HB & GB Bot

[Karazhan]

السلام عليكم

حبيت اكتب هذا الموضوع لأني شفت بعض الاعضاء مهتمين في برنامج البوت

ولكن بعض الاخوان فيهم خجل انهم يسألون في القسم هذا وتتم مراسلتي بالخاص , وانا تعبت صراحه من كثر مااتكلم لكل عضو عن البرنامج

حبيت اكتب الموضوع بالقسم لكي يكون شامل والكل يدخل ويشوف الطريقه بدون رسائل خاصه

اول خطوه انك تنزل البرنامج عندك من الموقع honorbuddy.com

وبعدين تشترك فيه ويفضل انك تشترك lifetime عشان تستخدم fly mount

وهذا الاشتراك يكفي ل3 اكاونتات مع بعض وبنفس الوقت

الخطوه الاولى لما تنزل البرنامج وتفتح الضغط عنه راح تشوف ملف البرنامج honorbuddy وعنده رقم release

ادخل على على الملف وراح تشوف داخل ملفات البرنامج , راح تلاحظ بين الملفات 3 ملفات ضروريه واسم الملفات

Plugins

CustomClasses

Default Profiles


هذي اهم ملفات بالبرنامج , الاول اهو الكل بالكل واهو اللي يحرك الشخصيه والبت و الفارم وكل شي

اللي تحت كوستم كلاس اهو عباره عن برمجه كل كلاس , بحركاته والروتيشن اللي يسويه

الثالث اهو برمجه الكويستات والمايننق والهيرب والباتل جراند وغيره من الامور اللي تحب ان البوت يقوم فيها

اول شي ادخل هذا الرابط http://www.thebuddyforum.com/honorbuddy-forum/plugins/free/uncataloged/19003-[plugin-gb2]-gbprofileloader-load-convert-gb-profiles-gb-2-a.html

ونزل منه برمجه خاصه حق بوت التفريم getherbuddy وبعد ماتنزل الملف او البرمجه اخذها وحطها في ملف
Plugins

ثاني شي اذا ما عجبك طريقه الضرب للشخصيه من البرمجه الموجوده في البوت , تقدر تروح هذا الرابط
http://www.thebuddyforum.com/honorbuddy-forum/classes/

وانت تدخل على كلاسك وتنزل البرمجه اللي تعجبك , لكن قبل ماتنزل البرمجه ادخل على CustomClasses وامسح ملف الكلاس مالك اذا كان مثلا mage امسح ملف الميج كله واترك باقي الكلاسات

بعد ماتنزل الملف افتحت الضغط عنه وادخل على الملف الموجود داخل وحاول انك ماتدخل اكثر من اللازم , يعني يمكن تصادف ملف ولما تدخل تشوف ملف ثاني ولما تدخل تشوف البرمجه فيه , انت انسخ الملف الثاني مو الاول وروح لملف اللي تكلمنا عنه بالبدايه اللي اهو CustomClasses وحط في الملف مال الكلاس اللي نسخته ونزلته وطبعا بعد ما تمسح الملف القديم

بعدين تروح الرابط هذا http://www.thebuddyforum.com/gatherbuddy-forum/profiles/


وهذا مخصص حق بوت التفريم او farming لما تدخل الرابط تشوف كاتبين كل المدن وكل لفل وكل هذا عباره عن المدن اللي لها برمجه للmining او herbs او skinning

من هذا الرابط تشوف انت شنو تبي من الفارم , ان كنت لفل 85 ادخل على كاتا ومنها نزل اي برمجه في twilight highlands او غيره من اللي يعجبك وحسب وظيفتك

بعد ماتنزل الملفات او البرمجيات اخذهم و حطهم في ملف Default Profiles وكل برمجه تحطها فيه


الحين وهذي خطوه مهمه لازم تسويها وهي انك لما تدخل على ملف البوت وتشوف الملفات اللي قلتها وتكلمت عنه اضغط يمين كلك و افتح ملف جديد وحطه بملف البرنامج واكتب اسم الملف mesh

لازم تسوي هذا الملف

وانت الحين خلصت من كل شي , الحين دور البرنامج تروح لhonorbuddy.exe وتفتحه بعد ماتفتح اللعبه بالاول

اول خطوه تقوم فيها اهي تروح بالاختيارات فوق لGeneral setting واول مستطيل تشوفه اسمه mesh folder

اضغط على select mesh folder يفتح معاك وادخل على ملف البوت لغايه ماتصول للملف اللي قلتلك اكتبه mesh واختاره واضغط ok عشان يكون بالمستطيل هذا

وتحت مكتوب خيارات مثل الاكل والشراب واسم المونت , كيفك اذا تعبيهم او تحط علامه صح على اختيار المونت اوتوماتيك وغيره , والاكل والشراب البوت من نفسه يبحث عنهم او اذا عندك اكل ماخذه من الميج تقدر تكتبه

تحت تشوف مستطيل اسمه CC Configuration وهذا تقدر تختاره اذا نزلت برمجه خاصه من الموقع للكلاس مالك واللي تكلمنا عنها في بدايه الامر واهي اللي في ملف custom class

واذا مانزلت برمجه عادي اهو البوت مبرمجه للضرب وغيره ولكن برمجه مش حالك

ولاتنسى تحط صح على use mount وتكتب اسم المونت فيه ويفضل اسم fly mount مو مونت ارضي

اما تحت find mount حط صح لأن اذا كانت في باتل جراند يستخدمه مونت ارضي وما يركض برجوله عشان الناس تعرف انك بوت

اخر شي تروح للأختيار اللي اسمه plugins وهذا مهم للفصل بين HB و GB

بعد ماتنزل الملف اللي كتبت اول الموضوع وقلتلك تحطه في ملف plugins تدخل الحين للأختيار هذا

وراح تشوف اسم الملف اللي كتبته او البرمجه , ولا تنسى اسمه GBProfile loader حط الفاره عليه بحث ان يكون مضلل بالازرق

وبعدها شوف على اليمين مربع تحط فيه علامه صح وكتوب عندها enabled

اذا كنت تبي تستخدم البوت للherb و mining وغيرها حط علامه صح عليها وتحت اضغط Recompile all

وبالحاله هذي يكون البرنامج مخصص للتفريم , اذا ماتبي تفريم وتبي تستخدمه للباتل جراند او وظيفه الاثار او كويستات او اي شي ثاني غير التفريم ماعليك الا تشيل الصح وتضغط على الكلمه تحت recompile all وبس

الحين خلصنا كل شي , ونرجع للبدايه , روح للأختيار فوق status واضغط عليها

راح تشوف start , load profile , bot setting

ستارت اهي تبدأ بتشغيل البوت و تحميل البروفايل اهي ترفع البرمجه اللي تبيها و ضبط البوت اهي تعدل في البرمجه

اول شي تدخل على load profile وراح يدخلك على البرمجيات اللي حملتها من الموقع , تختار البرمجه مثلا minig + herbs وتضغط ok والبوت يحملها داخله

بعدين تشوف مستطيل فوق الخيارات هذي وتفتحه تشوف فيه كذا اختيار
combat/heal bot
archaelogy
getherbuddy2

انت اختار getherbuddy2 لأن الخاص بالتفريم

تدخل على الضبط من bot setting وتشوف شنو موجود , لأن كل برمجه لها ضبط معين , ولأن كل صاحب برمجه يسوي برمجه يحط بعض الاختيارات مثل اذا كان herb قريب منه elite مايقرب صوبها ويبحث عن غيرها

او مثلا في كهف وداخله بعض الnod والمكان معقد مايدخل , او اذا كنت تبي mining فقط وماتبي herbs تقدر تعطل الوظيفه وتترك الثانيه وهكذا

بعد ماتعدل هذا كله وتشوف البرمجه وين , يعني مثلا في twilight highlands تاخذ شخصيتك هناك عن طريق البورتال وبعد ماتكون بالمدينه اضغط على start ولازم يكون معاك الفأس عشان تكسر الماينق مو تنسى

بعدها تشوف البوت يشتغل ويفتر يبحث عن الهيرب والماينق

يفضل انك تقط الbag وتشتري bag مخصصه للهيرب والماينق اللي فيهم 36 خانه , حتى لو كان سعر الوحده 500 جولد اشترها لأنك خلال يوم راح تترس الشنط عالاخر وتبيعهم وتكسب اضعاف السعر اللي شريت فيه الشنط


واذا مليت من التفريم روح للأختيار plugins وتشيل الصح منه وبعدين تروح ستاتيوس وتختار archaelogy وتشغل البوت طوالي واهو يطير ويبحث عن المواقع ويحفر
او pvp وتشغله وتدخل bot setting وتختار اي باتل جراند , لك اختيارين فقط , وانا انصحك تدخل AV و IoC لأن لاعبين بالباتل جراند هذا كثيرين وراح تضيع بينهم انت وبوتك

راح تلاحظ في اختيارين للباتل جراند واحد pvp والثاني BG Bot beta وهذا الافضل ولكن في بعض الباتل جراند مايدعمهم بالكامل ولكن يشتغل في كل الباتل جراند

وبالنهايه اقول هذا البوت ممنوع من استخدامه , اذا طاحوا عليك بليزرد باند , وبليزرد مايطيحون عليك الا اذا اشتكى عليك احد اللاعبين , وانت حاول انك ماتحطه في باتل جراند عدد لاعبين 15 عشان ما تنفضح واعلم ان كل الناس يعرفون البوت يعني لاتقول مايدرون على بالهم واحد اول مره يلعب

ثاني شي لا تحط البوت في مكان مثل uldum وتحط برمجه grind وهي عباره عن ذبح , ويقعد يذبح عند اللي يقطون voilte of air ادري غلط الكلمه لكن عارفين قصدي المهم لاتقطه عندهم ويذبح عشان تجمع air او فاير او غيره , لأن في ناس تمر على المكان واذا شافوك يوميا موجود راح يعرفون انك بوت

والانجليز ماعندهم غشمره على طول تبليغ , واغلب الناس اللي تاخذ باند بهذا السبب يكون حاطه في مكان عام والكل يشوفه , طبعا انت راح تشوف بوتات اكثر من قبل لأنهم راح يستخدمون نفس البرمجه اللي تستخدمها

وانا ما اتحمل اي مسؤوليه اتجاه اكاونتك اذا اخذ احلى باند

وشكرا

[Karazhan]

يا اخوان يمكن اكون ناسي شي او كتبت شي غلط

اتمنى يتم التصحيح او التذكير بنقطه انا ناسيها

انا كنت حاب اني اضيف صور لكل خطوه ولكن بصراحه مااعرف الطريقه ههههههههههههههههه

ليش تضحك ؟

[kagoor]

مشكور اخوي ولد بطنها
بصراحه دايم اضافاتك تكون بالصميم

[Karazhan]

ملاحظه مهمه نسيت اقولها

في بعض الاحيان بليزرد تنزل باتش صغير من حيث المساحه او باتش كبير

يمكن راح يوقف البوت عندك ومايشتغل او يشبك حتى , بالحاله هذي ماعليك الا انك تدخل هذا الرابط


http://www.thebuddyforum.com/release...on-thread.html

وتشوف اخر release كم رقمه , اول شي شوف release البوت من خلال الملف , لأنك راح تشوف ملف البوت اسمه honorbuddy وعنده رقم الrelease

بعدها ادخل الرابط وشوف الجديد كم رقمه , اذا نفس رقم اللي عندك يعني معناته اصحاب البوت ما نزلوا الجديد , واذا دخلت وشفت الرقم غير و يكون عاده الرقم زاد عن الرقم اللي عندك مثلا عندك 3433 وشفت اللي بالموقع 3434 يعني هذا الجديد و نزل عشان يماشي الباتش الجديد اللي نزلته بليزرد

قبل ماتسوي اي شي وعشان تحافظ على البرمجيات اللي عندك و ماتنزلها من جديد اهي انك تدخل ملف البوت وتاخذ الملفات التاليه

Plugins

CustomClasses

Default Profiles

وتاخذ ملف mesh بعد احسن لأن داخل هذا الملف خطوط السير اللي كان يمشيها البوت و تكون داخله كل خطوه خطتها الشخصيه مالتك

واذا ما تاخذ الملف مو مشكله ولكن تحتاج انك تسوي ملف جديد داخل برنامج البوت وتخلي اسمه mesh بعدين تدخل البرنامج وتسوي الخطوه اللي قلتها انك تحط ملف ميش في المستطيل

المهم بعد ماتاخذ الملفات هذي حطها في ملف على الديسك توب او حطهم بدون ملف المهم يكونون خارج ملف البرنامج , بعدين امسح البرنامج و كله مع zip و نزل البرنامج الجديد بالسعه الجديده

وبعدين ادخل افتح الضغط وكل شي وادخل ملف البوت وعلى طول امسح ملفات

Plugins

CustomClasses

Default Profiles

بعد ماتمسحهم اخذ الملفات اللي اخذتهم من البوت القديم واللي نفس اسماء الملفات هذي وحطهم بالبوت الجديد

بالحاله هذي تختصر الوقت والمجهود على نفسك

وتفتح البوت وتشوف كل البرمجيات موجوده وتبدأ باللعب

[BoOoOo7a]

"ملاحظة مهمة جداً جداً: بوت الـ Archa في الـ Pirox تم اكتشافه من بليزارد, و استخدامه يسبب Banned بنسبة 100%"


مشكوور عالموضوع ..

لو كان الشرح بالصور .. بيكون الموضوع مرشح انه يتثبت

وترا في شروح بالفيديو على اليوتيوب


وفي شغلة حبيت اوضحها بخصوص البوتات ..

افضل بوتين موجودة حالياً .. اللي هم Honorbuddy (هو نفسه Gatherbuddy) و عندك PiroxBots


وبما اني مشتريهم الأثنين وجربتهم الأثنين ..

--فهذا شرح مفصل بين الأثنين--

اول شيء من ناحية الـ Options والأمان:

الـ PiroxBots متطور جداً .. وفيه Options كثيرة جداً وفيه مميزات ما تخطر على بالك, وقد يكون صعب في الأستخدام (وهذا عيبه الوحيد) ويحتاج معرفة قوية باللغة الأنجليزية علشان تقدر تتعامل معاه.. وايضاً ميزته انه اكثراً اماناً من الـ Honorbuddy, ويمكن انك تخليه لفترات طويلة جداً Online بدون ان يتم ملاحضتك.

اما الـ Honorbuddy ميزته انه سهل جداً جداً بالاستخدام, وممكن اي واحد يقدر يستعمله والـ Options حقته واضحة ومفهومة وقليلة, وفيه ميزة انك اذا اشتريته Lifetime يمديك انت و اثنين من خوياك تستخدمونه بنفس الوقت وكل واحد من جهازه وبدون اي مشاكل ( تحديداً يمكن لـ 3 اشخاص يستخدمون الـ HB بنفس الوقت و 3 اشخاص للـ GB على نفس الحساب حق البوت) اما الـ Pirox لا يمكنك استخدامه على اكثر من جهاز, ولكن يمكنك من تشغيل عدد لا محدود من الأكاونتات على نفس الجهاز وبكل بساطة.


من ناحية الذكاء الأصطناعي:

الـ Pirox يعطيك Options كثيرة ولا تخطر على بالك من ناحية Setup للشخصية, لدرجة انك راح تلاحظ ان البوت يلعب احسن من بعض الأحيان (لوول), مثلاً تقدر تحط ماكرو يشتغل اول مايوصل HP الشخصية لـ 30%, مثال: لو انت Shadow priest ووصلت لـ 30% HP .. راح يدق الحركة اللي تنقص 90% من الدمج, وممكن تحط مكانها ماكرو يسوي لك اكثر من شغلة, وطبعاً تقدر تبدع باشياء كثيــــر .. وفي عندك قسم بالمنتدى حق البوت فيه Setups لكل الكلاسات والـ Specs

اما الـ Honorbuddy ما تقدر تسوي profile بنفسك, لازم تنزله من نفس الموقع حقهم, وكل الـ Setups محدودة .. وطريقة لعبها So Simple وممكن اي احد يقدر يلاحظ انك Bot بكل سهولة ..


من ناحية الأسعار:

الـ Pirox يتوفر على نظام Upgrades والموجود 4 حالياً كالتالي: Basic > Elite > Premium وفي Upgrade خاص للـ Archaeology اسمه Archa
وعندك الثلاث التحديثات الأولى تتطلب انك تطلبها بالترتيب واسعارها كالتالي: (ملاحظة: هاذي اسعار الايف تايم, اللي هي النسخة اللي للأبد)
Basic: 15 euro
Elite: 10 euro
Premium: 50 euro
Archa: 10 euro
المجموع 85 يورو لكــل مميزيات البوت (للأسف مافي وقت اقدر اكتب فيه مميزات كل تحديث, بس اذا تبي PvP وتلفيل, خذ لك اول اثنين, و اذا تبي الـ Gathering خذ لك ثالث واحد, و اذا تبي ارتشلوجي, خذ لك رابع واحد)
السعر بالسعودي لكل التحديثات: 445 ريال

الـ Honorbuddy يتوفر منه 2 باكج (مجموعتين)
الأولى هي لمدة سنة وحدة فقط لبوت الـ PvP والتلفيل والأرتشلوجي, وسعرها 25 يورو = 130 ريال)
والثانية هي للأبد وفيها مميزات اللي فوق بالأضافة الى Gahtering وبالأضافة لميزة استخدم البوت لـ 3 اشخاص اخرين, وسعرها 80 يورو = 420 ريال)


ملاحظة مهمة اخيرة:
نسخ الـ Lifetime بالبوتين فيها ميزة ربط البوت بالجوال وتقدر تتابع كل شي يسويه البوت (طبعاً بس يعرض لك ارقام واحصائيات و Log) ويمديك اخذ لقطة Screen Shot بنفس اللحظة وعرضها عالجوال, و ايضاً وجود ميزة الرد على اي Whisper او حتى تقدر تتكلم بأي شات باللعبة.

وبالنسبة للـ Pirox فقط يمديك تستخدم ميزة الجوال على الأيفون فقط. لانه ينزل كبرنامج.
اما الـ Honorbuddy يمديك تربطه مع اي جوال من الجوالات الجديدة فقط لأن نظامه انك تدخل عالموقع حقهم وتتابع من هناك, لذلك اي جوال فيه متصفح ينفع معك.



هذا كل اللي كان ببالي هاللحظة .. و اتوقع اني ذكرت فقط 60% من مميزات البوتين .. لانه في خرابيط كثيييييرة ومشوار اكتبها ..

وهاذي مواقعهم اذا تبي تقراً بنفسك:
Pirox: http://www.piroxbots.com
HB: http://www.honorbuddy.com
وشكراً

[Karazhan]

انا كل شوي اتذكر شي

على سالفه ملف mesh

اذا اشتغل البوت معاك راح تلاحظ ان يمشي او يقوم بعمله وبعد فتره تشوفه يوقف مكانه من دقيقه الى دقيقتين

انت على بالك فصل او صار فيه شي , ولما تشوف البرنامج راح تشوف تحت اخر شي على اطراف البرنامج كلمه downloading mesh

او انك تشوف الكلام في المساحه اللي تكون نفس الشات بالبرنامج ومكتوب تنزيل ميش

هذا عباره عن بدايه عمل البوت وانه ينزل الميش واهي عباره عن نفس ماتقول خطوط السير بين نقطه ونقطه , يقعد البوت يحسب المسافه والارتفاع والبعد عن النقطه التاليه ومن الامور هذي , بعدين تشوفه يركب المونت ويطير للمكان الثاني

راح تصير اكثر من مره الى ان يتم تخزين kalimdor كلها وبعدين تشوفه يتحرك بدون ما يوقف عشان يحمل , الا اذا مكان جديد , وانا دايم اذا نزلت البوت بالباتش الجديد اخذ معاه ملف mesh عشان مايوقف كل شوي وينزل خطوط السير

وترى مايطول يعني كل حسبه تاخذ 1 او اكثر شوي ومرات قليل تاخذ 5 دقايق اذا كانت المسافه طويله

لأن يحسب المسافه والبياعين في المدينه واماكن تواجد repire <صح الكلمه> ؟ وغيره

لأن اذا تضرر الجير عندك البوت من نفسه يروح يصلح الجير , واذا الشنطه full يروح يبيع ال gray items عشان جذي تشوف ياخذ وقت بتحميل الmesh

ولكن يفضل انك تاخذ ملف الmesh وتحطه بملف البوت الجديد وتضيفه من خلال البرنامج داخل المستطيل

ولكن بالبدايه انت مضطر انك تتحمل التحميل

وانشاءالله مااكون ناسي شي بعد

[Karazhan]

مااعرف احط صور

اذا تعرف حط احسن بعد

[arlund]

ماشاء الله شرح 100%
اقترح ان يتم اضافة الموضوع في الشروحات المميزة او المواضيع اللي تستحق المشاهدة
لي رجعة على الموضوع لما اشتري البوت

[rogur]

شرح وافي الصراحه

[الكيبورد]

معلومات جداَ جديدة و رائعة
سؤال للي جربوا البوت .. كم تطلّع قولد تقريباَ ؟
أكيد على حسب الاكشن هاوس .. بس تقريباَ خلال يوم أو اسبوع أقل شيء كم ؟
مشكورين جداَ على المعلومات الرائعة ( ولد بطنها ) و ( بوحا ) kiss/

[Yoshi]

ولد بطونها فعلا موضوع جميل ويستاهل انو يكون محله في الشروحات المميزهـ .. مشاء الله عليك دائما مبدع انا ماشوف من مشاركاتك الا الفائدهـ دائما
ومساعدتك للأعضاء .. جزاك الله خير ـاخوي وإن شاء الله يردونها لك بالأفراح :P

ايضا الأخ بوحا والحق ينقال .. مداخلتك جدا مفيدهـ وشرحت الخاصيه والفرق بين البوتين .. فعلا شرح وافي وجميل ولو فيه خاصيه الشكر كان شكرتك 5 مرات :P



يعافيكم ربي شباب بكم نرتقى بالمنتدى =3

[BoOoOo7a]

سؤال للي جربوا البوت .. كم تطلّع قولد تقريباَ ؟

يفرق على حسب الشيء اللي راح تسوي له Farm

بالنسبة لي انا ما جربت الـ Gathering للأن .. لأني قاعد البس الألتات PvP حالياً ومافضيت .. ولكن في واحد من الشباب معنا بالقيلد قاعد يسوي Gathering على Herb ويسوي Flasks , Mana potions ولمدة اسبوعين تقريباً .. طلع 100 الف قولد

بس اكيد السيرفر يلعب دور .. لأن السيرفر اللي انا فيه تقريباً يعتبر فاضي ومافيه ناس كثير, ونقلنا فيه لأننا مجموعة شباب نسوي رايدات مع بعض
والفارم فيه سهل مره ..
وغير عن كذا يمديك تحتكر الأكشن هاوس .. يعني مثلاً اذا انت معك 500 فلاسك .. وفي بالأكشن هاوس 150 فلاسك .. تقدر تشتريهم وتحطها بسعر اعلى .. وتعال شوف القولد ! خصوصاً انه سيرفر مو مزحوم وفيه 28 قيلد مسوية بروجرس (يعني مافيه ناس random ابداً وكلهم raiders) عكس سيرفر كازاك اللي 70% من اللي فيه عبارة عن ناس Randoms وتلاقي نصهم يلعب بس علشان يجمع قولد ويبيعه بفلوس .. والنص الثاني منهم عبارة عن REPUBLIC OF CHINA

وشكراً

[Karazhan]

مشكورين ياجماعه ومايحتاج تشكروني ترى ماسويت شي

اما بخصوص الجولد وكم اطلع ، انا عن نفسي عندي 4 شنط 2 للherbs 36 slot و 2 مايننغ 32 slot
كل يوم ادخل اشوفهم تقريبا full والبيع حسب السيرفر لأن يختلف من سيرفر لي سيرفر

ولكن لاتنسى بالherb تاخذ بعد voilate of life وانا ابيع الوحده ب10 جولد ، واطلع كل يوم تقريبا 350 الى 400

غير الماينغ هم تطلع جواهر تبيعهم على 30 جولد

يعني الوظيفه هيرب و ماينغ مو بس محتكره الاحجار والورد ، اما معدل الجولد ماني عارف بالضبط ولكن اطلع واجد

يعني كل مرتين ابيع فيهم بالاكشن هاوس اطلع فوق 10 الاف جولد يعني نقول كل مره 5 الاف

لدرجه اني حاليا وقفت الوظيفه وشغلت الباتل جراند لأني تعبت وانا اجمع جولد و مااستخدمه والمجموع حاليا 100 الف جولد

[Maybach8100]

الله يعطيك العافيه اخوي ولد بطنها + بوحا عز الله ماقصرتو الله يعطيكم العافيه

الله يعين انا عااايش طفره ودي اشم ريحت بوت بس مال امها داعي يجي باند على وجهي ونا خاسر على اللعبه 480 ريال تقريباً

[Karazhan]

مو شرط اكاونتك وانا ما انصحك تشغل البوت على اكاونتك الرئيسي

مثلا اذا عندك احد الشباب اللي تعرفهم و ترك اللعبه واكاونته مايبيه اخذه منه وشغل البوت عليه

او تشتري اكاونت في شخصيه وحده وتاخذه رخيص حتى لو كان لفل 80 يكون ارخص بعد وتشغل عليه البوت

وتشغل البوت عليه على وظيفه archaelogy وخلال 3 ايام بالكثير توصل لفل 85 , بعدها تبدأ بالماينق و الهيرب

وكل ما تجمع الاغراض ترسلهم لشخصيه لفل 1 بأكاونتك الرئيسي ومنها تبيع بالاكشن هاوس

اذا كان هدفك gold فقط ابحث عن لفل 80 وانت وصله 85 بالطريقه اللي قلتها واذا عنده وظيفه امسحها واخذ وظيفه minig + herb او skining اذا سوقه ماشي بالسيرفر , وسخر البوت للشخصيه هذي , تكون مثلا مشتريها ب20 دينار او 30 دينار

وصدقني راح تطلع من وراها ذهب يقدر قيمته ب200 دينار قبل ما تاخذ باند , والباند ما تاخذه الا اذا احد بلغ عنك , وانا ذكرت شلون يبلغون عنك

بس اذا انت تشتغل على الماينقق والهيرب محد راح يبلغ عنك لانك مو ثابت في مكان معين وراح تتنقل من مكان لي مكان بالمدينه بالخريطه كلها

يعني اذا انت تشتري جولد دايم من المواقع هذا البوت راح يوفر عليك , واذا شغلت عليه شخصيه في اكاونت انت ماخذه رخيص ماراح تتحسف عليه

دام انك اخذت حقك منه و ارسلت كل الاغراض بكل يوم الى اكاونتك الرئيسي


ثاني شي اشتراكك بالبوت راح يكون مدى الحياه , يعني لو الاكاونت اللي شريته ب20 دينار وطلعت منه 100 الف جولد اعتبر انك شاريهم من اوف جيمر ولكن اوف جيمر ب20 دينار راح تشتري 30 الف ان ما خاب ظني

وبعدين اخذ اكاونت ثاني ب20 دينار و شغل البوت عليه , وكل باند شوف اكاونت غيره , والبوت راح يظل معاك على طول

لين الله يهديك وتترك اللعبه و تسوي مسابقه بالمنتدى للبيع اشتراك في البوت واللي يفوز تعطيه