لاند شااااارك .. على التلفزيون الامريكي .. برنامج تونتي تونتي [حقيقة]
هلااااااااااااااااااو
اول شي حبيت اقول لكم ازيكم يا حضرات :cool: .. بما اني ما اعرف اسوي مقدمات ولا يحزنون .. وحدي اخش بالموضوع مرة وحدة لذا فراح اعفيكم من المقدمات والخرابيط ذي واخش بالغويط ..
حسب المتعارف عليه في ناموس الشاركات "القروش" الازلي ..
تقريبا كل جمعة يكون فيه اجتماع عائلي "اسم بس" في بيت جدي .. المهم المرة ذيك انا على نياتي طلعت من البيت انا واخواني وشفت اللينكون الحبيبة واقفة تتمطى عند الباب .. كانت الساعة 2 وهي تتمطى ما شاء الله مع انها تو رايح بها مشوار للصلاة .. المهم وادق سيلف واشغل سيلين ديون "بيكوز يو لف مي" واخوي الا بيخرب علي الجو ويشغل لينكين بارك " ان ذا ايند " .. المهم مشينا ومرينا من عند معارض السيارات "يبي يقول لكم انه مر ع النسيم" وافتكيت من .. تبيع .. سعر زين والله .. ومرينا في الحواري والقلق لين وصلنا للقصر الشامخ اللي هو بيت جدي .. والا اشوف شي عجيب :!
الأفالون حقت زوج خالتي ؟؟
الكارفان حقت زوج خالتي الثاني وبناته والقلق ؟؟
فان كبييييير .. طالع شبهه ؟؟
المهم وادخل والا يجيني زوج خالتي .. تصرف على طبيعتك :0) .. انا قلت يمكن الاف بي اي عندنا ونا مدري
المهم انا اقول له هااااه ?: .. وهو يقول ما عليك خلك طبيعي ;-)
عاد اخش والا اشوف ذاك الامريكي اللي فوق راسه شي تقل قطو فارسي .. شوشة ولا شوشة ار بي جي ماستر
والامريكية ذيك ماسكة معها قاذف صواريخ .. مدري كاميرا .. لا وبعد واحد كأنه اخو توم كروز جالس لا وحاط رجل على رجل بعد .. افففففففففف لو تمسكك جدتي بس كان قطعتك .. المهم زوج خالتي يدزني رح سلم على جدك .. عاد انا رحت دام الدعوة كاميرا احترام واحب راسه ويده وجه وقفا ودنيا .. بعدين قمت اترزعت على جنب عند خالتي ..
لاندي : بسست .. يا (...) .. وش القصة :! ؟؟
خالتي : ما تدري .. الحين هم مسويين معي مقابلة بكرة بصفتي محررة في جريدة عرب نيوز وبيسوون لنا تصوير يعني بما معناه يوم عائلي في حياة اسرة سعودية ;-) !!
لاندي : اخصص يعني بطلع على التلفزيون ! بصير مشهور يعني !!
خالتي : ما اقول الا رح جب سبت الشوكولاتة وباشر على عمك وجدك .. لازم برستيج دام الدعوة تصوير ؟
المهم واهز طولي رايح جاي قدام الكاميرا تقل مستر بوقس .. "أفففففف قديم انا" .. المهم مافي الا طالع نازل والعالم وراي بهالكاميرا .. بس يومتها مسوي مؤدب ما طقيت اخوي ابد .. مالها داعي يقولون عنا الامريكيين اننا ارهابيين حتى ببيوتنا .. المهم وانا كل خمس دقائق طالع ازين بهالشوشة اللي مدري وش تبي وارجع .. لا ودارك شارك قال دام انها خربانة خربانة راح سوا "سبايك" بشعره :cool: الولد خرب .. شوي ويخش على جدي
YO .. WASSUP
بس الحمد لله مرت سليمة .. المهم مافي الا رايح اصب بأدب جم قهوة على تمر على شوكولاة ما خليت .. لين جت ساعة الذورة "راش أور" .. الغدى ?:
افففففف غدى على التلفزيون .. لا المشكلة سمك .. والواحد لازم يعرمش وياخذ راحته اكيد انتهم فاهميني .. افففففف لحظات عصيبة اشوف الشعور والناجل وسلطان ابراهيم والجمبري اللي مشوي واللي مقلي واللي مقلي بدون زيت .. كله لازم يعني تطب فيه .. بعدين تتلم العائلة الكريمة اللي حنا .. اصبر اعد .. واحد اثنين ثلاثة اربعة .. كنا حوالي 20 واحد .. بما فيهم انا واخواني وخالاتي وازواجهم وبناتهم ودنيا .. المهم وجلسنا ويجون هالمصورين على روسنا .. عاد جدتي لازم :) تعالوا الا تاكلون معنا ما يصلح حنا ناكل وانتم واقفين طيب لقمة على السريع طيب حبة كذا طيب وصلة كذا .. اخر شي اقتنعت انه مافي امل .. عاد انا جالس بركن الطاولة والكاميرا فوقي بتنقل فضايح لاند شارك للشعب الامريكي .. المهم واصب عصير التوت واحرص على اني احط العلبة في الوسط لا يقولون ذا واين ولا وش قصة اهلهم .. عاد انا لأول مرة في حياتي حطيت بس 3 نعالق من الاصناف اللي فيه ومسوي جنتل اكل اللقمة في 5 لقمات ودنيا وكل ما اخلص شي امسح فمي وامدح هالاكل .. المهم والا يفكونا ويقولون ذاتس انف فور ناو ويرتزون فوق الكنب ويدخن المونتاج اللي معهم "اففففففففف لو تقفطك جدتي تدخن عند الكنب" .. المهم وماهي الا دقائق معدودات "لحظة بشرب موية" .. الا وحنا نهشنا الطاولة بمن عليها .. واقوم والا اشوف هالمصورين مرتزين عند الجزيرة وتناديني المصورة
هي : هلاااو .. وت از زس ..
انا : زس اس تلفزيون "اخص قل بالله"
هي : هاهاها "ضحكة امريكية" يور اسمارت بوي .. نو اي مين وت ار ذاي تولكينج اباوت ..
انا : "اففففف ابقعد اترجم" ذاي ساي امريكا از جود "لاحظ امريكا از جود بالجزيرة"
هي : واااااااااو .. وينقذني من هالموقف جدي وهو يقول صب الشاي والنعناع .. واروح ويكملون تصوير هم وقلق "ما ادري ليه احس انهم شلحوا ملاعق الشاي" .. المهم وشافوا قرآن مع بنت خالتي وانواع التحقيق "عمرها 9 سنين بس عايشة بامريكا 6 سنين يعني انجليزي ولا انجليزي حسني مبارك" وقعدت ترطم معاهم عن القران بعدين طار الموضوع لمتشيجين وطار لكيف ان الجيران ما يبدلون اكل هناك "وش ذا ?: "
عاد انا قلت بما انها خربانة خربانة يا ولد قم هز طولك واقلبها تيكن مع زوج خالتك .. وهات يا ولد السوني تو وتشبيك وانواع اللعب "هو غشاش يلعب بباول ويعرف له حركات انا مسيكين :" "وهاتك يا تصفيك فزت انا بنتيجة 5 - 5 :0)
المهم وبعد بربسة كثيرة وحكي كثير .. مشو على امل اللقاء مرة ثانية وخرابيط ثانية كثير
"على فكرة تراني طيرت نص القصة مع العجلة"
ملاحظات :
البرنامج على قناة ABC الامريكية .. اللي من طقة CNN & NBC وشلتهم
البرنامج اسمها تونتي تونتي 20 - 20
اللي ما حالفه الحظ بان يشوف البرنامج وكان خويي بارسله له بالماسنجر ولا بعطيه وصلة يعمل منها داون لوود
ودمتم خيرا لنا
Re: لاند شااااارك .. على التلفزيون الامريكي .. برنامج تونتي تونتي [حقيقة]
اقتباس:
كتب العضو (LanD ShArK)
زوج خالتي ؟؟
زوج خالتي الثاني وبناته والقلق ؟؟
زوج خالتي .. تصرف على طبيعتك :0)
جدتي بس كان قطعتك .. المهم زوج خالتي
جنب عند خالتي ..
خالتي : ما تدري .. الحين هم مسويين معي مقابلة بكرة بصفتي محررة في جريدة عرب نيوز وبيسوون لنا خالتي : ما اقول الا رح جب سبت الشوكولاتة وباشر على عمك وجدك .. لازم برستيج دام الدعوة تصوير ؟
((((((بما فيهم انا واخواني وخالاتي وازواجهم وبناتهم ودنيا))))))
(((((((.. المهم وجلسنا ويجون هالمصورين على روسنا .. عاد جدتي لازم ))))))
بنت خالتي
زوج خالتك
"على فكرة تراني طيرت نص القصة مع العجلة"
خربت الأخلاق ؟؟:! ؟؟:!
سؤال يا جماعه كم مره نطق كلمة خالتي في الموضوع ؟؟
بعدين يا خي موب عشان العجلة ما تجيب الا سيرة خلاتك يا خي وين مقص الرقيب
والمصورين فوق ريوسنا تعود على من؟؟ عليك وعلى جدك بس ولا على احد ثاني ؟؟:!
المفروض الموضوع ينتقل الى سلة المحذوفات !!
Re: Re: لاند شااااارك .. على التلفزيون الامريكي .. برنامج تونتي تونتي [حقيقة]
اقتباس:
كتب العضو (وليم ورع ديانا)
خربت الأخلاق ؟؟:! ؟؟:!
سؤال يا جماعه كم مره نطق كلمة خالتي في الموضوع ؟؟
بعدين يا خي موب عشان العجلة ما تجيب الا سيرة خلاتك يا خي وين مقص الرقيب
والمصورين فوق ريوسنا تعود على من؟؟ عليك وعلى جدك بس ولا على احد ثاني ؟؟:!
المفروض الموضوع ينتقل الى سلة المحذوفات !!
وش قصتك انت؟
محد قالك تقرا الموضوع...
Re: Re: Re: لاند شااااارك .. على التلفزيون الامريكي .. برنامج تونتي تونتي [حقيقة]
اقتباس:
كتب العضو (MEL C)
وش قصتك انت؟
محد قالك تقرا الموضوع...
لا يا شيخ اجل وش رايك اخذ الموضوع الاستديو واتصور جنبه
