السلام عليكم ورحمه الله وبركاته
كيف الحال كل ابوكم ؟
وكل امكم ؟
طبعاً الي يعرفني يعرفني والي مايعرفني هذي لمحة بسيطه عني
hod hod عضوه تحب التشكي والفضفضة بالمنتديات
والحلو بالموضوع ان اغلب الناس يتفاعلون مع نكدي الدائم
نبدء بالموضوع
هنا بفضفض فضفضة الترم الماضي كله
اولاً على صعيد المنتدى
يمكن اكون غايبه عن الكتابه والرد بالمواضيع لكني زي مايقولوا اتابع من بعيد
الي اشوفه حالياً ان ثلاث ارباع الأعضاء العزيزين علي اختفوا من المنتدى !
العدد بتناقص مستمر والغريب بالموضوع ان منتدى المنتدى يمسك العضو الجديد ويحافظ عليه لكن بعد مايكبر العضو ويصير من الأقلام الي لها وقع كبير بالمنتدى يترك المنتدى
يمكن بسبب طمع العضو ويمكن بسبب تقصير المنتدى عموماً الأحتمالاين واردين
وً الوضع الحالي محزن للمنتدى
صفحة القسم العام مليانه من المواضيع المنقولة الا من رحم ربي
سؤال ؟
وين الصعوبة في كتابه موضوع !
احياناً النقل مفيد
لكن نقل مواضيع من قصص عفا عليها الزمن مااتوقع انه شيء ممتع
حتى لو الموضوع ماتقفل ماتوقع ان في متعه او حماس من نفس كاتب الموضوع عكس يوم مايشوف الاعضاء متحمسين مع اسلوبه هو
عموماً نصيحة لأخوانا الجدد جربوا وأكتبوا شيء حصل لكم او شيء سمعتوا عنه مو شرط مواضيع مميزة وعربية فصيحة وصل لنا الفكرة بأسلوبك
|
|
|
|
|
ثانياً على صعيد الجامعة
الفصل هذا ولله الحمد مر على خير من ناحية المشاكل الي واجهتني سابقاً (راجعوا مواضيعي القديمة :09: )
لكن من ناحية المعدل للأسف طاااااح طيحة قشرة بس الحمدلله نجحنا مع ان طموحي ابعد من النجاح بس شكلي بسفط طموحي على جنب
سبحان الله بهذا الترم صارت معي معجزة بوحده من المواد
رحت استعلم بيوم استعلم عن درجتي قالت لي لسى ماجمعت الدرجات بس انتي ياهدى ناجحه
مادري ايش خلاني بعد يومين امر عليها واسمع خبر اني راسبة رسوب فادح
المعروف عني اني بنت مافيها صبر وعصبية والدموع انهار على طول
بس مادري كيف صبرت وقتها
قلت قلتي لي ناجحه من كم يوم
والي يرحم والديك ارجعي احسبيهم من جديد
جلست عندها بالمكتب ساعه تقريباً بسبب الزحمه
جلست استغفر وادعي
وغيري جلس يبكي ويتهاوش
سبحان الله الأستغفار فائدته شيء ماينوصف
مااحس الا بعد ساعه تقول لي هدى انا بأخذ اوراقك للبيت وارجع اتأكد
واخذت رقمي علشان تبلغني بالنتيجه
سبحان الله بكرة تجي لي رساله انها عدلت درجتي الله يجزاها خير هي طيبة كثير لو غيرها كان مشاها علي ..
حسيتها معجزة !
الى الأن مو مصدقه كيف الموضوع صار
الف الحمدلله والشكر لله
|
|
|
|
|
على صعيد العطلة
بدت عطلتي من اسبوع تقريباً
المفروض يسمونها عطلة جهنمية مو صيفية
حر لايطااااق
مكيف & ومروحه ومانفعوا بشيء
ارتاحوا يااهل الشرقيه مع هالحر اهل الرياض بيتركوكم هالأجازة بسلام
واحس الجو عندنا مزيج من غازات وحشيش
الواحد يحس بخمول ودوخة 24 ساعه
وسبحان الله الواحد طول السنة يخطط لهالعطله بس تبدي من اول يوم يحس بطفش
خصوصاً للي مثلي
يحبون البيت يسموني (بيتوتية )
وانا احس ان (غرفتيه) انسب لي لأني ماطلع من غرفتي الا قليل يوم مااشم ريحة الأكل
عموماً حتى لو حبيت الطلعة شرطة الأمن والسلامه (أمي) رجلها على رجلي بكل مكان ولهذا يوم مماطلع لازم انسق جدولي معها واخذ موعد من اسبوع علشان تطلعني للمكان الي ابيه
ومن ناحيه الصديقات فشروط المباحث عندنا (أبوي) تعتبر تعجيزية اذا بزور بنت لازم تتوفر فيها الشروط التالية :
1-أبوي يعرف ابوها أو امي تعرف امها
2-ان تزورني هي اول
3-ان يكون بيتها قريب
4-بعض الأحيان ينضاف هذا الشرط ان مايكون عندها أخوان
فمع هالشروط نزلت نسبة صديقاتي الي اعرفهم الى صديقاتي الي اقدر ازورهم الى 2%
وبرضو من ناحية غرفتي الجميلة
من زمااان ماشفت ارضية غرفتي ايش لونها
اوراق , كتب , صحون كاسات الي تبغون
ماكان لي خلق انظف غرفتي
لين ماجا ابوي وقال اذا نظفتي غرفتك لك مكافئة مالية
عاد انا شغلي مايمشي الا بالمكافئات واقوم واخلص تنظيفها بيومين نياهاهاها
|
|
|
|
|
على صعيد الهوايات
سبحان الله بعد ماعديت العشرين راحت الهوايات الثقافيه الي كانت عندي من كتب ورويات وبدلتها بهوايات جديده احس اني رجعت مراهقه !
كنت اسمع بالأنمي وبديت اشوفه هالسنه بصراحه شيء خطير ويخلي الواحد يسفط الكتب على جنب
ورجعت لي هويتي القديمه بالفيديو جميز وحالياً العب تومب رايدر (تمشي الحال)
مفكرة اني اشتري من اجهزة الجيل الجديد لكن مع العيوب الموجوده حالياً فيها قررت اني اجلس على بلاي ستيشن 2 والجيم كيوب لين ماربي ييسرها
|
|
|
|
|
على الصعيد الأسري
أنا اصغر وحده بين اخواتي
ومع زواج اخر أخت لي من كم شهر
وزي مايقولوا وصل لي الدور حسيت بالخطر (خطر اني كبرت وبديت اتخطب واهلي ناوين علي ! )!
والشيء المزعج بالموضوع ان امي ترزني بكل مكان
هذي بنتي الي ماتزوجت هذي بنتي الي ماتزوجت من يزيد من يزيد (احس اني بحراج بن قاسم )
مادري ليش الأمهات ينغثون من بناتهم
|
|
|
|
|
على الصعيد الديني
موقف صار اليوم خلاني اعرف اني صفر بالشمال من ناحيه الثقافة الدينية
اخوي الصغير مشتري زوج حمام
انا متضايقه منهم بسبب الأمراض وامي متضايقه من تعلق اخوي فيهم
تقول اخاف يصير يطير حمام
قلت يمى طيب واذا طير حمام
امي تعطيني نظرة تعجب واستغراب :blackeye:
ابوي نفس الحاله :blackeye:
وانا :ponder:
يضنوني استهبل
قلت شفيها يوسع صدره
رجعت امي اعطتني نظرة اقوى :12:
قالت ماتدرين ان الي يطير حمام شهادته ماتقبل بالمحكمة
وان تطير الحمام حكمه مكروه كره شديد
احس مفروض هالمعلومه اعرفها من اول ابتدائي بس الشكوى لله
|
|
|
|
|
خلصنا شكاوي واذا تذكرت شيء كتبته :31:
