ألحق ...خمسة من أعضاء المنتدى اختطفوا في دسك (ريزدنت إيفل) <<قصة مرعبة>>
حياكم الله جميعاً ... هذي قصة كتبتها بمناسبة الإختبارات ...
وراح تكون آخر قصة حتى تنتهي الإختبارات..
في هذي القصة راح يشاركنا خمسة من أعضاء المنتدى ... وممكن العدد يزيد حسب الحاجة ...
والقصة هذي تجمع بين الضحك والرعب ... وأتمنى إنها تعجبكم إن شاء الله.
راح نبدأ القصة مع أربعة من الأعضاء ...
(العضو الأول) دجو: واحد من الشخصيات المهمة في القصة ...
و تسرعه وأخذه للأشياء ببساطة من أهم العوامل اللي خلته أهم طرف في القصة .
(العضو الثاني) عماد18: وهنا راح نسميه (عماد) بس ، وما راح ندلعه ...
شخصيته الهادئة هي اللي تخليه يكون قيادي بين أصدقائة.
(العضو الثالث) خوباج: ما أعرف عن شخصيته الشيء الكثير ...
لكنه فرض نفسه وبقوة بعد الفلاش الانتحاري ... وبنتعرف عليه أكثر في القصة...
وبتكون هذي أول وآخر قصة يشارك فيها في حياته ... لأن الباقي من حياته بيكمله في كوكب ثاني.
(العضو الرابع) الكوبرا : أول ما تقابله يهيأ لك إنك أمام شخص طيب و في حاله ...
من الهدوء اللي يصاحبه ... ولكن في المواقف الصعبة يظهر على حقيقته ...
ويزيد الأمور صعوبة على نفسه وعلى من معه.
أما العضو الخامس فراح نشوفه في الجزء القادم ... وما راح نتكلم عنه الحين.
كنت ناوي أدخل (الوسط) في القصة ... ولكنه كان عصبي أكثر من اللازم ...
وكل ما أدخله في مشهد يخربه علي ويدخلنا في متاهات مالها آخر ... علشان كذا شوٌته برا ...
وكفايه علينا دجو وطفاقته.
وأتمنى قبل ما أبدأ إن ما حد من اللي اخترتهم يزعل ... وإذا كان ود أحد منهم وده ينسحب ...
أبغاه يقول لي قبل ما ندخل في الأجزاء الثانية... والآن نبدأ القصة ....
في استراحة المنتدى
في ليلة باردة ممطرة وفي الاستراحة التابعة للمنتدى كان أربعه من الأصدقاء سهرانين ...
فالاختبارات على الأبواب وأصدقائنا بيحللون آخر يوم يجتمعون فيه قبل ما يدخلون دوامة الاختبارات ..
أعاذنا الله وياكم منها وخلصها على خير..
كان الأصدقاء يقضون وقتهم بتبادل أطراف الكلام ، عدا دجو الوحيد و اللي قاعد يلعب كمبيوتر في دسك (ريزدنت إيفل) ...
وكان يتبادل معهم الكلام مرة ... ويكمل اللعب مرة ... إذا طلع له واحد من الزومبي ...
خوباج : ياخي كلما جينا هنا أزعجتنا بهذا الدسك ... إعن أبو أبليسك كم مرة تلعب فيه في اليوم؟؟
الكوبرا: شكله مولود في الدسك ... هههههههه.
دجو (وهو يرد بدون نفس): ياخي .. مالك ومالي ... خلصته سبع مرات ...
تبي شيء ... أفففففف.
عماد: ياخي كفاية عليك مرة وحده ... تعال خلنا نسولف ...
الأسبوع الجاي اختبارات ... وما راح نشوف بعض مده طويلة .
وبالطبع ما أعطى دجو لكلام أصدقائه أي بال ... وكمل اللعبه ... خصوصاً إن وقتها طلع عليه أربعة من الزومبي مره وحده كانوا مترصدين له في دولاب ... فكان مشغول في حصدهم ..
وبينما الأصدقاء يكملون سهرتهم ضرب البرق فجأة كبينة الكهرباء حقت الاستراحة ...
مما ولد كهرباء قويه جداً ... اتجهت للغرفة الوحيدة في الاستراحة اللي كان فيها أصدقائنا...
وطلع صوت فرقعه قوي من التلفزيون اللي كان دجو يتابع فيه لعبة (ريزدنت إيفل) ...
وبدون أي إنذار إختفى الأصدقاء تماماً من الغرفة ...
أمام القصر الكبير
المشهد اللي وصفناه لكم أخذ بالضبط ثانية وحدة ... و فجأة لقى أصدقائنا أنفسهم في الأحراش وأمامهم قصر كبير ...
بعد ما كانوا قبل ثانية وحده في الاستراحة ... ولفترة بسيطة سكت أصدقائنا بدون أي ردة فعل ...
قطع عليهم هدوئهم عماد ...
عماد: وش السالفة ؟؟؟ وش صار ؟؟؟ وين حنا فيه ؟؟؟
سؤال ما أجاب عليه أحد فالكل مندهش ... ففي غمضة عين انتقلوا من الاستراحة لهذا المكان ..
وقام الأصدقاء فزعين يشاهدون المنظر المرعب اللي أمامهم ... فالدنيا لا تزال ليل مظلم ...
وكانوا في مكان مفتوح، وهم جالسين على عشب نصف يابس وما فيه أي أثر للحياة ...
وكان أمامهم قصر ضخم مضيء ومخيف ...
وجلس دجو وهو غير مهتم وقال : أيييييييييييهههه هذا حلم سخيف أكيد .
ولفتره ظن كل واحد من الأصدقاء إنه يحلم ... ولكن هذا الشعور المطمئن بدأ يتلاشى لما بدأت تظهر أصوات مخيفة ..
عععععععاااااااااااااااوووووووو
هنا قام دجو وهو خايف ... وقال: تكفون قولوا لي إني أحلم ...
وكمل للكوبرا: أقرصني تكفى ... أكيد أنا أحلم ...
وبدون شعور منه ، فعل الكوبرا ما طلبه دجو منه ...
دجو (والتوتر بدا يدب فيه): آآآآآآآييييييييي ... الدعوة صدق أنا ما أحلم ... يمااااااااااااه ... وين حنا فيه ؟؟؟
عماد: أنا ما دري ... أنا ماني قادر أفكر في شيء ...
خوباج: القصر هذا ماهو غريب علي ... شكله مألوف ...
دجو (وهو يرتجف): هذا ... هذا ... هذا يشبه القصر اللي في بداية (ريزدنت إيفل) ...
وكان لجواب دجو أثر القنبلة على الأصدقاء ... فكان كل واحد منهم عنده إحساس إن المكان اللي هم فيه الآن له علاقه بالدسك اللي كان يلعب فيه دجو قبل ما يختفون من الغرفة ...
و مره ثانيه غرق كل واحد من الأصدقاء في هواجيسه مره ثانية ...
ولفتره ما هي قصيرة ظل كل واحد يفكر ولكن بدون نتيجة ...
لأن عقولهم ما أستوعبت اللي صار حتى الآن ....
وقطع عليهم أفكارهم الصوت المرعب ...
ععععععععععععااااااااااااااااااااااااااوووووووووووو
وكان الصوت يقرب منهم بسرعة ...
عماد : لازم نتحرك من هنا بسرعة قبل ما يوصل لنا الشيء اللي يطلع هذا الصوت ...
خوباج: وين نروح ...
وأشر عماد على القصر المرعب ...
الكوبرا: أنا لا يمكن أروح لذاك المكان لو يصير ويش ...
عماد: ما فيه وقت للتفكير وإلا للاختيار ... لو جلسنا هنا أكيد بنموت ... يالله بسرعة الصوت يقرب ...
وبدأ الصوت المرعب يقرب أكثر وأكثر ... وبخطى ثقيلة من الرعب جر أصدقائنا أقدامهم للقصر ...
حتى وصلوا لمدخله ...
في قصر الرعب
وعند مدخل القصر قام أصدقائنا ياخذون نفسهم ،ويتشاورون ...
خوباج: ما أدري وش الأسوأ ... اللي ينلقاه داخل القصر وإلا اللي برا ؟
دجو: يارب يكون الباب مفتوح مثل القصة .
وعندها بدأت الأشياء المطاردة تقترب من أصدقائنا ... كان الظلام حالك .. ولكن اللي شاهده الأصدقاء إن المخلوقات شكلها قريب من شكل الذئب وشكل الدب ..
عماد(وهو يحاول يفتح الباب): لازم يفتح الباب .
وفعلاً طلع الباب مفتوح ... وبدون تفكير ... دخل الأصدقاء ... وأغلقوا الباب وراهم.
كان القصر مضاءة جميع أنواره ... وكأن اللي ساكن فيه يستعد لحفله ... أو ما شابه ...
وكان المدخل كبير ... وفي منتصف الصالة درج تطلع للدور الثاني ..
وفيه بابين على اليمين وثلاثة أبواب على اليسار ...
ومما شد إنتباه أصدقائنا آلة كاتبه كانت عند الدرج مباشرة ...
الكوبرا: تتوقعون إن فيه أحد ساكن هنا؟
خوباج: أنا ما ودي إن يكون فيه أحد ساكن!!
وكان لكلمة خوباج أثر مرعب على الأصدقاء ... ففعلاً ما هي نوعية سكان هذا القصر ...
دجو: الظاهر إن القصر اللي حنا فيه الآن ... هو نفس القصر اللي في لعبة (ريزدنت إيفل) ...
أنا متأكد إنه هو نفسه اللي في الجزء الأول.
وسكت باقي الأصدقاء ... فالجواب اللي قاله دجو ... هو اللي كانوا يشكون فيه خصوصاً إن كل المؤشرات تدل على كذا ...
عماد: شكلنا انسحبنا للدسك اللي كان يلعب فيه دجو بطريقة ما .
الكوبرا (وهو يصرخ على دجو): كله منك ... لو ما كنت تلعب هذا الدسك ما جينا هنا ...
دجو: ليه طال عمرك ... كان ودك إني ألعب ويننج إليفن مثلاً .. وبعدين وش دراني إن اللي صار بيصير؟
عماد : دجو ماله أي ذنب يالكوبرا ... اللي صار ماهو منه ... هذا قضاء وقدر.
خوباج: ياريتك كنت تلعب ويننج أليفن على الأقل نشوف (بتيستوتا) ...
عماد: ما أتوقع إنك بتحب تشوفه وهو داخل كمبيوتر ... ما تدري وش راح يكون وقتها .
وترك الأصدقاء الاستنتاجات عن الأسباب اللي جابتهم وبدءوا يفكرون وش يسوون حتى يتخلصون من هذي المصيبة .
دجو: أتوقع إن فريق (ستار) اللي في الدسك بيجون للقصر حسب اللعبة ... وممكن إنهم يساعدونا إذا جوا ..
الكوبرا: طيب يمكنهم جوا وخلصوا اللعبة ومشوا؟
خوباج: ويمكن بعد إننا جينا قبلهم ... وبعد شوي بيجون؟
الكوبرا: وممكن بعد إننا إحنا فريق (ستار) اللي بيكون في اللعبة.
عماد: وممكن يكون فريق (ستار) هذا إذا كان موجود، غير ودي وخطر جدا ً.
كانت كل الاستنتاجات قريبه من الواقع فعلاً ... وكل واحد منها ممكن يكون هو الصحيح ...
وكانت المشكلة ... إن واحد من الاستنتاجات فقط هو الصحيح أما الباقي ... فخطأ ...
والخطأ راح يكون قاتل جداً .
وقطع الصمت الكوبرا بقوله: طيب ... كيف بنرجع لبيوتنا؟؟؟
دجو: يمكن إذا خلصنا الدسك ...
خوباج: ويمكن ما نرجع من أصله .. ويمكن بعد يكون حل الدسك غير الحل اللي في هذا القصر ...
عماد: ما عندنا أي خيار ... أحسن حل ... إننا نعتمد على نفسنا ...
ولا ودنا نعتمد على شيء غير مضمون...
(وكمل كلامة): من فيكم يعرف الدسك زين.
دجو: أنا مخلصه أكثر من خمس مرات.
الكوبرا: أنا خلصته مره وحده ...
خوباج: أنا ماكملته ... لأن ألغازه صعبه ... لكني أعرف فكرته.
عماد: حلو ... يعني ما حد منكم غريب عليه ... أما أنا فعندي فكرة عنه ...
أهم شيء إننا مهما صار ما نفترق.
(ووجه كلامة لدجو): أنت أكثرنا خبرة في الدسك ... وش اللي يبين لنا إن فريق (ستار) جاء قبلنا ...
أو ما جاء ...أو ما راح يجي من أصله.
دجو: ممكن نعرف إذا كانوا جوا ...أو لا ، بطريقة بسيطة ...
إننا نشيك على الأبواب...إذا كانت مفتوحة كلها ،معناها إنهم جوا قبلنا ...
وإذا كانت مسكره ،معناها إنهم ما جوا أو ما راح يجون.
خوباج: طيب ... وش درانا إن الطريقه هذي صحيحة ... يمكن تكون كل الأبواب مفتوحة ...
ويمكن يكون فريق (ستار) إذا كان موجود، خلف أحد الأبواب؟
ويمكن زي ما قال عماد ،يكون هذا الفريق أخطر من اللي برا ...
عماد: إحنا بنسوي اللي في الدسك ... هو أقرب شيء .. و إذا ما نفع نشوف بعدين ...
(وكمل كلامة): الآن بنشوف الأبواب زي ما قال دجو ... و لازم أؤكد عليكم ...
لا تدخلون من أي باب ... تأكدوا بس إنه مفتوح ...
دجو أنت والكوبرا بتشوفون الدور الثاني ....
وأنا و خوباج بنشيك على الأبواب اللي تحت ... لما نخلص نجتمع هنا.
وصعد دجو مع الكوبرا للدور الثاني ..
الكوبرا: تتوقع فيه وحوش من النوعية اللي في الدسك؟
دجو: ياريت نلقى أسلحة مثل اللي في الدسك و...
وحصلت الكارثة ... فبمجرد صعود دجو والكوبرا لآخر درجة إنفتح باب سري في الدرج وسقط الكوبرا ودجو منه ...
إنتهى الجزء الأول ... وبنكمل يوم الأحد علشان الإختبارات إن شاء الله ...
أتمنى إنكم تعطوني رايكم في القصة ... وإذا كان عند واحد منكم أي أفكار لا يبخل فيها علي
جميع الحقوق محفوظة الوسط 2002
