المنتدى بعملية انقاذ (قصة ) MoNTaDa iN ReSCue oPeRaTioN

السلام عليكم
شلونكم شخباركم..؟

قبل لا تقرا الموضوع اذا كنت معصب او زعلان لا تدخل اذا فرحان ادخل على طول

انا قلت احط قصة جديدة احلى من الي طافت الي بالمريخ
لانها ماعجبتني ومافي افكار جديدة


وانا قاعد اطالع اخر ميتل غير جتني فكرة اسوي قصة عن انقاذ وجيش وحرب والسوالف هذي
فاألفت القصة هذي

طبعا العنوان هو معروف عن قصصي

ندخل القصة




الرئيس العام للمهمه: اكس بي برتبة رئيب ركن. (لاحظ إن دوره بيكون ثانوي في القصة).
أعضاء الكوماندوز (الفريق الأول):

العضو الأول: (هيرو) برتبة عريف.
العضو الثاني: ( (صكوال )برتبة جندي أول.
العضو الثالث: (طويرق) برتبة رئيس عرفاء (هذي رتبة أنا مألفها )
العضو الرابع والأخير: (هامان) برتبة جندي (لاحظ إنه أقلهم رتبة ،لأنه أكبرنا رتبه في الترفيهي خخخخخخخخ).

المهمة الخطيرة

قرر منتدى الترفيهي إرسال فريق كوماندوز للعراق للقيام بمهمة محدده هناك وقد إختار المنتدى بعض أعضائه كدفعه أولى يرسلهم هناك.

في مكان سري في منتدى الترفيهي... وفي سرداب تحت الأرض تحديداً ... إجتمع الأعضاء الإجتماع الأخير قبل تنفيذ المهمه...

وقام اكس بي يعطي تعليماته الأخيره ...
اكس بي: بعد الشرح اللي قلناه كل واحد منكم عرف دوره بالضبط...
هيرو (وهو يكلم صكوال): شفت المسج اللي جاني على التلفون... هههههه والله نكته..

صكوال: هههههه ... والله مصخرة...
اكس بي (وهو معصب): بس أنت وياه ... شقاعد تطالعون... (ويجي عندهم وياخذ التلفون ويطالع المسجات بالتلفون)
اكس بي: هههههه... حلوه هذي ... ههههه
(ويطالع اكس بي المسجات بالتلفون ويدزها لنفسه... حتى وصل لمسج مرسله من الإنتر نيت فيها صورته وهو مشنوق ومكتوب تحتها : شنق غبي )
اكس بي(وعيونه حمر من كثر ما هو معصب) : من راعي الفكره هذي...
هيرو: أأأأ... هاه ... شنو؟؟
صكوال: ما لي شغل هذا تلفونه هو...
اكس بي: قوم أنت وياه وقفوا ووجهكم عالطوفة و كل واحد منكم يرفع رجله.
طويرق: هههههههههه .... اللهم لا شماته...
هامان : قلت لك يا هيروع لا تستعبط... بس أنت ما تسمع الكلام.
اكس بي : واللحين بنكمل شرح الجزء الأخير من المهمه... راح يكون الإتصال عن طريق التلفونات... (ويأشر على هيرو وصكوال) إقعد أنت وياه بنكمل الشرح... وبدون هذرة زايدة...

هيرو (يتكلم بصوت واطي): دوخنا الخبل هذا...
اكس بي (وهو يقرص إذن هيرو): لما أقول بلا هذرة .. يعني بلا هذرة...
هيرو: أخ... أخ... خلاص يبا فهمنا....
صكوال: ههههه .... والله إنك مصخرة هيروع...
اكس بي: مثل ما قلت لكم صرف لكم المنتدى تلفونات وراح نستعملها في الإتصال... (وبدأ يوزع التلفونات على الأعضاء)..
طويرق: ليش معطيني تلفون قديم... أبي ابي جديد.
اكس بي:مو انا الي معطيك اياه هذا دايركتور...
هامان: أنا أمس شايف واحد جايب لك كراتين تلفونات جديده ... وين راحت؟؟
اكس بي (وهو مرتبك) : أأأ... هذي هي التلفونات... الكراتين بس اللي جديده..
(وقام الأعضاء يخزون اكس بي ويتساءلون وين راحت التلفونات الجديده؟؟؟)

اكس بي (وهو يحاول يغيرالموضوع): أأ... إلا سمعتوا آخر نكته ... ههههه .
(وطبعاً ما حد رد عليه)
اكس بي : أحمم .. أحم ... بكره بتاخذون التذاكر وبتسافرون امريكا ومنها لعراق...
طويرق: اوووووله بنروح لامريكا علشان نوصل العراق...
هيرو (وهو يقلد صوت طويرق بإستهزاء): اوووووله بنروح لامريكا علشان نوصل العراق...ياخي إحمد ربك بتسافر ببلاش وبعدين تتمشى...
اكس بي: ماحد تكلم عن التمشي... إنتم بتتنتظرون في الطياره 7 ساعات ... ثم بتقلع بكم للكويت ومنها تدخلون في العراق.
هامان: ليش التعقيد هذا كله؟؟؟
طويرق : انا بالكويت ليش اروح لامريكا وارجع اهني
صكوال (وهو دايخ): أكيد بيقول لك علشان العملية سرية...
هامان : شهالكلام... التلفون مافيه خط.
اكس بي: الخطوط راح تستلمونها في الصين ... وبيصير جذي علشان...
طوريق: دارين العمليه سريه...
هيرو(وهو يحذف التلفون من القهر) : تعرفون شي بالسرية انتم ...
اكس بي (وهو يحس إن الموضوع طلع من ايده): بكره بتنفذون العمليه ... بالتوفيق.
_____________________________________________________________________
يــــــــــــــــــــــــــــــــــــــــتـــــــــــــــــــــــــــــــــــبــــــــــــــــــــــ ــــــــــــع
... المره الجايه نشوف شلون دخل الأعضاء العراق وشنو سووا اهناك

هولا باك:09:

موضوع رهيب :biggthump

دوري كووووووول

ثانكس ^^:biggthump

اقتباس:

---

المشاركة الأصلية كتبت بواسطة Squall 9

هولا باك:09:

موضوع رهيب :biggthump

دوري كووووووول

ثانكس ^^:biggthump

---

هلااااااع

والله بكتب التتمة بعد قليل
وشوف دورك يارامبو

يلا نكمل موضوعنا

امس تعبت عليها


وصلت الرسالة التالية من الإدارة العامة لاستخبارات المنتدى الترفيهي لأربع أعضاء من المنتدى :

=============================================

(سري جدا)ً


عزيزي العضو: ..... المحترم

السلام عليكم ورحمة الله وبركاته...

نظراً لأنكم من ذوي الخبرة الإستخباراتيه ،ولحاجة قسم المخابرات لكم ...تم اختياركم ضمن الفريق السري الثاني في عملية (عراق الابيض).
نرجو منكم الحضور للموقع السري للاجتماعات في المنطقة ب3 ،في الساعة 4000 وذلك لتقي التعليمات ، وسيكون رئيسكم المكلف "اكس بي".
عدم حضوركم يعني عدم قبولكم المهمة،وبالتالي الإستغناء عنكم في المنتدى وتجريدكم من جميع مزاياكم.


رئيس وحدة استخبارات المنتدى M.I.U
==================================================

وعلى ما يتجمع الأعضاء خلونا نشوف شنو صار على الفريق الأول:




مهمة جديدة

المكان: مدينه حدوديه امريكية.
الوقت: 5 صباحاً.
درجة الحرارة: 20 تحت الصفر.

(تغيرت التعليمات للفريق في آخر لحظه وطلب منهم مقابلة عميل اسمه (كلينزمان) وإستلام طرد مهم منه، وكان فيه أربع دببه كبيره تمشي مع بعض .... كانت الدببه الأربع هي أعضاء الفريق الأول لابسين جاكيتات كبيره جداً)

هيرو: بررررررررررررررد، يا ناس برررد .... تجمد جسمي...

طويرق: إإإإييييييههههه والله بررررررد.

هامان: والله ما حد قال لك أنت وياه تتحاذفون ببطولة الماي وتنقعون ملابسكم كلها ماي.

صكوال : شوف الجو اللي قاعدين يضحكون فيه ... هههههه .... والله لو تشيلون الجاكيتات اللي عليكم أدفأ لكم.

طويرق: أنت يا عادل إمام خلك بحالك ... بررررد ... لا آخذ منك البشت اللي عليك.

صكوال : ما تقدر يا شاطر... حاول إنك ...

هامان : شششش ... وصلنا للمكان اللي مفروض نقابل فيه العميل... عطني يا هيروع ورقه التعليمات اللي إستلمناها في الطياره.

هيرو (بكل برود): اسمحلي ... رميتها بالزباله.

طويرق(وهو متكهرب): شقلت !!!! قطيتها وين ؟؟؟

هامان (وهو بيطلع من طوره): أنت مجنون؟؟؟ ليش !!!!!!!

هيرو: شدراني ... ما كنت أدري إنها مهمه لهالدرجة.

صكوال: أنا كنت أعرف إنك عبيط ... لكن جذي أنت تعديت الحدود...

طويرق: شنو انسوي الحين ؟؟؟أكيد إن الطرد اللي كنا بنستلمه مهم ... والعملية متوقفة عليه.

هامان (وهو معصب): أسأل السيد المحترم هذا !!!!

هيرو: هههههههههه.

صكوال : تضحك ... بعد كل اللي سويته تضحك !!!!

هيرو (وهو يطلع ورقه من جيبه) : ههههه .... هذي هي الورقه ... حبيت أتغشمر معاكم بس ... هههههه.

هامان (وهو يطالع صكوال وطويرق) : ههههههه .... الولد يمزح هههههه.

(ويقرب من (هيرو) ويطمر عليه ويزنطه بقوة)

هامان (وهو يخنق هيرو بكل قوته) : تستخف دمك ... إحنا ذابحنا البرد وانت قاعد تستظرف.

طويرق: أحسسسن ... إزنطه حيل.

صكوال: هههههههههه ... والله يستاهل... هههههههه.

هيرو: كحح ... هدني يرحم امك ... كحح.

(وبعد ما هد هامان رقبة هيرو وأخذ الورقه منه ... قام يقراها)

هامان: المفروض إن (كلينزمان ) هذا نلقاه في محل لبيع التحف ...

طويرق: شكله عميل سري صج ...

صكوال: وين نلقاه فيه هذا محل التحف؟

هامان (وهو يطالع لخريطه معاه): المفروض حسب الخريطه إنه يكووووون ... نعم ... يكون في قرية على بعد 200 متر.

هيرو (وهو يكح من آثار البرد وزنطة هامان) : كححح .. كح ..كيف بنوصل له في هذا البرد ... على رجولنا؟؟

هامان : بالضبط على رجولنا.

(ومره ثانيه مشت أربع دببه لمحل تحف لملاقاة العميل كلينزمان).

بنترك الفريق الأول ونشوف شصار في غرفة إجتماعات الاستخبارات
هذا بكتبه برد ثاني

في الموقع السري للإجتماعات للمنتدى


المكان: موقع الإجتماعات السري .. المنطقة ب3
الزمان: الساعة 4000
درجة الحرارة: 30 درجه.

والأعضاء المجندين الجدد هم:
العضو الأول: (ساندر) برتية عريف.
العضو الثاني: ( لكويد) برتبة رقيب.
العضو الثالث: (رؤوف)برتبة جندي أول.
العضو الرابع والأخير: (ديفل =سايلنت ديفل) برتبة جندي أول.


حضر ثلاث أعضاء وهم: رؤوف ولكويد وساندر ... ولم يحضر العضو ديفل
وكان الرئيس المكلف "اكس بي" ينتظر بعصبية وكل دقيقه يطالع ساعته.

اكس بي: وين راح هذا ديفل !!!

ساندر: يمكنه نايم.

رؤوف: إلا يمكن ما وصلت له الرساله السريه.

لكويد: أنا متأكد إنه بيجي...

ولزم الكل الهدوء و"اكس بي" يدور مثل نمر جريح محبوس في قفص.

وفجأه دخلت عليهم العضوة (رافا).

اكس بي(وهو مندهش) : نعم شجابك اهني.

رافا: شفيكم مستغربين وصلتني منكم رساله ... تطلبون مني إني أشارك في عمليه سريه للمنتدى.

اكس بي: إنتي مجنونة أنتي ... احنا ما أرسلنا لك أي رساله ... وبعدين العلمليه هذي للأعضاء موللعضوات.

رافا: لا ترفع صوتك علي ... خوذ هذي هي الرساله.

اكس بي (وهو يقرا الرساله وهو مو مصدق) :شالكلام هذا ... هذي الرساله مكتوبه بخط اليد ... إحنا نكتب رسائلنا مطبوعه ... وبعدين التوقيع مو توقيع رئيس استخبارات المنتدى...

(وتتغير ملامح "اكس بي" من الغضب ... لقمة الغضب)

اكس بي : لحظه ... لحظه... الخط هذا أعرفه زين ... جررررررررر (بيكسر أسنانه من الزعل) هذا خط هيرو... أنا أعرفه زين ... من البراشيم اللي كنت أمسكها معه ...

(وعفس الورقه وقطها بغضب بالزباله) وكمل
وقال: كان لازم أذبحه يوم كان قاعد بين يديني.

رافا: اوكي ممكن أشارك ؟؟

اكس بي: لاااااااااااااا.

رافا: ... زين لاتعصب...أف.

وطلعت (رافا) وهي زعلانه.

اكس بي: آآآآه لو تطيح الحين بين يديني يا (هيرو) لأقطعك ... وين هذا ديفيل

لكويد: إتصل عليه وشوف.

اكس بي: ماحد طلب رايك... تصدق ... والله فكره ...

يدق "اكس بي" على رقم " ديفل "
طووووط ... طوووووط. ..طوووط

ديفل: ألو نعم ...

اكس بي: هذا أنت ديفل وينك يا غبي ...إحنا منتظرينك في الإجتماع.

ديفل: إنتو إتصلتوا علي ... وقلتوا بنرسلك رساله نعلمك وقت ومكان الإجتماع.

اكس بي: أنا عندي هني توقيعك بأنك استلمت الرسالة.

ديفل: أييييييه صح ... معك حق ... أنا ما أفتح رسايل هاليومين.

اكس بي (وهو يغلي): شلون ... ما فتحتها..

ديفل: مثلك عارف ... فيه مشكلة الجمرة الخبيثة ... لكن إن شاء الله إن إنتهت المشكله بأفتح الرسايل.

اكس بي( وهو يعض على أسنانه من القهر): لو ما جيت في عشر دقايق ... رايح أرسلك شيء ألعن من الجمرة الخبيثة... مفهوووووووووم (طك ... سكر السماعة بقوة)

اكس بي : ذكي الجمرة الخبيثة انتهت وهو للحين متعقد

بنشوف شصار على الفريق الأول.
ــــــــــــــــــــــــــــــــــــ
يـــــــــــــــــــــــــــــــــتـــــــــــــــــــــــــــــــــــــــــــبـــــــــــــــــــــ ــــــــــــــــــــــــــع

نكمل قصتنا


الفريق الأول وصل أخيراً لمحل التحف... وبعد جهد جهيد.

هيرو (وهو منهك من التعب): آآآه ...آآآه ... تعبنا علشان نوصل ... قعدنا نركض نص ساعه.

هامان (وهو معصب) : جرررررررر... كله منك ... لو إنك ما حذفت الكلب بصخرة... كان ما ركضنا نص ساعه ننحاش منه.

طويرق: والله لو إستعبطت مره ثانيه لأقطعك بنفسي..

صكوال: كان المفروض نربطه ونخليه للكلب يتفاهم معه.

هيرو: والله ما قصدت ... كنت أبي أمزح معه بس ...

هامان : حسابك معي بعدين ... بعد ما ناخذ الطرد المهم اللي هنا ...

هامان(وهو يكلم صاحب المحل بصوت منخفض): ممكن نكلم (كلينزمان) لو سمحت ..

كلينزمان: أنا كلينزمان ... ممكن ترفع صوتك ... أنا ما أسمعك زين...

هامان (وهو يوطي صوته أكثر): إحنا من استخبارات المنتدى ... ونبي منك طرد سري بأسم اكس بي...

كلينزمان: ياخي أرفع صوتك ...ما أسمع .

وعاد طويرق الكلام بصوت أوضح ...

كلينزمان: طرد سري ؟؟؟ فيه عندي طرد بأسم " اكس بي" ومعاه رساله ... ولكنه مو سري ولا شي ...

وأخذ صكوال الرساله وبدأ يقراها ..
وكان مكتوب فيها:
================================
أعزائي أعضاء المنتدى

بما إنكم وصلتوا امريكا،قلت مالي إلا ربعي ...
هذي تحف كنت طلبتها من امريكا ... وكانت تكاليف الشحن غاليه شوي... وبما إنها على طريقكم .. جيبوها معاكم تكفون...

اخوكم اللي يحبكم
اكس بي
====================================
وظل الأعضاء يطالعون بعض

خخخخخخخخخ

والله قصة حلوة مررة صراحة طلعت كاتب مبدع ^^

وننتظر جديدك أخوي ^^

بالمناسبة حطني أحد الأبطال XD

خوش قصة وننطر الباجي

اقتباس:

---

هامان (وهو يطالع صكوال وطويرق) : ههههههه .... الولد يمزح هههههه.

(ويقرب من (هيرو) ويطمر عليه ويزنطه بقوة)

هامان (وهو يخنق هيرو بكل قوته) : تستخف دمك ... إحنا ذابحنا البرد وانت قاعد تستظرف.

طويرق: أحسسسن ... إزنطه حيل.

صكوال: هههههههههه ... والله يستاهل... هههههههه.

هيرو: كحح ... هدني يرحم امك ... كحح.

(وبعد ما هد هامان رقبة هيرو وأخذ الورقه منه ... قام يقراها)

---

XD

اقتباس:

---

خخخخخخخخخ


والله قصة حلوة مررة صراحة طلعت كاتب مبدع ^^



وننتظر جديدك أخوي ^^

---

هذا من ذوقك

اشكرك عزيزي على ردك

اقتباس:

---

بالمناسبة حطني أحد الأبطال XD

---

حاضر

اصلا انا ابي اسامي اعضاء احطهم

اقتباس:

---

XD

---

شكرا عزيزي لردك

يلا نكمل موضوعنا


إجتماع الفريق الثاني


المكان: موقع الإجتماعات السري .. المنطقة ب3
الزمان: الساعة 4020
درجة الحرارة: 100 درجه.

كان الأعضاء ساندر و رؤوف و لكويد قاعدين بهدوء ويطالعون "اكس بي" وهو يدور في القاعة وهو متوتر.

وصل ديفل لمكان الإجتماع ، وكانت الحرارة مرتفعه جداً ... لأن "اكس بي" كان يغلي من القهر.

اكس بي: أخيراً وصلت طال عمرك ...ما ودك نجيب لك قلاص شاي وشيشة ... طال عمرك.

ديفل: لا والله ما أشيش ... ولكن إذا كان ممكن قلاص شاي لو سمحت ...

اكس بي (وهو يأشر على كرسي ويتكلم بصوت أقرب للبكاء): روح إقعد ... خلوا اليوم يعدي على خير..
وبدأ يكلم نفسه : أنا ليش ما صرت مدرس فيزيا مثل ما كانت تبي أمي...

وبدأ اكس بي يشرح للفريق الثاني مهمته طوال ساعتين...

اكس بي: راح تسافرون للعراق عن طريق تركيا ... وهناك بتستلمون مظروف فيه شرايح خطوط مصروفه لكم ... وبتنفذون أول مهمة لكم قبل ما تسافرون للعراق... مفهوم الشرح اللي قلناه ..

رؤوف: واضح..

ساندر: خخخخخخ...

اكس بي ( مثل العادة معصب): منو اللي نايم ...

ويتقدم "اكس بي" ويضرب ساندر على راسه

اكس بي: ما حد ينام هنا ... هذا مكتب استخبارات مو فندق برج العرب...

ساندر: هاه ... منو ... وين ... ليه.

لكويد: صح النوم طال عمرك ... ههههههه.

ااكس بي: اليوم بتسافرون وبعد ساعتين بالضبط.

(وفجأة قام ديفل يبى يمشي)

اكس بي(وهو يصرخ): وين بتروووح!!!

ديفل: لا ... لا تكفى ... أنا كنت ألعب في فاينل فانتسي الجديد ووصلت مرحلة جديدة ولا خزنت...

اكس بي (معصب ودخان من راسه) : أنا بأنفجر في وجه الدنيا في يوم من الأيام.

ديفل: خلني أروح البيت أكمل اللعبة وأسوي لها سيف وأجيكم .

اكس بي: روح إقعد مكانك ... وإلا ما راح تشوف كمبيوتر في حياتك... والآن إستعدوا ... بتطلعون من هني مباشره على المطار..


نشوف شصار مع الفريق الاول بس برد ثاني

أهالي القريه يطاردون أعضاء الفريق الأول ... وأعضاء الفريق يطاردون هيرو...

والسبب لما إستلم أعضاء الفريق الأول الطرد ممن كانوا يظنون أنه عميل سري ...

واللي تبين إنه مجرد بائع .. وإن الطرد السري كان تحف... غضب أعضاء الفريق من طريقة توصيل "اكس بي" لهم للأوامر ...

ولكن هيرو تصرف على طريقة الخاصة وبدون ما يشاور باقي الأعضاء ... فقام بتكسير التحف كلها على راس العميل الوهمي "كلينزمان" ... بل فعل أكثر من هذا وقام يكسر المحل ...

فطلب "كلينزمان" مساعدة من أهل القرية اللي ما كان منهم إلا طرد أعضاء الفريق ... بالعصي...
وبعد ما وصل أعضاء الفريق لمكان آمن بعد ساعة كاملة من الركض ... وبدأوا يلتقطون أنفاسهم ...

هيرو: آآه...آآه ... يا كثرهم ... ما توقعت إنهم بالكثره هذي...

طويرق(وهو يطمر على هيرو ويزنطه للمره الرابعه في هذا اليوم) : كله منك يا وجه المصايب ... من أول ما وصلنا للقرية وإحنا ما وقفنا عن الركض من سبة مشاكلك...

صكوال : كان لازم نفتك منه ونسلمه لأهل القريه...

هامان: هذا اللي كنت ناوي أسويه ... ولكن أهل القريه ما أعطوني فرصه وطقني واحد منهم بالعجرا...

صكوال : أنا ما قهروني إلا يوم أطلقوا الكلاب علينا...

هيرو (بعد ما إستعاد أنفاسه) : الحمد لله إنها جت سليمة ...

وقام الأعضاء وتركوه ... وبدأوا يتشاورون بالجاي...

هامان : باقي ساعة ونص وتقلع الطيارة ... لازم نروح للمطار ونسافر في أقرب وقت ...

طويرق: ليش التأخير يا لله نروح ...
وبجذي مشى الأعضاء الأربعه للمطار للدخول في المهمة الرهيبة.


اقول ليش اطولها وهي قصيرة
خلونا نشوف شصار عالفريق الثاني اهني



وصل الفريق الثاني للعاصمة التركية (انغرة) ... وإتجهوا مباشرة للفندق ... وهناك وصلهم فاكس ... إستلمه لكويد وأخذه للغرفه
بعد ما جلسوا في الغرفة وإستعدوا للنوم، فتح لكويد الفاكس وكان مكتوب فيه...

==================================
أعزائي أعضاء الفريق الثاني

تحيه طيبه وبعد،،،
قام أحد العملاء بإخفاء وثائق سرية في أحد الكتب في المكاتبات العامه ...
وبطريقة ما علمت CIA بالموضوع وكذلك الشرطة التركية..
المطلوب منكم الحصول على الوثائق والكتاب وتسليمه لأحد عملاء المنتدى في تركيا...
يجب عليكم التحرك للحصول على الكتاب فور إستلامكم للتعليمات
تجدون عنوان الكتاب وموقع المكتبه مع الفاكس ...

ملاحظة : الفاكس سينفجر تلقائياً بعد خمس دقائق من فتحه...

رئيس ركن/ اكس بي

=============================

لكويد: أأأأ ... كم لنا مستلمين الفاكس...

رؤوف: شتقصد.

لكويد (بعصبية): كم من الوقت مر من أول ما أخذنا الفاكس.

ساندر: تقريباً خمس دقايق ... ليش..

(وفجأة إنفجرت ورقة الفاكس مثلما تنفجر الألعاب النارية بقوة)

لكويد(ووجهه أسود من آثار الإنفجار) : طريقة غريبة لتلقي الأوامر...
وبعد ما مسح وجهه قال : يالله نمشي نفذ المهمه...

ديفل (وهو يتغطى باللحاف): أأأأوووه (يتثاوب) ... خلها بكره.

لكويد(وهو يرفع الغطاء عنه) : قلت لك بنقوم الحين ...
وبعد جهد تمكن لكويد من إقناع ديفل وذهب الفريق لتنفيذ المهمه الجديدة.

صراحة قصة ممتعة أكملها بسررعة ^^ >>>>>> متشوق ^^

اقتباس:

---

المشاركة الأصلية كتبت بواسطة ABDULLAH750

صراحة قصة ممتعة أكملها بسررعة ^^ >>>>>> متشوق ^^

---

اهلا اخوي عبدالله

الحمدلله انها عجبتك

وبكملها الحين

نكمل قصتنا



في بكين


وصل الفريق الأول للعاصمة الصينية( بكين) وتلقى الفاكس التالي:

=====================================

أعضاء الفريق الأول .... أتمنى عند إستلامكم هذا الفاكس أن تكونوا بصحة وعافية (صدقوني بتحتاجونها كثير) .
راح تقابلون واحد من العملاء للمنتدى صيني الجنسية إسمه (واهاوا) ... وهو كان ينسخ الدسكات الأصلية ويرسل منها كوبي للمنتدى أيام الحرب الباردة...
على العموم قابلوه وخذو منه خطوط للتلفونات اللي عندكم (أتمنى تكون تلفوناتكم حتى الآن سليمة ... لأن كفالتها إنتهت) ... وراح يعطيكم بغال تعبرون فيها الحدود بين الصين وايران وملابس رعاة .... وراح تجيكم التعليمات في وقتها ... مكان المقابله مؤشر عليه في الخريطة مرسله مع الفاكس هي و صورة العميل...
ملاحظة: إنتبهوا وأنتم تتعاملون مع (واهاوا) لأنه غريب الأطوار شوي ....
إذا إحتجتوا لشيء إتصلوا علي التلفون...

كلمة السر: عجوز ضايعه في الغبار

ملاحظة أهم من الأولى: الفاكس بينفجر تلقائياً بعد دقيقة من فتحكم له...

رئيس ركن / اكس بي


==========================================

هيرو: ياخي هذا "اكس بي" بط جبدنا... ما يمدينا نوصل مكان إلا يرسلنا لمكان ثاني...

صكوال: هذي الاستخبارات ... محد قال لك تدخلها ...

هيرو: وهو فيه أحد اخذ رايي ... المنتدى جندني على طول ...

طويرق: آآآآآه لو أعرف أبن الكلب اللي جندك ... والله لا أروح أنتفه و أذبحه ...

هامان :خلاص أنت وياه بنروح نقابل اللي إسمه ...

بووووووووووووووووووووووم م م م (إنفجر الفاكس وامتلأت وجوه الأعضاء بالبارود الأسود من آثار الإنفجار )

هامان(ووجهه أسود من آثار الإنفجار): شنو اللي صار ؟؟؟؟


وعلى بال ما يستوعب الفريق الأول اللي صار له ... وينظفون أنفسهم ...خلونا نطل على الفريق الثاني...




أمام المكتبة العامة في (انغرة)


المكان : أمام المكتبة العامة
الزمان: 9:30 في التوقيت المحلي
وصل الفريق الثاني للمكتبة العامة في انغرة ... ودخل الأعضاء ...
وسأل الأعضاء عامل في المكتبة عن الكتاب ، المرسلة صورته مع الفاكس (اللي أنفجر في وجوهم)

لكويد: ودنا نسألك عن هذا الكتاب ... وين نحصله
العامل: الكتاب اللي تسألون عليه وصلنا أمس ... وهو موجود عند الاستقبال هناك...
وتوجه الأعضاء لمكتب الأعضاء للاستقبال ... وكانت المفاجأة المرعبة ...وآخر شيء يتوقعونه...




مقابلة ساخنة مع (واهاوا)


بعد ما نظف الأعضاء أنفسهم راحوا يقابلون العميل (واهاوا) ،حسب المكان اللي حدده "اكس بي"

هامان: المفروض العميل يقابلنا هني ...

صكوال: زين أنت تعرف شكله ...

هامان: إحنا معانا صورته ...

طويرق: أهم شيء لا يطول ...

وجلس الأعضاء ينتظرون (واهاوا) مدة نصف ساعة ... وفجأة ظهر ... وكان عجوز وظهره منحني ... وماله إلا ضرس واحد في نصف حلقه(فمه ) ...

هامان: هذا هو ... واحد منا يروح يكلمه...

طويرق: لا تروح يا هيرو ... إنثبر هني ، أنا بأكلمه علشان ماتخربها مثل العادة...

وتقدم طويرق للعجوز (واهاوا )وبدأ يكلمه

طويرق: أنت (واهاوا) ؟؟؟

واهاوا (وهو مرتبك): منو أنت ... و شتبي؟؟

طويرق: إحنا الاستخبارات ... نبي منك شيء...

واهاوا (وهو ياخذ وضعية قتال في الكنج فو) : إبعد عني ... أنا أحذرك..

طويرق (وهو يتقرب منه) : تعال يا عجوز يا اوكي لا تخاف ... هههههه

وفجأه بحركة سريعة وقوية ضرب (واهاوا) برجله (طويرق) في منتصف وجهه تماماً ...

طويرق (وهو تحت تأثير الضربه) : منو حذف قنبله ؟؟؟

هامان :كلمة السر " عجوز ضايعه في الغبار " ...

وتوقف (واهاوا) عن حركات الكونغ فو وقال :ليش ما قلتوا لي من الأول ...

وراح صكوال وهيرو يطمئنون على طويرق ...

صكوال: والله يا عطاك وحده على كيف كيفك ..

هيرو : ههههه ... تستاهل يافهيم

طويرق (بعد ما بدا يستعيد وعيه): فكوني على العجوز ... والله لأكسر ضرسه ...

هامان :إحنا من الاستخبارات ... والمفروض إن معاك أغراض لنا...

واهاوا : إبيكم تجون معاي ...

وراح الأعضاء معاه حتى وصلوا لبيت صغير وهناك ... أعطاهم (واهاوا) خطوط للتلفونات ... وملابس رعاة ... وبغال ... وبعض الأغراض... وفاكس مرسل من استخبارات المنتدى ...

وبعد ما أخذ الأعضاء الأغراض ... جوا يمشون للحدود الايرانية ...


واهاوا: لحظة لو سمحتم ...

هامان : نعم ... فيه شي ...

واهاوا : "اكس بي" قال لي إنكم اللي بتحاسبوني على الأغراض اللي أخذتوها ...

ومره ثانيه قام الأعضاء يطالعون بعض باستغراب ...

يلا نكمل قصتنا


تحت صندوق زبالة كبير ، كانت أربع أزواج من العيون تنظر بحذر للمكان ...

ساندر: وووععععععععععع ... ريحه تصرع ...

ديفل : ما فيه غير هذا المكان نختبي فيه ؟؟؟

رؤوف: المفروض إننا نقابل العميل السري هني ... وبعدين لا تنسى إن كل المدينة تدور عننا ...

لكويد: أتمنى ما يطول ...

وفجأة ظهر رجل نحيل ومرتبك ... وكان معه كيس ...

رؤوف: هذا هو ...

وظهر له الأعضاء ... وعرفوه بنفسهم ...

العميل: ليش كنتوا مختبئين تحت الزبالة ...

لكويد: أأأأ .... هههه (يضحك بحياء) ... تعرف لزوم الشغل ... هههه...

ساندر (وهو يضحك بحياء أيضاً) : إيه ... صح ... ههههه

العميل (وهو يطالعلهم باستغراب) : على العموم المفروض إني أسلمكم رسالة وكيس ... وأستلم منكم كتاب ...

وهذا اللي صار ... وبعد ما راح العميل السري ... فتح رؤوف الرسالة ... وكان مكتوب فيها...


===================================

أعزائي أعضاء الفريق الثاني ...

عند إستلامكم لهذا الفاكس ... يفترض أن تكونوا على قيد الحياة ...
وأن تكونوا أنجز توا المهمة على أكمل وجه...
والآن يجب أن تلاقوا الفريق الأول في العراق لتنفيذ المهمة الأخيرة ... نقطة التقائكم معهم موضحه بالخريطة ... التي أرسلتها مع الرسالة ...

ملاحظة مهمة : الرسالة ستنفجر بعد خمس دقائق

===================================


وبينما كان الأعضاء مستعدين للإنصراف ظهر لهم فجأة واحد من CIA ومعاه مسدس كبير ...

العميل: أخيراً طحتوا بين يديني ... أعطوني الورقة اللي معاكم ... وراح أخليكم تمشون ...

رؤوف(وهو يكلم لكويد) : عطه الرسالة ...

لكويد: ليش أعطيها له ؟؟؟

لكويد: عطه بلا فلسفة ...

وأخذ لكويدالرسالة وأعطاها للعميل ...

وما كاد العميل يفتح الورقة ... بووووووووووم م م م ... وركض الأعضاء مره ثانية ...

رؤوف: ما راح أتشكي مره ثانية من طريقة "اكس بي" في إرسال الفاكسات...








ما كاد أصدقائنا يلمحون الهيلوكبتر حتى إختبوا في كهف قريب جداً هم والبغال اللي معاهم...
وأمام أعينهم هبطت الهيلوكبتر ونزل منها أربع جنود أمريكان يحملون رشاشات ضخمة ...
ونزل بعدهم رئيسهم ...

طوييرق: والحل راح يلقونا بسرعة ...

صكوال: هذا اللي ما حسبنا حسابه ... دق يا هامان على "اكس بي" يمكن يرسل أحد ينقذنا ...

وبدون تردد دق هامان على " اكس بي" ...

توووووووووت ... تووووووووت ... توووووووووتت ..

اكس بي: خخخخخ ... هاه .. منو ... وين ...

هامان: إحنا الفريق الأول في المخابرات ... إحنا محاصرين ونطلب مساعدة ..

اكس بي: بعدين .... بعدين ... أنا نايم الحين ... (وصكر التلفون في وجه هامان)

هامان: ألو ... ألو ...

طويرق: شصار ؟؟؟

وما رد عليه هامان وإتصل باكس بيي مره ثانية ... ورد علية صوت يقول (عفواً ... إن الجهاز المطلوب لا يمكن الإتصال به الآن .. يرجى المحاولة فيما بعد ... وشكراً) ...وإتصل هامان ثالثة ورابعة وخامسة ... وفي كل مرة نفس الرد ... ولما يئس حذف التلفون وقعد الأعضاء يطالعون في بعض بحيرة ...

في ذلك الوقت كان الجنود الأمريكيين يمشطون المنطقة ... وكأنهم يبحثون عن شيء ...

الرئيس: أنت متأكد إنك شفت أربع أشخاص في المنطقة ...

الجندي: نعم سيدي ... كانوا واقفين في هذي المنطقة بالضبط ...

الرئيس: واصلوا البحث ... أكيد إنهم مختبين في أحد المغارات ...

وفجأة طلع صوت ... ععععاااااااااااااووووووو

جندي1: ذئاب ...

الرئيس (وهو قلق) : الظاهر إن اللي شافهم الجندي ذئاب .. يالله نمشي ... وحتى لو كانوا آدميين ما راح ينجون من الذئاب ...

ورجع الجنود للهيلوكبتر وابتعدوا عن المنطقة ...

طويرق: ههههههههههههه.... والله حلوة منك يا هيرو إنك تقلد صوت الذياب وتخوفهم ..

هيرو : أنا عندي مواهب كثيرة حيل... إحم ... إحم ...

هامان (وهو يطالع لحافة الجبل) :والحين شلون ننزل ...

ععععععععاااااااااااااااووووووووووو

هامان : خلاص بس ياهيرو...كافي تقليد الأصوات ...

هيرو: والله ما قلت شيء ...

وإلتفت الأعضاء وراهم بحذر وشاهدوا خلفهم مباشرة حوالي 300 ذيب جائع ...

الأعضاء (بأعلى صوت) : ذئئئئئئئئئاااااااااااااابببببببب ...

وإندفعوا لحافة الجبل ... وتدحرجوا هم والبغال ...

هيرو(وهو يتدحرج) : ما يحتاج طريق ...

طويرق: آآآآآييييي ... بنوصل بسرعة..

ولما وصلوا الأرض ... كانوا يتألمون من الدحرجة ...

طويرق : آه ... آه...هبوط رائع ...آه

وقاموا ينفظون التراب اللي مغطيهم ... وإنتبهوا لشيء...
إنهم لقوا نفسهم محوطين بعشرات الرجال .. المسلحين ...

تصدق مالقيت إلا أنت من الأعضاء القديمين ..

سبحاااااااان الله وين راحوووو شكلهم ماتو إلا أنا وأنت ههههههه .. :p

هههههههههههه
قصة ممتعه اخي

السلام عليكم..
القصة ممتعة حقا و مضحكة!!!!!!!...اتمنى ان تستمر في كتابة هذه القصص الرائعة:biggthump .
سلام.....

خخخخخخخخخخخخخخخخخخخ

مشكوووور xbs

قصة تشوق

بس القهر (( جيبوا العفش من امريكا)) ههههه

اقتباس:

---

تصدق مالقيت إلا أنت من الأعضاء القديمين ..

سبحاااااااان الله وين راحوووو شكلهم ماتو إلا أنا وأنت ههههههه ..

---

كح كح

الخليجي اهني وينك ياخي

على طاري القدامى الظاهر ماتوا:p

اقتباس:

---

هههههههههههه
قصة ممتعه اخي

---

دوم الابتسامة

اقتباس:

---

السلام عليكم..
القصة ممتعة حقا و مضحكة!!!!!!!...اتمنى ان تستمر في كتابة هذه القصص الرائعة .
سلام.....

---

ان شاء الله;)

اقتباس:

---

خخخخخخخخخخخخخخخخخخخ

مشكوووور xbs

قصة تشوق

بس القهر (( جيبوا العفش من امريكا)) ههههه

---

ههههههههههههههههههههه





بالنسبة للقصة
ان شاء الله بحط تكملة لها بعد استرجاع الافكار:31:

السلام عليكم ورحمة الله وبركاته ^^
مشكوووووور يا اكس بي اس ^^ على القصة الرائعة ....
و الصراحة اكثر شي عيبني في القصة المقطع اللي طلعت فيه خخخخخخخخخخخ
صدق عرفت تطلعني صح ... يعني رزة حتى في هذه السوالف XD
و القصة فيها احداث ذكرتني بألعاب
مثل ميتل جير ... و ريزيدينت ايفل ^^
تسلم يمينك و يعطيك الف عافية
و الله ودي اطول في الرد بس تعبانة حدي ><"

اقتباس:

---

المشاركة الأصلية كتبت بواسطة Rave Master

السلام عليكم ورحمة الله وبركاته ^^
مشكوووووور يا اكس بي اس ^^ على القصة الرائعة ....
و الصراحة اكثر شي عيبني في القصة المقطع اللي طلعت فيه خخخخخخخخخخخ
صدق عرفت تطلعني صح ... يعني رزة حتى في هذه السوالف XD
و القصة فيها احداث ذكرتني بألعاب
مثل ميتل جير ... و ريزيدينت ايفل ^^
تسلم يمينك و يعطيك الف عافية
و الله ودي اطول في الرد بس تعبانة حدي ><"

---

يا الله
والله نسيت القصة بشكل نهائي
نسيت اني عندي قصة

مشكورة رافا على تذكيري

وخلاص انا لازم اكمل القصة دام هناك عشاق

اقتباس:

---

يا الله
والله نسيت القصة بشكل نهائي
نسيت اني عندي قصة

---

يلا عطني بيزات ... علشان ذكرتك <<< ما تنعطى ويه هالبنت XD

اقتباس:

---

مشكورة رافا على تذكيري

---

العفو ... بس ابا بيزات <<< مصرة الأخت :blackeye:

اقتباس:

---

وخلاص انا لازم اكمل القصة دام هناك عشاق

---

يس يس ... لازم لا زم ... وبعد لازم تعطيني بيزات << اقول قلبي ويهج بسج خلاص ><"
خخخخخخخخ
امزح معاك دوووب ^^ ... و ان شاء الله تكمل القصة و في انتظارها ^^

خخخخخخخخخخخخخخ

تبين بيزات
خلاص اذا نزلت المنحة الاميرية نصها لج:D



وعن القصة الحين بقراها ثاني مرة علشان ترجع لي الذكريات وراح اكتب التتمة
قصدي التكملة:p