->> الرسم الزخرفي <<-

[Neo Cid]

السلام عليكم و رحمة الله و بركاته ..

سيداتي سندويتشاتي سادتي .. و اخيرا .. بعد معاناة استمرت اشهر بيني و بين ( بيني ) .. قررت اني

ابتدي بهذا الموضوع .. اللي بيعود بالفائدة لي و لكم .. مع احر التمنيات الطيبة .. اخوكم .. نيو سيد ..


















للحين ما خلصت ..

بحمد الله .. بدأت الدراسة في مدارس الكويت السبت الماضي .. و طبعا احنا نظام المقررات ( نظام اليونيسيف ) ..

اول اسبوع .. او اول جم يوم يكون لتسجيل المواد و تعديل الجدول ..

من بين المواد اللي كنت مختارها تربية فنية - الرسم التصويري - .. ممكن من اسمه تعرفونه .. اللي يحطون

جدامكم شي و يقول رسموه مع تظليل و هالأمور .. كنت متزهب للشغلة هذي. .و مجهز كل شي لها ..

بس للأسف .. جدولي ما ركب عليه الرسم التصويري .. و اضطريت آخذ - الرسم الزخرفي - ..

الصراحة .. المادة حلوة .. بس مشكلتها مشكلة .. لازم تييب الوان .. و فرش .. و كراسة كبيرة .. و نوع

خاص من الألوان .. بلاه بلاه بلاه ( كلام فاضي و طويل ولا يمل ) ..

على نهاية اول اسبوع . طلعت من المادة محترف ..

احم احم ..

إلا المشكلة .. أني مالي اي خلفية بألوان القواش هذي .. و الرسم الزخرفي حتى .. كنت أشخبط باللوحة

و طلعت حركات .. و يقولي المدرس ( انت زي الفل يا ميسم )

ملاحظة : ميثم تنطق ميسم بالمصري .. شي لا مفر منه ..

المهم .. يمكن انتوا لكم خلفية أكثر مني .. و حبيت آخذ شوي من خبراتكم .. و مهاراتكم الفنية .. و تعطوني

بعض النصايح الحلوة .. والله انتوا حلوين و طيبين وما تقصرون ( مصلحة ) ..

نشوفكم على خير جميعا ..

موفقين ..

[Touya]

همم اتذكر الزخرفة الوحيدة اللي تعلمت اسويها كانت بالكمبيوتر... حركة عجيبة علمناها استاذ الكمبيوتر...

ارسم دائرة... وخلها تكون ممغوطة شوي.. لفوق أو تحت على راحتك..

بعدين انسخها في الذاكره... (CTRL+C)
ولصق (CTRL+v)

وحطها في موقع تشتهيه... بحيث يكون مركز الدائرة مماس لمحيط الدائرة الأصلية... وبعدين انسخ الدائرتين مع بعض... والصقهم مرة ثانية.. وانت ماشي لين مايكبر الشكل الهندسي ويصير شي

هذا شي سويته بسرعة بالرسام... تقدر تسوي هالشغلات ببرامج اقوى.. وتلون الفراغات بشكل مرتب.. ويطلع لك شغل محترم

[لوجــــــين]

عليكم السلام اخوي Neo Cid
كيف حالك ^^

ماده الخزف أحسها ماده حلوه و تنمي الأبداع ( للأسف ما تسنالي آخذها لمن كنت بمرحله الثانوي )

أفضل انك تستفيد من النت في اكتساب أفكار عن طريقه التعامل مع الخزف و أنواع الزخرفات

راح أحاول أبحث لك عن مواضيع تفيد عن الخزف ^^

[shaheen]

اهلا نيو سيد.. توقعت ان موضوع راح يكون حلو وفعلا

بالنسبة لزخرفة وهي مادة جميلة جدا درستها بالكلية وهي تحتاج الى عمل وصبر خاصة اذا كانت اكثر من مادة متدرجة الصعوبة.. يعني اتذكر عندنا زخرفة 1 وزخرفة 2 وزخرفة 3 وخرفة 4... وكل واحد اعجب من الثاني

واكيد الاخت مادوكا تعرف هالمادة لانها درستها مثلي (لأني درست بالكويت) واكيد خلود وتوتو درسوا من هالمادة(نفس التخصص).

لكن لان فروعها كثيرة لها اساسيات موحدة على ما اظن وهي على الخطوات التالية:
- رسم الشكل من الطبيعة مع الظل.
- رسم الشكل مع الظل باللون الاسود والابيض فقط (يعني مافي تدرج لوني).. بالمصري يا سوِد يا بيض ^_^
- تجريد الشكل أو تحويره من التفاصيل حسب الذوق والانطباع.
- رسم الشكل عن طريق خطوط معينة أو أشكال معينة.
- ملء الفراغات بأشكال وخطوط.
- أختيار الالوان.

وبما ان مادة الزخرفية مادة جمالية فهي تهتمد على الخيال والحس الفني والقدرة على التعامل مع الخطوط والاشكال والفراغات بينها.

اذا كان هذا ما قصدته سيد... فنحن بالخدمة

[أميرة الخيال]

هااااااااااااااااااي

آنا سمعت عن هذا المقرر و بقيت آخذه بس للأسف ما ركب على جدولي


خذيت آنا رسم تصويري بااااااااااايخ بس يونس و مع اني ما اعرف ارسم طلعت فيه 95% لأنه سهل ^_^

بس الشي الحلو اللي تعلمت في هذا المقرر تدريج الألوان و تخلطهم و ما أدري شنو من هذا الكلام

أما بالنسبة حق الزخرفة آنا ما اعرف ازخرف بس عندي كتاب كامل كله زخارف و اشلون تتعلم اتسويهم

السكنر مو عندي الحين بعد اشوي بحط لك الزخارف ^_^

و ان شاء الله تستفيد

[Neo Cid]

Touya :

هلاااااااااا فيك يا تويا ..

مشكوووووووور ألف ألف شكر من لك على المعلومة القيمة .. مع انها على الكمبيوتر .. إلا اني اقدر اطبقها

باستخدام أشكال أخرى .. حتى الخطوط المائلة تشكل نجمة سداسية .. و ثمانية ..

والله عليك حركات يا تويا .. تطلعلي من تحت الأرض ..

أنا مرة قلت للأستاذ ممكن استخدم الفوتوشوب .. و كان ردة : هاااه ؟ ..

والله شكلي للحين ما وصلت له تكنلوجيا المعلومات .. ههههههههه ..

عالعموم .. تسلم ..


لوجــــــين :

هلااااااااا و عليكم السلام و الرحمة ..

وينج من زمان ما تبينين .. صج انج قديمة .. كح كح ..

لا اشدعوه اختي .. بهالسرعة تنسين ؟ .. مو مشكلة . .انا عندج بالمسنجر 24 بطلع منج المعلومات كثر ما ابي ..

اممممم ..

خلاص .. انا ناطر مساعدتج لي .. ولو بموقع واحد .. تفي بالغرض .. لأني فيني تقشف أفكار هالاسبوعين ..

و ألف شكر ..


shaheen :

يا هلااااااااااا بالكابتن شاهين .. نورت الموضوع بردك ..

والله الموضوع حلو بوجودكم فيه ..

مشاء الله .. ماخذ المادة عندنا بالكويت .. صج ان الكويت بلد الثقافة .. ( لا تصدقون وايد ) ..

والله كلامك صحيح .. نقدر نرسم فيها كل شي بتفاصيل قليلة .. بس هالمدرسة صاك علينا الحين و مخلينا

ما نتعدى الخطوط و الأشكال الهندسية .. يحبط الواحد حتى لو كان دافنشي الابن ..

بس ان شاء الله الموضوع هذا يعين لي نهاية الكورس ووقتها صج بيفيدني لأن النهاية بتكون الابداع بعينة ..

تسلملي والله أخوي عالمعلومات القيمة .. و ان شاء الله أطلع من المادة 100% بإذن الله ..


أميرة الخيال :

واااااع .. آسف اختي .. أخوي جيم هيد برى ينظرني حق المدرسة .. لازم أمشي الحين .. بكتب لج بعدين ..

مع السلامة .. سوري .. ><

[orange road]

بالنسبة لزخرفة وهي مادة جميلة جدا درستها بالكلية وهي تحتاج الى عمل وصبر خاصة اذا كانت اكثر من مادة متدرجة الصعوبة.. يعني اتذكر عندنا زخرفة 1 وزخرفة 2 وزخرفة 3 وخرفة 4... وكل واحد اعجب من الثاني

هالكثر شاهين؟؟؟ @@
كل هاي مقررات زخرفة؟؟؟

واكيد الاخت مادوكا تعرف هالمادة لانها درستها مثلي (لأني درست بالكويت) واكيد خلود وتوتو درسوا من هالمادة(نفس التخصص).

والله احنا يا شاهين ما عندنا هالكثر مققرات عن الزخرفة كله اذكر اساسيات التصميم اللي خذناه وما كنا نرسم فيه الا بعض الاشكال الزخرفية البسيطة...

ميثم.. ممكن تسوي هالحركة اللي كنا نسويها في هالمقرر

كنا نرسم هالزخرفة في لوحة ونكررها اكثر من مرة وبأحجام مختلفة على كبر اللوحة..
وبعدين في كل جزء نحط ملمس مختلف بالأسود بس...
اللوحة تكون ملونة اساس.. فتكون اللوحة كلها بالاسود ولون اللوحة.. فهمت علي
وبس

عاد انت تحب تخليها بالابيض والاسود وتحط ملامس او انك تلونها...
وممكن بعد لما توزع الزخرفة على اللوحة تحط فوقها زخرفة ثانية بسيطة موزعة على اي شكل تبيه.. طير.. نبات (انا حطيت في لوحتي لقلق عاد لحد يضحك.. الدكتورة كانت تبي جذي) بس طلعت اللوحة حلوة

ممكن حتى انك توزع الشكل في لوحة دائرية... وتخلي الاشكال ملفوفة على محور الدائرة فهمت شي؟؟؟

[mad_dog]

شباب عندي طلب ابي موقع او اي شي عن الرسم الزخرفي ما ابي صور ابي معلومات عنه مثل الرسم الزخرفي المصري والفرعوني وجذيى

وثانكس اخوي نيوسد على الموضوع والله ايعينك على الماده

[Neo Cid]

أميرة الخيال :

شكرا اختي أميرة على المشاركة الطيبة و المشجعة ..

مثل ما قلتي .. الحلو بالمادة انك تتعلم أكثر عن دمج الالوان .. لا تسأليني عنها .. كنت أرسم كوابيس و الاستاذ

مستانس عليها .. درجت البرتقالي و صار نفس لون البشرة .. ( أرف ) ..

بس الحمد لله الاستاذ عطاني على أول امتحان درجة كاملة .. أخذ اللوحة مني .. قلتله أبيها عشان أعرضها

بالمنتدى بس الحبيب ما سمعني و قالي ( اوعد يا ولاااا ) ..

و ننتظر صور من كتابج أختي ..

orange road :

ألف ألف شكر اختي خلود على المشاركة الرائعة و المفيدة ..

يعطيج الف عافية .. عطيتيني أفكار جديدة و رائعة ..

بالنسبة للي نرسمة الحين .. في البداية كانت بدايتنا بالأشكال الهندسة ( مربع و دائرة و مثلث و مستطيل)

و الخطوط المتعرجة و المتقاطعة .. و كان لازم ندمجها كلها ببعض ..

و الحين الامتحان الثاني تونا داخلين عليه .. الاستاذ طلب منا رسم نخلة

على الاقل احسن من اللقلق ..

و حاليا انا قاعد أشتغل على السكيتشات .. و ان شاء الله بعرض لكم جم سكيتش بدائي لفكرة النخلة هذي ..

و شكرا مرة ثانية ..

mad_dog :
وهاهو عادل .. return of the Adel ..

تصدق .. كتابنا الحين عن الزخرفة الفرعونية و هالأمور .. تبيني أسويها لك سكان ؟ ..

و جميعا يا رب ..