http://img.photobucket.com/albums/v4...okai-title.jpg
قبل لا ألعب اللعبة :
انا ماعتقد اني الشخص إلي لازم يكتب تقرير عن هاللعبة، لأني ما أواطن شي اسمه دراجون بول، يعني لو حذفنا اني أذكى انسان بالعالم، ماني قادر أفهم شلون هالأنمي ظل ينعرض عالتلفزيوم لكل هالمدة، و شلون في جيش من المعجبين إلي يموتون فيه مع انه مافيه أي منطق، و شلون إلي سوو الأنمي و ألفوه يطلعون و يتمشون على راحتهم بدون لا شغلات ثقيلة تنحذف عليهم، انا شفت من هالأنمي جم حلقة بالغلط، و دايماً أشوف شخصيات شكلها غريب و مادري شلون صاير و عندها عضلات وزنها تقريباً 400 كيلو طايرين بالسمه و يحذفون كور ملونة مشعة على بعض، و كل كرة تفجر مساحة قد مونتانا و لسبب غامض ما تأثر بالشخصية إلي تنفجر يمها، طبعاً غير الحوار المبالغ فيه و الصراخ إلي عالفاضي، لكن لا تحاتون، ما كتبت هالتقرير إلا بعد ما قمت بعمل بحث و جذي...رحت فريت كل المحلات بمجمع الرحاب إلي بحولي (بالنسبة لغير الكويتيين، هذا مكان عندنا مجمع كامل كله ألعاب و جذي) و دشيت محل لقيت عنه مجلة مكتوب على غلافها ان فيها معلومات عن هاللعبة، قعدت أطالع الغلاف جذي لمدة 5 ثواني، و أعتقد اني صرت جاهز اني أكتب التقرير :) و أحذر العالم من هاللعبة الشريرة هذي!!!
لما لعبت هاللعبة قمت أشك ان أغلب المعجبين بهالأنمي هم من اللي أعمارهم 12 سنة واللي يطامرون على القنفة وهم يطالعون الأنمي و ياكلون مليون صحن كورنفلكس (انا ما أتطنز على الكورنفلكس... انا كل يوم آكل منه!)، السبب بهالتفكير هو عشان تقدر تستوعب الحركة المهزوزة وسيناريو ال 20-كلمة-بالثانية إلي تميز الأنمي، خلايا الدم إلي بالمخ لازم تكون متروسة كافين و شغلات ثانية عشان تقدر تستوعب و ما تنفجر و ينفجر راسك وياها، و سوو لعبة حق الناس إلي ما تبي تشغل مخها أكثر من جذي عشان تقدر تلحق عاللعبة و صار ما في شي اسمه كومبو ولا انك تضغط زرين مع بعض ولا شي، هالشي خلاني أبي أعرف شنو قدرات أغلب معجبين هالأنمي (طبعاً انتوا ملاحظين اني أستخدم "أغلب" عشان ما تتوحدون فيني ! ههههههه) فدشيت على مكان و كتبت تقرير بالانجليزي ذميت فيه اللعبة، و صراحة خرعوني ! وايد خفت! انصدمت! طلع في ناس مو بس عندهم ان الأنمي و اللعبة قمة! لا و طلعوا كلهم يعانون من مرض في التهجي! ما يعرفون يكتبون! أو انهم كانوا يكتبون عن طريق انهم يحذفون قطع الأثاث عالكيبورد!
هذا إلي رد علي :
This game is one of the best figthing video games that I played so far. You people should be very happy that this game for PS2 came out. So just be happy and shut up!
ATG this game OWNZ YO! it was one of the hottest sellin games where i live so if u r a gamer u really don't deserve workin' at ratein games idiot!!.... you should just quit cause u can't rate a game you stupid idiot!...
To me (a die hard fan till the end) the sounds were so acurate it gave me chills. I mean if someone were in another room they would think the show was actually on. this aspect of the game was as dead on perfect as it could have been(except for how fast they speak when pulling of moves like the kahmeahmeha wave it sound like its in fast forward) But overall It still THE BEST...DBZ FORERVER!!! !!! !!! !!!
ماشالله.. هههههههههههههههه
هذا راح يعطيكم فكرة عن شنو هدف إصدار هالأنمي! مجرد اني شفت تقاريرهم خفت، و جازفت مع اني كنت أقدر أحاول أجنب نفسي أسامي مثل idiot و غيرها (على فكرة انا غيرت الأسامي شوي لأنها كانت فيها قلة أدب شوي هههههههه)، جازفت و حطيت اللعبة بالبليستيشن و شغلتها.
بلشت بال vs mode ، و كنت أتمنى ان اللعبة عالأقل تنلعب، لكن للأسف، السبب الوحيد إلي خلاني ما أركض و أطلع برة و أنط بالشارع والإشارة خضرة كان لأني كنت أبي أحذركم من هاللعبة! مجرد اني شغلت هالطور اكتشفت مشاكل كثيرة، أول شي، ما تقدر توخر عن ضربات العدو إلا بالصد! لأنك ما تقدر تنقز ولا تنزل (تقعد) و ميزة ال sidestep إلي موجودة عبارة عن انه يلف لجدام أو ورة مسافة نص مليمتر! لا و شغلة ثانية ، يعني ميزة عجيبة صراحة، لما تضغط أي زر ، يتسبب هالشي بأن شخصيتك توقف بمكانها ما تسوي شي و تحاول تستوعب الأمر إلي عطيتها ياه لمدة دقائق معدودة، قبل لا يروح لجدول أعماله المتروس بشغلات مثل انه يوقف بدون حركة و ما يسوي شي، و ماراح تشوفون شغلات كثيرة أصلاً لأن كل شخصية لها حوالي 8 أو 9 حركات بس.
و إذا قاعد تفكر انك تقدر تطور من قدراتك و الحركات و جذي عن طريق اختيار شخصيات مختلفة فأنت غلطان، لأن تقريباً كل الشخصيات لها نفس الحركات، مادري ليش المنتجين ما شافوا هالشغلة كمصيييبة بالنسبة لهم لأنهم قاعد يسوون لعبة عن أنمي فيه كل شخصية لها قوات و قدرات سحرية مختلفة، الشخصيات الضخمة سرعتها نفس الشخصيات الصغيرة، و حتى الشخصيات إلي ما يزيد طولها عن 3 أقدام يقدرون يعطونك بكس يطيرك 40 قدم فوق!! و مثل الأنمي، كل شخصية لها تشكيلة من ضربات كرات نارية، لكن الفرق ان بعضها لونها أصفر و بعضها أخضر و برتقالي و بنفسجي! لا و جنه مافيه أخضر! ليش ماكو أخضر؟!!؟!؟ احم، و بعد لسبب علمي (و بكلمة علمي أقصد اني مو مقتنع ان أكو سبب أصلاً) لما تطير واحد بالهوا ما يطيحون، يتمون معلقين فوق و شخصيتك شوي شوي تطير لهم و بعدين تكمل تركض و تصد و ترفس و كل شي بالضبط مثل ما لما تكون عالأرض، أعتقد هالشي سووه عشان يطبقون الإثارة إلي تصير في القتال بالأنمي! لكن بالنسبة لي لما شفت المنظر، اثنين واقفين على ارتفاع 20 قدم من الأرض يركضون يمين و يسار و يطقون بعض فوق مادري يمكن أرضية غير مرئية واقفين عليها، مت من الضحك! يعني جذي طلعت ميزة ال Air Fight إلي سمعت عنها! طلعت مو "مثيرة" كثر ما كانت "مضحكة" عالآخر!
و إذا كان هذا كله ما عجبكم... في حركة تقدرون تسوونها تخلي اللعبة تدخل طور Burst Mode و هذا بالضبط نفس إلي تشوفونه بالقتال إلي بالأنمي، و هذا مو مدح، أول شي الخلفية كلها تتغير و تصير عبارة عن خطوط مايلة و منعوية مثل إلي يحطونها بالأنمي وقت القتال، و بعدين لازم تبلش تتوحد بالأزرة إلي عاليدة كلهم تضغطهم بسرعة بسرعة عشان تسوي كومبوات و جذي، لكن إلي يصير انه الطق يصير بروحه وانت بس تطالع و الكامرة كل نص ثانية تغير مكانها وانت قاعد تطالع الشاشة مخك مو راضي يجمع قاعد تفكر انت شنو سويت بدنيتك عشان ينتقمون منك و يقصون عليك و يخلونك تلعب هاللعبة، لكن أبشركم!!! لقيت طريقة أتمتع فيها باللعبة!! في زر حق ال Special Attack لما تطقونه شخصيتك تحذف شي جذي جنه حبة نفيش كبيرة مشعة على الخصم، إذا الخصم ضغط زر الصد باللحظة المناسبة راح يصارخ و يقول "BACKATCHA" و يقط نفيشتك عليك! وقتها كان معاي صاحبي و كان أهو بعد مستانس عاللعبة مثلي، عاد كل واحد خله شخصيته تروح لطرف الشاشة و تمينا نلعب كرة طائرة واحنا انصد و نعكس على بعض، وصلنا ل 51 مرة بدون لا تطقنا كله انصدها لين بعض الناس ( و بكلمة بعض الناس أقصده أهو ) توهق و ما صدها باللحظة المناسبة و طقته، لكن الغريب بالموضوع لما أسولف عن هالشي حق الناس ما يهمهم ولا شي... يمكن كان لازم نوصل 60 ؟
بعد ما خلصنا لعب طور اللاعبين المرعب الغثيث، طلع من البيت يبجي يدورله أي بالوعة مبطلة عشان يقط نفسه فيها لأنه سمح لنفسه يلعب هاللعبة، انا قلت خل أجرب طور القصة، إلي يفتخرون فيه و يقولون انه يوريني قصة دراجون بول زي، خلصت اللعبة، و لازم أقولكم... ما لاحظت شي يستحق الفخر صراحة، التصويرات كانت مو شي و الأنيميشن مالها بايخ كأنه هواة مسوينه مو محترفين، لا و كل تصوير لازم يصير زوم على حلج (فم) أحد يتكلم لين ياخذ الشاشة كلها، و تقريباً كل تصوير صار جذي :
Goku: Haha, I am glad I was able to win that battle!
The Enemy: Goku, my power levels are your power levels plus 150, there’s no way you can defeat me!
Goku: Oh no, my power level is at less than half of whatever my power level normally is! But I shall defeat you anyway!
(الكامرة تسوي زوم على حلج جوكو و يقعد يسوي فيه حركات لين يصير كأنه غوريلا و بعدين يصارخ )
Goku: YAAAAAAAARRRGARRRRYARGLEBARGLEGUHGUHBLARGSPLAT
(تبلش المعركة)
فزت في كل المراحل بطور القصة باستخدام روتين واحد ، أروح يم العدو، أضغط "بكس بكس بكس بكس بكس" بعدين ال Special Attack ، مادري ليش هالشي يخلي جوكو يسوي كومبو بوكسات غريب مادري شلون صاير، بعدين إيده تشب ليت و يصارخ "Kamehameha" واللي يتراوالي ترجمتها بالعربي "أقوى روح داخلية للتنين تطلق أقوى كرة نارية مشتعلة مشعة + 5" أو شي جذي؟ مادري ؟ و بعدين المساحة إلي حولينه تشب ضوء بعدين الخصم يطيح عالأرض، بعدين يقوم... بعدين أسوي نفس الحركة، تميت جذي لين خلصت اللعبة، كانت تصير حتى بالمراحل إلي ما ألعب بجوكو فيها ، لأن أصلاً كل الشخصيات لها نفس الحركات.
انا ما أبي أقابل أي شخص اعجبته هاللعبة لأنه سيدة راح يتخيل نفسه ان شعره صار أصفر و يتحرك من هوا المكيف يمكن و يصارخ يقول خرابيط مادري شلون صايرة و يطلق علي كرة نار ضخمة و يطيرني لأقرب جبل و يصارخ بعدين و يقول DBZ FORERVER!!! !!! !!!
(للمرة المليون أكرر... انا ما أقصد الإساءة لأحد و أتمنى ان معجبين هاللعبة ما يزعلون يعني :) )
