أرغب في زيادة وزني على الاقل عشرة كيلو

السلام عليكم ورحمة الله وبركاته

كيف الحال يالربع عساكم بخير ،، وكل سنة والجميع بخير ،، طبعا هذه اول مشاركة لي في هذا المنتدى الجميل المتابع له من فترة ، فلكم جزيل الشكر على ماتقدمونه لاخوانكم .

في الحقيقة انا عمري 28 سنة ، وطولي تقريبا 174 سم ، ووزني 64-65 كيلو .

الرغبة والامنية :
أنا بصراحة أرغب في زيادة وزني على الاقل عشرة كيلو ، لاني ملاحظ ان وزني لا يلائم طولي ، وبصراحة لا اريد تضخيم مثل هاللي نشوفهم في المصارعه وغيرهـ ، انا ابي جسم فرنسي مثل ماقراءته عندكم ، اللي هو يجي مثل الفراشة والعضل يطلع بارز والبطن مقسم ،، يعني باختصار جسم معضل وبارز ،، تخليك تمشي بالشارع والعالم كلها تطالع فيك ،، ماهب تمشي وعظامك مرتزة هههههه ،، خاصة يالربع اني داخل على زواج ان شاء الله ونبي نعدل الجسم قبل الزواج .

الطريقة اللي قاعد اسويها :
واحد من الاخوان نصحني ببروتين اسمه ( Pro Complex ) لونه موف تقريبا وحجمه ( 1045 G ) ،، فداخله توجد ملعقة صغيرة ومجوفة فقبل ما اروح للتمارين اشرب منه نص ملعقة بصراحة ،، اوقات مع الحليب واوقات مع الماء ،، لاني ان حطيت ملعقة كاملة احسه يطلع ثقيل ،، فاستخدامي له نصف ملعقة يوميا فقط ،،، واتمرن بالنادي حزة الظهر تقريبا ساعة كاملة ( قبل التمارين استخدم الكارديو خمس او عشر دقايق بناء على طلب المدرب ) وهذا هي طريقتي مدري هي صحيحة ام لا .

نظامي اليومي :
أنام الساعه 1 صباحا تقريبا واصحى حزت الفجر أصلي الفجر وانام لحد الساعه 11 الصباح تقريبا لان هالفترة عندي اجازة ،، وعقب الظهر اروح للنادي ،، واذا عودت اتغذا غذاء دسم شوي او اخليها عقب العصر ،، وعقب المغرب اخذ وجبة صغيرة ساندوتش ،، ولحد الساعه عشر بالليل اتعشاء وهكذا ..

فالخلاصة يالربع أنا ذكرت لكم جميع التفاصيل لاني فعلا متحمس وعندي الرغبة الشديدة لتحسين مظهري وجسمي ،، ولثقتي فيكم وفي اجاباتكم سجلة في هالمنتدى ووضعت لكم طرحي ،، فعندي كم سؤال لو تجاوبون عليه اكون شاكر لكم ومقدر :

1- هل البروتين اللي استخدمه ملائم لرغباتي والمناسب لي ام لا ؟؟ اذا كان الجواب بـ لا ياليت تنصحوني ببروتين ؟

2- كم مره يتم استخدام هذا البروتين في اليوم ؟ وياليت تحديد الاوقات بالضبط ؟

3- هل البروتينات لها اضرار جانبية للجسم ،، لاني سمعت انه اذا استخدمت البروتينات وماحرقتها ممكن تسبب امراض وفشل كلوي لاسمح الله وغيرهـ فهل هذا الكلام صحيح ؟

4- أتمنى منكم نصحي بأفضل وقت لأداء التمارين ،، وهل مره في اليوم تكفي لتحقيق رغبتي وطموحي ام احتاج أن افعل التمارين مرتين يوميا ؟

5- هل من الممكن تنصحوني بجدول يومي مناسب لتحقيق سرعة النتائج ؟

6- كم تبلغ أوقية الماء ؟؟ هل صحيح ان الاوقية الواحدة تساوي 30 مل ؟

فأتمنى يالاخوان تفيدونا ولكم جزيل الشكر ،، وكل ماكانت الاجابات مفصلة كل ماستفدت اكثر ،، ونا والله خايف شوي ومحتار ومتردد ومحيوس لذلك وضعت الموضوع بنفسي لكي يطمئن قلبي ،، رغم ان المنتدى زاخر ومليئ بالمواضيع المشابهه ،، ولكن اعذروني الله يرضالي عليكم ابي اطمن قلبي فقط .

بالتوفيق للجميع ان شاء الله

‘
وعليكم السلام ورحمة الله وبركاته

حياك الله ..... وانت بخيروصحة وسلامة

في البداية عندي كم سؤال / كم لك تتمرن ؟ وخلال فترة تمرينك مازاد وزنك ؟ البروتين اللي عندك اسمه ( Pro Complex ) أو ( pro complex gainer ) ؟

ــــــــــــــــــــــــــــــــــــــــــ

1- هل البروتين اللي استخدمه ملائم لرغباتي والمناسب لي ام لا ؟؟ اذا كان الجواب بـ لا ياليت تنصحوني ببروتين ؟

ان كان بروتينك Pro Complex فهو ما راح يزيد وزنك الا شي بسيط جدا > البروتين المناسب لك اما ( pro complex gainer ) أو ( Serious Mass ) بالاضافة الى زيادة عـدد وجباتك اليوميه إلى 5 وجبات

2- كم مره يتم استخدام هذا البروتين في اليوم ؟ وياليت تحديد الاوقات بالضبط ؟

3 مرات > ( سكوب الصبح مع حليب + سكوب بعد التمرين مع ماء + سكوب قبل النوم مع حليب )

3- هل البروتينات لها اضرار جانبية للجسم ،، لاني سمعت انه اذا استخدمت البروتينات وماحرقتها ممكن تسبب امراض وفشل كلوي لاسمح الله وغيرهـ فهل هذا الكلام صحيح ؟

لا ابـداً هذا الكلام غير صحيح إطلاقـاً

4- أتمنى منكم نصحي بأفضل وقت لأداء التمارين ،، وهل مره في اليوم تكفي لتحقيق رغبتي وطموحي ام احتاج أن افعل التمارين مرتين يوميا ؟

مافيه شي اسمه افضل وقت هو على حسب جدولك اليومي ومتى تكون فاضي ومستعد للتمرين ! .. انا اشوف انه يكون تمرينك العصر افضل لك ، حتى تكون الصبح اخذت بروتين وتتغدى بعد الظهر وبكـذا تدخل التمرين وعندك باور
مره باليوم يكفي التمرين ، ولازم يكون فيه يوم بالاسبوع على الاقل للراحـه

5- هل من الممكن تنصحوني بجدول يومي مناسب لتحقيق سرعة النتائج ؟

فيه جداول ممتازة تحصلها بقسم المواضيع المميزة

6- كم تبلغ أوقية الماء ؟؟ هل صحيح ان الاوقية الواحدة تساوي 30 مل ؟

اوقيه ما اعرف بالضبط كم تساوي ..... لكن الافضل ان تستخدم شيكر اسهلك فيه المقدار بس ما عليك الا تضع الماء او الحليب والبروتين وتشرب



واي سؤال احنا بالخدمة .. بالتوفيق

ماقصر اخ يـ u turn جاوب على اسئلتك كلها


بس اهم شي انك مستعجل نتايج وتصبر


وصدقني مع الوقت راح تلاحظ انك بديت تطور


والله يوفقك انشا الله

شاكر لكم سرعة ردودكم ولكم جزيل الشكر .

أنا في الحقيقة من زمان أتمرن في البيت ،، وكنت مسجل في اكثر من نادي لكن قطعت عن النوادي فترة طويلة يمكن سنة او سنتين ،،، والفترة الاخيرة سجلت في نادي وداومت عليه ولي تقريبا فيه ثلاث اسابيع ،، ما احس اني زدت شي ،، يمكن لاني استخدم البروتين الغلط او لاني استخدمه بكميات قليلة جدا .

البروتين اللي عندي اسمه ( Pro Complex ) فقط . وليس جينر .

طيب يالغلا ممكن توضح لي اكثر الله يجزاك بالخير :
أنا أعتبر نفسي مبتدأ وابي الجسم اللي ذكرته لكم ،، ابي برو ز عضلات وجسم متناسق وجميل مثل الاجسام الفرنسية ،، ما ابي جسم ضخم مثل هالمصارعين ،، فهل أستمر على هالبروتين اللي معي لاني شاريه من اربع ايام تقريبا ،، او اغيره واستخدم بروتينات اخرى وحبوب وغيرها ،،،، وبيني وبينك يالغالي انا والله اخاف من الكيراتين والجيلاتين والامينيو وغيرها من هالشغلات اللي تكتبونها ،، يمكن لاني اجهلها لا اعلم .

فياليت يالغالي تعطيني اقتراحك ونصيحتك لي ،، هل استمر على هالبروتين واضيف عليه اشياء اخرى ،، أم ان بدايتي غلط ولازم اغيرها كلها ؟

والاستفسار الاخر انا سمعت ناس كثير تمدح هالحبوب ،، وتنصح باستخدامه سواء كنت تبي تخسيس او تبي زيادة بالوزن ،، فمدري شرايك فيه ؟؟ وهذي صورته :
http://ecx.images-amazon.com/images/...500_AA300_.jpg

وايضا شي اسمه ( امينيو 2222 ) مافائدته ؟

عارف اني كثرت عليك بالاسئلة ،، لكن بصراحة ودي تكون بدايتي مضبوطة وجيدة ،، ما أبي اكون مثل بعض الناس اللي اعرفهم ،، صاير لهم يلعبون حديد اكثر من سنة وماظهر فيهم شي ابد ابد ،،

بالتوفيق وننتظر اجاباتكم

اهلا وسهلا فيك اخي
والله يوفقك في زواجك

وماقصر اخينا معك
وبالنسبة للبروتين هو مجرد مكمل غذائي ودامك تستخدم مكمل بروتيني قليل الدهون والكارب مثل البرو كمبلكس فهنا الحكم راح يكون على نظامك الغذائي هل راح تستفيد وتزيد وزن وعضل او لا
بدايتا نظم بالاكل
6 وجبات خلال اليوم
3 وجبات تكون رسمية تكون فيها بروتين عالي وكارب مثلا 5 بياض بيض كا فطور مع كوب حليب بالشوفان او كوب حليب بالكورن فلكس والوجبة الثانية الغدا تكون لحووم وركز على صدور الدجاج والاسماك وجميع انواع اللحوم مناسبة مع سلطات ومو لازم تكون الوجبات كبيرة حيل لدرجة التخمه لا اهم شي توفي حقك .. والجبة الاخير العشا تكون مثلا علبة تونه او ايضا صدور دجاج او بيض
وبين هالثلاث وجبات يكون وجبات خفافية مثلا كوب حليب مع موزه او موزتين .. مكسرات .. حليب بالشوفان .. خبز بر مع زبدة فول سوداني مع عسل .. علبة زبادي .. هكذا تختار

ويكون بين كل وجبة ووجبة من هالست 3 ساعات
طبعا انا شرحتلك بالاعلى تقريبا كيف تسوي جدولك الغذائي بنفسك لانك انت ادرى بالمواد الي تقدر توفرها ولو تبي جدول جاهز شوف البانر الموجود بصفحة كمال الاجسام واللياقة البدنية جدول تضخيم ممتاز

هذا عن الغذاء بعد كذا تقدر ترتب موعد التمرين على وقت غذائك لابد برايي تكون قبل التمرين ماخذ 3 وجبات او جبتين خلال اليوم يعني انسب وقت العصر .. وقبل التمرين سويلك حليب بالشوفان او بطاطا مسلوقة حتى تعطيك باور
وبالنسبة للبروتين البرو كمبلكس من اجود انواع البروتينات وتقدر تكمل العلبة الموجودة عندك سكوب ( ملعقة كاملة ) صباحا مع حليب بعد الافطار بساعتين .. سكوب بعد التمرين مع ماء .. وسكوب قبل النوم مع حليب مثل ماتفضل الاخ

وبالنسبة لصورة الحبوب الي حاطها هذي مالتي فيتامين وممكن تاخذ بديل له من اقرب صيدلية بس برايي الحين بس استخدم البرو وبعدين فكر تضيف والامينو احماض امينية لتكملة الناقص من الغذاء ونفس الكلام بس خليك ع البروتين واهتم باكلك وان شاءالله كافي حاليا

وان شاءالله موفق اخي

اخوي خذ لك سيرياس ماس + bcaa + كرياتين موهيدرات ... اتوقع تكفي وتوفي هالمكملات والباقي يعتبر اسراف

اقتباس:

---

المشاركة الأصلية كتبت بواسطة بردان1

اهلا وسهلا فيك اخي
والله يوفقك في زواجك

وماقصر اخينا معك
وبالنسبة للبروتين هو مجرد مكمل غذائي ودامك تستخدم مكمل بروتيني قليل الدهون والكارب مثل البرو كمبلكس فهنا الحكم راح يكون على نظامك الغذائي هل راح تستفيد وتزيد وزن وعضل او لا
بدايتا نظم بالاكل
6 وجبات خلال اليوم
3 وجبات تكون رسمية تكون فيها بروتين عالي وكارب مثلا 5 بياض بيض كا فطور مع كوب حليب بالشوفان او كوب حليب بالكورن فلكس والوجبة الثانية الغدا تكون لحووم وركز على صدور الدجاج والاسماك وجميع انواع اللحوم مناسبة مع سلطات ومو لازم تكون الوجبات كبيرة حيل لدرجة التخمه لا اهم شي توفي حقك .. والجبة الاخير العشا تكون مثلا علبة تونه او ايضا صدور دجاج او بيض
وبين هالثلاث وجبات يكون وجبات خفافية مثلا كوب حليب مع موزه او موزتين .. مكسرات .. حليب بالشوفان .. خبز بر مع زبدة فول سوداني مع عسل .. علبة زبادي .. هكذا تختار

ويكون بين كل وجبة ووجبة من هالست 3 ساعات
طبعا انا شرحتلك بالاعلى تقريبا كيف تسوي جدولك الغذائي بنفسك لانك انت ادرى بالمواد الي تقدر توفرها ولو تبي جدول جاهز شوف البانر الموجود بصفحة كمال الاجسام واللياقة البدنية جدول تضخيم ممتاز

هذا عن الغذاء بعد كذا تقدر ترتب موعد التمرين على وقت غذائك لابد برايي تكون قبل التمرين ماخذ 3 وجبات او جبتين خلال اليوم يعني انسب وقت العصر .. وقبل التمرين سويلك حليب بالشوفان او بطاطا مسلوقة حتى تعطيك باور
وبالنسبة للبروتين البرو كمبلكس من اجود انواع البروتينات وتقدر تكمل العلبة الموجودة عندك سكوب ( ملعقة كاملة ) صباحا مع حليب بعد الافطار بساعتين .. سكوب بعد التمرين مع ماء .. وسكوب قبل النوم مع حليب مثل ماتفضل الاخ

وبالنسبة لصورة الحبوب الي حاطها هذي مالتي فيتامين وممكن تاخذ بديل له من اقرب صيدلية بس برايي الحين بس استخدم البرو وبعدين فكر تضيف والامينو احماض امينية لتكملة الناقص من الغذاء ونفس الكلام بس خليك ع البروتين واهتم باكلك وان شاءالله كافي حاليا

وان شاءالله موفق اخي

---

يعطيك العافية يالغلا على ردك الوافي .

المشكلة وناخوك اني ما أكل واجد ،، يعني ابعطيك جدولي اليومي في الاكل تقريبا ، خاصة في هالفترة :
انام الساعه الواحدة صباحا ،، واصحى لصلاة الفجر ثمن ارد وانام لحد الظهر ،، عقب الظهر احاول اخذ اي شي خفيف ،، مثل ساندوتش جبن او حبة موز واروح للنادي واتمرن ،، وعقب النادي ( اخذ وجبة الغداء وهي دسمة ) .
وعقب العصر ما أكل شي لحد صلاة المغرب ،، عقب صلاة المغرب ( أخذ ساندوتشتين جبن او بيض ) وعليها لحد الساعه عشر بالليل تقريبا ( اتعشاء شاورما او بروستد وغيرهـ ) وهكذا نظامي الغذائي اليومي .

يعني تقريبا في اليوم ما أخذ الا ثلاث وجبات او بالكثير أربع ،، وحده منهم تكون ثقيلة والباقي عادية ،،، فعلى كلامكم أحس ان هالبرو كمبليكس ماراح يساعدني بزيادة الوزن لأني ما أكل واجد ،،،، فمدري هل فيه شي ثاني كبروتين او غيره ماله اضرار جانبية يقدر يفيدني بهالنقطة ،، يعني يعوضني عن الوجبات اللي ما أكلها ؟؟

وبعدين عندي استفسار ثاني لاهنتم ،، هالحين هالبرو كمبلكس ما استسقته ( ماهضمته ) مع الحليب او الموية ،، اغمض اعيوني واشربه دفعه وحده ،، لاني المشكلة ما احب الحليب وهو بارد ،، ومقدر اشربه وهو حار لان عندي ( حرقان وحموضة في المريء ) فمدري هل عندكم طريقة تضبطه لي وتخليه لذيذ كا ( الملك شيك مثلا ) ،، او اي طريقة مناسبة واكون شاكر لكم ،،، مع العلم ان النكهة اللي معاي اسمها ( Rocky Road ) .

فبعد الاجابة على الاستفسارين السابقين منكم ،، اتمنى منكم افادتي بهالنقطة الاخيرة وهي بخصوص تناول البروتين :
هالحين لابد اني اشرب الصباح ( سكوب واحد ) طيب انا الصباح اكون نايم ،، فهل اذا شربته مثلا عقب صلاة الفجر والبطن فاضية فيه شي ؟؟ لأني قراءت انه تأخذ ( سكوب واحد ) عقب ماتصحى من النوم ،، فهل القصد منه عقب ما اصحى نهائي يعني حزة الظهر ،، او عقب ما اصحى لصلاة الفجر ؟؟

نقطة مهمة / أنا متواجد بالرياض الان ،، من اين استطيع شراء الشيكر ؟

العذر والسموحة على الاطالة وألف شكر لكم جميع ،، واخص بالذكر الاخ ( u turn ) و ( بردان1 ) .

بالتوفيق

اقتباس:

---

المشاركة الأصلية كتبت بواسطة الجافي101

اخوي خذ لك سيرياس ماس + bcaa + كرياتين موهيدرات ... اتوقع تكفي وتوفي هالمكملات والباقي يعتبر اسراف

---

والله يالغالي محسوبك غشيم شوي ،، ياليت توضح لي شنو هالاشياء بروتينات او شنو بالضبط ،، وماهي وظيفة كل واحد منهم ،، ولك جزيل الشكر

اهلا وسهلا يالغالي ولا سويت الا الواجب

لكن اسمحلي نظامك الغذائي ماراح يفيدك باللعبة ابد لازم اهم شي قبل البروتين تضبط اكلك لو تدريجيا والتمرين مايصير تروحله وانت على معدة خالية او على اكل خفيف بس موزه من قومتك
وحتى لو اخذت انواع ثانية من البروتين مستحيل
حاول قدر المستطاع
وبالنسبة لجرعات البروتين مو شرط الصباح اهم شي تكون متوزعه بيومك بين الوجبات عشان تكون فاهمها صح
يعني انا قلتلك بعد الافطار بساعتين يعني تكون بين وجبة الافطار والغدا حتى يتواصل التغذية على جسمك وهكذا

بالنسبة للبروتين طعمه ممكن تضيف له منكهات وتحطه بالخلاط مع حليب يعني موزة او عسل او على حسب الرغبة ممكن حتى منكهات الكااكاو .. وانا ماسبق لي تجربة الروكي رود


وبالنسبة للشيكر تلقاه بالجي ان سي موجود
موفق

يعطيك العافية يالغالي ماقصرت .

طيب معليش ابسالك وناخوك ،، هالحين في يوم الاجازة حقتك كم سكوب من البروتين تأخذ ؟؟ وفي اي وقت ؟؟

والاستفسار الاخر ،، ماهي الاعراض اللي تفيدك بأنك ماشي بالطريقة المضبوطة ؟؟ يعني مثلا اذا حسيت بآلم بسيط على الكتف والذراع من قوة التمارين ،، او مثلا اذا حسيت وزنك يزيد كل اسبوع كيلو او كيلوين ؟

والاستفسار الاخير ،، تقريبا كم اسبوع يبك تنتظر عشان تبدأ نتائج عملك المنتظم والمجدول بشكل جيد ؟ مثلا شهر وتحس بتغير بجسمك او شهرين أو اقل او شنو ؟؟

ويعطيكم الف عافية

‘
لا شكر على واجب يَ كـآبتن

حتى ما تتشتت بين الردود وكل واحد يعطيك رأي ، انا اشوف ان كلام الاخ بردان عين الصواب وبرضوا سهل وما اعتقد انه بيصعب عليك

ـــــــــــــــــــــــــــــــــــــــــــ

انت تقول انك تنام الساعه 1 وتقوم لصلاة الفجر طيب لازم تاكل وجبة بعد الصلاة بعدين تنام >> قبل لا تنام اسلق بيض لمدة 7 دقائق بعدين سكر النار وخلهم بالماء فوق الفرن وبعد الفجر مباشرة تاكلهـم

بعدها تقوم الساعه 11 >> طيب حاول تصحى 10 أو 10,30 وأول ما تصحى تاخذ بروتيــن مع حليب

بعد صـلاة الظهر >> وقـت الغـداء

بعد العصر راح يكون التمرين >> تاخذ لك شي خفيف قبل التمرين مثلا زبادي وحبة موز

بعد التمرين مباشرة بروتين مع ماء >> يكون الشيكر معك بالسيارة فيه ماء والبروتين يكون بعلبه صغيرة او كاس ، واول ما تركب السيارة تخلطهم وتشرب

وبعد صلاة المغرب >> تاكل وجبتك الــ 4

بعدين عندك من بعد صلاة العشاء إلى وقت العشاء >> بالوقت هذا تاخذ لك اي شي خفيف مكسرات مثلا او فواكـة ........

الساعه 10,30 او 11 >> وقت العشـاء

واخيـــراً >> قبل النوم تاخذ سكوب بروتين مع حليب

بكـذا تكون اخذت 6 وجبات و 3 مرات بروتين ... تمـاااام

نجي للبروتين : ) البروتين اللي معك ممتاز من ناحية نسبة البروتين ولكن بالمقابل نسبة الفات والكارب لا تكاد تذكر وهي الاهم لك حتى تزيد 10 كيلـو

طيب عندي لك حل ، تشتري لك Serious Mass وتاخذ منه اذا صحيت من النوم + وقبل النوم / والــ Pro Complex يكــون بعد التمرين

* النكهة اللي انت ذكرتها ما عمري جربتها لكن يمكن انك ما ضبطت مقدار الحليب و الماء ! .. لكن اذا اشتريت شيكر بيكون كل شي تمام إن شاء الله
الشيكر مثل ما قال بردان تحصله بـ GNC قيمتة 15 ريال .. أو فيه واحد من الشباب بقسم البيع والشراء عنده شيكرات ممتازة بـ 20 ريال وموقعه الرياض


وبسس ؛ أي سؤال او استفسار لا يردك الا الكيبورد : )

تمنياتي لك بالتوفيق .

‘
طيب معليش ابسالك وناخوك ،، هالحين في يوم الاجازة حقتك كم سكوب من البروتين تأخذ ؟؟ وفي اي وقت ؟؟

يوم الراحـة تكـتـفي بـ سكوبين إذا صحيت من النوم و قبل النوم

والاستفسار الاخر ،، ماهي الاعراض اللي تفيدك بأنك ماشي بالطريقة المضبوطة ؟؟ يعني مثلا اذا حسيت بآلم بسيط على الكتف والذراع من قوة التمارين ،، او مثلا اذا حسيت وزنك يزيد كل اسبوع كيلو او كيلوين ؟

ملاحظـة برزو العضلات ، زيـادة الوزن ... كلها مؤشرات تدل على انك ماشي بالطريق الصحيح

والاستفسار الاخير ،، تقريبا كم اسبوع يبك تنتظر عشان تبدأ نتائج عملك المنتظم والمجدول بشكل جيد ؟ مثلا شهر وتحس بتغير بجسمك او شهرين أو اقل او شنو ؟؟

ما فيه وقت معين ( اقتباس : أهم مميزات هذه الرياضه أنها تكافىء ممارسها على قدر المجهود الذى يبذله )

ماشاءالله ماقصر الاخ يوتورن
كفى ووفا

وشفلي اخي انت اجتهد واعمل وخلك مواضب ولاتفكر بالنتايج حتتتتتتما راح تستفيد ان شاءالله
اهم شي اعمل
ومااااافيه وقت محدد فيه ناس من اول شهرين باللعبة يباان علييه بروز ويبان عليه الجسم صح ومع ذلك تلقاه مايرضى عن نفسه وفيه ناس يجلس سنه ولو يقولك انه له سنه يلعب ماتصدقه
يعني اختلاف بالاجسام وتقبلها
وانت اضبط اكلك وتمرينك تركيز بدون ماتغش نفسك وباوزان طالعة
وان شاءالله موفق

عزيزي يو ترن وبردان1 الله يجزاكم بالخير كفيتو ووفيتوا يالربع وتعبناكم معانا .

طيب يالغالي يو ترن أبسالك بخصوص البروتين اللي تقول عنه ( سيريس ماس ) هل تنصحني فيه وناخوك ؟ وشنو الفائدة منه بالضبط ؟


والاستفسار الاخر ،، هالحين أنا بصراحة أحب اشتري عن طريق الاونلاين ،، ودخلت موقع ( بودي بلدنق ) ولقيت عندهم البروتينات والمكملات بأسعار جيدة ومناسبة ،، فهل عندك معلومة عن كيفية استلامها في السعودية ؟؟

يعني في الدول الاخرى فيه ارقام للبريد عند كل بيت وغيره ،، اما عندنا تخبر الوضع ههههه ،، فمدري هل احد فيكم مجرب يشتري منهم ،، ووين يرسلون بالضبط هل للبريد السعودي او عن طريق الـ DHL أو ارامكس وغيرهم .

ويعطيكم الف الف عافية

‘
اي والله السرياس ماس انصحك فيه

طبعاً السرياس ماس هو بروتين مثله مثل البروكمبلكس ، لكن الفرق ان البروكمبلس مثل ما قلت لك نسبة الفات والكارب فيه قليلة جداااا ولا تكاد تذكر
وعلى العكس السرياس ماس غني بالكارب والفات وهـم ضروريـن بالنسبة لك لزيآدة الوزن

الطلب من برا ما انصحك فيه لان الجمارك يمنعون دخول المكملات الغذائية !!

شف قسم البيع والشراء اسعار الشباب ممتـازة

أنت من وين مشتري البروكمبلكس ؟

الله يعافيك ..

موفق

هلا بك يالغالي .

والله وناخوك حمستني على السيريس ماس خاصة اني من النوعية اللي ما تأكل واجد رغم اني احاول ،، واللي حمسني زود انه بروتين يعني ان شاء الله ماله اضرار جانبية .

بالنسبة للشراء عن طريق الانترنت أنا بحثت في المنتدى وقالولي ان مافيه اي مشاكل انك تشتري اونلاين عن طريق الموقع اللي ذكرته لك او غيرهـ ،، بشرط ان المنتجات اللي تشتريها تكون موجودة بالسعودية ،، وهي فعلا موجودة بالسعودية ،،، وفيه ناس اعرفهم شارين من الخارج ومامنعوهم الجمارك ،، طبعا هالكلام من كم شهر ،، اما الان والله مدري هل هو ممنوع ام لا ؟؟

بالنسبة للبرو كمبليكس انا شاريه من الـ GNC بـ 350 ريال ،،، وفي الاونلاين سعرهـ تقريبا 150 ريال ،،، والبريد راح ياخذ منك تقريبا 50 ريال ،، المجموع تقريبا ( 200 ريال ) شايف الفرق الكبير بينهم ؟؟

عطنا رأيك يالغلا لانه يهمنا ،، وشاكر لك ردودك السريعه واهتمامك .

‘
يا هلابك

ايه مثل ما قلت لك البروتين ماله اي اضرار جانبية وان شاء الله اذا طبقت النظام راح تشوف نتائج تسرك

شف انا اقولك الجمارك ( حظ ونصيب ) فيه بعض الشباب طالبين اشياء بسيطة مثلا علبة بروتين وعلبة فيتامين وصادروها الجمارك !!

وفيه شباب شارين بضاعه كبيرة ودخلت بدون اي مشاكل .. !



لكن انت تقول انك شارية من GNC << عاد ما لقيت تشتري الا من هالحراميه هههههه

طيب هنا الشباب بالمنتدى يبيعون البروكمبلس واسعـارهم من 230 إلى 250 وكذالك السرياس ماس نفس القيمة تقريباً وبضاعتهم مضـمووونه فـ أنصحك تشتري من عندهم

العفـــو ...

موفق

اقتباس:

---

المشاركة الأصلية كتبت بواسطة u turn

‘
يا هلابك

ايه مثل ما قلت لك البروتين ماله اي اضرار جانبية وان شاء الله اذا طبقت النظام راح تشوف نتائج تسرك

شف انا اقولك الجمارك ( حظ ونصيب ) فيه بعض الشباب طالبين اشياء بسيطة مثلا علبة بروتين وعلبة فيتامين وصادروها الجمارك !!

وفيه شباب شارين بضاعه كبيرة ودخلت بدون اي مشاكل .. !



لكن انت تقول انك شارية من GNC << عاد ما لقيت تشتري الا من هالحراميه هههههه

طيب هنا الشباب بالمنتدى يبيعون البروكمبلس واسعـارهم من 230 إلى 250 وكذالك السرياس ماس نفس القيمة تقريباً وبضاعتهم مضـمووونه فـ أنصحك تشتري من عندهم

العفـــو ...

موفق

---

الله يعطيك العافية يابعدي ،، انشهد انك ماقصرت .

والله وناخوك بالنسبة لـ GNC فيه واحد ولد عمي يقاله خبير ههههه هو اللي شرالي منهم وانشهد انه خبير لكن بالمقلوب ههههه .

وبالنسبة لاسعار الشباب ،، والله وناخوك انا كان تفكيري اني ابي اشتري كم بروتين وفيتامين وفيه شباب معي يبون يشترون ،، فقلت لو شرينا مره وحده كل اللي نبيه ،، راح نوفر كثير بصراحة .

طيب وناخوك معليش ابسالك ،،،، مشكلتي يالغالي أني حاولت اضبط جدول وماعرفت أبد ،، واللي فهمته منكم ان تنظيم الجدول مهم جدا ،، فقعدت أتقلب في المنتدى لحد مالقيت هالجدول ،، ابيك تعطيني رايك فيه ،، واذا فيه تعديلات بسيطة من عندك عطني خبر عشان اضبطها ،، لكي تتلائم مع هيئة الجسم اللي ابيه .
http://www.montada.com/showthread.php?t=668073


تحياتي لك

‘

يا هلا ومرحبا

وكل عام وانت بخير ..

ايه تمام الجدول هذا ممتاز ومناسب أبـدا فيه

* نصيحة اعتبر التمرين والتغذية والنوم مثل العمـل اذا اهملت واحد منهم راح نخصم من وزنك ههههه

موفق خير ......