محتار تنشف وإلا تضخم ؟ تاخذ مكمل تنشيف وإلا تضخيم ؟ تفضل حــيــاك

أنشف وإلا أضخم ؟؟
استخدم بروتين قينر والا بروتين تنشيف ؟؟

من أصبحت عضو في هذا المنتدى الراقي هالسؤالين أكثر سؤالين واجهتها
حتى في النادي
وأكثر من يحتار هو المبتدئ واللي صارله كم شهر يلعب
والسبب هو أنه إلى الآن هدفه مو واضح بالنسبه له
سبب كتابتي للموضوع هو أننا ( وأنا منهم ) نرد على اللي يسألون هالنوعيه من الأسئله على حسب اللي نشوفه صح
فنشوف موضوع فيه 10 ردود مثلا وكل رد أعطى رأي !! فيتشتت صاحب الموضوع !
وفي الواقع ان الجواب على هالسؤال هو عند صاحب السؤال مو عندنا

طيب كيف ؟؟
ببساطه هذا جسمك.. أنت اللي ترسمه وأنت اللي تحدده على مزاجك

في البدايه بنوضح كم شغله
مكملات التضخيم: تضخم جسمك عن طريق البروتين والدهون
مكملات التنشيف: تضخم جسمك عن طريق البروتين فقط ونسبة الدهون فيها جدا بسيطه
عشان كذا لازم توضح مسألة انه في الأخير هالإثنين بيحصلون على نفس المكسب العضلي والفرق فقط ان الأول حصل على كمية دهون تعطيه "شكل" الضخامه لكن إذا عمل تنشيف بيظهر وكأنه ما أستخدم مكمل قينر
ومكملات التنشيف هذي مو غرضها حرق الدهون لا. المقصود أنها ما تزيدك نسبة دهون وهي تستخدم وقت التضخيم العضلي الصافي ووقت التنشيف

وبنوضح شغله ثانيه
أحيانا يجي شخص جدا نحيف مثلا
وزنه 50 وطوله 170
هذا يحتاج كمية دهون لتصحيح جسمه قبل لا تكون ضخامه

شخص ثاني سمين
وزنه 90 او 100 كيلو وطوله 170
هذا يحتاج "تخسيس" في البدايه
لأنه حتى وإن حاول تضخيم العضله فما راح يظهر معاه أي شي بسبب كمية الدهون الكبيره في جسمه


الآن نبدأ في الأهداف
هل هدفك بروز بسيط للعضله وجسم مقسم وناشف ؟

إذًا أنت تحتاج مكمل بدون دهون ( ومو شرط تاخذ مكمل ) وإذا كان فيك دهون فأنت تحتاج تنشف في البدايه وتخسر كمية الدهون اللازمه اللي توضح تفاصيل العضله وعضلات البطن ولازم تحافظ على نسبة الدهون البسيطه علطول لأن موضوع الضخامه ما يهمك وكل اللي تحتاجه هو المحافظه على "تقسيم" جسمك وهالشي يكون بالإبتعاد عن الدهون كوسيلة تضخيم


هل هدفك تضخيم لكن بعضل صافي وبدون دهون حتى لو أخذ منك وقت طويل ؟

يظهر جسمه دائما بدون ملابس بمنظر جميل وما يحتاج يدخل كورس تنشيف كل فتره، مثل هذا الشخص يحب يشوف جسمه وهو مقسم ( مثل المثال الأول ) لكن بنفس الوقت هدفه الحصول على ضخامه عضليه صافيه عشان كذا هالشخص بتكون مهمته صعبه .
إذًا انت يهمك وضوح تفاصيل العضله بالإضافه إلى تضخيمها عضل صافي بدون دهون وهذا معناه أنك تحتاج مكملات بدون دهون والأهم من هذا تحتاج نظام غذائي دقيق تكون كمية الدهون فيه قليله جدا وكمية الكارب والبروتين محسوبه بالضبط عشان ما تزيد ويتحول الفائض منها لدهون.



هل هدفك تضخيم بدهون ولا يهمك تحديد العضله او الكرش ومستعد للتنشيف بعد كل فتره ؟

مهمة هذا الشخص تكون أسهل بالمقارنة من المثالين الأولين من ناحية أنه ما يفرق معاه إن كان هذا الأكل يحتوي على كمية دهون كبيره وإلا لا
يهتم صاحب هذا النظام للحصول ضخامه سريعه (حتى لو كانت من الدهون) ويعطي جسمه منظر رائع من فوق الملابس
لكن مثل ما لهذا النظام من ايجابيات من ناحية الراحه في الأكل والحصول على ضخامه سريعه فله سلبيات مثل احتمالية الحصول على كرش ( احيانا نشوف مدربين بكرش ) تحتاج كورس تنشيف كل فتره وهذا يؤدي غالبا لخسارة كتله عضليه
شكل الجسم من تحت الملابس ضخم لكن بدون تفصيل
إذًا في الأخير الضخامه في مثل هذا النوع هي ضخامه مؤقته توضح حقيقتها بعد التنشيف
إضافة نسيت أذكرها
* كن حريص فأغلب من لا يهتم بإكتساب الدهون ترتفع عندهم نسبة الكوليسترول الضار والدهون الثلاثيه في البطن لمن لهم كرش وهذي لها أضرار خطيره
* مو كل من اتبع هذا النظام يحصل على كرش
* حاول دائما نسبة الدهون ما تزيد عن 25 % وبعدها ابدأ في التنشيف عشان لا تتورط بنسبة دهون كبيره
* يفضل هذا النظام للاعبين المبتدئين أو للي ما يعرف يحط له برنامج غذائي موزون او للي عارف نفسه أنه ما راح يمشي على برنامج غذائي موزون من ناحية الكارب
فيأخذها من ناحية تزيد ولا تنقص


فيه سلبيه لازم لها توضيح اللي هي مسألة طول مدة التضخيم بالنسبه للي يضخم بدون دهون
دائما ما نسمع انه اذا بتضخم بدون مكملات قينر بهذا بيتطلب مده طويله
كجواب سريع بهو نعم لكن كإجابه دقيقه فهي لا
في الحقيقه لو نقارن ما بين لاعب يهدف الى التضخيم بدون دهون (مثال2) وآخر يهدف للتضخيم بدهون (مثال3) وهم لعبو نفس المده وقام الأخيره بعملية تنشيف راح نلقى في الأخير أنهم حصلو على نفس الجسم !!!
بل في نقطه لصالح (مثال2) وهي انه استغل فترة التنشيف في عملية التضخيم وجنب نفسه خسارة الكتله العضليه أثناء التنشيف
لكن أيضا في نقطه لصالح (مثال3) أنه أعطى جسمه حاجته وأكثر من الكارب اللي يغذي العضله عشان كذا هو ضمن وصول الحد الأدنى على الأقل من حاجته للكارب بعكس (مثال2) اللي قد يقصر في تناول كمية الكارب اللي يحتاجها


الآن بعد ما وضحت بعض الأمور وذكرت السلبيات والإيجابيات

عزيزي لاعب بناء الأجسام
أنت من يحدد هدفك وأنت من يحدد شكل جسمك وأنت من يحدد خطتك التدريبيه
مهما حاولت الحصول على رأي موحد في هذي المسأله عمرك ما راح تلقى
لأن ببساطه هذي مو قاعده عامه ولا هي قانون يجب إتباعه
هي رغبه وكل واحد يعطيك رغبته


مافي أحد يقولك ضخم بعدين نشف
أو نشف بعدين ضخم
أنت اللي تحدد هدفك
وبعدها تقدر تسأل أهل الخبره وأصحاب التجربه عن طريقة الوصول للهدف

ما شاء الله عليك
موضوع في كثير يحتاجه اهنيك عليه بصراحه
فتحت عقولنا على اشياء ما كنا حاطينها فبالنا
يعطيك العافيه يا وحش

انت حطيت يدك على حل للغز حير الكثير وانا منهم
وبصراحه بديت اميل لمثال3 تضخيم بدهون وبعدها نتصرف بالتنشيف
خصوصا اني اصير متمرس على الحديد اكثر وتكون فترة التنشيف اسهل من كوني مبتدئ
شي اخر انه بوجود الكتله العضلية يصبح الجسم قادر على خسارة الدهون بصوره اسرع


برااافو برااافو براااااافوووووووووو

والله انك جبتها على الجرح هههه .... انا ضخمت مع دهون لين وصلت 91 كيلو ... بس متندم بسبب الدهون الكثير ....والحين متعذب مع التنشيف بس وصلتت 66 كيلو ... صدقني تعذبت وانا اهرق دهون

اذا راح اضخم مره ثانيه راح اضخم بدون دهون حتى لو اخذ مني وقت ...... موضوووعك جميييللل

كلام كبير كبير كبير، تسلم على الموضوع الرائع

يآشيخ كنت محتاجك أول ماسجلت هههه

يعطيك العافيه على الموضوع الجميل هذا


انا تضخيم بدون دهون :)

الله يعطيك العافية على الموضوع الجميل

انا كنت نحيف .. في السنة الاولى اتبعت نظام التضخيم مع الدهون

لما حسيت ان دهون جسمي زادت اتبعت نظام التضخيم بدون دهون

لاني ما ابغى ادخل فترة تنشيف وخسارة عضلات وقوة في الاوزان

كلام مختصر وشافي

لاهنت يالغالي صراحه موضوع قوي

دليل لكل محتار
اشكرك موضوع موفق
احييك واهنئك عليه

انا اشوف انها تعتمد على الشخص نفسه كل واحد فكرته تختلف عن الثاني وهدفه الي بيوصله التضخيم بدون دهون ياخذ وقت اكثر تحياتي

السلام عليكم ورحمة الله وبركاته ..

طرح موفق بارك الله فيك ..

واصل ابداعاتك بالقسم ..

شكرا لك ..

جزاك الله خير على الطرح والشرح الجميل
نقاط يحتاجها كل مبتدا
تقبل مروري يابطل

‘

أحسنت ..

الله يعطيك العافيـة

السلام عليكم ورحمة الله وبركاتة

موضوع مميز ومهم
لكن الأهم تطبيق ما ذكر بالموضوع , لأن البعض ربما يعجبه ما يكتب لكن لا يطبق
او حين يأتي وقت التطبيق ينسى كل هذا , ويجري وراء رغباته حتى وإن كانت بطرق خاطئه

يعطيك العافيه

بارك الله فيك اخي

تصدق كثيييييييير في النادي محتارين انشف ولا أضخم صراحة موضوع جميييييييييل

انا اضخم بدون دهون الحمدلله بس مثل ما ذكرت نتيجه الزياده العضليه بطيئه ، بس الاهم ان تفاصيل العضلات بالجسم واضحه لان كميه الفات قليله اقل من 17 ، بس مهم الكارب بفتره الضخامه مو بس بروتين

يعطيك العافيه اخوي

لكن في نقطة اللي تسبب اشكالية عند الاغلب هي تنزيل الدهون ورفع العضل في وقت واحد
يالليت تشرح لنا اياه بالتفصيل

تسلم على الموضوع المهم لكل مبتدى مثلي :D
وانه افضل التضخيم بدهون لان راح يكون جسمك جميل مع التيشرت
والتنشيف يكون في الصيف لبرك السباحة وغيرة;)

يعطيكم العافيه يا اخوان على المشاركة

اقتباس:

---

يعطيك العافيه اخوي

لكن في نقطة اللي تسبب اشكالية عند الاغلب هي تنزيل الدهون ورفع العضل في وقت واحد
يالليت تشرح لنا اياه بالتفصيل

---

شوف يا غالي
انا اتوقع الشي هذا مو مستحيل لكنه صعب
في اللي يقولك ما تقدر تضخم عضل الا بكسب دهون .. لا هذا مو صحيح لأن هذا يعتمد على نظامك الغذائي
في ناس يضخمون عضل بدون كسب دهون وهذا مثل ما ذكرنا ما يتعدى الكميه المسموحه من الدهون والكارب والبروتين
في ناس قدرو يضخمون ويحرقون في نفس الوقت وهم قليلين صراحه
لكن هنا ما يعتمد بس على نظام التمرين والنظام الغذائي
يعتمد على طبيعة جسم الشخص وسرعة حرق الدهون او مدى تخزين الدهون عنده
يعني تقدر تقول انه شي مو بيدك

كفيت ووفيت وماقصرت

والله يعطيك الف عافية يا كابتن

بروز بسيط للعضله وجسم مقسم وناشف هذا هدفي ... انا نزلت وزني من 93 الى 77 وطولي 174 وش تنصحني اسوي عشان اوصل لهدفي محتاج والله مساعدة ؟

الله يعطيك الف عافيه موضوعك جدآ رائع ويحتاجه الكثير اولهم انا

السلام عليكم
موضوعك جميل وانا من الناس الي بالمثال 3 جسمي من فوق الملابس عاالمي ومن تحت الملابس لك عليه هههه الحين داخل تنشيف الله يعين
تحياااتي

موووضووك مفييييد

اخوي اوكسجين موضوعك اعجبني وانا من الناس الي يبي مثال رقم واحد ..

عندي دهون نسبه ٢٣٪
الوزن ٧٢
الطول ١٦٩


عندي بروتين بدون دهون
امينو
ليبو ٦

تشوف هالطريق سليمه لي في المكملات والا لك راي اخر

افيدني الله يجزاك كل خير .

اقتباس:

---

المشاركة الأصلية كتبت بواسطة b7ar.77

اخوي اوكسجين موضوعك اعجبني وانا من الناس الي يبي مثال رقم واحد ..

عندي دهون نسبه ٢٣٪
الوزن ٧٢
الطول ١٦٩


عندي بروتين بدون دهون
امينو
ليبو ٦

تشوف هالطريق سليمه لي في المكملات والا لك راي اخر

افيدني الله يجزاك كل خير .

---

ممتاز
عشان توصل لنسبة دهون مثاليه خلينا نقول 10% مثلا
تحتاج تنقص حول 10 كيلو "دهون" فقط
وطبعا لا تنسى انك بتزيد عضل وهالشي راح يساعدك في تقليل نسبة الدهون
غرضك مو صعب
ضخامه عضليه بسيطه وتقسيم عضلات البطن + حرق دهون والحوارق بتسوي معك نتيجه ممتازه
تحتاج نظام تمرين + برنامج غذائي منضبط وموزون
وتلقى نتيجه حلوه خلال 6 شهور ان شاء الله

شكرا علي المعلومات المهمة

تحياتي

موضوع تستحق الشكر عليه

:biggthump

السلام عليكم ورحمة الله وبركاته

الموضوع كان بالنسبه لي كنز لاني من زمان اريد ادخل الجيم لكن مش عارف ايش الاهداف المتعدده من الجيم الموضع هذا بين لي اللي كنت ابحث عنه
والحمدلله اكتشفت اسم او نوع هدفي
انا لاارغب بجسم كتله كبيره مثل اصحاب المسابقات والعروض (اكثر اجسام عجبتني هي اجسام اصحاب العاب الدفاع عن النفس عضله وفي نفس الوقت خفه في الجسم والحركه)
اريد التضخيم الصافي لكن قبل هذا عندي بعض الاستفسارات أتمنى اجد جواب لها حتى تكمتل لدي الصوره

1. وزني 65كجم وطولي 1.85متر (تقريباً لكن في هذا الحد)
2. بالنسبه للاكل هل المكملات مافيها ضرر لاني وجدت في (bodybuilding.com) خطط بمكملات ولاني في الوقت الحالي لااستطيع توفير كل المتطلبات الغذائيه(صدور دجاج_بيض-...) هل هناك مشكله لو بدات بالمكملات.
3. لدي كسور سابقه من 12/2007 في الحوض الايسر(ليس مفصل الحوض لكن مكان دوران المفصل) الحمدلله الان افضل لكن هناك عدم توازن في الطول وحركه غير كامله للمفصل وايضا خلع في الكتف الايسر فاشعر انه لايعطيني قوته الكامله( يعني لما العب جيم مايعطينا دفعه كامله للثقل)-هل لهذا اي تاثير على برنامجي.
   

أتمنى اكون بينت نقاطي بوضوح بالنسبه لموضوع الكسور لو ماعندك فكره مش مشكله راح اسال دكتور بس قلت انت بحكم انك في الجيم وسؤال الدكتور لابد منه
العفو ولو فيه شي غير واضح اخبرني حتى ابينه

وشكراً

اقتباس:

---

المشاركة الأصلية كتبت بواسطة captin jack

السلام عليكم ورحمة الله وبركاته

الموضوع كان بالنسبه لي كنز لاني من زمان اريد ادخل الجيم لكن مش عارف ايش الاهداف المتعدده من الجيم الموضع هذا بين لي اللي كنت ابحث عنه
والحمدلله اكتشفت اسم او نوع هدفي
انا لاارغب بجسم كتله كبيره مثل اصحاب المسابقات والعروض (اكثر اجسام عجبتني هي اجسام اصحاب العاب الدفاع عن النفس عضله وفي نفس الوقت خفه في الجسم والحركه)
اريد التضخيم الصافي لكن قبل هذا عندي بعض الاستفسارات أتمنى اجد جواب لها حتى تكمتل لدي الصوره

1. وزني 65كجم وطولي 1.85متر (تقريباً لكن في هذا الحد)
2. بالنسبه للاكل هل المكملات مافيها ضرر لاني وجدت في (bodybuilding.com) خطط بمكملات ولاني في الوقت الحالي لااستطيع توفير كل المتطلبات الغذائيه(صدور دجاج_بيض-...) هل هناك مشكله لو بدات بالمكملات.
3. لدي كسور سابقه من 12/2007 في الحوض الايسر(ليس مفصل الحوض لكن مكان دوران المفصل) الحمدلله الان افضل لكن هناك عدم توازن في الطول وحركه غير كامله للمفصل وايضا خلع في الكتف الايسر فاشعر انه لايعطيني قوته الكامله( يعني لما العب جيم مايعطينا دفعه كامله للثقل)-هل لهذا اي تاثير على برنامجي.
   

أتمنى اكون بينت نقاطي بوضوح بالنسبه لموضوع الكسور لو ماعندك فكره مش مشكله راح اسال دكتور بس قلت انت بحكم انك في الجيم وسؤال الدكتور لابد منه
العفو ولو فيه شي غير واضح اخبرني حتى ابينه

وشكراً

---

وعليكم السلام ورحمة الله وبركاته
اعتذر منك بشده لأني شفت ردك اول ما رفعت الموضوع لكني كنت مشغول وقتها وقلت برد عليك في اسرع وقت ونسيت وما افتكرت الا لما شفت الموضوع مره ثانيه

عموما يا عزيزي انت واضح من وزنك انك نحيف فمسألة الدهون عندك اخر مشكله ما شاء الله
فتقدر تدخل على هدفك علطول تضخيم صافي .. ولا تدقق كثير في مسألة الدهون زي ما قلت لك وزنك نازل
طبعا لازم تعرف ان الاكل قبل المكملات.. المكملات ممكن توفر لك مصادر البروتين لكن الكارب ما يوفره لك الا الاكل
لازم تعرف كم تحتاج كم جرام من البروتين والكارب والفات
مبدئيا ممكن نقول 130 جرم بروتين 260 جرام كارب 50 جرام فات
هذي حسبه عالماشي بعدين انت تعرف تحتاج اكثر او اقل بعد النتائج

بالنسبه للكسور والخلع
ما اقدر افتي لك
لكن تسأل طبيب والافضل يكون مختص بالطب الرياضي مو اي طبيب وخلاص
لكن مبدئيا اشتغل على اوزان خفيفه وشوف وش يصير معك

موفق يا كبتن

وزني 69
طولي 175
نسبة الدهون 14
مدة التمرين 5 شهور
الهدف تقسيم الجسم و بروز العضل
المكملات التي استخدمها الان هي واي بروتين - كازين - اكستند - مالتي فيتامين - اوميغا3

يا سيدي انا من الاشخاص المحتارين جدا هل اضخم ام انشف
احيانا اقول بضخم و احيانا بنشف
اخاف انشف و ايصال نسبة الدهون الى 10 اخسر عضل كثير و يكون شكل جسمي غير جيد

و ارجوك فيدني و اذا تطلع على موضوعي في قسم الاستفسار سوف تجد صورة جسمي

انتظر سيدي الفاضل

توني ادري ان التنشيف هو تضخيم لكن بدون دهون < هذا اللي ناوي عليه :)
على بالي التنشيف للناس اللي تبي تخسر دهون وتخس :D

يعطيك العافية ع الموضوع الرائع :)