لمله!!

أخوي : ذبحت اللمله!
انا : @________________@ الحين هذي لمله ؟
أخوي : ايه لمله...
انا : نمله! مو لمله...
أخوي : ايه لمله!
انا : نمممممممله! ناااااااااااااااااا ملااااااااه...
أخوي : لااااااااااااااااا مممممممممملاه!
انا : نمله يرحم امك...
أخوي : لمله...

انا : محمااااااااااااااااد!! "اخوي الثاني"... تعال شوف هذا شيقول, شوف شيقول انه ذابح =____=
محمد : شفيه ؟ @@ اه, ذبح لمله...
انا : :boggled:
اخوي : ايه لمله...
انا : نااااااااااااااملااااااااااااااه!!! >________________________________________<""""





=_____= انا كتبت مقدمه للموضوع ؟ الظاهر هالمحادثه الدراميه تكفي XD هههههههههههههههههه

يوه... مو من عادتي افتح مواضيع عاد @@ اخر موضوع يمكن من قبل ما لا يزيد عن نصف عام _-_ يحليل اللي طرى علي الفكرة بس :laughing: و اتوقع عاد وضح العنوان اكثر ليييييييش بالذات "لمله!".

و هي في الحقيقه وباء لغوي كان منتشر فبيتنا من عصور سلفت, كنت الوحييييييد اللي ينطق الكلام عدل انا :17: ... و انقالت, واحد شاط عن جماعه و هو وسطهم ما يعيش ابد... لدرجة اني كنت بصدق ان اسمها لمله _------_ كنت متعقد من الكلام الغلط سواء بحروفه و الا تركيبه! كنت احاول اقنعهم و المشكله يحاجوني و بعين قويه بعد!

و يا ليت وقفت على "لمله!" و خلاص... اذكر مره مع نفس اخوي هذا صار بينا مضارب و هواش على منو يلعب اول بالسوبر ننتندو =_= كان الجو بينا شرار و مشتعل جد! و شوفو شصار...

انا : البارح اخر واحد لعب انت... رحت نمت اصلا و خليتك طول ليلك جالس عليها!
أخوي : كول جب!
انا : @______________________________@ هاه ؟
اخوي : كول جب اقولك!!
انا : هههههههههههههههههههههههههههههههههههههههههههههههههه!!! الله... شنو كول جب ؟ شتبي يعني ؟
اخوي : اقولك بس عاد!! لعب مانت لاعب!
انا : ههههههههههههههههه لا عيدها عيدها, كول جب ؟ اوكي اوكي انا اسف... بس ثاني مره حدد, اما كول ووراها اي كلمه بخاطرك... بس خلها غيييييير جب! هههههههههههههههه او جب بروحها :laughing:
اخوي : مالك شكو انت!!
انا : O_________________________________________o هههههههههههههههههههههههههههههههههههههههههههههههههااااااااااااي!! شنااااااااااااااااو ؟ مالي شكو شنو هذي بعد!!؟ مااااااالك شغل او شكو بروحها :09:

و الظاهر وقتها جد خربتها ضحك... لانه قام و عفسني من الحره =____=




بس لا لا جد جد يعني... بالله هالكلام ينفع ؟ اوكي نقول وقتها اعمارنا حول ال 9 او ال 10 سنين but still... يعني شمعنى انا اللي كنت من بينهم اتكلم صح, انا ما كان فيني شي مميزني وقتها! كنت اسولف مع العالم طبيعيين و عادي يسولفون صح... كنت اعاني معاهم معاناه! المشكله اطلع انا الغلطان بالاخير عاد... و تمشي على اني انا اللي انشر الخزعبلات.

عاد فترتها كنت غاسل ايدي من اخواني... لحد ما جا اليوم اللي تطلع فيه اختي اطقع منهم _--------_

أختي : مشااااااااااااري!! "و هي فرحانه جايه من الحوش تركض"
انا : هاه... :31:
أختي : أنطرت الدنيا!! ^___________________________________^
انا : ............,
أختي : و الله صج روح برى للحوش بنفسك و شوف! @@

جريتها مع اذنها وجبتها للحوش...

انا : الحين بالله عليج لو جينا نتكلم عن الحدث اللي يصير الحين... نقول الدنيا انطرت!!؟
اختي : اجل شنقووووووول ؟ >__________________<
انا : ماااااااا لقيتي تقولين الا انطرت! يعني بالله الحين اللي قاعد ينزل اسمه نطر ؟ :31:
اختي : هاه O_O لا مطر!!
انا : يا سلام! اجل دامه مطر... شحقه تقولين تنطر ؟
اختي : لانها قاعد تنطر... شتبيني اقول ؟
انا : مطر... الدنيا قاعد تمطر _------_
اختي : تمطر... تممممممممطر, تممممممممطر... صعبه :boggled:
انا : اجل تنطر سهله الحين! الصعب علي اناااااااااا شلون استوعبت شتبين تقولين, لو واحد غيري مو مقدر حالكم كان دجيتو...


قلت عاد يالله... يمكن مع الايام يتسنع كلامها, مره عاد عطيتها بيبسي و قلت لها حطيه بالفريزر @@

انا : وين حطيتي البيبسي ؟ مو موجود بالفريزر...
أختي : اه نسيييييييت... حطيته بالفلاجه :biggrin:
انا : ياااااااا الله :08: شحلااااااااااااتكم... فلاجه :laughing: يا سلااااااااااام... يعني الحين ممكن اقول "حطو الفلج بالفلااااااااجه" و بتعتبر جمله صحيحه Gramaticaly ? او بالقليييييييييييل Dramaticaly ?
أختي : شقاعد تقول ؟ @@"""
انا : ياااااااا امي اسمها ثلاجه! الحين ثلاجه تثلج الاشياء... تجمدهااااااااااااا, بالله في شي بالدنيا اسمه فلج !؟
أختي : لا قول "حطوووو الثلج بالفلاجه" :laughing: يعني اسمها ثلاجه الحين ؟ :boggled:
انا : لا و الله للحين فيها شك :28: اسئلي واحد ابخص مني بهالمواضيع...



و قلت لا يا ولد... مستحيل! لازم يكون فيه مصدر لهالمصيبه! راس مدبر و الا شي :boggled: الا ان كان لي هذه المحادثه مع الوالده بعد ما خلصت من صلاتها و جت بتتسنن, طبعا قعدت تسبح و تستغفر... فانا قطيت اذني شوي, الا سمعت العجب!

أمي : أصطافر الله... أصطافر الله... أصطافر الله...
انا : يمه! لحظه شتقولين ؟
أمي : أبتسنن... قاعد أسبح...
انا : ادري... بس لا ما يجوز تقولين اصطافر الله! يقولون "أستغفر الله"! لما يستغفرون و يسبحون... مو اصطافر الله! فيه احد يصطافر الله بالله يعني شنو ؟ _------_
أمي : وشنهو ؟ أستغغغفر الله ؟
انا : ايه يمه هذا استغفار...
امي : ماني أدرى من الله... و الله يا وليدي من طلعنا عالدنيا و حنا نقول اصطافر الله... ما دريت و الله لا نعرف نقرى و لا نكتب و اخذنا عليها
انا : هههههههههههههههههه ادري... و اناااااااااا اقول اجل شفيهم عيالج :laughing:


من بعدها ارتحت... قلت العتب يمكن مو على خواني و تعاملهم مع الناس, يمكن لانهم يقولون الاشياء و ما يعرفون طريقة كتابتها, كنا صغار!

حسبت هالوباء عندنا بس... لحد ما مره بالمدرسه جلست على طاولة واحد من عيال الصف, و جاني معصب...

الولد : قوم عن بكاني!
انا : بكانك ؟ على هالخشم...


و قمت على طوووووول!

اللهم لا الاعتراض... خلاص, وصلت لحالة رضى تاااااااام عن الحال... مو حنا جايز نكون احسن من غيرنا XD

طبعا هالكلام كله من ايام الطفوله... مواقف من يمكن 13 او 14 سنه عدت.

And now~... Several years have passed, with a WHOLE new generation!

و الحين عاد للحلى و القبله :laughing: اللي خلتني افكر اكتب هالموضوع بكبره... "شوق" بنت أختي اللي تكلمت عنها فوق هههههههههههه اللي كانت تقول الدنيا انطرت :p

شوق مغرم فيها... انا اللي مسميها :icon6: ياااا الله, اموت على اسماء البنات اللي من ثلاث حروف بس... جنان صج, شكلي مابي يجيني بنات بعدين الا عساس اسميهم : نوف, وعد, عهد... و هلم جراً XD

المهم... كنت ماخذ شوق معاي للبقاله, و حنا بالطريق...

انا : شتبين من البقاله ؟
شوق : تاااااااو تاو مع تيته! ^_____________________^ "كاو كاو مع كيكه... كيكه بالكاو كاو او شي, اللي يجي هههههههههه"
انا : ههههههههه تاو تاو مع تيته مره وحده!؟ واااااااجد... بس اوكي

هني دق تليفوني و رديت عليه... وصلنا للبقاله و انا للحين اسولف...

شوق : دالي... "مشاري"
انا : هلا شوق @@
شوق : سبلعه!! "بسرعه"
انا : ههههههههههههههههههههههههههههههههههههههههههه... سبرعه اجل!؟ بسرعه بسرعاااااااه مو سبرعه...

خلصت مكالمتي و رحت سبرعه على ما قالت للبقاله و شريت لها اللي تبي... و حنا راجعين بالطريق

انا : شوق... هذا شنو ؟ "مديت لها سفن اب"
شوق : سنفب! ^_____________________^
انا : ههههههههههههههههههههههههههههههااااااااااااااي!! سفن اب!
شوق : سنفب...
انا : سفاااااااااااااااااااان... آآآآآآآآآب...
شوق : سنااااااااااااااااااااااااااا... فب!!
انا : ههههههههههههه, طيب قولي عيون..
شوق : عيووووون...
انا : خشم @@
شوق : خشاااااااام...
انا : اصبع
شوق : إبصع!!... لاااااااء >________< إبصع... اصصصصصبع! :laughing:
انا : هههههههههههههههههههه ياااااااااا الله تحفه! طيب @_______________________@ قولي... Extinguisher...
شوق : ........,
انا : اكستينقيوووووووووووشاااااااااااااااااار...
شوق : است.. ماااااا اعلف >________________________<"""
انا : ههههههههههههههههههههههههههههههههههههه كااااااااااااافي كافي! من يلومج انتي بعد... منهي اختج!؟ منهوووووووم خوااااااااااالج!؟


هههههههههههههههههههههه يااااااااااااا الله على ذاك اليوم... ياني ضحكت ضحك, استلمتها طول الليل قولي و قولي... وناسه توني ادري انها جد جد طالعه على خوالها!




و هذاااااااااا الموضوع بما فيه... ههههههههههههههه اي واحد حاب يشارك ؟ لان موقن كامل الايقان, ان فيه عجايب للحين مو سامعها XD
و معليش على الاطاله, بس تعرفون اول موضوع من عقب فتره... و يمكن موضوعي الاول هني بالمنتدى العام @@ كله اشارك ما اكتب مواضيع... و ليته كان خفيف عليكم عاد ^^

اهلا بعودتك...


الظاهر انك شارب يوم انك تكتب الموضوع.. :D :D :D


والله خوش لملمة يعطيك العافية...

المهم حبينا نشارك ..

وين الفورم خلنا نعبيه ؟؟ :D :p

Regards

موضوع حلو ^_^ كمشور تيدوس

دايم الاطفال كذا بس الكبار 0_0

ياخي انا ما احب الا البزران اللي ما يعرفون يتكلمون
سبحان الله اذا صاروا يتكلمون زين ما اهتم فيهم مثل قبل
يمكن لانه يكون اسهل التعامل معهم قبل ما يعرفون الكلام :)

على العموم ترى الحال من بعضه
كثير الاطفال الي يكون عندهم مثل هالحالات
يعني لا تخاف عائلتك ما فيها شي غريب :p

هلا تايدوس ^^ ..

اقتباس:

---

ياخي انا ما احب الا البزران اللي ما يعرفون يتكلمون

---

هذا ازين ما فيهم .. واذا كانوا ما يعرفون يتكلمون :D ..


قد كتبت موضوع انا عن الاشياء الي ما كنا نعرف نقولها ..

انا ما كنت اقول : تويكس .. كنت اقول ويث -__________________- .. وامي من قريب تستهبل علي تقولي تبي ويث ؟ :laughing: :laughing: ..

واخواني الصغار من اول .. انواااااااااااع الاختصارات .. اخوي دحوم :

سياره : دا !!

ثلاجه : فيم !!

تلفزيون : تيفي :09: .. وغيرها ..

بس من جد فله .. والغريب انهم اذا غلطوا .. تنتشر عندنا " الكبار " .. ونصير نقول زيهم ..


تذكرت شي .. عند عماني انواع البزرااااااااان .. كثار ماشاءلله @_@ .. المهم .. وكل فتره يطلع واحد جديد :biggrin: .. عاد طبعا لازم يكون له اسم دلع ..

عندي بنت عمتي اسمها لمياء صغيره طبعا .. ندلعها : دنوا !!!!!!!!! ..

بالله وش جاب لجاب .. اللهم اخوها طارق ما كان يعرف يقول لمياء ويناديها دنوا .. وانتشرت -___- ..

وكثير تصير كذا -___-


مشكور تيدوس عالموضوع الحلو ^^ .. ولازم تصير تكتب اكثر :reporter:

ياحليلهم هالبزارين عليهم كلام خخخخ :09:

يقلبون الكلام فوق تحت مثل وده (ورده) ابا ابر (الله اكبر) هذي انقلبت مره خخخ :31:

ومشكور على الموضوع الرائع ^_^

توووووووووووووووووووووووحفة أنت واخوانك مشاري ...........

عمرك سمعت واحد يقول " ماان ... ماااااااااااان ....... مااااااااااااااااااااااان سو دوم "
هذا ولد أخوي مشاري يقصد " محممد ... محمممممممممد .... محمممممممممممممد قوم أقعد "
سو دوم مرة وحدة ، صار كأنة خدامتنا ....
لا ويوم قمت يقول " ودلني البدالة " البدالة مرة وحدة ، جاريته ويالله على هالخشم
ومن يومها وأنا ماسكة وأعلم فيه ، الحين يتكلم أحسن من اخوه ضاري اللي أكبر منه :-)

السلااااااااامووو عليييكووووووووم

ههههههههههههههههههههههههههههههههه

حركاااااات!
عجيب الموضوع هههههههههههههههههههههههههه

مممم

عندك..
واحد مو خوالي وايد يقول "آآبوووك آآبوووك" حتى وهو يتغشمر..


طبعاً معناها "العن أبوك" يعني -_- للأسف

المهم..

مرة قاعد أصلي استخارة بالبيت..

و أوقفت يمي اختي تبي تقلدني..
لما يت تبي تكبر قالت "آآبووك آآبووك"
...

طبعاً اختربت صلاتي انا من الضحك _-_

هههههههههههههههههههههه..
موضوع لطيف جداً...

اااااخ..شحجي و شقول...استغفر الله..عاهات عندنا بالبيت -________-..

عيال اختي كلهم يوم صغرا ما يلفظون الـ"خ"..يلفظونها "ح"
يعني يوم ينادوني ينادوني "حالي" هههههههههههههههههه..الله و الحال...
كنا نغدي خانات يوم نرمسهم..كله نقولهم خخخخخخخخخخخاااء...خخخخخخاااااااااااااااء يا عيال الذين خااااااااء...هههههه

احنا عاد ما شاء الله..يا كثر اليهال عندنا بالبيت..بس للأسف مو متذكر كل شي..
من تنقيعاتهم المشهورة..

مايونيز = منويز (هذا حمود ولد خالتي)

كنتاكي = تنتاكي (جميع اطفال العايلة -_________-)

جمعية = جعمية (ايضاً حمود..نوجهله تحية من هني)

لا والي يقهر انهم يصرون..و يردون عليك جنك انت اللي ما تفهم :boggled:

هههههههههههههههههه..احلى شي بنت بنت عمي..من البحرين (على فكرة..هي اول من أبدل الـ"خ" بالـ"ح" في العايلة -__________-)

المهم..الاخت هاي يوم انها صغيرة..كنت اقولها..انتي عندج جواز؟؟
تقولي: لاااااااااااااااااا..ما ابي اتزواااااااااااااااااااااااااااااااااج..

هههههههههههههههههههه..و تصيح..هههههههههههههههههههههههههه..اااخ يا بطني..
طبعاً هاي مو تنقيعة..بس فهم غلط للموضوع..عاد انا ماشي قلت لازم اقولها :28:

مشكور تايدوس عالموضوع الي اعاد لي ذكرات كانت Sealed و المفرض اتم على هالشكل من الفضيحة..
و ينطيك الف عافية..

P.S: تنقيعة = بدلية

هههههههههههههههههههه

فعلا مواقف تضحك من قلب :09:
بس على فكرة لما كنت صغيرة....انا كنت من قوم لمله :31:
كنت اكره كلمة "مستشفى " ماعرف انطقها :boggled:
كل ماابي اقولها ....اقلب السين شين والعكس صحيح ....كنت اقولها ...مشتسفى :08:
ويعني باغيرها واقول "مستوصف" تطلع نفس الحالة:o ....يانا كنت اكره حرف الشين !!!
بس يللا يقولون اللي بالطريقة هذي....يطلعون فصيحين وهم كبار :09:

ههههه بس على طاري لمله....بنت اختي الصغيرة نفس الشيء....ماتقول الا لمله ....احسه كيوت ...يونسون لاصاروا مايعرفون يتكلمون :laughing:

هههههههه ولكم باك اخوي من زمان عن مواضيعك


الصراحة ضحكت من قلب خصوصا عند أصطافر الله :p

ولا كول جب هههههه


بس أغلب البزران وهم صغار كذه يعني عادي أما اذا تطور الأمر لين صاروا كبار فأعتقد هنا في مشكلة


وأظن قوة السمع لها تأثير


سلامي

هههه وانا اتحسب احنا بروحنا جيه -.-

عندنا كل صغارية العايله وحتى احنا يوم كنا صغار نقول نفس التنقيعات


قنبله: نقبله

مدفع: مفدع

كاتشاب: شيكب

مايونيز: مانونيز

نجمه: جمنه

حركه: حيكه

وهذا غيض من فيض XD

يحليل الصغاريه بس

هههه .. موضوعك طريف وظريف :biggthump

يا حليلهم الصغار ... الله يبارك فيهم ويحفظهم


من الأقوال المأثوره وما زالت في الذاكره

كمبيوتر : كوتر .. < i like how it sounds :D .. دايم أقول لخوي الصغير .. رح شغل الكوتر :biggrin:

شوكة : كوشه .. أبي كوشه أبي كوشه وين كوشتي !! .. خخخخخ

ملعقه : ... ( ما أتذكر زين .. بس كانت كلمة معفوسه عفس يمكن مقلعة هههه )

طحنية: طـاطـانـيـه ...

ببسي : بسي ..

يا زين تشفير الصغار .. kawai encryption

أتذكر من زمان كنا نسجل كلامهم بالمسجل ... لو تقدر ترفق عينات صوتيه .. كان الموضوع يكتمل :biggrin:

هاي تايدوس

اقتباس:

---

المشاركة الأصلية كتبت بواسطة Tidus

but still... يعني شمعنى انا اللي كنت من بينهم اتكلم صح, انا ما كان فيني شي مميزني وقتها! ^^

---

لا تظلم نفسك أنت مميز جدا , أقول لك ليش لأنك من جيل أفتح يا سمسم.......والله أنه كان من أفيد البرامج وأحلاها.

أما البقيه من عائلتكم الموقره فمن تحليلي لمخارج الحروف أتوقع هذه أعراض مرض البوكيمون اللذي أنتشر مع الجيل الجديد.:o

اقتباس:

---

المشاركة الأصلية كتبت بواسطة Tidus

أختي : اه نسيييييييت... حطيته بالفلاجه :biggrin:


انا : ياااااااا الله :08: شحلااااااااااااتكم... فلاجه :laughing: يا سلااااااااااام... يعني الحين ممكن اقول "حطو الفلج بالفلااااااااجه" و بتعتبر جمله صحيحه Gramaticaly ? او بالقليييييييييييل Dramaticaly ?
^^

---

لا لا لاتظلم أختك.......الأخت شكلها من متابعي مسلسل درب الزلق.......لأنك إذا بترجع لمصطلح الألفاظ في هذا المسلسل ستجد كلمه (فلج) مكتوبه على جدار بيت بن عاقول والجمله هل (فلج بو صالح)

وتسلم على الموضوع الجميل.

ههههههههههههههههههههههههه

على طاري المايونيز... اختي الصغيرة صار عمرها 7 سنين و ليلحين تقول "مينونيز"

يووه كل هالردود بيوم XD


UltimatE_ShArK :
لا تلومني يا اخوي خرف ما بعد الامتحاناتXD ... بعدين لولا شوق ما كنت كتبت الموضوع :08: ترى مو من عادتي اكتب مواضيع عامه...

Regards~ ^^


Mista Koo :
مو عن كبار و الا صغار, الفكره نطق الكلام من دون معرفة كتابته... و الا الكبار من يقدر يتكلم عليهم ؟ و الله يا ليتنا مثلهم اللي حتى سجاده الصلاه تربو 24 جالسين عليها!

و شكراً عالمرور ^^


E-Mad :
يااالله اجل ما شفت شي, بعضهم يفقعك من الضحك حنكته بالكلام! بس اسمح لي البدليات انا مقدر عليها XD


Trapped Inside :
هلا فيك و مرحبا, يالله حيه ^_________^

اقتباس:

---

ثلاجه : فيم !!

---

اما فيم!! هههههههههههههههههههههههههه ياااالله شنو العلاقه ؟ يحليلهم
هههههههههه لمياء دنو...
طيب عندي ولد خال اسمه زيد... و الزاء ينطقها دال
عاد امه ماخذه على جوه دوم تغي له و يرقص... تقوله :
"يا دين دوله... يا بعد كل الادوالي~" يا زين زوله... يا بعد كل الأزوال :31:
و هو مهيص يرقص :jester: هههههه يعني حاله كسيفه :08:

و شاكر لك اخوي على مرورك و مشاركتك... سعيد جدأً بوجودك ^^


moon girl :
كثيييير... اموت على نظرة البزر للعالم انا, دوم امسك واحد فيهم و اسئله عن اشياء كانت معقدتني لما كنت كبره, و تعال اسمع الاجوبه! افتاااااااااااااااء~ ههههههههههههههههه

و مشكوره عالرد ^^


Techno :
يالله انك تحييييييه, يالله انك تسعده :laughing:
اوووه عاد حدك و لا السمي... مشاري عجيب XD اجل مان مان سو دوم ؟ ههههههههههههه لغه بروح احسها مالها علاقه :09:

سعيد عجبك الموضوع XD


ATG :
يا فاااااااااشل... اجل عجبك الموضوع ؟ XD
هههههههههه تخاريف بعد الامتحان فله, انواع التحشيش!

كانك تدري... بعض الناس اعوذ بالله على لسانهم كلمات, عيالهم ياخذون عليها و يحسبونها من اساسيات الكلام =_= فلا تستغربها...
ههههههههههههه لا تلوم ام سبع سنين... فيه واحد خليته يقرى الموضوع و قالي : تصدق للحين اقول انطرت!!
توقع منو :09:

شاكرلك على الحظور و زين اللي عجبك و الله ^_____________^

NsaN :
هههههههههههههههههه فيه عندكم يقولو للكتكات : تكتاك ؟
لانها ترى وردت بسجل العايله بس مصيبه لو بقعد اكتب ما بخلص XD

عندي ولد خالتي مساعد... ذاك اليوم سالته شنو احلى الافلام عنده ؟
قال : ستايدر مان! "سبايدر مان"
و تعال دورني هني~

ولو... فرحت دام الموضوع جد عجبك, و يعطيك العافيه على مشاركتك ^^


little-angel :
ههههههههههه كنتي من اللي يقولون لمله ؟ ترى I didn't mean any offense XD
و يالله ما عليه عشان نكون ايفين تراني احوس لما كلامي يحتوي على حروف السين و الشين بفس الوقت _-_

ذاك اليوم جيت بقول لواحد "عسى ماشر ؟"... قلت له عشى ماسر ؟, و تعال شوف الشباب مسكوها علي الحين _---------_""

و مشكوره عالرد ^^


BOOOB_2002 :
يا هلا بوب ^^
و الله يا بوب هي فعلا مشكله لو الواحد كبر و هو للحين يعك... مره كان عندنا عشى و الشيبان جمعه و سوالف, واحد منهم الظاهر ضرب معاه العرق التجاري و جا بيسولف عن مؤسسات و مدري شنو... انا انحرجت من كثر ضحكي عندهم لما جا بيقول "مؤسسه" و قال موسوسه... هههههههههه رحت طلعت برى المجلس و كملت ضحك! يعني ليش سولف دامه مش و لا بد بهالمجال ؟ XD

و شاكرلك مشاركتك ^^


Angel whisper :
أهلاً أنجل ^^
ههههههههههه اقولج خلاص وصلت لمرحلة رضى تام... طلع العالم كبير بما فيه XD
و ايه و الله بعض الصغار ما تلقى منه ثنين...

سعيد بمشاركتج ^______^


Master ArNab :

اقتباس:

---

ملعقه : ... ( ما أتذكر زين .. بس كانت كلمة معفوسه عفس يمكن مقلعة هههه )

---

هههههههههه موجوده موجوده عندنا... معلقه ؟ كانت وارده ترى XD

حتى عندنا بالكويت يسمون الملعقه قفشه... فتلقى حتى بهذي بعضهم يقول فقشه _---------------_

هههههههههه فله اجل لو برفق صوت شوق... بتسمعون الهوايل!

و شاكرلك على مرورك و الله ^____________^


smigle :
اه, المزيون راد بموضوعي ؟ :08:
هايات ^______^ هههههههههههههه يمكن, بس و الله ما كنت اطيق هالبرنامج!
و ايه مو بس بدرب الزلق... الحين عندك على خطوط السفر بقالات مكتوب عليها "يوجد لدينا فلج" فما تلوم اللي التمست معاه السالفه XD

و شكراً على ردك ^^

اقتباس:

---

ذاك اليوم جيت بقول لواحد "عسى ماشر ؟"... قلت له عشى ماسر ؟, و تعال شوف الشباب مسكوها علي الحين _---------_""

---

حتى احنا في واحد ففصلنا ماسكينها عليه للحين ^_^ لا يكون انت

اقتباس:

---

كنتاكي = تنتاكي (جميع اطفال العايلة -_________-)

---

Same Here
مو بس الأطفال حتى الكبار صاروا يقولونها

اقتباس:

---

كاتشاب: شيكب

---

كمان نفس الشي

حبيت أضيف إضافة صغييييييييييييييييييييييييييييييييييييييييييييرة و ماراح أقول من منو....

دمك مليق!!!

ATG

اقتباس:

---

حبيت أضيف إضافة صغييييييييييييييييييييييييييييييييييييييييييييرة و ماراح أقول من منو....

دمك مليق!!!

---

ههههههههههههه دمك "مليغ" تكفى... مو مليق XD

و شفت شلون عاد :08:

سمعو سمعو......


هذا أخو رفيجي الصغير.

أم رفيجي دايماً تروح أعراس وعزايم...

وأخوه الصغير كل ما يعصب عليها يصارخ ويقول: كل يوم كمياح كل يوم كمياج.......بس بس.

ههههههههههههه كل يوم كمياج كل يوم كمياج... اشهد له هالولد, عاد اللي مثله ينقدون تصرفات اهاليهم لو كبرو مافيه غيرهم يسنع البيت XD

ههههههه .... والله فطست من الضحك على تنطر ( عاد احنا نقول
بالكويتي تنطر ...بمعني تنتظر ^^ )

بس لا تخاف الكل جذي ... عندنا وعندك خير +___+
مثلاً أنا كنت أغلط بكلمات وايد ..

مستشفى : مشتفشى +_*
بنفسجي : كنت انطقها بطريقة عجيبة وغريبة .. والصراحة لحد ألحين
أغلط فيها بعض المرات* حالتي مستعصية * :17: :09:
قطوه ( هره ^^ - قطة) :مياو ( اعتقد معظم الياهال كانوا ينطقونها جذي
خصوصاً من أهلي ^^ )
كتكات : تكتاك ^___^ وأخواني الصغار لحد ألحين ينطقونه جذي مع
إنهم يقدرون يقولونه صح لكن تعودو ... للعلم اخواني الصغار 10 سنوات
و14 سنوات :jester: ... أدري حدهم Baby ^___^

واخوي الصغير كان ينادي أمي يايه... كل الناس ماما أو يمه أو على الأقل
شي فيه حرف الميم إلا هو مادري وين طلع هالاسم .. وحتى كان يناديني
لو ( مع إنه ماله دخل باسمي بالمرة +_+) ... وطبعاً كلمة العائلة وهي
خشمي ( الأنف ) الكل تقريباً كان يقول شخمي ^___^


وأذكر مرة بنت خالي الصغيرة ( 7 سنوات ) كانت عندي بالغرفة وتسألني
عن أسامي الغراضي اللي عندي ( المكياج ) .... ذاك اليوم مت من
الضحك عليها ... مسكينة مع إنها حاولت تقول مثلي لكن كان يطلع منها
أشياء غريبة ^^ .... ياحلاتهم والله تشوفهم تستانس ^^ أحلى شي
بالدنيا الصغار .... والله نعمة .... الله يرزق كل المحرومين من هالنعمة
( دخلت جو ^^ ألحين اللي يسمعني يقولو عندي عشرة ^^ )

وأنا بعد أخربط بين الهريس والجريش ( آكلات) ... كنت أقول عن الهريس
هريش وعن الجريش جريس :jester: .... بس الحمدالله كبرنا وتسنعنا لكن
لا انكر وجود بعض المشاكل اللغوية البسيطة حتى الآن :p

أحس أحلى شي في الصغار لما ينطقون الكلمات غلط ... وااااي ياحلاتهم
ألحين بنت اختي توها صغيرة 4 شهور خلها تكبر شوي ... عشان نشوف
هل راح اطلع مصطلحات يديدة تضاف لمعجم العائلة للبدليات ؟:laughing:


مشكور أخوي على الموضوع .... ^___^ خليتنا نتذكر خرابيطنا....والله
كانت هالاشياء عندي مشكلة وكنت أسوي أفلام هندية بسببها خصوصاً
لما تعيب على أختي ^___^

لملة ..انطرت ..فلاجة ..بكاني..http://forum.shark-world.com/images/smilies/lol1.gif

اممم بنت اخـوي ..لما تجي تقول * صغيرون * ..تقول * صغريون *
وولد اختي ما يقول * سفن آب * ...يقول * سناب *


موضوعك so funny... :D

اممم الفلاجة .. كنت اسمع بعض الاطفال يقولون مفلج *مثلج *

:ds015:

لمــــــــــــــــــــــلة


خووووووش عنوان بصراحه :09:

أمــــــا الإعاقة الكلامية يا أخوي موجوده عند الكل ههههههههههههههههههه

مو بس بعايلتناااااااااااااااااااااااا:boggled:

مشمشوووووووه يالفظيحه وصفك بلييييغ :biggrin:

لمله ، انطرت ، فلاجه ، بكااااااان ( حتى سعد ولد خالتك يقولها للحين هههههههههههه) ، اصطاااااااااااااااافر الله :laughing: ( فديت اللي قالتها ياعمري هههههههههه) ، ابصع ابببببببببببببببصع عجييييييييييييييييييبه ههههههههههههههاااي

لحظه اكو بعد بلاوي ماذكرتها خخخخخخخخخخخخخخخخخخخخخ

منها أمي فيشه :D جان تذكرهاااااااااااااااااااااا
تشكب = كتشب
تكتووو = كتكووو
و ....... و........ و..........

محنا خالصين هههههههههههههههههههه


عمومـــــاً يالغالي الله يعطيك العافيه على الموضوووع المصرقع:laughing:

والله كوووووووووول ويسعدني ويشرفني يكون أول موضوع ارد عليه :)

تســــــــــــــــلم لنا يارب






سلااااااااااااااااااااااااااااااام

انا انسه فوارلة:ee2: :P


ههههههه

يومني صغيره كنت دايم اقول الفراوله= فوارله>< واخذوها اهلي طنزة علي..
للحين اسمي في بعض جوالات الاهل انسه فوارلةXD

*Ran* :

اقتباس:

---

بنفسجي : كنت انطقها بطريقة عجيبة وغريبة .. والصراحة لحد ألحين
أغلط فيها بعض المرات* حالتي مستعصية *

---

بونافنجي ؟ هههههههههه لان ترى قالوها عندنا بعد XD


ورد :
زين اللي عجبكم الموضوع, شكرا على الرد ^^


NoOoNaH :
ههههههههههههههههه حطي عشر طعش خط تحت ما بنخلص... و سلمتو لي ^^


Lena :
ههههههههه فوارله, صعبه عاد... فراوله اسهل, بالعاده تطلع غلط لان اساس الكلمه صعب فيخلونها اسهل
فحالتج عجيبه صناحه XD

و اشكرج على حظورج يا ططوه المنتدى و المشاركه "ططوه = قطوه ^_________________^ "

عندي مقلعة ومددس بعد :icon11:



مقلعه=ملعقة
مددس=مسدس

طرمر دمروني = دمر بنطروني -_-

بما اني مزكم اليوم,,

من جد ماعرفت اقول نمله,,ماطلع معي الا لمله.....

اقتباس:

---

little-angel :
ههههههههههه كنتي من اللي يقولون لمله ؟ ترى I didn't mean any offense XD
و يالله ما عليه عشان نكون ايفين تراني احوس لما كلامي يحتوي على حروف السين و الشين بفس الوقت _-_

ذاك اليوم جيت بقول لواحد "عسى ماشر ؟"... قلت له عشى ماسر ؟, و تعال شوف الشباب مسكوها علي الحين _---------_""

---

هههههه ......... لمله رحمة عند اللي كنت اقوله :09:
وعلى فكرة ترا كنت امزح :P

اقتباس:

---

عندي مقلعة ومددس بعد :icon11:



مقلعه=ملعقة
مددس=مسدس

---

ههههههههههه ...
تصدقين عاد ....هذي احسها لازم تمر على اي طفل :09: عيال خواتي اللحين نفس الحالة ..مددس:laughing:
بنت اختي....تنطق (بعدين )... عبدين !!