حماية المستهلك !! .. والطبغرافيه الكونيه !؟

**HArb200** · 20-03-2003, 09:30 AM

السلااااااام

لاتسألون عن حالي .. ان الأيام شتتن بالي

وش شعورك بعد ماتاكل أو تشرب .. شي خرباااان .. والمشكله طعمه عادي وحلو .. لا وببسي بعد

المهم .. اليوم مطفر (كالعاده) .. وجاي بعد مشاوير وروحات وجيات .. المهم .. واشوف لكم ذاك المطعم .. هبمرجر وخلافه .. اثنين هبمرجر دجاج بالله .. وكثر الزلطه .. واثنين ببسي .. طبعا عشاني فقدت وزني بعد القلق اليوم ..

وانا أصلا شاك من البدايه بتاريخ انتهاء هالببسي .. لانها من النوع القدييم .. قبل حق الكوره ذا .. طبعا حاولت ادور التاريخ .. محاولة بائسه .. جوعان ..وش بتنتظرون منه ؟؟ .. المهم .. بعد ماتعشيت .. وعيّنت خير بعد هالببسي .. قمت أفكر خلني اشوف التاريخ .. وعلطول طبت عيني عليه .. اوه ماي بيبي ?:

منتهي من شهر !؟؟ .. رحنا وطي .. وانا اللي يفزع عندي ابليس .. وأفكر ابلغ عن هالمطعم .. لانه وللأسف كل قوارير الببسي عنده من هالنوع !! .. يعني اي شاب يافع يشتري من عندهم احد هالقوارير .. قد يكون عرضه للتسمم .. لكن جانب الرحمه واللطف بهؤلاء الهنود الدلوخ .. خلاني اغير رايي .. طبعا مؤقتا ..الين تظهر اعراض التسمم (لاقدر الله) ..

المهم .. بالله متى تنتهي هالحاله .. مره كنت بأحد المطاعم (لاتدققون ترا كلها من نوع همبرجر وطقته ) وايضا كليت من عندهم ذيك الأكله .. الله لايوريكم .. قولوا كش برا وبعيد !!

جتني حمى وصداع .. لكن الحمدلله .. المناعه قويه .. ففالتو واللحظه .. راحت هالحمى بدون ادنى مشكله .

الزبده .. الى متى؟؟ .. خاصتن بمطاعم الشاورما والتسالي .. والبهلله هذي .. كل يوم مقفلين احدها بالشمع الاحمر والاخضر ..ووزارة الداخليه اذ تعلن انها ضد مخالفي نظام الاقامة والعمل .. ومن هالخرط الفاضي .. والمشكله لو تمر على المحل بعد يومين تلقا الشمع الاحمر في خبر كان .. والمطعم رجع مثل اول واحسن !!

.. وطبعا العزوبيه .. وزباين المطاعم ذي .. هم أول المتظررين .

ماودي أخش بتجاربي مع المطاعم .. لاني وبكل برودة دم اقولها .. ممكن أخليكم تنصرعون في التو واللحظه ..

لكن للأسف حماية المستهلك كالعاده هي آخر اهتمامات وزارة الصحه .. مع اني سمعت قبل كم يوم .. انهم أنشئوا هيئه لحماية المستهلك .. او شي زي كذا .

المهم .. نبي اعمال واقعيه .. وميدانيه .. مهوب كلام جرايد !!

وبعدين نصيحه لوجه الله .. بعد ماتقرون موضوعي ذا .. اتمنى تاخذون العضه والعبره من تجربتي .. واي شي تشرونه .. حتى ولو كان .. مناديل .. تتأكدون من الصلاحيه ..

واللي حصل له موقف مثلي .. ياليت يزرعه مع اخوياه .. عشان نفيد ونستفيد ..

وشكرا,,

**SNOoOP** · 20-03-2003, 10:11 AM

والله انك صادق

أخر اهتمامات وزارة الصحة وحماية المستهلك

حماية المستهلك

الظاهر انكم قريتوا عن الكيك المتعفن وجابوه كم مره في الجريدة

ولكن لا حياة لمن تنادي؟؟

طبعا غير البسكوت بالزجاج <<<<<<<ياللهول زجاج

والفلافل بالجراد

والشاورما بال...................وووو.....الخ...

على العموم سلمات هارب ماتشوف شر

**RPG_master** · 20-03-2003, 10:23 AM

وانت يالنكبه ورا ما نبهت الهنود على الأقل علشان يغيرونه:غضب: !ّ

على العموم بغيتك بكم سالفه حول المودم بتاع البي اس 2 وحماية المستهلك(علشان ما نطلع عن اطار الموضوع)

نرجع للموضوع,,

انا جاني تسمم مدري مرض لازمني اسبوعان وأكثر من المعاناه..

بسبب مجهول..ومحصور بين : شاورما,,وحلاو caprice الي بميد:6

وينكم يا حمايه المستهلك:"

**HArb200** · 20-03-2003, 10:46 AM

سنوب ,,

الشر مايجيك يالغالي ..

اما البسكوت بالقزاز .. هذي تحفه

يعني أنت مالك تجربه حساسه بمثل هالموضوع .. اعتبر انك محظوظ صراحه .. ماشاء الله ! ..

اربيجي ,,

لو علمتهم .. بيجحدون .. وبالعربي مهوب نافع فيهم .

على فكره .. لاتنسى تجيب معك زعتوره وفطيرة عش البلبل .. وحبة جبن .. وارسلها على الايميل !!

وشكرا ,,

**memy** · 20-03-2003, 11:01 AM

عادي انا اكلت جبنه ....

يوم مصمصت اصبعي :6

لقيت الجبنه خضرا

و ماصار لي شي

..... بس نمت بالمستشفى

**mohammed111** · 20-03-2003, 11:38 AM

زين اذا جت على انتهاء الصلاحية..

احد المطاعم كفشو عماله وهم يخلطون البول مع الرز البخاري:": :": :غضب:

**Angel whisper** · 20-03-2003, 08:26 PM

يا شيخ ما في شي يتعدى كنتاكي في هالبلاوي ..

كلما آكل شي من عندهم .. امرض .. -_-

وما تشوف شر ..

**عماد 18** · 20-03-2003, 08:47 PM

ما عمري تسممت و لله الحمد ..
لكن اعرف واحد توفي بعد ما اكل من كنتاكي ..
ما زال سبب وفاته غامض ..
بعدين وش فيك تتكلم مثل الصحف ..
بدون اشارة لاسماء المطاعم المخالفة ؟؟
يعني يجيبون لك تحقيق عشرة متر ..
و انواع البلاوي ..
و اخرتها ما يقولون اسماء المطاعم !!
ما ادري وش الفايدة منه ..

**العمدا** · 20-03-2003, 09:45 PM

انا صراحتن ما ادقق في التاريخ الا في كم شي..

مثل البيض والحليب ومشتقاته

اما الباقيين فاحس انه ما به مشكله اذا اكلته وهو منتهي ?:

كلما آكل شي من عندهم .. امرض .. -_-

في حياتي ما قد اكلت من كنتاكي الا مرتين :6 (لا تدققون )

مره جربت التويستر ومره البوب كورن ..

ويا ليتني ما جربتهن :"

**Y a z e e d** · 20-03-2003, 10:10 PM

يازين كودو بس

ولا رز من عمايل ست الحبايب
والباقي اجحّد

**MetalGear** · 20-03-2003, 10:15 PM

زيها ( حماية المستهلك ) زي حق المتسولين مدري وش اسمها ?: ..

كل ما اتذكر واحد من هذولا اتذكر حلقة طاش ما طاش

**cubelover** · 21-03-2003, 01:24 AM

أول شي الحمد لله على السلامه

مره طالع أنا وخوياي نتعشا الكل وعععععععععع

من جد وع ماكملنا ولا لقمه من أحد مطاعم الرياض طلعنا الحمد لله أن البيت كان قريب كل واحد أحتل ونتم بالكرامه حمام

طلع أنه ماغير صاج الشورما له شهر

**Justine** · 21-03-2003, 01:31 AM

انتوا من مطاعم تتسمموا :":

يا حليلكم :"

احنا في مدرستنا :6

كم من مرة لقينا صرصار في همبرجر

و كم من مرة لقينا عيش معفن ...

و كم من مرة طالبنا بتغغير المتعهد ....
و لكن الادارة تصرح بانه لا تعليق ...

اللي قاهرني اني متوسط لكوفي بن عنان عشان يساعدنا لكن النذل يعمل انه مشغول بالعراق :غضب:

**HArb200** · 21-03-2003, 02:56 AM

ميمي ,,
ليه ماتشوفين انتي ؟؟ .. ولا تاكلين وانتي نايمه !؟
وشلون ماشفتيها من البدايه ..

وشكرا على الرد ,,

محمد 111 ,,
:": .. وصخين ذولا .. على فكره .. من كم سنه .. جابو تقرير عن مطعم فول وفلافل .. المهم .. جايبين جرة الفول وحاطينها بالحمام (وانتم بكرامه) .. والعامل قاعد عليها .. ?:
ذاك المنظر مستحيل انساه ..

اينجل ,,
الشر مايجيك .. كنتاكي صراحه خايس .. لامن شريتي منهم وجبه .. شمي ريحة اللحم من داخل .. اشفطيها شفط .. والله ريحة مابعدها ريحه :":

عماد ,,
شفت اشلون .. عشان لامن فتح المطعم مره ثانيه .. محد يقول شي

المشكله مااعرف اسمه .. اصلا المحل ماله سجل تجاري الظاهر .. لانه مسمى باسم صاحبه على مااعتقد .
على طاري كنتاكي مره ثانيه .. لهم فرع بمكه .. قريب من الحرم .. اكيد جاستن يعرفه .. او اي واحد راح هناك .. بايام رمضان .. ادخل وتفرج بس .. شف انواع الحوسه .. حتى داجن بعد اللي جنبه اطقع منه .. يعني مثل هالاماكن .. المفروض كل اللي كلوا تسمموا !!

يتبع ...

**HArb200** · 21-03-2003, 03:08 AM

العمدا ,,
لا يبيلك بعد اليوم تدقق بكل شي .. يعني تاكل زبادي خربان .. !!؟

زيدان ,,
كودو منتاز .. بس جرب مره تشوف الطماط ولا الخضره اللي يحطونها .. دقق فيها شوي .. وشف

,,

ميتل جير ,,
عليك ربط .. وش دخل المتسولين !؟

لوسي ,,
ليه وش فيها خدامتكم .. !؟

كيوب ,,
الله يسلمك ..
والله الشاورما مشكله .. لو تسوي احصائيه .. تلقى الشعب السعودي كله تعرض لتسمم اما حاد او خفيف منها .. ومشكور على ردك ,,

جاستن ,,
يوه قلق .. طيب ورا ماتشترون من برا .. وتدخلونه معكم .. احسن ..
ومشكور على ردك ,,

وشكرا ..

الموضوع: حماية المستهلك !! .. والطبغرافيه الكونيه !؟

أدوات الموضوع

حماية المستهلك !! .. والطبغرافيه الكونيه !؟

ضوابط المشاركة