الهرفي دي باونتي كريسبو.

[Kubaj]

بسم الله والصلاة والسلام على رسول الله.. اما بعد.. يعلن خوباج علي حسن سلوّكة هذا البيان التالي :



1 - بأنه ضاق ذرعاً بالكيان المدعو هرفي.


2 - الموضوع مثبت وذلك لأنه المراقب ولإن الجمهور عاوز كده.. ولإن دارين حدشتي حلوة.


3 - هذا الموضوع برعاية كل من :

سعد خضر



من أكثر الممثلين المهضومين إعلامياً في العالم العربي كله.






داروين.. اعتقد انه ممكن يغير رأيه في النظرية بعد مايشوف هالرسمة.



بســــام.. حبيـــــــــبي.


وأخيراً..



جحا وحماره.... وماسك وردة بعد..


بإسم الله نبدأ.............


مايستفزني حقيقة في هرفي.. هو .. لا لحظة خلني اعيد صياغة الجملة

ما لا يستفزني في هرفي.. هو حقيقة انه ... . اممم.. يمكن الميلك شيك.. بس صار خايس..

يعني كل شي أصبح مصدر استفزاز في هذا الكيان العريق.



شركاء في النجاح.. لمدة خمسة وعشرون عاماً.. اجد نفسي عاجزاً بصراحة..عن التعبير امام مسألة

النجاح هذه .. وياشين اللي يمدح نفسه عيني عينك.

هذي اول نقطة...


ثانياً.. الشعار الجديد والشعار القديم.. وما أدراك مالقديم ..!!




ما نراه يا سادة.. هو همبرجر.. معلق بحلق في اذن الخروف..وسلسلة معلق عليها جرس ذهبي..!

وهي دعوة سافرة لتلقف الثقافة الغربية من أوسع ابوابها.



نجي للتصميم الجديد.. هو بشكل عام ماعليه.. وانا استغربت كيف تطور طاقم المصممين

لهذا المحل الناجح.. لكن اذا عرف السبب على قولتهم.. بطل العجب..



نلاحظ هنا.. مكتوب خمسة وعشرين سنة من النجاح هنا بعد..

على اليمين.. هو الشعار المعروف لسلسلة مطاعم مازار اللي محد يدري عنها.. على الرغم

من تواجدها في اماكن مشهورة.. على سبيل المثال.. طريق الأمير عبدالله بعد هرفي ب 200 متر..

المصمم مسوي عبقري زمانه فسرق الفكرة وحول حرف الM الى هـــ

بتقولون لا لا انت متحامل على المصمم وهرفي مساكين مجرد تشابه وصدفة.. بقول..

معليش.. لكن انا عايشت هالمصمم بالذات لأني كل ما اروح وارجع الجامعة اشوف دعاياتهم..

في حياتي.. ماشفت تصميم زي الأوادم.. برابيس لكل ماتحمله الكلمة من معاني..

ولكي أوثق كلامي بالصور.. نأتي لإعلان لهمبرجر دجاج سبايسي.. يفترض انه يكون حار..



شطة في وسط همبرجر.. ولك يضرب هيك نوع من خيال

اولاً الشطة ام ريال هذي معروفة انها طعم بس.. ميب حارة مثل توباسكو..

ثانياً.. الواحد المفروض يتخيل نفسه وهو يلتهم الهمبرجر.. كيف تحط له قزازة بوسطها !؟

يعني لا تصميم زي الناس ولا افكار ولا حتى خيال زي الأوادم..


والتصميم الثاني.. هو تصميم المراد به تشويق أطفال الخفافيش الظاهر..





تشوفون اللي ماسك حرف الR والله العظيم يوم شفته الكاميرة بغت تطيح..

ايش هذا ؟!!

من الطفل البائس اللي بيطيح ضحية لمثل هالألعاب ؟!

طبعاً .. مافيه حروف يمسكونها غير حروف المطعم.. همف بس.. .


يتبع

[Kubaj]

من ناحية أخرى وقعت سلسلة مطاعم ماكدونالدز ضحية سرقة فكرة الشعار

وللمرة الثانية يحاول المصممون السارقون تضليل العامة بإدخال فكرة ذكية ولكنها

تفشل فشلاً ذريعاً.. المطعم السارق هو .. الأرنب الجائع..



نشاهد هنا الألوان الإعتيادية.. الأحمر والأصفر.. والخط الأبيض..



وهنا.. اذا تجاهلنا وجه الأرنب.. كل شيء يصبح - ماكدونالدز.. اذني الأرنب كأنها حرف الM

والألوان نفسها بالضبط.. ووجه الأرنب اساساً.. يرفع الضغط ولا هوب Funny

والتعابير اللي على وجه فاشلة ولا لها صلة بالجوع بلا على العكس..... خلنا ساكتين بس.


قبل كم يوم طلعت انا واحد الزملاء.. في الصبح للإفطار في كودو.. وتجاذب اطراف الحديث..

نطلع من موضوع المطاعم ونجي لأحسن التصاميم واسماء المحلات اللي شفتها..




لأول وهلة يبدو اسم المطعم خوباجي.. وهنا الحكمة.







تصميم بسيط + عملي + انيق + متناسق = اكيد ماله علاقة بهرفي.. برافو .





ليس كل رسام فنان.. وليس كل كتابة عل الجدران شخابيط بزران..

صاحب هالكتابة يعبر عن تعاسته لشيء فقده.. او شخص.. الله يعينه.



والآن..... تذكرون الموضوع اللي كتبته عن محل ابو ريالين.. والمقهى المسكين

اللي فاتح قبلهم بس فتحوا جنبه واحتلوا كل مواقفه.. بما ان شغلهم كله رخيص المواقف

24 ساعة محتلة من زبائنهم اللي كلهم سواقين.




ايه خاص منيب قايله.. لحد يصدق هالمحلات واللافتات اساساً ممنوع احد يحطها

يعني لو توقف سيارتك وتنام فيها قدام المحل ماله حق يفتح فمه.



مو حرام مقهى لطيف مثل هذا مافيه قدام ولا موقف ؟!



هههه توني انتبه.. كأنهم اخوان Cute


الله يعين راعي المحل بس..


في النهاية.. مانقول وداعاً لكن نقول الى اللقاء ونترككم مع الصورة الأخيرة..



لافتة امام حديقة في الحي.. من يومنا صغار وحنا يالشباب مطرودين من كل مكان..

لاحظوا محاولات الأيدي اليانعة لخدش كلمة - الكرة - .

.. والآن.. فيه سؤال حلو.. كم مرة ذكرت كلمة اساساً في الموضوع ؟!

ثانياً.. كونوا في انتظار المزيد من الصور

[Macho Man]

كبير والله ياخوباج على هالموضوع الاسطوري ..
والله ماشاء الله كل شي في الشارع الا وتكلمت عنــة " الله يقويـك " ..

- هخخخخخخخخخخخخخخ ماشاء الله أجل الموضوع برعاية سعـد خضـر يستاهل خضـر لانة ممثل مهضوم مثل ما قلـت ..

اما بقية الرعاة للموضوع فهـم لايقلون مكانـة عن سعد خضر خصوصا حجـا ..


- بالنسبة لقضية شعار هرفي والتقليــد......


فـ من وجهة نظري اصلا شعار مزار مب بالمستوى المطلوب علشان شركة كبيرة مثل هرفي تقلد شعارهـا اللي اشوفـة انهـا جت صدفــة لان مو معقولة شركة لها 25 سنة :icon6: تقلـد شركـة ماتعدت العشر سنوات او الخمس في السعوديـة او هممممممممممم يمكن المصمم نفســة "شخص واحـد" اللي صمم الشعارين وماعندة أفكار جديدة .


يتبــع

[Macho Man]

- اما بالنسبة لشكل تصاميم الوجبات @


- كل هذا لجعل النااااااس يتسابقون لطلبهــا لان مو معقولـة كل هالأعلانات عن الوجبات او التشيبس مثل برينقلز حقيقــة كلها كذب في كذب خصوصا برينقلز اللي بالنكهـة الحارة ازعجونـا بها في الدعايات قلت خلني اشتريهــا بذوقهــا في النهاية نفس الطعم السابق اما النكهة الحارة اللي مزعجيني فيهــا طلعت خرطي لاحارة ولاهم يحزنون خسارة فلوس على الفاضي ..



- هخخخخخخخخخخخخخخخخخخخخخخ .. بصراحة اعجبتني ملاحظتــك على هالصــورة وما أتـوقـع أيضا انهـم قاصدينهــا ..

- اما شعار ماكدونالدر والارنب الجائــع بصراحـة مدري تقليـد ولا موب تقليــد يعين كل شي مطابق لشعار ماكدونالـدز اذا لم يكن وجهة الارنب موجود كذلـك اسم المطعم ..



- والله العظيم اول ماشفتــة تبادر الى ذهني النيك نيم تبـعـك بصراحـة تشابهة كبير " سبحان الله " .


- الكتابة بالبخاخ هذة ابصم بالعشرة انهـا مب لشخص سعودي هذا شخص اجنبي اشتاق لاحـد في ديرتــة وكتب هالكتابة , وشكلـة ماكتبهــا على طول اعتقـد انة جاب مربــع خشب وفتح فية فتحات وبخ البخاخ داخل هالفتحات , لو هذا شخص سعودي كان انواع الفضيـح وانتوا تدرون .. لاحضوا الفرق بين ماتشاهدونـة من اعمال مجرمي السعوديـة وهذة التحفـة الفنيــة




- احتكار المحلات للمواقف ونسبها لهـــا ياخي شي يقهر وكأن الشارع مل لـهـا !!! خصوصا المطاعــم وياليتها مطاعم كبيرة لا فتحـة وحـدة ومحتكريـن لهم موقــف ياخي شي يقهـر واللي يقهر اكثر اذا لبقت السيارة وجاك حق الطلبات وقالك وخر السيارة ودك تعطية كــف :vereymad: .........

- بصراحة رحمت راعي المقهى والله مسكيـــــن مقهى بهالجمال مافية مواقـف الله يعينــة ..

.. والآن.. فيه سؤال حلو.. كم مرة ذكرت كلمة اساساً في الموضوع ؟!

ما انتبهت بس اعتقـد ولا مـــرة ..



وشكرا على الموضوع التحفتة ويستحق التثبيــت ..
MachoMan

[Alexel]

رد الفعل الاول عند رؤية الموضوع "" الحين ليه الموضوع مثبت ""
لكن الان اتضح السبب استغلال مناصب << ايه يحقلك هم اصحاب المناصب كانوا احسن منك ولا كانو احسن منك خخخخخخخخخ

احلى مافي الموضوع بسام حبيبي وجحا وحماره ماسك الورده
ولا هرفي والارنب الجائع مايستاهلون موضوع خخخخخخخخخخ خل يسنعون وجباتهم اول بعدين يتفرغون للشعار

لأول وهلة يبدو اسم المطعم خوباجي.. وهنا الحكمة.

خخخخخخخخخخخخ فله من وين طحت عليه ذا

.. والآن.. فيه سؤال حلو.. كم مرة ذكرت كلمة اساساً في الموضوع ؟!

اربع داخله جو خخخخخخ

تسلم عالموضوع

[NsaN]

هههههههههههههه..
شكلك شغال تصوير بالكاميرا اليديدة..

ياخي تصدق من كثر ما تييب طاري هرفي خاطري اجربه!!
و الله مادري ليش احس اكلهم حلو (يمكن لاني للحين هب متغدي و ميت يوع -_________-)
هو اي نوع من الوجبات فيه؟؟ يعني شغل هنود (نفس اللي بالعصيرات اللي عندكم) و لا نفس كنتاكي و اخوانه؟؟

و بعدين..



هذا خروف؟؟
انا اشوفه ثور او بقرة

بالنسبة لسرقة الشعارات فهذا شي هب غريب عندنا..و اكبر مثال:





تحس ما شاء الله عندنا خبرة في هالمواضيع..هههههههههههههه..

بعدين دارين موش حلوة
استغفر الله العظيم..اللهم لا شماتة..بس طاع الخشم كيف ياي

[Lena]

ههههههههههههههههه

ههههههههههههههههههه

فن نادرا مايمتع فيه احد مثل خوباج.. الضحك الذي يمزق البطن

انبسط عالفكاهة الي تصير وسط الجد..يعني مب تضحكنا بالغصب.ههههههه حلو حلو



موضوعك يمس بطون الشعب المتفتحة..


بسم الله هههههههههههه كنك انا
امس والله متعشين فيه
وقاعده اعلق نفس التعليق
وجه غبي؟ ؟!!duh?!!

وانصحك لا تذوق هبمرجر اللحم مع المشروم حقه..اقدر اقيمه بنص حلو هالمطعم..
بس الكلوب ساندوتش حقه حلو!


بس هرفي؟
ياخي احب شعارهم الاول اكثر مدري ليه احسه الخروف اكثر براءة وقربا لقلوب الشعب..
بس مدري ليه التورتيلا حقتهم تشفع لهم كل الي يسوونه لذيذه لذيذه يا ناس..



على فكرة
اعجبتين فكرة الموضوع فيري نايس i enjoyed it bery bery much

اعجبني كونك تمشي وتاخذ صور حية للوضع i like such things

برااافوman ..
XD

[Lena]

بسم الله يوم بديت ارد مافيه احد..يوم خلصت عشر قبلي ههههه

انسان:
الحين وين وجه الشبه نفسي افهم؟؟
ومطعم هرفي مطعم وطني ..صاحبه خطيبي السابق الوليد بن طلال..عفته صرحه هالخطيب قليله فلوسه..
واكله مثل مكدونالدز والطقه..همبرجرات وسلطات وسوفت درينكز وفرينش فرايز والخ..

طايحه فيه صراحه..اكل لذيذ + وطني (مب امريكي اهم شي)

[Kubaj]

ههههه خطيبي السابق..

ياكثركم.. علي اختبار مادة ناشبة في حلقي.. - اللي يسمعك يقول Psycholinguisics

خلوها مستورة بس..

انا جيت احط ثلاثة اشياء.. صورتين و مقطع فيديو لدعاية ترفع الضغط..

نبدأ بالدعاية أول شي

http://my.saudi.net.sa/BOX/myfiles/d...ahahahanoo.avi


ناظروا البنت اللي تقول.. Nahahanoo ...

الصورة الأولى.... لمحل يبيع بطاطس مقلية..

يعني انا ما ادري والله.. وين رايح ذوق بعض الناس ؟!





لا تعليق.. لأني لو علقت يمكن انفجر.


وعلى النقيض تماماً..





شوكولا.. ب 12 ريال.. ولو ان الConcept مالنا دخل فيه لكن شكلها رااايق..

مدري احس انه ينشب في الأسنان


برد على الجميع غداً ان شاء الله.. حان وقت النوم..

[Angel whisper]

I don't like .. fast or slow food as we call it here .. totally unhealthy ,,

احم . مقارنات رهيبه ..

بس عيبني مال الـR gone ..

يكسر الخاطر .. نوعا ما

[Mista Koo]

خوباج ما عندك سالفة -_- لا وبعد مميزة

هرفي ومازار مدري مزار المهم ماشوف اي شبه

والألوان نفسهاالضغط ولا هوب Funny بالضبط.. ووجه الأرنب اساساً.. يرفع

بالعكس شكله رهيب ^_^ Retarded
وبعدين مين يقول انهم هم مقلدين مكدونالدز؟؟ يمكن العكس
ترى Hungry Bunny مو سعودي أمريكي ومو جديد جديد بالرياض بس
من أول ما نولدت وأنا آكله بالشرقية

بس مدري ليه التورتيلا حقتهم تشفع لهم كل الي يسوونه لذيذه لذيذه يا ناس..

I Agree ^_^

بس خطيبك الوليد بن طلال @_@ No Comments

وعلى دعاية محل البطاطس Hot & Crispy خوباجو
العبرة مو بالتصميم العبرة بالطعم ^_^ ما تقدر تقول شي 100%

انيوي كمشور على الموضوع

[Rory]

عيل الموضوع برعاية بســام ~

صورة الخروف مال هارفي .. أكيد هذا خروف؟
أشوفها بقرة أنا وإذا هاا ما كانت بقرة نقول ممكن ثور .. بس خروف؟

وراعي الــ R .. gone يحليله والله .. متألم

ومحل البطاطس المقلية ..
ولو إنه يعني الطعم هو المهم بس الصراحة .. من الصورة ما بفكر حتى إني آكله ..



مادري ليش تذكرت دعايات السجاير من ها الصورة ..
تحس كلهم يسوون الخط Italic و ستايل رايق وهادي ..

[Master ArNab]

موضوع وناسه !

موضوعك ذكرني بشيء سويناه العطلة الصيفيه الماضيه .. wardriving ..

بإستخدام الديستروز والتولز الجاليه معها للبحث على الوايرليس نيتوركس مثل سنورت الهوائي وسنارف الهوائي وكسميت وغيرهم ..

طبعاً ما أذينا حد .. بس قعدنا نستهبل على العالم .. وصدقني إذا قلت لك ان الأبواب مشرعة ولقينا مصايب و .. أحسن شيء أسكت بلا ما اورط نفسي ..

[ثريول]

كلت مرة من المطعم المذكور, وهو أحسن من توقعي له.. كلت منه في حفر الباطن الساعة 1 ونص وكنت نايم قبلها ساعتين بمنطلق كوني "عبري" يومها. المهم, رغم الظروف العويصة.. كان جيد.

بس فعلاً, شعاره يدل على إفلاس فكري.. يعني هذا الشعار مايصلح إلا لمحل جزار إيراني من تشوف وجهه تعاف اللحم وتطلع, مابالك بمطعم ينحط من الدرجة المتقدمة. ياخي, كثر ما أشوف مثل هالشعارات البليدة الحمقاء, يزيد عزمي على فتح شركة تصميم وأعمال نيون. للحفاظ على الذائقة المتهالكة, وكلمة الحق أقول أن اليوم أبرك من الأمس, والدليل بوسترات الكرتون القديم .

شكراً خوباج, موضوع شهي للغاية لدرجة أني أكلت نصف الشاشة.

[Electro M]

اجل بديت تحلل الكاميرا

بخصوص هرفي مثل ما ذكروا الاخوان تراك جالس تعلق على بقرة موب خروف الله يرجك
اول شعار لهرفي كان فعلا خروف لكن بعد ما استلمه الوليد خلاه بقرة مسوي يعنني قيادة و مسؤولية جديدة
لكن للاسف خربه
اخبر المطاعم تسبب الاسهال الا هالمطعم يسبب الامساك ؟!

اما الارنب الجائع فهذا دايما اسمع فيه بس ما عمري شفته
اللي اعرفه انه في الشرقية لكن وين الله اعلم