النظرة السلبية

[moon girl]

السلام عليكم ورحمة الله وبركاته
كيف حالكم المهم ابقول لكم موقف صار لي

لما كنت في المدرسه كنت انا وصديقاتي نتمشى قاعدين نسولف المهم ودخلنا في سالفة النت (انا طبعا اللي دخل

في هالسالفه والا هم مايعرفون شيء عنه ) المهم انا قلت ابجيب موضوع التعبير من النت لأني مو فاضيه اطلع

افكار (من زود الشطاره)قالت لي وحده ماشاءالله تتدخلين النت وانا مستغربه من كلامها قالت اهلي لايمكن يدخلوني

النت قلت طيب ليه قالت اصلا هو لأخواني بس البنات ممنوع عليهم علطول يخربون انا فتحت عيوني

المشكله ان الثانيه معها تقول وانا بعد اهلي كذا لو اقدر كان دخلت انا قلت طيب واخوانك غريبه لو انهم بيمنعون

كان امنعوكم كلكم قالت لا اصلا الولد حلال بكيفه

انا من عقب هالسالفه وانا مو مصدقه كذا نظرة بعض الأهالي للبنات يعني البنت تخرب علطول

مو بس على النت حتى بعض الأحيان على التليفون اعرف وحده اذا كلمت تكلم بالسر والا لو دروا اهلها ياويلها منهم

والتلفزيون نفس الحاله صديقتي ممنوع تشوف التلفزيون يقولون تخربين علينا

حتى شكل بعضهم لو يجي البنت خطيب علطول زوجوها يبغون الفكه منها

مع ان اللي اعرفهم كلهم اخلاق ودين غريبه والله

طبعا انا اتكلم عن البعض مو الكل

ابي رايكم في هالسالفه نظرة الاهل للبنات وحرمانهم من أشياء كثيرة اللي تكون حلال في حق الولد وممنوعة عن

البنت طبعا غير النت والتلفون .. بصفة عامة .. يعني مثلاً البنت مالها حق يأخذوا رأيها في أمور كثيرة خاصة بالعائلة ..

ليش ما يكون هناك نظرة سليمة للبنت وإنها تقدر تقدم اشياء مفيده

[Mada Mada Dane]

موضوع حلو

ببساطه السبب يعود لشئ ناقشناه كثيــر , وهو تطبيق بعض العادات والتقاليد المتوارثه >_<



عموما الولد مثل البنت , الولد يخرب ... والبنت تخرب , مافي فرق =_= في نظري

بس ممكن سبب التشدد على البنت ان بعض العوائل يعتقدون انها ممكن تجلب العار لهم , والولد لاخرب لا مايجلب العار بقدر البنت ... ممكن يكون هذا سبب ...

الحل هو انهم ينظرون إلى طريقه التربيه , يربون عدل بدال مايلجأون لأسلوب الحرمان

على كل حال انا بالنسبه لي مافي فرق أبدا , ومثل ماقلت بعض العادات والتقاليد متوارثه ان البنت لازم يسكرون عليها اكثر من الولد ... لا غير , افضل اسلوب التربيه المتعوب عليها بدل اسلوب الحرمان علشان الشخص سواء كان ولد بنت يمشي على طريق مستقيم



وشكرا اختي على الموضوع

[snorlax]

ما راح أزيد عن كلام خالد بس بامكانك مراجعة موضوع "تخلف" لمزيد من الآراء وخاصة التمرجح !

على طاري الغش ونقلك لموضوع التعبير يمكن يعجبك تعليق Angel Whisper !

التعليق على الغش:

ما اقدر اقول انه مبالغ من هالناحيه ..
الطلاب على سبيل المثال عندنا من يوم ما هم صغار متعودين على انه شغلهم كله يكون حفظ وكوبي بيست ..
كم طالب في الثانويه يفكر يكتب بحث بنفسه مثلا؟
الله يخلي النت .. يفتحلك اي ويب سايت وكوبي وبيست والمدرس عادي عنده .. المهم يستلم اوراق البحث ويحط هالدرجات ..
وشوف شو يستوي عليهم يوم يدشون الجامعه .. اللي ماله قدرة على انه يكتب بنفسه يعاني معاناة مب طبيعية بسبب القوانين اللي تخلي عقوبة الغشاش الطرد ..
والاخس انه اساسا الناس ما تعرف شو هو الـ plagiarism ..
وهذا مثال انا اعطيك اياه من خلال دراستي .. اول ما دخلنا الكليه .. الاغلبيه العظمى من البنات ما كانو يدرون انه النقل في الابحاث يعتبر غش او يشوفون انه شي عادي وما في مانع من انه يسوونه .. وتخيل انهم ضاربو المدرسين لانهم يشوفون ان البليجياريزم شي عادي ..
وهيه مجتمعنا ما يشجعنا على انه نحن نفكر بروحنا ونحلل بروحنا .. كم طفل او حتى مراهق بغى يتكلم ويقول رايه واخر شي يا اما انه تسكت او انه تطنش؟
هل في مجال اساسا للقاصرين عندنا انهم يعبرون عن افكارهم وان حد يسمعلهم من الاساس؟ لا!
وطبعا الدراسه الله يخليها كلها حفظ في حفظ .. حق الامتحانات حتى الرياضيات في *علمي* اذكر كنا نستلم كتاب الرياضيات ونحفظه عن غيب وناخذ درجات كامله .. ويوم دخلنا الكليه .. البنات ما يعرفون القسمة .. وهم كانو يحلون تفاضل وتكامل بكل بساطه !!
والمعادلات على قولته حفظ عن غيب بدون فهم .. ولا المدرسة تكتبها عالصبورة خلال الامتحان

وشكرا !

[moon girl]

بس ممكن سبب التشدد على البنت ان بعض العوائل يعتقدون انها ممكن تجلب العار لهم , والولد لاخرب لا مايجلب العار بقدر البنت ... ممكن يكون هذا سبب ...

انا اكره هالنظره من جد تقهر والعادات اللي زي كذا مره تقهر
ومشكور على ردك^_^

على طاري الغش ونقلك لموضوع التعبير يمكن يعجبك تعليق Angel Whisper

طيب لو اقولك ان المعلمه بنفسها تقول اللي عندها تجيب الموضوع من جريده او من الأنترنت مو لازم تكتبه
هذا مافيه غش
اصلا كل معلمات التعبير اللي مروا علي يقولون جيبوه من برا عادي
اصلا كذا مادة التعبير من يوم اني صغيره واحنا كذا
حتى اتذكر لما كنت في اولى ثانوي قالت معلمة علم النفس لنا جيبوا بحث واكتبوا بالأخير المصدر
انا من جد استغربت من كلامك
والله يهديني اذا كنت غلطانه ومشكور على ردك^_^

[ODIN]

هوف ...



تكلمت الى ما زهقت بموضوع ( تخلف ) حق خالد .. ووضحت رأيي بالتناقض هذا ..


باختصار .. تماسيح وضبان اجتمعوا -___- كيف تبينهم ينظرون للحياة ؟


التماسيح في مستنقعاتها .. والضبان في جحورها ..( منغلقين )


تناقض غريب عجيب يعيشونه ..

نظرتهم هذي للبنت تخليها غصب تخرب وتصيع ..



الكبت هذا راح يقنعها بأن غيره عبارة عن صياعه وعهر وانحطاط ..


بحيث انه لما تفتح لها أي فرصه راح تستغلها بطريقة سلبيه تلقائيا بعيده جدا عن معاني البراءة ..



لانها خلاص تعودت كذا وتربت على هذا وصارت قناعه عندها من كثر ما تعيش الواقع هذا ..

(( كبت وحرمان أو صياعه وفساد )) .. مافي شي بالوسط


ودي اتكلم باشياء اكثر عمقا .. بس انها حساسه جدا ما تنطرح بمكان عام .



باختصار انا اشوف واقعنا ما يفرق كثير عن وأد البنات الي كان موجود بالجاهليه .. لكن هنا عندنا وأد من طريقة اخرى ..


وشكرا

[snorlax]

المهم انا قلت ابجيب موضوع التعبير من النت لأني مو فاضيه اطلع
افكار (من زود الشطاره)

ايش الغريب في كلامي
انا اللي خلاني اقتبس تعليق الغش هي هذي العبارة.. بس ما كنت ادري انها هي اللي طالبة من النت أو الجرايد .. غريبة ايش الفايدة من التعبير .. اسلوب مدرستكم هذي يقتل الابتكار عند الطلاب .. اعذريني خرجت عن الموضوع الاصلي ..

وأرجو أن أرى تعليقك على هذي الفتوى "تحريم دخول المرأة على الانترنت بدون محرم" !

[Mada Mada Dane]

ايش الغريب في كلامي
انا اللي خلاني اقتبس تعليق الغش هي هذي العبارة.. بس ما كنت ادري انها هي اللي طالبة من النت أو الجرايد .. غريبة ايش الفايدة من التعبير .. اسلوب مدرستكم هذي يقتل الابتكار عند الطلاب .. اعذريني خرجت عن الموضوع الاصلي ..

وأرجو أن أرى تعليقك على هذي الفتوى "تحريم دخول المرأة على الانترنت بدون محرم" !

سنور من يكون هذا عثمان الخميس =_= , موب صاحي الاخ

يارجال اودن جابها , ضبان و تماسيح , خلوها على ربكم بالفعل الامر مايختلف كثير عن و أد البنات بالجاهليه , الحمدلله على نعمـــه الإسلام و العقــــل

[MeMoirs]

أهلاً ..

للحين في ناس عايشة كذا ..

برأيي انه في هذا الزمن خلاص الفروق بين الولد والبنت راحت ..

وأن المجتمعات الي متمسكة بهذا الرأي لازم تساير المجتمعات الثانية .. لمتى بيصيرون كذا ..

وأرجو أن أرى تعليقك على هذي الفتوى "تحريم دخول المرأة على الانترنت بدون محرم" !

ha ha ha ha ha



To be continue



الأختلاف في الرأي لايفسد في الود قضية ..

[moon girl]

تماسيح وضبان اجتمعوا -___- كيف تبينهم ينظرون للحياة ؟

هههه والله صادق في كلامك
المشكله انا لما يمرون علي ناس كذا يقعدون يقولون لي ((وليس الذكر كالأنثى))
شيء يقهر
ومشكور على ردك^_^

ايش الغريب في كلامي
انا اللي خلاني اقتبس تعليق الغش هي هذي العبارة.. بس ما كنت ادري انها هي اللي طالبة من النت أو الجرايد .. غريبة ايش الفايدة من التعبير .. اسلوب مدرستكم هذي يقتل الابتكار عند الطلاب .. اعذريني خرجت عن الموضوع الاصلي ..

وأرجو أن أرى تعليقك على هذي الفتوى "تحريم دخول المرأة على الانترنت بدون محرم" !

بلاك ماشفت مواضيع التعبير ترفع الضغط
واشين موضوع مر علي النقد الأدبي وانا مااعرف شيء في الأدب ومعلمتنا متساهله معنا مو متشدده
هي تقول اللي عندها معلومات من جريده او اي شيء تجيبها واللي ماعندها تكتب وانا اعلمها الصح فيه
اما عن الفتوى حاولت ادخل مو راضي يدخل محجوب عندي

[moon girl]

سنور من يكون هذا عثمان الخميس =_= , موب صاحي الاخ

يارجال اودن جابها , ضبان و تماسيح , خلوها على ربكم بالفعل الامر مايختلف كثير عن و أد البنات بالجاهليه , الحمدلله على نعمـــه الإسلام و العقــــل

قهر الفتوى ماطلعت عندي كان ودي اشوفها

الأختلاف في الرأي لايفسد في الود قضية ..[/center]

P.S/صحيح لكن اذا كان متعارف عليه ان هذا الرأي خطأ والصديقه ماتبغى الا الخير لصديقتها ^_^ والبعد عن الحرام
واعرفي ان قلبي مايدخله حقد ابدا

على العموم كلامك صحيح انه المفروض مايصير تفرقه ومشكوره على ردك

[snorlax]

هذا نص الفتوى

فتوى الشيخين عثمان الخميس وسعد الغامدي في تحريم الانترنت على المرأة بسبب خبث طويتها ولايجوز لها فتحه إلا بحضور محرم مدرك لعهر المرأة ومكرها، نسأل الله الثبات!


بسم الله الرحمن الرحيم

والحمد لله رب العالمين وبعد،


فإن النساء مخلوقاتٌ كسائر مخلوقات الله، لكن فيهنّ ضعفاً بيّناً وهوى يأخذهن صوب الحرام إن لم تجعل الضوابط الشرعية قائمة في المجتمعات التي يقمن فيهن. وحكم دخول المرأة للإنترنت حرام حرام حرام. ففي هذه الشبكة من مواضع الفتنة ما قد لا تتمكن المرأة بضعف نفسها على مقاومته. ولا يجوز الدخول لها على مواقع الشبكة ما لم يكن برفقتها أحد المحارم الشرعيين ممن يعرفون بواطن النساء ومكرهن وضعفهن أمام الجنس والهوى، كما قد فصّل ذلك فضيلة الشيخ سعد الغامدي في فتوى طويلة مدعومة بالأدلة الشرعية الثابتة.

كتبه/ عثمان الخميس.

[ODIN]

الشيخ عثمان الخميس عالم قدير وله انجازاته على المستوى العالمي في الدعوه ..

غلط اننا ننتقص من حقه او نتلفظ بألفاظ او نسخر بمجرد انه خالف رأينا .. له وجهة نظره واجتهاده ..


لو نتكلم على جماعات بشكل عام ونسميهم ضبان وتماسيح ما قدحنا أحد بعينه قدحنا بالتصرفات ونظرتهم العامه .. بس اننا نذكر شخص باسمه الكامل وننتقص بحقه فهذا مشين ..

هههه والله صادق في كلامك
المشكله انا لما يمرون علي ناس كذا يقعدون يقولون لي ((وليس الذكر كالأنثى))

فيه نقطه لازم اوضحها .. احنا لما نتكلم عن المرأة ما نطالب بالمساواة .. لان المساواة غير منطقيه وغير مقبوله لا شرعا ولا عرفا ..


احنا نتكلم ونطالب بالعدل .. العدل فقط ... فرق بين العدل والمساواة .. المساواة خاصه في قضية المرأة فيها ظلم كبير لها ..

المرأة مخلوق مختلف عن الذكر بتركيبها الانساني وفطرتها .. لها مهام معروفه ومحدده في هذه الحياة مثل ما الرجل له مهام ..

والشرع وضح الامر هذا ... ( وليس الذكر كالأنثى )


لكن ربعنا الله يهديهم اخذوا الآيه هذي بشكل مطاطي .. وجلسوا يستدلون فيها على كيفهم والعياذ بالله ..


وشكرا

[snorlax]

الشيخ عثمان الخميس عالم قدير وله انجازاته على المستوى العالمي في الدعوه ..

غلط اننا ننتقص من حقه او نتلفظ بألفاظ او نسخر بمجرد انه خالف رأينا .. له وجهة نظره واجتهاده ..


لو نتكلم على جماعات بشكل عام ونسميهم ضبان وتماسيح ما قدحنا أحد بعينه قدحنا بالتصرفات ونظرتهم العامه .. بس اننا نذكر شخص باسمه الكامل وننتقص بحقه فهذا مشين ..

صحيح أخوي أودين انا أعترف اني أخطأت في حقه بس حبيت اعرف رأيكم في كلامه .. هو صحيح انه شيخ وانا احترمه لذلك وايضا لعلمه بس ما يزال بشر ممكن يخطئ ..

شكرا

[hussien-11]

أكيد الان و ضح كلامي السابق بموضوع أخي الغالي mada mada dane لما قلت انه نظرة المجتمع للأنثى سلبية و لازم تتغير ، مشكورة أختي و كان الله في عونكم على ما تلاقونه من ظلم ^_^

[moon girl]

حبيت اوضح رأيي من ناحية اختلاف العلماء/
اكيد بيكون هناك اختلاف في رأيي العلماء فالمفروض مانقدح فيهم لو اختلفوا في الأراء او حتى غلطوا
مثل قضية تشقير الحواجب فيه علماء يقولون حلال وفيه من يقول حرام
طبعا مانروح وناخذ فتوى تقول مثلا النمص حلال وهو اصلا محرم لأن هذا شيء متعارف عليه ومبين

ومشكورين جميعكم على الرد ^_^