مرق شعوم

السلام عليكم

شلونكم وشخبارك اعضاء و عضوات المنتدى وكل الزوار الاعزاء

بالبدايه اعتذر عن كلامي اللي قلته ان ماراح اسوي سمك بعد اليوم الا لما اشوف طبخات ثانيه غير السمك مثل الدجاج واللحم و بعدين اذا حصل و عملت سمك احطه بالمنتدى , اعتقدت اني عمل المشوي والمطبق والمرق لكن اكتشفت ان المرق ماحطيته

و راح يكون هذا الطبق اخر الاطباق لهذا الموسم من الاسماك

عشان ما اطول عليكم اكثر بدخل بالتفاصيل , و ايضا قبل ما ادخل بالشغل راح اقولكم على شغله و هي اني راح احط الصور بالحجم الصغير واللي تضغط على الصوره عشان تكبرها , لأن الصور الكبيره سببت لي مشكله و ثقل بالتصفح وقام جهازي يعلق

لذلك قلت احطهم بالشكل الطبيعي واللي يحب يشوف اقرب يضغط على الصوره

و بسم الله نبدأ

---

ملف مرفق 357538

هني بدايه التنظيف . تتنظف السمكه من الخارج والداخل , يعني شيلو الصفط منها عشان راح تكون مرق , واذا شوي بس تنظيف من الداخل والخارج لأ عشان الصفط يكون الحمايه من النار على اللحم

نفس موضوع النقرور

-

ملف مرفق 357539

هذي خضرتنا و اهي خضره السمك عاده , شبنت و كزبره مفرومين واللي تشوفونهم بالسطل الاحمر , بصل و ثوم مفرومين بالخلاط وبعد اخراجهم منه حطينا طماط و فرمناه مع ما تبقى من البصل والثوم و بالاخير الزنجبيل مفروم بعد

-


ملف مرفق 357540

بهاراتنا , البهارات صوب الساعه 12 اهي بهارات سمك لكن العلبه تختلف واللون ايضا يختلف الظاهر بهارات سمك الاوربيين , الساعه 2 بهارات سمك المعروفه , الساعه 4 كركم , بالنص ملح مكان العقارب , الساعه 8 كزبره مطحونه , الساعه 9 ونص فلفل اسود مطحون

-

ملف مرفق 357541

الكزبره الخضره و الشبنت مفرومين

-

ملف مرفق 357542

الشعم و اهو يبتسم للكاميرا

-

ملف مرفق 357543

نخلط البهارات كلهم مع بعض و نتبل فيهم السمك من الخارج والداخل مثل ماتشوفون بالصوره

-

ملف مرفق 357544

نحط البصل والثوم والزنجبيل بالزيت و نحركهم لما يتداخلون ببعض , ترى الجدر كبير لكن الصوره ظالمته

-

ملف مرفق 357545

نضيف البهارات عليهم , تقريبا تقريبا ملعقه كبيره من كل نوع , بهار سمك , لومي , كزبره , فلفل اسود . ملح حسب الرغبه , مو كيفك يعني , لا حط ملح لكن ذوق وشوف قياس او لأ

-

ملف مرفق 357546

راح يطلعون بهذا الشكل , اوكي ياجماعه , خطوات سهله ومايبيلها شي

-

ملف مرفق 357547

نحط زيت بالمقله و نحط السمك فيها , يعني بذمتكم وين نحط السمك ؟ اكيد نحطه بالمقله اجل ليش حاطين زيت

نطبخ السمك على كل جهه تقريبا 4 الى 5 دقائق حسب قوه النار , لكن مو تكثرون طبخ لأن نبيهم 3 ارباع استواء بس والربع الاخير يكون بالمرق


راح نكمل معاكم في المشاركه القادمه , يعني السابقه ؟ اكيد القادمه

تأخرت شوي رحت مشوار طلعلي وانا احط الصور

المهم نكمل الموضوع وماتبقى منه

-

ملف مرفق 357548

بعد ما تداخل كل شي مع بعض حطيت الطماط المفروم , اللي ضربته بالخلاط

-

ملف مرفق 357549

حطيت 3 علب معجون طماط جاهز

-

ملف مرفق 357550

حطيت الخضره المفرومه فوقهم

-

ملف مرفق 357551

حطيت ماء نص الجدر تقريبا

-

ملف مرفق 357552

هني بالصوره هذي الهدف منها اوريكم حجم الجدر و حجم المكونات اللي حطيتهم عشان تعرفون شكثر من المقادير حطيت

-

ملف مرفق 357553

نشوف السمك ونقلبه كل ما استوى من جهه و مثل ماقلت 3 ارباع استواء بس

-

ملف مرفق 357554

شفتوا الصحن هذا , حطيت فيه كيس كامل صباره "تمر هندي" و ضفت ماء عليه تقريبا الى 3 ارباعه , و لما استخرجت العصاره و اخرجت البذر صبيت ربع الكميه على المرق و باقي ربعين او نص الصحن عشان اسوي صباره لوحدها

حطيت عليها كزبره مثل ماانتوا شايفين


ملف مرفق 357555

ثوم

ملف مرفق 357556

شويه من الخضره اللي تبقت

ملف مرفق 357557

الحين المرق قاعد تفوح , الحين جاهزه بس انا ما خلصتها ليش ؟

المفروض والطريقه المعروفه عندنا بمرق السمك , ان بعد مايفوح الجدر مثل اللي بالصوره , اوطي على النار اخر شي , يعني نار خفيفه جدا و احط السمك فيها

و مده 5 دقايق بس اسكر النار و اشيل الجدر و ينتهي الطبخ

لكن 2 من اصحابي دقوا علي وقالوا حنا جايين لا تاكلون انطرونا

اذا حطيت السمك راح يتقطع و تخترب الطبخه لأن بالكثير 5 دقايق من احط السمك بالمرق , لذلك عملت الآتي

-

ملف مرفق 357558

اطفيت النار و قعدت اشوف الطعم شلون اذا يحتاج شي مثل ملح او بهار

-

ملف مرفق 357559

عشان الشباب بالدرب و مايبي الاكل يبرد طلعت صحنين فرن , و حطيت الشعم فيهم مثل ما انتوا شايفين و صبيت عليهم المرق

-

ملف مرفق 357560

وهذا الصحن الثاني

ملف مرفق 357561

وهني الصحنين فيهم السمك والمرق عليهم

المفروض احط السمك بالجدر نفسه اللي مبين بالصوره اللي فوق و اتركه على نار هاديه 5 دقايق وبعدين احطهم بصحون التقديم لكن هذي الطريقه البديله و ماتفرق عن الطريقه التقليديه بأي شي ترى

-

ملف مرفق 357562

حطيتهم بالفرن مثل ماانتوا شايفين و نار هاديه اللي تحت بس

-

ملف مرفق 357563

هذا الزيت اللي قلينا السمك فيه

ملف مرفق 357564

اصفيه واصبه بالجدر

ملف مرفق 357565


هذا جدر العيش فيه زيت السمك و حطيت كركم عشان العيش يكون اصفر

ملف مرفق 357566
ملف مرفق 357567


الصورتين فوق العيش , بعد ما حطيته قعدت احركه على نار قويه و تركته يتشرب


-



نطلع فاصل و نواصل بعد

هم اعتذر لأن المنتدى مادري شفيه انقفل

المهم

هذي السلطه واللي مسويها اهو نفسه , بسميه ملك الزلاطه


ملف مرفق 357574

-


ملف مرفق 357575

هذا العيش الاصفر , كركم يعني عيش مكركم

-

ملف مرفق 357576

دقوا الشباب وقالوا احنا مطولين اكلوا و خشوا لنا , واللي عندي ذبحهم الجوع بعد فقررنا اننا بما ان حاطين صحنين فرن فيهم السمك , نطلع واحد لنا والثاني نخشه لهم

وهالصحن لنا

ملف مرفق 357577

اي هذا لنا بعد ما اخذنا سمكه زياده و انشلع راسها , بدون راس هالوين

ملف مرفق 357578

هذي المرقه نشربها على ما يجهزون الباقيين ويتجمعون

ملف مرفق 357579


هذا الشكل العام , بس الروب يمين و اللبن هذوله بالغلط جايبينهم , يعني احنا ما ناكل السمك مع روب او لبن او حليب والعلبه اللي يسار الروب هذي سمن

---

جذي نكون وصلنا واياكم الى نهايه التقرير , واتمنى اني وفقت بوضع 3 تقارير عن 3 طرق عمل السمك بالكويت , يعني اشهر 3 طرق نعملها بالسمك عندنا حطيتهم في 3 تقارير منفصله

واتمنى اني قدمتهم بالطريقه الصحيحه او الطريقه اللي اشوفها صحيحه


للأمانه : انا حطيت الصور بحجم صغير لأني حلمت اليوم حلم , طلعلي بالحلم كريس , اي كريس مغيره اللي معانا , وقالي فهد تدري ليش مواضيعك لما تدخلها تصير بطيئه ؟

قلت ليش ؟

قال لأن الصور بالحجم الكبير و عشان جذي يصير الموضوع ثقيل , وانا بعدل مواضيعك السابقه وبحط الصور بالحجم الصغير عشان يصير اسرع

انا قعدت من النوم و قلت بسويها , وفعلا اشوف الموضوع سلس وسريع ولا يهنق جهازي

فشكرا لكريس "اللي بالحلم" وشكرا لكريس "بالصج" عالوسام

وشكرا لكم اعزائي الاعضاء والزوار على مشاهدتكم لموضيعي المتواضع


---

الحين بنشوف طبخات غير السمك , لأن خلصنا من المشوي والمطبق والمرق


دمتم بود

الله يعطيك العافية مشكور على الطبخات إللي تقدمها.
أحسن لما وضعت صور صغيرة الحجم و تكون على الطبخة فقط .
شكرا مرة اخرى.