إلى متى يستمر مسلسل الذل
نعم إلى متى يستمر مسلسل الذل ,المراجع يذل من اجل معاملته , الطالب يذل من اجل القبول في الجامعه , و الكثير مما نراه في المطارات و الجامعات و الدوائر الحكوميه و كل من له سلطه يذل من هو دونه
يعني على سبيل المثال الدوائر الحكوميه
الموظفين نفوسهم براس خشمهم و بعضهم ما يعطيك وجه اصلا
يعني اذكر مره دخلت على مكتب (يوم انى كنت ابطلع بطاقه احوال) أبسأله عن مكان التصوير و لقيت موظف قاعد يكلم جوال و قدامه شايب مسيكين , و اللى قاعد بالمكتب متربع و يسولف بجواله و لا كأن قدامه احد و يقول:أأيه ياخي فهد مدرى وش مسوي به صراحه حايس الموضوع.
و الله انت اللى حايس الناس الحين ما ياخذ اجر بهالشايب المسكين و يمشيه و يسولف بجواله لين يقول امين بعدها
أخبر فيه واحد يبي يضيف زوجته بالبطاقه العائله قالوا له اكتب معروض لمدير الاحوال, كتب معروض و قدمه , راح للمدير قال له رح للنائب انا مالى شغل , راح للنائب شاف النائب الورقه
و قال:انت منتب مسلم.
قال :ايه نعم
قاله:اكتب السلام عليكم و رحمه الله اما بعد
كتبها
قال وقع هنا
وقع قال:خذ الورقه للمكتب اللى جنبنا.
راح للمكتب شاف الموظف الورقه و شقها و قطها زبالهو مشي اموره
الحين كل هالازعاج على هالورقه و اخرتها بالزباله
و نشوف بالمطار الى عنده حجز انتظار يذل و يتزاحم ساعه الين يلقى مقعد او يشوتونه
هذا غير الموظفين اللى يشتغلون على شوي شوي
و نشوف بالتقديم الجامعات اللى عنده واسطه يمشي و اللى ما عنده ماله الا بيته
و كذا الدنيا ماشيه!!
بس اللى ابي افهمه ليه دايم الكل يكره وظيفته الكل يكره الدراسه على العكس من الغرب
اذكر يقوللنا استاذ من اللى درسونى انه الموظف اللى يكره الدوام غالبا يكون مجبور على هالدوام لأن ما عنده وظيفه غيرها
زي الطالب يكون مجبور على الدراسه اضف الى ذلك البيئه المدرسيه الفاشله عندنا و عند الدول العربيه عامه للأسف
طبعا مما يؤدي الى انك اذا رحت تبي تخلص معاملتك تلقى الموظفين مهوب طايقيين الدنيا
الغرب الموظف يستمتع بعمله للذلك تجده متقن و مبدع فيه
الطالب يستمتع بدراسته لذلك تلقاه ما يفرق عنده اجازه و لا مدرسه
و بعد هذا نقول الى متى يا مسلمين الى متى يستمر مسلسل الذل هذا , الى متى يصبح كل صاحب سلطه يتسلط على اللى اصغر منه
الله المستعان
oO.. مكتبة برامج التصميم..Oo)::+
