معدات الغوص الاساسيه

[3mary]

السلام عليكم حبيت ابين لكم معدات الغوص اللى ما يستغنى عنها الغواص في كل غوصه يغوصها .. ولازم تكون متوفره وسليمه .. بدأ من فوق البدايه ..

النضاره .. mask و قصبة الهواء .. snorkl

اول شي النضاره مهم جدا بالنسبه للغواص .. والنوعيه مهمه .. في نضارات بو 25 درهم هذيل ما تنفع للغوص ابدا ..لازم تاخذ نضاره ماركه لان النضارات قوم بوعبود اللى ب 25 ما تتحمل الضغط اللى تحت وترب الماي ويمكن البلاستك اللى قدام ينكسر من الضغط .. فلازم تاخذ وحده عدله وعلى قياسك لا تكون وسيعه تدخل ماي ولا ضيقه تعور لك خشمك وراسدك .. تقريبا الاسعار من 100 و150 لين فوق .. انا خذت مالتي ب 250 اضن

اما قصبه الهواء فهذي نستخدمها اذا كنا فوق على سطح البحر ونتنفس منها الهوا الخرجي عشان ما نخلص هوا السلندر ونحنا بعدنا ما بدينا انغوص ..



ثالث شي ال بي سي دي BCD
اللى مثل جاكيت يكون .. فايدته انه تعلق السلندر وراه وهو اللى يخليك تطفي فوق الماء تعبيه متى بغيت وتفضيه مت ما بغيت من الهوا بواسطه زر التعبئه والتفضيه


وفي انواع وماركات وايد بعد واسعاره تقريبا تبدا من 1500 درهم وفي موديلات واشكال غير ..

ومن الخلف يتركب السلندر .. والسلندرات انواع ..
في سلندر المنيوم .. وفي سلندر استيل ..
شو الفرق في الشكل او كيف تعرف انه هذا استيل او المنيوم ..
الاستيل تكون في قاعده سوده تحت قاعده بلاستيك ويكون ثقيل .. اما الالمونيوم يكون عادي قاعدته مسطحه
هذا الاستيل ..

هذا الالمونيوم .. وانا افضل الامونيوم احسن لان ما يصدي وصيانته اقل من الاستيل وخفيف الوزن نسبيا ..
وقيمته تقريبا 700 درهم اذا بتشتري

وبعد يحتاج الغواص الى حزام الاوزان ..

وبنقوم بشرك مفصل عن حزام الاوزان في موضوع بروحه وكيفيه حساب الوزن المناسب ..
في حزام الاسزان بهذا الشكل .. وفي حزام الاوزان قطع رصاص جنه انتر لوك من الصغار كخخخ .. تشبيه حلو


وبعد في عندنا الريقليتور .. اللى هو منضم الهواء اللى نتنفس منه تحت الماء

تكون القطعه المكدنيه موصله بالسلندر .. ولازم يكون فيها عدد 2 منضم هواء .. رئيسي واحطياطي ..
بعد لازم يكون معاه

البوصله و قيج قياس الهواء والضغط .. وفي نوع ثاني كمبيوتر مثل هذا

بس غالي شويه

وبعد عندنا اللبس .. طبعا في الشتاء لازم يكون لبس طويل وكامل ويكون سميك مثل هذا ..

او للصيف اما انك تلبس شورت عادي او اذا تبي تدلع عمرك تاخذ لك لبس خفيف ونص مثل الصوره


ومن الاشياء المهمه السكينه ايضا .. لوقت الحاجه ..

وفي انواع واسعار بعد .. حسب الرغبع

يتبع

[3mary]

عدنا ..
اذا كنت ملقوف وبتمسك كل شي بتشوفه بيدك .. لازم تلبس

عشان اذا كان في شوك او شي ما يغزك .. بس بعد لا تتليقف وتمسك كل شي .. بس طالع

بعد من الاشياء اللى ما يستغني عنها الغواص اللى هي عزكم الله الجوتي ..

والزعانف

والزعانف انواع واشكال وحجام مختلفه .. وفي منها السريع ومنها العادي .. وفي تيربو بعد
بس غالي كخخخخ

وبعد لازم اتكون لابس ساعه عشان تعرف كم صارلك تحت الماي


وما يضر لو كان عندك ليت صغير حق وقت الحاجه

الا اذا بتغوص بليل فتاخذ كشاف متخصص


تقريبا هذا الاشياء الرئيسيه .. واللى عنده اي سؤال او استفسار او حب يضيف شي يتفضل ..
واذا نسيت شي بكمله ان شاء الله ..

[3mary]

وبعد في شي مهم وايد وبدونه لو كل العده جاهزه وهذا الشي مو موجود يمنعك من الغوص والنزول للبحر .. الا وهو ال اورنق


هذا ينحط حوالين فتحت السلندر اللى تطلع الهوا منها عشان ما يسرب الهوا .. واذا هذا الجزء البسيط ما كان موجود تخترب عليك الغوصه وما تقدر تنزل وقيمتها ما يتعدا الدرهمين ولا 3 دراهم

[88_Shadow]

موضوع جدا جميل وااايد حلو ...


لا يكون نسيت شي ما ذكرته

تسلم على الموضوع مفيد

بالتوفيق والى الأمام

[3mary]

هلا هلا اخوي .. شكرا لمشاركتك ..
هي نسيت اعبي السلندر هوا وساير للغوص كخخخخخخخخخخخخ
لا لا ان شاء الله ما ناسي شي .. هذول الاساسيه طبعا .. في مستلزمات غير بعد مو مهمه وايد
بخبركم اياها عقب ان شاء الله

[Action]

يعطيك الف عافيه اخوي على هذا الموضوع الجيد^^
مشكور وماتقصر^_^
ننتظر المزيد من ابداعاتك*_^

[3mary]

حياك الله اخوي وشكرا لمشاركتك

[Van Google]

=======================================================================

تسلم على الموضوع الحلوة ........ وعلى فكرة هذه وحدة من هواياتي واخذت فيها دورة لمدة اسبوعين من فترة طويلة

ولقيتها ممتعه جدا و اتمنى القى فرصة و امارسها .

=======================================================================