بسم الله الرحمن الرحيم
السلام عليكم
ابخش في الموضوع على طول.
ــــــــــــــــــــــــــــــــ
طبعا هذي الاختبارت انتهت وانتهى معها تذمر الطلاب من الدراسه وانتهى كابوس طلاب الصف الثالث ثانوي اللي هي أسئلة الوزاره وبعد سنه دراسيه كامله نجح اللي نجح ورسب اللي رسب...
وطبعا راح تسمعون اللي ما جابوا درجات مرتفعه يحطون اللوم على اسئلة الوزاره واللي رسبوا(في اي مرحله دراسيه) راح يحطون اللوم على المدرسين ..
او حتى الطلاب بعد الاختبار يطلعون وانواع السب على هالمدرسين ..تقول لهم ليش؟ يقولون والله الاختبار صعب و..و..و ...الخ
كأن هذولي الطلاب ملائكه ما يخطؤون بس غيرهم هو اللي يغلط!!
انا ما اقول ان اسئلة الوزاره سهله ولا اقول ان ما فيه اختبارات صعبه لكن ايضا الطالب لازم يسوي اللي عليه ولازم يجتهد ..
موب يسحب على المذاكره والا يقرا في هالكتاب وهو ما يدري وش السالفه وفي الاخير يحط اللوم على غيره..
مثل واحد عندي في المسنجر في ثالث ثانوي ادخل ايام الاختبارات وألقاه موجود!!
اقول يمكن انه منظم وقته... وأسأله كيف الاختبارات ويستلمهم تلعين وسب!!
قلت له :اكيد بتقول كذا عشانك ذابح النت ما شاء الله!!
طبعا ما قدر يقول الا(انقلع)!!
والا يجيك واحد يحسب انه لقى له عذر تسأله كيف الاختبار يقول: والله جابوا سؤال غلط كيف تبينا نحل؟
طيب سؤال واحد غلط يعني يمكن عليه درجه او درجتين او حتى خمس وباقي الدرجات ليش ما جبتها!!
اللي ابي اوصل له في الاخير ان الواحد دائما يرمي اغلاطه على غيره وما يفكر بأغلاطه ولا ياخذ الامور من كل الاوجه..
تلقى الواحد دائما ما ياخذ الامور بمنطقيه ولا يفكر بمحاسن الشيء على طول ياخذ المساوئ..
في كل الامور سواء كانت خلافات زوجيه او اختبارات او خلافات مع الاصدقاء او اذا كان الموضوع على جهه حكوميه او.. او.. الخ
طبعا هذا ما يمنع وجود ناس عقلاء ودائما ياخذون الامور من كل الاوجه لكن ما اتوقع انهم الاغلب!!
عشان كذا لازم الواحد يطور من تفكيره.
والا انتم وش رايكم؟
معليش طولت عليكم..
.
... قعدت أراجع أسئلة الخمس سنين اللي راحت، ويوم شفت الامتحان قلت كذا :واو: .. صراحة ما تقارن باللي قبل 
..
