السلام عليكم
قبل أسبوعين على ما أظن فتحت موضوع في قسم المناقشات عن قيادة المرأة. وأنا داري المواضيع الي كذا حساسة بالنسبة للمجتمع ، عشان كذا حطيت في العنوان (خاص لأولوا الألباب والأخلاق فقط).
ما أمداني أسافر وأرجع إلا ولقيت الموضوع مقفل. وليه ؟ عشان في كم واحد ما عجبه رأي الثاني ، وبدل ما يحاول يقنعه قام يهينه بطرق غير مباشرة.
يخوي النقاش مب عشان تتطاقون وتهوشون بعض. هو عبارة عن كل واحد يطرح رايه ويحاول يقنع الثاني بالوسائل (دينية أو منطقية أو إلخ..).
وترا مهب عيب إنك تترك رايك وتقتنع بالراي الثاني. في ناس يحسبون ذا عيب كأنه انهزم في معركة ولا شيء. يا ذكي ، انت لما تقتنع بوجهة نظر الثاني تكون مشيت مع الحق( من وجهة نظرك يعني). لأن في الأصل الواحد يكون يؤمن بشيء ، بعدين بعد النقاش يتمسك برايه أو يقتنع براي الثاني ، وبعد النقاش يصير الراي الثاني رايه هو. مهب عيب ترا.
الي يخش المناقشات ونظامه "أنا دايم صح وغيري دايم خطأ" لا يدخل في الأساس ، لأنك كذا انت محا تستفيد وغيرك بينزعج منك. أنا شعاري في النقاشات هو التاليرأي صواب يحتمل الخطأ ، ورأي غيري خطأ يحتمل الصوابما عندي مشكلة أعدل وجهة نظري ، وش يدريني يمكن أكون غلطان. بس أخش النقاش كأني أنا الي فاهم الدنيا كلها وأنا الصح دايم وغيري خطأ دايم، هذي ما تنفع.
يا عرب يا مسلمين كبروا عقولكم واكبروا. ولا تنقهر لو في واحد ما عجبه رايك، لأنه شيء طبيعي. حنا بشر وشيء طبيعي نختلف. بالله عليك كل الي في بيتك يحبون نفس الي تحبه ويكرهون نفس الي تكرهه ؟ ولا في اختلافات ؟
اذا النقاش كان عبارة عن إثبات نقطة، فيكون نظام "اقنعني أقنعك" ،مب نظام "اذا ما اقتنعت براي بأهينك".
سلام
)..
