~ فوائد تمرين الرفعه المميته deadlift الخياليه من تجربه شخصيه

السلام عليكم

من زمان مانزلت موضوع وحبيت انزلكم موضوع مهم وجبار لكل من يبحث عن الكماليه والكمال لله للجسم وتحقيق جسم متناسق وقوي
و اللي بتكلم عنه اليوم هو تمرين الرفعه المميته او الديد ليفت واهميتها للجميع وفادني هالتمرين بشكل كبير وماتتصورون شكثر يعطيك ثقه بنفسك وقوه اضافيه وحبيت افيد الوحوش عشان يركزون ع هالتمرين ويعتبر هالتمرين من افضل واشهر تمارين الطيبين

http://www.thedeadlift.com/wp-conten...g_deadlift.jpg

قبل ماتكلم عن فوائد التمرين احب اذكر لكم شنهي العضلات اللي تشتغل بهالتمرين :

• عضلات الافخاذ الاماميه والخلفيه
• عضله المؤخره
• عضله اسفل الظهر *هي العضله الاساسيه المستهدفه
• عضله المثلثات او الترابس او Trapezius المتوسطه والعليا
• عضلات البطن والاجناب
• عضلات الظهر الاجنحه
• و البطه او الكالفز

مثل مانكم شايفين عدد العضلات اللي تتفاعل مع هالتمرين الجبار

طيب الحين وبعد ماعرفنا العضلات اللي تتفاعل مع تمرين الديد لفت الحين بقولكم فوايده لكم وعشان ابسطها راح احط فوائد التمرين بنقاط

1. تمرين الديد لفت يحرق الكثير من الكالوريز و الدهون
2. يبني عضل قوي في عضلات السواعد و يقوي مسكه اليد
3. الديد ليفت يقوي قوه الجسم كله
4. مثل ماتم ذكره الكثير من العضلات تدخل في هالتمرين
5. مايحتاج تمرن عضلات البطن بعد هالتمرين لانك اولريدي مرنتهم بهالتمرين
6. الديدليفت يزيد من هرمون الاتش جي اتش والتستوريون
7. الديد ليفت غير مضر لو تم بالطريقه الصحيحه
8. الديدليفت يحميك من الاصابات لانه يقوي عضله الظهر السفليه بشكل جبار ويخليك ثابت في باقي التمارين مثل تمارين الباي مايخليك تتارجح كثير يعطيك ثبات
9. هالتمرين راح يساعدك حتى بحياتك العمليه مثلا لو شلت تلفزيون او شي تعرف تشيله بالطريقه الصحيحه وبسهوله تامه
10. والديدليفت اعتبره كانه كارديو لانه يزيد من دقات القلب وحراره الجسم ويزيد من VO2Max
11. الديدليفت مايحتاج معدات كثيره بس بار واوزان وتقدر تسويه بالدنابل لكن البار هو اللي اشوفه الاحسن والاحلى

اما بالايام العاديه تجمعه مع تمرين الظهر وانصح يكون الاخير لانه بعد هالتمرين الظهر يكون منتهي ومنهك هههه ويكون عباره عن ثلاث جلسات باوزان متوسطه من 10 الى 12

انصح بعمل تمرين الديد ليفت باوزان ثقيله كل شهر مره وتكون مخصصله يوم بس للديدليفت ويكون عشر جلسات و كل جلسه بين 3 الى 5 رفعات والراحه 5 دقايق بين كل جلسه عشان تجمع طاقتك وريكفري احسن

طريقتي المفضله واللي ارتحت لها لهلتمرين وخصوصا لو كان باوزان ثقيله احب افصخ الحذاء الله يعزكم عشان يعطيني ثبات اكثر بالارض واحس بالارض اكثر شعور حلو :wink2: و استخدم ربطه اليد عشان تقوي قبضتي اكثر واكثر ومايفلت البار مني

وهاي صوره لي وانا اشيل وزن 180 كيلو 4 عدات قولو ماشاء الله

https://fbcdn-sphotos-a-a.akamaihd.n...72409905_o.jpg



وبالاخير اتمنى اني افدكم بخبرتي المتواضعه الشخصيه
واتمنى تسوولي لايك ع صفحتي الخاصه بالفيسيبوك عشان تشوفون كل جديد لي باذن الله : رابط الفيسبوك http://cdn.shopify.com/s/files/1/009...small.png?2012

اخوكم ناصر فمان الله

الي آثآر انتباهي في الموضوع الصــــوره ..

تتمرين بدووون جوووتي هع هع هع مسكتك ..:wink2:

تمرين الرفعه المميته حتى لو ما تطبقته صح بتستفيد منه ..

وهو أفضل تمرين لعضله القطنيه

وعليكم السلام ورحمة الله وبركاته...>ماشاء الله تبارك الرحمن الله يزيدك.

بس اغلب الشعب مايلعبونه :)اذكر كنت بنادي بالحرس الوطني وكان المدرب جسمه جميل ومقسم وشافني العب مرة بـ100 ومرات بـ120 كيلو جاء بعدي يبي يشيله ماقدر يحركه من مكاانه هههههههه.
لأنه مايلعبه اصلا بحياته.

هالتمرين بالذات يخلي بالمطارح بين أخوياك 100% ما أحد يطرحك.:biggthump.
مشكور وماقصرت استفدت من موضوعك.

اقتباس:

---

المشاركة الأصلية كتبت بواسطة mr.dark.gym

الي آثآر انتباهي في الموضوع الصــــوره ..

تتمرين بدووون جوووتي هع هع هع مسكتك ..:wink2:

تمرين الرفعه المميته حتى لو ما تطبقته صح بتستفيد منه ..

وهو أفضل تمرين لعضله القطنيه

---

ههههه تركت كل شي وركزت بهاي .. اتمرن بس تمرينين بدون جوتي الله يعزك الديد ليفت والسكوات و مثل مانك شايف ارنلود وكثار يتبعون هالطريقه او لو تحب تقدر تلبس جوتي مسطح مثل كونفرس اول ستار
و بالنسبه حتى لو ماطبقته صح بتستفيد ما اوافقك الرأي يالغالي لانه مافي لعب مع عضله اسفل الظهر الاصابات موجعه بتكون فانصح اول شي الواحد يتعلم عليها باوزان خفيفه ويسال الناس ويتابع اليوتيوب وشوي شوي يزيد نورت موضوعي حبوب

السلام عليكم ورحمة الله وبركاته

ماشاء الله موضوع رائع ومميز ...

اقتباس:

---

طريقتي المفضله واللي ارتحت لها لهلتمرين وخصوصا لو كان باوزان ثقيله احب افصخ الحذاء الله يعزكم عشان يعطيني ثبات اكثر بالارض واحس بالارض اكثر شعور حلو :wink2: و استخدم ربطه اليد عشان تقوي قبضتي اكثر واكثر ومايفلت البار مني

---

بصرااح التمرين بدون جوتي او حذاء اكرمكم الله يدخلك في جو ثاني .. يا خي تحس انك غيييير ههههه .. تسلم ع الموضوع الرااائع


تحيااتي لكم

يعطيك العافيه موضوع في غاية الاهميه وللاسف الكثير من اللاعبين لا يعطونه الاهميه الكافيه..

هذا التمرين هو الوحيد اللي يمرّن عضلات الوجه :bigeyes: ويشغّل 240 عضله في الجسم ..

له طريقتين ولكل واحده فوائد :
Romanian deadlift هو التمرين المتعارف عليه وهو لكامل الجسم..
Sumo deadlift وهو التمرين اللي يركّز اكثر على الارجل وخصوصاً عضلات الفخذ الجانبيه الداخليه التي تكون مهمله وقد تكون عامل مساعد للكثير من الاصابات في منطقة الوسط .


مشكور على جهدك الرائع.

الله يعطيك العافية اخوي فعلا تمرين سوبر خارق
الف شكر على مجهودك

اقتباس:

---

المشاركة الأصلية كتبت بواسطة بن غانـم

السلام عليكم ورحمة الله وبركاته

ماشاء الله موضوع رائع ومميز ...

بصرااح التمرين بدون جوتي او حذاء اكرمكم الله يدخلك في جو ثاني .. يا خي تحس انك غيييير ههههه .. تسلم ع الموضوع الرااائع


تحيااتي لكم

---

صحيح اوافقك الرأي يالغالي خصوصا بهالتمرين والسكوات ;)

هذا التمرين ممتاز ولا غنى عنه ولاكن يجب التدريج بالاوزان وربط الحزام بقوة لأنه خطر على آخر الضهر والطريقة الخاطئة ممكن تسبب مشكلة فالغضروف
ويعطيك الف عافية ماقصرت فالموضوع ..

اقتباس:

---

المشاركة الأصلية كتبت بواسطة Strong Muscle

يعطيك العافيه موضوع في غاية الاهميه وللاسف الكثير من اللاعبين لا يعطونه الاهميه الكافيه..

هذا التمرين هو الوحيد اللي يمرّن عضلات الوجه :bigeyes: ويشغّل 240 عضله في الجسم ..

له طريقتين ولكل واحده فوائد :
Romanian deadlift هو التمرين المتعارف عليه وهو لكامل الجسم..
Sumo deadlift وهو التمرين اللي يركّز اكثر على الارجل وخصوصاً عضلات الفخذ الجانبيه الداخليه التي تكون مهمله وقد تكون عامل مساعد للكثير من الاصابات في منطقة الوسط .


مشكور على جهدك الرائع.

---

لايعطونه اهميه لانه ببساطه مجهد و يتعب اكثر من غيره فألوم الواحد اللي يشتكي عن عدم تطور جسمه وكذا وهو يبتعد عن هالتمارين مثل السكوات و الديد ليفت لو عرفوا اهميتهم و بعدوا عن السلبيين انه تمرين مو مهم و كله اصابات الواحد بيبتعد .. وانا انصح الجميع بتجربته والتدرج فيه وبيشوف نتايج حلوه باذن الله
االسومو ديدليفت ماجربتها الا مره وفعلا تحس بضغط كبير عالرجل تسلم الغالي عالمرور الطيب

وعليكم السلام ورحمة الله وبركاته

ماشاء الله موضوع في قمة الفائده

مميز كعادتك يابرنـــــــــــس .

الله يعطيك الف عافيه ..

اقتباس:

---

المشاركة الأصلية كتبت بواسطة Nas Fitness

ههههه تركت كل شي وركزت بهاي .. اتمرن بس تمرينين بدون جوتي الله يعزك الديد ليفت والسكوات و مثل مانك شايف ارنلود وكثار يتبعون هالطريقه او لو تحب تقدر تلبس جوتي مسطح مثل كونفرس اول ستار

و بالنسبه حتى لو ماطبقته صح بتستفيد ما اوافقك الرأي يالغالي لانه مافي لعب مع عضله اسفل الظهر الاصابات موجعه بتكون فانصح اول شي الواحد يتعلم عليها باوزان خفيفه ويسال الناس ويتابع اليوتيوب وشوي شوي يزيد نورت موضوعي حبوب

---

طبعآ لازم نرركز على هذا الشيء ونمسسك الحافيين خخخخخخخخخخـ

هو كلامك صح مافي افضل من انك تتطبق التمرين صح .. وتتطبيقه سسهل

لكن جرب تلعبه غلط مره واحده وشوف بتحس بالعضله ولالا ..

عن نفسي أحس فيها ..

اقتباس:

---

المشاركة الأصلية كتبت بواسطة samimo2006

هذا التمرين ممتاز ولا غنى عنه ولاكن يجب التدريج بالاوزان وربط الحزام بقوة لأنه خطر على آخر الضهر والطريقة الخاطئة ممكن تسبب مشكلة فالغضروف
ويعطيك الف عافية ماقصرت فالموضوع ..

---

تسلم حبيب عالمرور واتفق معاك ولكن لي تعقيب بخصوص الحزام .. للي مايعاني بمشاكل بظهره و يعرف التكنيك صح ما اشوف للحزام له داعي لانه غش ويخليه يشيل وزن اثقل وبدون الحزام ماراح يقدر والهدف من كلامي انه الواحد يحاول قدر الامكان الاستعانه بقوته الجسمانيه اكثر والثقه الكامله بقوته ونفس ماقلت يالغالي بالتدرج

تمرين خطر جداً يجب الحذر منه واللعب بأوزان خفيفة جداً
اول شي بالبار فاضي بعدها 2.5 كيلو بعدها 5 كيلو بعدها 10 كيلو بعدها 15 بعدها 20 وزي كذا لا تستعجل
هذا الكلام للي ماعمرهم لعبو ديدليفت والكلام ينطبق على السكوات بعد

اقتباس:

---

المشاركة الأصلية كتبت بواسطة متعطش

تمرين خطر جداً يجب الحذر منه واللعب بأوزان خفيفة جداً
اول شي بالبار فاضي بعدها 2.5 كيلو بعدها 5 كيلو بعدها 10 كيلو بعدها 15 بعدها 20 وزي كذا لا تستعجل
هذا الكلام للي ماعمرهم لعبو ديدليفت والكلام ينطبق على السكوات بعد

---

يا اخوي بطريقتك هاي بانه خطر جدا ويجب الحذر كانه الناس نازله بنار وتجنبهم منه :boggled: .. مثل ما ذكرت انا والاخوان واظافتك انه يبدى الواحد فيه بالتدرج وبالطريقه والتكنيك الصحيحين ومافي اي غبار عليه باذن الله وانا اشجع الجميع باشراكه بتمرين الظهر و السومو للارجل نورت الموضوع عزيزي

ياوحش هو التمرين خطر ويجب القول انه خطر واقولها للمرة الألف خطـــــــــــــــــــر جداً
أكثر تمرينين في كمال الأجسام من ناحية الخطورة هي الديدليفت والسكوات لزوم نقول هالكلام حتى مايجيك بعض المبتدئين متحمس ويهايط من اول شي يحاول يشيل لك 100 كيلو
وظهره بلوط وهو منكسر
لكن هالتمرينين السكوات والديدليفت من أكثر التمارين بل أقواها في رفع هرمون الجي اتش والتيسترون ويعتبرون أساسيين لكل يوم تمرين وأكثر اللعيبة العالميين ينصحون بتمرين السكوات مرتين أسبوعياً
والديدليفت مرة أسبوعياً .. موضوع حلو شكراً

صدقت
أنا والحمدلله مواظب على أداء هذا التمرين في يوم الظهر والحمدلله وصلت إني أشيل 100 كيلو فيه وإذا حبيت اكسر وزن أكسره بزيادة 5 كيلو فقط يعني التدرج فيه ممتاز وبالفعل بيعطي لجسمك قوة وثقة أكثر عن غيرك وخصوصا إن فيه ناس لهم سنين بكمال الجسام ومايلعبوا هالتمرين

التمرين هذا تمرين اصابات دائمة انا لعبت التمرين لمدة ما يقارب 8 اشهر و سبب لي الم دائم في الفقرتين الأخريتين في الظهر لأن طريقة التمرين تؤدي للضغط علي على الديسكات و يمسحها مسح انا انصح بألأبتعاد عنة بشدة و يكفي الأسكواش اقل ضررا منه اذا لعب بحذر

اقتباس:

---

المشاركة الأصلية كتبت بواسطة ابو علي 1

التمرين هذا تمرين اصابات دائمة انا لعبت التمرين لمدة ما يقارب 8 اشهر و سبب لي الم دائم في الفقرتين الأخريتين في الظهر لأن طريقة التمرين تؤدي للضغط علي على الديسكات و يمسحها مسح انا انصح بألأبتعاد عنة بشدة و يكفي الأسكواش اقل ضررا منه اذا لعب بحذر

---

100% أكيد كنت تؤدي التمرين بطريقة غلط أو عندك مشكلة في الأساس والتمرين زاد من تفاقمها أن لي سنة ونصف في كمال الأجسام وامارس هذا التمرين بانتظام مع تمارين الظهر ولله الحمد لم تحدث أي إصابة أو حتى شعور بألم بالعكس نتائجه قوة في أسفل الظهر وثبات في الجسم حين أداء جميع التمارين وضخامه مميزه للظهر

أي تمرين في كمال الأجسام خطير ولاشك أن أخطرهم الديدليفت إذا تم أداء أي تمرين بطريقة خاطئة لكن لو أديت جميع التمارين بطريقة صحيحة وعدم المبالغة الزائدة في الأوزان مع الأخذ بوسائل السلامة كالحزام وربطات الركبه وغيرها فلن تكون هناك اي إصابات بحول الله وقوته

يعطيك العافية

فيه ناس كثير عندنا بالنادي
يتجنبون هالتمرين ؟! واذا ليش يقول يجيب اصابات ومهو مهم ؟!
بالعكس انا براايي اهم تمرين للي هدفه يستمر على الرياضة ورفع الاوزان
صحيح انه اخطر تمرين ممكن يصيبك لو لعبته بشكل خاطئ سواءا بالاداء او بوزن فوق مستواك , لكن بالتطبيق السليم اكيد ماراح يصيبك شي

الجانب الثاني فيه ناس يبعد عن هالتمرين بسبب انه تمرين اصابات والمشكلة تجيه اصابات من تمارين ثانية والسبب اهماله لهالتمرين
يعني مية بالمية بس تتطور وتصير تشيل اوزان راح تستخدم اسفل ظهرك كثيييييير سواءا بتمارين الظهر كلها لو شلت اوزان راح يكون حمل على اسفل الظهر
وايضا باقي التمارين لو فرضا وصلت لوزن كبير بالدامبل كتف او صدر وجيت بترفع الدامبل من الارض هنا ضغط على ظهرك كبير



اشكرك مره ااخرى وفعلا هالتمرين من اهم التمارين

اقتباس:

---

المشاركة الأصلية كتبت بواسطة بردان1

يعطيك العافية

فيه ناس كثير عندنا بالنادي
يتجنبون هالتمرين ؟! واذا ليش يقول يجيب اصابات ومهو مهم ؟!
بالعكس انا براايي اهم تمرين للي هدفه يستمر على الرياضة ورفع الاوزان
صحيح انه اخطر تمرين ممكن يصيبك لو لعبته بشكل خاطئ سواءا بالاداء او بوزن فوق مستواك , لكن بالتطبيق السليم اكيد ماراح يصيبك شي

الجانب الثاني فيه ناس يبعد عن هالتمرين بسبب انه تمرين اصابات والمشكلة تجيه اصابات من تمارين ثانية والسبب اهماله لهالتمرين
يعني مية بالمية بس تتطور وتصير تشيل اوزان راح تستخدم اسفل ظهرك كثيييييير سواءا بتمارين الظهر كلها لو شلت اوزان راح يكون حمل على اسفل الظهر
وايضا باقي التمارين لو فرضا وصلت لوزن كبير بالدامبل كتف او صدر وجيت بترفع الدامبل من الارض هنا ضغط على ظهرك كبير



اشكرك مره ااخرى وفعلا هالتمرين من اهم التمارين

---

كلام مميز ومتفق معاك بكل كلمه اخوي بردان اسفل الظهر هو مثل الاساس للبنايه لو ماكان شديد وقوي صعب تتحمل البنايه الضغوط عليها بس لو الاساس قوي وصلب العكس تماما وطبعا للافضل