروو..شحالج يالقاطعة.."
مهروو ببرود" بخير شحالج انتي"
فطوم " و الله تمااام...الحين أي تخصص قررتي"
مهروو" نظم معلومات...اقول ما شفتي مريومة"
فطوم"لا والله ما شفتها.."
مهرة" عيل يلا بخليج بسير اطالعها"
مهرة ما كانت تداني فطوم..فطوم كانت بالرغم من انها تسولف و تظحك انسانة غيارة و حقودة..كانت تحسد مهرووة و مريوم على العز اللي هم فيه..و دايما تطالع شو يلبسن و شو سون..جنه محد في الجامعة غيرهن..
و تسير مهروو واحد من الحمامات و تدق لمريووم..
مهرة" الوو..ها وينج انا ياية من وقت عشانج.."
مريم و صوتها كله رقاد"هاا..وين تترييني..انا راقدة"
مهرة" هااا..يالسخيفة الحين انا ما رقدت طول الليل احاتيج و ييت من وقت بس عشان سواد عيونج و آخر شي تقولين لي راقدة"
مريم" اوهوو..يلا يلا..اتريي نص ساعة و بييج..."
مهرة" أي نص ساعة ربع ساعة يكفيج"
مريم" يعني اييج بالبجامة"
مهرة" ما يخصني..انا عندي كلاس الساعة 9 و ابا اعرف شو السالفة...بموت و اعرف شو استوى"
مريم" انزيين يلا يلا..الحين اتلبس و اييج.."
بعد ثلث ساعة تقريبا تدخل مريم الكلاس اللي تعودت تيلس فيه ويا مهروو و تلقى مهروو ياسة تسمع أغاني..
مهرة"هلا والله..صباح الخير بالصياحة"
مريم يعتفس ويهها و توقف دمعة على طرف عيونها..
مهرة" اوه اوه اوه..شكلها السالفة جد...مريوم شو استوى"
و ترتمي مريوم في حضن مهروو و تقولها السالفة و كيف رد عليها سعيد ببرود و باحتقار..تسكت مهروو..ما تعرف شو تقول حق ربيعتها..ما كانت تقدر تواسيها..مهرة ما كانت تعرف شو معني كلمة حب..و لا تعرف شو معنى الفراق..او انه الحب يكون من طرف واحد و الطرف الثاني بارد و ميت....و خلت ربيعتها تصيح و تصييح لين ما تعبت..و آخر شي قالته.."خلاص يا مريووم انسييه..لي ما يباك لا تصيح تبغييه..ما يسوى عليج...و بعدين الف من يتمناج ...لا تزعلين عمرج.."
و تسكت مريم و هي ما عندها رد لكلام ربيعتها اللي كله كان صحيح..بس شو تسوي بقلبها اللي حب سعيد لحد الجنون..كيف تتخلى عن هذا الحب بهالسهولة...كيف..
و تسير مريوم و مهروو واحد من الحمامات و تغسل مريم ويهها و تحاول انها تكمل اول يوم دوام لى خير..و تسير ويا ربيعتها مهرة الكلاسات اللي عليهم...

في بيت حمد بن سالم...
ام سعيد تدق باب حجرة سعيد" يلا قوم يا وليدي..يلا عليك دوام..استوت الساعة 9 و انت بعدك ما نشيت..سعيد..سعيد..يلا عاد قوم"
سعيد" هاااا..هااااا...طفرتوني تراكم..ابا ارقد انا"
ام سعيد" قم يلا...بطل الباب اشووف...انا مدري شو مستوي فيك...كل يوم يالس في هالحجرة و صاك علىعمرك الباب...يلا قووم الدوام بيحسبونك غياب.."
و يقوم سعيد و هو يتأفف...و يبطل الباب...
ام سعيد" الله يهديك يا ولدي...الله يشيل الهم اللي في صدرك..يلا قوم اتسبح و صل الصبح و سير دوامك زين"
سعيد يحب راس امه"انشالله امايه.."
يتسبح سعيد و يلبس كندورته و السفرة و قبل ما ينزل تدق عليه الخدامة الباب..
شاندرا" بابا سعيد...بطل باب شويه..انا يريد يقول حق انته شي.."
سعيد يبطل الباب" ها شو عندج انتي بعد شاندروه,,,"
شاندرا" بابا انا قبل كم يوم سوي غسل كندورة مال انته و يلقى ورقة هذا داخل..." و تمد له ورقة صغيرة..و اول ما يقراها يلقى ارقام بخيت..بخيت ريل شرينا..سعيد نسى سالفة انه خذا رقمه من عنده..
سعيد" انزين يلا انتي سيري خلاص"
و يتم سعيد سرحان في هالورقة..و يقول في خاطره..مستحيل اتصل..مستحيل..كرامتي ما تسمحلي..لأ لأ...انا لازم انساها نفس ما هي نستني...و يشل الورقة و يفرها في الزبالة..و يقطع آخر وسيلة كان ممكن توصله لشرينا..و يظهر بسرعة من الحجرة جنه شارد من شي..شارد من الماضي و آلامه ...كان شارد من شرينا..
.
.
.
.
يسير سعيد الدوام متأخر..و يوم يوصل هناك يلقى المدير سأل عنه ولافوق خمس مرات..و يدخل عند المدير..
المدير سمير" وينك يا بشمهندس سعيد...شو حصل متأخر.."
سعيد"اسمحلنا يا استاذ سمير بس ظروف"
المدير" بس تأخيرك زاد في آخر فترة يا سعيد..انا رايي انك تنظم اوقاتك بين ظروفك و شغلك...لانه الشغل مسؤولية و ما بيتحمل أي ظروف.."
و يسكت سعيد و هو خلاص متفتف على المدير اللي يتفلسف عليه..و يغيظ لأنه يعرف انه الاستاذ سمير عند حق..
و يبدى المدير يناقشه في مشروع يديد للشركة اللي كان سعيد واحد من أكفأ المهندسين و أصغرهم سنا فيها..و يقطع حديث عملهم صوت رنة تلفون سعيد..و لكن سعيد يشوف الرقم غريب فيسويله طاف و يقول انه بيتصله عقب..."
يوم يظهر سعيد من مكتب المدير يتذكر الرقم الغريب اللي ياه..و يقرر يتصل..
سعيد"الوو..منو المتصل"
....."الوو...سعيد...افا يا ريال...و انا اللي قلت ربيعي و بيتصل فيني عقب الغيبة.."
سعيد" عفوا اخوي ما عرفتك.."
....." انا بخيت يا ريااال..بخيت صديق ايام المدرسة..."
..
.

...........................

انتظروا الاحداث القادمة...لأن الحين بدت القصة صدق

م ن ق و ل

حد السيف !! ليه متى بتعلقنا ؟؟

pllllzzz لاتسويلنا مثل انت لي

ويعطيك ألف عافيه

Valeryana
ولا يهمك علشانك اليوم ثلاث حلقات وش تبي بعد :)
أهم شي لا تحرمينا من طلاتك
السلام عليكم :)

الجزء السادس



بخيت" الو سعيد..ويينك..شو ما تسمعني عدل"
سعيد"هاا..لا لا بس سرحت شوي.."
بخيت" انزين شحالك يا رياال..علومك..وين دارك"
سعيد" و الله العلوم طيبة الحمدلله..انا ياخي في بوظبي"
بخيت" الحين ها اللي اونه بيتصل و مادري شو..وين الصداقة وين..ولا خلاص خلصت المدرسة و رباعتنا انتهت وياها"
سعيد" افا عليك يا ريال..من قال جي..بس ياخي انشغلت شوي ويا الدوام و جي" و يقول سعيد في خاطره لو تدري يا اخوي شو السالفة جان ما قربت صوبي..ليش دقيتلي ليش..
بخيت" هييه..انزين ياخي نبى نظهر وياك..تعرف توني قبل شهر راد من لندن و عرست و جي و الربع مادري وينهم ما عرف ارقامهم..انا يوم شفتك في المستشفى قلت زين في حد من ربعي"
سعيد" فالك طيب..انت تامر يالخوي..انشالله نتلاقى و نظهر ويا بعض شرات اول.."
بخيت" ههههه..وين شرات اول..الحين خلاص كبرنا و عقلنا...ياخي العرس يلجم"
و يسكت سعيد يوم يطري العرس..آآآه يا بخيت لو تدري..عروسك كانت في يوم من الايام بتستوي عروسي..حرمتك هي حبيبة قلبي..
بخيت" الوووووووو..انت شو فيك كل شوي تسرح..من ساعة اكلمك"
سعيد " و الله سوري..نزين وين تبا نتلاقى.."
بخيت" انت اختار..انا ماعرف وايد في البلاد...ياخي خمس سنين ساير و رديت كل شي متغير.."
سعيد" خلاص ما عليه..شو رايك نتلاقا عند حامد سنتر..اعتقد تعرفه...هذا من الآثار عندنا.."
بخيت"ههههههههه.. اكيد اعرفه.."
سعيد"خلاص عيل..نتلاقا عند الباب و و توقف سيارتك و نسير بسيارتي نتكشت.."
بخيت" تم..الساعة ثمان بكون عند الباب"
سعيد" اوكي حبوب..خلاص انا الحين بخليك لاني في الدوام..و انشالله عالثمان بكون هناك"
بخيت"فمان الله"
سعيد" الله يحفظك"
و يسكر سعيد عن بخيت و يفكر في ربيعه اللي كان اقرب انسان له ايام المدرسة و كيف انقطع عنه يوم سافر يدرس طب و كيف انه هو من دون الناس ياخذ حبيبة قلبه شرينا..و يقول بصوت كله حزن و قهر"سبحان الله..لي ما
بعد صلاة العصر كان سعيد يالس ويا ابوه و امه و اخته لطيفة..
لطيفة"ياخي انت شو فيك كله مبوز...و الله حالة...طول الوقت قاعد سرحان و مادري كيف..ليكون تحب"
سعيد" جب جب...انتي ما يخصج..و بعدين ابوز ولا ما ابوز مشكلتي"
ابو سعيد" جب يجبكم انتوا الاثنين..حشموني قاعد وياكم..ابوكم انا ولا البشكار ما تحترموني"
سعيد" محشوم يابوية..ما عاش لي ما يحترمك..بس عاد شوف بنتك تتدخل في كل شي.."
لطيفة" يعني انا منو اكلم..طول الوقت بروحي و خواتي محد في بيوت ريايلهم..انا شو اسوي"
ام سعيد" كلميني انا امج..و لا ما انفع.."
لطيفة"افا يا ام سعيد..انتي الزين كله ...من قال جي..بس بعد يعني الواحد لازم يغير.."
ام سعيد" انزين انزين اسكتي يا ام لسان و خلي اخوج في حاله"
لطيفة"اوهوو..كله تسكتوني..ما عليه انا بخليلكم المكان بكبره و بسير حجرتيه"
سعيد" يكون احسن بعد.."
و تقوم لطيفة عنهم و تسير حجرتها و يتم سعيد و امه و ابوه بروحهم، لطيفة كانت تحس بالملل و الوحدة لان خواتها الكبار حصة و نورة كانن معرسات و ما عندها غير اختها الصغيرة أمون اللي كانت اكبر من شمسة بنت عمتها بسنة.
ام سعيد" سعيد..الا صدق انت شو فيك..كله ضايق..شو مكدرنك.."
سعيد"ماشي يا امي و الله ماشي..بس جي ملان.."
ابو سعيد" انزين ليش ما تظهر من البيت..قبل كله تظهر ويا ها ربيعك شو اسمه..ولد فرج المنصوري"
سعيد"هيه نهيان..انشالله عقب بتلاقا وياه عقب صلاة المغرب.."
و يسكتون كلهم و يتذكر سعيد سالفة بخيت اللي بيتلاقا وياه الساعة ثمان..
سعيد" تحيد ابويه بخيت ربيعي ولد عمي خلفان.."
ابو سعيد" هييه بخيت..شو بلاه...اب جنه سار لندن مادري امريكا يدرس.."
سعيد" هيه سافر لندن..التقيت وياه قبل اسبوع و انشالله اليوم بتلاقا وياه.."
ابو سعيد" ماشالله عليه..ريال و النعم.."
سعيد" عرس الحين و حرمته حامل"
ام سعيد" والله..منو خذا"
سعيد و هو مرتبك.." خذا بنت عوض اللي كانوا جيرانا..الا هم وين ساروا الحين"
ام سعيد و هي منصدمة"هااا..ماشالله شرينا عرست..ماشالله عليها..بس مادري شو ياهم بيت عوض هجوا من الفريج و محد يدري عنهم وين ساروا و ليش"
و يتحبط سعيد و كان عنده امل انه امه تعرف عن السالفة و بتعطيه سبب مقنع لزواج شرينا..و يشل بعمره و يسير حجرته و يرقد عشان ينسى..


الساعة ثمان يسير سعيد عند حامد سنتر و يلقى بخيت واقف عند الباب يترياه..و ينزل الجامة و يأشرله يركب وياه..و يركب بخيت..
بخيت"حيه الاستيشن..عجييب.."
سعيد"هههه..ياخي ملعوزني والله..كل شوي في الوكالة و تشييك.."
بخيت" بس ياخي رهييب..شو مزودنه"
سعيد" اكيد طال عمرك..كيف عيل عوافي ما بترضى.."
بخيت" يا خطير...عيل يبالنا سيرة وياك عوافي.."
سعيد" اكييد ..فالك طيب..انزين اقول شو رايك نسير مارينا مول..في كافيه وايد رهيب هناك"
بخيت " لا ياخي غير...خلنا نسير مكان ثاني..طفرت من هالمول عكثر ما ودوني ياه الاهل"
و يتغير ويه سعيد..اكيد قصده بالاهل شرينا..يا حيك يا بخيت..يا حيك..
بخيت" نزين وين مكان ثاني نسيرله.."
سعيد"شو رايك نسير ميلس ربيعي نهيان..بعرفك عليه...و الله فنان..و هناك بعد الشباب بتتعرف عليهم.."
بخيت"يلا عيل ودنا خلنا نوسع دايرة معارفنا.."
و يسيرون ميلس نهيان..

مهرة قاعدة في حجرتها و حاطة اغاني من اللاب توب مالها و هي متضايقة و ملانة..تفكر في ربيعتها مريوم و اللي صار لها و هي تشوف الأغاني لقت اغنية ما عليها اسم المطرب او الاغنية و قالت خلني اشوف شو هي و اول ما حطتها سمعت راشد الماجد يغني"امي يا اول حب عشته في دنياي...يا اول اسم تنطق شفاي طاريه..انتي هوى روحي و بعروقي الماي..عمري بدونك عمر ما عشت انا فيه.."
و ينقبض قلبها و تسكر الاغنية علطول...و ما تحس بدمعة نزلت على خدها...جنها الحين استوعبت انها وحييدة بدون ام..بدون الصدر الحنون اللي يقعد معاها و يسولف وياها او يهتم فيها..و هني تمت تصيح و تصيح..كانت تقول في خاطرها شو فايدة كل هذا العز و المال و انا ماعندي اللي اباه...نزين لو بس اعرف شو السبب..و ليش ما تسأل عني..مب انا بنتها..ما تتوله علي شرات ما انا اتوله عليها..ما تحب تشوفني يوم اني كبرت...يا ربي انا ما اتذكر أي شي عنها..ما اتذكر غير صورة مب واضحة عنها يوم نحن في المستشفى..و يا ليت بعد اتذكرها عدل..انا لازم اسأل ابويه عن امايه.."و تقوم و تمسح دموعها و تنزل الصالة تدور على ابوها و ما تلقاه..و تسير تطالعه في مكتبه و تلقاه قاعد يشتغل..
مهرة"السلام عليك ابويه"
ابو مهرة" هلا بنتي..و عليج السلام و الرحمة"
مهرة" ابوية بغيتك في سالفة"
ابو مهرة" خير يا بنتي...ناقصنج فلوس..اتريي بظهرلج من التجوري"
مهرة" لا لا ابوية..مابا فلوس عندي.."
ابو مهرة يستغرب و يهد الاوراق اللي في ايده و يعدل جلسته و هو يترياها تقول السالفة..
مهرة" ابويه انا بغيت اكلمك عن..."
ابو مهرة" ها يا بنتي ..خير..عن شو"
مهرة" عن امي..ابويه وين امي..ليش ما تسأل عني...منو هي.."
و ينقلب ويه ابو مهرة و يعصب.." يا مهرة انا كم مرة قلتلج ما تطرين امج قدامي...قلتلج صكي موضوعها يعني صكيه.."
مهرة" انزين يا ابوية ليش"
ابو مهرة بعصبية" انتي الظاهر ما تحترمين ابوج..انا مقصر عليج في شي..يعني انا مب هامنج..امج محد و لازم تنسينها..اعتبريها ماتت...فاهمة..ماتت"
و تنصدم مهرة من رد ابوها...و تنزل من عيونها دموع حارة من الحزن و تركض حجرتها و هي زعلانة واايد ...و تم تصيح و تصيح بس محد يدري عنها..وحيدة بدون خوات او اخوان يسألون عنها...

بعد مرور شهر تقوى علاقة بخيت بسعيد و نهيان اللي ما كان يدري انه بخيت هو نفسه ريل شرينا..و يدخلون و يطلعون ويا بعض..كان بخيت انسان طيب و حبوب و مرح...كان كل من عرفه يتعلق فيه على طبعه الحلو..و سعيد برغم انه كان متحسس من صداقته ببخيت الا انه ما قدر يخلي ربيعه اللي شارنه..و في يوم من الايام...
بخيت" اقول انا عازمنكم على الغدا عندي يوم الخميس..شو رايكم"
نهيان"اكيد موافقين ...دام السالفة فيها عيش و لحم"
و ما يرد سعيد اللي كان متردد...كيف يدخل بيت فيه حبيبته شرينا..كيف يقعد في مكان يفصله عنها جدران قليلة..كيف بيتحمل..
بخيت" ها شو رايك يا سعيد.."
سعيد" لا يا بخيت ما اعتقد..مره ثانية..."
نهيان"لا يا ريال شو مره ثانية...انت شو ياينك...شو بتسوي..خلنا نسير نتسلى شوي..و بعدين غدا ببلاش"
نهيان و سعيد"ههههههههه"
سعيد"ليش ما عندكم غدا في بيتكم ولا فقارى ما تتغدون"
نهيان" عاد انت ذليتنا...يلا خلاص مالك عذر..يوم الخميس عند بخيت"
بخيت"هييه يوم الخميس الغدا عندي..ما استوت..كل يوم انا مطيح في بيت واحد منكم ولا مرة ييتوا عندي"
سعيد اتلوم في الريال و وافق بعد حنة..

في بيت علي بن عتيق..يرن التلفون و تكون مريم يالسة عداله..
مريم"الوو"
......."اللوييين"
مريم" منوو معاية"
....."الحين من صدقج ما عرفتيني يالدبة..
مريم"ووااااااااااااااي...علاية فديييتج..شحالج...سوري و الله ما عرفتج..صوتج متغير.."عليا تكون حرمة جاسم اخو مريم و هم يكونون مسافرين امريكا عشان يكمل جاسم الماجستير..
عليا"زين ما علينا...انتي شحالج و شو مسوية"
مريم" والله بخير..شحاله جسووم...بعده لين الحين يجحت الكتب"
عليا" هيه والله حليله..الحين بقاله شهرو نص جي و يخلص..يعني على اجازة نص السنة بنييكم"
مريم و هي مستانسة" قولي والله...الله يعني بنستانس.."
جاسم و حرمته عليا كانوا اقرب حد لها في البيت ..صحيح انه جاسم كان انسان عصبي بس كان طبعه مرح و ما يعصب الا لشي يرزا..و اذا عصب...الله يعين اللي قدامه..اما عليا فكانت انسانة حبوبة و وايد تحب مريم..كانت دوم تحس فيها يوم يآمرون عليها حريم اخوانها سلامة و حصة...مريم استانست عشان عليا بترد و بتلقى حد تسولف وياه في البيت...


في يوم الخميس الموعود...

يتأخر سعيد عن موعدهم بنص ساعة...و يوم يوصل يوقف عند باب البيت....و في راسه ألف فكرة و الف ذكرى..و الف كلمة خطتها دموعه على شرينه في رسايلهم الوردية...
و يدق الباب و هو عنده امل كبير انه يلقى شرينه..و ينتظر ثواني كنها دهور...و تعرق ايده و يحس ببرد شدييد...و يتبطل الباب.."يلا بابا ادخل..بابا بخيت في انتظار انت " ويوم استوعب سعيد اللي كان يشوفه قدامه لقى انه البشكار هو اللي بطل الباب...

و يدخل سعيد الحوش و يتم يطالع الفيلا..و يقول في خاطره...الحين شرينه داخل..شرينه اللي راحت عني داخل..و فجأة يلمح طيف من ورا الدريشة..كانت شرينه واقفة و تسرق النظرات و اول ما شافته صكت الستارة و تركته ملهوف..مب عارف شو يسوي..
البشكار"بابا مني ميلس..هذا فيلا مافي داخل رياييل..تعال مني بابا بخيت في انتظار انته"
و يدخل سعيد الميلس و هو شال معاه خفي حنين...
*****

انتظروا الجزء السابع

م ن ق و ل

الجزء السابع
دخل سعيد ميلس سعيد و هو حزين...آماله تعدت الحدود...و لكنها تكسرت في ذيج اللحظة..حس بغصة و حس بأنه يخون ربيعه...يخونه بمجرد انه يفكر في شرينا كحبيبة..و آخر شي وصل للحقيقة المرة...و استوعب انه هالعلاقة انتهت من زمان...و مالها أي أمل بالحياة...عرف انه كل اللي عاشه بعد رحيل شرينا هو وهم..و الحقيقة الوحيدة اللي بقت انه بخيت الحين هو حبيب شرينا و لازم يعيش مع هالوضع...و انه بخيت هو من اعز ربعه و ما عنده استعداد يخسر هالصداقة الحلوة...و علطول اتذكر اغنية راشد يوم يقول" بعاند كل احاسيسي وببدى خطوة النسيان..متى ما زارني طيفك بقوله روح يا خوان...خلاص الماضي ودعته.."

في بيت سيف بن عيلان..
مرت على المناقشة الحادة بين مهرة و ابوها 3 اسابيع تقريبا..كانت مهرة تتفادى انها تقعد ويا ابوها..او تكلمه..كانت تعتقد انه ابوها اللي يدلعها و يحبها بيرضخ لعنادها مثل كل مرة....بس انصدمت في ابوها اللي ما استسلم لعنادها و ما فكر انه يراضيها بكلمة او يقولها أي شي عن امها....كان موضوع ام شرينا بالنسبة لسيف يتعدى الحدود اللي شرينا لازم توقف عندها...ابو شرينا كان مستعد لاي طلب لشرينا الا انها تذكر امها و لو لمجرد السؤال قدامه و دايما كان السبب مجهول و سر محد يعرفه غير ابو مهرة...
مهرة كانت قاعدة في الصالة يوم يت عندهم جوزيت ...جوزيت كانت وحدة من اللي يتقربون من شرينا و من الحاشية اللي كل يوم تقريبا يزورون مهرة بس هي تسويلهم طاف..
جوزيت"مرحبا مهرة...كيفك حبيبتي...وينك كل يوم بتصل فيك و بيؤولولي انتي مش فالبيت.."
مهرة" هلا جوزيت..و الله اشغال تعرفين الجامعة و الدراسة.."
جوزيت" و شو عاملة بالدراسة..انشالله منيحة..."
مهرة" اوكي يا جوزيت اوكي..شخبار ريلج ايميل و العيال.."
جوزيت"بيسلمو حياتي و خاصة ليندا بتموت و تيجي تتشكرك عالتياب اللي بعتيلا ياهن"
مهرة" لا ما عليه يا جوزيت ...ليندا شرات اختي الصغيرة.."
و يقعدن يسولفن سوالف عادية...مهرة كانت تسولف من ورا خاطرها...تحس بظيقة لانها وحيدة...مب قادرة تشل فكرة امها من راسها...و عندها الف سؤال عن امها..كيف شكلها ..منو هي...و ليش ما سألت عني..ليييش..
جوزيت" وينك سرحانة...عم حاكيكي من الصبح و انتي ما عم تردي علي"
مهرة" سوري جوزيت..سحرت شوي"
جوزيت" شو بكي يا مهرة..انا حاسة انو فيكي اشي..خير"
مهرة"جوزيت انتي من متى تيين بيتنا و تعرفينا"
جوزيت" وييييييييين...من زمااان..من قبل حتى ما تنولدي كنت بجي عند جدتك كلثم الله يرحمها"
مهرة" يعني تعرفين امي"
و هني يتغير ويه جوزيت...
جوزيت" اييه اكيد بعرفها...بس انتي بتعرفي يا مهرة اني ما بقدر اتكلم عنها...ابوكي محذرني اني ما احكي عنها معك.."
مهرة" انزين بس قوليلي كيف شكلها..و ليش هدتنا"
جوزيت و قلبها متقطع على مهرة.."و الله يا مهرة ما بقدر...انا آسفة.." و تتم جوزيت ساكتة و هي وواااايد زعلانة على مهرة اللي ما عندها ام ...و ما تروم تسأل عنها..و تستأذن من مهرة انها تروح لانها ما تضمن انها تسكت قدام نظرات مهرة الحزينة..
و تم مهرة على حالها ...و تقعد في الصالة تفكر نفس الافكار اللي ما فارقتها من يوم ما وعت على الدنيا..و يقطع عليها حبل افكارها صوت التلفون..و تشوف الكاشف و تلقاه رقم مريوم..
مهرة" هللووو"
مريم" الوو..منو"
مهرة" who is this”
مريم"هااا...sorry wrong number”
مهرة"هههههههه... يالهبلة قصيت عليج"
مريم"يالحمارة..والله انج ماصخة..شكيت في عمري...و الله تنفعين تستوين فلبينية"
مهرة" فلبينية انتي يالدبة.."
و يضحكون الثنتين..كانت مريم بالنسبة لمرة بلسم جروحها..و الشخص الوحيد اللي تقدر احزانها و هي تكلمها ...
مريم" اقول مهروو..شو رايج اتين عندنا ...اليوم الخميس و ما عندنا شغل حق يوم السبت.."
مهرة" ما عندنا شغل..؟؟!! انتي شكلج فقدتي الذاكرة...نسيتي البروجيكت الي بنسلمه الاربعاء الياي"
مريم" اوهووو..انزين ما عليه خلينا اليوم نستانس و باجر نبدا نشتغل فيه"
مهرة" لا لا مارووم.."
مريم " لييش...شو عندج تسوين..بتقعدين تعدين يدران بيتكم"
مهرة " لا حبيبتي ...يدرانا عادتنهم ولا فوق امية مرة بس ماروم اخبر ابويه...ماكلمه..شو نسيتي.."
مريم" اوهو علينا..انتي لين متى ما بتكلمينه..انتي لين الحين ما فهمتي انه هالموضوع غير قابل للنقاش..و بعدين انتي ما شفتي ابوج كيف ساكت..يعني اكيد ما بيراضيج "
مهرة"و الله ما يخصني...انتي ما شفتي كيف رد عليه..انا ما يخصني..انزين انتي ليش ما تيين عندي.."
مريم"اممم..انا كنت اباج اتيين و كنت بخلي بنت خالي لطيفة اتيي.."
مهرة"انزين تعالي انتي و هي.."
مريم" ولا اقوولج..خلاص انا بييج اليوم و مره ثانية انتي اتيين عندنا و هي موجودة شو رايج.."
مهرة" حلو.."
مريم" خلاص انا بسير استأذن من ابويه..و برد عليج خبر..يلا سلااام"
مهرة" مع السلامة"
و تسير مريم الصالة و تلقى ابوها و امها و سلامة و اليازي حريم اخوانها يالسات...
مريم"ابويه بغيت اسير بيت مهرة بنت سيف.."
ابو محمد" و ليش ..شو عندج هناك"
مريم" ابويه اليوم الخميس و من زمان ما ظهرت..بسير عندها شوي اسولف.."
ابو محمد" انتن يالبنات ما تخلص سوالفكن..يلا يلا سيري...مرخوصة"
مريم" فديتك ابويه ..علني ماخلا منك"
ابو محمد" بسج ياللوتية"
و يضحكون كلهم...و تقوم مريم عشان تسير تتلبس..و توقفها اليازي"اقول مريوم ليش مهرة ما قامت تدقلج شرات اول..حتى ما قامت تزورنا..."نبرة اليازي كانت كلها خبث..تبا تحرج فيها مريم بس ما كان في شي مستوي عشان تنحرج منه مريم..
مريم" لا عادي تتصل و تزور..بس عشان الجامعة انشغلنا ثنتينا.." و سارت مريوم فوق قبل ما تقول اليازي أي شي..اليازي كانت علاقتها مب لين هناك ويا مريم و كانت مرات تحاول تحفر ورا مريم او تتسأل عنها يمكن تلقا عليها شي..و طبعا كانت ظاربة تعاون ويا حصة حرمة سلطان..بس سلامة كانت طيبة و ما يخصها في شي..و بالطبع مثل ما قلت قبل..كانت عليا حرمة جاسم هي الوحيدة اللي في صف مريم و دوم تدافع عنها..
...
..
.

اتلبست مريم و اتعدلت و سارت عند مهرة اللي كانت تترياها في حجرتها..و تموا يسولفون ويا بعض و طبعا مريوم ما خلت سعيد في حاله و هي تقول لمهرووه كيف تحبه و كم تتوله عليه..و تمت مهرة تفكر في حال ربيعتها الغريب..يعني لهالدرجة الحب يسلب القلب و الفكر..و تمت تقول في خاطرها"يا ربي انا ليش ما عندي ولد عم يحبني و احبه..حتى صلة الرحم انحرمنا منها..الحين يمكن انا عندي ولد خال او خالة كبري..لو كانت امي عندي جان احتمال حبني و حبيته.." و تمت سرحانة و مريوم تسولف و تسولف ولا عبالها لين آخر شي قالتلها
مريم"اييييييييييه...صباح الخير..وين سافرتي..يعني انتي يايبتني بيتكم عشان تسرحين و تفكرين.."
مهرة و هي متلومة" اووه سوري والله سوري..بس انا اعرف سوالفج كلها عن سعيد مالج..مادري عشو تحبينه.."
مريم"شووو...حبيبتي سعيد احلى واحد في العائلة..ملك جمال.."
مهرة"الصراحة انا ما اذكر شكله بالمرة..."
مريم " كيف ما تذكرين...مب انتي تميتي مصطنة واقفة تطالعينهم..كيف ما شفتيه"
مهرة" يا بنتي انا يوم تنحت ما تميت اطالع ويوهم..تميت اشوف الدم اللي تسبحوا فيه..."
مريم"مادري عنج و الله..بس سعيد والله انه يجنن"
مهرة" ياختي شو هالنحاسة..ما عندي حد احبه و يحبني.."
مريم" و الله انه انتي اللي حيج..ما تحاتين حد و ما يعورج قلبج من الحب"
تمت مهرة تفكر في كلام ربيعتها اللي لقته منطقي...بس تم الفضول في راسها..كانت تبا تعرف شو هو طعم الحب و الشوق و اللهفة..كانت تبا تجرب بس حياها و تربيتها تمنعها من انها تدخل في أي علاقة من هالنوع..
المهم مريوم غيرت السالفة و تموا يتكلمون عن البروجيكتات و الدراسة اللي لازم يسلمونهن عقب اسبوعين..لان الامتحانات ما بقى عليها غير اسبوعين..
.
.
.
في جهة ثانية كان سعيد قاعد ويا نهيان في ميلس بيت سعيد بعد ما صلوا العشا يدخل عليهم بخيت..
سعيد" تو الناس...وينك من الصبح نحن نترياك"
بخيت "شو تحروني فاضي شراتكم..انا واحد معرس و وقتي مب بايدي"
نهيان" ههههههههههه...شو الحرمة حابستنك في البيت.."
بخيت" جب ..ما يخصكم في الحرمة"
نهيان" هدي اعصابك..بس امزح وياك"
سعيد سكت يوم طروا سالفة بيت بخيت و حرمته...كان يحاول يتجاهل الموضوع و اخيرا تكلم عشان يغير الموضوع.." ها وين بتسيرون اليوم"
نهيان"يا ويلكم ان قلتوا بنسير مارينا مول او ابوظبي مول..و الله لاعت جبدي..خلونا نغير"
بخيت" شو رايكم نسير واحد من هاييلا المقاهي اللي على الكورنيش"
سعيد" هيه والله فكرة..شو رايكم نسير هافانا كافيه"
نهيان" لا لا..شو رايكم نسير مقهى ليالي زمان.."
سعيد " اوكي ..بخيت شو رايك"
بخيت" وياكم انا وين ما تسيرون"
و يقومون كلهم و كل حد يركب سيارته و يتلاقون عند مقهى ليالي زمان..و اول ما يدخلون يلقون هزاع و حمدان..و قبل ما يلف سعيد ويهه و يظهر من المكان..يقوم هزاع و يتجه صوبهم
هزاع" هلا و الله بخيت..شحالك يا ريال...وينك ما تنشاف.."
بخيت " انت وينك ياخي..سألت عنك اخوك منصور و كله يقولي بيخبرك"
هزاع" و الله ماخبرني منصوروه..ما عليه انا براويه"
سعيد و نهيان كانوا واقفين متفاجئين و يطالعون اللي يستوي قدامهم..معقولة هزاع ربيع بخيت..هالماصخ هزاع ربيع بخيت...شو يمع الاثنين على بعض..
بخيت" هزاع هذيلا ربعي..سعيد و نهيان.."
هزاع"ما يحتاي تعرفني...اعرفهم عدل" و يتم يطالعون بعض بنظرات كلها كره و شوي بيصفعون بعض..يحس بخيت بالجو المتكهرب..
بخيت" انزين خلاص يلا انا اخليك"
و يسحب سعيد و نهيان..." انتوا شو سالفتكم..ليش جي تطالعون بعض "
نهيان" انت شو عرفك في هالنذل..."
بخيت" نذل...ابب ابب..السالفة شكلها عودة"
سعيد"لا سالفة ولا شي..بس هزاع معروف عنه نذل و ماله صاحب..و نحن ما نداني بعض"
بخيت" و الله حرام عليكم...هزاع ماشالله عليه ريال و النعم"
نهيان" روح لا..الا قول نذل و النعم.."
بخيت" انا مادري شو سالفتكم وياه..بس هزاع يستوي ربيع ولد خالي..و دومه يتمدحلي ياه"
سعيد كان ساكت و هم يرمسون...اتذكر السالفة اللي استوت قبل في ابوظبي مول..و حس بداخله نار تغلي يوم اتذكر ان هزاع ما انحبس هو و حمدان..
ظهروا كلهم من المقهى و ساروا هافانا كافيه
في مقهى ليالي زمان...
حمدان" منو ها اللي سلمت عليه..."
هزاع"هذا بخيت بن خلفان اللي يقرب لمنصور ربيعنا.."
حمدان" انزين مب اللي ويااه سعيد..هذاك مال سالفة المخفر.."
هزاع" هييه هذا هو سعيد مال سالفة المخفر.."
حمدان" هيييييييييه.."
هزاع" انا مادري كيف خليته في حاله..بس نهيايته بتكون على ايدي"
حمدان" أي نهاية انت بعد..تبا تورط عمرك عسب واحد ما يسوى..يخي ما عليك منه.."
هزاع" لا يسوى..مب انا اللي انهان و اسكت...لازم اردله ياها"
حمدان" اوهووو..ردينا عسوالف الكرامة و الكلام الفاضي"
و يسكت هزاع و في باله افكار مالها عد..يبا يعرف طريقة ينتقم فيها من سعيد و نهيان..و في نفس الوقت اتذكر مريم..و ويها اللي ما راح عمره ينساه..كان ويه جميل بكل معنى الكلمة..و يقرر هزاع هالمرة انه ما راح يخلي سعيد في حاله...و بيكسر راسه مثل ما هانه جدام الجميع

م ن ق و ل

الجزء الثامن

************

مرت 3 أسابيع ومهرة و مريم خلصوا امتحانات نص السنة و بدت الاجازة..اما بالنسبة لسعيد و نهيان فعلاقتهم قوت ويا بخيت و صاروا ما يفترقون عن بعض...مهرة لين الحين ما تكلم ابوها من يوم هزبها على سالفة امها و ان كانت استسلمت ان ابوها مستحيل انه يخبرها أي شي عن ابوها...
........
سعيد و نهيان و بخيت ما كان عندهم اجازة لانهم يشتغلون..و في يوم من الايام و بالتحديد يوم الخميس اتصل سعيد في بخيت و نهيان و قالهم ايون ميلس بيته عشان يسولفون و جي عقب صلاة العشا..سعيد و نهيان وافقوا..
و في بيت بخيت نهيان قال حق حرمته شرينا تزهب الفوالة و دلال القهوة و الشاي في الميلس لان ربعه بيون عنده..
شرينا كانت في ذاك الوقت في الشهر السادس من حملها..بس كانت تسوي كل شي بروحها في البيت و ما تخلي الخدامة تساعدها غير في المطبخ..لانها ما كانت تداني تيود شي في حجرتها او من اغراضها..سارت شرينا المطبخ و شلت صياني الفوالة و دخلت الميلس و تمت ترتبه و تحط الفنايين و الدلال و بخيت كان في حجرته يتسبح و يتلبس عشان يسير يصلي و يرد الميلس قبل ما يوصلون ربعه...
في نفس الوقت سعيد غير رايه و قرر انه يسير بيت بخيت عشان يصلي وياه العشا..و دخل سعيد الميلس و تفاجأ..كانت شرينا في الميلس...كانت ترتب و تنظف و ما انتبهت ان سعيد دخل..اتفاجأ سعيد بوجودها و تم يطالعها.. كان اول مرة يشوفها من قريب..ما قدر سعيد انه يقول شي..و ما قدر انه يضحي بهالحظة..و نزل عينه و شاف بطنها الكبير...كانت حامل ...حامل بولد ربيعي بخيت...في هاللحظة سعيد استوعب انه حرام انه يوقف..ما كان يريد يخون ربيعه..شرينا كانت لين الحين مب منتبهة لانها في آخر الميلس و لافة ويها..
سعيد"احم ..احم"
لفت شرينا ويها و شهقت بصوت عالي..و قالت في خاطرها.."معقولة سعيد..معقولة...من دون الناس انت اللي التقي بك"...شرينا ما اتحركت من مكانها و تمت واقفة و سعيد يطالعها و هي تطالعه..استغرب سعيد من موقفها..ما ربعت ما استحت ما صاحت..ولا شي غير شهقة المفاجأة...ما كان في تعبير ثاني للشوق و اللهفة اللي ارتسمت في كل تعابير ويهه....ما شاف نظرة الشوق و الحزن في عيونها..معقولة انا اكون نكرة بالنسبة لها..معقولة ما تحس بأي شي صوبي و لو كان احساس بالشفقة او الذنب..
و في هاللحظة تحركت شرينا من مكانها و مشت صوب سعيد عشان تظهر من الميلس و اول ما مرت صوبه ما قدر يمنع نفسه من انه يسألها عن السبب..ليش هجرته و ليش كل هذا الكذب..يود ايدها...حاولت انها تخلص ايدها من ايده و لكن ما قدرت...ما قدر يخليها تهرب بعد ما لقا هالفرصة..مستحيل يفرط بالفرصة الاخيرة انه يعرف السبب..عشان يرتاح من عذابه و من حبه و يلقى النهاية المنطقية لالمه..
سعيد"وين رايحة..انا ماصدقت لقيتج"
شرينا"سعيد الله يخليك خليني اروح..الحين بخيت بيي..حرام عليك لا تخرب بيتي"
سعيد" ليش يا شرينا ليش...ليش هجرتيني..ريلج اللي بيدخل الحين كان ممكن اكون انا مكانه..ليش رحتي و خليتيني..معقولة كل جواباتج كانت كذب"
شرينا و الدموع اللي حاولت تخفيها بدت تفضحها و تنزل على خدها"يا سعيد انت مب فاهم شي..ولا يمكن تفهم شي ..مصيرك تعذرني على اللي سويته..صدقني عشانك"
سعيد و هو معصب" عشاني؟؟!!...عشاني تجرحيني...عشاني تهجريني...عشاني تعلقيني فيج و تاخذين واحد غيري..فهميني..انا مب فاهم..كيف كل ها اللي سويتيه عشاني.."
شرينا انهارت و بدت تصيح و تصيح و سعيد يضغط عليها و يسألها ليش و هي تصيح..
شرينا" ما اقدر اقول ما اقدر..."
سعيد"و شو اللي يمنعج..خلاص ما بقى شي تخافين عليه..قلبي و طعنتيه..و لا يمكن شي ثاني يجرحه اكثر من هجرج و خيانتج"..
شرينا" سعيد سامحني..انا ما كنت اقصد..بس خلاص الماضي انتهى...انت ليش ما تفهم اني مب لك..انا الحين انسانة متزوجة...خلاص انتهى"
و تسحب شرينا ايدها من ايد سعيد و لكنه يودها بقوة و يصك الباب...و كان في ثورة من الغضب و الجنون..كانت كرامته و رجولته تنهار جدامه و يريد السبب..يبا يعرف سبب مقنع يخليها تهجره...
سعيد" ما بخليج لين ما تقولين شو السبب " و يشد على ايدها..
و شرينا تتأوه من كثر ما هو راص على ايدها..و آخر شي تزعق"يا سعيد انا اختك..."
هد سعيد ايد شرينا.." شو تخربطين انتي..كيف اختي..."
شرينا و الدموع غطت ويها الطفولي"انا اختك بالرضاعة يا سعيد..اختك..يعني حبنا حرام..و كل اللي كان بينا حرام...خلاص ارتحت..عرفت شو هو السبب.."
و في لحظة دارت الدنيا بسعيد...استعاد كل شريط ذكرياته ويا شرينا و كل الرسايل..و كل الكلمات..كلها كانت علاقة شاذة و محرمة...الانسانة الوحيدة اللي قدرت انها تتملك قلبه كانت اخته..الانسانة اللي واقفة قدامه الحين و هو متولع بحبها تستوي اخته..و صدرت منه آهة حزينة...و حس بانه كاره لنفسه و لاول مرة كاره لشرينا..كان كاره هالمشاعر اللي يحس فيها لانسانة يحبها و هي اخته في نفس الوقت...
شرينا"يا سعيد انا ما كان قصدي اخونك..بس انا يوم صارحت امايه بحبي لك و انك تبي تخطبني قالتلي انك اخوي بالرضاعة..امايه مرة رضعتك و انت صغير يوم امك دخلوها المستشفى..بس محد يدري..حتى امك ما تدري..بس الله شاهد الحين اني انا و انت ما نصلح لبعض.."
سادت لحظة صمت كانت في نظرهم دهر..كل حلم انهدم في عين سعيد..و كل سعادة ماتت في عينه...كان اهون عليه ان شرينا تكون خاينة ولا انها تكون...اخته..
و كسر هالصمت صوت الباب..دخل بخيت عليهم بعد ما شاف سيارة سعيد في الكراج..لكنه تفاجأ بالموقف اللي شافه قدام عينه..الدموع كانت سيدة الموقف..و الصدمة هي كل ما يعبر عنه ويه ربيعه..سعيد..
كان آخر ما توقعه سعيد انه ينحط في هالموقف ويا حبيبته و ربيعه..و طلع من الميلس بسرعة بدون ما يقول أي كلمة..كان يحاول يهرب ...يهرب من نفسه و من الكل..و اول ما ركب سيارته انطلف بجنون بدون ما يعرف وين ساير..و مشى و مشى في شوارع بوظبي بليا طريق..وين يروح ..شو هو المكان اللي بينسيه كل اللي صار..وين المكان اللي بيمحي هالصورة البشعة من خياله..طول هالوقت كنت احب اختي...الين ما وصل مكان من زمان ما سارله..وصل البحر..و اتذكر كيف كان كل ما يحس بظيقة يسير هناك...و يلس على الرملة و حط المسجل و كان محمد عبدو يغني" آه يا جود الحزن وياي و الفرحة شحوح..لا صديق و لا رفيق و لا طريق اتبعه.." سعيد كان تايه بليا طريق..في لحظة فقد اثنين من اغلى الاشخاص في دنياه..بخيت و شرينا..و تم على هذي الحالة في البحر ليين الفير و غفا و هو منسدح على الرملة..
على الجانب الثاني كان الكل قلق و خايفين على سعيد لا يكون سوى بعمره شي..شرينا بعد ما طلع سعيد علطول خبرت ريلها السالفة..خبرته كل اللي صار و بخيت تم مصدوم كيف ربيعه ما قاله عن هالشي الخطير...كيف..و لكن في النهاية ما كان يقدر يسوي شي لانه استوعب انه حالة سعيد هي في قمة يأسها و حزنها و في الآخر شرينا تكون اخته...
بعد ما خبرت شرينا ريلها السالفة ياهم نهيان على الموعد بعد صلاة العشا..بس بخيت ما قاله شي غير انه اتظارب ويا سعيد و انه ظهر معصب ولازم يلقونه قبل ما يسوي بعمره شي..
ظهروا نهيان و بخيت من البيت و ساروا يدورون على سيعد...دقوله و لا فوق 30 مسد كول بس ما كان يرد عليهم...دوروا عليه في كل مكان ممكن يكون فيه بس بدون أي نتيجة..
................
في مكان ثاني من بوظبي كانت مهرة يالسة كعادتها في البيت و تطالع التلفزيون يوم دقت عليها مريم..
مريم"الو"
مهرة"هلا..ياخي محد يتصل فيا غيرج.."
مريم"شو يعني...مب عايبنج..يلا يلا مع السلامة"
مهرة"لا لا لا وين بتروحين..امرح وياج...عنبوه ما امزح يعني.."
مريم"هي اونج تمزحين عاد...ويا ويهج.."
مهرة" ما علينا..انتي علومج..بدا الملل عندج ولا بعده..."
مريم" والله هو من زمان بادي من يوم ما يونا سلطان و حرمته حصة"
مهرة"هههههههه...يا حليلج والله..يعني بدت الحرب عندكم..."
مريم" اقولج جنه ماكلة من حلالها هي و اليازي..ماعرف شو يبن مني.."
مهرة" ما عليج منهن انتي..تعرفين انج ما سويتي شي غلط"
مريم" تعرفين اليازي شو تسوي..اول ما تشوف ريلها تتعلث تبطل سالفة عني..و يوم يسألون ويني تقولهم مادري..يمكن يالسة على النت..و هي تدري انه صالح ما يداني طاري النت"
مهرة"انزين انتي ليش ما تخبرين امج..."
مريم"وين امي اتروم تسويلي شي..ساحرينها يمكن .."
مهرة"ههههههه..اسميج يا مريوم سوالف.."
مريم" المهم..باجر بسير المارينا و اباج تسيرين ويايه.."
مهرة"يا مريوم كم مرة بقولج اني ماروم..اقولج ما اكلم ابويه"
مريم" عد مب حاله هاي..لين متى يعني..لين متى..ما يسوى عليج..و بعدين لو مب عشانه عشاني..انا ابا اظهر من البيت...ملييت.."
مهرة" ............"
مريم" فديتج مهروو لو لي عندج غلا تراضين ابوبج...و بعدين انتي تعرفين شكثر هو يحبج..و انتي بعد لازم تراعين انه ما يحب هالسالفة..مثل ما هو يبا رضاج لانج بنته الوحيدة انتي دوري رضاته.."
مهرة بتردد"مادري..بفكر..اقول يلا مع السلامة انا بسير اتسبح.."و تسكر مهرة عن مريوم و تمت تفكر في ابوها..الصراحة هي مصختها شوي...بس هو ما يا يراضيها..و تمت تفكر و تلف و تدور و يوم كانت سارحة دخل عليها ابوها..
ابو مهرة"السلام عليكم"
مهرة بزعل" و عليكم السلام"
و سكتوا الاثنين و يلس ابوو مهرة على واحد من الكراسي..
ابو مهرة"يا بنتي انا ابا اقولج شي واحد و اباج تفهمينه عدل..."
مهرة",,,,,,,,"
ابو مهرة"لازم تفهمين انه مب كل اللي تبينه من الدنيا بتعطيج ياه... صحيح انتي امج مب عندج بس الله عوضج بالمال و الجمال و عندج انا ابوج اللي احبج لانج بنتي الوحيدة..........يا بنتي انتي مب اول وحدة امها تكون بعيدة عنها...و انتي لازم تقدرين مثل ما انا اتعب و اشقى عشان اوفرلج كل هالعز اللي انتي فيه و ما تحسين باي نقص لازم انتي تراعين شعوري و شو اللي اباه و شو اللي ما اباه..انا ما يوم في عمري و اخرتلج طلب يا مهرة بس اسمحيلي سالفة امج انا ما احب اني اتكلم فيها لانها ماضي و انتهى..و حتى لو اتكلمت عنها ما بيفيد..."
مهرة كانت ساكتة و تسمع ابوها و حست بتأنيب الضمير...
ابو مهرة"اتمنى انج تفهمين هالشي عدل و انتي الحين كبيرة و لازم تتعودين ان الدنيا ما تعطيج كل ما تتمنيين..و احمدي ربج على اللي عندج لان غيرج يتمنى يكون عنده نص اللي عندج يا بنتي"و قام ابو مهرة من مكانه و قبل ما يظهر من الصالة قامت مهرة من مكانها و سارت لوت على ابوها قو و هي تعلن بجي نهاية المقاطعة..و نزلت من عيونها دموع فرحة انها ردت تكلم ابوها..

مرت هذي الليلة و كل مشغول بليلاه...في صوب سعيد كان في عالم ثاني يفكر باللي صارله..و بشرينا اللي طلعت اخته..و نهيان و بخيت ما ردوا بيوتهم غير الفير بعد ما داروا كل شوارع بوظبي و سألوا عن سعيد في المستشفيات و مراكز الشرطة و ما لقوه..و شرينا كانت في حجرتها تصيح و تصيح...ما كان في خاطرها في يوم من الايام تنحط في هذا الموقف..و لا كان في خاطرها انها تكشف هالسر لسعيد ...اخوها...سعيد ما كان يدري انها عقب ما كلمت امها على سعيد قررت امها تشل بنتها و تبعدها عن هالمكان بقرب سعيد و ساروا بيتهم اللي في العين و تموا هناك لين ما خطبها بخيت بمعرفة امه..ما كان يدري انه هالمفاجأة كانت اقوى عليها من قوتها عليه..شرينا كانت مجنونة بسعيد..كان الهوا اللي تتنفسه و كل شي بعالمها الصغير.............في جانب ثاني كانت مريم بعد تفكر في سعيد حبيب قلبها..كان سعيد هوسها..ريوقها و غداها و عشاها..و كان حلمها اللي تحلم به كل ليلة...اما مهرة فكانت قاعدة بابوها و امها و قررت انها تنسى سالفة امها عشان خاطر ابوها...

.
.
"

.."

انتظروني
م ن ق و ل

الســـــــــــــــــلام عليكم


مشكوور اخووي حد السيف


على النقـــــــ :shock22: :shock22: ــل الرائع


وننتظر تكملت القصة على احر من الجـــــمر

مع تحياتي لك

اخوك:
B!7

اقتباس:

---

المشاركة الأصلية كتبت بواسطة حد السيف

mahk0098

العفو وأشكرك على المرور


onyx2020
لا مش زي أنت لي أحلى منها :09:
مشكوره أختي على المرور العطر الله لايحرمني منه

Valeryana
الله يعافيك مشكوره على المرور

السلام عليكم :)

---

chokran lak ala alkisah aljamila:08:

B!7
وعليكم السلام
العفو أخوي
وإن شاء الله رح أكمل القصه

aamall
بصراحه إنتي غريبه الأطوار والأطوال :09:
أو مره تجربين إقتباس وش دخل اللي إقتبستيه إلحين :06:
وبعدين هذه أول مشاركه تكتبي فيها مبروووووووووك <<< الظاهر أول كان عندك ماوس بس بدون كيبورد :D
والباقي كلها صور وعلامات وإقتباس :09:
على العموم عفوا أختي
ولا تزعلي أنا أحب أمزح وإذا في زعل حقك عليا
السلام عليكم :)

الجزء التاسع..

اليوم الجمعة من اول اسبوع في اجازة نص السنة..سعيد قرر انه يسافر فرنسا بعد الحقيقة المرة اللي اكتشفها عن حب حياته..الحقيقة اللي خلته كل ما فكر في الموضوع وقف شعر جسمه كله..و حس بمرارة الاثم تحرق يوفه...كانت حبيبة العمر شرينا هي اخته..شرينا كانت الاخت السادسة لسعيد...
.
.
.
الساعة اربع العصر عقب الصلاة كانت مهرة قاعدة في حجرتها كالعادة و ملانة..قررت تتصل في مريم و تقولها شو استوى ويا ابوها و تقولها انها بتسير وياها المارينا مول..
مهرة:الووو
مريم"هلا و الله..هلا بالطش و الرش..و الما ورد بالغرش.."
مهرة"احم احم..كل هذا عشاني..فدريتني والله .."
مريم" طالع...ها بدال ما تقول اهلين ولا مشكورة ياسة تتفدى عمرها..اييه انتي..عن تصدقين عمرج وايد.."
مهرة"اب اب اب..كلتينا انزين...المهم انا لساني يحرقني ابا اخبرج سالفة.."
مريم" ها شووو..خطبوج..؟؟"
مهرة"انتي ما عندج سالفة غير العرس و الحب و الرياييل"
مريم" انزين شو استوى خبريني"
مهرة و هي مستانسة"اتصالحت ويا ابويه.."
مريم"كلليللييليلليليليش...ما بغيتوا..انزين منوا كلم الثاني انتي ولا هو.."
مهرة"لا هو شافني في الصالة جان يا يرمسني..و الله يا مريوم احس اني غلطت في حقه..حليله غمضني..انا اصلا ياهل ليش اييب حق عمري الرمسة"
مريم"رحم الله امرء عرف قدر نفسه..زين بعد يوم اتعرفين ان عقلج عقل يهال..."
مهرة" ايييه انتي يالماصخة..انا بس اللي اقول عن عمري ياهل..انتي لا.."
مريم"ويا هالويه...انزيين يلا فكينا بسير اطالع المسلسل الحين بيبدى.."
مهرة"لا لا لا ..اتريي.."
مريم" شو تبين"
مهرة"ما بتسيرين المارينا"
مريم" ليش بتسيرين انتي.."
مهرة"هييه...مب انتي قلتيلي البارحة"
مريم"هييه صح نسيت..خلاص اسمعي..انا الحين بسير اسبح و بتلبس و انا بمر عليج..شو رايج.."
مهرة"خلاص عيل..اترياج.."
مريم"اوكي يلا مع السلامة..مب تتأخرين عليه و تنقعيني في السيارة"
مهرة"طالع منو يرمس..الحين انا اللي اتأخر ...ما علينا يلا مع السلامة"
مريم"مع السلامة"
.
.
.
في بيت حمد بن سالم ابو سعيد...كان ابو سعيد و ام سعيد و لطيفة و آمنة الصغيرونة يالسين وياهم بنتهم العودة نورة..
ام سعيد "ها يا نورة..وين طاف عليج سنة و ما شفنا شي منج.."
نورة و هي متغصصة من هالرمسة"يا امي كل شي بايد الله..اذا الله يبانا نييب عيال انا و ريلي بنييب اليوم قبل باجر.."
ابو سعيد"يا بنتي امج تقصد انج لازم تسيرين تسوين فحوصات انتي وريلج عيسى..."
و تسكت نورة و هي تفكر بكلام امها و ابوها..نورة كانت اكبر بنات حمد بن سالم و اصغر من سعيد بسنتين..نورة عرست قبل سنة من عيسى ولد عمها خادم..بس لين الحين ما بانت عليها علامات الحمل..و هي الصراحة بدت تشك..
لطيفة"حوووووووووه...وين سافرتي..ياسة اكلمج من الصبح"
نورة"ها..شو ..سوري بس سرحت شوي.."
لطيفة بابتسامة خبث" اللي ماخذ عقلج يتهنابه...يا حيج عندج ريل تحاتينه و تفكرين فيه..اففف..متى بعرس يا ربي"
ام سعيد"جب...انتي ام لسان..منيين لج هالرمسة..بعد ابا اعرس.."
ابو سعيد" و شو فيها..البنية تبا تعرس خلها تعرس..الف من يتمناها..و بعدين البنية مصيرها بيت ريلها ولا تبينها تقعد على قلبج.."
لطيفة و هي متشججة.."هييه والله يا بويه..البنية مصيرها بيت ريلها...الا اقول نورة..شخبار بيت عمي"
نورة"منو تبين في بيت عمي...عمي بخير و يسلم عليج..و حرمته هم بعد بخير..."
لطيفة"لا اقصد يعني كلهم بخير.."
نورة بخبث"منو قصدج..منو كلهم"
لطيفة و هي مستحية" عاد يا نورة انتي تدرين منو..لا تمين تستهبلين"
نورة"هيييييييييه...قصدج خليفة.."
و تسكت نورة و يستوي ويها احمر من المستحى..
نورة تبا تلعب باعصاب لطيفة"ما شي اخبار عنه.."

لطيفة كانت محيرة لولد عمها خليفة..و الحلو انهم اثنيناتهم يحبون بعض..بس اللي كان مخرب امها..اللي كانت كل ما ايون يخطبون لطيفة تجرج ريلها يردهم لين ما تخلص لطيفة الدبلوم العالي في الكلية..
لطيفة و هي معصبة على نورة"كيف يعني ماشي اخبار عنه..بلعته الارض.."
نورة"لا بس في وحدة خطفت عقله و كيانه و صرنا ما نشوفه خير شر.."
لطيفة تيبست في مكانها و صفر ويها من المفاجأة..و وقفت الدموع في عيونها...
نورة"ايييه عن تصيحين علينا اقص عليج..يحبج و يموت فيج بعد.."
لطيفة" يالماصخة..صدق انج سخيفة"
ام سعيد"هيييه انا قلت بنتي الكبيرة عاقل و تفهم اختها الصح من الغلط..طلعتي انتي شراتها خبلة..تقوليلها عن حب و ما حب و هالخرابيط..يلا قومن فوق عني..يلا بسرعة.."
و قبل ما يسيرن فوق يدخل سعيد عليهن الصالة...
سعيد"السلام عليكم.."
و يردون كلهم"وعليكم السلام و رحمة الله و بركاته.."
ام سعيد"وينك يا وليدي ما اتغديت ويانا..و البارحة الساعة كم رديت البيت.."
سعيد"لا يمي ما اشتهي اكل..بس بغيت اكلم ابوية في سالفة"
ابو سعيد" خير يا سعيد..شو السالفة"
سعيد"خير ابويه انشالله..بس ياليت نسير الميلس بكلمك"
و يقومون سعيد و ابوه الميلس الخارجي..
سعيد"ابويه انا بغيت اترخص منك ابا اسافر.."
ابو سعيد"شوو..تسافر..ويين و ليش"
سعيد"يا بويه انا ظايق و احس اني مخنوق و ابا اسافر..بسير فرنسا اسبوعين و برد"
ابو سعيد" انزين ويا منو تبا تسير"
سعيد" بسير بروحي...ابا اكون بروحي هالمرة"
ابو سعيد"خلاص يا ولدي ..اذا تحس انك بتغير جو..الله معاك مرخوص..بس انت شو فيك يا ولدي..حالتك مب عايبتني..شو شاغلنك.."
سعيد"لا يا بويه ما في شي..سلامتك..بس ظايق من الشغل..و ابا اغير جو"
سعيد كان يقول في خاطره آآآه يابويه لو تدري شو فيني..فيني هموم الدنيا كلها..فيني هموم الدنيا يابويه..
ابو سعيد"انزين عيل متى عزمت.."
سعيد"اليوم في الليل..و باجر نهيان بياخذلي اجازة من الدوام"
ابو سعيد"خلاص عيل..انا باجر بحطلك فلوس في حسابك "
سعيد" مشكور يا بوية و ما قصرت.."
و يظهرون من الميلس..سعيد يسير حجرته و ابوه يرد الصالة وين ما كان يالس..
لطيفة"شو السالفة ..شو كان يبى سعيد"
ابو سيعد"وانتي يالملقولفة شو يخصج..يوزي عن هاللقافة..يوزي"
ام سعيد"لا صدق شو فيه ظايق"
ابو سيعد"يبا يسافر فرنسا"
لطيفة "شوو..و ليش ما نسير كلنا..يعني اشمعنا هو بروحه يسافر"
ابو سعيد"الولد يبا يسير بروحه...خله يرتاح شوي و يغير جو"
لطيفة" و ليش انا بنت البطة السودة..انا بعد ابا اغير جو..ابا اسير اتشرالي لبس بعد حق الكلية من فرنسا.."
ام سعيد."هيييه..تراج فقيرة..كبتج مرة فاضي..مافيه لبس وثياب.."
لطيفة"يامي عاد..نحن في الكلية لازم نتلبس و نتكشخ..شو عيل.."
ام سعيد"بس بس..سيري فوق يلا..خليني اشرب قهوتي و فكيني من عوار الراس"
لطيفة"افف..خلاص خلاص..نورو قومي براويج شو سويت بحجرتيه فوق..عدلتها"
و يسيرن نورة و لطيفة فوق حجرة لطيفة و يتم ابو سيعد و ام سعيد في الصالة...اما سعيد كان في حجرته يالس يرتب شنطته حق السفر..
.
.
.
في المارينا مول...
يسيرن مهرة و مريم بروحهن و كالعادة ما يخلن محل الا و دشوه و خمو البضاعة اللي عندهم..و بعد ما مرت اكثر من ساعتين و نص عليهم..
مريم"اففف..و الله تعبت...و عطشانة واااايد"
مهرة" من اييبلج ماي هالساعة.."
مريم"و ليش ماي...هاذو ستار بكس قدامنا.."
مهرة" ينيتي انتي..ما تشوفين الشباب اللي فيه..تقولين نمل ابيض.."
مريم" و شو فيها..نحن ما نسوي شي غلط..الا هو فرابتشينو و بنسير..يلا مهرووو بليييز..و الله عطشانة و خاطري في ستار بكس.."
مهرة" الله يعين عليج...يلا طوفي قدامي بس بسرعة تطلبين مب تمين ساعة"
مريم و هي مستانسة"يلا عيل.."
مريم"excuse me..i want to order one frupitchino"
في نفس الوقت كان في واحد يالس يطالع مهرة و مريم و هن واقفات يطلبن...
..."يا وييل حالي انا علفرابتشينو..يا ويلي عالصوت الملائكي..."
مريم و مهرة تموا ساكتات و يترين طلبهن و كاونوا يسمعون شو الريال يقول بس عاطينه ظهورهن.."
....."يا حلو...التفت شوي..بس شوي...ابا اشوف ويه الشيوخ.."
مريم " و هي خلاص متفتفة تلف عليه و تبا تفتن عليه بس تتيبس في مكانها و ترد تلف على مهرة...
بصوت واطي..مريم"مهروو الحقي,,,"
مهرة بهمس" ها شووو..."
مريم" تعرفين منو اللي عدالنا.."
مهرة"منوو.."
مريم"هذاك اللي غازلنا و اتظارب وياه سعيد.."
هييه نعم..كان هزاع بلحمه ودمه يغازلهن...بس هزاع ما كان يعرف انه هاذي اللي واقفة عداله و يغازلها هي نفسها اللي تقرب حق سعيد..
هزاع" اقول الشيخة..انا بحط اسمي و رقمي و ايميلي...و رجيتج شللي الورقة..الله يخليج.."
مهرة و مريم مرتبكات و مب عارفات شو يسون..
مريم" انا براوييه.."
مهرة"ايييه شو بتسيون...لا تفضحينا.."
مريم" ما عليج انتي بس اسكتي.."
و بحركة سريعة تشل مريم ورقة الكلينكس اللي مكتوب عليها رقم هزاع و تشل ورقة ثانية و تطر الورقة الثانية..هزاع اتحراها طرت ورقته..و لكن في الحقيقة مريم خشت الورقة اللي كان مكتوب فيها اسمه و رقمه و قصت ورقة ثانية كانت محطاية على الطاولة..و ظهرت بسرعة هي و مهرة و ما خذوا طلبهم حتى...
مهرة"اييه يالخبلة..ليش طريتي الورقة..زين ما اشتط علينا ذيج الساعة.."
مريم"احسن عشان يتأدب..و بعدين انا ما طريت ورقته انا طريت ورقة ثانية"
و تبتسم مريم و تظهر من شنطتها ورقة الكلينكس و مكتوب عليها اسمه هزاع و ايميله و رقم تلفونه..
مهرة و هي منصدمة.."و ليش انشالله خذيتي الورقة..لا يكون ناوية تدقيله.."
مريم"لا لا..سلامة عقلج حبيبتي..أنا بفتح ايميل يديد و بسويله اد عليه..و بعلمه شو يعني كلمة ادب.."
مهرة"استخفيتي انتي..مهرووو..لو حد درى عن هاي السالفة صدقيني بتروحين في داهية..و خاصة اخوج صالح.."
مريم"اوهووو..انتي وايد خوافة..و بعدين صلوح شو دراه..بس خليني اعلمه الادب ها اللي ما يستحي..تخيلي ما تاب من يوم هذيج السالفة..و الله انه قليل ادب.."
مهرة"مريوم عشان خاطري لا تبدين في هالسالفة..."
مريم"انزين خلاص حشرتينا..خلاص ما بسوي شي.."
.
.
.و يردن مهرة و مريم لبيوتهن...
.
.
في بيت حمد بن سالم..سعيد كان يجهز عمره للسفر..كانت الساعة عشر...ودع امه و ابوه و خواته و سار ويا نهيان اللي وصله للمطار...

في المطار..نهيان"سعيد...تحمل على عمرك...و لا يلعب الشيطان بعقلك.."
سعيد"لا تخاف يا نهيان و لا توصي حريص.."
نهيان"متأكد انك تبا تسير بروحك..ترى اذا تباني ايي وياك للحين اقطع تذكرة و ياك على نفس الطيارة.."
سعيد"لا يا نهيان..مشكور ياخوي و ما قصرت..بس اللي اباه منك انك تستحملي من بخيت و تقوله اني ما قصدت شي..وتقوله انه شرات اخويه..مثل ما شرينا اختيه.."
نهيان و قلبه متقطع على ربيعه"انت تامر يا سعود..خلاص يلا ياه موعد طيارتك...سلملي على الفرنسيات"
سعيد"ههههههه..الله يغربل ابليسك..توك توصني و الحين تباني اسلم عليهن..."
و يلون على بعض و يسلمون على بعض ..
سعيد"تامر على شي من هناك ياخوي.."
نهيان"سلامتك يا سعيد..سلامتك.."
و يركب سعيد الطيارة و هو كله امل انه بيخلي كل الذكريات و المشاكل اللي مر بها وراه في الامارات...كان عنده امل انه هالرحلة بتنسيه همومه و آلامه..و اهم شي الذنب اللي كان يرتكبه و هو ما عنده أي فكرة..

انتظروا الجزء العاشر

م ن ق و ل

الجزء العاشر

في بيت سيف بن عيلان..

مهرة كانت يالسة في حجرتها قاعدة اون لاين..و كانت تكلم ربيعاتها ريم و خولة اللي كانوا وياها في المدرسة ..و كانت وياها فطوم اللي وياها في الجامعة..بس مهرة كانت مسوتلها طاف..
مهرة"اسمعوا شو رايكم اتيون عندي البيت...بسوي عزيمة و تعالوا انتوا و بقول لمريوم"
ريم"لا لا...انا مافيه..بنسافر باجر بنسير العمرة.."
خولة"اممم..انا اذا ريم ما بتسير انا مابي"
مهرة"مالت عليكن..محد يعزمكن على شي...ما منكن فايدة.."
مهرة"ها ريمي..شخبار تجهيزات العرس..خلاص قرب.."
ريم"ليش ما دريتي...خلاص فسخنا الخطبة"
مهرة"هااااا...لييييش..."
خولة" يقوللج مغازلجي عووود.."
ريم" هيه والله..مرة زخيت موبايله يوم هو عندنا و الله لا يراويج الارقام"
مهرة"شوو ...شو حاط"
ريم"الا حبيبتي...و عمري..و حلوة..و مادري منو...ولافوق ست ارقام بنات عنده..و يوم قلتله منو هاييله تم ساكت و ماعرف شو يرد"
خولة"اصلا انا قلتها قبل انه سمعته مب اوكي"
مهرة"انزين احسن انج اكتشفتي الحين قبل العرس..احمدي ربج"
ريم" هييه والله..الحمدلله والشكر.."
و تمر فترة و يسكتون كلهم..و تدخل فاطمة على مهرة....
فاطمة"السلام عليكم"
مهرة"و عليج السلام و الرحمة"
فاطمة"شحالج..انشالله بخير"
مهرة و هي مالها خاطر تكلمها..و تقول في خاطرها"اففف..انا ليش ما سويتلها بلوك"
فاطمة"اللوووووو...شو انتي مشغولة"
مهرة"هييه شوي"
فاطمة"اهااا..بس حبيت اسأل عليج...اقوول..انا شفتج انتي و مريامي في المارينا.."
مهرة"و الله..ما شفتج انا..و بعدين انتي كيف شفتينا..نحن كنا متغشيات"
فاطمة"لا اانا شفتكم في محل و كنتن رافعات الغشوة"
مهرة"هيييه"
و يسكتون الثنتين..
مهرة"اقوول بخليج الحين "
فاطمة"خلاص الغالية الله يحفظج"
مهرة"مع السلامة"
فاطمة كانت تحاول بأي طريقة انها تتقرب من مهرة..بس مهرة مسوتلها بولابس بالقو..فاطمة كانت خبيثة برغم الابتسامة اللي على ويها..كانت بس تبا تتخقق بوجودها ويا مهرة..فاطمة كانت غيارة بكل معني الكلمة و لو حاولت تخفي هالشي يتم باين في نظراتها..
اتسبحت مهرة و اتلبست و نزلت الصالة و لقت ابوها يالس..
مهرة"السلام عليك ابويه"
ابو مهرة"و عليج السلام و الرحمة..شحالج بنتي"
مهرة"بخير ابويه..غريبة اليوم يالس في البيت..."
ابو مهرة"لا بس احس اني تعبان شوي..و قلت خليني ارتاح اليوم"
مهرة"سلامات ابويه..ما تشوف شر..تباني اسويلك شي"
ابو مهرة"سلمتي ..انا بس بقعد شوي و عقب بارد الشركة"
مهرة"ابويه فديتك ليش ما تريح شوي..ليش ما تاخذ اجازة و نسافر أي مكان"
ابو مهرة"لا لا..شو اجازة...و منو بيتابع هالحلال.."
مهرة"انزين ابويه بس اسبوعين"
ابو مهرة"أي اسبوعين انتي بعد..لا لا ماشي"
مهرة"ابوووووويه..فدييييتك"
ابو مهرة"اسمعي جان تبين تسافرين انا الاسبوع الياي بسافر لندن عندي شغل هناك"
مهرة"لا ابويه ابا اسير فرنسا انا..ابا آخذ اغراض حق الجامعة"
ابو مهرة"لا ماروم اسير فرنسا انا..و بعدين لندن فيها كل شي..خذي اللي تبينه من هناك"
مهرة"اوكي ابويه..بس قدم السفر..ليش عقب اسبوع..ما يمديني اخلص اوكسفورد ستريت في اسبوع واحد"
ابو مهرة"هههههه..خلاص عيل..بحجزلنا عقب 3 ايام...و انتي رتبي اغراضج اوكي حبيبتي"
مهرة و هي مستانسة و متشججة"اوكييييييييي..."
و تربع مهرة لحجرتها عشان تخبر مريوم..بس تلقاها راقدة و تقرر تدقلها عقب...
.
.
.
في بيت بخيت بن خلفان..
كانت الاحوال في بيت بخيت كئيبة...كل شي كان بارد و مظلم سواء في ويه بخيت او في ويه شرينا..كل الاحاسيس كانت متجمدة..و الشك متربع في قلب بخيت..كان في نظرهم اللي استوى غلط..كل شي كان ماشي في طريق غلط...هل اللي صار خيانة..او كان قدر ينتظرهم و يترقب أذيتهم...و السعادة اللي عاشوها شرينا و بخيت قبل ما يرد سعيد لحياتهم..هل كانت كذبة..او خدعة..بخيت تاه في عالم من الافكار و الشكوك...معقولة شرينا حرمته تكون خاينة..او لين الحين تفكر فيه..كيف..سعيد يحب شرينا و في نفس الوقت يكون..ا خوها...كان بخيت كل ما يفكر في هالسالفة يوصل لهالنهاية اللي ما تسمحله يتمادى ..سعيد و شرينا اخوان..و ما تسمحله افكاره انه يتخيلهم باي وضع او علاقة غير علاقة اخوة...بس الماضي اللي عاشوه كان مربك..هذي كانت دائرة مالها نهاية...افكار مالها حل غير انه ينساها او يتناساها..بس منو اللي بينسييه
في الجانب الثاني كانت شرينا عايشة في عالمها المظلم من يوم زيارة سعيد..كل شي اتهدم..اللي كانت خايفة منه و تحاول انها تتفاداه صار..و قدام ريلها بخيت بعد..شرينا من يوم ما روحت عن سيعد جاهدت نفسها عشان تنساه او تحاول تقنع نفسها بعلاقتهم الاخوية...و تغلبت شرينا على حبها المحرم و قدرت تواجه نفسها و تتجاوز مرحلة الحزن و الكآبة...و ثاني خطوة اتخذتها انها قبلت بخيت يوم خطبها....كان بخيت هو دليل انتصارها على نفسها و على حبها و على سعيد..شرينا حولت كل حبها لبخيت و حبته و حاولت قد ما تقدر انها تمحي ذكريات الماضي لو كان مب عشانها..عشان بخيت ريلها اللي يحبها و ما أخرلها أي طلب من يوم عرسوا....شرينا كانت خايفة...خايفة وايد انها تخسر جائزة انتصارها...خايفة تخسر الحضن الدافي اللي قدر يحتويها و يشعرها بالأمان و السعادة بعد حب فاشل..و علاقة يمكن تنوصف بانها..شاذة..

تمت الاحوال بين بخيت و شرينا معلقة ..ما يكلمون بعض غير بالاشيا الهامة...ابدا ما فكروا انهم يفتحون هالسالفة مره ثانية...علاقتهم صابها الجفا...و تموا على هالحال..غراب..
.
.
.
.
في بيت حمد بن سالم..كانت لطيفة يالسة ملانة..و قررت انها تتصل في مريم..
لطيفة"الو.."
ام محمد"الو"
لطيفة"هلا خالو السلام عليج"
ام محمد"و عليج السلام و الرحمة لطووف"
لطيفة"شحالج خالتي..عساج بخير"
ام محمد"الحمدلله يا بنتي بخير و سهالة"
لطيفة"خالتي هني مريم.."
ام محمد"هييه لحظة بزقرلج ياها"
و تسير ام محمد تزقر مريم..
مريم"الووو..ازيك يا بت..من زمان ما اتصلتيش فيه"
لطيفة"نعمل ايه ياختي مشغولة اعد يدران بيتنا"
مريم"هههههههه..اكيد الملل مشتغل عدل وياج...
لطيفة"هييه و الله ياختي.."
مريم"انزين خواتج ما اين عندكم يعني نوروو و حصة"
لطيفة"هييه نورو كانت عندنا من يومين..و حصة عندكم...انشالله اتيي عندنا"
مريم تقول في خاطرها..يا رب..تسير عندكم على الاقل نفتك من النقرة كم يوم..
لطيفة"سرتي اتشريتي حق الدوام.."
مريم"هييه سرت انا و ربيعتي مهرة"
لطيفة"اهااا...انا بسير آخذلي من هني و بخلي سعيد بعد اييلبي"
مريم و هي مستغربة"سعيد؟؟ ليش وين هو"
لطيفة"ما تدرين...سعيد سافر فرنسا.."
مريم سكتت من الصدمة.."متى سافر"
لطيفة"يوم الجمعة اللي طاف"
مريم و هي تحاول تسوي عمرها طبيعية"هيييه انزين شو عنده في فرنسا"
لطيفة"ماشي يبا يغير جو على قولته"
حست مريم بالغيرة...و قالت في خاطرها اكيد ساير يطالع بنات فرنسا..شو يبا بي...و قطع عليها حبل افكارها صوت الخط الثاني..
مريم"اقول يلا بخليج عندنا خط ثاني"
لطيفة"خلاص مع السلامة"
و ترد مهرة على الخط الثاني..
مريم"الوو.."
مهرة"مرحبااا..كيفووو"
مريم"هلا.."
مهرة"شو بلاج..ليش جي تكلميني ببرود..ماحيدج.."
مريم"لا ماشي...مافيه شي.."
مهرة"علي انا..يلا اعترفي شو بلاج"
مريم بحزن"مهروو سعيد سافر.."
مهرة"ويعني..شو فيها لو سافر"
مريم"شو شو فيها..اكيد ساير يطالع الشقر اللي عندهم"
مهرة"هههههه...الله يغربل ابليسج يا مريوم..اللي يقول الحين مسولج سالفة عشان تحاتينه هالكثر.."
سكتت مريم و ماردت على مهرة اللي حست انها جرحت مريم بكلامها من غير قصد...وحاولت تغير السالفة..
مهرة"اقوول..ترى انا بعد بسافرعقب ثلاث ايام"
مريم"هاااا....وين انشالله...و ليش تسافرين..منو بكلم انا يوم بتسيرين انتي"
مهرة"بسير لندن ويا ابويه..و بعدين انتي عندج حريم اخوانج..انا لو سار ابويه بقعد ويا منو"
مريم"اففف..كملت..عيل يوم بتسيرين ييبيلي لبس وياج..خلينا نطقم.."
مهرة"اكييد طال عمرج..شو عيل.."
مريم"انزين اسمعي..بخليج الحين..بسير اصيح على الاطلال"
مهرة"هههههه..خلاص اوكي...سيي يووو"
مريم"مع السلامة"..
.
.
و تسير مريم حجرتها وت ظهر صورة لسعيد و هو صغير من بين كتبها ...هالصورة سرقتها من لطوف يوم كانت عندها...و تمت تطالع الصورة و هي حاسة بغصة في صدرها...اتذكرت كيف سعيد ما يداني سيرتها و هي تموت فيه..و تمت تعصر مخها و هي تسأل عمرها ليش و شو السبب..بس طبعا ما عرفت شو السبب و لا عمرها كانت بتعرف..و تذكرت اغنية احلام يوم تقول"لما قلبي..يحب لي ما يحب قلبه و لا يهوى مثيله..و لا يعجب بكلماتي و جلساتي و لا خلوة مقيلي.." و آخر شي قررت انها تشله شوي من راسها و نزلت الصالة عشان تيلس ويا امها و ابوها و حريم اخوانها..
.
.
.
في جانب ثاني من مدينة بوظبي كان نهيان يالس يفكر في ربيعه و اللي استوابه..و كان يبا يتصل فيه بس سعيد من وصل ما اتصل فيه و ما يعرف رقمه..و أخيرا قرر انه يتصل في بخيت اللي ما كلمه من يوم السالفة..قرر انه يوصله اللي قاله سعيد..
تم تلفون بخيت يرن و يرن بس بخيت ما رد عليه..و قبل ما يسكر رد عليه بخيت..
نهيان"الوو.."
بخيت"...."
نهيان"شحالك بخيت"
بخيت"بخير الله يعافيك"
نهيان"بخيت بغيت اكلمك في موضوع.."
بخيت"خير انشالله"
نهيان"لا مب في التلفون..شو رايك نتلاقا في المقهى"
بخيت"خلاص تم..متى"
نهيان"عقب صلاة العشا..شو رايك"
بخيت"انشالله"
نهيان"خلاص عيل اخليك الحين...مع السلامة"
بخيت"في حفظ الله"

م ن ق و ل

السلام عليكم

ترى فيه جم كلمه ما فهمتها
شنو يعني : يرمس ؟؟؟ :D

موفق انشالله

hadi lkhisa iejabeteni ketir,chokran lak.maa lsalama

Valeryana
مشكوره أختي على مرورك وإذا تبين القصه كامله إدخلي الرابط اللي تحت لاكن بدون زعل :31:

aamall
كسرتي خاطري والله لاكن وش أسزي غصب عني
إدخلي هذا الرابط وإنتي تعرفي :(


http://www.montada.com/showthread.php?t=348237

السلام عليكم :)

اللي يبغى التكملة يراسلني على إيميلي! :biggthump

السلام عليكم
رائعه اخى الحبيب / حد السيف رائعه
شكرا لك وسلمت يدك على النقل الرائع
وننتظر دوما جديدك بالتوفيق اخى الحبيب
ولك التحيه والسلام

مع الأسف ،
منعنا المنقول ،

مشكور على اجتهادك ..
الموضوع ( مغلق ) .