Changes ...

[Trapped Inside]

منحبس جوا يحييكم حميعا .. ويعود اليكم من جديد .. ليقدم لكم كل جديد يطرأ على مخيخه ^_^ ..

ChanGes

اغلبنا بسن المراهقه .. وجرب من الحياة الكثير .. وتعلم منها .. واكيد خلال هذي السنوات .. راح " تتغير " فيك اشياء .. وفي اشياء طبعا راح تكون ثابته فيك ^^ ..

بعضها ايجابي والبعض الاخر سلبي .. بس الاغلب يكون ايجابي .. ( من يبي يتغير للاسوء ؟ >>> الزحيفه " وش يعرفك انت يالدافور " ..

My Changes :


- همممم .. معاملتي للناس .. من اول كنت دايم اتعامل بالهدوء .. والطيبة .. حتى لو ما كنت غلطان ..

الحين تغيرت عن اول .. احاول ابعد عن المشاكل قدر المستطاع .. بس اذا دورها الواحد .. ارد عليه ..

ويمكن حتى لو ما زودها ارد عليه .. اذا كان مزاجي عكر >>> حلوه عكر

.. من اول كنت عكس هذا الشيء تماما .. يمكن من البيئه الي عشت فيها " لعب وتسليه من دون عنف " ..

يمكن التربيه الي تربيت عليها .. ووو الخ ..



- مستواي بالمدرسه .. تحدرت من جد -__- ..

من اول كنت بالموهوبين واخذ الاول على المدرسه ( الكلام هذا بالابتدائيه وبداية المتوسطه ) ..

والحين مافي الا سحبيشن .. والسبب هم الطلاب ..

اعتقد انهم اثروا فيني ( للاسف ) .. وما خلوني اهتم بالدراسه .. غير كذا تحس انك غريب عن البقيه .. ( من رغم انهم هم الي غريبين ) ..

المهم .. ما صرت اذاكر .. الحل واجبات فقط بالفصل .. نسبتي نزلت مره ..

وبصراحه ما توقعت ابدا اني ابسقط بماده بيوم من الايام .. بس سقطت بثلاثة بعد !! ..

استحقها .. >>> خل الهياط ينفعك

بس انا ما انكر ان حياتي المدرسيه صارت احلى بكثير .. يوم صرت غير مبالي ..

بس حياتي صارت معاناة بالبيت -___- ..

ان شاء الله ذي السنه اعوض >>> ما ظنيته ..



- همممم .. بعض من هواياتي .. ما صرت اهتم لها زي اول ..

حبي لمشاهدة الكوره .. كنت مشجع هلالي كبير .. حتى اذا خسر الهلال اصيح .. وكنت مدفعجي ( محب للارسنال ) .. من رغم من انه ما كان يفوز بالبطوله ابدا .. مانشيستر كان دائما نمبر ون -__- ..

والحين بعد ما صرت مهتم .. صاروا فريق رائع .. وفازوا بالطوله المحليه ..

حبي للفديو جيمز .. قل جدا عن اول ( للاسف ) ..

من اول لازم عشر ساعات لعب .. ( كراش وماريو وسوبر ساي يوكر ديلاكس ) ..

هذي كلها .. لها ذكريات حلوه معي .. كنت مدمن ..

الحين اشتري اللعبه العبها مره مرتين .. وارميها .. حتى لو كانت حلوه -___- ..

بس ما زال حبي لننتندو باقي ^^ .. وسيظل ^_^ ..


الرياضه بشكل عام .. وكرة القدم بشكل اخص ..

اول لعب غيير طبيعي .. بالظهر .. اخر الليل .. بعز الحر .. بغزارة الامطار .. ما فرقت .. بس لازم لعب ..

وكنت لاعب وسط رائع .. وصاحب الرجل اليسرى الذهبيه ( اياااااااام ) ..

سبب تركي لها .. بايام المتوسطه ما صرت الاقي احد العب معه .. وادى هذا لبعد عن الكوره .. والحين صراحه اشتقت لها .. عشان كذا تشوفني متحمس باللعب بحصة الرياضه ..


والكثير غيرها من التغيرات .. بس ما زلت المحبوس جوا >>>> يا درامي انت



Some things Never Change

* خجلي -___- .. هذا شكله ماله نيه يضف وجه شوي عني -__- ..

ملاحق وين ما رحت ووين ما جيت .. حتى وانا نايم " باحلامي " يلاحقني ..يمكن خف عن اول ..

بس اذا كنت ودي اسوي شي مع شخص عزيز علي بس ما شفته .. او ما تعرفت عليه بالطبيعه .. استحي مره




* حبي للغه الانجليزيه ^_^ ..

ما زلت وساظل احبها من كل قلبي ^_^ ..

سبب حبي لها .. Disney Channel !! ... المسلسلات حقتهم كانت روعه ( Boy Meets World .. Brotherly Love .. etc ) ..

ان شاء الله يوم من الايام اتقنها ^_^ ..



* كرهي لمجتمعنا المتخلف .. خرابيط الرجوله ..

*برودي -___- .. ما زلت بارد بتصرفاتي .. ودايم اتورط بسبب هذي الصفه الي فيني

في كثير مواقف حصلت بس مالي خلق الحين اكتبها >>>> نصكم متحسف .. اكيد كان ودكم تعرفون مواقفي الفتاكه


الكثير غيرها .. بس ما اتذكرهم الحين ^^ ..

P.S : Changes اغنيه مره حلوه لتوباك .. اسمعوها ^^


Soooo .. What About Ya ?

[ODIN]

بالنسبة لعمر المراهقه تو الناس على كلمة ( تغيرات ) فيه المرحله هذه متقلبه ولا تثبت على شيء معين ...

تلاقي المراهق بالصباح مهايطي راعي حركات نص كم وبالليل راكد ثقيل ... ماله اشياء مستقره الا ما ندر ..



حسب تجربتي ... كنت طول مرحله الثانوي مقتنع بأني شخص فاهم نفسي واعرف وايش الي احبه وايش الي ما احبه ...

لكن كنت غلطان .. ما عرفت نفسي الا بعد الثانوية في الجامعه وتحديدا بمنتصف السنه الاولى .


المشكله من سابع المستحيلات تقنع ولد او بنت بالثانوية بأنهم ما يفهمون انفسهم ولا استقرو على شخصية معينه ... لانهم بسن مراهقه ومستحيل يقتنعون بس وباختصار .!


ومشكور على الموضوع الحلو ننتظر ردود الاعضاء

[Better Days]

هممممممممم...

Boy Meets World

ما كانهم استهلكوه من كثر ما يعيدونه

نصيحتي لك اقرا who moved my cheese?
راح تساعدك كثييييييييييييييييييييييييير

[RPG_master]

اكثر من نقطه ذكرتها حصلت لي, عموماً بالنسبه لي واتوقع الأغلبيه.. التغيير بنفسك راح تلاحظه بأول سنه جامعية..او يمكن الثانيه..

انا حصلت لي تقلبات كثيره باخر سنتين سواء بالمزاج او التفكير او الاهتمامات وغيرها من الأشياء..

بعض التغييرات سلبيه لكن أغلبها ايجابيه ولله الحمد.


واذا تبي تعرف هل فعلاً تغيرت ولا لا..تعال بعد ثلاث سنوات مثلا وابحث عن ردودك اول ما سجلت بالمنتدى..

بتلاحظ انك تغيرت تماماً وبعض الأحيان ما تبلع هالخربطه الي كنت تقولها..بإختصار بتشوف العجب

هالشي ممكن ما يكون يحصل للجميع..فيه ناس من يوم ما عرفتهم وهم نفس الأسلوب

[أفلاطون]

طيب ليش تحصل هالتغيرات؟ واذا حصلت..ليش غالبا تثبت بعد سن المراهقه؟ ليش ما تثبت من السنه السابعه مثلا

هل لأن اسمها سن مراهقه بس؟

[The Noble]

أنا كل فترة أحس ان فيني شي تغير وبالذات السنة ذي تغيرت كثير

طبعا في كثير أمور تغيرت للأحسن بفضل الله ثم من بعض الناس الي حولي

وبعض الأمور صرت سيء فيها اكثر من قبل لكن قليلة الحمد لله


لكن أنا مستقر على وضعي الحالي واحس ببعض الرضا مع وجود حاجات مسببة لي التعب مثل التفكير الدائم بالمستقبل .. والي ممكن يصير لي بعدين

لكن كل شي يهون دام في هدف ممكن احققه ... ودام في ناس تدعمك


شكرا خيو

[Trapped Inside]

ODIN

لا ليش تو الناس ... اكيد راح يتغير فيك شي بسن المراهقه .. يعني بتقولي 15 سنه مثلا وما تغير فيك شي

وطبعا اذا كنت شاب .. راح تتغير فيك اشياء زياده ^^ ..

هممم .. اذا على كذا اخاف اني اكون فاهم نفسي غلط -___- ..

انت احلى خيو ^^ ..



Deadman

-___- .. طيب على الاقل قلي وش صارت لك تغيرات

اي ولله يمكن عادوا المسلسل مية مره .. اعرف واحد دايم يتابعه .. يقول من كثر ما يعيدونه صار يحفظ الترجمه من ظهر قلب

ان شاء الله اقراه ^^ ..



RPG master

ههههههههه فعلا ..

انا الظاهر اني ما تغيرت .. لاني قبل 3 سنوات كنت بالترفيهي .. يعني مهستر زي الحين ..




أفلاطون

-___- ..

ومن قال انها بس بالمراهقه .. انا اقصد اننا حنا اغلبنا فيها .. وحصلت له تغيرات .. بث (ليش تفهمون غلط -_-) ..

وبعدين صعبه الواحد يدرك ان فيه شي تغير بنفسه وهو سبع سنين .. ولا ؟





The Noble

مشكور على الموجز القصير ^^ ..


العفو ^_^ ..


اقول شباب .. اشوف ان محد منكم قال تغيراته بالتحديد ..

انا كان ودي من الموضوع .. انك تقول التغيرات الي حصلت لك .. مو بس شي عمومي ..

ولا كذا الموضوع بيطلع ممل ..


على كل مشكورين على مروركم ^_^ ..

[Angel whisper]

I think that i've actually changed .. on the academic and personal side ..

umm regarding my personality ..
I've actually hanged a lot ..
I'm starting to appreciate myself a lot more ..
I'm trying to be less serious beause my seriousness IRL has made people feel uncomfortable at my presene ..
I grew a bit stronger .. I an easily tell my opinion without backing off for any reason ..
and perfectism .. I seek it all the time ..

academically ..
I became a real hardworker and a straight A person ..

my hobbies didn't really change ..
reading .. video gaming .. watching anime & movies ..
added staring dreamingly to Saitou and Hatori's pics recently to my hobbies though O.o

Interesting thread ..

[rushin_911]

همم لو في شيء لاحظته في نفسي فهو إن في أشياء كثير اهتمامي لها صار أقل بكثير عن أول مثل واجبات و مسؤوليات و نظرة الناس لي إلى آخره...
طبعاً احتمال كبير أتغيّر خلال الكم دقيقة الجايّة و أعطيك رأي ثاني لأنّي لاحظت إن عادة تقلّب الآراء صارت متأصّلة عندي من خلال السنين الماضية يمكن أثار الانهاك و التعب من الثانوي

و مشكور على الموضوع الحلو

[أفلاطون]

أفلاطون

-___- ..

ومن قال انها بس بالمراهقه .. انا اقصد اننا حنا اغلبنا فيها .. وحصلت له تغيرات .. بث (ليش تفهمون غلط -_-) ..

..

معليش..بس انا ما كنت اقصد ارد على نقاط ذكرتها في موضوعك..وانا عارف وش تقصد من الموضوع

انا المقصود من ردي..اني اطرح تساؤلات تتعلق بالموضوع وتثير القدره التحليليه عند الاعضاء واشوف رايهم فيها .يعني زي الراي اللي انت قلته

وبعدين صعبه الواحد يدرك ان فيه شي تغير بنفسه وهو سبع سنين .. ولا ؟

..

يعني اقدر افهم من كلامك ان الثبات في التغيرات يرتبط بإدراك الشخص لها





ومعليش اذا كنت طلعت برا الموضوع

[alex]

كل الناس يتغيرون اذا دخلوا الجامعه ... صعبه تحصل واحد من ايام الثانوي لين تخرج من الجامعه ما تغير فيه شي ...




بس ياخي ... النسريط ما يتغير




صالح ... وش الي قدرة تحليلية وادراك الشخص ومدري ايش .. روقنا -___-

[Lena]

يا واد يا فتاك عالموازيع القميلة ديت =.=

اسمعني يا اخوي اسمع نصيحة اختك الكبيره..اترك الاولا دالخرنبط عنك!! مو معقول تستسلم لمخاواتهم لدرجه انك تسقط بعد؟؟!! اتركهم خل بينكم هاي وباي..بس الا الدراسه والمستقبل...لآلآلآلآ والف لا..
جتني فترة مثلك بغيت اخق..ولكني رجعت لنفسي مباشره وشديت الهمة اكثرمن اول والله شعور يونس انصحك تعيشه..

كرهي لمجتمعنا المتخلف .. خرابيط الرجوله ..

مدري بالنسبه لي صفة..لاتغيرها ..اذا كانت هي الي ببالي طبعا واظني فاهمه قصدك


اوكي انا بكتب تغيراتي بالزبط عشان ما يصير الموضوع ممل ولا يهمك

وش اقول

بالعودة ثلاث سنين ورا..

انا انسانه اخرى تمااااااااااااااااااااما

1. اول كنت اكثر خبالة ومرح زايد وضحك وتنكيت وكنت اسوي جو وصجه في البيت الحين قل هالشي وصرت اثقل شوي ولكن بس شوي ماصرت مرة عاد
2. تغير ايجابي:اول كنت اكثر عصبية وكنت تناقر مع القاصي والداني واتهاوش كثير مع اخواني الحين لا صرت مؤدبة وقلت هواشاتي يعني خلاص كبرنا بأه
3. كنت احب العب اربي جي الحين لي سنتين ماطب ايدي جهاز البلاي ستيشن
4. كنت اكتب مذكراتي والمواقف الي تصير لي بدفتر خاس والحين ما عاد اسوي هالشي للاسف مع انه كان يونسني
5. كنت ماهتم بالجمال وخرابيط البنات اليحن موضوعي الرئيسي الاهتمام بالصحة والجمال الخ
6. كنت معرف النت قبل سنتني او ثلاث
7. كنت معرف الانمي ولا الفوتوشوب والحين اعشقهم@@
8. كنت معرف انقلش كثير ومع النت تطورت واجد الحمدلله
9. تغير سلبي: كنت اعشق اللعب مع البزران وبالي طويل عليهم واعرف لهم مرة الحين فقدت شوي من هالموهبة وصار مالي خلقهم كثير
10. تغير سلبي: كنت اكثر التصاقا باهلي وواصله مع ربعي ولكن هالشي تغير للاسوا للاسف ..احس صار عادي انعزل شوي عن اهلي وقاااااطعة مرة لصديقاتي
11. تغير سلبي: اول كان لي هواية صنع الاشياء والابتكار واسوي هدايا وارسم واسوي حفلات واسوي برامج وافكار ببيتنا..الحين لا..خقت الهمة
12. تغير ايجابي:كنت اكثر غباء ومعرف اتصرف وطيبة زياده عن اللزوم وماعرف اتصرف في المواقف الصعبه مع صديقاتي الحين صارت لي شخصية محبوبة اكثر واعرف اتكلم كلام زين واعرف اعبر وافهم نفسي صح..
13. تغير ايجابي: صرت مرة:icon6: لا بس اقصد صرت افهم كثير ..كنت في ثالث ثانوي عقلي عقلا طفال مفهم الدنيا الحين صرت افهم بالمرأة والرجل والعواطف والمشاكل وهالاشياء..

خلاص قلت قصه حياتي

الزبدة..

احب لينا الحالية اكثر من لينا قبل كم سنة وهذا اهم شي

يعني راضية في المجمل عن تغييراتي ولله الحمد^^

يبغالي اشتغل عالسلبيات بعدين= =

وش رايك في رد بنت الحاسب..تحس اخلاص في التنسيق ههههههههههه

صانكيوو عالموزوع اللزيز اوي اوي خالص(متابعه مسلسلات مصري واجد)

p.s:شهر رمضان جاي حاول تخفف اغاني..بس من باب النصيحه..وحاول تقللها عموما ماقولك ماسمع اغني بس حلو نخفف

[Tidus]

صرت مرة:icon6:

و عنستي :icon6:


ههههههههه عاد فعلا, هو أهم تغير إن الواحد ينضج... و يلتفت للأمور اللي بتهمة أكثر من غيرها و يعقل.

عني و الله التغيرات كثيرة اللي حصلت, كلها بالغالب جايه من باب اني عرفت شقد انا ناقص بالمجالات اللي تخصني و شكثر يبيلي أتعلم زيادة و أخوض فيها أكثر... أشياء كثير غيرها من علاقاتي مع الناس و ارتباطي معهم لكن و لله الحمد الغالب عليها ايجابيات و حيل حيل احسن من قبل ^_____________^

ترابد... محرك المنتدى تراك, شد حيلك

[golden_sky]

مستواي بالمدرسه .. تحدرت من جد -__- ..

من اول كنت بالموهوبين واخذ الاول على المدرسه ( الكلام هذا بالابتدائيه وبداية المتوسطه ) ..

والحين مافي الا سحبيشن .. والسبب هم الطلاب

هذي الله يعينك فيها ^-^

أنا السنة الي راحت دخلت عالم البلوت .. وما فيه إلا سحب على المحاضرات

من الساعة 8 إلى 2

لكن ربك ستر علي .. وما ودي أكررها السنة هذي ^-^

بس انا ما انكر ان حياتي المدرسيه صارت احلى بكثير .. يوم صرت غير مبالي ..

ههههههههه صحيح كنا بنروح فيها لكن أيامها كنت أشعر إني أعيش شبابي

ان شاء الله ذي السنه اعوض >>> ما ظنيته

لا تشيل هم ..
انت شد حيلك وركز على الدراسة ^-^
حتى النت اتركك منه

حبي للفديو جيمز .. قل جدا عن اول

حتى أنا بعد قل .. بس مو بسبب تغير مني !
الألعاب الي في السوق دلخة .!.
ما فيه ألعاب تشدك مثل زمان ..
أنا منتظر ميتل جير وبعدها بأقطع صلتي بيها >_<

Soooo .. What About Ya ?

من كثر التغييرات احس نفسي شخص ثاني
وأعتقد إذا اتوظفت ، في المستقبل أكيد رح تتغيير الشخصية أيضاً ^_^
وبشكل كبير !
خاصة لما تتعرف على العالم الخارجي وتصبح شخص مسؤول

على العموم .. شكراً على الموضوع

[The Noble]

اقول شباب .. اشوف ان محد منكم قال تغيراته بالتحديد ..

ممم

من ناحية التغيرات فهي كثيرة لكن بقولك اهمها


صرت اثق بنفسي أكثر من قبل واثق باللي أسويه

أحب أشرب قهوة عكس قبل

ماعاد شربت الا سفن دايت <<< خايف على روحه

مرتاح لأني عارف وش أبي ومن ناحية اخرى مش مرتاح الا بعد ما أحقق احد اهم أحلامي وهو اني أسعد الي أحبهم×__×

حصلت على شهادة مايكروسوفت +A والحين داخل على CISCO وان شاء الله أحصل على هالشهادة ادعولي

ما بقى كثير واخلص دراستي بالجامعة :icon6:

شريت سيارة من فترة ليست ببعيدة

صرت اخرج من البيت شوي أروح نزهات مطاعم مقاهي عكس قبل ماكنت أتحرك ابدا

صار عندي ثقة ان في ناس ممكن تثق فيهم وتشاركهم مشاكلك وهمومك

جيمز وبلاي ستيشن 2 ماعاد لعبت يمكن ارجع ألعب اذا نزلت ميتل جير 3

ماعاد سمعت أغاني يعني صار نادر جدا جدا والحمد لله وتقدر تقول انعدم هالشي عندي

عرفت ناس زي الجواهر ماشاء الله عليهم تقدر تعتمد عليهم وتثق فيهم ومتفهمينك وبنفس الوقت عرفت ناس اندم لأني شفتهم وتعرفت عليهم بيوم من الأيام

صرت احافظ على الصلاة بالمسجد بوقتها والحمد لله ^__^

السلبيات عاد مب كثيرة

منها اني صرت اصرف كثير هنا وهنا واحيانا على بعض الأمور الغير مهمة كثيرا

ادمنت شي اسمه بيتزا بالفترة الأخيرة

ما عاد لعبت رياضة زي أول صرت اتعب على طول يرحم ايام التمارين السويدية

احس نفسي ساذج مرات وبالذات لما يتعلق الأمر بمعاملتي السابقة مع البعض لكن ان شاء الله اصير واعي أكثر-__-



والصراحة هالسنة هذي بالذات زادت خبرتي بالحياة بمعدل يتفوق على أي سنة اخرى وحاس اني صرت واعي أكثر ولو أن بعض التجارب للحين ما انساها لكن دامني مصر اني أحقق أحلامي وما فقدت الأمل في تحقيقها مهما كان واثق ان في ناس تتمنالي الخير وتنتظر نجاحي وتدعي لي دايما فأنا مرتاح جدا


ممم بس هذي