روايـة مـن الادب السـيـرلانـكي ( الكـيـرم والســروال اللعـين )
هههههههههههههههه اقروها و قوليلي وش رايكم :D
الفــــصــــل الأول
----------------------
العــاشــــق الصــــغـــير
طفل في التاسعه صباحاً من عمره ..
نظيف من الخارج يعني شعره وثوبه اخر تمام
لكنه يرتدي سروال وفنيلة تحت الثوب في قمة الوسخ ولونهم كان اشبه بلون الغروب
ولو شلح ثوبه يطلع شكله مثل لوحة فنية تشكيليه
وكان في تلك الايام تنتشر ظاهرة ( المسح ) على الايدين والرجلين
والمسح طبقة من الوسخ المتراكم الذي يغطي الجلد ويصبح لونه اسود وفي ايام البرد
يتشقق هذا المسح ويطلع دم وكان بطلنا يحط فازلين حتى يروح هذا المسح ..
وقد نظف هذا الطفل الآن واصبح هو واخوه عندهم مواقع على الانترنت
الفــاتــنــــة ذات الشعر الطويل
جميلة ونظيفة وعيونها ساحره خلوني ساكت احسن وشعرها طويل واسود مثل لون سروالي
وكانت دائماً ترتدي ( الهيلاهوب ) وهو منتج فرنسي لأرجل البنات الصغيرات حتى ما يبان عليها الوسخ
الفــــصــــل الثــــــاني
------------------------
كــم أحـــبك أيهــا الكــــيرم
كانت تلك الفتاة اخت صديقان لي في مثل سني
.. كنت اذهب للعب معهما وهناك رأيت اختهما واحببتها
وتعلقت بها وشغفت بها شغفاً لا يوصف وهمت بها هياماً أكبر من سني
وبدأت تظهر علي علامات صياعه مبكرة..
فكنت ازورهم يوميا بحجة اني اريد ان العب مع اخوانها وانا في نيتي العب عليهم
واشوف اختهم ..
في ايام الاجازة .. اصحو من النوم مبكراً
واغسل وجهي وراسي فقط لأن الترويش كان سنوي عندنا وفي الاعياد فقط
وألبس ثوب نظيف من ثيابي الاثنين ( واحد وصخ للبيت وواحد نظيف حق العيد والمدرسة) واتعطر من عطور العيلة ( كولونيا ليفدور )
واتجه الى منزل اصحابي علشان اشوف الحبيبة ..
وكنت استحي منها مقدر اتكلم معاها بس اطالعها بعيوني وهي تطالعني وينك يا نوال تغنين
وكنا نلعب كيرم يومياً انا واخوانها وهي تجلس عندنا
واذا جلست جنبي كنت احتاس واسجل الغطا قبل الخمسين
وكان بينا نظرات اعجاب وهي اكبر مني بسنتين <--- مالها علاقه بالسمكه ولا الخاتم
واخوانها مهابيل ولا هم عارفين حاجة يا حليلهم اهم شي يغلبوني بالكيرم
وبقيت على هالحاله فتره طويله وانا اكحل عيوني فيها بدون ما اتكلم معاها ذبحني الحيا
وكنت مغرما بمعنى الكلمه وانا عمري تسع سنوات
واصبحت عندي اغلى من خمسين الكيرم وغطاها
الحمد لله اللي مافيه مدارس مختلطة ولا اولياء الامور ذبحوني ورف! ! ! عوا علي قضايا
واستمريت على هذه الحالة اتزين يوميا من برا بس
واروح للعيال حتى اشوف اختهم ونجلس نلعب كيرم لين تورمت اصابعي بس كله يهون علشانها
الفــــصــــل الثــالـــث
--------------------
غلطـــــة طـفــــــــــــل
في ليلة من الليالي كنا في عرس اخت البنت حبيبتي وآخر الليل كان اغلب الناس راحوا بيوتهم
وباقي شوية حريم بالحوش .. ودخلت انا غرفه جوا البيت ولقيت البنت نايمة جوا
وهنا لعب الشيطان براسي <-- والله عمري تسعه
وقررت اني احبها يعني ابوسها ( ماعرفنا كلمة بوس غير من الانترنت وجاي )
وجلست متردد امطقها ولا ما امطقها على خدها ( المطقة اسم قديم للبوسة )
وفكرت ان ابوسها على عيونها لكني تذكرت اغنيه عبدالوهاب
( مابلاش تبوسني في عينيه .. دي البوسه في العين تفرق )
و خفت تصحى البنت وتهاوشني ويخرب حب العيون اللي بينا .. وظليت خمس دقايق اشاور نفسي
بس للامانة والتاريخ كانت بوستها تجنن ..لو اني بستها
لكني كنت عيل وظليت عيل لاني ما بستها
لان عقلي كان كبير شوي وقلت بنفسي يا ولد ليش مستعجل بكره تتزوجها وتبوسها على كيفك
وهذا انا الحين تمغطت فيها وجنبي مخدة كلها نمل ( وضحيت بالبوسه حتى يعيش الكيرم )
الفــــصــــل الــرابــــع
-----------------
الهفـــــــــــــوه القــــاتـــــــلـة
في يوم من الايام قالوا لي العيال نبي نلعب كوره بحوشهم .. ودخلنا نلعب وكان اخوانها ضدي وانا بروحي والبنت جت و قالت ابي اصير حارسه لك
قلت صيري يا عيوني انا مستانس حيل وقلت ابي احوسهم ولا مارادونا بزمانه ... وبدا اللعب
ويبدا الضحك من العيال واختهم بعد تضحك يناظروني ويضحكون طاح قلبي قلت وش بلاهم ذولي .. ليش يضحكون علي خاصه البنت مهي عوايدها تكون كذا دايم تحترمني ...
قلت لاخوها وش بلاك تضحك يا الدب قال شف لون سروالك
ابوك يا الفشيله رفعت ثوبي عشان اللعب
ونسيت الوان الطيف اللي بسروالي والله وانا انزل ثوبي والعب شوي واروح واخليهم ..
وصرت استحي اجيهم من ذاك اليوم لاني مقدر اقابل البنت بعد ما ضحكت علي وكنت مضرب مثل بالنظافه عند اهل البنت .. ولكني تفشلت وانكشفت على حقيقتي امام البنت ..
وبدأنا نكبر بدون ان اراها الا صدف قليله وبدأت تتغطى عني ولا اشوفها ولا تشوفني ..
كنهاية اي حب طفوله سعودي
الفــــصــــل الخــــامـــس
------------------
ودارت الايــــــــــــــــــام
كنت بزيارة اشرافيه العام الماضي ! ! ! لمدرس
وبعد خروجي من الصف مررت بالصف الثالث .. واذا بعريف الصف يناديني
استاذ استاذ عندنا مشاغب تعال اجلده ... دخلت الصف قلت وين المشاغب قال عريف الصف
هذا يا استاذ .. واذا به يشير الى الساعه اقصد الى طفل جميل ونظيف وش حليله
قلت له تعال يا ولد وجا وقرب مني وجت عينه بعيني
ويا آلهي رأيت عيون حبيبتي القديمة في عيونه وكأنها تنظر لي
فسألته عن اسمه فقال لي اسمه ( فكان ابنها )
فقلت له ليش تشاغب ؟؟؟ قال يا استاذ اخر مره سامحني ..
قلت طيب :- اذا ملابسك نظيفه رح اسامحك ..
فقال الولد :- شوف ثوبي نظيف يا استاذ ..
فقلت له :- هين ثوبك .. خلني اشوف سروالك طيب ؟
ورفع الولد طرف ثوبه ومد رجله يريني سرواله الطويل الابيض النظيف ..
والذي لو كنت ارتديه قبل عشرون عاما
لأصبح هذا الطفل الجميل ابن ذاك العاشق الصغير
