ضياع او سرقه حسابك

[Karazhan]

السلام عليكم

اول شي موضوعي للكثير منكم يعتبر عادي , ولكن بعض الاخوان مازالوا يعانون من مشكله السرقه او نسيان بياناتهم في لعبه ووركرافت

حبيت اذكر فقط بأهم النقاط واللي كل واحد لازم يتبعها عشان مايخسر حسابه وبعدين يدخل المنتدى ويطالبنا بأستعاده اكاونته بأي طريقه

اول شي يا اخي الفاضل بالتسجيل وعمل حساب في الباتل نت راح يطلبون منك معلومات

اهم المعلومات

email

first name

last name

secret answer

بالعربي

الايميل

الاسم الاول

الاسم الاخير

والجواب السري

هذي المعلومات لازم تحفظها عن ظهر قلب , واذا كتبت المعلومات هذي روح بجهازك الكمبيوتر وافتح txt واكتب فيه المعلومات

وبالتلفون بعد افتح note واكتب المعلومات

لأن من غير المعلومات هذي او اذا نسيتها انسى تستعيد اكاونتك مره اخرى


بعد ماتسجل بالباتل نت راح تضيف اللعبه فيه , والاضافه عن طريق السيريال للعلبه

بعد ماتضيف السيريال نبمر للأكاونت احفظ الرقم للسيريال واكتبه بالtxt و note مع باقي المعلومات

لأن اذا حبيت تستعيد اكاونتك اذا انسرق او ضاع راح يطلبون منك طريقه وحده من طريقتين

اما الجواب السري واما السيريال نمبر ويكون اول 6 ارقام من السيريال نمبر

اذا قدرت تحفظ 6 ارقام من السيريال راح يكون افضل

وال6 ارقام اما تكون لأول جزء من اللعبه او burning crusade او WotLK او CATA

اي نسخه منهم احفظ رقم السيريال عالاقل


-----

لما تنسى او يتم سرقه حسابك ادخل هذا الرابط

https://eu.battle.net/account/support/password-reset.html

في عده خيارات

اول اختيار اذا نسيت المعلومات الخاصه بالاكاونت

الاختيار الثاني اذا حسابك تم سرقته

الاختيار الثالث اذا كانت حسابك في برنامج الرقم السري Authenticator واخترب او ضاع منك وتبي تعيد الضبط وتلغي البرنامج

الاختيار الرابع انك اخر مره لعبت سنه 2009 والحين ماتقدر تدخل

---


طبعا اذا كنت نسيت البيانات للأكاونت تختار اول اختيار وتكتب الايميل والاسم الاول والاخير والرقم تحت تنسخه

بعدها ينقلك لصفحه فيها اختيارين

اما انك تختار الاول واللي يطلب منك الاجابه عن السؤال السري

او الاختيار الثاني واللي يطلب منك تذكر اول 6 ارقام من السيريال نمبر للعبه

-----

اذا نسيت معلوماتك لا تطلب من احد يرجع لك اكاونتك

لأن انت الشخص الوحيد اللي يعرف المعلومات كلها , يعني لاتروح قسم الاستفسارات وتطلب المساعده

اذا ماعندك المعلومات المهمه , لأن ماكو احد يقدر يسوي شي لك


-----

واذا نسيت الايميل والجواب السري والاسم الاول والسيريال نمبر

انصحك انك تبدأ تشتري لعبه جديده وتسوي كل الخطوات اللي قلتها لك وتبدأ من جديد


-------

الايميل + الاسم الاول والاخير + الجواب السري + السيريال نمبر لأي نسخه من نسخ ووركرافت

بالحاله هذي تقدر تستعيد حسابك بكل سهوله

---------

اتمنى من الاخوه اللي مايهتمون بالامور هذي انهم يبدأون بالاهتمام من الان , لأن بدون هذي المعلومات

لا انا ولا غيري من الاعضاء ولا حتى بليزرد راح يسترجعون لك اكاونتك

احرص عليهم من البدايه واحفظهم في قلبك + txt + note + اذا كتبتهم بالعلبه مالت اللعبه يكون افضل بعد


-------

اسف عالاطاله يااخواني , وانا ادري معلومات قديمه لكن الذكرى تنفع المؤمنين خصوصا اللاعبين الجدد

[usoppu]

الله يعطيك الف عافيه أخوي ولد بطنه على هيك موضوع

والموضوع هذا لازم يتثبت لأهميته للمبتدئين

ويعطيك الف عافيه اخوي

[Yoshi]

موضوع جبار وقسم !

هذي المواضيع ولابلاش تستاهل التقييم + الشكر ’’
والواحد يستفيد منها كثير حتى الشباب اللى لهم فترهـ يلعبون WoW ونسوا كيفيه طريقه إرجاع الأكاونت الحين يعرفون ويذكرون كيف
وانا واحد منهم استفدت منه فشكر لك

وتفضل هذي الوردهـ مني لك



وتراني عازمك ومن يغلي عليك

حياك الله

[Yoshi]

يا شباب اي احد يستفيد من اي موضوع او مشاركه ياليت يقدم شكر لصاحب الموضوع عشان يزيد في العطاء

+ ينقل نسخه مو الموضوع إلى المواضيع المهمه والمثبته

[عروقي بالماي]

ما اتوقعت انك تخرج عن طاعتي وتسمي نفسك ملك اللعبة ......
عالعموم انا استغنيت عنك, ابني مملكتك بنفسك اذا تبي تكون ملك

[Karazhan]

لوووووووووووووووووووووووووووووووووووووووووووووول

اخ بطني بطني

والله من شفتك تقطعت جبدي من الضحك ههههههههههههههههههههههههههههههههه

انا ماطلعت من طاعتك

بس لي متى بضل مندوب يعني

[Karazhan]

مشكورين يااخوان


واحب اضيف شي بعد

ان اللي ينسى او يضيع معلوماته لا يطلب مننا نساعده

لأن بالحاله هذي ماكو مساعده تفيد , يعني احفظ معلوماتك بالاول وبعدين اسألنا عن الطريقه اللي ترجع فيها اكاونتك

[usoppu]

ولد بطنها والله يا انك تاخذن صنف أقوى من حق القذافي

[xman 2]

هلا والله اخوي ولد بطنها ومشكور على الموضوع الجميل

بس حبيت اسال عندي اكونت كنت شارية من خويي من 3سنوات ممكن بس الحين بو الشباب مسافر من سنتين ويوم سألتها على الاكونت قالي انته الشحن يوم بغينه نشحنه طلع حبيبنا ناسي كلمة السر

يوم اتصالنا على بلزارد قاموا يخربطون بعدين قالو لازم الاسم او السيريال نمبر بالعربي راح الاكونت او اذا تعرف طريقة ثانية قل

[Karazhan]

اذا ماعندك المعلومات انسى ترجعه

هذا بأختصار

[Karazhan]

اهو قالك موظف بليزرد لازم الاسم او السيريال

اهو لازم الجواب السري او السيريال , لأن لما تحاول تسترجع اكاونت من الامور اللي لازم تسويها تكتب واحد منهم يا الجواب السري او السيريال

اذا انت ماعندك ولا واحد فيهم ماتقدر تسترجع الاكاونت

[Rshaman]

السلام عليكم


طيب ياخوي انا عندي اكاونت انسرق من شهرين تقريبا وتغير الأيميل حقه حاولت استرجع الأكاونت يطلبون مني ايميل الأكاونت حتى اعمل له استرجاع واكيد انا ماعرف ايميل الي سرقه


.. الحل ؟؟ بارك الله فيكم مع العلم اني اعرف الأسم الاول والاسم الثاني والجواب السري بس لواعرف الأيميل كان رجعته طبعآ ماعرف السيريال .. الأكونت غديم

[Karazhan]

اخي الفاضل لو بيدي شي كان من عيوني

ولكن هذي شروط بليزرد , لأزم كل شي موجود

انا قاعد احاول ابحث عن الطريقه القديمه لأسترجاع الاكاونت المسروق , طريقتهم الجديده مجحفه جدا

لكن كيف تغير الايميل ؟ الايميل مايتغير الا بموافقتك , واذا ما وافقتك مستحيل يتغير

[Rshaman]

لا يالغالي مايلزم موافقتي .. يلزم موافقه الأيميل المنقول له انا بحثت بالبريد عندي ماوصلني اي شيء من بليزارد فقط تم تغيير حسابك من .. الى .. الايميل مشفر .. عالعموم ماتقصر

[Karazhan]

بعض الاشخاص يوصلهم بالبريد رسائل من بليزرد

مكتوب بالرساله بما معناه ان الاكاونت مشتبه فيه او مشكوك بأمره وانك تحاول بيعه او باور لفل

ولأتأكد انك صاحب الاكاونت ادخل على هذا الرابط " ويحطون رابط تحت " واكتب البيانات كامله من اسم الاكاونت والاسم الاول والاخير والباسوورد والسؤال السري والجواب

طبعا لما تدخل على الرابط تشوف موقع بليزرد

اول شي هذي خدعه من الجماعه في الصين

ثاني شي لا تصدق وتدخل اي رابط من هذي الروابط حتى وان كانت صحيحه من بليزرد

ثالث شي ادخل على بليزرد موقعهم الرسمي راح تشوف ايميلاتهم الرسميه ويطلبون منك ان تضيفهم عندك عشان تتأكد ان الرسائل اللي توصلك منهم

رابع شي اذا شفت اي رساله تطلب منك ارقام سريه وغيره امسحها لأن بليزرد ماتحتاج ارقامك السريه عشان تتأكد من الاكاونت

خامس شي اذا حبيت تدخل الرابط المكتوب وتشوف اذا من بليزرد او من اشخاص يحاولون سرقه حسابك , اول خطوه تسويها انك تكتبت ايميل وهمي وباسوورد وهمي واذا دخلت لموقعهم عادي معناه ان موقع وهمي لسرقه الاكاونتات

يعني مثلا انت اكاونت q11111@hotmail.com

والباسوورد 1234567890

اذا تبي تتأكد اذا الموقع رسمي او نصب وسرقه , ادخل الرابط واذا دخلت صفحه تطلب منك كتابه الاسم والباسوورد اكتب التالي

r222222@hotmail.com

والباسوورد اكتب 09090909

اذا دخلت الموقع يعني نصابين , لأن بعض الناس يكتوب الاسم والباسوورد صحيح ويدخلون مايشوفون شي اللهم الا خلفيات بليزرد , يعتقد الشخص ان السيرفر داون او شي ومافتحت الصفحه

ومن ثم يتركهم وينسى

اصحاب الموقع المزيف توصلهم كل البيانات التي تم ادخاالها , ويبدأون بالدخول اكاونت اكاونت , منهم الصحيح ومنهم اللي غير صحيح و حاول يكتشف ان كان موقع رسمي او موقع احتيال

وبعد ما يطلعون ب100 اكاونت صحيح يبدأون بتغيير الباسوورد وسرقه جميع الاغراض بالاكاونت , واذا اصبح الاكاونتات عندهم فتره طويله بدون ما يسترجع اكاونت المغدور به يعرفون ان صاحب الاكاونت ماعنده البيانات لأكاونته

ومن ثم يستخدمون الاكاونت لأغراض ثانيه , مثل يشغلون عليه بوت يجمع gold ويبوعونهم عالناس

او انهم يمسحون الشخصيات منه ويتركون صاحبه يعاني مع بليزرد عشان يرجع كل شي بالاكاونت

والمصيبه لما موقع من المواقع يطلب من الناس كتابته الايميل والباسورد , او ان الشخص يخلي الباسوورد لأكاونته نفس باسوورد الايميل

بالحاله هذي السارق يدخل موقع بليزرد ويغير الباسوورد والايميل , ومن ثم يدخل الى بريدك ويشوف رساله من بليزرد طلب تغيير الايميل , يضغط موافق ويحول الايميل الى ايميله الخاص ويعطيك بومبه

لازم الاكاونت يكون الباسوورد ماله غير باسوورد الايميل , ويفضل انك تستخدم برنامج تغيير الرقم السري authenticator

اذا عندك iphone تنزل البرنامج مجانا وتستخدمه , و الحلو بالبرنامج انك ما تخاف لو تخلي رقمك السري 4 حروف او حتى حرف واحد اذا سمح لأن مطلوب من اللي يحاول يدخل اكاونت ان يكتب الرقم هذا واذا ماكتبه مايقدر يدخل

غير ان الرقم مايقدر يكتشفه اللي يحاول يسرق اكاونت لأن كل 10 ثواني يتغير الرقم اوتوماتيك , يعني مستحيل يقدر يكشف الرقم , وحتى لو يدخل موقع بليزرد عشان يغير باسووردك او الايميل

راح يطلبون منه بليزرد ان يكتب الرقم السري للبرنامج , يعني مايقدر يدخل اللعبه ولا يقدر يدخل الموقع

من هنا تقدر تحفظ اكاونتك وحسابك في موقع بليزرد من جميع النصابين , وحتى لو تدخل عليهم وتقولهم باسوورد مايقدرون يدخلون حسابك لأن لازم الرقم السري الخاص بالجهاز واللي يتغير كل 10 ثواني

اتمنى الاهتمام بحساباتكم عشان ماتبتلشون بالنصابين

بليزرد صارت شديده بأسترجاع الاكاونتات , مو مثل قبل بسهوله ترجعه , الحين ماعندك الايميل ولا الاسم الاول ولا الاخير ولا الجواب السري ماتقدر تسوي شي

وانا بحاول اكتشف من موقعهم العنوان القديم اللي كنت استرجع منه الاكاونتات بسهوله , لكن اظن تم الغائه

موفقين جميعا