العزائم و المناسبات و اضراها على الدايت و افكار لمقاومه اكل العزائم و المناسبات

من اكثر الاشياء التي تتعبني في العالم العربي و خصوصا في دولتي الحبيبه السعوديه موضوع العزائم في فترات الاعياد و المناسبات . اي مكان تروحه يقدمونلك عشاء او غداء موجود فيه بلاين من الكلوريات و مو هنا المشكله لانك انسان قوي ولك فتره ماشي على نظامك ما بيأثر فيك و لا بيغريك لا شكل المفطح و لا شكل المدفون و لا شكل الغوزي و لا اي شي . لكن المشكله تبدا اذا احد شافك ما تاكل قام يرميلك لحم عندك و قام يجيبلك جميع المؤكولات الي على السفر قدامك عشان تاكل و تتغذي و يقولك بكل انبساط فرحه ( كل كل انت نحفان هذي الفتره ) و انت نفس تقوله شكرا لانه ملاحظ ونفسك تقوله لو سمحت خليني في حالي ما ابي اعبي فل ابي بس اعبي ب 10 ريال هههههههه . هذي مشكله عويصه جدا . و الي ادهى من كذا اذا قلتلهم انك مسوي دايت قامو الشباب ينكتون عليك و سرت نكتت المجلس و قام الشياب يشرهون عليك و يقولون ( كيف تجي بيتنا و ثمك ما يطبه اكلنا ) ودك تقولهم انا دافع دم قلبي على هذي المكملات و الدايت و البرنامج الغذائي و حارم نفسي فترات من اشياء احبها عشان اوصل لهذه النتائج . فاذا كنت انسان قوي و ما اكلت زعلو منك و لكن اذا اكلت هنا تبدأ الدراما . اليوم الي بعده تنعزم مع ناس ثانيه و تبدأ نفس المعاناه من جديد و بعد مره تنحرج و بعد كذا تقول خلاص باخذ بقيه الاسبوع بريك ....... ( احذر من هذا البيريك ) اول ما تاخذ بريك يجي الاسبوع الي بعده و انت متكاسل و تقول بزود كمان اسبوع بريك في الدايت بس بمشي على التمرين ( هنا تبدأ الدهوره ) و كثير من الشباب يدخل في دوامه العزائم من فتره العيد لحد عيد الحج و عندك فتره الصيف و الزواجات و المناسبات و الجمعات العائليه . انا اتكلم هنا من واقع تجربه استمرت سنين .
و لقيت تقريبا حل لموضوع العزائم و التقليل من اضرارها عل الدايت ( طبعا هذي الحلول للشخص الي ما يقدر يقول لا ما ابي اكل معاكم ....... اذا انت تقدر تقول لا فانا اهنيك على قوه رايك و اصرارك بس برضو بيجيك كلام )

هذي الاشياء الي اسويها يوم اضطر اني اروح عزيمه و يحرجوني على الاكل:

1- اشرب ماء بكميات كبيره جدا ( تساعد في التحكم في الشهية)
2- ابدأ بالسلطه او اي نوع خضار او فاكهه غير مطبوخه
3- توجه للخضار المطبوخه
4- بعدها توجه و كل اي نوع بروتين موجود ( دجاج -سمك -لحم)
( اذا كان موجود جلد او شحوم حاول ازالتها قبل ما تاكلها )
5-بعدها توجه للكربويهدرات ( اذا قدرت تهرب من الرز و النشويات فمبروك عليك )

اهم شي الموضوع ما يكون فيه احراج امهات لان الواحد ما يبي يضيق صدورهم على العيد

اذا احد عنده اي طريقه لاجل مقاومه الاكل في العزائم بالله يشاركنا هنا و يخلينا نستفيد من تجاربكم يا وحوش.

كل عام و انتم بخير وحوش

شكرا خوي على الموضوع انا دايمن لما اكون مخفف اكل تجيني عزومه ههههههههههههههه

والله انا احاول اصر اذا كنت معزوم عند ناس قريبين مني لكن اذ1 كانت عزيمه عند ناس من الاقراب البعيدين احط لحم مع السلطه وضيع الوقت بالسواليف

اتفق معاك اخوي في انه موضوع محرج ومؤذي للي يبغى يوصل لهدف وهنا حبيت اوضح كم نقطة في برنامجك الهدف طيب لكن الطريقة محتاجة تعديل وبتأثر على جسمك وبتهدم الي بنيته اولا لا تشرب سوائل بكميات كبيرة مع الاكل او بعده مباشرة وخصوصا اكل دسم لانه بتقلل تركيز الحمض والمواد الهاضمة وبتزيد الحمل على المعدة وتتاخر في عملية الهضم ولا تكون بنفس الفعالية وتؤدي لتخمر الكربوهيدرات حيث انها اخر شي يهضم بعد البروتين والدهون وايضا نفس الشي الفواكه لا تؤكل مع الوجبات الرئيسية بل قبل او بعد الوجبة بساعتين على الاقل لكن اذا ان تتجنب الاحراج في المناسبات كل ببطئ يعني اللقمة اقعد فيها وقتك جهزها على وزيل الشحم على مهلك ونقي اللحم من افضل الاماكن مثل الكتف كما كان يحبه الرسول عليه الصلاة والسلام قلل من كميات الرز والدهون والحلويات والخ بحيث تعطي ايحاء بانك اكلت كثير وفي حركة ثانية اني اخد اخويا الصغير جنبي واسوي اني بقطعله وازبطله الصحن وااكله وبكدا ماحد ينتبهلي واقوم وانا ماكل القليل ومحافظ على نظامي وبدون أي احراج

تحياتي لك

اشكرك على الموضوع الرائع وتجربتك الأروع وأنا اتفق معك وبعد العزيمه بساعتين إحرقها مشي أو حبل وبكذا استفاد تغذيه ورياضه وعدم الإحراج ..

صدقت أخوي وهذي المشكلة انا اعاني منها كل جمعة،،، الي احرقه ارجعة في بيت اهل زوجتي

كانهم مو مصدقين ماخذ بنتهم !! كل ما اجيهم ينفخوني 35،،، حتى مالك محل للهواء.

هذي الأمور في العزايم ممكن تزعل الناس..لذلك بنظري انك لازم تاكل
يعني الناس مكلفة انفسها على شانك..و في الأخير تجي و ما تاكل..؟

لكن للأسف هذي المشكلة أواجهها حتى مع أصدقائي..يعني لما نطلع نتعشى..
و في سيارة وحدة مثلا..كلهم يحددون مطعم واحد..بعدها انا اتكلم و اقول هذا المطعم ما يناسبني لأنه مافيه مشاوي..
و لا حياة لمن تنادي و حنا متعودين نمشي براي الأغلبية..فيخترب النظام هنا في بعض الأوقات
أو حتى اذا كل واحد جاب عشاه من مطعم مختلف..لما يشوفوني ماسك البيبسي دايت...
أصير شماته لهم..(أحلىىىىى يا داااااااايت أنت)..

و مرة نفس الحالة.. العشا كان جماعي سفري وودوني كنتاكي..فطلبت منه أخف وجبة و قلت له البيبسي يكون دايت..
و لما خلص الطلب و جا يعطيني البيبسي..يقولي مافيه دايت..و عطاني بيبسي عادي
فما شربتة و خليت الشباب يمرون بقالة عشان اشتري دايت..
و هنا رجووني..(ياخي أشرب..حرام عليك ترمي البيبسي العادي..يعني بتموووت اذا شربتة..:bigeyes:)

و اليوم العشا بعد مع الحمولة في مزرعة..
الله يستر

^^^
ملاحظه خارجيه
البيبسي الدايت مضر اكثر من العادي لاحتوائه على الاسبارتم يعني فكلا الحالتين ابتعد عنه
والعادي يحتوي على مايقارب عشر ملاعق سكر يعني دمار..

تحياتي

كنك دريت اني معزوم اليوم على العشاء وسحبت عليهم!

والله اني بموت جوع والبيت فاضي مافيه احد..

اولاً انا ضد الاسراف في الذبائح ، 20 خروف يذبح دفعة واحدة + مئات الكيلوجرامات من الرز = لا احد يأكل مجرد " نقنقة " !

ايش فيها المشاوي طيب؟

انا من ناحيتي اذا انعزمت اكل لحم بشكل كبير ثم القليل من الرز واقوم وانا لسى جيعان ، المصيبة اول ماتقول لازم تصيح وسط المجلس : كثر الله خيييييييييييركم ! يقوم يرد عليك صاحب العشاء اقعد ياولدي ما تعشيت! ترد عليه الحمدلله يرجع يرد عليك : ماتعشيت! غصب هو؟

انا صرت اقوم من العشا وانا ساكت اغسل وانتظر الين يطلع المعازيم ثم اروح لصاحب العشا واقول له كثر الله خيرك يابو فلان ، وخليه يقول لي ماتعشيت ويبشر بسوبلكس خلفي!

عاداتنا الغذائية سيئة ، من اكبر البلاد اصابة بالسكري السعودية ان لم تكن اكبرها ، حتى الشيبان مساكين يقعد الواحد وانت تعرف انه مصاب بالسكر ويجبرونه انه ياكل رز ولحم واذا تعذر بالمرض قالوا مااااش

على طاري الشياب و العزايم ............. ما تلاحضون بعد العشا في العزايم تشوف الشياب دايم زابنين في الزاويه و مشمرين ثيابهم و قاعدين يدونها انسلوين في الزاويه تقول مدمنين هروين هههههههههه اللله يشفي مرضانا و مرضا المسلمين يا رب .

صدقك يالطيب .. العزيمه اذا ماكلت فيها وايد يعني انته ماااتبي تاكل ..

والرسول صلى الله عليه وسلم قال (حسب المسلم لقيمات يقمن صلبه)
وقال(ثلث للطعام وثلث للشراب وثلث للنفس) ..

الله يعين والإنسان لازم يتفهم انه الاكل بحدود العقل ويكون كثير الفائده للعقل والجسم ..

تحيـــاتي ..

هلا اخواني
انا عندي لكم طريقه حلوه
كل شوي وسولف شوي كل شوي وسولف شوي وانته ماشي اطوف الوقت
بس اتحمل وانته تسولف واحد يشك فيك ويقول بسك سوالف كل كل والله وجهك يستوي احمر ههههههههه
بس حاول تتفادى العزايم قدد ما تقدر


انا الحمدلله احب العزايم لاني ابا ازيد وزني هههههههههه
كلهم يسولفو وانا اكل ولا معبرنهم هههههههه
وتحياااااااااتي

والله الموضوع هذا مشكلته مشكله

اما انا عن نفسي

اذا كانت العزيمه كبيره يعني تجمع كل العالم مثل ايام العيد والعروس

اذا سمعتهم قالوا العشاء اقلظوا ابد مع هالباب اطلع برا واجلس اذا حسيتهم بيخلصون دخلت وكليتلي تفاحه مع برتقاله وطلعت

اما اذا كانت العزيمه صغيره ولا طلعه مع الشباب فـ الشكوى لله كل واذا حسيت بطنك بينفجر قم خخخ

ويعطيك العافيه على الموضوع

بالنسبة لي والله ساحب عليهم سحبه
لاعزايم ولا غيرة
احاول قد ماقدر اكلي مايخترب كلش
عشان كذا من النادي للمجلس ومن المجلس للغرفة
والاكل قد ماقدر يكون شي استفيد منه ويستفيد منه جسمي
.
.
.
بارك الله اخوي وصدقت الامهات الله يخليهم لنا مانحب نزعلهم
بس فديتها والله متفهمة هالامور
.
.
.
موضوع يستحق القراءة والوقوف امامة
.
.
.
الف تحية وشكر

ما عندي مشكله انا

اول واحد اقلط على العشاء واخر واحد يقوم

وبعدين سؤال لا كنت عازم رجاجيل ببيتك وحلفو غير تجلس معهم لازم تاكل عشان ياكلون هم


لازم تفهم انه فيه شي يسمونه استثناء

أخوي المري ماشاء الله على الوالده ربي يخليها لكم...

ههههه أبو ذراع ماشاء الله عليك اجل تنفع معزز في العزايم هههه

ينقل من التثبيت للمواضيع المميزة

صادق اخوي تدخل في احراجات وغير مثل مافلت يقولون انك موسوس وما خذ مقلب بجسمك

السلام عليكم

اولا احب اشكر كاتب الموضوع ولا يهونون المشاركين

والله انا هذا الموضوع فاقع قلبي من زماااان واول ما شفت العنوان فرحت وخشيت على طوول

اما عني انا اذا تورطت او حكم علي اعدام في عزيمة لأنها بصرااحة اعداااام قتل كل ما بنيته خلال الفترة اللي راحت

احاول اني اخفف بقدر الامكان واحط السلطة على الرز واكل السلطة واخلي الرز على شان اوهمهم اني اكلت واخفف لحم يادوب قطعتين او ثلاث

ويبداء السيناريو بعد العشاء لما ارجع البيت اشرب لي شاي الضيافة للرشاقة مدري اذا احد يعرفو هذا الشاي اشربه واحسب لبطني ست ساعات ويطلع كل اللي اكلته ههههههههههههههههههه

واحس بالرااااحة بعده احس اني ابريت ذمتي من الذنب اللي ارتكبته ههههههههه

هذي طريقتي مدري صح ولا خطاء بس لو فيه احسن من كذا قولو خلونا نفتك

وتكفون يا شابااااب غيروا هذي العادة يعني احنا جيل اليوم والمستقبل ان شاء الله خلونا نعدل عاداتنا للاجيال اللي بعدنا

عارف بتقولو صعبة لو جاك ضيف بس عاد على حسب الضيف اذا شايب ولا شباب فكروا فيها

والله ياشباب اذا كنت بدايت وبعزيمة آكل بس اللحم لوحده واذا اكلت رز اكل كمية خفيفة جداً وبعدين أحرص انها تكون بعد التمرين افضل عشان تتأكد ان جسمك يستفيد قدر الامكان من الاكل ....