الاعياد والسرقات ......الحراميه اشتغلوا.
السلام عليكم .
انا ماكتبت هالموضوع الا من تجربه شخصيه مريت فيها .
انه امس حوالي الساعه الثالثه والنصف.
كنت قاعد اشتغل على الجهاز الاوشوي واسمع صوت صقع (ضرب) كانك قاع تدق الباب على واحد يعني صقع يد انسان...... واضح انهم سووا هالحركه عشان يتاكدون فيه احد والا لا..... على الويندو<==واحد متاثر بالكمبيوتر:)
المهم اول مره سكت ثاني مره صبرت ثالث مره معاد قدرت ...وايضا كنت اسمع خشخشة المكيف (الصحراوي).
بعده طلعت من المحل اللي انا فيه صبرت شوي قلت يمكن قطو اوشي ثاني .
المهم مسكت نفسي وقلت هذي ياعصابه يامدري وش .
وهم واضح انهم انتبهوا لسيارة الوالد كان مدخلها وسيارتي برا قالوا يمكن مافيه احد في البيت .
وطبعا انا كنت لحالي في البيت لحد يسالني ليش.
المهم قلت افتح الويندو واشوف فيه احد والا لا ومع الربشه اللي انا فيها طرحت شي كان موجود فشكلهم اسمعوه وبعدها انخشيت جنب الويندو وصبرت .
همن فتحتها بسرعه وناديت (اطلع يالحرامي يالرخمه اطلع وراك منخش اطلع )
همن صكيت الدريشه ...وقلت لنفسي شكلهم اعرفوا ان مافيه احد وانحاشوا.
عاد بعدها ارتحت وجلست حمدت ربي على السلامه .
THE END
واكيد ان الاوقات ذي بيطلعون حرامية كثار لان اغلب الناس تلقونهم طالعين لاهلهم وجماعتهم.
وانا ماحبيت اقول هالقصه الا انه ممكن اي واحد تحصله نفس اللي صار بس اللي عنده احد مهوب زي اللي ماعنده:) وايضا ياخذون حذرهم اللي كانت حالتهم مثلي.
وانا بغيت اسوي زي الافلام لاكن شكلي ماانفع الا كومبارس:D
لانه اول تجربه لاكن ان شاء الله ان جوا مره ثانيه لاقوم اطاردهم في ذا الشوارع ومعي بندق الشايب.:)
والسلا ختام .
ـــــــــــــــــــــــــــــــــــــــــــــــــــ
مفتاح الموضوع.
الويندو=دريشه=شباك=طاقه=فتحه في جدار البيت منها ينسم البيت ومنها تدخل اشعة الشمس(هههههه)طبعا الفتحه ذي عليها شي يسترها طبعا .
بندق=بندقيه=مدينه في ايطاليا (ههههههههه)
قطو=بس (ياولد)=قطة(مهيب قطة)= مياو مياو=هي حيوان يقال انه من نسل النمر لكن ضعيف ممكن تجي بيضا حمرا شقرا سودا واذا كانت سوداء فاانحش وارم العباه لانها ممكن يكون راكبها جني=ماادري كان فيه معنى ثاني.
اذا فيه شي مافهمتوه قولوا.
_________________________________________
وعفوا.
