يوميات زوجين
أحب أعرفكم بأبطال سلسلة يوميات زوجين أحمد شاب متدين توفى والده وهو فى يوم تقديمه اوراق الترشيح للكليه فى السابعه والعشرين من عمره حاصل على ليسانس حقوق عمل بالمحاماه وكان أول محام يترافع فى جنحة ضرب فى أول يوم تمرين له – بالطبع سأل أحمد المحامى الذى يقوم بتمرينه هل الموكل بالفعل مظلوم – فأكد له الأستاذ انه برئ لذلك قام احمد بالدفاع عنه بحماس مستعينا بما أرشده له المحامى الى أن اكتشف بعد عدة اشهر ان الموكل لم يكن برئ وهنا قام احمد بترك المحاماه وعمل بالتدريس الذى يحبه وسرعان ما بزغ نجمه لثقته بالله وبنفسه ولأخلاقه وشرحه السهل وبالفعل عمل مجموعة وقام بتدريس العلوم واشتهر خلال عام واحد وكثر عمله فى الدروس
مروه فتاه فى الثالثه والعشرين من عمرها توفى والدها وهى صغيره خريجة شريعه وقانون جامعة الأزهر تحفظ القران وتحفظه متدينه مرحه تعمل بتعليم الأطفال وتحفيظ القران
لا اطيل عليكم سنبدأ اليوميات من شهرين قبل الزفاف
فى منزل مروه
يرن احمد الجرس فتفتح له حماته وترحب به وتدخله للصالون وتنادى يا مروه أحمد هنا ترد مروه من داخل حجرتها وهى ترتدى خمارها حاضر يا ماما
تدخل مروه وترحب به وتذهب مامت مروه " حماتى " لتحضير الطعام
يأكل الجميع ويدخل أحمد للصالون وبعده مروه
مروه : تعالى يا أحمد عشان افرجك الحاجات اللى جبتها ولو انى مكنتش عايزاك تشوفها الا لما تروحلك فى العفش
احمد : خلاص يا حبيبى براحتك
مروه : لا مش مهم يلا نشوفها دى التلاجه ايه رايك ؟ ودى الغساله ؟
احمد : جميله يا حبيبى
مروه : انا اخترتها كبيره عشان لو اتجوزت عليا حقطعك واحطك فيها
أحمد : يا شيخه روحى دا إنتى متقدريش تدبحى فرخه
مروه : والله ولا اشوفها بتندبح
أحمد : يبقى أكيد مش حهون عليكى
تدخل حماتى وتقول هو فى ايه فيقولها أحمد ان مروه عايزه تدبحنى وتحطنى فى التلاجه بعد ما تجوز عليها
حماتى : وهى تهون عليك مروه يا حمد عشان تتجوز عليها
أحمد : لا طبعا يا ماما متهونش عليا 000 يعنى اللى هامك انى اتزوج على بنتك ومش مهم تدبحنى وتحطنى فى التلاجه " ده فى سرى طبعاً "
يؤذن المؤذن لصلاة العشاء فيستأذن أحمد ليصلى فى المسجد المجاور
يعود احمد بعد الصلاه كانت مروه قد صلت العشاء فى المنزل
مروه : انا مش فاهمه ايه لازمة طقم الملاعق المدهب اللى فى علبة قطيفة ب 950 جنيه ولا طقومة القهوه والخشاف والكاسات اللى على كل شكل ذى ما نكون حنشرب ويسكى وشمبانيا
أحمد : أنا قلت لمامتك متجيبش الا الضروريات لكن تقولى مش حتخش ناقصها حاجه ولا اقل من حد زى ما يكون سباق فى اللى يجيب اكتر ونقعد نسدد سنين بعد الزواج
مروه : الحاجات عجبتك ؟
أحمد : جميله يا حبى ذوقك جميل قوى بس تعرفى ان ذوقك جميل وراقى فى كل شئ ماعدا شئ واحد
مروه باستغراب : ايه هو يا أحمد ؟
