يلا انا بروح للدوام لكن قلت اعطيك هدية قبل لا امشي
تفضل عزيزي كرزان جاوب على مهل
1- كنت بمكان عام واضطريت تدخل دورة مياه ولما رحت للحمام لقيته مصكر بس مافي صوت .. هل تطق الباب ولا تنطر؟
اطق الباب
2- طق احد عليك باب الحمام .. هل تسكت إلين يروح ولا اتنحنح ولا تقول منوووووو ؟؟
اتنحنح
3- اول ما تقوم من النوم شنو تاكل او تشرب على الريق؟ أغلب المصبنة زقارة
زقاره واضبط قهوه , عندي بالصاله جوله صغيره و ابريق مال القهوه وسكر وقهوه مضبط الشغل يعني
4- شنو خلفية تلفونك؟ جيتي77 ولا وحدة منقبة؟
خلفيه من الجهاز موجوده
5- واحد نام عليك بالشارع شلون تتصرف؟ تعلق ع الهرن عشان يكسر السكان 180 درجة ويدعم؟ ولا شنو بالضبط
اطنش احاول اوخر عنه بس ماادق هرن
6- هل انت شخص لك روتين دائم؟ وماهو؟
ماعندي روتين معين , قاعد بالبيت واللي يدق علي يبيني اروح معاه مشوار او مكان معين اروح , يعني حسب اللي يدق علي او اللي معاي
7- تحب تقرا الجرايد؟ ولا صفحات معينة؟ ولا كلش ما تقرا؟
اقرأ جرايد بس مو بالتفاصيل يعني عناوين واللي يهمني من عنوانه اقرأه
8- هل تشربون الماي بقلاص بالبيت بقلاص معدن ولا كالعادة جبن جبن جبن
لا كله جبن , وشفيك انت على قلاصات الجبن بفهم
9- عندك حساسية ما تشرب بعد أحد من نفس القلاص بدون لا تغسله؟
مع الاسيويين اي اغسله
10- اذا كنت مقحط زقاير ورفيجك يدخن وهذي آخرة زقارة اب باكيته تقوله قطلي باجي؟ يعني لا تخلص الزقارة خل شوي لي
اعرق باجيك في كويتي شرير مايعرفها , لا مااقوله وانا عاده كل ماينزل معاشي اروح مركز سلطان اشتري 5 كروز , واحد بالسياره و 4 بالبيت , اللي بالسياره ما اخذ منه الا اذا كنت طالع و مو قريب من البيت يعني احاول اخلي اللي بالسياره اخر واحد يخلص , من ناحيه الزقاير تطمن حاسب حسابي التقحيط
11- هل تسمع أغاني المصبنة؟ الي تجيك أغنية مشوشة وعود سريع وصوت مو حلو وما تفهم اي كلمة؟
قصدك فهد بن سعيد شريط مسرع , لا مااسمع , مع اني احب الاغاني اللي يكون التسجيل في هوى و تحس اللي يغني مثل عبادي انت تعرف صوت عبادي , لكن بالتسجيل تحس صوته صاير صغير بالعمر , احب هالاشرطه وانا مااسمع الا عبادي واي واحد يسب عبادي اتهاوش معاه
12- هل طبعك اذا رحت محل تكون جاد تسأل عن حاجتك وتمشي؟ ولا تدش تقول ها صديق شلونك؟ تيقا؟ جذي يعني
لا اسأل عن اللي ابيه وامشي مااحب استملغ
13- هل تلبس دشاديش مخصرة ولا وسيعة؟
عاديه بالنص يعني
14- نظامك تلبس شماغ طويل؟ يعني اتمشى والشماغ واصل لي ركبتك؟ ولا تلبس صغير مقاس ولادي؟
انا طويل والبس مقاسات اشوفها عاديه , يعني لغايه ركبتي لا , ولا ولادي , يعني مثل ماتقول البس الشي المناسب على طولي
15- ليش شريت التاهو؟ ليش مو يوكن؟
اليوكن عيوبه الكهربائيه كثيره , يعني عندي ناس عندهم يوكن يشتكون من الكهربا والتاهو مااشوف احد يشتكي الا قليل , والشكل عندي التاهو احلى
16- شنو سيارتك قبل التاهو؟
استخدمت سيدرك بس مو لي , واللي لي قبل التاهو برادو ماخذه سنه 2003 بسنته اخذته يعني , وقبله بي ام 540 وقبله فورد ماركيز وقبله كمارو موديل 94
17- هل كنت اتمشى أيام قبل ولما تشوف فطفوط تغطط؟ يعني تحطه N وتدعسله بانزين
عالبرادو يعني الله يهداك اسألتك من وين تطلعها , كنت بس تكنت والسياره جير عادي شنو N وفطفوطه مو فطفوط
18- كنت بمكان عام وقاعد تاكل وجنبك واحد يطالعك ونفسه بالأكل الي تاكله .. شتسوي؟
اقوله تفضل زايد الاكل
19- اذا دخلت سينما لازم تاكل بوب كورن وببسي ولا ما يحتاج؟
خبري بالسينما ايام كانت ب750 بس مادري متى ولكن بالتسعينات اخر مره رحت , وبتايلند سنه 2001 دخلت اخر مره , وكنت اخذ معاي نفيش وبيبسي ونشرب زقاير و واحد يبرجك لنا
20- هل انت من شلة الهاي الهاي الي دايم يشربون قهوة من ستاربكس؟
انا اذكر من كان عمري 6 سنين وانا كل صبح اروح ستار بكس اشرب قهوه واقرأ الجريده لغايه ماتخلص قهوتي ارجع البيت , ياعمري انا انسان بسيط ولا احب الفخفخه , هاي هاي عشان قهوه معقوله في ناس جذي او انت تألف من عندك
21- كنت بمواقف الجمعية ناطر واحد يطلع بتاخذ مصفطه وطاق اشارة .. شوي ويجي واحد يزرق ويدش بالمصفط.. شتسوي؟
اقوله ك. ام. وامشي واترجى انه يلحقني عشان يتهاوش بس اغلبهم يسوي روحه مايسمع
22- نظامك بالشتاء تلبس قميص تحت الدشداشة؟ يعني كشخة
لا مو يعني كشخه سويتها مره وابتلشت حسيت نفسي محامي واذا بتفصخ عباله فلت حبيبي افندي رادو ابرك من القمصات والخرابيط
23- شنو نوع عقالك؟ يلمع مثل السعوديين ولا لبتن مثل القطريين؟ ولا الصوف الي تحسه منتف؟
عادي مااعرف بالانواع لكن عادي اللي يلبسه كل مواطن كويتي شريف
24- تلبس سراويل الصفاة؟ ولا نظامك كشخة دروش؟
دروش لأنهم بالغسيل مايتغير لونهم
25- هل تمشط بالمشط الصغير ابو اصبعين ولا نظامك ذرب مشط كشخة؟
مشطي اللي دائري مادري شلون اوصفلك اياه , اللي يستخدمونه اذا بتسوي ستشوار لشعرك
26- شنو نسفتك الي دايم تنسفها؟
كل شي وين مااقطها اقطها مو مهم عندي
27- اذا قاعد بمكان وانقطت نغزات عليك تسوي روحك غشيم ولا ترد عليهم؟
على حسب اذا مااعرفهم اسوي روحي يعني صقعه وجامعي مااعرف السوالف هذي واذا اعرفهم اشخط فيهم
28- غولة دشداشتك زرار واحد ولا زرارين؟ ولا عشر؟
زرارين بس حجمها عادي مو كبير
29- جم طفل بريئ دمرت حياته؟
لاتعليق
30- هل نظامك تخش عجرة تحت الكشن؟
قبل الحين كلاشنكوف , انت صاحي بذمتك انت صاحي على هالسؤال واللي فوقه ؟
31- نظامك مصبنجي مطيح خشم التاهو وحاطله ويلس طول الشبة وخيزرانة ع الطبلون؟
لا يبا شد بلاده
32- شنو تخش داخل تكاية السيارة؟
علك وزقاير و شحن تلفون
33- جم رقم لوحة سيارتك؟ وشنو لون التاهو؟ عشان اذا شفتك صدفة بالشارع اتحرش فيك
49000 لونه اسود
صج رقمي ذرب ها
34- اذا دخلت المسجد بتصلي ولقيت الناس خالصين ودخل واحد بعد .. تبون تصلون مع بعض، تصير انت الإمام ولا هو؟ فرضاً واحد يشبهك
اشوفه بالاول اقدمه اذا قالي روح انت اروح
35- هل جسمك فيه جروح وآثار لهوشات قديمة؟
راسي فيه كم فلعه بطل و عجره وجبهتي فيها ضربه رنغ مادري اذا راحت او لأ , ورجلي فيها حرق قزوز سيكل بس بدأ يصغر صار تقريبا 2 الى 3 سم وعرضه نص سم
36- بواو اذا كنت بدنجن وواحد كتب شي بالعربي؟ هل تستانس وتبين له ان انت بعد عربي؟ ولا تطنش
اطنش , وساعات يعني اذا خلصنا وقبل اطلع اقول كلمه عربيه واطلع
37- هل تستخدم اسماء عربية بواو لتبين للعربيين انك عربي؟
اسامي خرابيط مثل lkjhgfdsazxcv جذي يعني
38- جم ساعة تلعب واو باليوم؟
قبل ليل نهار ويعطلني النوم بس , الحين بوت و مادري عنه
39- اذا كنت ليدر هل تطرد واحد من القروب عشان تدخل رفيجك؟
مستحيل
40- هل انت تشاينيز؟ يعني كل شغلك بواو تجمع قولد؟
بعد الكاتا اي
41- هل تهتم بالـ Achievements بواو ؟
لا
42- تحرص على تجميع الماونتات؟ البتات؟
لا نهائيا
43- ودك الناس تهد واو وتلعب قلد وار؟
ودي لمصلحتهم وله انا ماراح يدخل جيبي شي
44- وقت النوم تنام بمكسر ولا لازم دشداشة نوم او بدلة نوم؟
لا انام بشي خفيف بوكستر يكون واسع شوي مثلك عارف
45- هل اذا مليت تروح تفتح الثلاجة تطل فيها؟
مرات تصير فيني
46- هل ثلاجة البيت دائماً عامرة ماشاء الله ولا فاضية؟
كل نزله معاش تكون عامره وبنص الشهر تصفر , احنا مو مثلك داخل السور اللي الثلاجه بسم الله ماشاءالله عامره طول الشهر
47- تحب قعدة الشيبان ولا الرياجيل الي بالأربعين ولا الشباب الصغار تقريباً 25؟
الشياب افضل بس مايكونون شياب جذابين وكل واحد يجذب عشان تتحطم فيه وتقول هذا قبل كان عنتر , احب شياب اللي عندهم علم بأمور الدنيا وانا مثل ماقلتلك احب التاريخ واسمع التاريخ خصوصا ان الشياب عندهم علم ما تسجل بالورق
48- هل طبعك اذا حطيت المنبه للدوام تحطه قبل موعده بنص ساعة عشان تتمتع بالنوم مرة ثانية؟
ياليت عندي دوام شوفني مجابلك ولما اخص بروح انام , وخل الدوام للجامعيين اللي ضيع عمره دراسه وبعدين يضيعها وظيفه واذا صك عمره 70 قال انا شنو سويت بدنيتي شنو استفدت منها ؟
49- هل انت شخص دايم تاخذ احتياطاتك ولا ما تبالغ بالأشياء هذي؟
مثلاً صارلك بنجر وبدلت التاير.. تروح دايركت للصناعية تجيب تاير ولا تأجل الموضوع يوم يومين
ومثلاً واحد خذا منك جيك هل تحرص انه اول ما يخلص منه يجيبه ولا عادي تدق عليه بعد جم يوم؟
عادي لكن حسب التواير اذا جديده ومافيهم شي اطنش ولكن اذا واحد مرقع 100 مره والثاني صعرورتين فيه لا ابدل اول بأول
50- حاط تغييم على سيارتك ولا باقات؟
تغييم المصنع حراري اسود بالليل وبالنهار تشوف بس ماتشوف الملامح , حتى يوم اسوي الدفتر ماكلمونا عليه يا انه اللي شريت منه واسطه او ان من المصنع طالع جذي ومافيه مشاكل , لأن اهو اظن تغييم حراري بعد اللي عليه , اما الباقات ماعليه شي اللهم الا بركب اسطابات بمعاش شهر 7 ان شاء الله
51- هل اذا شفت راعي برد / بريد يبيع ع الدوار توقف تشتري؟
برد بريد 
يعني انت تقطها باللهجتين الحضريه والبدويه لا مااصفط الا اذا طالع من مراجعه و الدنيا حر يمكن اصفط اشتري , يعني مو اكيد
52- تشتري من الي يبيعون حب شمسي وبنك وترمس ( فصفص ) ولا ما تحبهم؟
مرات اي ومرات لأ حسب الخاطر
53- اذا رحت تتقضى للجمعية جم يطلع حسابك تقريباً؟
للبيت تقريبا 60 الى 70
54- هل انت من شلة مشروبات الطاقة؟ رد بول؟ هاوس بور؟
اشرب مرات قليله لأن جذابين سعره اغلى من البيبسي ومايعطيك جوانح وهذا غش تجاري ترى , يعني تشتكي عليهم تربح القضيه
55- أي لبن تشرب؟ مراعي؟ نادك؟ كي دي دي؟ خاثر؟
لبن اب . او اللي فيه نعناع , واخوي مدمن لبن ويسويه بنفسه بالبيت ويحط نعناع , يعني اشرب محلي الصنع اكثر شي
56- اذا كنت مقحط زقاير ولقيت هندي يشرب قود ليف ميبس طاقته الشمس 5 ايام تاخذ منه زقارة ولا اتحمل؟
اخذ ليش لأ بس ليته يندي ويعطيني زقاره
57- هل تمنيت انك جميل وحلو؟ ولا تقول الحمدلله اني جيكر عشان لا يجوني العرابجة
انا جميل ولله الحمد , يعني هذا اللي اسمعه من الناس , ولكن بمعنى ثاني مافيني عيب , وانا ابو العرابجه ليش اخاف منهم , عندي ربعي مشطبين على الكل
58- لو تلقى يوشي يتمشى بالشارع لحاله يعني ماعنده احد يدافع عنه شنو تسويله؟
اخطفه و اوديه جواخير جبد
59- هل انت راعي طيور؟ يعني من ربع يا فلاح يا فلاح اييييييييييه
ربعي جذي انا لأ , يعني المحيطين فيني فيهم نفس الطقه لكن انا مااهتم للهوايه اللي كل من يبي يصير رجال شرى طير وقط وجهه بالدواوين يعني شوفوني صقار
60- هل انت مطيرجي؟ يعني حاط لك قفص حمام فوق السطح وكل يوم الظهر تطيره
كنت راعي باكستاني اللي ينجم بالسما و تركت وصرت راعي زاجل وتركب وصرت راعي ووركرافت
61- تحب تطعس يعني تدش بالتغاريز؟
بالبرادو كنت اسويها بس خفيف مو نفس عربجيه السعوديه
62- هل تلبس خاتم؟
اي البس خاتم بأصبعي اليسار مو اخر واحد اللي قبله , عشان تعرفني مره وحده من خاتمي بعد
63- لك طلعات مزارع؟ جواخير؟ اصطبلات؟ ولا كلش مالك فيها؟
اروح المزارع الوفره او العبدلي
64- هل جربت تشتري من مزاد مثل مزاد جبد ولا مزاد الفودري؟ وشنو كان شعورك وقتها؟
شريت بمزاد جبد زاجل 12 طير يمكن , وشريت من مزاد بفنيطيس قبل ما تتثمن بلبل عراقي , شعوري مثل شعور اي مواطن كويتي يقط فلوسه على وناسته
65- هل تهتم بالأرقام الذهبية؟ يعني يكون بداية رقمك مثلاً 5555
اي انا رقمي 94949 بدايته
66- في مرة تهاوشت مع شركة الاتصالات وشنو كان السبب؟
لما بشيل خدمه منهم يقولون لك دقايق مجانا تدفع 23 بالشهر ومكالماتك من 12 بالليل الى 12 الظهر مجانا ومادري شنو , كانت فواتيري قبل الخدمه 50 دينار وبعد الخدمه 120 دينار جان اروح اشخط فيهم واكنسل الخدمه قالوا لازم سنه تكون مشترك بعدين تقدر تكنسلها قلت سنه مااقعد ياعمري كنسليها الحين وكنسلوها
67- شنو السبب الي خلاك تكمل بموقع منتدى رغم التوقيفات الي اخذتها؟
لأني شفت ان اغلب اللي كانوا يوقفون معاي الاعضاء البسيطين واللي دايم اكون مساعدهم بالاستفسارات , ولما اتوقف ارجع عشانهم لأن محد يعطيهم وجه ويرد عليهم
68- هل نظامكم بالبر تحطون علبة نيدو مصدية على الفحم ولا عندك أساليب متطورة؟
لا نفس النظام بس ماتغير
69- انت من كتلة المعارضة ولا مع الأعضاء القبيضة؟
مالي بالسياسه والله
70- لو ماكنت كويتي شنو تتمنى تكون؟
كندي واعيش بكوخ هناك واربي غنم ونياق , علف وماي ابلاش من الطبيعه غصن عليك تصير راعي حلال لو مالك بالطريق هذا
باي
المشاركة الأصلية كتبت بواسطة xmoonkinx
يالله يالله كارازان بسرعه جاوب تراه فيه ناس صافيين طابور << خخخخخخخخ
