هلا شباب..
كيف الحال؟!..
بعد 6 ايام من اللعب المتواصل في WE7I..هذا هو رأيي في اللعبه..مع توضيح الاختلافات الحاصله..واختيار افضل اللاعبين..وغيرها..وان شاء الله الموضوع سيتم تحديثه كل فتره...
==============================================
رأيي في اللعبه
ما زالت كونامي تتحفنا بابداعاتها في كل جزء من اجزاء هذه اللعبه..فبعد WE7..انصدم جميع عشاق اللعبه بقرار كونامي بتغيير النسخة المطوره (والتي اصبح انتاجها عادة عند الشركة بعد 6اشهر من اصدار اي جزء اصلي)..بنسخة عالميه من اللعبه..والذي زاد الامر سوء..عدم صدور اي معلومات تفيد بتغييرات ولو بسيطه على اللعبه..
لكن كونامي لم تخيب ظن عشاقها..وكان اصدار WE7I مفاجأة ساره للجميع..والسبب..التغييرات التي حدثت للعبه (سأتحدث عن التغييرات في الفقره القادمه)..اول ما لعبت اللعبه..حدث لي ما حدث ايام WE7 وهو اني وجدت اسلوب اللعب صعب..وكدت ان اتركها واعود للجزء السابق..ولكن..بعد يومين وجدت نفسي لا استطيع ترك اللعبه..من شدة الانبهار والحماس..
باختصار..اللعبه رائعة..كونامي ما زالت في القمة..و Winning Eleven ما زالت افضل لعبة كرة قدم في التاريخ..
..
الاختلافات..التي حدثت
اسمحوا لي هنا..اخفف شوي من الفصحى عشان اعرف اشرح
..على الرغم من استخدام اللعبه لنفس المحرك..لاحظت تحسن في الرسوم..مع وجود زيادة في الانيميشن (مثلا:اذا لاعبك تزحلق على لاعب وطيحه..بعض الاحيان تشوف لاعبك يروح يقوم اللاعب الطايح بكل روح رياضيه)..بس تراني لاحظت شي مزعج..وهو انه في حاله تجمع عدد كبير من اللاعبين في منطقه وحده..يكون فيه بطء في اللعبه مع تقطيع بسيط (مدري هل هو بسبب رداءة نسختي اللي منزلها من النت او من اللعبه الاصليه)..لكن اهم نقطه بالنسبة لللاعبين..هي التغير في اسلوب اللعب..وهذي باطرحها على شكل نقاط..
1- اولا..التمريرات والرفعات..
تم تحسين اسلوب التمريرات والرفعات بشكل كبير..واصبح تناقل الكره بين اعضاء الفريق اكثر واقعيه ودقه (جربوا البينيه من رجل زيدان)..والرفعات تغيرت..الان الرفعه ممكن تمر من فوق رؤوس المهاجمين والمدافعين وتتعداهم الى الجهه الثانيه من الملعب...
2- ثانيا..ضربات الرأس..
اصبحت اقوى وافضل..في الجزء السابق كان اغلبيه اللاعبين يشتكون من ضعف ضربات الرأس (هذا ان جت الكوره على راس اللاعب)..لكن في هالجزء صارت ضربات الرأس اقوى واحلى..هذا غير تحسين قوة التسديد لتصبح التسديدات اكثر واقعيه وقوة..بمعنى آخر الشوتات صارت تبرد القلب (جرب شوت كوره برا منطقه الجزاء بنيدفد
)..
3- ثالثا..المراوغه والتسحيب..
في الجزء السابق..كان من الممكن لو معك لاعب مثل مارادونا او اورتيغا..انك تسحب في 5 او 6 لاعبين بكل سهوله..وصار فيه مجموعه ما تلعب الا بهالاسلوب (سحب..سحب..سحب..شوت..قوووول)..بس خلاص..راحت ايامهم..الان حتى لو معك كابتن ماجد..ما راح تقدر تراوغ اكثر من 3 لاعبين..بيجيك الرابع ويقطعها..مما يلزمك تستخدم التمرير..والون تو..والبينيات..
4- رابعا..قطع الكره واستخلاصها..
في WE7 لو تباري واحد يلعب بآرسنال او ميلان..وهجم عليك من الجناح عن طريق شفشينكو او هنري..بتواجه صعوبه كبيره في قطع الكوره..وتلقاه يخترق منطقه الجزاء بسهوله نظرا لسرعه اللاعبين اللي ذكرتهم..اما في WE7I..صار استخلاص الكوره اسهل بكثير..وبصراحة انا ملاحظ انهم زودوها حبتين يعني لو معك لاعب مثل مارتينز سرعته99 وهجمت فيه..راح تلاقي الكمبيوتر يلحقك ويجي من وراك بكل بساطه ويقطعها..مما يذكرني بنقطه ثانيه..وهي تغير اسلوب قطع الكوره عن السابق..الان لو تقطعها بزر x فيه اكثر من حركه يقطعها فيها..لكن لو تستخدم زر o..فيه نسبه كبيره ان الحكم بيحسب فاول عليك..(هنا فيه شي غريب..وهو انك اذا جربت تحتك باللاعب المنافس سواء كان بزر x او انك تمشي جنبه..ما تدري الحكم بيحسبها فاول ولا بيمشيها..ما صار فيه طريقه واضحه لقطع الكوره)..<== هذي ملاحظه شخصيه توني انتبه لها
5- خامسا..مبدأ اتاحه الفرصه..
تم تحسين مبدأ اتاحه الفرصه (وهو للي ما يعرفه..العلامه الصفرا اللي تطلع فوق على اليمين اذا كان فيه فاول لصالحك ولاعبك كمل)..في السابق كان فيه مرات يطبق فيها الحكم مبدأ اتاحه الفرصه..بدون ما تستفيد منها وترتد عليك..اما الان..اذا كان فيه فاول لصالحك..واعطاك الحكم ادفانتج..اذا استمرت الكوره لصالحك حلو..اما اذا اخذها اللاعب المنافس قبل ما تستفيد منها..بيصفر ويعطيك فاول..
6- سادسا..حراس المرمى..
للاسف..النقطه الوحيده السلبية اللي من الصعب التغاضي عنها..هي ضعف حراس المرمى بشكل غريب..تقريبا اي تسديده مباشره على المرمى..تدخل هدف..على عكس الشريط السابق اللي كانوا الحراس فيه مبدعين..تلقى الحارس منهم ممكن يصد 3 او 4 كور متتاليه وكلها انفرادات..والاغرب من هذا..لاحظت ان الحراس يبدعون في كور لا يمكن صدها (مثل ضربه رأس من ركله زاويه..تشوف الحارس ينقض على الكوره مثل الصقر ويمسكها..وبعدها بدقايق..يدخل فيه هدف من تسديده ارضيه ضعيفه من خارج منطقه الجزاء).
الماستر ليج
انا ما لعبت الماستر ليج في الجزء السابق..لكن من اللي فهمته من الاخوان انه تقريبا نفسه..وباقول لكم اللي لاحظته وصححوني ان كان اللي باذكره موجود في WE7..
كالعادة..تبدأ الماستر ليج بفريق ضعيف..وتحاول تجميع النقاط لكي تستطيع شراء لاعبين جدد..وتستمر على نفس المنوال حتى يتكون عندك فريق الاحلام..وكله من تعبك..
اول ملاحظاتي..ان اللاعبين كثاااااار..وفيه حركه حلوه لما تدور لاعبين تشتريهم..اذا اخترت -ترتيب اللاعبين حسب منتخباتهم- بتلاقي منتخبات كثيييييره غير موجوده في قائمة المنتخبات الاصليه وغالبيتها افريقيه..مثل ليبيا والجزائر وغينيا..وليبيريا..وايضا منتخب لبنان.لكن اللي قهرني هو وجود المنتخب الصهيوني اسرائيل :vereymad:..اما سبب وجود هالمنتخبات هنا فقط..هو انك لو تختار المنتخب..ما راح تلقى فيه الا كم من لاعب لا يتعدون عدد اصابع اليد..(الظاهر ان هذولا يلعبون في اوروبا)..حتى ان بعض المنتخبات ما تقدر تختارها..مدري ليه!!..
ثاني شيء لاحظته..هو زياده تعقيد اللعبه..واضافه اكثر من طريقه للحصول على اللاعب..بالاضافه الى طريقه الشراء العاديه (دفع مقدم عقد+راتب شهري)...هناك مبادله اللاعبين..واعارة اللاعب..واخذ اللاعب ببلاش
(هذي تسميتي لها..لكن المقصود منها هو..لما مدة عقد اللاعب مع ناديه تقرب تنتهي..تقدر تفاوض اللاعب للعب في ناديك بدون مقدم عقد..المطلوب منك انك تعرض عليه راتب اعلى من راتبه السابق..وهالطريقة توفر عليك آلاف النقاط)..
ثالث ملاحظاتي وهي اهم واجمل ملاحظه
..وضعت كونامي محرك بحث راااائع في الماستر ليج..ويقوم هذا المحرك بالبحث عن اللاعبين وترتيبهم لك على كيف كيفك
...يعني تقدر تطلب منه يرتب لك الللاعبين من اسرع واحد الى ابطئ واحد..او تطلب منه ترتيب اللاعبين حسب سعرهم في السوق..او حسب قوة ضرب الرأس عندهم..او تقدر تخليه يوضح لك اللاعبين اللي قربت عقودهم تنتهي في نواديهم وبالتالي تقدر تاخذهم بدون مقدم عقد (شرح الطريقه موضع في النقطه السابقه)..باختصار المحرك راااائع واضافه قويه لهذا الجزء (ان كان موجود في الجزء السابق فانا الومكم يا شباب المنتدى لعدم توضيحها)..
افضل اللاعبين
انا كنت ناوي ارتب اللاعبين مثل موضوعي السابق..لكن بما ان كونامي ما قصرت وحطت لنا محرك بحث..باكتب لكم افضل اللاعبين بشكل عام..خصوصا ان طريقه حساب قوة اللاعب تختلف من شخص لآخر (فيه ناس عشان يشوفون اسرع لاعب..يدورون عن الSpeed وبس..وفيه ناس تحسب السرعه والتسارع والاستجابه وغيرها)...
ضربات الرأس..
ما زال اللاعب اليوغسلافي كوفاسيفيتش هو الافضل حسابيا..حيث ان قوة رأسه (96) وقوة قفزه (90)..ويأتي خلفه الفرنسي تريزيغيه بقوة رأس (95) وقفز (91)..والجميل هو تحسين كونامي لقوة كلوزه الالماني لتصبح قوة رأسه (95) وقفزه (90)..وهناك ايضا الانجليزي الن شيرر..والهولندي كلايفرت..
التسديد..
هنا بصراحة احترت..من ناحية قوة التسديد..اقوى اثنين ر.كارلوس واوليسيه بقوة تسديد تبلغ (99)..لكن التسديد يعتمد على اكثر من معيار..ولو حسبناها بشكل نسبي..بيطلع اكثر من لاعب..اولهم واللي اعتقد انه افضل واحد يسدد من كوره متحركه رونالدو..ويأتي بعده..هنري ونيدفيد وراؤول..وايضا ما ننسى شيفشفنكو وفان نيستلروي...
السرعه..
في السرعه..ما فيه نقاش..بأن اسرع لاعب في اللعبه هو لاعب الانتر..النيجيري مارتينز بسرعته البالغه (99)..وتسارعه وتحكمه بالكره كلها فوق ال90..بعده..يجي اكثر من لاعب..ممكن يكون اولهم شيفشينكو اللي نقصوا سرعته من 98 الى (95)..وفيه برضو اللاعب البلجيكي امبينزا..وما ننسى اوين وهنري...ممكن نضيف رونالدو..صحيح ان سرعته ضعيفه مقارنه باللي قبله..لكن باقي المعايير اللي تدعم السرعه عاليه عنده..
الحراس..
في الجزء السابق كان الحارس الالماني -اوليفر كان- هو افضل حارس..لكن في هذا الجزء فيه حارس ثاني..وهو الاخطبوط الايطالي -بوفون-..وتقريبا يأتي بعده تولدو الايطالي..وفيه ايضا ديدا حارس الميلان..وطبعا اوليفر كان ما زال محتفظ بامكانياته..ومستواه جيد..وفيه روستو حارس تركيا..والدعيع حاطينه قوي في هالجزء..وحارس كولمبيا...والله فيه حراس كثيرييين ممتازين..لكن برأيي هؤلاء هم الافضل..
===========================================
هذا اللي عندي الان..لكن مثل ما قلت..الموضوع سيتم تحديثه كل فتره..اتمنى انه يعجبكم..وارجو من الاعضاء التفاعل..