السلام عليكم
اول شي بادئه ذي بدأ انا قلت قبل كل شي اني معتزل المنتدى بشكل شبه كلي , يعني موجود بين فتره وفتره الى ان يفرجها الله بتحقيق المطلوب من الاداره او اذا رافعين الجام راح انتظر الى ان تنزل لعبه تجمعنا ونكون مع بعض
وماكو الا لعبه جيلد وور 2 , لما تنزل نلتقى فيها
هذا اول شي واللي كل تلميذ يحطه في باله
ثاني شي يمكن بعضكم مو فاهم ليش قدمت استقاله , كراي يقول توقيف او شي جذي يعني
لا الموضوع مو موضوع توقيف , والكل يدري ان التوقيف عندي مايسوى شعره من شعرات اي عضو فيكم
لكن الموضوع واللي الاداره زعلت عليه لدرجه انهم اتصلوا بدارك تب عشان يدخل مخصوص يشوف كلامي , وفعلا دخل الاخ دارك تب واللي مايدخل الا بالسنه مره وشاف الكلام و مسحوا المشاركه
تقدر تسألون المراقب يعطيكم المدونه لأن المواضيع المحذوفه يقدر يشوفها
من كلامي بالمدونه حطيت 5 امور وقلت لابد تتنفذ , منها حجب الروابط والصور عن الزوار , تفعيل دور المراقبين مو بس ياخذ اللون ويكشخ فيه , اللون الذهبي صار ماله معنى , لأن الاعضاء المميزين والمراقبين السابقين والاعضاء المراقبين كلهم نفس اللون
وطلبت يرفعون اي عضو مراقب الى اللون الازرق ويتركون اللون الذهبي للأعضاء المميزين والمراقبين السابقين , وفعلا عملوا هذا الشي مع عضوه مراقبه 1 بس , لأنها بنت طبعا مع ان في رجال ولكن الرجل ماله سوق هني
وتفعيل الشكر بالمواضيع وليس الشكر محصور بالمراقب , حالنا حال المنتديات الثانيه , اي عضو تعجبه مشاركه يشكر صاحبه , مشاركه اقصد مو موضوع , يعني الشكر بس تقدر تشكر صاحب الموضوع
وجعل المراقب اهو الكل بالكل بالقسم الخاص فيه , اهو يعطي اوسمه و يعمل كل شي بدون الحاجه للرجوع الى المراقب الكبير , ابو لون عنابي
اي مراقب يغيب مده شهر ينزل على طول
كتبت هالامور بالمدونه و اصدموني احذفوها بعد ما اتصلوا على دارك تب عشان يشوف بعينه شكاتب
مع ان لي مشاركات سابقه , ما اسلمت مني الاداره , هوشه كبيره عريضه , وفوق هذا عادي ماصار شي , ولكن من عطيتهم بعض الافكار انقلبت الدنيا , مع ان هالامور بصالح المنتدى مو بصالحي
ولكن يمكن ان حجبت الروابط راح تخلي ال1500 زائر كل يوم زعلانيين , لأن الزوار افضل عن الاداره من الاعضاء ال50 واحد كل يوم , هذا اذا اذبحوا نفسهم وصلوا هالرقم
قلت ياجماعه نستقل الوضع ونحجب الروابط ويضطرون الناس تسجل وخلاص , مو معقوله 12 عضو موجود الحين و الزوار 1300 شخص
يمكن لأن الزعيم مايحب يسجل دخول و يحب يشوف من بعيد لي بعيد عشان جذي مايبي يحجب الروابط
يجوز
-
الموضوع اللي فوق راح ينحذف حاله من حال المدونه رقم 8 واللي ازعجت الاداره
المنتدى بالطوفه عندهم
تدرون ليش ؟ اداره ضعيفه
اداره تجاريه , المنتدى تابع شركه , والشركه مو مهتمه بالمنتدى كثر اهتمامها بنشاطاتها اللي تدر عليها بالمال , دارك تب نفس هلال رمضان , تشوفه بالسنه مره
اداره المنتدى اكتشفت ان ماعندهم صلاحيات , ولا صلاحيه للمراقبين , مجرد حذف\تعديل\نقل المشاركات
تغيير اسم\نقاط تقييم\توقيف\اوسمه
هذا كل اللي يقدر يعمله المراقب من اللون الذهبي وصولا الى العنابي
كل شي بيد دارك تب , والاخير هلال رمضان
انتوا يمكن تقولون انت شكو بالمنتدى , خلك بالقسم هذا دام في مواضيع ومشاركات وخلاص , انا مهتم بالمنتدى كله , كل الاقسام ادخلها واشوف بدون اشارك , يعني لي اهتمامات ولكن مشاركاتي اغلبها بالقسم هني , لذلك اشوف ان في تفرقه كبيره
يعني اعطيكم مثال , وقلت هالشي قبل لما تهاوشت مع الاداره و سكتوني بوسامين , من الترفيهي وفوق انت محظوظ , من تحت الترفيهي مالك حظ وانت البطه السوده
يعني خلاصه القول : ادخل بأسم بنت , و حط صوره بطله من بطلات فاينل فانتسي , انا اعطيك كفاله 10 سنوات او مليون كيلو متر ان خلال 6 شهور , راح تحصل 6 اوسمه و لقب تحت اسمك
تحمل واقعد سنه تصير مراقب
الاقسام اللي تحت الترفيهي , 5 سنوات مشاركه يوميه + 44 توقيف + 230 هوشه = يعطونك وسام ويذلونك عليه , كل ماتسوي شي يهددونك بالتوقيف
انا ماعندي سالفه صح ؟
روح القسم و كحل عيونك بعدد مشاركات الاعضاء و عدد اوسمتهم و منصبهم , يعني لو تروح الاداره متهاوش مع واحد فيهم , انت تاكل توقيف واهو يطلع منها
ليش ؟
بنت
المهم
قال رفيجي ملك اللعبه اللي عروقه بالماي الرجل والمرأه متساوين بالحقوق والواجبات , لا الرجل يستطيع ان يكون امرأه ولا الأمرأه تستطيع ان تكون رجل
وفعلا لو تدقق بكلام رفيجي تشوف كلامه عدل 100%
شلون الاداره تفرق ؟ انتوا ماسمعتوا عن اللي دخل المنتدى بأسم بنت
وكان احد تلاميذي بعد , سجل بالمنتدى بأسم بنت وقعد الله وكيلكم بحدود السنه مسوي نفسه بنت , وانا كنت داخل المنتدى قبله ب3 سنوات تقريبا
خلال سنه تدرون شنو حصل ؟
6 اوسمه و نقاط تقييم و طلباته مجابه من الخرفان
الى ان زهق واعترف انه بنت
وانا منطق قبله وبعده ماحصلت ولا شي
اسمه مس ربيكا وكتبت موضوع عنه ولكن حذف من المسؤولين عشان مايبون اي شي عليهم
يعني بالعربي البنت قايم سوقها هني , تدخل انت كافي خيرك شرك وتعطي بعض النصايح تروح فيها
ولكن كل هذا يهون عشان خاطر كل مصبنجي وعربجي شريف على هذا الكوكب
الخلاصه اني بقولكم ان سبب الاعتزال مو عشان توقيف او وسام او اي شي
الاعتزال لما الاداره تحترم رأي اعضائها و تعدل المنتدى و يطبقون ال5 امور اللي ذكرتهم بالمدونه ويردولي اعتباري الذي سلب 5 سنوات
ويفصلون الاعضاء المميزين عن الراقبين و يحذفون الاشراف من اي مراقب ما داوم
وانا تكلمت بعد عن فلوتا وقلت من سنه 2011 ما دخل القسم , و سنه 2012 عنده مشاركتين فقط و المشاركتين بأقسام ثانيه حتى مو بالقسم هذا
طنشوني طبعا نفس تطنيشهم لي لما تكلمت عن هت مان اللي قعد مراقب سنتين واهو مو موجود
عشان تعرفون ان الاداره مالها شغل بشي ولا عندهم ادنى فكره عن مايحدث بالاقسام
لذلك طلبت بالمدونه ان يكون هناك مراقبين اداريين يقومون بجولات وصولات بكل الاقسام , وظيفتهم يكونون مراقبين على المراقبين نفسهم ويشوفون ادائهم و منو الموجود ومنو اللي مشفط
طبعا كل هذا راح لأن ماعجبهم
وانا ان شاء الله لي عوده اذا صار ال5 اقتراحات اللي ذكرتهم , اما ارجع والوضع سيئ بالشكل هذا
اعور قلبي ليش
وبالاخير حبيت اقول ان يوشي قالي ظلمتني وقلت انت دخلت و حذفت توقيعي
الحقيقه اني ادري مو يوشي اللي دخل ولكن قلت عشان ابيه يعترف ويخاف من العيال لما تقوله انت عملت كذا يقول لا والله مو انا فلان
بس يوشي طلع جيد و مخلص للأداره , ماقال منو التزم الصمت واكتفى بالخاص
وانا والله ادري انه مو اهو , لأن مسكين صلاحياته محدوده المراقب بالمنتدى هذا
و جيرمي قرر يعتزل بعد اعتزالي , وانا اطلب منه العدول عن الامر لأن الموضوع مايخصك , انت رجل تدخل تشارك وتمشي وانا عندي معركه مع الاداره
اهو بروحه القسم مات بعد خروجي , تجي انت وتقول بعتزل
شوف القسم شلون واقف , كأنك موقف الزمن
عشان يعرفون انا منو اعداء الثوره واعداء النجاح
حتى بوحا بشحمه ولحمه دخل علي بعد ما قلت راح اعتزل , سجل دخوله و دخل ملفي عشان بس يخلي الناس تعرف انه معاي قلبا وقالبا
عدل بوحا
تكلم لاتستحي , مو انت دخلت عشان تخلي الناس تعرف انك معاي قبلا وقابلا
البسطويسي قلت راح يشعللها حرب عالاداره , خضع على طول واستانس لما اعتزلت , الظاهر سكتوه بوسام على عضويته الاصليه
الله كريم
ياجماعه ترى التصويت اللي حاطه مجرد عبط
كنت بكتب ما رأيك بأداء الاداره ؟
بس قلت ان كتبت راح يحذفون الموضوع وانا مابي يحذف و كتبت تحبني وله ماتحبني تراني ياي
المهم
انا وضحت اللي في بالي , الاعتزال مو عشان توقيف ولا وسام
5 امور مذكوره بالمدونه , لاتقول المدونه محذوفه , الاداره تقدر تطلعها , وانا مراقب بقسم ثاني واعرف البير وغطاه , قول لأي مراقب يروح قسم المحذوفات ويطلعه لك
ال5 امور تتحقق اهلا وسهلا , ال5 امور ماتتحقق لا انا ولا انت عزيزي العربجي المواطن والمقيم راح ننضر
وكلها كم يوم وتنزل لعبه جيلد وور 2 و نتواصل فيها , نسرق الفنت مال جيرمي ونخليه لها , و نسوي جيلد Al-Qaeda و نكون مع بعض
واشكر كل من سأل عني
من اللي فوقي الى اول واحد رد علي
مشكورين على مشاعركم الجياشه
و الملك يقدر كلامكم و يعتز فيه , وانتوا تدرون ان بالي وسيع يوسعكم ويوسع بلاويكم و مشاكلكم و اعمالكم الطيبه والشريره
كم واحد فيكم كان يتمنى توقيفي للأبد قبل 4 سنوات , والحين يطالبني اني ابقى
ودي اكون معاكم , لكن الوضع سيئ يااخوان , والله الوضع يزعل لما تشوف ابو 250 مشاركه و بنت و تهددك بالتوقيف
قهر الرجال هذا
انا مااتحمل بصراحه
والحين اخليكم لأني بروح مراجعاتي , و اذا تعدلت و عدلت من سياستها و وضعها الاداره قولولي عشان ارجع وابدأ من جديد
هذا اذا ما احذفوا مشاركتي هذي بعد , انسخوها عشان توزعونها بالسر اذا احذفوها الاداره
والسلام عليكم ورحمه الله وبركاته
